Lɔlɔ̃ Ðua Ŋuʋaʋã Manyomanyo Dzi
“Lɔlɔ̃ la meʋãa ŋu o.”—KORINTOTƆWO I, 13:4.
1, 2. (a) Nya kae Yesu gblɔ na eƒe nusrɔ̃lawo le lɔlɔ̃ ŋu? (b) Ðe wòanya wɔ be woaɖe lɔlɔ̃ kple ŋuʋaʋã siaa afia, eye nukata nèɖo eŋu nenema?
LƆLƆ̃E dea dzesi Kristotɔnyenye vavãtɔ. Yesu Kristo gblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Gbɔgbɔ ʋã apostolo Paulo wòɖe ŋusẽ si wòle be lɔlɔ̃ nakpɔ ɖe Kristotɔwo ƒe ƒomedodowo dzi me. Eŋlɔ kpe ɖe nya bubuwo ŋu be: “Lɔlɔ̃ la meʋãa ŋu o.”—Korintotɔwo I, 13:4.
2 Ŋuʋaʋã gbegblẽ ye Paulo wɔnɛ le nya mawo siwo wòŋlɔ la me. Anye ne magate ŋu agblɔ na hame ma ke be: “Metsɔ Mawu ŋuʋaʋã le ŋu ʋãm le mia ŋu” o. (Korintotɔwo 11:2) ‘Mawumeŋuʋaʋã’ ɖo eme le ŋutsu siwo nɔ ŋusẽ gbegblẽ kpɔm ɖe hamea dzi ta. Esia ʋã Paulo wòŋlɔ lɛta evelia si tso gbɔgbɔ me si me lɔlɔ̃ ƒe aɖaŋuɖoɖo geɖe le la na Korinto Kristotɔwo.—Korintotɔwo II, 11:3-5.
Ŋuʋaʋã le Kristotɔwo Dome
3. Aleke ŋuʋaʋã ƒe kuxi aɖe do mo ɖa le Kristotɔ siwo nɔ Korinto la domee?
3 Le lɛta gbãtɔ si Paulo ŋlɔ na Korintotɔwo me la, eƒo nu tso kuxi aɖe si na Kristotɔ yeye siawo dome menɔ vivim o ŋu. Wonɔ ame aɖewo dom ɖe dzi henɔ wo ɖokui dom “ɖe dzi le ame ɖeka ta ɖe ame bubu ŋuti.” Esia de mamã hamea me, eye amewo nɔ gbɔgblɔm be: “Nye la, Paulo tɔ menye! Nye la, Apolo tɔ menye! Nye la, Kefa tɔ menye!” (Korintotɔwo I, 1:12; 4:6) Gbɔgbɔ kɔkɔe fia mɔ apostolo Paulo wòkpɔ nusi gbɔ kuxia tso. Korintotɔwo nɔ nu wɔm abe ŋutilãmemewo ene, ke menye abe “gbɔgbɔmemewo” ene o. Eyata Paulo ŋlɔ bena: “Mieganye ŋutilãmemewo. Elabena ŋkeke alesi ŋuʋaʋã kple dzrewɔwɔ kple mamã le mia dome la, menye ŋutilãmemewo mienye, eye miezɔna le ŋutalã la nu o ɖe?”—Korintotɔwo I, 3:1-3.
4. Kpɔɖeŋu kae Paulo zã tsɔ kpe ɖe nɔviawo ŋu be wo nɔewo ŋuti nukpɔsusu nyui nasu wo si, eye nukae míate ŋu asrɔ̃ le esia me?
