Eunike Kple Loide Nufiala Siwo Ðo Kpɔɖeŋu Nyui

Mí Yehowa subɔlawo míenya be mawusubɔsubɔ ŋuti nufiafia nyui nana mía viwo nye agbanɔamedzi vevi aɖe. Le nɔnɔme siwo de ame dzi kura gɔ̃ hã me la, kplamatsedonu kple kuxi vovovowo ate ŋu anɔ agbanɔamedzi sia tsɔtsɔ me. Esia agasesẽ wu ne dzila Kristotɔ awɔ dɔ sesẽ ma le aƒe si me mã le subɔsubɔnyawo me la me. Esia menye nu yeye o. Ŋɔŋlɔawo gblɔ dzila aɖe si nɔ nɔnɔme ma tɔgbe me le ƒe alafa gbãtɔ M.Ŋ. me ƒe ŋutinya na mí.

Nyɔnu aɖe si ŋkɔe nye Eunike kple eƒe ƒomea nɔ Listra, si nye dugã aɖe si nɔ Likaonia nutome le Asia Sue ƒe titinanyiehe. Listra nye nuto sue aɖe si ŋkɔ menyɔ tututu o. Enye du si nɔ Roma-dziɖuɖua te si woyɔna be Julia Felix Gemina Lustra si Augusto Kaisaro tso be yeatsɔ atsi adzogliwo ƒe nuwɔnawo nui le afima nutowo me. Eunike nye Yudatɔ Kristotɔ, wo kple srɔ̃a si nye Helatɔ, viaŋutsu Timoteo, kpakple dadaa Loide, nɔ aƒe si me mã le subɔsubɔnyawo me la me.—Dɔwɔwɔwo 16:1-3.

Anye be Yudatɔwo mesɔ gbɔ ɖe Listra o, elabena Biblia megblɔ be ƒuƒoƒe nɔ afima o, togbɔ be Yudatɔ aɖewo nɔ Ikonio si ƒe didime ade kilometa 30 tso afima hã. (Dɔwɔwɔwo 14:19) Eyata manɔ bɔbɔe na Eunike be wòawɔ eƒe subɔsubɔdɔ o. Esi wometso aʋa na via Timoteo esi wodzii o ta la, agbalẽnyala aɖewo susui be anye ɖe Eunike srɔ̃ tsi tre ɖe nya ma ŋu.

Gake menye Eunike ɖeɖekoe nye xɔsetɔ o. Edze abe ɖe Timoteo xɔ eƒe nufiame siwo tso “ŋɔŋlɔ kɔkɔeawo” me tso dadaa kpakple Loide si nye mamaa le nɔ gome gbɔ ene.a Apostolo Paulo xlɔ̃ nu Timoteo be: “Nɔ nusiwo nèsrɔ̃, eye nèkpɔ kakaɖedzi le wo me la me; elabena ènya amesiwo gbɔ nèsrɔ̃e le, eye esi tso [vidzĩme, NW] ke nènya ŋɔŋlɔ kɔkɔeawo la, woate ŋu ana nunya wò hena agbexɔxɔ to xɔse, si le Kristo Yesu me la me.”—Timoteo II, 3:14, 15.

Hehenana ‘tso Vidzĩme Ke’

Esi Paulo gblɔ be wofia “ŋɔŋlɔ kɔkɔeawo” Timoteo tso ‘vidzĩme’ ke la, esia dze ƒã be tso eƒe vi fẽ mee. Esia sɔ kple Helagbe me nya (breʹphos) si wozãna na vidzĩ. (Tsɔe sɔ kple Luka 2:12, 16.) Eyata Eunike wɔ dɔ si Mawu de asi nɛ la moveviɖoɖotɔe, eye megblẽ ɣeyiɣi kura hafi dze hehe si akpe ɖe Timoteo ŋu wòatsi azu Mawu subɔla dovevienu la nanae o.—Mose V, 6:6-9; Lododowo 1:8.

