Megadzɔ Gbeɖe Be Míagbugbɔ Ðe Megbe Ðe Gbegblẽ Me o!
“Míawo míenye amesiwo gbugbɔna ɖe megbe ɖe gbegblẽ me la dometɔwo o.”—HEBRITƆWO 10:39.
1. Nudzɔdzɔ kawoe na vɔvɔ̃ ɖo apostolo Petro?
ÐEWOHĨ ewɔ mo yaa na apostoloawo ŋutɔ esime woƒe Aƒetɔ lɔlɔ̃tɔ, Yesu, gblɔ na wo be wo katã woaka hlẽ agblẽ ye ɖi. Aleke nusia tɔgbe adzɔe—le gaƒoƒo sia si me wòhiã kpekpeɖeŋu le wu? Petro ƒo nu kple kakaɖedzi be: “Ne wo katã woakpɔ nuɖiaɖia hã la, menye nye o.” Le nyateƒe me la, Petro nye kalẽtɔ si ƒo dzi nɔ. Gake esime wode Yesu asi eye wolée la, apostoloawo—kple Petro hã—ka hlẽ. Emegbe esi wonɔ gbe biam Yesu le Nunɔlagã Kayafa ƒeme la, Petro nɔ lalam le xɔxɔnu nɔ didim vevie be yeakpɔ nusi ava dzɔ. Esi vuvɔ nɔ wɔwɔm eye zãa nɔ tsitsim ɖe edzi la, anɔ eme be Petro va nɔ vɔvɔ̃m be ɖewohĩ wogbɔna Yesu kple amesiwo katã dea ha kplii la wu ge. Esi teƒea nɔla aɖewo kpɔ Petro dze sii be enye Yesu ƒe zɔhɛ veviwo dometɔ ɖeka la, vɔvɔ̃ ɖoe. Esẽ nu zi gbɔ zi etɔ̃ be kadodo aɖeke mele ye kple Yesu dome o. Petro gbe gɔ̃ hã be yemenyae o!—Marko 14:27-31, 66-72.
2. (a) Nukatae vɔvɔ̃ si lé Petro le zã si me wolé Yesu la mena wòzu ‘amesiwo gbugbɔna ɖe megbe dometɔ o’? (b) Tameɖoɖo kplikpaa kae le be wòanɔ mía si?
2 Gbɔdzɔgbɔdzɔ ƒe ɣeyiɣi aɖee wònye le Petro ƒe agbe me, eye ɖikeke mele eme o be exaa nu ɖe ɣeyiɣi sia ta le eƒe agbemeŋkeke mamlɛawo me. Gake ɖe nusi Petro wɔ zã ma me na wòzu vɔvɔ̃nɔtɔa? Ðe wòzu amesi ‘ƒomevi’ Paulo va yɔ emegbe esi wòŋlɔ be: “Ke míawo míenye amesiwo gbugbɔna ɖe megbe ɖe gbegblẽ me la dometɔwo” oa? (Hebritɔwo 10:39) Ðewohĩ mía dometɔ akpa gãtɔ alɔ̃ ɖe edzi be menye Petro ŋue Paulo ƒe nya la ku ɖo o. Nukatae? Elabena Petro ƒe vɔvɔ̃a menɔ anyi eteƒe didi o, ɣeyiɣi kpui aɖe ƒe gbɔdzɔgbɔdzɔ koe wònye dze le eƒe agbenɔnɔ si ŋu dzinɔameƒo kple xɔse ɖedzesi dze le la me. Nenema ke ŋu kpea mía dometɔ geɖe vie ne míeɖo ŋku nusiwo me míeto va yi dzi, ɣeyiɣi siwo me míeɖe ŋu ɖi ale be vɔvɔ̃ lé mí míete ŋu ʋli nyateƒea ta abe alesi míadii hafi ene o. (Tsɔe sɔ kple Romatɔwo 7:21-23.) Míate ŋu aka ɖe edzi be ɣeyiɣi kpui aɖe ƒe gbɔdzɔgbɔdzɔ sia mena míenye amesiwo hena ɖe megbe ɖe gbegblẽ me la dometɔwo o. Ke hã ele be míaɖoe kplikpaa be míaganye amesiawo dometɔwo gbeɖe o. Nukatae? Eye aleke míawɔ be míaganye amesiawo dometɔwo o?
