NUSƆSRƆ̃ 49
Nu Kae Ana Dzidzɔ Nanɔ Wò Ƒomea Me?—Akpa 1
Ame siwo ɖe srɔ̃ yeyee la kpɔa mɔ be dzidzɔ si yewokpɔ le yewoƒe srɔ̃ɖegbe la nanɔ anyi ɖaa. Eye ate ŋu anɔ nenema hã. Kristotɔ siwo ɖe srɔ̃ ɣeyiɣi didi aɖee nye esia eye wodzea agbagba vevie wɔna ɖe Biblia ƒe aɖaŋuɖoɖowo dzi la nyae be esia anya wɔ.
1. Aɖaŋu kae Biblia ɖo na srɔ̃ŋutsuwo?
Yehowa gblɔ be srɔ̃ŋutsue nye ta na eƒe ƒomea. (Xlẽ Efesotɔwo 5:23.) Yehowa di tso esi be wòawɔ nyametsotso siwo aɖe vi na eƒe ƒomea. Biblia ɖo aɖaŋu na srɔ̃ŋutsuwo be: “Miyi edzi mialɔ̃ mia srɔ̃wo.” (Efesotɔwo 5:25) Nu kae nya ma fia? Srɔ̃ŋutsu si lɔ̃ srɔ̃a la wɔa nu ɖe eŋu dɔmenyotɔe le aƒe me kple le amewo dome. Edzea agbagba be yeana wòanɔ dedie, yeakpɔ eƒe nuhiahiãwo gbɔ nɛ, eye yeana wòakpɔ dzidzɔ. (1 Timoteo 5:8) Esi gale vevie wue nye be, ekpena ɖe srɔ̃a ŋu be eya kple Yehowa dome nanɔ kplikplikpli. (Mateo 4:4) Le kpɔɖeŋu me, edoa gbe ɖa kple srɔ̃a eye woa kplii woxlẽa Biblia ɖekae. Ne srɔ̃ŋutsu léa be na srɔ̃a lɔlɔ̃tɔe la, esia wɔnɛ be eya ŋutɔ hã kple Yehowa dome nɔna nyuie.—Xlẽ 1 Petro 3:7.
2. Aɖaŋu kae Biblia ɖo na srɔ̃nyɔnuwo?
Mawu ƒe Nyaa gblɔ be ele be ‘srɔ̃nyɔnu nade bubu deto srɔ̃a ŋu.’ (Efesotɔwo 5:33) Aleke wòate ŋu awɔ esiae? Ate ŋu awɔ esia ne edea ŋugble le srɔ̃a ƒe nɔnɔme nyuiwo kple agbagba siwo wòdzena be yealé be na ye kple ɖeviawo la ŋu. Agate ŋu aɖee afia be yedea bubu ye srɔ̃ ŋu ne ekpea asi ɖe eŋu be eƒe nyametsotsowo nadze edzi, ne eƒoa nu nɛ ameŋububutɔe eye wòƒoa nu nyui tso eŋu, ne menye haxɔsetɔe srɔ̃a nye o gɔ̃ hã.
3. Nu kae srɔ̃tɔwo ate ŋu awɔ be woƒe srɔ̃ɖeɖea nali ke?
Biblia gblɔ tso ŋutsu kple nyɔnu siwo ɖe wo nɔewo la ŋu be: “Wo ame evea woazu ŋutilã ɖeka.” (Mateo 19:5) Esia fia be woadze agbagba vevie be woagana naneke nawɔe be lɔlɔ̃ si le wo si na wo nɔewo la me nagbɔdzɔ o. Woate ŋu awɔ esia ne wokpɔa vovo ɖe wo nɔewo ŋu eye wogblɔa woƒe susuwo kple seselelãmewo na wo nɔewo faa le lɔlɔ̃ me. Womeɖea mɔ be naneke alo ame aɖeke nanɔ vevie na yewo wu yewo srɔ̃ o, negbe Yehowa ko. Eye woɖɔa ŋu ɖo vevie be woagana ƒomedodo kplikplikpli nava nɔ yewo kple ame bubu aɖeke dome tsɔ wu yewo srɔ̃ o.
SRƆ̃ NU BUBUWO
Àkpɔ ale si Biblia ƒe mɔfiamewo ate ŋu ana wò srɔ̃ɖeɖe nali ke.
4. Srɔ̃ŋutsuwo—milɔ̃ mia srɔ̃wo eye mialé be na wo
Biblia gblɔ be ele be “srɔ̃ŋutsuwo nalɔ̃ wo srɔ̃wo abe woawo ŋutɔwo ƒe ŋutilã ene.” (Efesotɔwo 5:28, 29) Nu kae esia fia? Mikpɔ VIDEOA, eyome miadzro biabia si gbɔna me.
Nu kawoe srɔ̃ŋutsu ate ŋu awɔ atsɔ aɖee afia be yelɔ̃ ye srɔ̃ eye yeléa be nɛ?
Mixlẽ Kolosetɔwo 3:12, eye miadzro biabia sia me:
Aleke srɔ̃ŋutsu ate ŋu aɖe nɔnɔme nyui siawo afia le eƒe srɔ̃ɖeɖe me?
