Sɔhɛ siwo si etsɔme like le

“ENYE [nyɔnu gbɔ dɔdɔ sesẽe ƒe nuwɔna] si dzi ŋɔ henyɔ ŋu wu ɖesiaɖe”—nenemae ʋɔnudrɔ̃la si nɔ zi me wodrɔ̃ ʋɔnunya aɖe nyitsɔ laa la ɖɔ nuvlowɔwɔ lae. Ƒewuivi enyi, siwo xɔ tso ƒe 14 va ɖo 18, ƒe ha aɖe de xa ɖe mɔ dzi na nyɔnu tsaɖimɔzɔla aɖe le London ƒe nutotroe aɖe me, wodɔ egbɔ ʋuu, eye wodae ɖe tsimɔ aɖe si te ɖe afima me togbɔ be nyɔnua be yemenya tsi ƒuƒu o hã. Eme kɔ be ƒewuiviawo dometɔ ɖeka dada gblɔ be esi yekpɔ nusi ye viŋutsua wɔ ŋuti nyatakaka le television dzi la, ɖeko yedze dɔ.

Nublanuitɔe la, nudzɔdzɔ sia ɖe nusi le edzi yim le xexeame egbea la fia. Ŋutasesẽe bɔ azɔ, wowɔnɛ eɖanye le nuvlowɔwɔ me, le aƒemedzrewo me, alo le gbevovodolawo dome ʋawo me le Balkan-nutowo me, le titina kple ɣetoɖoƒe Afrika, kple le teƒe bubuwo o. Nɔnɔme siawo mee sɔhɛwo tsina le, alo wosea wo ŋuti nyawo zi geɖe. Eyata mewɔ nuku o be mo kplala li na wo dometɔ geɖe, ‘womelɔ̃a ame ƒe nya o’ eye wonye ‘ɖokuidzimaɖulawo.’—Timoteo II, 3:3.

“Ame Wɔadãwo”

Roma ye nye xexemeŋusẽ si nɔ dzi ɖum esime Kristotɔ apostolo Paulo ŋlɔ eƒe lɛta evelia ɖo ɖe ehati hamemegã Timoteo. Anyrawɔwɔ kple adãnuwɔwɔe bɔ ɖe Roma fefewɔƒewo. Gake Paulo gblɔ be ɣeyiɣi siwo nɔ ŋgɔ ‘me nɔnɔ asesẽ.’ (Timoteo II, 3:1) Anyo be míanya be ‘adãwɔwɔ’ ƒe susu hã dze le Helagbe me nya si ɖɔ ɣeyiɣi siawo be ‘woavɔ̃ɖi’ la me. Nane si dzɔ ƒe 30 kple edzivɔ do ŋgɔ le Yesu ƒe anyigba dzi subɔsubɔdɔ wɔɣi la ɖe nusita adãnuwɔna aɖewo dzɔ le eƒe ɣeyiɣia me fia.

Ðeko Yesu nɔ tɔdziʋu me va ɖi go ɖe Galilea Ƒua ƒe ɣedzeƒeƒuta teti enye ma. Esi wòɖi ɖe ƒua ta la, ŋutsu eve va do goe. Adã si nɔ mo na wo kple woƒe aƒadodo na wòdze ƒã be nane gblẽ le wo ŋu vevie. ‘Adã nɔ mo na wo eteƒe mekɔ o,’ míagblɔ ko be gbɔgbɔ vɔ̃ nɔ wo me.a Gbɔgbɔ vɔ̃ siwo na wonɔ adãnuwo wɔm lae na wonɔ nu ƒom. Ŋutsuawo do ɣli be: “Nya ka le mía kpli wò dome, wò Mawuvi? Ðe nèva afisia funyafunya wɔ ge mí hafi ɣeyiɣi la nade mahã?” Gbɔgbɔ vɔ̃ siwo nɔ ame evea me la nya nyuie be Mawu ɖo ɣeyiɣi si dzi wòadrɔ̃ toheʋɔnu gbɔgbɔ vɔ̃wo. Anye wo tsɔtsrɔ̃ ɖa tegbee. Gake hafi ɣeyiɣi ma naɖo la, woazã woƒe ŋusẽ si tri akɔ wu amegbetɔwo tɔ la ade ŋutasẽnuwɔnawo amewo dome. Nukunu si Yesu wɔ tsɔ nyã gbɔgbɔ vɔ̃awo do goe koe te ŋu na gbɔdzɔe ŋutsu eveawo.—Mateo 8:28-32; Yuda 6.

