Ele Be Yehowa Nanye Míaƒe Ŋuɖoɖeŋutɔ
“Yehowa ye nye wò ŋuɖoɖeŋutɔ.”—LODODOWO 3:26.
1. Togbɔ be ame geɖe gblɔna be yewoɖoa ŋu ɖe Mawu ŋu hã la, nukae ɖee fia be womeɖoa ŋu ɖe eŋu ɣesiaɣi o?
WOŊLƆ mɔfiamenya si nye “Mawu Ŋue Míeɖoa Ŋu Ðo” ɖe ga si wozãna le United States, Amerika, dzi. Gake ɖe amesiwo katã zãa ga sia le dukɔ ma me alo le teƒe bubuwo ɖoa ŋu ɖe Mawu ŋu nyateƒea? Alo ɖe woɖoa ŋu ɖe ga la ŋutɔ ŋu geɖe wua? Dukɔ ma kple dukɔ bubu ɖesiaɖe ƒe ŋuɖoɖo ɖe ga ŋu mate ŋu anyo ade ŋuɖoɖo ɖe lɔlɔ̃ ƒe Mawu si nye ŋusẽkatãtɔ nu o, amesi mezãa eƒe ŋusẽ le mɔ gbegblẽ nu gbeɖe o eye meklẽa ŋu le mɔ aɖeke nu o. Le nyateƒe me la, egblɔe eme kɔ ƒã be yemedi ŋukeklẽ o.—Efesotɔwo 5:5.
2. Nɔnɔme kae le Kristotɔ vavãtɔwo si le kesinɔnuwo ƒe ŋusẽ ŋu?
2 Mawu ŋue Kristotɔ vavãtɔwo ɖoa ŋu ɖo, ke menye kesinɔnuwo si me “beble” le ŋu o. (Mateo 13:22) Wokpɔnɛ dzea sii be ga ƒe ŋusẽ si te ŋu nana wokpɔa dzidzɔ eye wòléa agbe ɖe te la medea afi aɖeke kura o. Mawu Ŋusẽkatãtɔ ƒe ŋusẽ ya mele nenema o. (Zefanya 1:18) Eyata aleke gbegbe nunya le nuxlɔ̃amenya sia mee nye si be: “Mina miaƒe susu navo tso galɔlɔ̃ me, eye nusiwo le mia si la, nadze mia ŋu; elabena eya ŋutɔ gblɔ be: ‘Nyemele asi ɖe ge le mia ŋu o, eye nyemele mia gblẽ ge ɖi akpɔ o’”!—Hebritɔwo 13:5.
3. Aleke nya siwo ƒo xlã Mose V, 31:6 kɔ nu me le nusita Paulo yɔ nya tso kpukpui ma me ŋu?
3 Esime apostolo Paulo nɔ nya siawo ŋlɔm na Hebritɔ Kristotɔwo la, eyɔ mɔfiame siwo Mose na Israel-viwo do ŋgɔ teti na eƒe ku, si gblɔ be: “Milé dzi ɖe ƒo, eye misẽ ŋu, migavɔ̃ o, eye womegadzi ŋɔ na mi o, elabena Yehowa, wò Mawu ŋutɔ le yiyim le mia dome, maɖe asi le ŋuwò o, eye magblẽ wò ɖi o.” (Mose V, 31:6) Nya siwo ƒo xlãe la ɖee fia be Mose nɔ dzi dem ƒo na wo be kakaɖedzi si de ŋgɔ wu ŋuɖoɖo ɖe Yehowa ŋu be ana woƒe ŋutilãmenuhiahiãwo wo ko la nanɔ wo si. Nukata wòhiã nenema?
