Epafrodito—Filipitɔwo ƒe Amedɔdɔ — Gbetakpɔxɔ INTERNET DZI AGBALẼDZRAƉOƑE

Epafrodito—Filipitɔwo ƒe Amedɔdɔ

PAULO ŋlɔ ɖo ɖe Filipitɔwo be: “Mixɔe le Aƒetɔ la me kple dzidzɔ katã, eye mibu amesiawo tɔgbe.” Ðikekemanɔmee la, dzi adzɔ mí, ne Kristotɔ dzikpɔla aɖe kafu mí nyuie nenema. (Filipitɔwo 2:29) Gake ameka ŋue Paulo nɔ nu ƒom le? Eye nukae amea wɔ be wòdze na kafukafu lédziname ma?

Biabia gbãtɔ ƒe ŋuɖoɖoe nye Epafrodito. Mina míalé ŋku ɖe nɔnɔme siwo ʋa Paulo hafi wòŋlɔ nya mawo ŋu atsɔ aɖo biabia evelia ŋui.

Anye ƒe 58 M.Ŋ. me lɔƒoe Filipitɔwo se be nuvlowɔha sẽŋuta aɖe he Paulo do goe tso mawuxɔ me le Yerusalem eye woƒoe, dziɖuɖumegãwo lée, eye esi wodee mɔ̃ ʋɔnumadrɔ̃madrɔ̃e vɔ megbe la, wode kɔsɔkɔsɔe gbugbɔ kplɔe yi Roma. (Dɔwɔwɔwo 21:27-33; 24:27; 27:1) Anɔ eme be esi wotsi dzi ɖe eƒe dedienɔnɔ ŋu ta la, woabia nusi woate ŋu awɔ nɛ la wo ɖokui. Woda ahe le ŋutilã me eye wometsɔ ɖe Paulo gbɔ o, eyata womate ŋu ana kpekpeɖeŋu boo aɖekee o. Gake seselelãme sẽŋu si ʋã Filipitɔwo be wodo alɔ eƒe subɔsubɔdɔa va yi la gakpɔtɔ nɔ wo ʋãm; esi wòɖo nɔnɔme sesẽ me ta la, enu gasẽ wu gɔ̃ hã.—Korintotɔwo II, 8:1-4; Filipitɔwo 4:16.

Ate ŋu anye be Filipitɔwo ade ŋugble be yewo dometɔ aɖe ate ŋu atsɔ nunana ɖe asi aɖasrã Paulo akpɔ eye wòakpe ɖe eŋu ne nane ahiãe hã. Gake mɔzɔzɔa didi eye wòtea ɖeɖi ame ŋu, eye kpekpe ɖe eŋu ate ŋu anye afɔku! Joachim Gnilka gblɔ be: “Ebia dzideƒo be woasrã gamenɔla akpɔ, vevietɔ ne edze abe womekpɔ ta na amea ƒe ‘agɔdzedzea’ kura o ene.” Agbalẽŋlɔla Brian Rapske gblɔ be: “Eganye afɔku hã be ame kple gamenɔla dome nanɔ kplikplikpli akpa alo woade eƒe nukpɔsusu dzi. . . . Ne kpeɖeŋutɔ menya nuƒoƒo alo nya wɔwɔ o la, ate ŋu ana be menye gamenɔla ɖeɖekoe woawu o ke woawu eya hã.” Amekae Filipitɔwo adɔ ɖa?

Asɔ be míasusui be mɔ sia tɔgbe zɔzɔ ana woatsi dzi anɔ ɖi kem le susu me, gake Epafrodito (mígabu be eyae nye Epafra si tso Kolose o) lɔ̃ faa be yeatsɔ dɔ sesẽ ma. Ne míebu eƒe ŋkɔ si me Afrodito le ŋu la, edze abe Trɔ̃subɔlae wònye zu Kristotɔ ene—enye dzila siwo subɔa Helatɔwo ƒe lɔlɔ̃ kple vidzidzi mawunɔ ma ƒe viŋutsu. Esime Paulo ŋlɔ agbalẽ ɖo ɖe Filipitɔwo tsɔ nɔ akpe dam na wo ɖe woƒe dɔmenyo ta la, esɔ be egblɔ le Epafrodito ŋu be enye ‘miaƒe amedɔdɔ kple nye nuhiahiãwo ƒe subɔla.’—Filipitɔwo 2:25.

Nusi Biblia gblɔ le Epafrodito ŋu na míete ŋu kpɔe be togbɔ be eɖokuitsɔtsɔna bene yeasubɔ Paulo kple eya ŋutɔ ƒe hamea dze na kafukafu hã la, kuxi siwo tɔgbe anɔ mía ŋu la nɔ Epafrodito hã ŋu. Mina míade ŋugble le eƒe kpɔɖeŋu ŋu.

