Wò Xɔse Ƒe Nyonyome—Wole Edom Kpɔ Fifia

“Nɔvinyewo, ne miege ɖe tetekpɔ bubu ƒomeviwo me la, mibui dzidzɔ sɔŋ, esi mienyae bena, miaƒe xɔse ƒe dodokpɔ wɔa dzidodo.”—YAKOBO 1:2, 3.

 1. Nukatae wòle be Kristotɔwo nakpɔ mɔ na xɔse ƒe dodokpɔ?

FUKPEKPE medzroa Kristotɔ vavãwo o, eye mevivina na wo be yewoase veve alo woado vlo yewo o. Ke hã Yesu dadavi Yakobo ƒe nya siwo le etame la le susu me na wo. Kristo na eme kɔ na eƒe nusrɔ̃lawo be woate ŋu akpɔ mɔ na yometiti kple fukpekpe bubuwo le esi wokuna ɖe Mawu ƒe dzidzenuwo ŋu goŋgoŋ ta. (Mateo 10:34; 24:9-13; Yohanes 16:33) Gake woate ŋu akpɔ dzidzɔ le dodokpɔ mawo me. Aleke?

 2. (a) Aleke míaƒe xɔse ƒe dodokpɔwo ana dzi nadzɔ míi? (b) Aleke dzidodo awu eƒe dɔ nu keŋkeŋ le mía gomee?

² Nu vevi aɖe si tae dzi dzɔa mí ne míedo go tetekpɔwo alo míele xɔse ƒe dodokpɔwo me tom enye be wonaa míetsea ku nyuiwo. Abe alesi Yakobo gblɔe ene la, tenɔnɔ ɖe dodokpɔwo alo fukpekpewo nu “wɔa dzidodo.” Ate ŋu aɖe vi na mí ne míesrɔ̃ Kristotɔwo ƒe nɔnɔme xɔasi ma. Yakobo ŋlɔe be: “Dzidodo la nakpɔ eƒe dɔwɔwɔ blibo, bena mianye ame blibowo keŋkeŋ, eye naneke nagahiã mi o.” (Yakobo 1:4) ‘Dɔ’ aɖe li si wòle be dzidodo nawɔ. Eƒe dɔdasie nye be wòana míade blibo le go sia go me, wòakpe ɖe mía ŋu be míanye Kristotɔ tsitsi siwo da sɔ. Eyata ne míeɖe mɔ be dodokpɔawo nayi edzi esi míadze agbagba aɖeke be míato mɔ siwo mesɔ ɖe Ŋɔŋlɔawo nu o dzi atsi enu kplo o la, edoa míaƒe xɔse kpɔna eye wòkɔa eŋu. Ne dzigbɔɖi, nublanuikpɔkpɔ, dɔmenyonyo, alo lɔlɔ̃ medzena le míaƒe nuwɔnawo alo nuwɔwɔ ɖe mía havi amegbetɔwo ŋu me tsã o la, dzidodo ate ŋu awɔ mí bliboe wu. Ẽ, ɖoɖo si nu nuwo yina ɖoe nye si: Dodokpɔwo dzia dzidodo; dzidodo naa Kristotɔwo ƒe nɔnɔmewo dzina ɖe edzi le ame me; nusiwo ta woakpɔ dzidzɔ ɖoe nusiawo nye.—Petro I, 4:14; Petro II, 1:5-8.

 3. Nukata mele be vɔvɔ̃ na fukpekpewo alo xɔse ƒe dodokpɔwo nana míavɔ̃ ahe ɖe megbe o?

³ Apostolo Petro hã ƒo nu tso nusita mehiã be míavɔ̃ o alo asi le míaƒe xɔse ƒe dodokpɔwo nu o ŋu. Eŋlɔ be: “[Esia] me miatso aseye le, wònye ele na mi be, miaxa nu azɔ ɣeyiɣi ʋee aɖe le tetekpɔ bubu ƒomeviwo me hafi, bena woakpɔ miaƒe xɔse ƒe dodokpɔ be, exɔ asi geɖe wu sika, si gblẽna, wònye wodoe kpɔ kple dzo hafi hena kafukafu kple ŋutikɔkɔe kple bubu le Yesu Kristo ƒe ɖeɖefia la me.” (Petro I, 1:6, 7) Nya siawo de dzi ƒo ŋutɔ elabena “xaxa gã” la—kafukafu, ŋutikɔkɔe, bubu, kple agbetsitsi ƒe ɣeyiɣia—gogo ŋutɔ wu alesi ame aɖewo susui eye egogo wu esime míezu xɔsetɔwo.—Mateo 24:21; Romatɔwo 13:11, 12.

