Na Biblia Xexlẽ Naɖe Vi Na Wò Bliboe

1-3. Viɖe kawoe dona tso Biblia xexlẽ kple eƒe nufiamewo dzi wɔwɔ me?

“MEDAA akpe na Yehowa ŋdi sia ŋdi be ekpe ɖe ŋunye mese Biblia la gɔme.” Nɔvinyɔnu Kristotɔ tsitsi si gblɔ nya sia la xlẽ Biblia bliboa katã wu zi 40 sɔŋ, eye wògale exexlẽ dzi. Nɔvinyɔnu ɖetugbui aɖe gblɔ be Biblia xexlẽ na yekpɔe be Yehowa nye ame ŋutɔŋutɔ. Esia na wòva te ɖe Fofoa si le dziƒo ŋu geɖe wu. Egblɔ be: “Nyemekpɔ dzidzɔ le nye agbe me alea gbegbe kpɔ o!”

² Apostolo Petro de dzi ƒo na mí katã be: “Mina nya la ƒe notsi [tsimatɔ] nadzro mi vevie.” (1 Pet. 2:2) Dzitsinya nyui sua ame siwo ɖia kɔ na dzodzro ma to Biblia sɔsrɔ̃ kple eƒe nufiamewo dzi wɔwɔ dzi la si eye taɖodzinu va nɔa woƒe agbe ŋu. Xɔlɔ̃wɔwɔ akuakua nɔa woa kple ame bubu siwo hã lɔ̃a Mawu vavã la hesubɔnɛ la dome. Esiawo katã nye susu nyui siwo tae wòle be ‘míakpɔ dzidzɔ le Mawu ƒe se la ŋu’ ɖo. (Rom. 7:22) Gake viɖeawo mese ɖe afi ma o. Bubu kawoe gali?

³ Ne èyi edzi srɔ̃ nu tso Yehowa kple Via ŋu la, wò lɔlɔ̃ na wo kple hawòviwo me asẽ ɖe edzi. Ŋɔŋlɔawo me sidzedze vavãtɔ si su asiwò la ana nàkpɔ ale si Mawu aɖe ame dzɔdzɔewo tso tsɔtsrɔ̃ si gbɔna nuɖoanyi sia si le kudɔ ƒom dzi la me. Nya nyui geɖewo asu asiwò nàgblɔ na amewo le gbeadzi. Yehowa ayra wò ne èyi edzi le nu siwo nèsrɔ̃ to Mawu ƒe Nya la xexlẽ me la fiam amewo.

 4. Nu kae wòfia be woaxlẽ Biblia “kple gbe blewu”?

⁴ Yehowa medi be ye subɔlawo naxlẽ yeƒe Nya la to eme dzradzradzra o. Egblɔ na Yosua be: “Mègaɖe nu le segbalẽ sia ŋu o, eye nàbu eŋu [alo, nàxlẽe kple gbe blewu, “NW”] zã kple keli.” (Yos. 1:8; Ps. 1:2) Ðe esia fia be nàke nu axlẽ Biblia bliboa katã tso Mose Ƒe Agbalẽ Gbãtɔ va se ɖe Nyaɖeɖefia kple gbe blewua? Kura o. Nu si wòfiae nye be nàxlẽe le mɔ si ana nàte ŋu anɔ ŋugble dem le emenyawo ŋu la nu. Ne èxlẽ Biblia “kple gbe blewu” alea la, akpe ɖe ŋuwò be wò susu nanɔ eƒe akpa vevi siwo ade dzi ƒo na wò le ɣeyiɣi ma me la ŋu. Ne èɖo akpa vevi mawo, siwo ate ŋu anye nyagbe aɖewo, kpukpui aɖewo, alo ŋutinya aɖewo dzi la, xlẽe blewu, ɖewohĩ nàke nu anɔ nyawo yɔm ɖekaɖeka. Esia ana nu si xlẽm nèle le Ŋɔŋlɔawo me nawɔ dɔ ɖe dziwò wu. Nu ka tae esia wɔwɔ le vevie? Mawu ƒe mɔfiamewo gɔme sese ye aʋã wò be nàwɔ ɖe wo dzi.

