Yi Edzi Nànɔ Nɔviwòwo Tum Ðo Le Hamea Me
“Miyi edzi mianɔ akɔ fam na mia nɔewo, eye mianɔ mia nɔewo tum ɖo.”—1 TES. 5:11.
1. Yayra kawoe Kristo hamea me tɔwo kpɔna, ke hã, kuxi kawoe míagate ŋu anɔ avu wɔm kpli kokoko?
YAYRA gã aɖe ŋutɔe wònye be nènye Kristo hamea me tɔ. Ƒomedodo nyui le mia kple Yehowa dome. Esi nèɖoa ŋu ɖe mɔfiame siwo le eƒe Nyaa me ŋu ta la, wokpɔa tawò tso nu gbegblẽ siwo dona tso agbenɔnɔ si mesɔ na Kristotɔwo o me la me. Xɔlɔ̃ vavã geɖewo le asiwò siwo di be eme nanyo na wò. Ɛ̃, yayrawo sɔ gbɔ. Gake Kristotɔwo dometɔ akpa gãtɔ le avu wɔm kple kuxi vovovowo. Ðewohĩ wo dometɔ aɖewo ahiã kpekpeɖeŋu bene woate ŋu ase Mawu ƒe Nya la me nu gogloawo gɔme. Bubuwo le dɔ lém alo nu te ɖe wo dzi, alo ɖewohĩ wole nyametsotso gbegblẽ siwo wowɔ la me tsonuwo ƒe fu kpem. Gakpe ɖe eŋu la, ele be mí katã míanɔ agbe le xexe mavɔ̃mawu sia me.
2. Nu kae wòle be míawɔ ne míekpɔ mía nɔviwo wole nɔnɔme sesẽwo me tom, eye nu ka tae?
2 Mía dometɔ aɖeke medina be yeakpɔ hati Kristotɔ wòanɔ fu kpem alo anɔ nɔnɔme sesẽwo me tom o. Apostolo Paulo tsɔ hamea sɔ kple ŋutilã eye wògblɔ be “ne ŋutinu ɖeka le fu kpem la, ŋutinu bubuawo katã kpea fu kplii.” (1 Kor. 12:12, 26) Le nɔnɔme siawo ƒomevi me la, ele be míadze agbagba vevie akpe ɖe mía nɔviwo ŋu. Ŋutinya geɖewo le Ŋɔŋlɔawo me ku ɖe ale si hamea me tɔwo kpe ɖe wo nɔewo ŋu wote ŋu nɔ te ɖe kuxiwo nu heɖu wo dzii la ŋu. Ne míele wo me dzrom ɖekaɖeka la, de ŋugble tso ale si wò ŋutɔ nàte ŋu ana kpekpeɖeŋu mawo tɔgbi la ŋu. Alekee nàte ŋu ana kpekpeɖeŋu nɔviwòwo le gbɔgbɔ me ahato esia me atu Yehowa ƒe hamea ɖo?
“Wokplɔe Ðe Wo Ðokui Ŋu”
3, 4. Nu kae Akwila kple Priskila wɔ tsɔ kpe ɖe Apolo ŋu?
3 Hafi Apolo nayi aɖanɔ Efeso la, enye gbeƒãɖela bibi xoxo. Ŋutinya si le Dɔwɔwɔwo ƒe agbalẽa me gblɔ be: “Esi gbɔgbɔ la yɔe fũu la, eyi ɖaƒo nu hefia nu tso Yesu ŋuti nyawo ŋu ɖe eteƒe tututu, gake Yohanes ƒe nyɔnyrɔnana ŋu nya koe wònya nyuie.” Esi wònye be Apolo menya naneke tso nyɔnyrɔxɔxɔ “ɖe Fofo la kple Vi la kpakple gbɔgbɔ kɔkɔe la ƒe ŋkɔ me” ŋu o ta la, efia be Yohanes Amenyrɔɖetsimela la ƒe nusrɔ̃lawoe anya ɖi ɖase nɛ loo alo Yesu yomedzelawoe anya ɖe gbeƒã nɛ ɣeaɖeɣi do ŋgɔ na ƒe 33 M.Ŋ. ƒe Pentekoste ŋkekea. Togbɔ be dzo nɔ Apolo me hã la, nu vevi aɖewo ganɔ anyi siwo gɔme mese o. Aleke hadede kple haxɔsetɔwo kpe ɖe eŋu?—Dɔw. 1:4, 5; 18:25; Mat. 28:19.
