Mina Míanye Amesiwo Si Xɔse Le

“Míawo míenye amesiwo gbugbɔna ɖe megbe . . . o, ke boŋ amesiwo xɔnɛ sena . . . dometɔwo míenye.”—HEBRITƆWO 10:39.

 1. Nukatae míate ŋu agblɔ be Yehowa subɔla nuteƒewɔla ɖesiaɖe ƒe xɔse xɔ asi?

ƔEYIƔI bubu si nàgayi Fiaɖuƒe Akpata si me Yehowa subɔlawo le fũ la, tɔ sẽ nàbi kɔ akpɔ amesiwo ƒo xlã wò ɖa. Bu mɔ geɖe siwo nu woɖe xɔse fia le ŋu kpɔ. Àkpɔ ame tsitsi siwo subɔ Mawu ƒe gbogbo aɖewo, sɔhɛ siwo nɔa te ɖe hatiwo ƒe nyaƒoɖeamenuwo nu gbesiagbe, kpakple dzila siwo le agbagba dzem be yewoanyi yewo viwo woanye mawuvɔ̃lawo. Hamemegã kple subɔsubɔdɔwɔla siwo tsɔa agbanɔamedzi geɖe hã li. Ẽ, àkpɔ gbɔgbɔ me nɔviŋutsu kple nɔvinyɔnu tsitsiwo kple ɖeviwo siaa siwo ɖua mɔxenu ɖesiaɖe dzi kple susu be yewoasubɔ Yehowa. Aleke gbegbe wo dometɔ ɖesiaɖe ƒe xɔse xɔ asii enye si!—Petro I, 1:7.

 2. Nukatae viɖe le aɖaŋu siwo Paulo ɖo le Hebritɔwo ta 10 kple 11 ŋu na mí egbea?

² Ne amegbetɔ madeblibo aɖewo li siwo nya xɔse ƒe vevienyenye nyuie wu apostolo Paulo la, ke wo dometɔ ʋɛ aɖewo koe. Le nyateƒe me la, ede dzesii be xɔse vavãtɔ kplɔa ame yia “luʋɔ xɔxɔ ɖe agbe” gbɔe. (Hebritɔwo 10:39, NW) Gake Paulo nya be woate ŋu atu nu kple ame ƒe xɔse eye wòagbɔdzɔ le xɔsemanɔamesi ƒe xexe sia me. Etsi dzi vevie ɖe Hebri Kristotɔ siwo nɔ Yerusalem kple Yudea, amesiwo nɔ ʋiʋlim be yewoakpɔ yewoƒe xɔse ta la nu. Esi míele Hebritɔwo ta 10 kple 11 ƒe akpa aɖewo me dzrom la, mina míade dzesi mɔnu siwo Paulo zã tsɔ tu woƒe xɔse ɖoe. Le emedzodzro me la, míakpɔ alesi míate ŋu ado ŋusẽ mía ŋutɔwo kple amesiwo dome míele la ƒe xɔse ɖe edzii.

Mika Ðe Mia Nɔewo Dzi

 3. Aleke Paulo ƒe nya siwo le Hebritɔwo 10:39 fia be eka ɖe nɔviaŋutsu kple nɔvianyɔnu haxɔsetɔwo dzi?

³ Nu gbãtɔ si míade dzesi enye susu nyui si nɔ Paulo si ɖe eƒe nyawo xlẽlawo ŋu. Eŋlɔ be: “Ke míawo míenye amesiwo gbugbɔna ɖe megbe ɖe gbegblẽ me la dometɔwo o, ke boŋ amesiwo si xɔse le hena luʋɔ xɔxɔ ɖe agbe la dometɔwo míenye.” (Hebritɔwo 10:39, NW) Susu nyui ye nɔ Paulo si ɖe ehati Kristotɔwo ŋu ke menye susu gbegblẽ o. De dzesii hã be ezã nya si nye “míawo.” Ame dzɔdzɔe ye Paulo nye. Gake meƒo nu ɖokuidodoɖedzitɔe na eƒe nyawo xlẽlawo abe ɖe wòle dzɔdzɔe sasasã wu wo ene o. (Tsɔe sɔ kple Nyagblɔla 7:16.) Ke boŋ ebu eɖokui kpe ɖe wo ŋu. Eƒo nu kple kakaɖedzi si tso dzime be ye kple Kristotɔ wɔnuteƒe siwo axlẽ yeƒe nyawo la siaa yewoadze ŋgɔ kplamatsedonu ɖedzileameƒo siwo le yewo ŋgɔ, be yewoatsɔ dzinɔameƒo agbe hehe ɖe megbe ɖe gbegblẽ me, eye be yewoaɖee afia be yewonye amesiwo si xɔse le.

