Filemon Kple Onesimo Wowɔ Ðeka le Nɔvi Kristotɔwo ƒe Habɔbɔa Me

LƐTA siwo tso Mawu ƒe gbɔgbɔ me siwo apostolo Paulo ŋlɔ la dometɔ ɖeka ku ɖe ŋutsu eve aɖewo dome kuxi si gbɔ kpɔkpɔ bia ŋuɖɔɖɔɖo ŋu. Wo dometɔ ɖekae nye Filemon, eye ame eveliae nye Onesimo. Amekawoe nye ŋutsu siawo? Nukae na Paulo tsɔ ɖe le woƒe nya la me?

Kolose si le Asia Sue ye Filemon, amesi woŋlɔ lɛtaa na la nɔ. Togbɔ be Kristotɔ geɖe siwo nɔ nuto ma ke me medze si Paulo o hã la, Filemon ya dze sii, elabena apostolo la ƒe gbeƒãɖeɖedɔae na wòva xɔ nyanyuia. (Kolosetɔwo 1:1; 2:1) Paulo dze sii be enye ‘hadɔwɔla lɔlɔ̃tɔ.’ Filemon ɖo xɔse kple lɔlɔ̃ ƒe kpɔɖeŋu. Enye amedzrowɔla eye wònye amesi gbɔ ehati Kristotɔwo kpɔa gbɔɖeme le. Edze abe alɔme nɔ Filemon si vie ene, elabena eƒe aƒeme lolo ale be wo gbɔ hamea te ŋu wɔa kpekpewo le afima. Wogblɔ be ɖewohĩ Apia kple Arxipo, siwo nye ame eve bubu siwo hã woyɔ le Paulo ƒe lɛtaa me nye srɔ̃a kple viaŋutsu. Kluvi ɖeka ya teti nɔ Filemon si, si nye Onesimo.—Filemon 1, 2, 5, 7, 19b, 22.

Enye Sisila le Roma

Ŋɔŋlɔawo megblɔ nusita Onesimo nɔ Paulo gbɔ le Roma si didi kilometa 1,400 tso enɔƒe, afisi woŋlɔ lɛtaa le ɖo ɖe Filemon le ƒe 61 M.Ŋ. me lɔƒo la na mí o. Gake Paulo gblɔ na Filemon be: “Ne [Onesimo wɔ] vɔ̃ aɖe ɖe ŋuwò, alo wònyi fe aɖe le asiwò la, bui nam.” (Filemon 18) Nya siawo na eme kɔ ƒã be kuxi aɖe nɔ Onesimo kple eƒe aƒetɔ Filemon dome. Paulo ŋlɔ eƒe lɛta la be wòatsɔ aɖɔ ŋutsu eve siawo dome ɖo.

Wogblɔ be anye be Onesimo va zu sisila esi wòfi Filemon ƒe ga be wòate ŋu asi ayi Roma. Eɖoe be yeanɔ afima atsaka kple ame gbogboawo.a Le Hela kple Roma nutowo me la, menye kluviwo ƒe aƒetɔwo koe sisilawo va zu kuxi gã aɖe na o ke enye kuxi na dudzikpɔlawo hã. Wogblɔ be Roma ŋutɔ va zu afisi kluvi sisilawo “dia sitsoƒe le si ame geɖe nya.”

Aleke Paulo wɔ do go Onesimo? Biblia megblɔe na mí o. Esi ablɔɖe yeye si Onesimo susu be yekpɔ la nu yi la, edze sii be yede ye ɖokui afɔku gã aɖe me. Le Roma-dua me la, kpovitɔ tɔxɛ aɖewo nɔa kluvi sisilawo dim, eye nya si wotsɔna ɖe wo ŋu nye agɔdzedze gãtɔ kekeake siwo ŋu blemase tsi tre ɖo la dometɔ ɖeka. Gerhard Friedrich gblɔ be “wotsɔ ga xɔdzo dea dzesi kluvi sisila siwo woléna ƒe ŋgonu. Wowɔa fu wo zi geɖe . . . , wodaa wo ɖe lãwo dome le fefewɔƒewo, alo woklãa wo ɖe ati ŋu be wòado vɔvɔ̃ na kluvi bubuwo ne womagasrɔ̃ woƒe kpɔɖeŋu o.” Friedrich gblɔ be ɖewohĩ esi ga si Onesimo fi va vɔ eye wòdze agbagba be yeadi bebeƒe alo dɔ aɖe awɔ do kpoe la, eɖe kuku na Paulo, amesi ŋuti nya wòse le Filemon ƒeme, be wòakpɔ ye ta eye wòaxɔ nya ɖe ye nu.