5-7. Wɔ ale si Mawu ƒe Nya la xexlẽ kple gbe blewu ate ŋu akpe ɖe ŋuwò la ƒe kpɔɖeŋu le go siawo me: (a) be nànɔ agbe dzadzɛ; (b) be nàwɔ nu ɖe amewo ŋu le dzigbɔɖi kple dɔmenyonyo me; (d) be nàɖo ŋu ɖe Yehowa ŋu le ɣeyiɣi sesẽwo gɔ̃ hã me.

⁵ Biblia xexlẽ kple gbe blewu aɖe vi na wò, vevietɔ ne èle eƒe agbalẽ siwo dze abe ɖe wo gɔme sese sesẽ na wò ene la xlẽm. Bu kpɔɖeŋu etɔ̃ siwo gbɔna ŋu kpɔ. Gbã la, bu Kristotɔ sɔhɛ aɖe si ɖo Hosea ƒe agbalẽa dzi le eƒe ɖokuisi Biblia xexlẽ me la ŋu kpɔ. Esi wòɖo ta 4 lia hexlẽ kpukpui 11 va se ɖe 13 kple gbe blewu vɔ la, etɔ sẽe. (Mixlẽ Hosea 4:11-13.) Nu ka tae wòtɔ? Kpukpui mawo he eƒe susu, elabena ele agbagba dzem be yeaɖu agbe gbegblẽ nɔnɔ ƒe nyaƒoɖeamenuwo dzi le suku. Ebu nyaawo ŋu hegblɔ na eɖokui be: ‘Yehowa kpɔa nu siwo amewo wɔna le ɣaɣlaƒe gɔ̃ hã. Nyemadi be madze agɔ le edzi o.’ Sɔhɛa ɖoe kplikpaa be yeayi edzi anɔ agbe dzadzɛ le Mawu ƒe dzidzenuwo nu.

⁶ Kpɔɖeŋu evelia: Nɔvinyɔnu Kristotɔ aɖe le Yoel ƒe nyagblɔɖia xlẽm eye wòva ɖo ta 2, kpukpui 13. (Mixlẽ Yoel 2:13.) Esi wòxlẽe kple gbe blewu vɔ la, ede ŋugble le ale si wòasrɔ̃ Yehowa, ame si ŋu wogblɔ le be: “Amenuvela kple nublanuikpɔla wònye, egbɔa dzi ɖi blewu, amenuveve bɔ ɖe esi.” Eɖoe be yeadze agbagba adzudzɔ dzugbewo kple dzivenyawo zazã ne yele nu ƒom kple ye srɔ̃ kpakple ame bubuwo.

⁷ Kpɔɖeŋu etɔ̃lia: Bu vifofo Kristotɔ aɖe si si dɔ ge le eye wòle dzimaɖi tsim ɖe ale si wòawɔ akpɔ srɔ̃a kple viawo dzi la ŋu kpɔ. Exlẽ Naxum 1:7 kple gbe blewu; afi ma gblɔ be, Yehowa “nya ame siwo ɖoa dzi ɖe eŋu” eye wònye woƒe “sitsoƒe le xaxagbe.” Nya mawo fa akɔ nɛ. Ekpɔe be Yehowa léa be na ye lɔlɔ̃tɔe, eya ta edzudzɔ dzimaɖitsitsi fũu akpa. Eyome exlẽ Naxum 2:1 blewu. (Mixlẽ Naxum 2:1.) Mía nɔviŋutsua kpɔe be ne yeyi edzi ɖe gbeƒã le ɣeyiɣi sesẽwo gɔ̃ hã me la, efia be yebua Yehowa be enye yeƒe sitsoƒe vavã. Togbɔ be nɔviŋutsua le ŋutilãmedɔ dim hã la, nu si wòxlẽ la ʋãe wòva le gome kpɔm le kwasiɖa domedome gbeƒãɖeɖedɔa me.

