Mègana Ta Le Agbedudimekekea Me o!
“Mina míatsɔ dzidodo anɔ [duɖimekeke], si woɖo na mí la dzi.”—Hebritɔwo 12:1.
1, 2. Nudzɔdzɔ dodzidzɔname kawoe na Yehowa subɔlawo kpɔ dzidzɔ le ŋkeke mamlɛ siawo me?
DZIDZƆKPƆƔI si nye ganye ɣeyiɣi sesẽ mee míele. Ƒe 80 kple edzivɔe nye esia si woɖo Yesu zi dzi wòzu Mawu ƒe Dziƒofiaɖuƒea ƒe Fia, le ƒe 1914 me. “Aƒetɔ ƒe ŋkeke la” kple nuɖoanyi sia ƒe “nuwuɣi” dze egɔme ɣemaɣi. (Nyaɖeɖefia 1:10; Daniel 12: 9) Tso ɣemaɣi la, agbeduɖime si kem Kristotɔwo le va le vevie wu. Mawu subɔlawo ʋli wo ɖokui vevie be yewoanɔ akasanu kple Yehowa ƒe dziƒotasiaɖam, si nye eƒe dziƒohabɔbɔ si le zɔ ɖem matɔmatɔe be yeana Yehowa ƒe tameɖoɖowo nava eme.—Xezekiel 1:4-28; 1 Korintotɔwo 9:24.
2 Ðe Mawu ƒe amewo kpɔa dzidzɔ le agbe mavɔ ƒe ‘duɖimekekea mea?’ Ẽ, wokpɔa dzidzɔ! Edzɔ dzi na wo esi wokpɔe woƒo Yesu nɔvi susɔeawo nu ƒu, eye wotsoa aseye esi wokpɔe be esusɔ vie ko woawu ame 144,000 ƒe ame susɔeawo nu tetre nu. (Nyaɖeɖefia 7:3, 4) Tsɔ kpe ɖe eŋu la edzɔ dzi na wo be woakpɔe be Yehowa ƒe Fia si wòɖo do eƒe hɛ gobɛ ɖa be ‘yeaŋe nu le anyigba dzi.’ (Nyaɖeɖefia 14:15,16) Eye nuŋeŋe ka gbegbee nye esi wònye! (Mateo 9:37) Vaseɖe fifia la, woƒo luʋɔ siwo wu miliɔn atɔ̃ nu ƒu—“ameha gã, si ame aɖeke mete ŋu xlẽ o la, tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me.” (Nyaɖeɖefia 7:9) Ame aɖeke mate ŋu agblɔ alesi gbegbe ameha ma ava sɔ gbɔ aɖo mlɔeba o, elabena amegbetɔ aɖeke mate ŋu axlẽ wo o.
3. Kplamatsedonu kawo me totoe wòle be míadze agbagba ɣesiaɣi ana dzidzɔ ƒe nɔnɔme nanɔ mía si le?
3 Nyateƒee, Satana dzea agbagba be yeana míakli nu alo míadzudzɔ dua ƒuƒu sesĩe le duɖimekekea me. (Nyaɖeɖefia 12:17) Eye mele bɔbɔe na mí kura be míanɔ dua ƒuƒu dzi le aʋawɔwɔ, dɔwuame, dɔvɔ̃wo, kple nɔnɔme sesẽ bubu siwo nye nuwuɣia ƒe dzesiwo me o. (Mateo 24:3-9; Luka 21:11; 2 Timoteo 3:1-5) Ke hã míaƒe dzi kpɔa dzidzɔ esi míele duɖimekekea ƒe nuwuwu gogom geɖe wu. Míedzea agbagba be míaɖe nɔnɔme si Paulo ƒoe ɖe ehati Kristotɔwo nu le eƒe ŋkekea me be wòanɔ wo si la afia: “Dzi nadzɔ mi le Aƒetɔ la me ɖaasi; megale egblɔm bena: Dzi nadzɔ mi!”—Filipitɔwo 4:4.