4 Akwila kple Priskila, siwo nye Kristotɔ atsu kple asi aɖe la, se Apolo wònɔ nu fiam dzinɔameƒotɔe le ƒuƒoƒe la, eye wokplɔe ɖe wo ɖokuiwo ŋu, eye wofia nu geɖewoe. (Mixlẽ Dɔwɔwɔwo 18:24-26.) Nu si me lɔlɔ̃ le be woawɔ lae nye ema wowɔ. Ðikeke mele eme o be Akwila kple Priskila anya te ɖe Apolo ŋu le ŋuɖɔɖo me kple susu be yewoakpe ɖe eŋu, eye womena wòse le eɖokui me be yewole nya gbem nɛ o. Nya la koe nye be Apolo menya Kristo hame gbãtɔa ƒe ŋutinya nyuie o. Eye Apolo anya kpɔ ŋudzedze ɖe eƒe zɔhɛ yeye siawo ŋu ɖe nu vevi siwo me woɖe nɛ la ta godoo. Esi nugɔmesese siawo su Apolo si la, “ekpe ɖe” nɔvi siwo nɔ Axaya la “ŋu geɖe ŋutɔ” eye wòɖi ɖase sẽŋu aɖe.—Dɔw. 18:27, 28.
5. Kpekpeɖeŋu kae Fiaɖuƒegbeƒãɖela akpe geɖe naa amewo lɔlɔ̃tɔe, eye nu kawoe dona tso eme?
5 Le Kristo hamea me egbea la, ame geɖe kpɔa ŋudzedze ɖe ame siwo kpe ɖe wo ŋu wose Biblia gɔme la ŋu ŋutɔ. Xɔlɔ̃wɔwɔ si nɔa anyi ɖaa va nɔa nufiala geɖewo kple woƒe Biblia nusrɔ̃viawo dome. Zi geɖe la, kpekpe ɖe amewo ŋu be woase nyateƒea gɔme biana be woawɔ ɖoɖo anɔ go dom anɔ nu me dzrom hena ɣleti geɖe. Ke hã, Fiaɖuƒegbeƒãɖelawo lɔ̃na faa be yewoawɔ esia, elabena wokpɔe dze sii be amewo ƒe agbekpɔkpɔ nɔ te ɖe dɔ sia dzi. (Yoh. 17:3) Dzidzɔ ka gbegbee nye esi wònyena ne míekpɔe be amewo se nyateƒea gɔme, wole agbe nɔm ɖe enu, eye wotsɔ wo ɖokui ɖo anyi be yewoawɔ Yehowa ƒe lɔlɔ̃nu!
‘Woƒo Nu Nyui Tso Eŋu’
6, 7. (a) Nu ka tae Paulo tia Timoteo be wòanye yeƒe mɔzɔhati? (b) Ŋgɔyiyi kae wokpe ɖe Timoteo ŋu wòwɔ?
6 Esime apostolo Paulo kple Sila yi Listra le eƒe dutanyanyuigbɔgblɔ mɔzɔzɔ evelia me la, wodo go ɖekakpui aɖe si ŋkɔe nye Timoteo, si anya nɔ eƒe ƒewuiwo ƒe nuwuwu loo alo anya ge ɖe eƒe ƒe 20-awo me teti. “Nɔvi siwo le Listra kple Ikonio la ƒo nu nyui tso eŋu.” Timoteo dada Eunike, kple mamaa Loide, wonye Kristotɔ ɖeadzɔgbewo, gake fofoa ya nye dzimaxɔsetɔ. (2 Tim. 1:5) Ðewohĩ esi Paulo yi nuto ma me zi gbãtɔ ƒe ʋɛ aɖewoe nye ema va yi lae wòdze si ƒome sia. Gake fifia la, apostoloa tsɔ ɖe le eme na Timoteo etɔxɛe, elabena edze le eŋu be enye ɖekakpui ɖedzesi aɖe. Eya ta hamemetsitsiwo ƒe ha si le afi ma la da asi ɖe edzi be Timoteo nanye Paulo ƒe kpeɖeŋutɔ le dutanyanyuigbɔgblɔdɔa me.—Mixlẽ Dɔwɔwɔwo 16:1-3.