4 Paulo kpe ɖe Korintotɔwo ŋu be dzɔdzɔmenunana kple ŋutete siwo le hamea me tɔ vovovowo si ŋuti nukpɔsusu nyui nasu wo si. Ebia be: “Ameka na nèto vovo ma? Eye nukae le asiwò, si mèxɔ oa? Ke ne wò hã nèxɔe la, nukaŋuti nèle adegbe ƒom abe menye ɖe nèxɔe ene oa?” (Korintotɔwo I, 4:7) Paulo ɖe eme le Korintotɔwo I, ta 12 be hamea me tɔwo le abe ametia ŋuti nu vovovowo, asi, ŋku, kple to ene. Eɖee fia be Mawu wɔ ametia ŋutinuwo alea be woalé be na wo nɔewo. Paulo gaŋlɔ bena: “Ne wode bubu ŋutinu ɖeka ŋu la, ŋutinuwo katã kpɔa dzidzɔ nɛ ti.” (Korintotɔwo I, 12:26) Ele be Mawu subɔlawo katã natsɔ gɔmeɖose sia awɔ dɔe le woƒe ƒomedodo kple wo nɔewo me egbea. Le esi teƒe be míaʋã ŋu ame bubu le eƒe dɔdasi alo ŋgɔyiyi siwo wòwɔ le Mawu ƒe subɔsubɔdɔa me ta la, ele be míakpɔ dzidzɔ boŋ kpli ame ma.
5. Nukae woɖe fia le Yakobo 4:5, eye aleke Ŋɔŋlɔawo te gbe ɖe nya siawo ƒe nyateƒenyenye dzii?
5 Nyateƒee, esia gbɔgblɔ le bɔbɔe wu ewɔwɔ. Biblia-ŋlɔla Yakobo ɖo ŋku edzi na mí be ‘ŋuʋaʋã ƒe dzodzro’ nɔa nuvɔ̃me ɖesiaɖe me. (Yakobo 4:5) Amegbetɔ ƒe ku gbãtɔ dzɔ le esi Kain na ŋuʋaʋã gbegblẽ kpɔ ŋusẽ ɖe edzi ta. Filistitɔwo ti Isak yome le esi woʋã ŋu eƒe dzidzedzekpɔkpɔ ta. Raxel ʋã ŋu nɔvianyɔnu ƒe vi geɖe dzidzi. Yakob viwo ʋã ŋu ɖe alesi wove wo nɔviŋutsu suetɔ Yosef nui ta. Edze ƒã be Miriam ʋã ŋu foa srɔ̃ si menye Israel-vi o la. Korax, Datan, kple Abiram dze aglã ɖe Mose kple Aron ŋu ŋuʋaʋãtɔe. Fia Saul ʋã ŋu Dawid ƒe dzidzedzekpɔkpɔ le aʋawɔwɔ me. Ðikeke mele eme o be ŋuʋaʋã hãe na Yesu ƒe nusrɔ̃lawo he nya edziedzi le wo dometɔ si nye gãtɔ ŋu. Nyateƒeae nye be ame madeblibo aɖeke medo le ‘ŋuʋaʋã ƒe dzodzro’ vɔ̃ɖi me keŋkeŋ o.—Mose I, 4:4-8; 26:14; 30:1; 37:11; Mose IV, 12:1, 2; 16:1-3; Psalmo 106:16; Samuel I, 18:7-9; Mateo 20:21, 24; Marko 9:33, 34; Luka 22:24.
Le Hamea Me
6. Aleke hamemegãwo ate ŋu aɖu ŋuʋaʋã ƒe dzodzro dzii?
6 Ehiã be Kristotɔwo katã nanɔ ŋudzɔ ɖe ŋubiabiã kple ŋuʋaʋã manyomanyo ŋu. Hamemegãwo ƒe ha siwo wotsɔ Mawu ƒe amewo ƒe hamewo dzi kpɔkpɔ de asi na hã le esia me. Ne hamemegã bɔbɔa eɖokui la, madi vevie be yeanɔ ŋgɔ na ame bubuwo ŋuʋaʋãtɔe o. Gake ne ɖoɖowɔwɔ alo dutoƒonuƒoƒo ƒe ŋutete ɖedzesiwo le hamemegã aɖe si la, ame bubuawo akpɔ dzidzɔ ɖe esia ta ahabui be enye yayra na hamea. (Romatɔwo 12:15, 16) Ðewohĩ nɔviŋutsu aɖe anɔ ŋgɔyiyi nyui wɔm eye edze ƒã be eɖea Mawu ƒe gbɔgbɔ ƒe kutsetsewo fiana le eƒe agbenɔnɔ me. Ne hamemegãwo le eƒe dzedze ŋu bum la, ele be woakpɔ nyuie be womalé vodada sue aɖe me ɖe asi agblɔ be ema ta yewomakafui wòazu subɔsubɔdɔwɔla alo hamemegã o. Ema afia amemalɔ̃malɔ̃ kple nugɔmemasemase.