4. Nɔnɔme ka ƒomevie Filipi Kristotɔwo ɖe fia?
4 Ðikeke aɖeke mele eme o be Kristotɔ siwo Paulo ŋlɔ nya mawo na la nɔ dzidzɔ kpɔm le woƒe xɔse me, elabena Paulo gblɔ na wo be: “Dzi nadzɔ mi le Aƒetɔ la me [ɖaa]!” (Filipitɔwo 3:1) Filipi-hamea me tɔwo nye dɔmenyotɔwo lɔ̃ame siwo tsɔ veviedodo kple dzonɔameme subɔ. (Filipitɔwo 1:3-5; 4:10, 14-20) Gake menye ƒe alafa gbãtɔ me Kristotɔwo katã sie nɔnɔme ma nɔ o. Le kpɔɖeŋu me, kuxi nɔ Yudatɔ Kristotɔ siwo Paulo ŋlɔ Hebritɔwo ƒe agbalẽ na la dometɔ aɖewo ŋu.
“Míalé To Ðe Nusiwo Míese la Ŋuti Geɖe Wu”
5. (a) Nɔnɔme kae nɔ Hebritɔ Kristotɔwo si esi woɖo Kristo-hame gbãtɔ anyi? (b) Ƒo nu tso nɔnɔme si nɔ Hebritɔ Kristotɔ aɖewo si le 60 M.Ŋ. me ŋu.
5 Dzɔdzɔme Yudatɔwo kple trɔ̃subɔla zu Yudatɔwoe nɔ Kristo-hame si nye gbãtɔ le xexemeŋutinya me la me eye ƒe 33 M.Ŋ. mee woɖoe le Yerusalem. Nɔnɔme kae nɔ eme? Ne èxlẽ Dɔwɔwɔwo ƒe agbalẽa ƒe ta gbãtɔawo la, àkpɔ dzonɔameme kple dzidzɔ si nɔ eme, togbɔ be woti eyome hã. (Dɔwɔwɔwo 2:44-47; 4:32-34; 5:41; 6:7) Gake esi ƒe geɖe va nɔ yiyim la, nɔnɔmea va trɔ, eye edze ƒã be Yudatɔ Kristotɔ geɖe megatsɔ dzo ɖe agbeduɖimekekea ŋu o. Agbalẽ aɖe gblɔ nya sia le nɔnɔme si nɔ anyi le 60 M.Ŋ. me lɔƒo ŋu be: “Enye lãmefafa kple nutikɔname ƒe nɔnɔme, dziɖeleameƒo, mɔkpɔkpɔbuɖeame, kpododonu si dze ƒã kple dzimaxɔse. Wonye Kristotɔwo gake womegakpɔ ŋudzedze boo aɖeke ɖe woƒe yɔyɔa ƒe vevienyenye ŋu o.” Aleke wòdzɔe be Kristotɔ amesiaminawo te ŋu ge ɖe nɔnɔme sia tɔgbe me? Lɛta si Paulo na Hebritɔwo (si wòŋlɔ le 61 M.Ŋ lɔƒo) me dzodzro akpe ɖe mía ŋu be míaɖo biabia ma ŋu. Numedzodzro sia akpe ɖe mí katã mía ŋu egbea be míagava gbɔdzɔ le gbɔgbɔ me nenema o.
6. Nukawoe nye vovototo aɖewo siwo le tadedeagu le Mose ƒe Sea te kple tadedeagu si nɔ te ɖe Yesu Kristo dzixɔxɔse dzi dome?
6 Yuda-subɔsubɔ si me tɔwo gblɔ be yewowɔa Se si Yehowa na to Mose dzi la mee Hebritɔ Kristotɔwo do go tso. Edze abe Se ma yi edzi kpɔ ŋusẽ ɖe Yudatɔ Kristotɔ geɖe dzi ene, ɖewohĩ le esi wònye mɔ ɖeka kolia si dzi wotona dona ɖe Yehowa ŋkume hena ƒe alafa geɖe, eye wònye tadedeagu ƒe ɖoɖo wɔdɔɖeamedzi si me nunɔlanyenye, vɔsasa edziedzi, kple Yerusalem-gbedoxɔ si xɔ ŋkɔ le xexeame katã nɔ ta. Kristotɔnyenye ya to vovo. Ebia be woakpɔ nu le gbɔgbɔ me, abe alesi Mose wɔ ene, amesi ‘kpɔ teƒeɖoɖofetu si ava le etsɔme la ɖa’ eye “[wòdo] dzi, abe ɖe wòle amesi womekpɔna o la kpɔm ene.” (Hebritɔwo 11:26, 27) Edze ƒã be gbɔgbɔmeŋku sia tɔgbe menɔ Yudatɔ Kristotɔ geɖe si o. Wonɔ adzɔ eve ɖum le esi teƒe be woana woƒe duƒuƒua nato mɔ ɖeka.