 4. Susu kawo tae Paulo ka ɖe ehati xɔsetɔwo dzi?

⁴ Nukatae kakaɖedzi nɔ Paulo si nenema? Ðe menya gbɔdzɔgbɔdzɔ siwo nɔ Hebri Kristotɔawo ŋu oa? Menye nenemae o, elabena eɖo aɖaŋu si le tẽ na wo be wòakpe ɖe wo ŋu woaɖu woƒe gbɔgbɔ me gbɔdzɔgbɔdzɔwo dzi. (Hebritɔwo 3:12; 5:12-14; 6:4-6; 10:26, 27; 12:5) Ke hã la, susu nyui eve ya teti nɔ Paulo si siwo ta wòka ɖe nɔviawo dzi ɖo. (1) Esi Paulo nye Yehowa srɔ̃la ta la, edze agbagba be yeatsɔ susu si Yehowa tsɔ kpɔa Mawu ƒe amewoe la akpɔ woe. Menye woƒe gbɔdzɔgbɔdzɔwo ko ŋue eƒe susu nɔ o, ke boŋ nɔnɔme nyui siwo le wo si kple alesi woate ŋu ava tiae be yewoawɔ nu nyui le etsɔme ŋue eƒe susu nɔ. (Psalmo 130:3; Efesotɔwo 5:1) (2) Paulo ka ɖe gbɔgbɔ kɔkɔea ƒe ŋusẽ dzi bliboe. Enya be mɔxenu, alo amegbetɔ ƒe gbɔdzɔgbɔdzɔ aɖeke mate ŋu axe mɔ na Yehowa be wòado kpo ‘ŋusẽ si gbɔ dzɔdzɔmetɔ ŋu’ nana Kristotɔ si le agbagba dzem be yeasubɔe nuteƒewɔwɔtɔe o. (Korintotɔwo II, 4:7; Filipitɔwo 4:13) Eyata menye kakaɖedzi gbɔlo si mele dzɔdzɔme nu, alo mɔkpɔkpɔ dzodzro aɖee nɔ Paulo si na nɔviaŋutsu kple nɔvianyɔnuwo o. Kpeɖodzi nɔ eŋu eye wònɔ te ɖe Ŋɔŋlɔawo dzi sesĩe.

 5. Aleke míate ŋu asrɔ̃ Paulo ƒe kakaɖedzii, eye nukae ate ŋu ado tso eme?

⁵ Kakaɖedzi si nɔ Paulo si la kpɔ ŋusẽ ɖe ame bubuwo dzi vavã. Alesi Paulo ƒo nu dzideƒotɔe na Yerusalem kple Yudea hameawo ado ŋusẽ wo ale gbegbe. Esi Hebri Kristotɔawo dzea ŋgɔ Yudatɔ tsitretsiɖeŋulawo ƒe alɔmeɖeɖe ɖudzinamea kple woƒe ɖekematsɔleme dadatɔe ta la, nyagbɔgblɔ siawo kpe ɖe wo ŋu be woɖoe kplikpaa le woƒe dzi me be yewoanye amesiwo si xɔse le. Ðe míawo hã míate ŋu awɔ nu ma ke na mía nɔewo egbea? Enɔa bɔbɔe ŋutɔ be míakpɔ gbɔdzɔgbɔdzɔ kple nɔnɔme gbegblẽ gbogbo aɖewo le ame bubuwo ŋu. (Mateo 7:1-5) Gake ne míete ŋu de dzesi xɔse tɔxɛ si le amesiame si eye míede asixɔxɔ eŋu la, míate ŋu akpe ɖe mía nɔewo ŋu geɖe wu. Ne míedea dzi ƒo na mía nɔewo alea la, ele eme be míaƒe xɔse asẽ ɖe edzi.—Romatɔwo 1:11, 12.