Timoteo ‘kpɔ kakaɖedzi’ le Ŋɔŋlɔawo me nyateƒewo me. Abe alesi Helagbe me nyagɔmeɖegbalẽ aɖe gblɔe ene la, nya si Paulo zã le afisia fia be “woaka ɖe [nane] dzi bliboe; woaxɔ [nane] dzi ase.” Ðikekemanɔmee la, ehiã ɣeyiɣi kple agbagbadzedze geɖe be woana kakaɖedzi blibo sia naxɔ anyinɔ ɖe Timoteo ƒe dzi me eye wòakpe ɖe eŋu be wòade ŋugble tso Mawu ƒe Nya la me ahaɖe edzixɔxɔse afia. Eyata eme kɔ be Eunike kple Loide dze agbagba vevie le Ŋɔŋlɔawo fiafia Timoteo me. Eye yayra kae nye si wònye na nyɔnu mawuvɔ̃la mawo! Paulo ŋlɔ tso Timoteo ŋu be: “Meɖo ŋku xɔse alakpa manɔmee, si le mewò, si nɔ mamawò Loide kple dawò Eunike me gbã la dzi, eye menyae pete be, ele wò hã mewò.”—Timoteo II, 1:5.

Akpa vevi kae nye si Eunike kple Loide wɔ le Timoteo ƒe agbe me! Agbalẽŋlɔla David Read gblɔ le esia ŋu be: “Ne ɖe apostoloa susui be Timoteo ŋutɔ ƒe dzimetɔtrɔ le eɖokui si ƒe nya koe la, anye ne eɖo ŋku edzi nɛ enumake. Gake nu gbãtɔ si wògblɔ tso Timoteo ƒe xɔse ŋue nye be ‘enɔ mamaa Loide . . . kple dadaa Eunike me xoxo.’ ” Nya si Paulo gblɔ tso Loide, Eunike, kple Timoteo ƒe xɔse ŋu fia be zi geɖe la, dzilawo, tɔgbuiwo, kple mamawo kura gɔ̃ hã ƒe tsotso kaba ɖe Ŋɔŋlɔawo fiafia ɖeviwo ŋu hiã vevie be wòafia alesi ɖevia ƒe etsɔme anɔ le gbɔgbɔ me. Ðe ema mana ƒomea me tɔwo nabu tame vevie le alesi wole agba si le wo dzi le Mawu kple wo viwo gbɔ tsɔmee la ŋu oa?

Ðewohĩ Paulo nɔ alesi Loide kple Eunike na woƒe aƒeme nɔ la hã ŋu bum. Anɔ eme be apostoloa de woƒe aƒeme esime wòyi Listra zi gbãtɔ le ƒe 47/48 M.Ŋ. me lɔƒo. Ðewohĩ ɣemaɣie nyɔnu eve siawo va zu Kristotɔwo. (Dɔwɔwɔwo 14:8-20) Anye be lɔlɔ̃ kple xɔlɔ̃wɔwɔ si woɖe fia Paulo le aƒe ma me la kpɔ ŋusẽ ɖe nya siwo wòzã esime wònɔ nu ƒom tso Loide ŋu be enye Timoteo “mama” la dzi. Agbalẽnyala Ceslas Spicq gblɔ be Helagbe me nya si wòzã (mamʹme, ke menye teʹthe si wozãna le agbalẽwo me kple le bubudedeameŋu me o) nye nya si “ɖevi gblɔna tsɔ doa vivi” ɖe mamaa ŋu, “si me tete ɖe ame ŋu kplikplikpli alo lɔlɔ̃ na ame dze le” le alesi wozãe le nya siawo me nu.

Timoteo ƒe Ʋuʋu Dzo le Wo Gbɔ

Míenya alesi tututu Eunike ƒe srɔ̃ɖeɖe nɔ esime Paulo trɔ yi Listra zi evelia (ƒe 50 M.Ŋ. lɔƒo) o. Agbalẽnyala geɖe susui be anya zu ahosi. Eɖanye kae o, Timoteo tsi va zu ɖekakpui nyui aɖe le dadaa kple mamaa ƒe mɔfiafia te, ɖewohĩ axɔ ƒe 20 ɣemaɣi. Nɔvi siwo nɔ Listra kple Ikonio ‘ɖi ɖase nyui le eŋu.’ (Dɔwɔwɔwo 16:2) Edze ƒã be woƒã Fiaɖuƒe ŋuti nyanyuia kaka ƒe didi ɖe Timoteo ƒe dzi me, elabena elɔ̃ esi Paulo kpee be wòakpe ɖe ye kpakple Sila ŋu le yewoƒe dutanyanyuigbɔgblɔdɔa me.