7. Aleke nuɖoanyi si me míedo go tso la kpɔa ŋusẽ ɖe alesi míeƒua du le agbeduɖimekekea me dzii?
7 Ðe nɔnɔme ma tɔgbe li egbea? Ele me be nuwo megale nenema tututu ya o. Gake nuɖoanyi si ƒoa adegbe le nu gãwo ŋu mee Kristotɔwo do go tso. Xexeame ʋua mɔnukpɔkpɔ dzroamewo ɖi, gake le ɣeyiɣi ma ke me la, edaa agba kpekpewo ɖe amewo dzi. Tsɔ kpe ɖe eŋu la, dukɔ siwo me ɖikeke bɔ ɖo kple teƒe siwo amewo tsɔa ɖokuitɔdidi dia woa ŋutɔwo ɖeɖe ƒe nyonyo la mee mía dometɔ geɖe le. Ne míeɖe mɔ nɔnɔme siawo kpɔ ŋusẽ ɖe mía dzi la, anɔ bɔbɔe be ‘míaƒe dzi ƒe ŋkuwo’ dzi nado viviti. (Efesotɔwo 1:18) Aleke míawɔ aƒu agbedua nyuie ne míegate ŋu le afisi míeɖo tae la kpɔm nyuie o?
8. Mɔ siwo nu Kristotɔnyenye de ŋgɔ wu tadedeagu le Sea te la dometɔ aɖewo ɖe?
8 Paulo ɖo ŋku alesi Kristotɔwo ƒe ɖoɖoa de ŋgɔ wu Mose ƒe Se lae dzi na Yudatɔ Kristotɔwo be wòatsɔ aʋã wo. Nyateƒee, esime ŋutilã me Israel dukɔa nye Yehowa ƒe dukɔ si nɔ Sea te la, Yehowa ƒo nu na wo to nyagblɔɖila siwo gbɔgbɔ ʋã dzi. Gake Paulo gblɔ be egbea eƒoa nu na mí “[to Via dzi], amesi wòɖo nuwo katã ƒe domenyila, amesi hã dzi wòto wɔ xexeame.” (Hebritɔwo 1:1, 2) Tsɔ kpe ɖe eŋu la, Yesu nye gã wu fia siwo katã tso Dawid ƒomea me, siwo nye ‘ehatiwo.’ Eƒe ɖoƒe kɔ wu mawudɔlawo tɔ gɔ̃ hã.—Hebritɔwo 1:5, 6, 9.
9. Nukata wòle be “míalé to ɖe” nya siwo Yehowa gblɔ na mí “ŋu geɖe wu” abe alesi wònɔ le Yudatɔ Kristotɔ siwo nɔ Paulo ƒe ŋkekea me gome ene?
9 Eyata Paulo ɖo aɖaŋu na Yudatɔ Kristotɔwo be: “Ele na mí bena, míalé to ɖe nusiwo míese la ŋuti geɖe wu, bene míagato eŋuti ayi o.” (Hebritɔwo 2:1) Togbɔ be nusɔsrɔ̃ tso Kristo ŋu nye yayra gã aɖe hã, nu geɖe wu gahiã. Ele be woalé to ɖe Mawu ƒe Nya la ŋu geɖe wu be Yudatɔwo ƒe xexe si me wonɔ la nagakpɔ ŋusẽ ɖe wo dzi o. Ele be míawo hã “míalé to ɖe” nya siwo Yehowa gblɔna na mí “ŋuti geɖe wu” le nyatakaka gbegblẽ siwo míesena tso xexe sia me ɣesiaɣi la ta. Esia fia be míasrɔ̃ nu nyuie edziedzi eye Biblia xexlẽ ƒe ɖoɖo nyui nanɔ mía si. Abe alesi Paulo gblɔe emegbe le lɛta si wòŋlɔ na Hebritɔwo me ene la, efia hã be míayi kpekpewo edziedzi eye míaƒo nu tso míaƒe xɔse ŋu na ame bubuwo. (Hebritɔwo 10:23-25) Nuwɔwɔ sia akpe ɖe mía ŋu be míanɔ ŋudzɔ le gbɔgbɔ me ale be míaƒe ŋku nagabu le míaƒe mɔkpɔkpɔ wɔnuku la dzi o. Ne míetsɔ Yehowa ƒe nyawo yɔ míaƒe susu me la, naneke meli si xexe sia awɔ ɖe mía ŋu si aɖe dzi le mía ƒo alo ablu afɔ na mí o.—Psalmo 1:1-3; Lododowo 3:1-6.