Mawu ƒe Nya la Zazã Nyuie

 6. Afikae Paulo yɔ nya tsoe esime wòŋlɔ nya siwo le Hebritɔwo 10:38?

⁶ Paulo gatu ehati xɔsetɔwo ƒe xɔse ɖo to Ŋɔŋlɔawo zazã nyuie me. Le kpɔɖeŋu me, eŋlɔ be: “‘Ke ame dzɔdzɔe la anɔ agbe atso xɔse me, eye ne egbugbɔ ɖe megbe la, luʋɔnye makpɔ ŋudzedze nyui le eŋuti o.’” (Hebritɔwo 10:38) Nyagblɔɖila Xabakuk ƒe nyawoe Paulo yɔ le afisia.a Anye be Paulo ƒe nyaawo xlẽla siwo nye Hebri Kristotɔ siwo nya nyagblɔɖigbalẽawo me nyawo nyuie la nya nya siawo. Xabakuk ƒe kpɔɖeŋua sɔ tututu le taɖodzinu si nɔ esi ta—be yeado ŋusẽ Kristotɔ siwo nɔ Yerusalem kple eƒe nutoawo me ƒe xɔse le ƒe 61 M.Ŋ. me. Nukatae?

 7. Ɣekaɣie Xabakuk ŋlɔ eƒe nyagblɔɖia, eye aleke nɔnɔmewo nɔ le Yuda ɣemaɣi?

⁷ Numekuku fia be Xabakuk ŋlɔ eƒe agbalẽa ƒe blaeve tututu do ŋgɔ hafi wova tsrɔ̃ Yerusalem le ƒe 607 D.M.Ŋ. me. Nyagblɔɖila la kpɔe le ŋutega me be Kaldeatɔwo (alo, Babilontɔwo), si nye “dukɔ nyanyrã, si ƒe afɔ tsɔna,” va ƒo ɖe Yuda dzi bibibi hetsrɔ̃ Yerusalem, eye woɖe amewo aboyoe hexɔ dukɔwo le amedzidzedzea me. (Xabakuk 1:5-11) Gake wogblɔ tsɔtsrɔ̃nya ma ɖi ƒe alafa ɖeka kple edzivɔ do ŋgɔ, tso Yesaya ŋɔli ke. Yoyakim ye va xɔ ɖe Fia Yosia ame nyui la teƒe le Xabakuk ŋɔli, eye wogate nu vɔ̃ɖi wɔwɔ le Yuda ake. Yoyakim ti amesiwo ƒoa nu le Yehowa ƒe ŋkɔme la yome hewu wo gɔ̃ hã. (Kronika II, 36:5; Yeremya 22:17; 26:20-24) Eyata mewɔ nuku o be nyagblɔɖila Xabakuk tsɔ nuxaxa fa konyi be: ‘O Yehowa, vaseɖe ɣekaɣi?’—Xabakuk 1:2.

 8. Nukatae Xabakuk ƒe kpɔɖeŋua akpe ɖe ƒe alafa gbãtɔ me Kristotɔwo kple esiwo li egbea ŋu?

⁸ Xabakuk menya alesi gbegbe Yerusalem ƒe tsɔtsrɔ̃ gogoe o. Nenema ke ƒe alafa gbãtɔ me Kristotɔwo hã menya ɣekaɣie Yudatɔwo ƒe nuɖoanyia awu enu o. Eye míawo hã míenya ‘ŋkeke kple gaƒoƒo’ si Yehowa adrɔ̃ ʋɔnu nuɖoanyi vɔ̃ɖi sia o. (Mateo 24:36) Ekema mina míade dzesi ŋuɖoɖo eve ƒokpli si Yehowa na Xabakuk. Gbã la, eka ɖe edzi na nyagblɔɖila la be nuwuwua ava ɖe game dzi tututu. Mawu gblɔ be, “mahe ɖe megbe o,” togbɔ be awɔ abe ɖe eteƒe le didim le amegbetɔ ƒe nukpɔkpɔ nu ene hã. (Xabakuk 2:3) Eveliae nye be, Yehowa ɖo ŋku edzi na Xabakuk be: “Ke ame dzɔdzɔe ya anɔ agbe to eƒe xɔse me.” (Xabakuk 2:4) Nyateƒenya nyui siwo me kɔ kawo gbegbee nye esi! Menye ɣeyiɣi si nuwuwua avae le vevie o, ke ne míayi edzi anɔ agbe ɖe xɔse nu loo alo míado kpo nue le vevie.