Nusi Wòfia be Woagbugbɔ Ðe Megbe Ðe Gbegblẽ Me
3. Aleke nyagblɔɖila Eliya kple Yona ɖe mɔ vɔvɔ̃ ɖo woe?
3 Menye amesiwo ƒo dzi ɖena le ɣeyiɣi kpui aɖee Paulo wɔnɛ esi wòŋlɔ nu tso “amesiwo gbugbɔna ɖe megbe” ŋu o. Ele eme kokoko be Paulo nya nu tso Petro ƒe nyaa kple ema ƒomevi bubuwo ŋu. Vɔvɔ̃ ɖu Eliya, amesi nye nyagblɔɖila dzinɔameƒotɔ si ƒoa nu vɔvɔ̃manɔmee la dzi eye wòsi le eƒe agbe ta esime Fianyɔnu Izebel vɔ̃ɖi la di be yeawui. (Fiawo I, 19:1-4) Vɔvɔ̃ si ɖo nyagblɔɖila Yona nu gasẽ wu kura. Yehowa dɔe be wòayi Niniwe-dugã si ƒe ŋkɔ de du le ŋutasesẽ kple vɔ̃ɖivɔ̃ɖi ta la gbɔ. Enumake Yona ɖo tɔdziʋu si yina Tarsis—si nye teƒe bubu kura si gbɔ didi kilometa 3,500! (Yona 1:1-3) Ke hã la, womate ŋu agblɔe wòasɔ be nyagblɔɖila wɔnuteƒe siawo alo apostolo Petro sɔ kple amesiwo wogblɔ be wogbugbɔna ɖe megbe o. Nukata womesɔ kple wo o?
4, 5. (a) Aleke nya bubu siwo ƒo xlã Hebritɔwo 10:39 kpe ɖe mía ŋu be míenya “gbegblẽ” si Paulo wɔnɛ? (b) Nukae Paulo wɔnɛ esime wògblɔ be: “Míawo míenye amesiwo gbugbɔna ɖe megbe ɖe gbegblẽ me la dometɔwo o”?
4 Se nyagbe blibo si Paulo zã ɖa, ebe: ‘Ke míawo míenye amesiwo gbugbɔna ɖe megbe ɖe gbegblẽ me la dometɔwo o.’ Nukae “gbegblẽ” si wòzã la fia? Helagbe me nya si wòzã te ŋu fiaa tsɔtsrɔ̃ mavɔ ɣeaɖewoɣi. Gɔmeɖeɖe sia sɔ na nya siwo gblɔm wòle. Nuxlɔ̃ame si Paulo na do ŋgɔ tetie nye be: “Ne míexɔ nyateƒe ƒe sidzedze la, hafi bua wɔ nuvɔ̃ la, vɔsasa ɖe nuvɔ̃wo ta megali o, ke boŋ vɔvɔ̃mɔkpɔkpɔ na ʋɔnudɔdrɔ̃ kple dzo ƒe ŋuʋaʋã, si afiã adikãtɔwo ɖa keŋ la, koe li.”—Hebritɔwo 10:26, 27.