“Mixlɔ̃ Nu Mia Nɔewo”
10. (a) Nukae ate ŋu adzɔ ɖe amesi meléa to ɖe Yehowa ƒe Nya la ŋu geɖe wu o dzi? (b) Aleke míate ŋu ayi edzi anɔ ‘nu xlɔ̃m mía nɔewoe’?
10 Ne míaƒe susu mele gbɔgbɔmenuwo dzi o la, Mawu ƒe ŋugbedodowo hã magadze nu ŋutɔŋutɔ na mí o. Nusia dzɔ le ƒe alafa gbãtɔ me esime hameawo me tɔwo katã nye Kristotɔwo amesiaminawo eye apostolowo aɖewo ganɔ agbe. Paulo xlɔ̃ nu Hebritɔwo be: “Nɔviwo, mikpɔ nyuie be, dzi vɔ̃ɖi maxɔse naganɔ mia dometɔ aɖeke me o, bene wòagatrɔ atso Mawu gbagbe la gbɔ o, ke mixlɔ̃ nu mia nɔewo gbesiagbe boŋ, ŋkeke alesi woyɔ egbegbe, bene nuvɔ̃ ƒe beble nagasẽ mia dometɔ aɖeke ƒe dzime o.” (Hebritɔwo 3:12, 13) Nya si Paulo gblɔ be “mikpɔ nyuie” la te gbe ɖe alesi wòhiã be míanɔ ŋudzɔe dzi. Afɔku aɖe li! Xɔsemanɔamesi—si nye “nuvɔ̃”—ate ŋu aɖo míaƒe dzime, eye ate ŋu adzɔ be míate ɖa le Mawu ŋu le esi teƒe be míate ɖe eŋu kplikplikpli boŋ. (Yakobo 4:8) Paulo ɖo ŋku edzi na mí be ‘míanɔ nu xlɔ̃m mía nɔewo.’ Dzidzɔ si le hadede kple nɔviwo me hiã mí. “Amesi ɖe eɖokui ɖe aga le eya ŋutɔ ƒe dzodzro yome dim la, etsia tre ɖe nunyanyawo katã ŋu.” (Lododowo 18:1) Alesi hadede sia hiãe la ʋãa Kristotɔwo egbea woyia hame ƒe kpekpewo, takpekpe suewo kple gãwo edziedzi.
11, 12. Nukata mele be Kristotɔwo ƒe gɔmedzenufiafia ɖeɖe nyanya nasɔ gbɔ na mí o?
11 Paulo gaɖo aɖaŋu nyui sia le eƒe lɛtaa me emegbe be: “Ele na mi be, mianye nufialawo le ɣeyiɣi la ƒe didi nu; gake egahiã mi be, woagafia nusiwo nye Mawu ƒe nyawo ƒe gɔmedzenuwo mi, eye miezu abe amesiwo gahiã notsi ko, eye menye nuɖuɖu sesẽ o la ene. ... Ke nuɖuɖu sesẽ li na amesiwo tsi zu blibo to ŋudɔwɔwɔ me kpɔ sidzenu, siwo nu mã wo, be woabu nyui kple vɔ̃ me kpɔ la.” (Hebritɔwo 5:12-14) Edze ƒã be Yudatɔ Kristotɔ aɖewo mete ŋu na woƒe nugɔmesese tsi ɖe edzi o. Numekɔkɔ geɖe si va ku ɖe Sea kple aʋatsotso ŋu la xɔxɔ sesẽ na wo. (Dɔwɔwɔwo 15:27-29; Galatiatɔwo 2:11-14; 6:12, 13) Ðewohĩ wo dometɔ aɖewo gadea asixɔxɔ blemakɔnuwo abe kwasiɖa sia kwasiɖa ƒe Sabat kple Avuléŋkeke si woɖuna etɔxɛe ƒe sia ƒe ene la ŋu kokoko.—Kolosetɔwo 2:16, 17; Hebritɔwo 9:1-14.