7. Kuxi kae ate ŋu ado mo ɖa ne wode teokrasi-dɔ aɖe asi na Kristotɔ aɖe?
7 Ne wode teokrasi-dɔ asi na ame aɖe alo wòkpɔ gbɔgbɔmeyayra aɖe la, ele be hamea me tɔ bubuwo nanɔ ŋudzɔ be woagaʋã ŋu o. Le kpɔɖeŋu me, woazã nɔvinyɔnu bibi aɖe wòawɔ wɔwɔfiawo le Kristotɔwo ƒe kpekpewo me edziedzi wu ame bubu. Esia ate ŋu ana nɔvinyɔnu aɖewo naʋã ŋu. Kuxi ma tɔgbe ye anya nɔ Ewodia kple Sintixe dome le Filipi-hamea me. Ele be hamemegãwo nade dzi ƒo na nyɔnu siawo tɔgbe siwo li egbea la dɔmenyotɔe be woabɔbɔ wo ɖokui eye “woƒe tamesusu nanɔ ɖeka le Aƒetɔ la me.”—Filipitɔwo 2:2, 3; 4:2, 3.
8. Nuwɔna vɔ̃ɖi kawoe ŋuʋaʋã ate ŋu ahe vɛ?
8 Ðewohĩ Kristotɔ aɖe nya nu tso amesi wotsɔ mɔnukpɔkpɔwo yra le hamea me fifia la ƒe tsã gbɔdzɔgbɔdzɔwo ŋu. (Yakobo 3:2) Ŋuʋaʋã ate ŋu atee kpɔ wòaƒo nu tso esia ŋu na ame bubuwo atsɔ atɔ gbe dɔ si wode ame ma si le hamea me. Esia ato vovo na lɔlɔ̃ si “tsyɔa nuvɔ̃wo ƒe agbɔsɔsɔ dzi.” (Petro I, 4:8) Nya si woagblɔ le ŋuʋaʋã me ate ŋu agblẽ hamea ƒe ŋutifafa me. Nusrɔ̃la Yakobo xlɔ̃ nu be: “Ne ŋuʋaʋã vevi kple dzrehehe le mia dzi me la, migaƒo adegbe, eye migaka aʋatso ɖe nyateƒe la ŋuti o. Nunya sia la menye dziƒo wòtso va o; ke anyigbadzitɔe, dzɔdzɔmetɔe, gbɔgbɔ vɔ̃ tɔe.”—Yakobo 3:14, 15.