5. Srɔ̃nyɔnuwo—milɔ̃ mia srɔ̃wo eye miade bubu wo ŋu
Biblia gblɔ be srɔ̃nyɔnu nade bubu srɔ̃a ŋu ne srɔ̃a menye Yehowa subɔla o gɔ̃ hã. Mixlẽ 1 Petro 3:1, 2, eye miadzro nyabiase siawo me:
Ne srɔ̃wò menye haxɔsetɔ o la, àdi godoo be eya hã nava subɔ Yehowa. Ke kae nèkpɔ be aɖe vi wu—nànɔ gbeƒã ɖem nɛ ɣesiaɣi loo, alo nànɔ nu wɔm ɖe eŋu nyuie eye nàde bubu eŋu? Nu ka tae nèɖo eŋu nenema?
Enyo be srɔ̃ŋutsu kple srɔ̃a nalé nyawo kpɔ hafi atso nya me. Ke hã, ate ŋu adzɔ ɣeaɖewoɣi be srɔ̃nyɔnu ƒe susu nato vovo na srɔ̃a tɔ. Ne edzɔ alea la, ate ŋu agblɔ eƒe susuwo tufafatɔe le bubu me, gake ele be wòanɔ susu me nɛ be le Yehowa gbɔ la, ye srɔ̃ ƒe agbae wònye be wòatso nya me le nu si nyo na ƒomea ŋu. Eya ta ele be wòadze agbagba akpe ɖe srɔ̃a ŋu be woawɔ eƒe nyametsotsoa dzi. Ne ewɔnɛ alea la, ke ele asi kpem ɖe eŋu be dzidzɔ nanɔ ƒomea me. Mixlẽ 1 Petro 3:3-5, eye miadzro biabia sia me:
Aleke Yehowa sena le eɖokui me ne srɔ̃nyɔnu dea bubu srɔ̃a ŋu?
6. Miate ŋu akpɔ kuxi siwo ado mo ɖa le srɔ̃ɖeɖea me la gbɔ
Srɔ̃ɖeɖe aɖeke mede blibo o. Eya ta, ele be srɔ̃tɔwo nawɔ nu aduadu atsɔ akpɔ kuxiwo gbɔ. Mikpɔ VIDEOA, eyome miadzro nyabiase siwo gbɔna me.
Le videoa me la, nu kawoe ɖee fia be atsu kple asia dome megava nɔ vivim o?
Nu kawoe wowɔ si wɔe be wo dome gava le vivim?
Mixlẽ 1 Korintotɔwo 10:24 kple Kolosetɔwo 3:13. Ne miexlẽ mawunyakpukpuiawo dometɔ ɖe sia ɖe vɔ la, midzro nyabiase sia me:
Aleke aɖaŋuɖoɖo si le kpukpui sia me la dzi wɔwɔ ate ŋu ana srɔ̃ɖeɖe nali ke?
Biblia gblɔ be míade bubu mía nɔewo ŋu. Bubudede ame ŋu fia be míawɔ nu ɖe ame ŋu dɔmenyotɔe le ameŋububu me. Mixlẽ Romatɔwo 12:10, eye miadzro nyabiase siawo me:
Ðe wòle be srɔ̃ŋutsuwo alo srɔ̃nyɔnuwo nalala be yewo srɔ̃ nade bubu yewo ŋu gbã? Nu ka tae nèɖo eŋu nenema?
AME AÐEWO GBLƆNA BE: “Nye kple srɔ̃nye dome megale vivim abe tsã ene o.”
Aleke nàɖe nu me na amea ne wòakpɔe be Biblia ate ŋu akpe ɖe wo ŋu?
NU SIWO MÍESRƆ̃
Atsu kple asiwo ate ŋu akpɔ dzidzɔ ne wolɔ̃ wo nɔewo, ne wodea bubu wo nɔewo ŋu, eye wowɔa Biblia ƒe mɔfiamewo dzi.
Numetoto
Nu kawoe srɔ̃ŋutsu ate ŋu awɔ be dzidzɔ nanɔ srɔ̃ɖeɖea me?
Nu kawoe srɔ̃nyɔnu ate ŋu awɔ be dzidzɔ nanɔ srɔ̃ɖeɖea me?
Ne srɔ̃tɔe nènye la, Biblia ƒe mɔfiame ka dzi wɔwɔe ate ŋu ana wò srɔ̃ɖeɖea nali ke?
KU NU ME TSO NYATIA ŊU
Àkpɔ aɖaŋuɖoɖo nyui siwo akpe ɖe ŋuwò nàna dzidzɔ nanɔ wò ƒomea me la le agbalẽ gbadza sia me.
Yayra siwo nàkpɔ ne èwɔ ɖe Mawu ƒe aɖaŋuɖoɖowo dzi le wò srɔ̃ɖeɖe me la dze le haƒoƒo ƒe video sia me.
Nu kae wòfia be srɔ̃nyɔnu nabɔbɔ ɖe srɔ̃a ƒe tanyenye te? Àkpɔ ŋuɖoɖoa le nyati sia me.
“Nyɔnuwo, Nu Ka Tae Wòle Be Miabɔbɔ Ðe Tanyenye Te?” (Gbetakpɔxɔ, May 15, 2010)
Nu kae kpe ɖe atsu kple asi aɖe ŋu togbɔ be woto srɔ̃ɖekuxi sesẽwo me eye wogbe wo nɔewo gɔ̃ hã?
Le Mawu Ƒe Kpekpeɖeŋu Me La, Míaƒe Srɔ̃ɖeɖea Va Li Ke (5:14)