 4. Aleke nɔviŋutsu aɖe bu dodokpɔ siwo va eya kple Kristotɔ amesiamina bubuwo dzii?

⁴ Le nyati si do ŋgɔ me la, míedzro dodokpɔ siwo me amesiamina susɔeawo to tso ƒe 1914 me la me. Ðe nusiawo nye nusiwo ta woakpɔ dzidzɔ ɖoa? A. H. Macmillan gblɔ nya siwo gbɔna esi wòtrɔ kpɔ megbe kpɔ ɣeyiɣi siwo va yi be: “Mekpɔ dodokpɔ sesẽ geɖe si va habɔbɔa dzi kple tetekpɔ siwo do emetɔwo ƒe xɔse kpɔ la teƒe. Mawu ƒe gbɔgbɔ la ƒe kpekpeɖeŋu na wòte ŋu to eme eye wòkpɔtɔ le ŋgɔ yim. Mekpɔ alesi nunya le eme be míalala akpɔ Yehowa sinu be wòana míase Ŋɔŋlɔawo me nyawo gɔme tsɔ wu be míana gɔmesese yeye aɖe naɖe dzi le mía ƒo la dze sii. . . . Eɖanye asitɔtrɔ kawoe wòahiã be míawɔ le míaƒe nukpɔsusuwo ŋu ɣeaɖewoɣi o, matrɔ tafe ƒe ɖoɖo si wowɔ amenuvevetɔe kple Mawu ƒe agbe mavɔ ƒe ŋugbedodo la o. Eyata mele be míana nusiwo míekpɔ mɔ na gake womeva eme o alo tɔtrɔ siwo va le míaƒe gɔmesese ŋu la nana míaƒe xɔse nagbɔdzɔ o.”—August 15, 1966, ƒe Eŋlisigbe me Gbetakpɔxɔ, axa 504.

 5. (a) Vi kawoe ame susɔeawo ƒe dodokpɔwo me toto ɖe? (b) Nukatae wòle be dodokpɔnya la naka mí fifia?

⁵ Kristotɔ amesiamina siwo to ƒe 1914-19 dodokpɔɣia me la vo tso xexeame ƒe ŋusẽkpɔɖeamedzi kple Babilon ƒe mawusubɔsubɔnuwɔna geɖe siwo kpɔ ŋusẽ ɖe amewo dzi la me. Ame susɔea siwo ŋu wokɔ hedza la yi ŋgɔ, eye wolɔ̃ faa tsɔ kafukafuvɔsa na Mawu eye kakaɖedzi nɔ wo si be yewoƒe nu dze eyama ŋu. (Yesaya 52:11; Korintotɔwo II, 6:14-18) Ʋɔnudɔdrɔ̃ dze egɔme le Mawu ƒe aƒeme, gake mawu enu le ɣeyiɣi ɖoɖi ɖeka aɖe me o. Mawu ƒe amewo dodokpɔ kple wo me tiatia le edzi yim. Wole amesiwo le mɔ kpɔm be yewoanye “ameha gã” la me tɔwo atsi agbe le “xaxa gã” si gbɔna me hã ƒe xɔse dom kpɔ. (Nyaɖeɖefia 7:9, 14) Wole esia wɔm le mɔ siwo ɖi nusiwo me amesiamina susɔeawo to kple mɔ bubuwo nu.

Aleke Woate Ŋu Ado Wò Akpɔe?