Le Wò Ƒomea Me
9. Aleke srɔ̃tɔwo ate ŋu aɖu woƒe ŋuʋaʋã ƒe seselelãmewo dzii?
9 Srɔ̃ɖeɖe geɖe me gblẽna le ŋuʋaʋã manyomanyo ta. Makamaka ɖe srɔ̃wò dzi mefia lɔlɔ̃ o. (Korintotɔwo I, 13:7) Gake ɖewohĩ srɔ̃tɔ ɖeka matsɔ ɖeke le srɔ̃a ƒe ŋuʋaʋã ƒe seselelãmewo me o. Le kpɔɖeŋu me, srɔ̃nyɔnu aʋã ŋu le srɔ̃a ƒe tete ɖe nyɔnu bubu ŋu ta. Alo srɔ̃ŋutsu aʋã ŋu le ɣeyiɣi si srɔ̃a zãna tsɔ kpɔa eƒe ƒometɔ aɖe ƒe nuhiahiãwo gbɔe ta. Ne seselelãme siawo na srɔ̃tɔawo tɔtɔ la, ɖewohĩ woazi ɖoɖoe ahaɖe woƒe dziɖeleameƒo fia le mɔ si ana kuxia nado gã ɖe edzi nu. Ðe ema teƒe la, ele be srɔ̃tɔ si le ŋu ʋãm la naƒo nu na srɔ̃a ahaɖe eƒe seselelãmewo agblɔ le anukwareɖiɖi me. Ele be srɔ̃tɔ evelia hã nase nu gɔme nɛ ahaka ɖe eƒe lɔlɔ̃ dzi nɛ. (Efesotɔwo 5:28, 29) Ahiã be wo ame evea siaa nana ŋuʋaʋã nu nafa to alesi woaƒo asa na nɔnɔme siwo henɛ vɛ me. Ɣeaɖewoɣi la, ahiã be dzikpɔla Kristotɔ nakpe ɖe srɔ̃a ŋu wòase egɔme be ɖeko yele tetem ɖe nyɔnuwo ŋu vie le mɔ nyuitɔ nu be yeatsɔ Mawu ƒe alẽha la kpɔkplɔ ƒe agbanɔamedzi la. (Yesaya 32:2) Le nyateƒe me la, ele be hamemegã nakpɔ nyuie be wòagawɔ nusi ana srɔ̃a naʋã ŋu o. Esia bia be wòada asɔ ahakpɔ egbɔ be yezãa ɣeyiɣi tsɔ doa ŋusẽ ye ŋutɔ ƒe srɔ̃ɖeɖe ƒe ƒomedodo lae.—Timoteo I, 3:5; 5:1, 2.
10. Aleke dzilawo ate ŋu akpe ɖe wo viwo ŋu woanɔ te ɖe ŋuʋaʋã ƒe seselelãmewo nui?
10 Ele be dzilawo hã nakpe ɖe wo viwo ŋu woase nusi ŋuʋaʋã gbegblẽ nye gɔme. Zi geɖe la, ɖeviwo hea nya siwo va zua dzre. Ŋuʋaʋã gbɔe wòtsona zi geɖe. Esi ɖevi ɖesiaɖe ƒe nuhiahiãwo to vovo ta la, womate ŋu awɔ nu ɖe ɖeviwo ŋu sɔsɔe o. Tsɔ kpe ɖe eŋu la, ele be ɖeviwo nanya be ŋusẽ kple gbɔdzɔgbɔdzɔ vovovowoe le yewo dometɔ ɖesiaɖe ŋu. Ne wodea dzi ƒo na ɖevi ɖeka ɣesiaɣi be wòawɔ nu nyuie abe nɔvia ene la, esia ate ŋu ana wòaʋã ŋu eye ame kemea hã nanɔ dadam. Eyata ele be dzilawo nahe wo viwo be woatsɔ Mawu ƒe Nya la me kpɔɖeŋuwo adzidze woƒe ŋgɔyiyiwoe, ke menye be woaʋli ho kple wo nɔewo o. Biblia gblɔ be: “Miganɛ míaƒe ŋkuwo nabiã le bubu dzodzro ŋuti o, ne míagadi ge le mía nɔewo ŋu, eye míaƒe nu nagave dɔme na mía nɔewo o.” Ke boŋ “amesiame nado ye ŋutɔ ƒe dɔwɔwɔ akpɔ, ekema akpɔ nu aƒo adegbe le ye ŋutɔ ɖokui ɖeɖeko me, eye menye le ame bubu me o.” (Galatiatɔwo 5:26; 6:4) Vevietɔ wu la, ele be dzila Kristotɔwo nakpe ɖe wo viwo ŋu to Biblia sɔsrɔ̃ edziedzi me ahate gbe ɖe kpɔɖeŋu nyui kple gbegblẽa siwo le Mawu ƒe Nya la me dzi.—Timoteo II, 3:15.