5 Eyata esi Paulo gblɔ na ehati xɔsetɔwo be, “míawo míenye amesiwo gbugbɔna ɖe megbe ɖe gbegblẽ me la dometɔwo o” la, nusi fiam wòle enye be ye kple yeƒe nuxlẽla Kristotɔ wɔnuteƒeawo yewoɖoe kplikpaa be yewomatrɔ megbe de Yehowa adzudzɔ esubɔsubɔ gbeɖe o. Tsɔtsrɔ̃ mavɔ me koe nu ma wɔwɔ akplɔ wo ayii. Yuda Iskariot nye amesiwo gbugbɔ ɖe megbe ɖe gbegblẽ me la dometɔ ɖeka, eye nyateƒea ƒe futɔ bubu siwo ɖoe wɔ nu tsi tre ɖe Yehowa ƒe gbɔgbɔa ŋu hã le eme. (Yohanes 17:12; Tesalonikatɔwo II, 2:3) Amesiawo nye ‘vɔvɔ̃nɔtɔ’ siwo atsrɔ̃ tegbee le kpɔɖeŋudzotaa me la dometɔwo. (Nyaɖeɖefia 21:8) Míedi gbeɖegbeɖe be míanye amesiawo ƒomeviwo o!
6. Nukae Satana Abosam adi be míawɔ?
6 Satana Abosam di be míagbugbɔ ɖe megbe ɖe gbegblẽ me. Esi wòbi ɖe ‘ayemenuwɔnawo’ me ta la, enya be nu suewo dzie gbegblẽmɔ sia dzea egɔme tsonae. (Efesotɔwo 6:11, NW ƒe etenuŋɔŋlɔ) Ne mete ŋu kpɔ ta na nusi dim wòle to yometiti tẽ dzi o la, edzea agbagba be yeato mɔnu siwo menya kpɔna dzea sii o dzi agbɔdzɔ Kristotɔwo ƒe xɔse. Edi be yeana Yehowa ƒe Ðasefo bibi, siwo ƒo dzi le nagbugbɔ ɖe megbe. Mina míakpɔ ayemɔ siwo wòzã ɖe Hebri Kristotɔ siwo Paulo ŋlɔ agbalẽ na ŋu ɖa.
Alesi Woti Kristotɔwo Yome be Woagbugbɔ Ðe Megbe
7. (a) Nukawo mee Yerusalem-hamea to va yi? (b) Aleke nuwo nɔ le gbɔgbɔ me gome na Paulo ƒe agbalẽa xlẽla dometɔ aɖewo?
7 Kpeɖodziwo ɖee fia be anye ƒe 61 M.Ŋ. mee Paulo ŋlɔ agbalẽa na Hebritɔwo. Nuwo menɔ bɔbɔe na Yerusalem-hamea le ɣeyiɣi siwo do ŋgɔ me o. Le Yesu ƒe ku megbe la, yometiti sesẽ aɖe do mo ɖa, si na be Kristotɔ siwo nɔ dua me dometɔ geɖe ka hlẽ. Gake tomefafa ƒe ɣeyiɣi kpui aɖe kplɔe ɖo si na Kristotɔawo dzi ɖe edzi. (Dɔwɔwɔwo 8:4; 9:31) Esi ƒeawo va nɔ yiyim la, yometiti kple nɔnɔme sesẽ bubuwo doa mo ɖa ɣeaɖewoɣi eye wo nu gayina. Edze abe esime Paulo ŋlɔ agbalẽa na Hebritɔawo la, hamea ganɔ tomefafa me vie ene. Ke hã la, xaxawo nɔ anyi. Ƒe blaetɔ̃ kloe va yi tso esime Yesu gblɔe ɖi be woatsrɔ̃ Yerusalem. Anɔ eme be ame aɖewo see le wo ɖokui me be nuwuwua tsi megbe akpa eye magava le yewoƒe agbenɔɣi o. Wo dometɔ bubuwo medo go yometiti sesẽ aɖeke haɖe o, vevietɔ amesiwo zu xɔsetɔwo yeyee, eye womenya nu boo aɖeke tso alesi wòhiã be woado dzi le dodokpɔ me ŋu o. (Hebritɔwo 12:4) Ðikekemanɔmee la, Satana dze agbagba be yeazã mɔnukpɔkpɔ mawo ana woagbugbɔ ɖe megbe. ‘Ayemenu’ kawoe wòwɔ?