12 Eyata Paulo gblɔ be: “Mina míagblẽ Kristo ƒe nufiafia ƒe gɔmedzedze ɖi, eye míade ŋgɔgbe ate ɖe blibonyenye ŋuti.” (Hebritɔwo 6:1) Dulegbeƒula si léa ŋku ɖe eƒe nuɖuɖu ŋu te ŋu doa dzi le duɖimekeke legbe si tea ɖeɖi ame ŋu la me. Nenema ke Kristotɔ si léa ŋku ɖe eƒe gbɔgbɔmenuɖuɖu ŋu nyuie—si ‘gɔmedzenufiafiawo’ ɖeɖe mesuna na o—ate ŋu anɔ dua ƒuƒu dzi awu enu. (Tsɔe sɔ kple 2 Timoteo 4:7.) Esia fia be míadi be míanya nyateƒea ƒe “kekeme kple didime kple goglome kple kɔkɔme” ale be míayi ŋgɔ aɖo tsitsi gbɔ.—Efesotɔwo 3:18.
“Dzidodo Hiã Mí”
13. Aleke Hebritɔ Kristotɔwo ɖe woƒe xɔse fia tsãe?
13 Le ɣeyiɣi si kplɔ Pentekoste 33 M.Ŋ. ɖo tututu me la, Yudatɔ Kristotɔwo nɔ te sesĩe togbɔ be wotsi tre ɖe wo ŋu vevie hã. (Dɔwɔwɔwo 8:1) Ðewohĩ esia nɔ susu me na Paulo esime wòŋlɔ bena: “Miɖo ŋu tsã ŋkeke, siwo me miedo dzi le heʋli geɖe le fukpekpewo me, le esime woklẽ ɖe mia me megbe la.” (Dɔwɔwɔwo 10:32) Woƒe dzidodo nuteƒewɔwɔtɔe alea ɖe woƒe lɔlɔ̃ na Mawu fia eye wòna wote ŋu do ɖe eŋkume ƒo nu faa. (1 Yohanes 4:17) Paulo xlɔ̃ nu wo vevie be womegatsɔe ƒu gbe le xɔsemanɔamesi ta o. Eƒoe ɖe wo nu be: “Dzidodo hiã mi, bena ne miewɔ Mawu ƒe lɔlɔ̃nu la, miaxɔ ŋugbedodo la. ‘Elabena esusɔ ʋee ko, tete amesi gbɔna la, nava, eye mahe ɖe megbe o.’”—Hebritɔwo 10:35-37.
14. Nyateƒenya kawoe wòle be woakpe ɖe mía ŋu míado dzi ne míetsɔ ƒe geɖe subɔ Yehowa gɔ̃ hã?
14 Ke mí amesiwo li egbea ɖe ya ɖe? Mía dometɔ akpa gãtɔ míedo vevie nu esime míesrɔ̃ Kristotɔwo ƒe nyateƒea zi gbãtɔ. Ðe míegadoa vevie nu nenema? Alo ɖe ‘míegblẽ míaƒe lɔlɔ̃ gbãtɔa ɖia’’? (Nyaɖeɖefia 2:4) Ðe míaƒe lãme fa, eye ɖewohĩ dzi ɖe le mía ƒo alo nu ti kɔ na mí le esi míelala Harmagedon ʋuu wòglo ta? Gake tɔ vie nàbu nya sia ŋu kpɔ. Nyateƒea ganye nu xɔasi aɖe kokoko abe alesi wònɔ tsã ene. Yesu kpɔtɔ nye míaƒe Fia si le dziƒo. Míegale mɔ kpɔm na agbe mavɔ nɔnɔ le paradisonyigba dzi kokoko, eye ƒomedodo gale mía kple Yehowa dome. Eye mègaŋlɔe be gbeɖe o be: “Amesi gbɔna la, [ava], eye mahe ɖe megbe o.”