7 Nu geɖe li Timoteo asrɔ̃ tso eƒe zɔhɛ sia si tsi wui la gbɔ. Eye esrɔ̃ nu geɖe tso egbɔ ale gbegbe be, le ɣeyiɣi aɖe megbe la, Paulo tea ŋu dɔa Timoteo be wòanɔ ye teƒe aɖasrã hameawo kpɔ, elabena eka ɖe edzi. Le ƒe siwo ade abe 15 ene siwo me Timoteo, si nye ɖekakpui makpɔnuteƒe, si ɖewohĩ ŋu hã kpena la nɔ Paulo ŋu me la, ewɔ ŋgɔyiyi ale gbegbe be eva zu dzikpɔla bibi aɖe.—Flp. 2:19-22; 1 Tim. 1:3.
8, 9. Nu kae hamea me tɔwo ate ŋu awɔ atsɔ ade dzi ƒo na sɔhɛwo? Gblɔ eƒe kpɔɖeŋu aɖe.
8 Ŋutete nyui geɖewo le ɖekakpui kple ɖetugbui siwo le Kristo hamea me egbea la si. Ne woƒe zɔhɛ siwo léa fɔ ɖe gbɔgbɔmenuwo ŋu la de dzi ƒo na wo hena kpekpeɖeŋu wo la, sɔhɛ siawo ate ŋu awɔ ŋgɔyiyi eye woalɔ̃ axɔ agbanɔamedzi geɖe le Yehowa ƒe amewo dome. Lé ŋku ɖe miaƒe hamea me tɔwo ŋu kpɔ! Ðe nèkpɔ sɔhɛ aɖewo siwo ate ŋu atsɔ wo ɖokuiwo ana abe ale si Timoteo wɔe enea? Ne èkpe ɖe wo ŋu hede dzi ƒo na wo la, woate ŋu ava zu mɔɖelawo, Betel dɔwɔlawo, dutanyanyuigblɔlawo, alo dzikpɔla mɔzɔlawo. Nu kae nàte ŋu awɔ atsɔ akpe ɖe wo ŋu be woaminya taɖodzinu siawo?
9 Martin, si nye Betel ƒomea me tɔ ƒe 20 ye nye esia la ɖoa ŋku ɖetsɔleme si nutome sue dzikpɔla aɖe ɖe fiae ƒe 30 ye nye esi va yi esime woa kplii wonɔ gbeadzi la dzi ŋudzedzekpɔkpɔtɔe. Dzikpɔlaa tsɔ dzidzɔ ɖo dze tso subɔsubɔdɔ si wòwɔ le Betel esime wònye ɖekakpui la ŋu nɛ. Ede dzi ƒo na Martin be wòade ŋugble tso ale wòate ŋu atsɔ eɖokui ana le Yehowa ƒe habɔbɔa me nenema ke la ŋu. Martin kpɔe be dze vevi ma si yewoɖo gbe ma gbe la wɔ akpa vevi aɖe le tiatia siwo yeva wɔ emegbe la me. Ame kae nya nyui si gbegbe nàte ŋu awɔ na sɔhɛ siawo ne èɖo dze tso teokrasitaɖodzinuwo ŋu na wo?
“Miƒo Nu Na Luʋɔ Siwo Lé Blanui La Akɔfafatɔe”
10. Aleke Epafrodito se le eɖokui me, eye nu ka tae?
10 Epafrodito zɔ mɔ didi teɖeɖiameŋu aɖe tso Filipi yi Roma ɖasrã apostolo Paulo, si wode gaxɔ me ɖe eƒe xɔse ta la kpɔ. Filipi nɔviawoe dɔe ɖa. Menye ɖeko wòtsɔ woƒe nunanawo yi na apostoloa ko o, ke ewɔ ɖoɖo hã be yeanɔ Paulo gbɔ vie ana kpekpeɖeŋu ɖe sia ɖe si wòahiã lae le nɔnɔme sesẽ si me wònɔ la me. Ke hã, esime Epafrodito va Roma la, eva dze dɔ “de kuku ge kloe.” Esi Epafrodito se le eɖokui me be yemeɖo yeƒe taɖodzinua gbɔ o la, elé blanui vevie.—Flp. 2:25-27.