8. Nɔnɔme kae nɔ Yudatɔ geɖe si ɖe Kristo-hame si woɖo yeyee la ŋu?
8 Yudatɔ siwo nɔ Yerusalem kple Yudea mebua Kristo-hame si woɖo yeyee la ɖe naneke me o. Ne míelé ŋku ɖe Paulo ƒe lɛtaa me nyawo ŋu la, míade dzesi alɔmeɖenya siwo Yuda-subɔsubɔhaŋgɔla dadalaawo kple wo yomedzelawo gblɔna ɖe Kristotɔawo ŋu. Anye be wogblɔna be: ‘Gbedoxɔ gã le mía si le Yerusalem ƒe alafa geɖe enye sia! Nunɔlagã si dze na bubu kpakple eƒe nunɔlateviwo wɔa subɔsubɔdɔwo le afima. Wosaa vɔ gbesiagbe. Se la, si mawudɔlawo tsɔ na Mose eye wotsɔ dzesi gãwo ɖo kpe edzi le Sinai Toa gbɔ la le mía si. Nusiawo dometɔ aɖeke mele kɔmama sia, Kristotɔ siawo siwo do nyitsɔ laa, amesiwo trɔ megbe de Yuda-subɔsubɔ, la si o!’ Ðe alɔmeɖeɖe le wo ŋu alea wɔ dɔ aɖea? Edze ƒã be alɔmeɖeɖea ɖe fu na Hebri Kristotɔ aɖewo. Paulo ƒe lɛtaa va xɔ na wo le ɣiyiɣi nyuitɔ dzi.
Nusita Mele Be Woagbugbɔ Ðe Megbe Ðe Gbegblẽ me Gbeɖe O
9. (a) Nyati kae dze le lɛta si woŋlɔ na Hebritɔwo la me? (b) Gɔmesese ka nue Kristotɔwo nɔ subɔsubɔm le gbedoxɔ si nyo wu esi nɔ Yerusalem me la le?
9 Mina míadzro susu eve siwo Paulo na nɔviaŋutsu kple nɔvianyɔnu siwo nɔ Yudea siwo ta mele be woagbugbɔ ɖe megbe ɖe gbegblẽ me gbeɖe o la me. Gbãtɔ—si nye alesi Kristotɔwo ƒe subɔsubɔ de ŋgɔ wu—dze le lɛta blibo si wòŋlɔ na Hebritɔwo la me. Paulo ƒo nu tso nya sia ŋu le eƒe lɛtaa katã me. Kpɔɖeŋu koe gbedoxɔ si nɔ Yerusalem nye na gbedoxɔ akuakua si lolo wu, si nye Yehowa ƒe gbɔgbɔmegbedoxɔ si “wometsɔ asi wɔe o.” (Hebritɔwo 9:11) Mɔnukpɔkpɔ nɔ Kristotɔ mawo si be woasubɔ le gbɔgbɔmeɖoɖo si wowɔ na tadedeagu dzadzɛtɔ la me. Wonɔ subɔsubɔm le nubabla si nyo wu te, si nye nubabla yeye si ƒe ŋugbe wodo ɣeyiɣi didi aɖe, si ƒe Avuléla de ŋgɔ wu Mose, si nye Yesu Kristo.—Yeremya 31:31-34.
10, 11. (a) Nukatae ƒome si me Yesu dzɔ tso mewɔe be medze anye Nunɔlagã ahasubɔ le gbɔgbɔmegbedoxɔa me o? (b) Mɔ kawo nue Yesu nye Nunɔlagã si de ŋgɔ wu esi subɔna le Yerusalem gbedoxɔa me le?