4. Aleke Mawu ɖee fia Israel-viwo be woate ŋu aɖo ŋu ɖe ye ŋu?
4 Le ƒe 40 siwo Israel-viwo tsɔ tsa le gbeadzi me la, Mawu yi edzi na woƒe agbe me nuhiahiãwo woamawo. (Mose V, 2:7; 29:5) Ewɔ ɖoɖo ɖe wo kpɔkplɔ hã ŋu. Mɔ siwo nu wòto wɔ esia dometɔ ɖekae nye alilikpo si dzena le ŋkeke me kple dzo le zã me, si kplɔ Israel-viwo yi “anyigba, si dzi notsi kple anyitsi bɔ ɖo” la dzi. (Mose II, 3:8; 40:36-38) Esi ɣeyiɣia de be woage ɖe Ŋugbedodonyigba la dzi ŋutɔŋutɔ la, Yehowa tia Yosua be wòaxɔ ɖe Mose teƒe. Ate ŋu adzɔ be anyigba la dzi nɔlawo natsi tre ɖe wo ŋu. Gake ƒe bla nanewoe nye ma si Yehowa nɔ eƒe amewo kplɔm, eyata mehiã be woavɔ̃ o. Esɔ le go sia go me be Israel-viwo nanya be Yehowa nye woƒe Mawu si ŋu woate ŋu aɖo ŋu ɖo!
5. Aleke nɔnɔme si me Kristotɔwo le egbea ɖi esi me Israel-viwo nɔ do ŋgɔ na Ŋugbedodonyigba la dzi yiyi?
5 Kristotɔ siwo li egbea le zɔ ɖem to fifi xexe vɔ̃ɖia ƒe gbedadaƒo yina Mawu ƒe xexe yeyea me. Wo dometɔ aɖewo le esia wɔm wu ƒe 40. Fifia woɖo Mawu ƒe xexeme yeyea ƒe liƒo dzi. Ke hã futɔwo gale woƒe mɔ me, eye woɖoe kplikpaa be yewoaxe mɔ be ame aɖeke nagage ɖe afisi ava zu abe Ŋugbedodonyigba dzi ene, si dze ani wu blema tɔ ma si dzi notsi kple anyitsi bɔ ɖo la o. Eyata aleke gbegbe Mose ƒe nya siwo Paulo gbugbɔ gblɔ la le vevie na Kristotɔwo egbea enye si be: “Nyemele asi ɖe ge le mia ŋu o, eye nyemele mia gblẽ ge ɖi akpɔ o”! Amesiwo katã yia edzi sẽa ŋu heléa dzi ɖe ƒo, amesiwo si xɔse blibo le eye woɖoa ŋu ɖe Yehowa ŋu ate ŋu aka ɖe edzi be woaɖo eteƒe na yewo.
Kakaɖedzi si Nɔ Te ɖe Sidzedze Kple Xɔlɔ̃wɔwɔ Dzi
6, 7. (a) Nukae do Abraham ƒe kaka ɖe Yehowa dzi kpɔ? (b) Aleke Abraham anya se le eɖokui me esime wòzɔ mɔ yina afisi wogblɔ nɛ be wòatsɔ Isak asa vɔ le?
6 Ɣeaɖeɣi la, wode se na Israel-viwo tɔgbui Abraham be wòatsɔ viaŋutsu Isak asa numevɔe. (Mose I, 22:2) Nukae na vifofo lɔ̃ame sia ka ɖe Yehowa dzi vevie ale gbegbe be wòlɔ̃ faa enumake be yeawɔ ɖe edzi? Hebritɔwo 11:17-19 ɖo eŋu be: “Le xɔse me Abraham tsɔ Isak na, esime wotee kpɔ, eye eya, amesi xɔ ŋugbedodo la, tsɔ eƒe tenuvi na, amesi wogblɔ na be: ‘Le Isak me woayɔ ƒome atsoe na wò;’ elabena esusu bena, ŋusẽ le Mawu si be, wòafɔe ɖe tsitre tso ame kukuwo dome ke hã; eyaŋuti wògaxɔe le tsɔtsɔna sia ta.”