Ame bubuwo xɔe se be ɖe Onesimo ɖoe koŋ si yi eƒe aƒetɔ xɔlɔ̃wo dometɔ ɖeka gbɔ, eye enɔ mɔ kpɔm be to ame ma dzi la, ɖewohĩ ƒomedodo nyui agava nɔ ye kple yeƒe aƒetɔ si do dziku wòsɔ ɖe susu bubu aɖewo ta la dome. Ŋutinyamenuŋlɔɖiwo ɖee fia be nusia nye “nyagbɔkpɔnu si bɔ si ŋudɔ kluviwo wɔna ne woɖo xaxa me.” Agbalẽnyala Brian Rapske gblɔ be ne nenemae la, ke “ate ŋu anye be” Onesimo fi fia “ale be wòakpe ɖe eŋu wòate ŋu aɖo Paulo si axɔ nya ɖe enu gbɔ ke menye ɖe wòɖoe be yeasi o.”

Paulo Kpe Ðe Eŋu

Nuka ke na Onesimo si o, edze ƒã be ebia Paulo ƒe kpekpeɖeŋu bene woadzra wo kple eƒe aƒetɔ si do dziku la dome ɖo. Nya sia va zu kuxi na Paulo. Kluvi dzimaxɔsetɔ si va zu nuvlowɔla si le sisim ye amesia nye. Ðe apostolo la ate kpɔ akpe ɖe eŋu ale be wòable exɔlɔ̃ Kristotɔ nu be megawɔ eƒe gomenɔamesi si le se nu ŋudɔ atsɔ ana tohehe sesẽe oa? Nukae Paulo awɔ?

Esime Paulo ŋlɔ lɛta na Filemon la, edze ƒã be sisila la nɔ apostolo la gbɔ hena ɣeyiɣi aɖe xoxo. Enɔ egbɔ wòdidi vie ale be Paulo gblɔ be Onesimo va zu ‘nɔvi lɔlɔ̃tɔ.’ (Kolosetɔwo 4:9) Paulo gblɔ le eya ŋutɔ ƒe gbɔgbɔmeƒomedodo kple Onesimo ŋu be: “Mele kuku ɖem na wò ɖe vinye Onesimo, si medzi le nye bablawo me la ta.” Le nya siwo katã wògblɔ me la, Filemon manya nɔ mɔ kpɔm na nya ma ya sese kura o. Apostoloa gblɔ be kluvi si menye “viɖe aɖeke” tsã o la zu nɔvi Kristotɔ hetrɔ gbɔna. Fifia Onesimo anye “viɖe nyui,” alo amesi “ŋu viɖe le,” eye wòato esia me anɔ agbe ɖe gɔmesese si le eƒe ŋkɔ ŋu nu.—Filemon 1, 10-12.

Onesimo na kpekpeɖeŋu geɖe apostolo si nɔ gaxɔ me la. Le nyateƒe me la, anye ne Paulo ana wòanɔ egbɔ hafi, gake tsɔ kpe ɖe eƒe se nu manɔmanɔ ŋu la, aganye dada le Filemon ƒe gomenɔamesiwo dzi. (Filemon 13, 14) Le lɛta bubu si Paulo ŋlɔ le ɣeyiɣi ma ke me lɔƒo na hame si kpena le Filemon ƒe aƒeme me la, eyɔ Onesimo be “nɔvi nuteƒewɔla lɔlɔ̃tɔ, si tso mia dome.” Esia fia be Onesimo wɔ nu tsɔ ɖee fia xoxo be woate ŋu aka ɖe ye dzi.—Kolosetɔwo 4:7-9.b

Paulo de dzi ƒo na Filemon be wòaxɔ Onesimo nyuie gake mezã eƒe apostolonyenye ƒe ŋusẽ tsɔ zi edzi be wòawɔe nenema alo be wòana ablɔɖe eƒe kluvi la o. Le xɔlɔ̃wɔwɔ kple lɔlɔ̃ si le wo me na wo nɔewo ta la, Paulo ka ɖe edzi be Filemon ‘awɔe wòawu’ alesi yebia gɔ̃ hã. (Filemon 21) Míate ŋu anya nusi ‘wòawu gɔ̃ hã’ afia o elabena Filemon koe ate ŋu atso nya me le nusi wòawɔ Onesimo ŋu wòasɔ. Ame aɖewo gblɔ be Paulo ƒe nyawo nye ayemebiabia be ‘woagbugbɔ’ sisila la ‘aɖo ɖa ale be wòate ŋu ayi kpekpeɖeŋu nana Paulo si gɔme wòdze xoxo la dzi.’

Ðe Filemon lɔ̃ ɖe Paulo ƒe kukuɖeɖe ɖe Onesimo ta dzia? Kakaɖedzi li be elɔ̃ ɖe edzi, togbɔ be ɖewohĩ esia madze Kolose kluviwo ƒe aƒetɔwo ŋu o hã, amesiwo adi be woahe to na Onesimo wòanye kpɔɖeŋu na woa ŋutɔwo ƒe kluviwo be womagasrɔ̃ eƒe nuwɔna la o.