 9. Aleke Yehowa subɔla toɖolawo ƒe nuteƒewɔwɔ na woyi edzi nɔ agbee (a) le ƒe 607 D.M.Ŋ. me? (b) le ƒe 66 M.Ŋ. megbe? (d) Nukatae wòle vevie ŋutɔ be míado ŋusẽ míaƒe xɔse?

⁹ Esime wodze Yerusalem dzi le ƒe 607 D.M.Ŋ. me la, Yeremya, eƒe agbalẽŋlɔla Barux, Ebed-Melex, kple Rexab-vi nuteƒewɔlawo kpɔ ŋugbe si Yehowa do na Xabakuk la ƒe nyateƒenyenye teƒe. ‘Wogakpɔtɔ nɔ agbe’ heto tsɔtsrɔ̃ dziŋɔ si va Yerusalem dzi la me. Nukatae? Yehowa ɖo woƒe nuteƒewɔwɔ teƒe na wo. (Yeremya 35:1-19; 39:15-18; 43:4-7; 45:1-5) Nenema ke ƒe alafa gbãtɔ me Hebri Kristotɔwo anya wɔ nu ɖe Paulo ƒe aɖaŋuɖoɖoa nui, elabena esime Roma-srafowo va dze Yerusalem dzi le ƒe 66 M.Ŋ. me eye wogatrɔ dzo evɔ ame aɖeke menya nusita wotrɔ dzo o la, Kristotɔ mawo wɔ ɖe aɖaŋu si Yesu ɖo be woasi la dzi nuteƒewɔwɔtɔe. (Luka 21:20, 21) Wotsi agbe le woƒe nuteƒewɔwɔ ta. Nenema ke míawo hã míatsi agbe ne míelé nuteƒewɔwɔ me ɖe asi vaseɖe nuwuwu. Susu vevi ka gbegbee nye si si ta wòle be míado ŋusẽ míaƒe xɔse fifia!

Xɔse ƒe Kpɔɖeŋuɖolawo Ŋu Nya Gbɔgblɔ be Wòaʋã Ame

10. Nukae Paulo gblɔ le Mose ƒe xɔse ŋu, eye aleke míate ŋu asrɔ̃ Mose le go sia mee?

¹⁰ Paulo to kpɔɖeŋu ʋãmewo hã zazã dzi tsɔ tu xɔse ɖoe. Ne èle Hebritɔwo ta 11 xlẽm la, de dzesi alesi wògblɔ Biblia me me siwo ɖo kpɔɖeŋu ƒe nya wòʋã amee. Le kpɔɖeŋu me, egblɔ be Mose ‘do dzi, abe ɖe wòle amesi womekpɔna o la kpɔm ene.’ (Hebritɔwo 11:27) Ne míagblɔe bubui la, efia be Mose bu Yehowa ame ŋutɔŋutɔe ale gbegbe be ewɔ abe ɖe wònɔ Mawu makpɔmakpɔa kpɔm ene. Ðe woate ŋu agblɔ nenema le mía ŋua? Ele bɔbɔe be míagblɔ be ele be ƒomedodo nanɔ mía kple Yehowa dome, gake ebia agbagbadzedze be míatu ƒomedodo ma ɖo ahado ŋusẽe. Emae nye dɔ si wòle be míawɔ! Ðe Yehowa nye ame ŋutɔŋutɔ na mí ale gbegbe be míebua eŋu ne míele nyametsotsowo wɔm, ne eganye le nya suewo gɔ̃ hã mea? Xɔse ma tɔgbe akpe ɖe mía ŋu be míado dzi le tsitretsiɖeŋu sesẽtɔ gɔ̃ hã me.

11, 12. (a) Anye nɔnɔme kawo mee wodo Henox ƒe xɔse kpɔ le? (b) Teƒeɖoɖo dedziƒoname kae su Henox si?

¹¹ Bu Henox hã ƒe kpɔɖeŋua ŋu kpɔ. Tsitretsiɖeŋu si wòdo goe nu sẽ ale gbegbe. Ele na Henox be wòagblɔ ʋɔnudrɔ̃nya ɖudziname aɖe ɖe ame vɔ̃ɖi siwo nɔ anyi ɣemaɣi la ŋu. (Yuda 14, 15) Yometiti si nɔ nuteƒewɔla sia ŋgɔ nu sẽ, woawɔ fui, ale gbegbe be ɖeko Yehowa ‘ɖee dzoe,’ eɖee le agbagbeawo dome yi alɔ̃me le ku me hafi eƒe futɔwo ƒe asi nava su edzi. Eyata Henox mekpɔ nya si wògblɔ ɖi la ƒe emevava teƒe o. Gake exɔ nunana aɖe si nyo wu sasasã le go aɖewo me.—Hebritɔwo 11:5; Mose I, 5:22-24.