‘Nye Nuhiahiãwo ƒe Subɔla’

Míenya nusianu tsitotsito o, gake míate ŋu asusui be mɔzɔzɔa te ɖeɖi Epafrodito ŋu hafi wòva ɖo Roma. Ðewohĩ ezɔ mɔa to Via Egnatia, si nye Romatɔwo ƒe mɔ si tso Makedonia me la dzi. Anya tso Adriatik-ƒua ayi Italia-ƒukpo afã la ƒe “afɔkpo” nu eye wòato Appian-mɔ ayi Roma. Enye mɔzɔzɔ si tea ɖeɖi ame ŋu (kilometa 1,200, yiyi dzaa) eye ɖewohĩ axɔ wu ɣleti ɖeka.—Kpɔ aɖaka si le axa 29.

Nukpɔsusu kae nɔ Epafrodito si wòtsɔ zɔ mɔe? Wodɔe ɖa be wòawɔ “subɔsubɔdɔ” alo lei·tour·giʹa, na Paulo. (Filipitɔwo 2:30) Gbã la, Helagbe me nya sia fia dɔ si dumevi awɔ na Dziɖuɖu faa tso dzime. Emegbe la, eva fia dɔ si tɔgbe Dziɖuɖu ziaa dumevi siwo dze etɔxɛe na ewɔwɔ la dzi be woawɔ. Agbalẽnyala aɖe gblɔ le nya sia si wozã le Hela Ŋɔŋlɔawo me ŋu be: “Gbã la, Kristotɔ nye amesi wɔa dɔ na Mawu kple amewo, elabena edi tso dzi blibo me, be yeawɔe, eye evelia elabena enye dzizizi nɛ be wòawɔe, elabena Kristo ƒe lɔlɔ̃ ƒoe ɖe enu.” Nyateƒee, gbɔgbɔ nyui ka gbegbee nye si Epafrodito ɖe fia!

‘Ede eƒe Agbe Afɔku Me’

Paulo zã nya si wozãna le tsatsadada me hegblɔ be Epafrodito ‘de [pa·ra·bo·leu·saʹme·nos] eƒe agbe afɔku me,’ alo le nya la ŋutɔŋutɔ nu la, etsɔ eƒe agbe “da tsatsa” le Kristo subɔsubɔ ta. (Filipitɔwo 2:30, NW) Mele be míasusu be Epafrodito wɔ bometsinu o; ke boŋ afɔkue nɔ eƒe subɔsubɔdɔ kɔkɔea wɔwɔ me. Ðe wòwɔ kpekpeɖeŋudɔa le esime yame ƒe nɔnɔme menɔ mɔ ɖem oa? Ðe wòdze dɔ le mɔa dzi le teƒe aɖe gake tekpɔ godoo be yeawu mɔzɔzɔa nua? Aleke kee wòɖadzɔe o, Epafrodito ‘lé dɔ de kuku ge kloe.’ Ðewohĩ edi be yeatsi Paulo gbɔ hafi, eyata edze ƒã be apostoloa nɔ alesi wònɔ tɔtrɔm gbɔ kaba wu alesi wokpɔ mɔe la nu ɖem.—Filipitɔwo 2:27.

Ke hã la, Epafrodito nye dzideƒotɔ si lɔ̃ faa be yeatsɔ ye ɖokui ana ɖokuitɔmadimadii ale be yeakpe ɖe amesiwo hiã tu la ŋu.

Míate ŋu abia mía ɖokui se be, ‘Afikae madze agbagba be makpe ɖe nye gbɔgbɔmenɔvi siwo ɖo nɔnɔme sesẽwo me la ŋu ase ɖo?’ Ðokuitsɔtsɔna ƒe gbɔgbɔ ma menye esi Kristotɔwo aɖe fia ne wolɔ̃ ko o. Yesu gblɔ be: “Se yeye mena mi bena, mialɔ̃ mia nɔewo, sigbe alesi melɔ̃a mi ene, bena miawo hã mialɔ̃ mia nɔewo nenema ke.” (Yohanes 13:34, míawoe te gbe ɖe edzi.) Epafrodito subɔ “de kuku ge kloe.” Eyata Epafrodito nye amesi si “susu” si ƒe dzi Paulo de ƒo na Filipitɔwo be wòanɔ wo si la le ƒe kpɔɖeŋu aɖe. (Filipitɔwo 2:5, 8, 30) Ðe míawo hã míalɔ̃ faa be míawɔ nu nenema?

Gake Epafrodito galé blanui kokoko. Nukatae?