10 Nunɔlagã si nyo sasasã wu hã nɔ Kristotɔawo si, amesi nye Yesu Kristo. Menye Aron ƒe dzidzimevie wònye kura o. Ke boŋ enye Nunɔlagã “le Melxizedek ƒe kɔa nu.” (Psalmo 110:4) Melxizedek, amesi ƒe dzidzimeŋutinya womeŋlɔ ɖi o la, nye blema Salem-fia kpakple eƒe nunɔlagã. Eyata enye nyagblɔɖi me kpɔɖeŋu si ɖi Yesu, amesi ƒe nunɔlanyenye menɔ te ɖe amegbetɔ madeblibo aɖeke ƒe dzidzimevinyenye dzi o ke nusi de ŋgɔ wu boŋ dzie wònɔ te ɖo—ɖe Yehowa Mawu ŋutɔ ƒe atamkaka dzi. Abe alesi wònɔ le Melxizedek gome ene la, menye Nunɔlagã koe Yesu nye o, ke enye Fia si maku akpɔ gbeɖe o hã.—Hebritɔwo 7:11-21.
11 Gakpe ɖe eŋu la, mele be Yesu nanɔ vɔwo sam ƒe sia ƒe abe alesi nunɔlagã wɔnɛ le Yerusalem gbedoxɔ me ene o. Eƒe vɔsa nye eya ŋutɔ ƒe agbe deblibo si wòtsɔ na zi ɖeka ɖe ɣeyiɣiawo katã nu. (Hebritɔwo 7:27) Vɔ siwo katã wosana le gbedoxɔa me la nye vɔvɔli ko, wonye nusi Yesu tsɔ sa vɔe ƒe kpɔɖeŋuwo. Eƒe vɔsa debliboa ʋu mɔ ɖi be woatsɔ amesiwo katã xɔ edzi se la ƒe nuvɔ̃wo ake wo. Dzidzɔnyae wònye hã esi Paulo ƒe nyawo fia be Nunɔlagã sia nye Yesu ɖeka ma si Yerusalem Kristotɔawo nya, amesi metrɔna o. Enye ame fatu, dɔmenyotɔ, kple amesi “[nya] míaƒe gbɔdzɔgbɔdzɔwo na mí.” (Hebritɔwo 4:15; 13:8) Mɔkpɔkpɔ nɔ Kristotɔ amesiamina mawo si be woanye Kristo ƒe nunɔlateviwo! Nuka koŋ tae woasusu be yewoagbugbɔ ɖe megbe ɖe Yuda-subɔsubɔ gbegblẽa ƒe nu “gbɔdzɔ daheawo gbɔ”?—Galatiatɔwo 4:9.
12, 13. (a) Susu evelia kae Paulo na si ta mele be woagbugbɔ ɖe megbe o? (b) Nukatae alesi Hebri Kristotɔawo do dzi va yi la ade dzi ƒo na wo be woagagbugbɔ ɖe megbe ɖe gbegblẽ me gbeɖe o?
12 Paulo mese eƒe nyaa ɖe afima o, ke egagblɔ susu evelia si ta mele be Hebritɔawo nagbugbɔ ɖe megbe ɖe gbegblẽ me gbeɖe o la na wo—eyae nye alesi woa ŋutɔwo do dzi va yi. Eŋlɔ be: “Miɖo ŋu tsã ŋkeke, siwo me miedo dzi le heʋli geɖe le fukpekpewo me, le esime woklẽ ɖe mia me megbe la [dzi].” Paulo ɖo ŋku edzi na wo be wodo ŋukpe wo eye woto xaxa geɖe me eye wozu “du ƒe nukpɔkpɔ.” Wode wo dometɔ aɖewo gaxɔ me; wo dometɔ aɖewo fa na amesiwo nɔ game eye wodo alɔ wo. Ẽ, woɖe xɔse kple kutrikuku ƒe kpɔɖeŋu nyui fia. (Hebritɔwo 10:32-34) Gake nukatae Paulo le biabiam tso wo si be ‘woanɔ ŋku ɖom nudzɔdzɔ mawo siwo me wose veve le la dzi’? Ðe ŋkuɖoɖo wo dzi maɖe dzi le wo ƒo oa?