 8. Gblɔ gbɔgbɔmenu xɔasi siwo ŋu nèke ɖo le wò Biblia xexlẽ me kpuie míase.

⁸ Nufiamekpɔɖeŋu nyui siwo dze le afi sia la tso Biblia-gbalẽ siwo ame aɖewo susu be wo gɔme sese sesẽ me. Ne èle Hosea, Yoel kple Naxum ƒe agbalẽwo xlẽm eye wònye wò didi be yeasrɔ̃ nu tso wo me la, ke anyo be nàtsɔ gbe blewu axlẽ woƒe kpukpui aɖewo. Kpɔ nunya kple akɔfanya gbogbo siwo nàte ŋu akpɔ le nyagblɔɖinya mawo me ɖa ko! Ke Biblia-gbalẽ bubuawo ya ɖe? Mawu ƒe Nya la le abe tomenukuƒe aɖe si lotamekpe gbogbo aɖe le ene. Ku eme nyuie! Xlẽ Biblia bliboa eye na wòanye wò taɖodzinu be yeake ɖe Mawu ƒe mɔfiame kple eƒe dzideƒoname, siwo xɔ asi abe lotamekpe ene la ŋu.

 9. Nu ka wɔwɔe akpe ɖe mía ŋu be míase Mawu ƒe lɔlɔ̃nu gɔme nyuie wu?

⁹ Togbɔ be ele vevie be nàxlẽ Biblia la ƒe akpa aɖe gbe sia gbe hã la, àdi godoo be yease emenyawo gɔme nyuie. Eya ta wɔ agbalẽ siwo Yehowa ƒe habɔbɔa ta na mí la ŋu dɔ nyuie nàtsɔ aku nu me tso amewo, teƒewo kple nudzɔdzɔ siwo ŋu nàxlẽ nu le la ŋu. Alo ne èdi be yeanya ale si yeawɔ Biblia ƒe nufiame aɖe ŋu dɔ le wò agbenɔnɔ me la, àte ŋu abia kpekpeɖeŋu tso hamemetsitsi alo Kristotɔ tsitsi bubu aɖe gbɔ. Mina míadzro ƒe alafa gbãtɔ me Kristotɔ aɖe si dze agbagba wɔ esia ƒe kpɔɖeŋu me, ne míakpɔ nu si tae wòle vevie be míanɔ míaƒe gɔmesese dzim ɖe edzi la ɖa. Eŋkɔe nye Apolo.

10, 11. (a) Aleke wokpe ɖe Apolo ŋu be eƒe subɔsubɔdɔa va nyo ɖe edzi? (b) Nu kae míate ŋu asrɔ̃ tso Apolo ƒe ŋutinyaa me? (Kpɔ aɖaka si nye “Ðe Wò Nufiafia Sɔ Ðe Numekɔkɔ Yeyewo Nua?”)

¹⁰ Apolo nye Kristotɔ Yudatɔ si ‘nya Ŋɔŋlɔawo nyuie’ eye “gbɔgbɔ la yɔe fũu.” Wogblɔ tso eŋu le Dɔwɔwɔwo ƒe agbalẽa me be: “Eyi ɖaƒo nu hefia nu tso Yesu ŋuti nyawo ŋu ɖe eteƒe tututu, gake Yohanes ƒe nyɔnyrɔnana ŋu nya koe wònya nyuie.” Apolo menya be wona numekɔkɔ yeyewo tso nyɔnyrɔxɔxɔ si ŋuti nya fiam yenɔ la ŋu o. Esi Kristotɔ srɔ̃tɔ siwo nye Priskila kple Akwila wose nu si fiam Apolo nɔ le Efeso la, “woɖe Mawu ƒe mɔ la me nɛ nyuie wu.” (Dɔw. 18:24-26) Vi kae wòɖe na Apolo?