11. (a) Nu ka tae mele be wòawɔ nuku na mí nenye be hamea me tɔ aɖewo lé blanui vevie o? (b) Nu kae Paulo de dzi ƒo na Filipitɔwo be woawɔ na Epafrodito?
11 Nɔnɔme sesẽ vovovowo wɔnɛ be amewo léa blanui egbea. Xexea Me Ƒe Lãmesẽ Habɔbɔ ƒe akɔntabubuwo ɖee fia be blanuiléledɔ ate ŋu aɖe fu na ame 1 le ame 5 ɖe sia ɖe me le xexea me godoo ɣeaɖeɣi le woƒe agbe me. Yehowa ƒe amewo meto le eme o. Kuxi siwo amewo doa goe le woƒe ƒomea ƒe nuhiahiãwo gbɔ kpɔkpɔ me, lãmesẽkuxiwo, dziɖeleameƒo le kpododonu ta, alo nu bubuwo ate ŋu awɔe be ame nalé blanui. Nu kae Filipitɔwo ate ŋu awɔ atsɔ akpe ɖe Epafrodito ŋu? Paulo ŋlɔ bena: “Mixɔe abe ale si miewɔna ɖaa ene le Aƒetɔ la me kple dzidzɔ blibo; eye miyi edzi mianɔ ame siawo ƒomevi bum ame veviwoe, elabena Aƒetɔ la ƒe dɔwɔwɔ tae wòde kuku ge kloe ɖo, eye wòtsɔ eƒe luʋɔ de afɔku me, bene wòaxɔ ɖe mia teƒe le afi sia asubɔm.”—Flp. 2:29, 30.
12. Nu kae ate ŋu afa akɔ na ame siwo lé blanui?
12 Ele be míawo hã míade dzi ƒo na nɔvi siwo ƒo dzi ɖe le alo lé blanui la. Ðikeke mele eme o be nya nyui geɖewo li míate ŋu agblɔ tso ale si wosubɔa Yehowae ŋu. Ðewohĩ wowɔ tɔtrɔ geɖe le woƒe agbe me hafi va zu Kristotɔwo alo te ŋu le ɣeyiɣiawo katã ƒe subɔsubɔdɔa wɔm. Míekpɔa ŋudzedze ɖe woƒe agbagbadzedzeawo ŋu eye míate ŋu aka ɖe edzi na wo be Yehowa hã kpɔa ŋudzedze ɖe wo ŋu nenema ke. Ne tsitsi alo lãmegbegblẽ wɔe be mía nɔvi wɔnuteƒewo dometɔ aɖewo megate ŋu le nu siwo wowɔna tsã la wɔm o gɔ̃ hã la, wogadze kokoko be míade bubu wo ŋu ɖe subɔsubɔdɔ si wowɔ ƒe geɖe la ta. Aleke kee nɔnɔmea ɖale o, nu si Yehowa di tso esubɔla wɔnuteƒewo katã sie nye esi: “Miƒo nu na luʋɔ siwo lé blanui la akɔfafatɔe, mikpe ɖe gbɔdzɔgbɔdzɔtɔwo ŋu, migbɔ dzi ɖi blewu na amewo katã.”—1 Tes. 5:14.
‘Mitsɔe Kee Faa, Eye Miafa Akɔ Nɛ’
13, 14. (a) Afɔ vevi kae Korinto hamea ɖe, eye nu ka tae? (b) Esi woɖe amea le hamea me la, nu kae do tso eme?
13 Nɔnɔme aɖe do mo ɖa le Korinto hamea me, si nye be nɔviŋutsu aɖe nɔ gbɔdɔdɔ ƒe agbe gbegblẽ nɔm dzimematrɔmatrɔe. Eƒe agbenɔnɔa ate ŋu agblẽ nu le hamea ƒe dzadzɛnyenye ŋu eye dzimaxɔsetɔwo gɔ̃ hã bua eƒe nuwɔna ma ŋukpenanui. Eya ta esɔ be Paulo gblɔ be woaɖe ŋutsu la ɖa le hamea me.—1 Kor. 5:1, 7, 11-13.