13 Maɖe dzi le wo ƒo o, elabena ‘ŋkuɖoɖo tsã ŋkekewo dzi’ ana Hebritɔawo naɖo ŋku alesi Yehowa lé wo ɖe te le dodokpɔ mee dzi. Ekpe ɖe wo ŋu wonɔ te ɖe Satana ƒe amedzidzedze geɖe nu xoxo. Paulo ŋlɔ be: “Mawu menye madzɔmadzɔtɔ be, wòaŋlɔ miaƒe dɔwɔwɔ kple lɔlɔ̃, si mieɖe fia le eƒe ŋkɔ ta . . . la be o.” (Hebritɔwo 6:10) Ẽ, Yehowa ɖo ŋku dɔ siwo katã wowɔ nuteƒewɔwɔtɔe la dzi, eye wòdzra wo ɖe eƒe susu me eye mabu ɖee akpɔ gbeɖe o. Ena míeɖo ŋku nuxlɔ̃ame si Yesu na be míadzra kesinɔnuwo ɖo ɖe dziƒo la dzi. Fiafitɔ aɖeke mate ŋu afi kesinɔnu siawo o; agbagblaʋui alo ɣebiã mate ŋu agblẽ wo dome o. (Mateo 6:19-21) Le nyateƒe me la, negbe ɖe Kristotɔ gbugbɔ ɖe megbe ɖe gbegblẽ me hafi kesinɔnu siawo ate ŋu atsrɔ̃. Nuwɔwɔ aleae agblẽ kesinɔnu ɖesiaɖe si wòdzra ɖo ɖe dziƒo la dome. Susu sẽŋu kawo gbegbee nye si Paulo na Hebri Kristotɔawo siwo ta mele be woawɔ nu ma gbeɖe o! Nukata wòle be woana ƒe gbogbo siwo katã wotsɔ subɔ nuteƒewɔwɔtɔe la nazu dzodzro? Esɔ eye enyo wu kura be woanɔ dzidodo dzi.
Nusita Mele Be Míagbugbɔ Ðe Megbe Ðe Gbegblẽ me Gbeɖe O
14. Nɔnɔme sesẽ kawoe dze ŋgɔ mí siwo ɖi esiwo ƒe alafa gbãtɔ me Kristotɔwo do goe?
14 Susu sẽŋuwo le Kristotɔ siwo li egbea hã si nenema ke siwo ta mele be woagbugbɔ ɖe megbe o. Gbã la, mina míaɖo ŋku yayra si wònye dzi be tadedeagu si nye dzadzɛtɔ kekeakee Yehowa tsɔ na mí. Abe alesi wònɔ le ƒe alafa gbãtɔ me Kristotɔwo gome ene la, míawo hã míele ɣeyiɣi aɖe me si me subɔsubɔha xɔŋkɔawo me tɔwo koa mí heɖea alɔme le mía ŋu, eye wotsɔa woƒe tadeaguƒe gagãwo kple alesi woƒe kɔnyinyiwo li tso keke blema ke la ƒoa adegbee. Gake Yehowa na kakaɖedzi mí be yeda asi ɖe míaƒe tadedeagu dzi. Le nyateƒe me la, woyra mí egbea geɖe wu ƒe alafa gbãtɔ me Kristotɔwo. Ðewohĩ àbia be, ‘Le mɔ ka nu?’ Ne èbu eŋu kpɔ la, àkpɔe be woawoe nɔ anyi esime gbɔgbɔmegbedoxɔa dze egɔme. Kristo va zu eƒe Nunɔlagã esi wòxɔ nyɔnyrɔ le ƒe 29 M.Ŋ. me teti ko. Wo dometɔ aɖewo kpɔ Mawu ƒe Vi nukunuwɔla la kple ŋku. Wogawɔ nukunu geɖe le eƒe ku megbe gɔ̃ hã. Gake abe alesi wogblɔe ɖi ene la, nunana mawo nu va yi mlɔeba.—Korintotɔwo I, 13:8.