7 Ðo ŋku edzi be ŋkeke etɔ̃e Abraham kple Isak tsɔ zɔ mɔ va ɖo afisi wòasa vɔa le. (Mose I, 22:4) Ɣeyiɣi geɖe nɔ Abraham si be wòagbugbɔ nusi wobia tso esi be wòawɔ la ŋu abu. Ðe míate ŋu akpɔ alesi wòbu kple alesi wòse le eɖokui me la le susu mea? Isak dzidzi na wokpɔ dzidzɔ si womenɔ mɔ kpɔm na o. Kpeɖodzi si nɔ Abraham kple srɔ̃a Sara si tsi ko tsã si be Mawue na wòdzɔ nenema la na ƒomedodo si nɔ wo kple Mawu dome gasẽ ɖe edzi. Edze ƒã be woƒe ŋku nɔ alesi etsɔme ava nɔ na Isak kple eƒe dzidzimeviwo ŋu. Ðe woƒe mɔkpɔkpɔwo nu ava tsi kplo, abe alesi wòadze ene le nusi Mawu bia tso wo si ta?
8. Aleke Abraham ƒe kaka ɖe Mawu dzi yi ŋgɔ wu edzixɔxɔse ko be Ate ŋu afɔ Isak ɖe tsitre?
8 Kakaɖedzi si wotu ɖe ame nɔewo nyanya si nɔa xɔlɔ̃ kplikplikpliwo dome kpɔtɔ nɔ Abraham si. Esi Abraham nye “Mawu xɔlɔ̃” ta la, “[exɔ] Mawu dzi se, eye wobui nɛ dzɔdzɔenyenye.” (Yakobo 2:23) Abraham ƒe kaka ɖe Yehowa dzi yi ŋgɔ wu edzixɔxɔ se be Mawu ate ŋu afɔ Isak ɖe tsitre ko. Abraham ka ɖe edzi hã be nusi Yehowa bia tso ye si be yeawɔ la sɔ, togbɔ be Abraham mese nya bliboa katã gɔme o hã. Naneke meli si ta wòake ɖi le nusia si Yehowa bia ƒe dzedze ŋu o. Emegbe wodo ŋusẽ Abraham ƒe kakaɖedzi esi Yehowa ƒe dɔla va xe mɔ nɛ be wòagawu Isak atsɔ asa vɔe ŋutɔŋutɔ o.—Mose I, 22:9-14.
9, 10. (a) Ɣekaɣie Abraham ɖe kaka ɖe Yehowa dzi fia do ŋgɔ? (b) Nu vevi kae míate ŋu asrɔ̃ tso Abraham gbɔ?
9 Abraham ɖe kakaɖedzi sia tɔgbe ke fia ɖe Yehowa ƒe dzɔdzɔenyenye ŋu le ƒe siwo anɔ 25 siwo do ŋgɔ me. Esi wona wònya be wole Sodom kple Gomora tsrɔ̃ ge la, etsi dzi ɖe ame dzɔdzɔe siwo anɔ afima, kple tɔgãayɔvi Lot ƒe dedienɔnɔ ŋu. Abraham gblɔ nya siawo tsɔ ɖe kuku na Mawu be: “Esia nede megbe xaa tso gbɔwò be, nagawu ame dzɔdzɔe kple ame vɔ̃ɖi siaa zi ɖeka, eye ame dzɔdzɔe nanɔ abe ame vɔ̃ɖi ene o! Esia nede megbe xaa tso gbɔwò! Ðe xexeame ƒe ʋɔnudrɔ̃la madrɔ̃ ʋɔnu dzɔdzɔe oa?”—Mose I, 18:25.