14 Nu nyuiwo do tso tohehe ma me. Ewɔe be wokpɔ hamea ta tso ŋusẽkpɔɖeamedzi gbegblẽa me eye wòna be nu vɔ̃ wɔlaa va nyɔ le eɖokui me eye wòtrɔ dzi me anukwaretɔe. Paulo nɔ te ɖe kpeɖodzi siwo ɖe ŋutsua ƒe dɔwɔwɔ siwo dze dzimetɔtrɔ fia la dzi gblɔ na hame ma le eƒe agbalẽ evelia me be woagbugbɔ axɔ ŋutsua ɖe hamea me. Gake nane gakpɔtɔ li wòle be woawɔ. Paulo gagblɔ na hame ma hã be ‘woatsɔe ake [nu vɔ̃ wɔla trɔdzime ma] faa, eye woafa akɔ nɛ, bene nuxaxa akpa nagamii le mɔ aɖe nu o.’—Mixlẽ 2 Korintotɔwo 2:5-8.
15. Aleke wòle be míawɔ nu ɖe nu vɔ̃ wɔla trɔdzime siwo wogbugbɔ xɔ ɖe hamea me la ŋu?
15 Nu kae míesrɔ̃ tso nudzɔdzɔ sia me? Etena ɖe mía dzi ne eva hiã be woaɖe ame aɖewo le hamea me. Ðewohĩ wohe vlododo va Mawu ƒe ŋkɔa dzi eye woƒo ɖi hamea ƒe ŋkɔ. Ðewohĩ wowɔ nu vɔ̃ ɖe míawo ŋutɔwo hã ŋu. Ke hã, ne hamemetsitsi siwo wode dɔ asi na be woadzro nyaa me kpɔ la nɔ te ɖe Yehowa ƒe mɔfiamewo dzi kpɔe be ele be woagbugbɔ axɔ nu vɔ̃ wɔla trɔdzime aɖe ɖe hamea me la, efia be Yehowa tsɔe kee. (Mat. 18:17-20) Ðe mele be míadze agbagba asrɔ̃ Yehowa oa? Le nyateƒe me la, ne míewɔ nu ɖe nu vɔ̃ wɔla trɔdzime la ŋu ameŋumabumabutɔe eye míegbe be míatsɔe akee o la, afia be míele tsitre tsim ɖe Yehowa ŋu. Bene míado ŋutifafa kple ɖekawɔwɔ ɖe ŋgɔ le Mawu ƒe hamea me eye Yehowa nakpɔ ŋudzedze ɖe mía ŋu la, ɖe manyo wu boŋ be ‘míaɖee afia’ nu vɔ̃ wɔla siwo trɔ dzi me vavã eye wogbugbɔ xɔ wo ɖe hamea me la ‘be míelɔ̃ wo’ oa?—Mat. 6:14, 15; Luka 15:7.
“Enye Kpeɖeŋutɔ Nyui Aɖe Nam”
16. Nu ka tae Paulo do dziku ɖe Marko ŋu?
16 Ŋɔŋlɔawo me nuŋlɔɖi bubu hã ɖee fia be mele be míalé ame siwo wɔ nu wòve mí la ɖe dɔ me o. Le kpɔɖeŋu me, Yohanes, si woyɔna be Marko la wɔ nane wòve Paulo vevie. Nu kae dzɔ? Esi Paulo kple Barnaba dze woƒe dutanyanyuigbɔgblɔdɔ ƒe mɔzɔzɔ gbãtɔa gɔme la, Marko kplɔ wo ɖo abe woƒe kpeɖeŋutɔ ene. Ke hã, esi wova ɖo teƒe aɖe le woƒe mɔzɔzɔa me la, Yohanes Marko trɔ le eƒe zɔhɛawo yome yi aƒe, gake nuŋlɔɖia megblɔ susu si tae o. Nu sia ve Paulo ale gbegbe be esi wogava nɔ ɖoɖo wɔm hena woƒe mɔzɔzɔ evelia la, woa kple Barnaba woʋli nya kple wo nɔewo nenye be Marko agayi kpli yewo ake loo alo mayi kpli yewo o. Le nu si dzɔ le woƒe mɔzɔzɔ gbãtɔa me ta la, Paulo medi be Marko nazɔ mɔa kpli yewo o.—Mixlẽ Dɔwɔwɔwo 13:1-5, 13; 15:37, 38.
17, 18. Aleke míewɔ nya be Paulo kple Marko kpɔ masɔmasɔ si ɖo wo dome la gbɔ, eye nu kae míate ŋu asrɔ̃ tso esia me?