15. Nyagblɔɖi ka ƒe emevaɣi mee Kristotɔ vavãwo le egbea, eye nukae wòfia na mí?
15 Gake míawo míele agbe le ɣiyiɣi si me Xezekiel ta 40-48 ƒe gbedoxɔ ŋuti nyagblɔɖi si lɔ nu geɖe ɖe eme la le eme vam.a Eyata míawoe le eteƒe hafi wogbugbɔ Mawu ƒe tadedeagu dzadzɛa ɖo anyi. Wokɔ gbɔgbɔmegbedoxɔ ma ŋu tso mawusubɔsubɔ me ɖiƒoƒo ɖesiaɖe kple trɔ̃subɔsubɔ me. (Xezekiel 43:9; Maleaxi 3:1-5) Wò ya bu viɖe siwo gbedoxɔ ŋukɔkɔ sia nye na mí ŋu kpɔ.
16. Nɔnɔme ɖedzileameƒo kae ƒe alafa gbãtɔ me Kristotɔwo do goe?
16 Le ƒe alafa gbãtɔa me la, ɖeko wòwɔ abe ɖe etsɔme manyo na Kristo-hame si woɖo anyi la o ene. Yesu gblɔe ɖi be anɔ abe lugble si me wova wu gbe wuwluiwo ɖo ene, ale be luawo megava toa vovo boo tso gbe wuwluiawo gbɔ o. (Mateo 13:24-30) Eye nenemae wòva dzɔe hã. Va ɖo ƒe alafa gbãtɔa ƒe nuwuwu, esime apostolo Yohanes si ku amegã ƒe anyinɔnɔ nɔ abe mɔxenu mamlɛtɔ ene na gbegblẽ la, megbededea nɔ edzi yim xoxo. (Tesalonikatɔwo II, 2:6; Yohanes I, 2:18) Le apostoloawo ƒe ku megbe kpuie la, subɔsubɔhakplɔlawo ƒe hatsotso yeye aɖe do eye wova nɔ alẽha la tem ɖe anyi eye wodoa awu tɔxɛwo. Megbededea keke ta abe abi vɔ̃ ene. Dziɖeleameƒonya ka gbegbee nye si wònye na Kristotɔ wɔnuteƒewo! Wokpɔe be tadedeagu ƒomevi gbegblẽ aɖe va kpe dzadzɛtɔ si woɖo anyi yeyee la dzi. Kristo ɖo hamea mede ƒe blaatɔ̃ gɔ̃ hã hafi nusia va dzɔ o.
17. Susu ka nue egbegbe Kristo-hamea nɔ anyi didi wu ƒe alafa gbãtɔa me tɔ le?
17 Lé ŋku ɖe vovototoa ŋu azɔ. Egbea la, tadedeagu dzadzɛtɔ li ɣiyiɣi didi wu alesi wònɔ anyi vaseɖe esime apostoloawo ku. Tso esime wota magazine sia ƒe tata gbãtɔ le ƒe 1879 me la, Yehowa tsɔ tadedeagu si ŋu le kɔkɔm ɖe edzi la yra mí. Yehowa kple Kristo Yesu ge ɖe gbɔgbɔmegbedoxɔa me le ƒe 1918 me na eŋukɔkɔ. (Maleaxi 3:1-5) Tso ƒe 1919 me la, wotrɔa asi le ɖoɖo si wowɔ na Yehowa Mawu subɔsubɔ la ŋu edziedzi. Alesi míese Biblia ƒe nyagblɔɖiwo kple gɔmeɖosewo mee dzi ɖe edzi geɖe. (Lododowo 4:18) Amekae kafukafua ayi na? Mayi na amegbetɔ gbɔlo madeblibowo o. Yehowa, kpakple Via si nye hamea ƒe Ta, koe ate ŋu akpɔ Eƒe amewo ta be woagagblẽ le ɣiyiɣi gblẽku siawo me o. Eyata mina míagado kpo akpedada na Yehowa be wòna míele gome kpɔm le tadedeagu dzadzɛtɔ me egbea gbeɖe o. Eye mina míaɖoe kplikpaa be míagbugbɔ ɖe megbe ɖe gbegblẽ me gbeɖe o!