Eƒe Blanuiléle

Tsɔe be yee nye Epafrodito. Paulo gblɔ be: “Edzroe vevie be, yeakpɔ mi katã, eye wòxa nu ŋutɔ bena, miese eŋkɔ be, dɔ dze edzi.” (Filipitɔwo 2:26) Epafrodito nya be nɔvi siwo le yewoƒe hamea me se be yeva dze dɔ ale be yemegate ŋu kpe ɖe Paulo ŋu abe alesi wosusui ene o. Le nyateƒe me la, adze abe ɖe Epafrodito gava dzi Paulo ƒe nuxaxa ɖe edzi ene. Ðe wòva hiã be Paulo ƒe zɔhɛ, atikewɔla Luka, nagblẽ nu bubuwo ɖi akpɔ Epafrodito gbɔa?—Filipitɔwo 2:27, 28; Kolosetɔwo 4:14.

Anɔ eme be esia na Epafrodito va lé blanui. Ðewohĩ ebui be nɔvi siwo le yewoƒe hamea me anɔ bubum be ɖewohĩ yemete ŋu le kpekpeɖeŋu nam o. Ðewohĩ enɔ fɔ bum eɖokui eye “edzroe vevie” be yeakpɔ wo aka ɖe yeƒe nuteƒewɔwɔ dzi na wo. Paulo zã Helagbe me nya sesẽ aɖe, a·de·mo·neʹo, si fia “lé blanui,” tsɔ ƒo nu le Epafrodito ƒe nɔnɔmea ŋui. Agbalẽnyala J. B. Lightfoot gblɔ be nya sia ate ŋu afia “tɔtɔ, dzimaɖitsitsi, susu ƒe nu ŋu manɔmanɔ tututu ƒe nɔnɔme si tsoa lãmegbegblẽ, alo susu me ƒe vevesese, abe nuxaxa, ŋukpe, numadzedziname, kple bubuawo ene gbɔ.” Teƒe bubu si wogazã nya sia le le Hela Ŋɔŋlɔawo me koe nye esime Yesu nɔ veve helĩhelĩ sem le Getsemane-bɔa me.—Mateo 26:37.

Paulo va kpɔe be nu nyuitɔ kekeake si yeawɔ enye be yeaɖo Epafrodito ɖe Filipitɔwo aŋlɔ agbalẽ si aɖe woƒe amedɔdɔa ƒe tɔtrɔ gbɔ si womenɔ mɔ kpɔm na o la me akpe ɖe eŋu. Esi Paulo gblɔ be, “Mebu bena, ele vevie be, madɔ . . . Epafrodito, . . . aɖo ɖe mi” la, ele eme ɖem be yee gblɔ be netrɔ gbɔ, ale be wòaɖe nazã si ɖewohĩ woabu ɖe Epafrodito ŋu be edo kpo nu ɖa le amewo ƒe susu me. (Filipitɔwo 2:25) To vovo na ema la, Epafrodito ku kloe esi wòdi be yeawu yeƒe mɔzɔzɔa nu! Paulo kafui na wo vevie be “mixɔe le Aƒetɔ la me kple dzidzɔ katã, eye mibu amesiawo tɔgbe. Elabena Kristo ƒe dɔwɔwɔ ŋuti wòde kuku ge ɖo kloe, eye wòtsɔ eƒe agbe ke, bena wòawɔ subɔsubɔdɔ, si susɔ ɖe mia ŋu la, ɖe mia teƒe.”—Filipitɔwo 2:29, 30.

‘Mibu Amesiawo Tɔgbe Vevie’

Ele be míakpɔ ŋudzedze ɖe ŋutsu kple nyɔnu siwo si Epafrodito ƒe nukpɔsusu le la ŋu vavã. Wotsɔa wo ɖokui saa vɔe be yewoasubɔ. De ŋugble le amesiwo tsɔ wo ɖokui sa vɔe be yewoasubɔ le afisiwo didi tso wo de gbɔ abe dutanyanyuigblɔlawo, dzikpɔla mɔzɔlawo, alo awɔ dɔ le Gbetakpɔxɔ Habɔbɔa ƒe alɔdzedɔwɔƒewo dometɔ ɖeka la ŋu kpɔ. Ne tsitsi alo lãmegbegblẽ megale mɔ ɖem na wo dometɔ aɖewo fifia be woawɔ nusiwo wote ŋu wɔna tsã o hã la, wodze na bubu kple kafukafu ɖe ƒe geɖe si wosubɔ nuteƒewɔwɔtɔe la ta.