Ne amewo, ɖeviwo hã le eme, wɔ tsukunuwo egbea la, anyo be míaɖo ŋku nudzɔdzɔ sia dzi. Nukatae? Elabena míedze ŋgɔ afɔku aɖe si do ƒome kplii le ƒe alafa 20 lia sia me, abe alesi Biblia ƒe agbalẽ mamlɛtɔ si nye Nyaɖeɖefia ɖe emee ene be: “Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.” (Nyaɖeɖefia 12:12) Taflatse, de dzesii be vlododo Satana alea na “dzi le ekum ŋutɔ” elabena enyae be ɣeyiɣi boo aɖeke megale ye si o.

Eho Aʋa Ðe Wo Ŋu

Abe alesi míegblɔnɛ le magazine sia me zi geɖe ene la, ƒe 1914 mee woɖo Kristo Yesu wònye Mawu Fiaɖuƒea ƒe Fia le dziƒo. Yesu tso ɖe Satana, si nye Mawu ƒe futɔ gãtɔ la ŋu enumake. Eyata wonyã Abosam kple eƒe gbɔgbɔ vɔ̃wo ɖa tso dziƒo eye anyigbae wotɔ ŋkui fifia. (Nyaɖeɖefia 12:7-9) Esi woɖo asi Satana ƒe ŋusẽkpɔɖeamedzi dzi vevie ta la, ele “tsatsam abe dzata, si le gbe ɖem hele ame dim, be yeavuvu ami ene.” (Petro I, 5:8) Amekawoe wòte ŋu léna bɔbɔe? Ðe eme mekɔ be woanye amesiwo mekpɔ nuteƒe le agbe me kple le amegbetɔ ƒe nuwɔnawo me oa? Eyata egbe sɔhɛwo va zu amesiwo Abosam tɔ ŋkui. Wotoa woƒe haƒoƒo kple modzakaɖenuwɔnawo me gena ɖe ametafala makpɔmakpɔ dzeaɖaŋu sia ƒe asi me.—Efesotɔwo 6:11, 12.

Ne sɔhɛwo le agbagba dzem be yewoana agbenɔnɔ nadze edzi na yewo gɔ̃ hã la, wokpɔnɛ be nane xea mɔ na yewo. Tso esime Xexemeʋa II wu enu la, amesiwo le dukɔ siwo wɔ aʋaa me la dometɔ geɖe dze agbagba be yewoana yewoƒe ƒomea me tɔwo naɖu agbe ɖe eteƒe. Ŋutilãmenunɔamesiwo didi, gbɔɖemedidi atraɖii, kple modzakaɖeɖe va zu taɖodzinu veviwo. Esia na ame geɖe kpe fu. Paulo xlɔ̃ nu Timoteo be: “Amesiwo dina be, yewoazu kesinɔtɔwo la, gena ɖe tetekpɔwo kple mɔ̃tetrewo kpakple movidzɔdzɔ kple nuveviwɔame ƒe nudzodzro geɖe . . . me. Elabena nuvɔ̃wo kata ƒe ke enye galɔlɔ̃, si yome mɔ ame aɖewo di, . . . eye wotsɔ nuxaxa geɖe ŋɔ wo ɖokui flofloflo.” (Timoteo I, 6:9, 10) Míekpɔe be amesiwo katã le egbe ƒe ŋutilãmenudidi ƒe xexeame he vevesese geɖe va wo ɖokui dzi le ŋutilãmenuwo, ganyawo, kple seselelãme gome. Sɔhɛ geɖe siwo ŋu Mawu ƒe futɔ gãtɔ ƒe ayemɔ sia gblẽ nu le la le wo dome.

Gake enye dzidzɔ be nyanyui li. Eku ɖe sɔhɛ siwo si etsɔme like le la ŋu. Aleke wòadzɔe?

Midi eye Miakpɔ

Dzidzenu kɔkɔwo le sɔhɛ geɖe si. Wotsri nɔnɔme gbegblẽ siwo bɔ ɖe ame tsitsiwo dome. Dunyahela siwo klẽa ŋu ɖe ɖoƒe ŋu kple asitsalagãwo ƒe numadzɔmadzɔwɔwɔ kple tagbɔsesẽ nyɔa ŋu na wo. Ne sɔhɛe nènye la, ɖewohĩ nenemae nèsena le ɖokuiwò me.

Bu nusi me Cedric, ɖekakpui si gogo ƒe blaeve, to si menye numadzɔkpɔ o ŋu kpɔ.b Evɔ̃na na nu geɖe le eƒe ɖevime, eye evɔ̃na na ku hã. Ebua tameɖoɖo si le agbe ŋu la ŋu. Esi wòva xɔ ƒe 15 gake mekpɔ eƒe biabiawo ŋuti ŋuɖoɖowo vaseɖe ɣemaɣi o ta la, eva de ha kple sɔhɛ nuŋubula bubu aɖewo henɔ ŋugble dem le agbe ŋu. Egblɔ be: “Míenoa atike vɔ̃ɖiwo eye míenɔa anyi nɔa dze ɖom gaƒoƒo geɖe. Àkpɔe be amesiame le tame bum abe ye ke ene, gake ame aɖeke mekpɔa ta na nya la o.”