18. Susu kae le mía si si tae mele be míagbugbɔ ɖe megbe ɖe gbegblẽ me gbeɖe o?
18 Susu evelia si ta mele be vɔvɔ̃ naɖo mí míagbugbɔ ɖe megbe o la le míawo hã si abe alesi wònɔ Hebri Kristotɔ mawo si ene—eyae nye alesi mía ŋutɔwo míedo dzii va yi. Eɖanye ƒe siawo mee míedze Yehowa subɔsubɔ gɔme loo alo míele esubɔm nuteƒewɔwɔtɔe ƒe gbogbo aɖewoe nye si va yi o, ɖaseɖiɖi li be míewɔ Kristotɔwo ƒe dɔwo va yi. Woti mía dometɔ geɖe yome kpɔ, eɖanye gamenɔnɔ, mɔxexeɖedɔnu, anyrawɔwɔ, alo nunɔamesiwoe bu na mí o. Ame bubu geɖe hã do go ƒometɔwo ƒe tsitretsiɖeŋu, koko, alɔmeɖeɖe, kple ɖekematsɔleme. Mí katã míedo dzi va yi, eye míegale Yehowa subɔsubɔ dzi nuteƒewɔwɔtɔe togbɔ be agbe me kuxiwo kple dodokpɔwo ɖea kpe na mí hã. Míeto nuwɔwɔ alea me na ɖaseɖiɖi va li be míekua kutri eye Yehowa maŋlɔe be akpɔ o, wonye kesinɔnuwo míedzra ɖo ɖe dziƒo. Eyata enye nyateƒe be menye fifiae nye ɣeyiɣi si me míagbugbɔ ɖe megbe ayi nuɖoanyi xoxo gblẽku si míegblẽ ɖe megbe la me o! Nukatae míana míaƒe dɔsesẽwɔwɔwo katã nazu yaka? Nya sia le vevie egbea vevietɔ esi ‘wòsusɔ vie ko’ ne nuwuwua nava.—Hebritɔwo 10:37.
19. Nuka mee míadzro le nyati si kplɔe ɖo me?
19 Ẽ, mina míaɖoe kplikpaa be ‘míaganye amesiwo gbugbɔna ɖe megbe ɖe gbegblẽ me la dometɔwo o’! Ke mina míanye ‘amesiwo si xɔse le la dometɔwo’ boŋ. (Hebritɔwo 10:39) Aleke míawɔ akpɔ egbɔ be míeɖi amesiawo, eye aleke míawɔ akpe ɖe hati Kristotɔwo ŋu be woawo hã nanɔ nenema? Míaƒe nyati si kplɔe ɖo adzro nya sia me.
[Etenuŋɔŋlɔ]
Èɖo Ŋku Wo Dzia?
◻ Nukae wòfia be woagbugbɔ ɖe megbe ɖe gbegblẽ me?
◻ Nɔnɔme sesẽ kawoe nɔ fu ɖem na Hebri Kristotɔ siwo Paulo ŋlɔ agbalẽ na?
◻ Susu kawoe Paulo na Hebritɔwo siwo ta mele be woagbugbɔ ɖe megbe ɖe gbegblẽ me o?
◻ Susu kawoe le mía si siwo ta wòle be míaɖoe kplikpaa be míagbugbɔ ɖe megbe ɖe gbegblẽ me gbeɖe o?
[Nɔnɔmetata siwo le axa 15]
Petro ƒe gbɔdzɔgbɔdzɔ si na vɔvɔ̃ ɖoe mena wòzu ‘amesiwo gbugbɔna ɖe megbe ɖe gbegblẽ me la dometɔ o’