10 Blemafofo Abraham ka ɖe edzi be Yehowa mewɔa nu madzɔmadzɔ gbeɖe o. Emegbe hakpala la dzi ha be: “Yehowa enye dzɔdzɔetɔ le eƒe mɔwo katã me, kple amenuvetɔ le eƒe nuwɔwɔwo katã me.” (Psalmo 145:17) Anyo be míabia mía ɖokui be: ‘Ðe mexɔa nusi ŋu Yehowa ɖea mɔ ɖo wòvaa dzinye ɖimakemake eƒe dzɔdzɔenyenyea? Ðe meka ɖe edzi be nusianu si ŋu wòaɖe mɔ ɖo ava ɖe vi nam eye wòaɖe vi na ame bubuwo hã?’ Ne míate ŋu aɖo eŋu be ẽ la, ke míesrɔ̃ nu vevi aɖe tso Abraham gbɔ.
Kaka Ðe Yehowa ƒe Tiatiawo Dzi
11, 12. (a) Kakaɖedzi ka ƒomevie va hiã Mawu subɔlawo? (b) Nukae ate ŋu anye kuxi na mí ɣeaɖewoɣi?
11 Amesiwo kana ɖe Yehowa dzi kana ɖe amesiwo Yehowa tiana be yeazã le yeƒe tameɖoɖowo dzi wɔwɔ me hã dzi. Le Israel-viwo gome la, esia fia be woaka ɖe Mose kple Yosua si va xɔ ɖe eteƒe emegbe la dzi. Le Kristotɔ gbãtɔwo gome la, efia be woaka ɖe apostoloawo kple Yerusalem-hamea me ame tsitsiwo dzi. Le mí amesiwo li egbea gome la, efia be míaka ɖe “dɔla nuteƒewɔla kple aɖaŋudzela” si wotia be wòana gbɔgbɔ me “nuɖuɖu . . . le ɣeyiɣi nyui dzi,” kple wo dometɔ siwo le Dziɖuha la me dzi.—Mateo 24:45.
12 Ne míagblɔe la, kaka ɖe amesiwo le ŋgɔ xɔm le Kristo-hamea me dzi ɖea vi na mía ŋutɔwo. Wogblɔ na mí be: “Miɖo to mia nunɔlawo, eye midze wo yome; elabena wole mia luʋɔwo ŋu dzɔm, abe amesiwo lana akɔnta le wo ŋuti ene, bene woawɔ esia kple dzidzɔ, eye menye kple tseɖuɖu o; elabena esia menye viɖe aɖeke na mi o.”—Hebritɔwo 13:17.
Mègake Ði Yehowa ƒe Tiatiawo O
13. Susu ka tae wòle be míaka ɖe amesiwo woɖo be woaxɔ ŋgɔ dzi?
13 Biblia kpe ɖe mía ŋu be míada asɔ le kaka ɖe amesiwo le ŋgɔ xɔm le Yehowa ƒe amewo dome dzi me. Míate ŋu abia mía ɖokui be: ‘Ðe Mose wɔ vodadawoa? Ðe apostoloawo ɖe nɔnɔme si ɖi Kristo tɔ fia ɣesiaɣi abe alesi Yesu di be woawɔe enea?’ Ŋuɖoɖoawo dze ƒã. Yehowa tiae be yeazã ŋutsu nuteƒewɔla siwo tsɔ wo ɖokui ke la be woakplɔ yeƒe amewo, togbɔ be ame madeblibowoe wonye hã. Eyata togbɔ be hamemegã siwo li egbea mede blibo o hã la, ele be míabu wo be ‘gbɔgbɔ kɔkɔe lae ɖo wo be woanye dzikpɔlawo, be woakplɔ Mawu ƒe hamea.’ Wodze be míado alɔ wo ahade bubu wo ŋu.—Dɔwɔwɔwo 20:28.