¹¹ Esi Apolo ɖe gbeƒã le Efeso vɔ la, eyi Axaya. “Esi wòɖo afi ma la, ekpe ɖe ame siwo xɔe se le Mawu ƒe amenuveve ta la ŋu geɖe ŋutɔ; elabena etsɔ ŋusẽ nɔ kpe ɖom edzi le dutoƒo be Yudatɔwo da ƒu, eye wòtsɔa Ŋɔŋlɔawo ɖenɛ fiana be Yesu ye nye Kristo la.” (Dɔw. 18:27, 28) Esi Apolo se nu si Kristotɔwo ƒe nyɔnyrɔxɔxɔ fia gɔme nyuie azɔ ta la, “ekpe ɖe” ame yeyewo ŋu “geɖe ŋutɔ” be wowɔ ŋgɔyiyi le tadedeagu vavãtɔ me. Nu kae míate ŋu asrɔ̃ tso esia me? Abe Apolo ene la, míawo hã míedzea agbagba be míase nu siwo míexlẽ le Biblia me la gɔme. Gake ne haxɔsetɔ kpɔnuteƒe aɖe ɖo aɖaŋu na mí le ale si míawɔ be míaƒe nufiafia naganyo ɖe edzi ŋu la, ele be míaxɔ eƒe aɖaŋuɖoɖoa ɖokuibɔbɔtɔe ahada akpe ɖe eta. Esia wɔwɔ ana míaƒe subɔsubɔ kɔkɔea nanyo ɖe edzi.

12, 13. Wɔ ale si Ŋɔŋlɔawo zazã ŋuɖɔɖotɔe ate ŋu akpe ɖe Biblia nusrɔ̃viwo ŋu woawɔ ŋgɔyiyi la ƒe kpɔɖeŋu.

¹² Abe Priskila, Akwila kple Apolo ene la, míate ŋu akpe ɖe amewo ŋu. Ne wò dzideƒonamenyawo kpe ɖe dzinyuitɔ aɖe ŋu wòɖu kuxi aɖe si na mete ŋu le ŋgɔyiyi wɔm le gbɔgbɔ me o dzi la, aleke nèsena le ɖokuiwò me? Alo ne hamemetsitsie nènye la, aleke nèsena le ɖokuiwò me ne hati tadeagula aɖe da akpe na wò le aɖaŋu si nèɖo nɛ tso Ŋɔŋlɔawo me si kpe ɖe eŋu le nɔnɔme sesẽ aɖe me ta? Ðikeke mele eme o be Mawu ƒe Nya la zazã atsɔ akpe ɖe amewo ŋu be woƒe agbe nanyo ɖe edzi hea dzidzeme kple dzidzɔ vanɛ.a Kpɔ ale si nàte ŋu awɔ esiae ɖa.

¹³ Israel vi siwo nɔ anyi le Eliya ŋɔli la dometɔ geɖe tsi evedomesi le esi womenya ne tadedeagu vavãtɔ loo alo alakpasubɔsubɔ ƒe akpa dzie yewoanɔ o ta. Aɖaŋu si Eliya ɖo na wo ate ŋu aɖe vi na Biblia nusrɔ̃vi aɖe si mete ŋu le nyametsotso wɔm be yeasubɔ Yehowa o. (Mixlẽ 1 Fiawo 18:21.) Bu kpɔɖeŋu bubu aɖe hã ŋu kpɔ: Ne ɖetsɔlemetɔ aɖe le ale si exɔlɔ̃wo alo eƒe ƒometɔwo awɔ nu ɖe eŋui vɔ̃m la, àte ŋu azã Yesaya 51:12, 13 (mixlẽe) me nyawo atsɔ akpe ɖe eŋu wòatso nya me be yeasubɔ Yehowa.