Bu alesi Eunike kple Loide ase le wo ɖokui me esime Timoteo nɔ dzodzom la ŋu kpɔ! Wonya be esi Paulo va yewoƒe dua me zi gbãtɔ la, woƒu kpe apostoloa dzo le egbɔ esi wobu xa be ɖe wòku. (Dɔwɔwɔwo 14:19) Eyata asiɖeɖe le Timoteo ŋu wòadzo manɔ bɔbɔe na wo o. Anye be woabu ɣeyiɣi didi si eƒe dzodzoa axɔ kple nenye be agbɔ dedie ŋu. Togbɔ be woatsi dzi nenema hã la, ɖikeke mele eme o be dadaa kple mamaa de dzi ƒo nɛ be wòaxɔ mɔnukpɔkpɔ tɔxɛ sia si ana wòate ŋu subɔ Yehowa bliboe wu.

Nusɔsrɔ̃ Xɔasi Siwo Le Eme na Mí

Míate ŋu asrɔ̃ nu geɖe tso Eunike kple Loide ŋu bubu nyuie me. Xɔse ye ʋã wo be woana gbɔgbɔmenufiame tuameɖo Timoteo. Mawusosroɖa ƒe kpɔɖeŋu si aɖe tsitsi fia si tɔgbuiwo kple mamawo aɖo na wo tɔgbui kple mama yɔviwo kple ame bubuwo ate ŋu aɖe vi na Kristo-hame bliboa godoo. (Tito 2:3-5) Nenema ke Eunike ƒe kpɔɖeŋua ɖo ŋku agba si le vidada siwo srɔ̃wo nye dzimaxɔsetɔwo dzi be woafia gbɔgbɔmenuwo wo viwo kple yayra siwo le eme la dzi na wo. Esia wɔwɔ abia dzideƒo geɖe ɣeaɖewoɣi, vevietɔ ne nyɔnua ƒe dzixɔsewo medzɔa dzi na vifofoa o. Egabia ayedzedze hã, elabena ele be srɔ̃nyɔnu Kristotɔ la nabu srɔ̃a ƒe tanyenye.

Woɖo xɔse, agbagbadzedze, kple nugbegbe le ame ɖokui gbɔ si Loide kple Eunike ɖe fia la teƒe na wo esi wokpɔ Timoteo wòyi ŋgɔ le gbɔgbɔ me va zu dutanyanyuigblɔla kple dzikpɔla nyui aɖe. (Filipitɔwo 2:19-22) Nemema ke egbea hã Ŋɔŋlɔawo me nyateƒewo fiafia mía viwo bia ɣeyiɣi, dzigbɔɖi, kple tameɖoɖo kplikpaa, gake nu nyui si ado tso eme ana nàkpɔe be yeƒe agbagbadzedzewo ɖe vi vavã. Sɔhɛ Kristotɔ kpɔɖeŋuɖola geɖe siwo wofia ‘ŋɔŋlɔ kɔkɔea wo tso woƒe vidzĩme’ le aƒe siwo me mã le subɔsubɔnyawo me nyea dzidzɔ gã aɖe na wo dzila mawuvɔ̃lawo. Eye aleke gbegbe lododo si gblɔ be, ‘Vidada si dzi vi nyanu akpɔ dzidzɔ’ la nye nyateƒee enye si!—Lododowo 23:23-25.

Apostolo Yohanes gblɔ le eƒe gbɔgbɔmeviwo ŋu be: “Nyemekpɔ dzidzɔ gã wu esia be, mese bena, vinyewo zɔna le nyateƒe me o.” (Yohanes III, 4) Ðikekemanɔmee la, ame geɖe siwo ɖee fia be yewole abe Eunike kple Loide siwo nye nufiala siwo ɖo kpɔɖeŋu nyui ene hã ƒe seselelãmewo sɔ kple esiwo wogblɔ le nya mawo me.

[Etenuŋɔŋlɔ]