14. Nukae ɖe dzesi le alesi Yehowa tia Mose wòzu kplɔla ke menye Aron alo Miryam o ŋu?
14 Aron tsɔ ƒe etɔ̃ tsi wu Mose, gake wo nɔvinyɔnu Miryam tsi wu wo ame evea. (Mose II, 2:3, 4; 7:7) Eye esi Aron te ŋu ƒoa nu nyuie wu Mose ta la, wotiae be wòanye nɔvia nu ɖela. (Mose II, 6:29–7:2) Ke hã Yehowa metia woƒe tsitsitɔ Miryam, alo Aron si nya nuƒoƒo wu, be wòakplɔ Israel-viwo o. Enya nusianu kple hiahiã si nɔ anyi ɣemaɣi la nyuie hafi tia Mose. Ɣeaɖeɣi esi nɔnɔmea me meva kɔ na Aron kple Miryam nyuie alea o la, woto nyatoƒoe be: “Alo Mose ɖeɖe koe Yehowa ƒo nu kplia? Ðe meƒo nu kple míawo hã oa?” Wohe to na Miryam, amesi koŋ anya nɔ megbe na aglãdzedzea, le esi mede bubu amesi Yehowa tia ŋu o ta, amesi wòle be woa kple Aron woakpɔ be enye amesi “fa wu amesiwo katã le anyigba dzi” hafi.—Mose IV, 12:1-3, 9-15.
15, 16. Aleke Kaleb ɖee fiae be yeka ɖe Yehowa dzi?
15 Esi wodɔ ŋkutsala 12 be woaɖatsa ŋku le Ŋugbedodonyigbaa dzi la, wo dometɔ 10 meva ƒo nu nyui tso teƒea ŋu o. Wode vɔvɔ̃ dzime na Israel-viwo esi wova gblɔ le Kanaanitɔwo ŋu be ‘wololo wu gbɔgblɔ.’ Esia wɔe be Israel-viwo “lĩ Mose kple Aron ŋu.” Gake menye ŋkutsalaawo katãe meka ɖe Mose kple Yehowa dzi o. Míexlẽ be: “Ke Kaleb tsi nya ɖe dukɔ la nu hexɔ ɖe Mose dzi bena: Míate ŋu ade, eye míaxɔe, míate ŋui kokoko tsã!” (Mose IV, 13:2, 25-33; 14:2) Yosua si nye Kaleb hati ŋkutsala hã nɔ te sesĩe nenema. Wo ame evea ɖee fia be yewoka ɖe Yehowa dzi esime wogblɔ be: “Ne míaƒe nu dze Yehowa ŋu ko la, ekema akplɔ mí ayi anyigba sia dzii, eye wòatsɔ anyigba, si dzi notsi kple anyitsi bɔ ɖo la, na mí. Ðeko . . . migavɔ̃ anyigbadzitɔwo o . . . Yehowa li kpli míawo ya, eyata migavɔ̃ wo o!” (Mose IV, 14:6-9) Woɖo kaka ɖe Yehowa dzi alea teƒe na wo. Le ame tsitsi siwo nɔ agbe ɣemaɣi dome la, Kaleb, Yosua, kple Lewi-vi aɖewo koe te ŋu kpɔ mɔnu ge ɖe Ŋugbedodonyigba la dzi.
16 Ƒe aɖewo megbe la, Kaleb gblɔ be: “Nye la medze Yehowa, nye Mawu la yome blibo. . . . Kpɔ ɖa, Yehowa na metsi agbe, abe alesi wòdo ŋugbe ene; esi Yehowa gblɔ nya sia na Mose la, ƒe blane vɔ atɔ̃ enye si va yi, esiwo me Israel zɔ gbedzi. Mexɔ ƒe blanyi vɔ atɔ̃ egbe siawo, gake ŋusẽ le ŋunye egbe siawo, abe alesi wònɔ ŋunye le gbesigbe Mose dɔm la ene; alesi ŋusẽ nɔ ŋunye ɣemaɣi . . . la, nenema wògale ŋunye fifia hã.” (Yosua 14:6-11) De dzesi Kaleb ƒe kakaɖedzi, eƒe nuteƒewɔwɔ, kple eƒe ŋutetewo. Ke hã Yehowa metia Kaleb be wòaxɔ ɖe Mose teƒe o. Yosua ye wotsɔ mɔnukpɔkpɔ sia na. Míate ŋu aka ɖe edzi be Yehowa nya nusita wòtia ame ma, tiatia nyuitɔe wònye wòwɔ.