 6. Dodokpɔ sesẽ siwo me ame geɖe to la ƒomevi aɖe ɖe?

⁶ Kristotɔ geɖe bu alesi wònye nu sesẽe be woanɔ te ɖe dodokpɔ siwo nye amedzidzedze tẽ nu ŋu. Woɖoa ŋku nyatakaka sia dzi, be: “[Yudatɔwo ƒe kplɔlawo yɔ] apostoloawo vɛ, . . . woƒo wo, eye wode se na wo be, woagaƒo nu le Yesu ƒe ŋkɔa dzi o, eye wodo mɔ wo. Ke woawo la wodzo le ʋɔnudrɔ̃lawo ƒe ŋku me kple dzidzɔ be, wobu wo be, wodze bena woado ŋukpe wo le eƒe ŋkɔ la ta.” (Dɔwɔwɔwo 5:40, 41) Eye edze kɔte le Mawu ƒe amewo ƒe egbegbe ŋutinya me, vevietɔ le xexemeʋaawo me, be woƒo Yehowa Ðasefowo dometɔ geɖe eye wo yometilawo gawɔ nusiwo vɔ̃ɖi kura wu ema ɖe wo ŋu.

 7. Afika ke míaƒe ɣeyiɣia me Kristotɔ aɖewo ɖe xɔse fia see?

⁷ Le yometiti si wohena vaa Kristotɔwo dzi gome la, xexeame medea vovototo amesiamina susɔeawo kple ‘alẽ bubuawo’ ƒe ameha gã la dome o. (Yohanes 10:16) Le ƒeawo me la, wotsɔ gaxɔmenɔnɔ kple xɔsetaku gɔ̃ hã do ƒuƒoƒo eveawo me tɔwo kpɔ vevie le woƒe lɔlɔ̃ na Mawu kple edzixɔxɔse ta. Ƒuƒoƒo evea siaa hiã Mawu ƒe gbɔgbɔ la, eɖanye mɔkpɔkpɔ kae le wo si o. (Tsɔe sɔ kple June 15, 1996, ƒe Gbetakpɔxɔ, axa 31.) Le ƒe 1930 ƒeawo kple ƒe 1940 ƒe ƒeawo me le Nazitɔwo ƒe Germany la, Yehowa subɔla geɖe, siwo me ɖeviwo hã nɔ, ɖe xɔse ɖedzesi fia, eye wodo wo dometɔ geɖe kpɔ vevie ŋutɔ. Nyitsɔ laa sia la, woti Yehowa ƒe amewo yome le dukɔwo abe Burundi, Eritrea, Ethiopia, Malawi, Mozambique, Rwanda, Singapore, kple Zaire ene me. Eye dodokpɔ siawo tɔgbe gale edzi yim.

 8. Aleke nya siwo nɔviŋutsu aɖe si le Afrika gblɔ fia be míaƒe xɔse ƒe dodokpɔ mese ɖe dzidodo le yometiti me ƒe ameƒoƒo ko dzi o?

⁸ Gake abe alesi míegblɔe va yi ene la, wodoa míaƒe xɔse kpɔ le mɔ siwo menya kpɔna dzea sii o hã nu. Dodokpɔawo dometɔ aɖewo mevana tẽ ale o eye womenya kpɔna dzea sii bɔbɔe o. Bu alesi nàwɔ le nɔnɔme siawo dometɔ aɖewo me ŋu kpɔ. Nɔviŋutsu aɖe si si vi ewo le le Angola la le hame aɖe si sa ɖe aga me eye kadodo megava nɔ wo kple nɔvi siwo le dɔa dzi kpɔm dome o va de asi na ɣeyiɣi aɖe. Emegbe ame bubuwo te ŋu yi ɖasrã hamea kpɔ. Wobia alesi wòwɔna kpɔa eƒe ƒomea dzi lae. Eŋuɖoɖo menɔ bɔbɔe nɛ o, eye nya si wògblɔ koe nye be nɔnɔmea sesẽ ŋutɔ. Ete ŋu kpɔa nuɖuɖu naa viawo zi ɖeka teti le ŋkeke ɖeka mea? Eɖo eŋu be: “Ƒã hafi mete ŋu kpɔnɛ. Míesrɔ̃ alesi míanɔ agbe ɖe nusi le mía si nu.” Azɔ egblɔe kple kakaɖedzi blibo be: “Gake ɖe menye nɔnɔme siae míakpɔ mɔ na le ŋkeke mamlɛ siawo me oa?” Xɔse sia nye nusi le vevem le xexeame, gake ebɔ le Kristotɔ nuteƒewɔla siwo si kakaɖedzi blibo le be Fiaɖuƒe ŋugbedodowo ava eme la ya dome.