14. Nu kae akpe ɖe ŋuwò nàɖo ŋku Biblia me nyawo dzi le ɣeyiɣi si me nèhiãe atsɔ akpe ɖe amewo ŋu?

¹⁴ Edze ƒãa be Biblia me nya geɖewo tea ŋu dea dzi ƒo na exlẽlawo, ɖɔa wo ɖo, alo doa ŋusẽ wo. Ðewohĩ àbia be, ‘Nu kae mawɔ be mate ŋu aɖo ŋku mawunyakpukpuiwo dzi le ɣeyiɣi si me mehiãe?’ Xlẽ Biblia la gbe sia gbe nànɔ ŋugble dem le Mawu ƒe mɔfiamewo ŋu. Esia ana Mawu ƒe nyawo natsi susu me na wò eye Yehowa ƒe gbɔgbɔa akpe ɖe ŋuwò nàɖo ŋku wo dzi le ɣeyiɣi si me nèhiãe.—Marko 13:11; mixlẽ Yohanes 14:26.b

15. Nu kawoe akpe ɖe ŋuwò nàse Mawu ƒe Nya la gɔme nyuie wu?

¹⁵ Abe Fia Salomo ene la, wò hã àte ŋu ado gbe ɖa na Yehowa be wòana nunya wò le wò teokrasidɔwo wɔwɔ me. (2 Kron. 1:7-10) Srɔ̃ blema nyagblɔɖilawo eye ‘nàdzro nu me vevie ahawɔ numekuku tsitotsito’ le Mawu ƒe Nya la me be Yehowa kple eƒe lɔlɔ̃nu ŋuti sidzedze vavãtɔ nasu asiwò. (1 Pet. 1:10-12) Apostolo Paulo de dzi ƒo Timoteo be wòatsɔ “xɔse ƒe nyawo kple nufiafia nyui” la anyi eɖokui. (1 Tim. 4:6) Ne wò hã èwɔ esia la, àsu te nyuie akpe ɖe amewo ŋu le gbɔgbɔ me. Le ɣeyiɣi ma ke me la, àtu wò xɔse ɖo.

16. (a) Alekee ‘Ŋɔŋlɔawo me dzodzro tsitotsito gbe sia gbe’ ɖe vi na Beroiatɔwo? (b) Nu ka tae wòle vevie be míanɔ Biblia xlẽm gbe sia gbe?

¹⁶ Yudatɔ siwo nɔ Makedonia-du si nye Beroia me la nɔa “Ŋɔŋlɔawo me dzrom tsitotsito gbe sia gbe.” Esi Paulo ɖe gbeƒã na Yudatɔ mawo la, wotsɔ nya siwo wògblɔ la sɔ kple nu si wonya tso Ŋɔŋlɔawo me. Nu kae do tso eme? Kakaɖedzi su ame geɖe si be nyateƒea fiam wònɔ, eye wova “zu xɔsetɔwo.” (Dɔw. 17:10-12) Esia ɖee fia be Biblia la xexlẽ gbe sia gbe nana míeva xɔa Yehowa dzi se geɖe wu. Xɔse sia, si nye “dziɖoɖo ɖe nu siwo wole mɔ kpɔm na la ŋu kple kakaɖedzi,” le vevie hafi míate ŋu atsi agbe age ɖe Mawu ƒe xexe yeyea me.—Heb. 11:1.

17, 18. (a) Aleke xɔse sẽŋu kple lɔlɔ̃ kpɔa Kristotɔ ƒe kpɔɖeŋudzia tae? (b) Aleke míaƒe mɔkpɔkpɔ kpɔa mía tae?