Onesimo—Ŋutsu si Trɔ

Aleke ke o, Onesimo trɔ yi Kolose kple amenyenye yeye. Esi nyanyuia ƒe ŋusẽ trɔ eƒe tamesusu ta la, ɖikeke mele eme o be eva zu nuteƒewɔla le Kristo-hame si nɔ du ma me la me. Ŋɔŋlɔawo megblɔe ne Filemon va na ablɔɖe Onesimo mlɔeba alo menae o. Gake le gbɔgbɔmenukpɔsusu nu la, amesi nye sisila tsã la va zu ablɔɖevi. (Tsɔe sɔ kple Korintotɔwo I, 7:22.) Amewo wɔa tɔtrɔ mawo tɔgbe egbea. Ne amewo tsɔ Biblia me gɔmeɖosewo wɔ dɔe le woƒe agbenɔnɔ me la, woƒe nɔnɔmewo kple amenyenyewo trɔna. Wokpena ɖe amesiwo wobuna tsã be womenye viɖe aɖeke le amewo dome o ŋu wova zua dumevi nyuiwo.c

Aleke gbegbe tɔtrɔ va xɔse vavãtɔ me na ame toa vovoe nye si! Togbɔ be ɖewohĩ Onesimo manye “viɖe aɖeke” na Filemon tsã o hã la, ɖikeke mele eme o be Onesimo si zu ame yeye la nɔ agbe ɖe eƒe ŋkɔa nu henye amesi “ŋu viɖe le.” Eye kakaɖedzitɔe la, enye yayra be Filemon kple Onesimo va wɔ ɖeka le nɔvi Kristotɔwo ƒe habɔbɔa me.

[Etenuŋɔŋlɔwo]

[Aɖaka si le axa 30]

Kluviwo le Roma-Se Te

Le Romatɔwo ƒe se si nɔ dɔ wɔm le ƒe alafa gbãtɔ M.Ŋ. me la, alesi wowɔa nu ɖe kluvi ŋui la nɔ te ɖe alesi eƒe aƒetɔ ƒe seselelãmewo, nudzodzrowo, kple dziku le dzi. Numeɖela Gerhard Friedrich gblɔ le eŋu be, “ne woagblɔe koŋ le se nu la, menye amee kluvi nye o, ke boŋ enye nunɔamesi si ŋudɔ eƒe aƒetɔ ate ŋu awɔ alesi dze eŋui. . . . Wobua [eya] kple aƒemelã kple dɔwɔnuwo sɔsɔe eye takpɔkpɔ aɖeke mele esi le dusewo me o.” Kluvi mate ŋu atsɔ se akplɔ ame ɖe nu madzɔmadzɔ si wowɔ ɖe eŋu ta o. Nusi wòle be wòawɔ koe nye be wòawɔ ɖe eƒe aƒetɔ ƒe sededewo dzi. Seɖoƒe menɔ tohehe si aƒetɔ si do dziku atsɔ nɛ ŋu o. Ne ewɔ vodada sue aɖe gɔ̃ hã la, ŋusẽ le esi be wòawɔe agbe kple ku ƒe nya.d

Togbɔ be kluvi alafa geɖe ate ŋu anɔ kesinɔtɔ si hã la, eve alo etɔ̃ te ŋu nɔa ƒome si le sue wu gɔ̃ hã si. Agbalẽnyala John Barclay gblɔ be: “Dɔ vovovo geɖe ŋutɔwoe aƒemekluviwo wɔna. Míekpɔa kluvi wonyea agbonudzɔlawo, nuɖalawo, kplɔ̃subɔlawo, xɔmedzraɖolawo, dɔtsɔlawo, ɖevigbɔkpɔlawo, ɖevidzikpɔlawo, kple ame ŋutɔ ƒe dɔtsɔla si wɔa dɔ hamehame, tsɔ kpe ɖe asinudɔ vovovo wɔla siwo woate ŋu akpɔ le aƒe gãwo kple kesinɔtɔwo ƒe aƒewo me ŋu. Le nusi dzɔna ŋutɔŋutɔ nu la, aƒetɔ ƒe nɔnɔme dzi koŋue aƒemekluvi ƒe agbenɔnɔ ƒe nyonyome nɔ te ɖo eye ate ŋu anye le go evea siaa me: aƒetɔ sẽŋuta gbɔ nɔnɔ ate ŋu anye fukpekpe le nɔnɔme vɔ̃ɖi geɖe me, gake aƒetɔ dɔmenyotɔ si kpɔa nublanui na ame ate ŋu ana agbe nanya nɔ nɛ eye mɔkpɔkpɔ nanɔ esi. Ŋutasesẽ le wo ŋu ƒe kpɔɖeŋu nyanyɛwo le blemagbalẽwo me, gake nuŋlɔɖi geɖe hã li si ɖo kpe lɔlɔ̃ si nɔ aƒetɔ aɖewo kple woƒe kluviwo dome dzi.”