 9. Aleke wole mía dom kpɔ le Korintotɔwo I, 11:3 me nyawo gomee?

⁹ Wodoa ameha gã la kpɔna le teokrasiɖoɖowo ŋudɔwɔwɔ gome. Mawu ƒe gɔmeɖosewo kple teokrasi dzidzenuwoe fiaa mɔ xexeame katã ƒe Kristo-hamea. Esia fia be míalɔ̃ ɖe edzi gbã be Yesu Kristoe nye Kplɔla la, amesi woɖo wònye hamea ƒe Ta. (Korintotɔwo I, 11:3) Ðokuibɔbɔ ɖe eyama kple Fofoa te faa ɖenɛ fiana be míexɔ ametiatia le teokrasimɔnu kple nyametsotso siwo ku ɖe alesi míawɔ ɖeka awɔ Yehowa ƒe lɔlɔ̃nu ŋu la dzi se. Tsɔ kpe ɖe eŋu la, woɖo ŋutsu siwo axɔ ŋgɔ le hame ɖesiaɖe me. Wonye ame madeblibo siwo ƒe vodadaawo míate ŋu akpɔ bɔbɔe; ke hã woxlɔ̃ nu mí be míade bubu wo ŋu eye míabɔbɔ mía ɖokui na wo. (Hebritɔwo 13:7, 17) Ðe nusia wɔwɔ sesẽna na wò ɣeaɖewoɣia? Ðe wònyea dodokpɔ ŋutɔŋutɔ na wòa? Ne nenemae la, ke ɖe dodokpɔ sia le vi ɖem na wòa?

10. Dodokpɔ kae míedoa goe le gbeadzisubɔsubɔdɔ gome?

¹⁰ Wodoa mí kpɔna le gomekpɔkpɔ edziedzi le gbeadzisubɔsubɔdɔa wɔwɔ ƒe mɔnukpɔkpɔ si ganye nusi wobia tso mía si la hã gome. Be míado le dodokpɔ sia me la, ele be míanyae be menye ɣeyiɣi kpui aɖe ko tsɔtsɔ ɖe gbeƒãe, alo ewɔwɔ gotagomenuwɔwɔtɔe, ye gomekpɔkpɔ le gbeadzisubɔsubɔdɔa me fia o. Ðo ŋku ŋudzedzekpɔkpɔnya si Yesu gblɔ le ahosi dahe si tsɔ eƒe nusianu na ŋu la dzi. (Marko 12:41-44) Míate ŋu abia mía ɖokui ase be, ‘Ðe metsɔa ɖokuinye nana nenema le gbeadzisubɔsubɔdɔa mea?’ Ele be mí katã míanye Ðasefowo na Yehowa ŋkeke bliboa katã, anɔ klalo ana míaƒe akaɖi naklẽ le mɔnukpɔkpɔ ɖesiaɖe me.—Mateo 5:16.