¹⁷ Paulo gblɔe wòsɔ be: “Mí ame siwo nye ŋkeke tɔwo la, mina míanɔ mo xexi, eye míado xɔse kple lɔlɔ̃ ƒe akɔtakpoxɔnu la, eye míaɖɔ xɔxɔ ƒe mɔkpɔkpɔ abe gakuku ene.” (1 Tes. 5:8) Ele be asrafo nakpɔ eƒe dzi ta tso futɔwo si me. Nenema kee wòle be mí Kristotɔ hã míakpɔ míaƒe kpɔɖeŋudzia ta tso nu vɔ̃ ƒe ŋusẽkpɔɖeamedzi si me. Ne Yehowa subɔla aɖe xɔ Mawu ƒe ŋugbedodowo dzi se vevie, eye wòlɔ̃ Yehowa kple ehavi amegbetɔ vevie la, vi kae wòaɖe nɛ? Mawusubɔla ma doa gbɔgbɔ me akɔtakpoxɔnu nyuitɔ kekeake, eya ta asesẽ hafi wòawɔ nane si ana Mawu magakpɔ ŋudzedze ɖe eŋu o.

¹⁸ Paulo ƒo nu tso gakuku hã ŋu, si nye “xɔxɔ ƒe mɔkpɔkpɔ” la. Le Biblia ƒe ɣeyiɣiwo me la, ne asrafo meɖɔ gakuku o la, ate ŋu aku le aʋagbedzi bɔbɔe. Gake ne eɖɔ gakuku sesẽ la, ate ŋu akpɔ eta tso nu siwo adze ta nɛ la si me. Ne míesrɔ̃a Yehowa ƒe Nya edziedzi la, mɔkpɔkpɔ sẽŋu asu mía si be Yehowa aɖe mí. Esia akpe ɖe mía ŋu be míatsi tsitre ɖe xɔsegbelawo ŋu ahagbe woƒe “dzeɖoɖo ƒuƒlu” siwo kekena abe abi vɔ̃ ene. (2 Tim. 2:16-19) Míaƒe mɔkpɔkpɔ agado ŋusẽ mí be míaƒo asa na ame siwo dina be yewoakplɔ mí ade agbe si medzea Yehowa ŋu o la nɔnɔ me.

19, 20. Nu ka tae míedea asixɔxɔ gã Mawu ƒe Nya la ŋu, eye aleke míeɖena fiana be míekpɔa ŋudzedze ɖe eŋu? (Kpɔ aɖaka si nye “Yehowa Naa Nu Si Tututu Mehiã Lam.”)

¹⁹ Zi ale si míele nuwuwua gogom la, zi nenemae wòhiã be míaka ɖe Yehowa ƒe Nya la dzi geɖe wu. Aɖaŋuɖoɖo siwo le eme la kpena ɖe mía ŋu míeɖɔa nɔnɔme gbegblẽwo ɖo eye míeɖua nu vɔ̃ ƒe dzodzrowo dzi. Emenya dedziƒoname fakɔnamewo ate ŋu akpe ɖe mía ŋu míado dzi ato dodokpɔ siwo Satana kple eƒe xexea hena vaa mía dzii la me dedie. Mɔfiame siwo Yehowa naa mí le eƒe Nya la me akpe ɖe mía ŋu míayi edzi anɔ agbemɔa dzi.

²⁰ Ðo ŋku edzi be Mawu ƒe lɔlɔ̃nue wònye “be woaɖe ame ƒomeviwo katã.” Mí Yehowa subɔlawo hã míekpe ɖe “ame ƒomeviwo katã” ŋu. Nenema kee nye ame sia ame si ŋu míakpe ɖo le míaƒe gbeƒãɖeɖe kple nufiafiadɔa me hã. Gake ele vevie be “nyateƒe ƒe sidzedze vavãtɔ” nasu ame sia ame si di be yeakpɔ ɖeɖe la si. (1 Tim. 2:4) Eya ta hafi míate ŋu ato ŋkeke mamlɛ siawo me dedie la, ele vevie be míanɔ Biblia me nya siwo tso gbɔgbɔ me la xlẽm ahanɔ wo dzi wɔm. Ɛ̃, Biblia xexlẽ gbe sia gbe ɖenɛ fiana be míedea asixɔxɔ gã Yehowa ƒe Nyateƒenyawo ŋu.—Yoh. 17:17.