Amesiwo Ðu Ŋuʋaʋã Dzi ƒe Kpɔɖeŋuwo
11. Aleke Mose nye kpɔɖeŋu nyui aɖe le ŋuʋaʋã dzi ɖuɖu mee?
11 “Mose fa wu amesiwo katã le anyigba dzi” si to vovo na xexe sia me ŋgɔnɔla ŋusẽdilawo. (Mose IV, 12:3) Esime Israel-viwo kpɔkplɔ va zu agba si manya tsɔ na Mose ɖeka o la, Yehowa na Eƒe gbɔgbɔ wɔ dɔ ɖe Israel-vi 70 bubuwo dzi hedo ŋusẽ wo be woakpe ɖe Mose ŋu. Esime amesiawo dometɔ eve va nɔ dɔ wɔm abe nyagblɔɖilawo ene la, Yosua bu be esia ɖe Mose ƒe ŋgɔnɔlanyenye dzi kpɔtɔ madzemadzee. Yosua di be yeaxe mɔ na ŋutsuawo, gake Mose gblɔ nɛ ɖokuibɔbɔtɔe be: “Wòe le ŋu ʋã ge ɖe nunyea? Oo, Yehowa mana eƒe gbɔgbɔ nava dukɔ blibo la dzi, eye woatrɔ zu Yehowa ƒe nyagblɔɖilawo dzro oa?” (Mose IV, 11:29) Ẽ, edzɔ dzi na Mose be subɔsubɔ ƒe mɔnukpɔkpɔ su ame bubuwo hã si. Medi bubu na eɖokui ŋuʋaʋãtɔe o.
12. Nukae na Yonatan meʋã ŋu o?
12 Yonatan, Israel Fia Saul ƒe vi la, ɖo alesi lɔlɔ̃ ɖua ŋuʋaʋã ƒe seselelãme manyomanyo si ate ŋu aho ɖe ame me dzii ƒe kpɔɖeŋu nyui aɖe ɖi. Yonatan ye nye amesi aɖu fia akplɔ fofoa ɖo hafi, gake Yehowa tia Dawid, Isai vi la, be wòanye fia si kplɔe ɖo. Ame geɖe aʋã ŋu Dawid ahabui futɔe ne woawoe nye Yonatan. Gake Yonatan ƒe lɔlɔ̃ na Dawid mena seselelãme sia ɖu edzi o. Esi Dawid se Yonatan ƒe ku la, ete ŋu gblɔ be: “Tɔwò le veyem, nɔvinye Yonatan! Wò nu vivi nunye ŋutɔ, eye wò lɔlɔ̃ nam ƒo nyɔnuwo ƒe lɔlɔ̃ ta!”—Samuel II, 1:26.
Kpɔɖeŋu Siwo Ðe Dzesi Wu
13. Amekae nye ŋuʋaʋã ƒe kpɔɖeŋu nyuitɔ kekeake, eye nukatae?
13 Yehowa Mawue nye amesi te ŋu kpɔa ŋusẽ ɖe ŋuʋaʋã nyuitɔ gɔ̃ hã dzi ƒe kpɔɖeŋu si ɖe dzesi wu. Eɖua seselelãme siawo dzi bliboe. Mawu ƒe ŋuʋaʋã ɖeɖefia sẽŋu ɖesiaɖe wɔa ɖeka kple Mawu ƒe lɔlɔ̃, dzɔdzɔenyenye, kple nunya.—Yesaya 42:13, 14.