15. Aleke Kristotɔ aɖewo do dzi le yometiti sesẽwo mee, abe alesi Yesu wɔ ene?
15 Eyata Paulo ƒe nya siwo wòŋlɔ ɖe Hebritɔwo 12:1, 2 la sɔ nyuie be: “Mina míaɖe nu kpekpe sia nu kpekpe kple nuvɔ̃ [xɔsemanɔamesi], si ɖea to ɖe mí la ɖa, eye mina míatsɔ dzidodo anɔ [duɖimekeke], si woɖo na mí la dzi, eye míakpɔ Yesu, si nye xɔse ƒe gɔmeɖola kple nuwula la ɖa: Amesi do dzi kpe [fuwɔameti, NW] ƒe fu, eye mebu ŋukpe o le dzidzɔ, si woɖo ɖi nɛ la ta, eye wòbɔbɔ nɔ anyi le Mawu ƒe fiazikpui ƒe nuɖusi.” Mawu subɔlawo to nu geɖe me le ŋkeke mamlɛ siawo me. Abe Yesu, amesi wɔ nuteƒe vaseɖe fukpekpe ƒe ku me ene la, mía nɔviŋutsu kple nɔvinyɔnu aɖewo tsɔ nuteƒewɔwɔ do dzi le yometiti sesẽtɔ kekeakewo me—le gakpɔwo me nɔnɔ, fu fiafia wo, wo gbɔ dɔdɔ sesẽe, kple ku gɔ̃ hã me. (1 Petro 2:21) Ne míebu woƒe nuteƒewɔwɔ ŋu la, ɖe lɔlɔ̃ na wo meyɔa míaƒe dzime oa?
16, 17. (a) Nusiwo ate ŋu agblẽ xɔse dome kawoe Kristotɔ akpa gãtɔ doa goe? (b) Ŋkuɖoɖo nuka dzie akpe ɖe mía ŋu míayi agbeduɖimekekea dzi?
16 Gake nya siwo Paulo gagblɔ la nye nyateƒe le Kristotɔ akpa gãtɔ gome be: “Le aʋawɔwɔ kple nuvɔ̃ me la miekpɔ tsitre sesĩe yiɖase ɖe ʋu me haɖe o.” (Hebritɔwo 12:4) Gake le nuɖoanyi sia me la, nyateƒea ƒe mɔ dzi toto mele bɔbɔe na mía dometɔ aɖeke o. “Nuvɔ̃wɔlawo ƒe ɖeklemiɖeɖe” le ŋutilãmedɔwɔƒewo alo le suku, kple fewuɖuɖu alo tenɔnɔ ɖe nyaƒoɖeamenu be woawɔ nuvɔ̃ nu ɖea dzi le ame aɖewo ƒo. (Hebritɔwo 12:3) Tetekpɔ sesẽwo gblẽ ame aɖewo ƒe tameɖoɖo kplikpaa be yewoalé Mawu ƒe dzidzenu kɔkɔwo me ɖe asi me. (Hebritɔwo 13:4, 5) Xɔsegbelawo gblẽ nu le ame ʋee aɖewo siwo ɖo to woƒe nya siwo me aɖi le la ƒe gbɔgbɔmekelili ŋu. (Hebritɔwo 13:9) Ame nɔewo dome kuxiwo na dzi megadzɔa ame bubuwo o. Modzakaɖeɖe kple ɖiɖiɖeme nuwɔnawo yomenɔnɔ fũ akpa na Kristotɔ aɖewo gbɔdzɔ. Eye ame akpa gãtɔ kpɔe be agbemekuxi siwo le nuɖoanyi sia me na nu te ɖe yewo dzi.
17 Nyateƒee, nɔnɔme siawo dometɔ aɖeke menye ‘tsitrenɔnɔ sesĩe yeɖase ɖe ʋu me’ o. Eye wo dometɔ aɖewo ate ŋu atso nyametsotso gbegblẽ siwo mía ŋutɔwo míewɔna gbɔ. Gake wo katã nye nusiwo ate ŋu agblẽ nu le míaƒe xɔse ŋu. Ema tae wòle be míaƒe ŋku nanɔ Yesu ƒe dzidodo ƒe kpɔɖeŋu nyuia ŋu. Migana míaŋlɔ alesi gbegbe míaƒe mɔkpɔkpɔa nyoe be gbeɖe o. Migana kakaɖedzi si le mía si be Yehowa ‘nye teƒeɖola na amesiwo dinɛ vevie’ la nabu gbeɖe o. (Hebritɔwo 11:6) Ne míewɔe nenema la, ana ŋusẽ nanɔ mía ŋu le gbɔgbɔ me be míanɔ du dzi le agbeduɖimekekea me.
Míate ŋu ado dzi
18, 19. Ŋutinya me nudzɔdzɔ kawoe ɖee fia be Hebritɔ Kristotɔ siwo nɔ Yerusalem wɔ ɖe Paulo ƒe aɖaŋuɖoɖo si tso gbɔgbɔ me la dzi?