Vivisese dzroa Cedric abe sɔhɛ bubu geɖe ene. Atike vɔ̃ɖiwo nono ɖeɖe mesu eme nɛ o. Eteƒe medidi o eva nɔ fi fim henɔ atike vɔ̃ɖiwo dzram. Eganɔ vivisese bubuwo yome tim kokoko. Azɔ amewo dɔnɛ wòva fia nu vɛ na wo. Egblɔ be: “Mesea vivi le ewɔwɔ me. Gake nyemetsɔa ame dahe aɖeke ƒe nu o. Ne mefi ʋu eye mezãe vie la, nyemegblẽa naneke le eŋu o. Ne mafi dɔwɔƒe aɖe ƒe nu la, ke dzaa menya nyuie be nugblẽfexexe ƒe ɖoɖo le wo si hafi mefia nua. Ewɔe be mete ŋu ɖea ɖokuinye nu.” Abe alesi nàkpɔ mɔe ene la, wova de Cedric gaxɔ me mlɔeba.

Cedric ɖo ŋku edzi gblɔ be: “Mark si nye hati gamenɔla ƒo nu nam. Esi wòkpɔ be wota atitsoga gã aɖe ɖe nye abɔgba ŋu ta la, ebia susu si ta mewɔe lam. Esusu be mawusubɔsubɔ ƒe susu tae wòle ŋunye ɖo.” Le kwasiɖa aɖewo megbe la, Mark tsɔ agbalẽ si nye Ate Ŋu Anɔ Agbe Tegbee le Paradiso me le Anyigba Dzic na Cedric. “ ‘Ate Ŋu Anɔ Agbe Tegbee’—nya ʋee mawo wɔ dɔ ɖe dzinye enumake. Nya ma ŋue míeɖoa dze tsoe ɣesiaɣi, gake míekpɔ ta nɛ kpɔ o.” Esi Yehowa Ðasefo aɖe si vaa gakpɔa me va wɔ numedzodzro geɖe kple Cedric megbe la, eva kpɔe be yeƒe asi ate ŋu asu nusi dim yenɔ la dzi—gake ato ɖoɖo si Mawu wɔ ko dzi.

Cedric gblɔ be: “Esi medzudzɔ hadede kple xɔ̃nye tsãtɔwo ko la, meva wɔ ŋgɔyiyi kabakaba.” Eƒe ŋgɔyiyi le nugɔmesese kple dzidzɔkpɔkpɔ me menɔ bɔbɔe nɛ o. Egblɔ be: “Megale kutri kum le eŋu kokoko. Ele be makpɔ nyuie le alesi mebua tamee ŋu.” Ẽ, Cedric va kpɔe be tame dzodzro bubu kplɔ ye de Abosam ƒe mɔ̃ me, elabena esusu be yeate ŋu aɖo yeƒe taɖodzinuwo gbɔ ne yeƒo ye ɖokui ɖe vivisesenuwɔnawo me.

Dzidzɔtɔe la, woɖe asi le Cedric ŋu tso gaxɔ me xoxoxo, eye edea ha ɣesiaɣi kple amesiwo hã ƒe asi su nusi dim wonɔ dzi. Yehowa Ðasefoe wònye fifia eye agbe nɔnɔ le Paradisonyigba dzi ƒe mɔkpɔkpɔ si le wo sie le eya hã si. Ele mɔ kpɔm hã be woava ɖe Satana ƒe ŋusẽkpɔɖeamedzi fluame ɖesiaɖe ɖa.

Gake menye sɔhɛ abe Cedric ene ko sie etsɔme like le o; dzila mawuvɔ̃la siwo ƒãa lɔlɔ̃ na Biblia me nyateƒe ɖe wo viwo mee nyi wo dometɔ bubuwo.

Mawumehehenana Ðea Vi

Blema Fia Salomo nunyala la ŋlɔ bena: “Mlã ɖevi ɖe mɔ, si wòato la ŋu, ne eva tsi la, mate ɖa le edzi o.” (Lododowo 22:6) Nya sia ƒe nyateƒenyenye dze le sɔhɛ geɖe siwo ɖoe wo ɖokui dzi be yewoawɔ ɖe Biblia ƒe dzidzenuwo dzi la gome.