17 Edze ƒãa be esi Paulo gbe be Marko nagakplɔ yewo ɖo o la, esia meɖe dzi le Marko ƒo fũu akpa o. Nu si na wòdze nenemae nye be, ewɔ ɖeka kple Barnaba heyi eƒe dutanyanyuigbɔgblɔdɔa dzi le nuto bubu me. (Dɔw. 15:39) Nu si Paulo ŋlɔ tso eŋu ƒe aɖewo megbe la ɖee fia be enye nuteƒewɔla kple ame si dzi woate ŋu aka ɖo. Le ɣeyiɣi sia me la, Paulo nɔ gaxɔ me le Roma, eye wòŋlɔ agbalẽ ɖo ɖe Timoteo be wòava. Le agbalẽ ma ke me la, Paulo gblɔ nɛ bena: “Kplɔ Marko, ne mia kplii miava, elabena enye kpeɖeŋutɔ nyui aɖe nam le subɔsubɔ gome.” (2 Tim. 4:11) Ɛ̃, Paulo kpɔe be Marko wɔ ŋgɔyiyi nyuiwo.
18 Nufiame aɖe le esia me na mí. Marko va tu nɔnɔme siwo wòle be woanɔ dutanyanyuigblɔla si la ɖo. Mena be esi Paulo gbe be megakplɔ yewo ɖo o la zu nuɖiaɖia nɛ o. Eya kple Paulo siaa tsi le gbɔgbɔ me, eye womenɔ dzre dzi ɖaa o. Ke boŋ, Paulo bu Marko be enye kpeɖeŋutɔ nyui aɖe na ye. Eya ta ne masɔmasɔ aɖe do mo ɖa le nɔviwo dome eye wonya kpɔ egbɔ ko la, nu nyuitɔ si wòle be woawɔe nye be woaɖe asi le nyaa ŋu, akpɔ ŋgɔ tẽe ahayi edzi anɔ kpekpem ɖe ame bubuwo ŋu be woawɔ ŋgɔyiyi le gbɔgbɔ me. Ne míaƒe susu nɔa nɔnɔme nyui siwo le mía nɔviwo si ŋu la, esia tua hamea ɖo.
Míehiã Na Mía Nɔewo Le Hamea Me
19. Kpekpeɖeŋu kae Kristo hamea me tɔ ɖe sia ɖe ate ŋu ana nɔvia?
19 Le “ɣeyiɣi sesẽ siwo me nɔnɔ sesẽ” siawo me la, èhiã nɔviwò siwo le hamea me la ƒe kpekpeɖeŋu, eye woawo hã hiã na wò kpekpeɖeŋu. (2 Tim. 3:1) Menye ɣesiaɣie Kristo hamea me tɔ ɖekaɖekawo anya ale si woakpɔ nɔnɔme siwo wole go domee la gbɔ dzidzedzetɔe o, gake Yehowa ya nyae. Eye ate ŋu azã hamea me tɔ vovovowo, siwo dome wò hã nèle, atsɔ akpe ɖe nɔviwo ŋu be woawɔ nyametsotso nyuitɔ. (Yes. 30:20, 21; 32:1, 2) Ekema wò hã dze agbagba ɖe sia ɖe be nàwɔ ɖe apostolo Paulo ƒe aɖaŋuɖoɖoa dzi! Miyi edzi “mianɔ akɔ fam na mia nɔewo, eye mianɔ mia nɔewo tum ɖo, abe ale si ko miele ewɔm vavã hã ene.”—1 Tes. 5:11.
Aleke Nàɖo Wo Ŋui?
• Nu ka tae wòhiã be Kristo hamea me tɔwo nade dzi ƒo na wo nɔewo?
• Kuxi kawo tɔgbi dzie nàte ŋu akpe ɖe ame bubuwo ŋu woaɖu?
• Nu ka tae míehiã míaƒe hamea me tɔwo ƒe kpekpeɖeŋu?
[Nɔnɔmetata si le axa 11]
Ne hati Kristotɔ aɖe le go dom kuxi aɖe la, míate ŋu ana kpekpeɖeŋui
[Nɔnɔmetata si le axa 12]
Ŋutete nyui geɖewo le ɖekakpui kple ɖetugbui siwo le Kristo hamea me egbea la si