11. Aleke tɔtrɔ siwo woawɔ le nuwo gɔmesese alo nuxlɔ̃ame gome ate ŋu anye dodokpɔe?

¹¹ Dodokpɔ bubu si míagate ŋu ado goe ku ɖe alesi gbegbe míekpɔa ŋudzedze ɖe kekeli si le kɔkɔm ɖe edzi si wole keklẽm ɖe Biblia me nyateƒea dzi kple ɖe aɖaŋu siwo dɔla nuteƒewɔla ƒe ha la ɖona ŋu la gome. (Mateo 24:45) Ɣeaɖewoɣi esia wɔwɔ biaa tɔtrɔ wɔwɔ le míaƒe agbenɔnɔ me, abe le kpɔɖeŋu me, esime eme kɔ be ele be amesiwo zãa atama nadzudzɔ ne wodi be yewoanɔ hamea me la ene.a (Korintotɔwo II, 7:1) Alo dodokpɔa ate ŋu anye alesi míalɔ̃ ɖe edzi be ehiã be míawɔ tɔtrɔ le hadzidzi alo modzakaɖeɖe ƒomevi bubu aɖewo ŋu la ŋuti.b Ðe míake ɖi le nunya si le aɖaŋu si woɖo me ŋua? Alo ɖe míana Mawu ƒe gbɔgbɔ nakpɔ ŋusẽ ɖe alesi míebua tamee dzi eye wòakpe ɖe mía ŋu be míado Kristotɔwo ƒe amenyenye yeyea?—Efesotɔwo 4:20-24; 5:3-5.

12. Nukae hiã be wòado ŋusẽ ame ƒe xɔse le nyɔnyrɔxɔxɔ vɔ megbe?

¹² Ameha gã la me tɔwo ƒe xexlẽme le dzidzim ɖe edzi ƒe geɖee nye sia, eye le woƒe nyɔnyrɔxɔxɔ vɔ megbe la, wokpɔa egbɔ be yewoana yewo kple Yehowa dome ƒomedodo me nasẽ ɣesiaɣi. Esia bia nu geɖe wu Kristotɔwo ƒe takpekpe aɖe dede, kpekpe ʋee aɖewo dede le Fiaɖuƒe Akpata me, alo gomekpɔkpɔ le gbeadzisubɔsubɔdɔa me ɣeaɖewoɣi. Le kpɔɖeŋu me: Ame aɖe ate ŋu anɔ Babilon Gã, alakpasubɔsubɔha ƒe xexeame katã ƒe fiaɖuƒe la, godo le ŋutilã me ya, gake ɖe wòtrɔ megbe dee ŋutɔŋutɔa? Ðe wògalé nu mawo siwo ɖea Babilon Gã la ƒe nɔnɔme fiana—nɔnɔme siwo doa vlo Mawu ƒe dzidzenu dzɔdzɔeawo, la me ɖe asi kokokoa? Ðe wòbua gbɔdɔdɔ ƒe agbenyuinɔnɔ kple nuteƒewɔwɔ le srɔ̃ɖeɖe me nu tsɛa? Ðe eƒe susu nɔa eya ŋutɔ ƒe nuwo kple ŋutilãmenuwo ŋu geɖe wu gbɔgbɔmenuwoa? Ẽ, ɖe mena xexeame ƒo ɖii oa?—Yakobo 1:27.

Na Xɔse si Wodo Kpɔ la Naɖe Vi na Wò

13, 14. Nukae ame aɖewo wɔ le gege ɖe tadedeagu vavãtɔ me vɔ megbe?

¹³ Ne míesi tso Babilon Gã la me vavã eye míedo go le xexeame hã la, ke mina be míagatrɔ akpɔ nusiwo míegblẽ ɖe megbe o. Le ɖekawɔwɔ me kple gɔmeɖose si le Luka 9:62 la, ne mía dometɔ aɖe trɔ kpɔ megbe la, ate ŋu ana magadze anye Mawu ƒe Fiaɖuƒea tenɔla o. Yesu gblɔ be: “Amesi tsɔ eƒe asi da ɖe kodzi dzi, eye wògale megbe kpɔm la, medze mawufiaɖuƒe la o.”