Ke hã la, dɔléle si gbɔdzɔa ame la ate ŋu ana woalé blanui alo abu fɔ ame ɖokui. Woadi be yewoawɔ geɖe. Aleke wòɖea dzi le ame ƒoe nye si! Amesiame si ge ɖe nɔnɔme ma me la ate ŋu asrɔ̃ nu tso Epafrodito gbɔ. Ne èbu eŋu kpɔ la, eƒe vodadae wònye be edze dɔa? Kura o! (Mose I, 3:17-19; Romatɔwo 5:12) Epafrodito di be yeasubɔ Mawu kple ye nɔviwo, gake dɔléle mena mɔe o.

Paulo meka mo na Epafrodito ɖe eƒe lãmegbegblẽa ta o ke boŋ egblɔ na Filipitɔwo be woado ŋusẽe. Nenema ke wòle be míafa akɔ na mía nɔviwo ne wolé blanui. Zi geɖe la, míate ŋu akafu wo ɖe subɔsubɔ ƒe kpɔɖeŋu si woɖo nuteƒewɔwɔtɔe ta. Alesi Paulo kpɔ ŋudzedze ɖe Epafrodito ŋu eye wòƒo nu nyui le eŋu la afa dzi nɛ, eye wòaɖe eƒe blanuilélea dzi akpɔtɔ. Míawo hã míate ŋu aka ɖe edzi be ‘Mawu menye madzɔmadzɔtɔ be wòaŋlɔ míaƒe dɔwɔwɔ kple lɔlɔ̃ si míeɖe fia le eƒe ŋkɔ ta, le esime míesubɔ ame kɔkɔewo eye míegale edzi le wo subɔm la be o.’—Hebritɔwo 6:10.

[Aɖaka si le axa 29]

Fukpekpe Siwo Nɔ Mɔzɔzɔa Me

Fukpekpe boo manɔ mɔzɔzɔ tso Europa-dugã ɖeka me yi bubu me le egbeŋkekeawo me, abe esi Epafrodito zɔ ene o. Woate ŋu aɖo yameʋu avo nyuie ade le gaƒoƒo ɖeka alo eve me. Mɔ sia tɔgbe zɔzɔ le ƒe alafa gbãtɔ me nye nya bubu kura. Ɣemaɣi la, àkpe fu le mɔzɔzɔ tso du ɖeka me yi bubu me. Afɔzɔla ate ŋu azɔ kilometa 30-35 ŋkeke ɖeka, eye ate ŋu akpe fu le yame ƒe nɔnɔme kple afɔku vovovowo, abe “adzodalawo” ene si me.—Korintotɔwo II, 11:26.

Ke afisiwo woadze ne zã do kple nuhiahiãwo gbɔ kpɔkpɔ ya ɖe?

Ŋutinyaŋlɔla Michelangelo Cagiano de Azevedo ɖe eme be, “mansiones, amedzrodzeƒe ŋutɔŋutɔ siwo ŋu nudzraɖoƒewo, lãkpowo, kple dɔwɔlawo ƒe dɔƒewo le la nɔ” Romatɔwo ƒe mɔwo dzi; “mutationes, alo tɔɖoƒe gbogbo aɖewo siwo woate ŋu aɖɔli sɔwo alo kekewo le eye woagate ŋu akpɔ nuhiahiãwo le la nɔ mansiones eve ɖesiaɖe dome.” Ŋkɔ nyui aɖeke menɔ dzeƒe siawo ŋu o esi ame ɖigbɔwo katã dea afima ta. Tsɔ kpe ɖe adzotsotso mɔzɔlawo ŋu la, amedzrodzeƒedzikpɔlawo gaxɔa ga le gbolowo hã si tsɔ kpea woƒe fetuwoe. Latin-hakpanyaŋlɔla Juvenal gblɔ be amesi nu va glo ale gbegbe be wòva dze amedzrodzeƒe mawo tɔgbe la akpɔe be “ye kple ŋutasẽlae mlɔ aba ɖeka dzi, le tɔdziʋumedɔwɔlawo, fiafitɔwo, kple kluvi sisilawo dome, amlɔ kadevenamelawo kple amekukuɖakakpalawo xa . . . Tsinokplu ɖekae amesiame zãna; abati mele ame ɖeka aɖeke si vovo o, kplɔ̃ hã meli vovo tso ame bubuwo tɔ gbɔ o.” Blema nuŋlɔla bubuwo hã fa konyi le tsi manyomanyo kple xɔ siwo me amewo sɔ gbɔ ɖo akpa, siwo me ƒo ɖi, ɖo tsi, eye tredzɔe bɔ ɖe wo me la ŋu.

[Anyigbatata/Nɔnɔmetata si le axa 27]

(Edze nyuie le agbalẽa ŋutɔ me)

Roma

[Nɔnɔmetata]

Roma ɣeyiɣiwo me mɔzɔla

[Afi Si Míexɔ Mɔɖeɖe Tso]