17. Nukawoe na wòdze abe ɖe Petro medze hena agbanɔamedzi xɔxɔ o ene?
17 Apostolo Petro gbe nu le eƒe Aƒetɔ gbɔ zi etɔ̃ sɔŋ. Eya ŋutɔ tso le eɖokui si kpa to na nunɔlagã ƒe dɔla hã. (Mateo 26:47-55, 69-75; Yohanes 18:10, 11) Ame aɖewo ate ŋu agblɔ be vɔvɔ̃nɔtɔe Petro nye, meda sɔ o, eye medze be woatsɔ mɔnukpɔkpɔ tɔxɛ nɛ o. Ke hã amekae wotsɔ Fiaɖuƒea ƒe safuiwo na, hena mɔnukpɔkpɔe be wòaʋu dziƒo yɔyɔa ƒe mɔ na amewo ƒe hatsotso etɔ̃? Petro ye.—Dɔwɔwɔwo 2:1-41; 8:14-17; 10:1-48.
18. Vodada ka ŋue Yuda ƒo nu tsoe si míedi be míawɔ o?
18 Kpɔɖeŋu siawo fia be ele be míakpɔ nyuie be míaganɔ te ɖe gota gome dzedzemewo ko dzi aƒo nya ta o. Ne míeka ɖe Yehowa dzi la, míake ɖi le tiatia siwo wòwɔ ŋu o. Togbɔ be ame madeblibo siwo megblɔna be yewomedaa vo o woe le eƒe hame si le anyigba dzi me hã la, ele wo zãm le mɔ deŋgɔ aɖe nu. Yuda si nye Yesu dadavi xlɔ̃ nu ƒe alafa gbãtɔ me Kristotɔwo le amesiwo “doa vlo aƒetɔnyenyewo eye wogblɔa busunya ɖe [ŋutikɔkɔemewo] ŋuti” la ŋu. (Yuda 8-10) Megadzɔ be míanɔ abe woawo ene gbeɖe o.
19. Nukata mesɔ be míake ɖi le amesiwo Yehowa tiana ŋu o?
19 Edze ƒã be Yehowa tiaa amesiwo si nɔnɔme tɔxɛ aɖewo siwo hiã le hedea dɔ asi na wo be woakplɔ yeƒe amewo le mɔ si wòdi be woato le ɣeyiɣia me nu. Ele be míadze agbagba ade dzesi nya sia, eye míaganɔ ɖi kem le amesiwo Mawu tiana ŋu o, ke boŋ míakpɔ ŋudzedze ɖe wo ŋu eye mía dometɔ ɖesiaɖe míatsɔ ɖokuibɔbɔ asubɔ le ɖoƒe si Yehowa tsɔ na mí. Esia aɖee fia be míeka ɖe Yehowa dzi.—Efesotɔwo 4:11-16; Filipitɔwo 2:3.
Kaka Ðe Yehowa ƒe Dzɔdzɔenyenye Dzi
20, 21. Nukae míate ŋu asrɔ̃ tso alesi Mawu wɔ nu kple Mose mee?