¹⁴ Gake amesiwo va zu Kristotɔwo le ɣeyiɣi siwo va yi me la ɖe mɔ le wo ɖokui ŋu woƒe agbenɔnɔ va ɖi nuɖoanyi sia tɔ. Wometsri xexeame ƒe gbɔgbɔ o. (Petro II, 2:20-22) Xexeame ƒe susuhenuwo xɔ woƒe susu kple ɣeyiɣi, eye wòna wogbe ŋgɔyiyi. Le esi woana woƒe susu nanɔ Mawu Fiaɖuƒea kple eƒe dzɔdzɔenyenye ŋu, eye woatsɔ nusiawo aɖo nɔƒe gbãtɔ le agbe me teƒe la, woɖe asi le eŋu va le ŋutilãmenuwo dim. Ne naneke meʋã wo wode dzesi woƒe xɔsemanɔsitɔwo nyenye kple yɔyrɔenɔnɔ eye wotrɔ hedi Mawu ƒe aɖaŋuɖoɖo o la, ke ate ŋu adzɔ be ƒomedodo xɔasi si le wo kple Yehowa kpakple eƒe habɔbɔa dome me nagblẽ.—Nyaɖeɖefia 3:15-19.

15. Nukae wòhiã be míawɔ be míaƒe nu nanɔ Mawu ŋu dzem ɖaa?

¹⁵ Mía bubu amesiwo dze hena agbetsitsi le xaxa gã si le du dzi gbɔna me nɔ te ɖe mía ɖokui wɔwɔ kɔkɔe kple míaƒe ‘awuwo nyanyã le Alẽvi la ƒe ʋu la me’ dzi. (Nyaɖeɖefia 7:9-14; Korintotɔwo I, 6:11) Ne míelé tenɔnɔ dzɔdzɔe si dza me ɖe asi le Mawu ŋkume o la, womakpɔ ŋudzedze ɖe míaƒe subɔsubɔ kɔkɔea ŋu o. Nyateƒee, ele be mía dometɔ ɖesiaɖe nakpɔe adze sii be xɔse si wodo kpɔ wòsesẽ akpe ɖe mía ŋu míado dzi eye ana míagava wɔ naneke si madze Mawu ŋu o.

16. Mɔ kawo nue aʋatsokakaɖeamesi ate ŋu ado míaƒe xɔse kpɔ le?

¹⁶ Ɣeaɖewoɣi la, nyakakadɔwɔlawo kpakple dziɖuɖumegãwo daa alakpa ɖe Mawu ƒe amewo si eye wogblɔa vlodoamenyawo ɖe míaƒe Kristotɔwo ƒe dzixɔsewo kple agbenɔnɔ ŋu. Mele be esia nawɔ nuku na mí o, elabena Yesu gblɔe kɔte be ‘xexeame alé fu mí elabena míenye eƒe akpa aɖeke o.’ (Yohanes 17:14) Ðe míaɖe mɔ amesiwo Satana gbã ŋku na nado vɔvɔ̃ na mí eye woaɖe dzi le mía ƒo eye woana nyanyuia nakpe ŋu na mía? Ðe míaɖe mɔ aʋatsonya siwo wogblɔna ɖe nyateƒea ŋu nagblẽ nu le míaƒe kpekpewo dede edziedzi kple míaƒe gbeƒãɖeɖedɔa ŋua? Alo ɖe míanɔ te sesĩe eye míalé dzi ɖe ƒo aɖoe kplikpaa wu be míayi edzi aɖe gbeƒã nyateƒe si ku ɖe Yehowa kple eƒe Fiaɖuƒea ŋua?

17. Kakaɖedzi kae ate ŋu ado ŋusẽ mí be míayi edzi anɔ xɔse ɖem anɔ fiafiam?

¹⁷ Biblia ƒe nyagblɔɖi siwo va eme fia be míeɖo didiƒe ʋĩ na nuwuɣia fifia. Kakaɖedzi li be míaƒe mɔkpɔkpɔ na dzɔdzɔenyenye xexeme yeye si ƒe nya Biblia gblɔ la ava eme godoo dzidzɔtɔe. Vaseɖe esime ɣemaɣi naɖo la, mina mí katã míaɖe Mawu ƒe Nya la dzixɔse maʋãmaʋã afia eye míaɖo kpe nusi míaƒe xɔse nye dzi to gbeƒãɖeɖe Fiaɖuƒea ŋuti nyanyuia le xexeame katã madzudzɔmadzudzɔe me. Bu nusrɔ̃la yeye siwo wonaa nyɔnyrɔe kwasiɖa sia kwasiɖa la ŋu kpɔ. Ðe ema ɖeɖe mena míekpɔe be alesi Yehowa gbɔ dzi ɖi le eƒe ʋɔnudɔdrɔ̃ hehe vɛ me ate ŋu ana ame geɖe wu nakpɔ ɖeɖe oa? Ðe medzɔ dzi na mí be Mawu ɖe mɔ Fiaɖuƒedɔ si naa agbe la gale edzi yim oa? Eye ɖe medzɔ dzi na mí be ame miliɔn geɖe xɔ nyateƒea eye wole woƒe xɔse ɖem fia oa?