14. Kpɔɖeŋu kae Yesu ɖo si to vovo na Satana tɔ?
14 Mawu ƒe Vi lɔlɔ̃a, Yesu Kristo, ye nye kpɔɖeŋu ɖedzesi evelia le ŋuʋaʋã ƒe seselelãme dzi ɖuɖu me. “Esi wònye Mawu ƒe nɔnɔmee” Yesu nɔ “hã la, mebui nuhahae bena, ye kple Mawu sɔ o.” (Filipitɔwo 2:6) Aleke gbegbe wòto vovo na mawudɔla nugãdila si va zu Satana Abosam la ƒe nuwɔnae nye si! Abe alesi “Babel-fia” wɔ ene la, Satana di be ‘yeanɔ tasɔsɔ me kple Dziƒoʋĩtɔ la’ ŋuʋaʋãtɔe to eɖokui wɔwɔ mawu si tsi tre ɖe Yehowa ŋu me. (Yesaya 14:4, 14; Korintotɔwo II, 4:4) Satana dze agbagba gɔ̃ hã be yeana Yesu ‘nadze klo ade ta agu’ na ye. (Mateo 4:9) Gake naneke mate ŋu ana Yesu nadzudzɔ eɖokuibɔbɔ ɖe Yehowa ƒe dziɖulanyenye te o. Nusi Yesu wɔ wòto vovo na Satana ƒe nuwɔnae nye be, “eɖi gbɔlo eɖokui, esime wòtsɔ dɔla ƒe nɔnɔme ɖo eɖokui dzi, hedzɔ ɖe amewo ƒe nɔnɔme, eye wokpɔ nuwɔna le eŋuti abe ame tɔ ene. Ebɔbɔ eɖokui ɖe anyi, eye wòɖo to yiɖase ku me, yiɖase [fuwɔameti] ŋuti ku la me ke.” Yesu do Fofoa ƒe dziɖuɖu ƒe dzedze ɖe dzi, eye wògbe Abosam ƒe dada kple ŋuʋaʋã ƒe nuwɔnawo keŋkeŋ. Le Yesu ƒe nuteƒewɔwɔ ta la, “Mawu do eyama ɖe dzi kakaka, eye wòtsɔ ŋkɔ, si ƒo ŋkɔ sia ŋkɔ ta la kee, bene amesiwo le dziƒo kple amesiwo le anyigba dzi kple amesiwo le anyigba te la, katã nadze klo le Yesu ƒe ŋkɔ la me, eye aɖe sia aɖe naʋu me bena, Yesu Kristo enye Aƒetɔ la hena Mawu Fofoa ƒe kafukafu.”—Filipitɔwo 2:7-11.
Alesi Nàɖu Wò Ŋuʋaʋã Dzii
15. Nukata wòle be míaɖɔ ŋu ɖo le ŋuʋaʋã dzi ɖuɖu me?
15 Kristotɔwo mede blibo abe Mawu kple Kristo ene o. Esi wonye nuvɔ̃mewo ta la, woate ŋu awɔ nu le nuvɔ̃ ƒe ŋuʋaʋã me ɣeaɖewoɣi. Eyata le esi teƒe be míaɖe mɔ ŋuʋaʋã nana míaɖe ɖeklemi haxɔsetɔ aɖe le vodada sue aɖe alo nusi míawo míebu be menyo o ta la, ele vevie be míade ŋugble le nya siawo siwo tso gbɔgbɔ me la ŋu: “Megawɔ nu dzɔdzɔe vivivo o, eye meganya nu tso eme akpa o; nukaŋuti nèbe, yeade ye ɖokui tsɔtsrɔ̃ me ɖo?”—Nyagblɔla 7:16.