¹² Paulo ɖe nu me be: “Hafi [woatsɔ Henox] ayii la, woɖi ɖase nɛ bena, edze Mawu ŋu nyuie.” (Hebritɔwo 11:5) Nuka fiam wòle? Anye be hafi Henox nayi alɔ̃me le ku me la, ekpɔ ŋutega aɖe ƒomevi, ɖewohĩ anye anyigba dzi Paradiso si me wòafɔ ɖe tsitre ava nɔ kpuie lae. Aleke ke nyaa le o, Yehowa na Henox nya be Yekpɔ ŋudzedze ɖe eƒe agbenɔnɔ nuteƒewɔwɔtɔe ŋu. Henox do dzidzɔ na Yehowa ƒe dzi. (Tsɔe sɔ kple Lododowo 27:11.) Ne èbu Henox ƒe agbenɔnɔ ŋu la, ɖe mewɔa dɔ ɖe dziwò oa? Àdi be yeaɖe xɔse ma tɔgbe afia le agbe mea? Ekema de ŋugble le kpɔɖeŋuɖola mawo tɔgbe ŋu; tsɔe be wonye ame ŋutɔŋutɔwo. Ðoe kplikpaa be yeanɔ agbe le xɔse me tso ŋkeke yi ŋkeke. Ðo ŋku edzi hã be amesiwo si xɔse le la mesubɔa Yehowa le ŋkeke aɖe alo ɣeyiɣi ɖoɖi si dzi Mawu awɔ eƒe ŋugbedodowo dzi ta o. Ke boŋ míeɖoe kplikpaa be míasubɔ Yehowa tegbee! Agbenɔnɔ nenemae nye mɔ nyuitɔ kekeake si nu woanɔ agbe ɖo le nuɖoanyi sia kple esi gbɔna me.

Alesi Woawɔ be Xɔse Nasẽ Ðe Edzi

13, 14. (a) Aleke Paulo ƒe nya siwo le Hebritɔwo 10:24, 25 akpe ɖe mía ŋu be míana dzidzɔ nanɔ míaƒe kpekpewo mee? (b) Susu vevi ka tae míeyia Kristotɔwo ƒe kpekpewo ɖo?

¹³ Paulo gblɔ mɔ ŋutɔŋutɔ geɖe siwo dzi Hebri Kristotɔawo ate ŋu ato ado ŋusẽ woƒe xɔse la na wo. Mina míade ŋugble le eve ko ŋu. Ðewohĩ míenya nuxlɔ̃ame si wòna le Hebritɔwo 10:24, 25 la nyuie, si de dzi ƒo na mí be míaƒo ƒu edziedzi le Kristotɔwo ƒe kpekpewo me. Gake ɖo ŋku edzi be nya siwo gbɔgbɔ ʋã Paulo wòŋlɔ le afima mefia be míanye nukpɔlawo dzro ko le kpekpeawo me o. Ke boŋ Paulo gblɔ le kpekpeawo ŋu be wonye mɔnukpɔkpɔ na mí be míatsɔ adze si mía nɔewo, ade dzo mía nɔewo me bene míasubɔ Mawu bliboe geɖe wu, eye be míade dzi ƒo na mía nɔewo. Ðe míeyi be míana nu, menye be míaxɔ ɖeɖeko o. Emae wɔnɛ be dzidzɔ nɔa kpekpeawo me.—Dɔwɔwɔwo 20:35.

¹⁴ Gake susu vevitɔ si ta míedea Kristotɔwo ƒe kpekpewoe nye be míasubɔ Yehowa Mawu. Míesubɔnɛ ne míekpɔa gome le gbedodoɖa kple hadzidzi me, ne míeɖoa to nyuie, kple ne míetsɔa ‘nuyiwo ƒe kutsetse’ nana—esiawoe nye Yehowa kafukafunya siwo míagblɔ le míaƒe nyaŋuɖoɖowo me kple le dɔdasi siwo míawɔ le kpekpeawo me la me. (Hebritɔwo 13:15) Ne míena taɖodzinu mawo le susu me na mí eye míetsɔ wo de dɔwɔwɔ me le kpekpe ɖesiaɖe me la, atu míaƒe xɔse ɖo ɣesiaɣi kokoko.