20 Ne ɣeaɖewoɣi míekana ɖe mía ɖokui dzi fũ eye míeɖoa ŋu ɖe Yehowa ŋu boo o la, ke mina míasrɔ̃ nu tso Mose gbɔ. Esime wòxɔ ƒe 40 la, etso le eɖokui si be yeaɖe Israel-viwo tso kluvinyenye na Egiptetɔwo me. Ðikeke mele eme o be susu nyuie aɖee nɔ esi, gake mewɔe be Israel-viwo kpɔ ɖeɖe enumake o, eye mena eya ŋutɔ ƒe nɔnɔme nyo ɖe edzi o. Le nyateƒe me la, eva hiã be wòasi. Etsɔ ƒe 40 xɔ hehe sesẽ aɖe le dzronyigba dzi hafi dze be woatiae wòawɔ nusi wòdi be yeawɔ tsã la. Fifia ya ate ŋu aka ɖe edzi be Yehowa le megbe na ye elabena ele nu wɔm azɔ abe alesi Yehowa di ene le ɣeyiɣi si sɔ na Eyama dzi.—Mose II, 2:11–3:10.
21 Mía dometɔ ɖesiaɖe ate ŋu abia eɖokui be: ‘Ðe medzea ŋgɔ na Yehowa kple hamemegã siwo woɖo le hamea me la ɣeaɖewoɣi, eye medzea agbagba be mado tsɔtsɔe nuwo alo awɔ nu alesi media? Le esi teƒe be mabui be wogbe mɔnukpɔkpɔ aɖewo tsɔtsɔ nam la, ɖe melɔ̃na faa xɔa hehe si woyi edzi le nayem la?’ Vevietɔ la, ɖe míesrɔ̃ nu vevi aɖe tso Mose gbɔa?
22. Togbɔ be mɔnukpɔkpɔ gã aɖe to Mose ŋu hã la, aleke wòse le eɖokui me ɖe Yehowa ŋu?
22 Tsɔ kpe ɖe eŋu la, míate ŋu asrɔ̃ nu bubu aɖe hã tso Mose gbɔ. Mose IV, 20:7-13 ƒo nu tso vodada aɖe si wòwɔ si wɔe be nu vevi aɖe to eŋu la ŋu. Ebu mɔnukpɔkpɔ si nye be wòakplɔ Israel-viwo ayi Ŋugbedodonyigba dzii. Ðe wòbui ɣemaɣi be nyametsotso si Yehowa wɔ le nya la ŋu mesɔ oa? Ðe wòɖe eɖokui ɖe aga henɔ eƒe afi aɖe kpoo hebu be Mawu mele nu wɔm ɖe ye ŋu nyuie oa? Ðe Mose megava ka ɖe Yehowa ƒe dzɔdzɔenyenye dzi oa? Míate ŋu akpɔ ŋuɖoɖoawo le nya siwo Mose ŋutɔ gblɔ na Israel-dukɔa do ŋgɔ teti na eƒe ku la me. Mose gblɔ le Yehowa ŋu be: “Eƒe nuwɔwɔ de blibo; elabena eƒe mɔwo katã dzɔ. Mawu nyateƒetɔ wònye, eye alakpa mele eme o, nuteƒewɔla kple dzɔdzɔetɔ wònye.” (Mose V, 32:4) Edze ƒã be Mose yi edzi ka ɖe Yehowa dzi vaseɖe eƒe agbenɔnɔ ƒe nuwuwu. Ke míawo ya ɖe? Ðe mía dometɔ ɖesiaɖe le afɔɖeɖewo wɔm be yeana yeƒe kaka ɖe Yehowa kple eƒe dzɔdzɔenyenye dzi me nasẽ wua? Aleke míate ŋu awɔe? Mina míakpɔe ɖa.
Aleke Nàɖo Wo Ŋui?
◻ Susu kawo tae wòle be Israel-viwo naɖo ŋu ɖe Yehowa ŋu?
◻ Nukae míate ŋu asrɔ̃ tso Abraham gbɔ le kakaɖeamedzi gome?
◻ Nukata mele be míake ɖi le amesiwo Yehowa tiana ŋu o?
[Nɔnɔmetata si le axa 13]
Kaka ɖe Yehowa dzi bia be míade bubu amesiwo le ŋgɔ xɔm le hamea me ŋu