18 Aleke Yudatɔ Kristotɔwo xɔ Paulo ƒe lɛta lae? Esi woŋlɔ lɛtaa na Hebritɔwo ƒe ade megbe la, wonɔ aʋa wɔm le Yudea. Le ƒe 66 M.Ŋ. me la, Roma-ʋakɔ ɖe to ɖe Yerusalem, si na Yesu ƒe nyawo va eme be: “Ne miekpɔ aʋakɔwo ɖe to ɖe Yerusalem ŋu la, ekema midze sii bena, eƒe aƒedozuɣi ɖo vɔ.” (Luka 21:20) Gake be wòaɖe vi na Kristotɔ siwo anɔ Yerusalem ɣemaɣi ta la, Yesu gblɔ be: “Ekema ame siwo le Yudea la nasi ayi towo dzi, eye ame siwo le Yerusalem la nadzo, eye ame siwo le agbletawo la nagatrɔ ayi eme o.” (Luka 21:21) Eyata aʋa si wokpe kple Roma na dodokpɔ aɖe do mo ɖa: Ðe Yudatɔ Kristotɔ mawo adzo le Yerusalem si nye Yudatɔwo ƒe tadedeagunɔƒe kple afisi gbedoxɔ dzeania le la?
19 Le vo me la, Romatɔwo gatrɔ dzo, eye menye susu gobii aɖeke ta o. Anɔ eme be Yudatɔ subɔsubɔnyahelawo bu esia be enye kpeɖodzi be Mawu nɔ yewoƒe du kɔkɔe la ta kpɔm. Ke Kristotɔwo ya ɖe? Ŋutinya gblɔ na mí be wosi. Azɔ le 70 M.Ŋ. me la, Romatɔwo gatrɔ va eye wotsrɔ̃ Yerusalem gbidii eye ame gbogbo aɖewo bu woƒe agbe. “Yehowa ƒe ŋkeke” si Yoel gblɔ ɖi la va Yerusalem dzi. Gake Kristotɔ nuteƒewɔlawo meganɔ afima o. ‘wokpɔ ɖeɖe.’—Yoel 3:3-5; Dɔwɔwɔwo 2:16-21.
20. Mɔ kawo nue wòle be nyanya be “Yehowa ƒe ŋkeke” gã la tu aƒe naʋã mí le?
20 Egbea míenyae be eteƒe madidi o “Yehowa ƒe ŋkeke” gã bubu ava nuɖoanyi blibo sia katã dzi. (Yoel 4:12-14) Míenya ɣeyiɣi si ŋkeke ma ava ya o. Gake Mawu ƒe Nya la na kakaɖedzi mí be ava godoo! Yehowa gblɔ be matsi megbe o. (Xabakuk 2:3; 2 Petro 3:9, 10) Eyata mina “míalé to ɖe nusiwo míese la ŋuti geɖe wu.” Tsri xɔsemanɔamesi, si nye “nuvɔ̃, si ɖea to de mí.” Ðo ŋku edzi be Yehowa ƒe dziƒohabɔbɔ gã si le abe tasiaɖam ene la le du dzi. Ana eƒe tameɖoɖo nava eme. Eyata mina mí katã míanɔ dua ƒuƒu dzi eye míagana ta le agbeduɖimekekea me o!
Èɖo Ŋku Wo Dzia?
◻ Nuxlɔ̃ame Kae Paulo na Filipitɔwo si akpe ɖe mía ŋu míado dzi agbeduɖimekekea me ne míewɔ ɖe edzi?
◻ Nukae akpe ɖe mía ŋu míanɔ te ɖe agbagba si xexe sia dzena be yeahe míaƒe ɖa la nu?
◻ Aleke míakpe ɖe mía nɔewo ŋui be míado dzi le duɖimekekea me?
◻ Nusiwo ate ŋu atsi Kristotɔ ƒe veviedodo nu la dometɔ aɖewo ɖe?
◻ Aleke Yesu ƒe kpɔɖeŋu ate ŋu akpe ɖe mía ŋu míado dzii?
[Nɔnɔmetata si le axa 8, 9]
Kristotɔ siwo le abe duƒulawo ene nagana naneke nahe woƒe susu ɖa o
[Nɔnɔmetata si le axa 10]
Naneke mate ŋu axe mɔ na Yehowa ƒe dziƒotasiaɖam gã la be Mawu ƒe tameɖoɖo nado kpo emevava o