15. Nukatae Paulo de dzi ƒo na Hebri Kristotɔwo be woalé woƒe subɔsubɔdɔa me ɖe asi sesĩe, eye nukatae aɖaŋuɖoɖo ma gasɔ na míawo hã egbea?

¹⁵ Mɔ bubu si dzi míato atu xɔse ɖoe nye to gbeƒãɖeɖedɔa wɔwɔ me. Paulo ŋlɔ be: “Mina míalé mɔkpɔkpɔ me ʋuʋu ɖe asi sesĩe, bena magaʋã o; elabena amesi na ŋugbedodo la, enye nuteƒewɔla.” (Hebritɔwo 10:23) Àte ŋu ade dzi ƒo na amewo be woalé nane me ɖe asi sesĩe ne wòwɔ abe ɖe wodi be yewoaɖe asi le nua ŋu ene. Le nyateƒe me la, Satana nɔ ʋu yɔm ɖe Hebri Kristotɔwo nu be woaɖe asi le woƒe subɔsubɔdɔa ŋu, eye ele ʋu yɔm ɖe Mawu ƒe ame siwo li egbea hã nu nenema ke. Nukae wòle be míawɔ le fuɖename siawo me? Bu nusi Paulo wɔ ŋu kpɔ.

16, 17. (a) Aleke dzi va ɖo Paulo ƒo ɖe subɔsubɔdɔa ŋui? (b) Afɔ kawoe wòle be míaɖe ne míekpɔe be míele vɔvɔ̃m na Kristotɔwo ƒe subɔsubɔdɔa ƒe akpa aɖe wɔwɔ?

¹⁶ Paulo ŋlɔ na Kristotɔ siwo nɔ Tesalonika be: “Míekpe fu, eye wodo vlo mí le Filipi tsã hafi, abe alesi mienyae ene, gake míekpɔ dzideƒo le mía Mawu me hegblɔ eƒe nyanyui la fia mi le ʋiʋli geɖe me.” (Tesalonikatɔwo I, 2:2) Aleke “wodo vlo” Paulo kple eƒe zɔhɛwoe le Filipi? Agbalẽnyala aɖewo gblɔ be Helagbe me nya si Paulo zã la fia anyrawɔwɔ le ame ŋu si fia ame dzudzu alo ŋukpedodo ame. Filipi-dumegãwo ƒo wo kple ati, wode wo gaxɔ me, eye wode kunyowu wo. (Dɔwɔwɔwo 16:16-24) Ŋusẽ kae nudzɔdzɔ ma si me vevesese le la kpɔ ɖe Paulo dzi? Ðe amesiwo nɔ Tesalonika, si nye du bubu si me Paulo gayi le eƒe dutanyanyuigbɔgblɔdɔa wɔwɔ me, kpɔe be vɔvɔ̃ ɖoe wòhe ɖe megbea? Kpao, ‘elé dzi ɖe ƒo.’ Eɖu vɔvɔ̃ dzi heyi gbeƒãɖeɖea dzi dzinɔameƒotɔe.

¹⁷ Afikae Paulo ƒe dzideƒoa tso? Eya ŋutɔ gbɔ yea? Ao, egblɔ be ‘Mawu gbɔe’ yekpɔ dzideƒo tsoe. Biblia gɔmeɖelawo ƒe numekugbalẽ aɖe gblɔ be woagate ŋu agblɔ nya sia be, “Mawu ɖe vɔvɔ̃ ɖa le míaƒe dzi me.” Eyata ne dzi mele ƒowò tututu ɖe wò subɔsubɔdɔa ŋu o, alo dɔa ƒe akpa aɖe doa vɔvɔ̃ na wò la, nukata màɖe kuku na Yehowa be neɖe vɔvɔ̃ le ye hã me o? Biae be wòaɖe vɔvɔ̃ ɖa le wò dzi me. Biae be wòakpe ɖe ye ŋu yealé dzi ɖe ƒo awɔ dɔa. Gakpe ɖe eŋu la, wɔ afɔɖeɖe aɖewo siwo aɖe vi. Le kpɔɖeŋu me, wɔ ɖoɖo be yeayi gbeadzi kple amesi bi ɖe ɖaseɖiɖidɔa ƒe akpa si le fu ɖem na wò la me. Ate ŋu anye ɖaseɖiɖi le dɔwɔƒewo, ablɔdziɖaseɖiɖi, vomeɖaseɖiɖi, alo telefon dzi ɖaseɖiɖi. Ðewohĩ wò zɔhɛa adi be yeaxɔ ŋgɔ aɖi ɖase gbã. Ne nenemae la, ke lé ŋku ɖe eŋu nàsrɔ̃e. Gake ele be nàlé dzi ɖe ƒo atee kpɔ.