Nu mae Sheila, Gordon, kple Sarah wowɔ. Wogblɔ be yewo dzilawo bu Kristo ƒe sedede be ‘woayi aɖawɔ nusrɔ̃lawo’ dzi wɔwɔ nu vevii ale be woyina ɖaɖea gbeƒã Fiaɖuƒe nyanyuia. (Mateo 24:14; 28:19, 20) Sheila gblɔ be: “Ne mía kple Dada míawɔ nyametsotso ɖesiaɖe la, míebiaa mía nɔewo zi geɖe be, ‘Ŋusẽ kae wòakpɔ ɖe gbeƒãɖeɖedɔa dzi?’ ” Egblɔ be: “Míeɖea asi le nu geɖe siwo míeɖo be míawɔ la ŋu le nuŋububu alea ta,” eye egblɔ kpee be, “gake woyraa mí ale gbegbe!” Ne Sheila kple dadaa wozã ŋkeke bliboa tsɔ gblɔ nyanyuia na amewo le woƒe aƒewo me vɔ megbe la, wonɔa ha dzim zɔna yia aƒeme. Egblɔ be: “Nye dzidzɔ gba go. Dzi gadzɔam fifia gɔ̃ hã.”

Gordon gaɖoa ŋku Memleɖa fiẽ dodzidzɔname aɖewo dzi. Gordon gblɔ be: “Hamemegãwo kpeam yia woƒe aƒewo me, afisi míebiaa nya hewɔa numedzodzro siwo me tsɔɖui le la le. Wodea dzi ƒo na mí be míalé Biblia me kpukpui aɖewo ɖe susu me, be míaƒo nu tso Ŋɔŋlɔawo me nyatiwo ŋu faa, be míagblɔ gbeƒãɖeɖe me nuteƒekpɔkpɔwo, kple be míanya alesi Fiaɖuƒedɔa le ta kekemii. Esiawo katã na mete ŋu ɖo gɔmeɖoanyi nyui aɖe eye metu Yehowa Mawu lɔlɔ̃ ɖo.”

Dzi dzɔa Sarah ne eɖo ŋku fiẽ siwo wòtsɔ yi ɖasrãa Ðasefowo kpɔnae dzi. “Míeɖua nu ɖe du. Azɔ míeƒoa saŋku kplɔa amesiwo le Mawu Fiaɖuƒea ƒe hawo dzim la ɖo tsɔ ƒoa sasrãkpɔa tae. Haƒoƒo kpe ɖe mía ŋu ale gbegbe, vevietɔ le míaƒe sukudeɣi, elabena enana ƒomea wɔa nu ɖekae.”

Nyateƒee wònye be menye sɔhɛ siwo katã di be yewoadze Yehowa ŋu ƒe ƒome mee nuwo nyo le o. Gake hadede kplikplikpli kple Ðasefowo ƒe ƒome bubu siwo le hamea me na wonɔa dedie eye wokpɔnɛ be amewo le yewo si.

De Asixɔxɔ Etsɔme ƒe Gɔmeɖoanyi Like Ŋu

Tiatia aɖe dze ŋgɔ sɔhɛwo egbea. Woate ŋu ayi edzi anɔ xexe vɔ̃ɖi sia me wo kplii woade ta tsɔtsrɔ̃ me le “xaxa gã” si Yesu gblɔ ɖi si gbɔna la me. Alo woate ŋu ‘aɖo ŋu ɖe Mawu ŋu eye woalé eƒe sewo me ɖe asi’ abe alesi hakpala Asaf si gbɔgbɔ ʋã la dzi hae ene. Toɖoɖo Mawu ana womazu “ƒome sẽto dzeaglã, ƒome, si ƒe dzi meli ke o, eye eƒe gbɔgbɔ meku ɖe Mawu ŋu le nyateƒe me o la” o.—Mateo 24:21; Psalmo 78:6-8.

Àkpɔ sɔhɛ geɖe siwo ƒe nu anyo ŋuwò le Yehowa Ðasefowo ƒe hame 80,000 kple edzivɔ me le xexea me godoo. Wowɔ ɖe aɖaŋu si Paulo ɖo na ɖekakpui Timoteo dzi “bene woawɔ dɔmenyo, eye woanye kesinɔtɔwo le nu nyui wɔwɔ me, woalɔ̃ nunana ame, woalɔ̃ hadede, eye woaƒo kesinɔnuwo nu ƒu na wo ɖokui, si anye gɔmeɖoɖoanyi nyui hena ɣeyiɣi si gbɔna.” Ewɔe be fifia la, woƒe asi “[su] agbe vavã la dzi.” (Timoteo I, 6:18, 19) Srɔ̃ nu bubu geɖe tso Kristotɔ akuaku siawo ŋu to woƒe kpekpewo dede me. Ekema etsɔme like ƒe mɔkpɔkpɔ anɔ wò hã asiwò.

[Etenuŋɔŋlɔwo]

[Nɔnɔmetata si le axa 7]

Gbɔgbɔ vɔ̃woe nɔ ŋutsu siwo ‘do adã eteƒe mekɔ o’ siwo ŋu Yesu da gbe le la me

[Nɔnɔmetata si le axa 8]

“Gɔmeɖoɖoanyi nyui hena ɣeyiɣi si gbɔna” la tutuɖo