18. Tame kplikpaa kae nèɖo ɖe Yehowa subɔsubɔ ŋu?

¹⁸ Míate ŋu anya ɣeyiɣi didi kae míaƒe xɔse ƒe dodokpɔ si le edzi yim fifia la awu enu o. Gake míeka ɖe nya sia dzi be: Yehowa ɖo ŋkeke si dzi wòabia akɔnta fifi dziƒowo kple anyigba vɔ̃ɖi la. Hafi ŋkeke ma naɖo la, mina míaɖoe kplikpaa be míasrɔ̃ xɔse si wodo kpɔ ƒe nɔnɔme ɖedzesi si Yesu, Amesi naa míaƒe xɔse zua blibo la ɖe fia. Eye mina míasrɔ̃ amesiamina susɔe tsitsiawo kple ame bubu siwo le subɔsubɔm dzideƒotɔe le mía dome ƒe kpɔɖeŋu.

19. Nuka dzie nàte ŋu aka ɖo be aɖu xexe sia me dzi?

¹⁹ Ele be míaɖoe kplikpaa be míagblɔ nyanyui mavɔ la ŋutinya na dukɔ, to, gbegbɔgblɔ, kple du ɖesiaɖe me tɔwo madzudzɔmadzudzɔe le ɖekawɔwɔ me kple mawudɔla si le dzodzom le dziƒo titina. Mina woase mawudɔla la ƒe gbedasia be: “Mivɔ̃ Mawu, eye mitsɔ ŋutikɔkɔe nɛ; elabena eƒe ʋɔnudɔdrɔ̃gaƒoƒo la ɖo.” (Nyaɖeɖefia 14:6, 7) Ne Mawu he ʋɔnudɔdrɔ̃ ma vɛ la, nukae ado tso eme le míaƒe xɔse si wodo kpɔ la gome? Ðe manye aʋadziɖuɖu nyui—si nye ɖeɖekpɔkpɔ tso fifi nuɖoanyia me ayi ɖe Mawu ƒe dzɔdzɔenyenyexexe yeyea mee oa? Ne míedo dzi to míaƒe xɔse ƒe dodokpɔwo me la, míate ŋu agblɔ abe alesi apostolo Yohanes gblɔe ene be: ‘Aʋadziɖuɖu si míetsɔ ɖu xexeame dzi la, eyae nye míaƒe xɔse.’—Yohanes I, 5:4.

[Etenuŋɔŋlɔwo]

Èɖo Ŋku Wo Dzia?

◻ Aleke wɔ míaƒe xɔse ƒe dodokpɔ naa míekpɔa dzidzɔ?

◻ Míaƒe xɔse ƒe dodokpɔ siwo manya akpɔ adze sii bɔbɔe o dometɔ aɖewo ɖe?

◻ Viɖe kawoe wòanye na mí ne míedo dzi vaseɖe nuwuwu le míaƒe xɔse ƒe dodokpɔwo me?

[Nɔnɔmetata si le axa 17]

A. H. Macmillan (ŋgɔgbe le miame) le ɣeyiɣi si me wolé wo kple Gbetakpɔxɔ Habɔbɔa ƒe ŋgɔnɔlawo de game madzemadzee

Ede Detroit, Michigan, takpekpea le ƒe 1928 me

Eyi edzi ɖe xɔse fia le eƒe agbenɔƒe mamlɛawo me

[Nɔnɔmetata si le axa 18]

Kristotɔ geɖe siwo le Afrika ɖe xɔse si wodo kpɔ fia abe ƒome sia ene