18. Yayra kawoe míakpɔ ne míelé dzi ɖe ƒo hewɔ míaƒe subɔsubɔdɔa?

¹⁸ Ne èlé dzi ɖe ƒo la, bu nusi ate ŋu ado tso eme ŋu kpɔ. Ne èku kutri eye mèna dzi ɖe le ƒowò o la, nyateƒea gbɔgblɔ na ame bubuwo ƒe nuteƒekpɔkpɔ nyuiwo asu asiwò, siwo anye ne woato ŋuwò hafi. (Kpɔ axa 25.) Wò dzi adze eme be yedze Yehowa ŋu to nusi sesẽ na ye la wɔwɔ me. Akpe ɖe ŋuwò eye ayra wò be nàɖu nusiwo nèvɔ̃na na dzi. Wò xɔse asẽ ɖe edzi. Nyateƒe wònye be màte ŋu adze agbagba be yeatu amewo ƒe xɔse ɖo evɔ ŋusẽ nagbe tɔwò ŋu ɖoɖo o.—Yuda 20, 21.

19. Teƒeɖoɖo xɔasi kae li na “amesiwo si xɔse le” la?

¹⁹ Neva eme be nàyi edzi ado ŋusẽ mia kple amesiwo dome nèle la ƒe xɔse. Anya wɔ na wò ne àtu mia kple ame bubuwo ɖo to alesi nàbi ɖe Mawu ƒe Nya la zazã me, to xɔse ƒe kpɔɖeŋuɖola siwo le Biblia me sɔsrɔ̃ me ahana woakpɔ ŋusẽ ɖe dziwò, to alesi nàdzra ɖo ɖe Kristotɔwo ƒe kpekpewo ŋu ahakpɔ gome le wo mee la me, eye to alesi nàlé dutoƒosubɔsubɔdɔa ƒe mɔnukpɔkpɔ xɔasia me ɖe asi sesĩe me. Ne èle nusiawo wɔm la, kakaɖedzi nenɔ asiwò be le nyateƒe me la, ènye ‘amesiwo si xɔse le la dometɔ ɖeka.’ Ðo ŋku edzi hã be teƒeɖoɖo xɔasi aɖe li na amesiawo tɔgbe. Wonye “amesiwo si xɔse le hena luʋɔ xɔxɔ ɖe agbe la dometɔwo.”b Neva eme be wò xɔse natsi ɖe edzi, eye neva eme be Yehowa Mawu naxɔ wò ɖe agbe tegbetegbe!

[Etenuŋɔŋlɔwo]

Aleke Nàɖo Wo Ŋui?

◻ Aleke Paulo ɖee fia be yeka ɖe Hebri Kristotɔawo dzi, eye nukae míate ŋu asrɔ̃ tso nusia me?

◻ Nukatae nyagblɔɖila Xabakuk ƒe nya si Paulo yɔ la sɔ?

◻ Xɔse ƒe kpɔɖeŋuɖola siwo le Ŋɔŋlɔawo me kawo ƒe nyae Paulo gblɔ wòwɔ dɔ ɖe ame dzi?

◻ Xɔse tutuɖo ƒe mɔnu ŋutɔŋutɔ kawo ƒe aɖaŋue Paulo ɖo?

[Nɔnɔmetata si le axa 23]

Le vevesese si me Paulo to le Filipi megbe la, egalé dzi ɖe ƒo heyi gbeƒãɖeɖea dzi

[Nɔnɔmetata si le axa 24]

Àte ŋu alé dzi ɖe ƒo ate ɖaseɖiɖimɔnu vovovoawo kpɔa?