16. Nuxlɔ̃ame nyui kae magazine sia ƒe tata aɖe si va yi na le ŋuʋaʋã ŋu?
16 Esi March 15, 1911 ƒe Eŋlisigbe me Gbetakpɔxɔ nɔ nu ƒom tso ŋuʋaʋã ŋu la, exlɔ̃ nu be: “Togbɔ be ele be míado vevie nu ahaʋã ŋu ɖe Aƒetɔ la ƒe dɔ nu vevie hã la, ele be míanya be menye ame ŋutɔ ƒe nya wònye o; eye ele be míabu eŋu akpɔ ne ‘míedea nu ame bubuwo ƒe nya me madzemadzee’ alo míele nenema o. Azɔ hã la, ele be míabu eŋu akpɔ ne asɔ be hamemegãwo nade nu nya sia me kple ne míawoe wòle be míayi hamemegãwo gbɔ alo míayi o. Ele be mí katã míaʋã ŋu ɖe Aƒetɔ la ƒe nuwɔna kple Aƒetɔ la ƒe dɔa nu vevie, gake míaɖɔ ŋu ɖo vevie be maganye manyomanyotɔ o . . . ne míagblɔe le mɔ bubu nu la, ele be míakpɔ nyuie be menye ŋuʋaʋã ame bubu o, ke ŋuʋaʋã ɖe ame bubu, nusiwo doa dzidzɔ nɛ kple eƒe nyonyo nyuitɔ nu boŋ wòanye.”—Petro I, 4:15.
17. Aleke míate ŋu atsri ŋuʋaʋã ƒe nuwɔna vɔ̃ɖiwo?
17 Aleke mí Kristotɔwo míate ŋu atsri dada, ŋuʋaʋã, kple ŋubiabiã? Nusi akpe ɖe mía ŋue nye alesi míana Mawu ƒe gbɔgbɔ kɔkɔea nawɔ dɔ le míaƒe agbenɔnɔ me faa. Le kpɔɖeŋu me, ehiã be míado gbe ɖa abia Mawu ƒe gbɔgbɔ kple eƒe kpekpeɖeŋu le eƒe kutsetsewo ɖeɖefia me. (Luka 11:13) Ehiã be míayi Kristotɔwo ƒe kpekpe siwo nu wotsɔa gbedodoɖa ʋuna eye Mawu ƒe gbɔgbɔ kple yayra le wo dzi la. Tsɔ kpe ɖe eŋu la, ele be míasrɔ̃ Biblia si tso Mawu ƒe gbɔgbɔ me. (Timoteo II, 3:16) Eye ele be míakpɔ gome le Fiaɖuƒegbeƒãɖeɖedɔ si wotsɔ Yehowa ƒe gbɔgbɔ kɔkɔe ƒe ŋusẽ le wɔwɔm la me. (Dɔwɔwɔwo 1:8) Kpekpeɖeŋu nana hati Kristotɔ siwo nɔnɔme gbegblẽ aɖe gbã dzi na hã nye alesi míana Mawu ƒe gbɔgbɔ nakpɔ ŋusẽ nyui ɖe mía dzi ƒe mɔ bubu. (Yesaya 57:15; Yohanes I, 3:15-17) Kristotɔwo ƒe dɔ siawo katã wɔwɔ veviedodotɔe akpɔ mía ta tso ŋuʋaʋã ƒe nuwɔna vɔ̃ɖiwo me, elabena Mawu ƒe Nya la gblɔ be: “Mizɔ le gbɔgbɔ me, eye miele ŋutilã ƒe nudzodzro dzi wɔ ge o.”—Galatiatɔwo 5:16.
18. Nukatae manye ɣesiaɣie míadze agbagba be míaɖu ŋuʋaʋã ƒe seselelãme manyomanyowo dzi o?
18 Lɔlɔ̃e nye Mawu ƒe gbɔgbɔ kɔkɔea ƒe kutsetse gbãtɔ si woyɔ. (Galatiatɔwo 5:22, 23) Lɔlɔ̃ ɖeɖefia ana míaɖu míaƒe dzodzro vɔ̃wo dzi fifia. Ke etsɔme ya ɖe? Yehowa subɔla miliɔn geɖe ƒe mɔkpɔkpɔe nye be yewoanɔ agbe le anyigba dzi Paradiso si gbɔna la dzi, afisi woate ŋu akpɔ mɔ be woakplɔ yewo aɖo amegbetɔ ƒe blibodede gbɔ le. Le xexe yeye ma me la, lɔlɔ̃ axɔ aƒe ɖi eye ŋuʋaʋã manyomanyo maganɔ ame aɖeke me o, elabena “woaɖe nuwɔwɔ la ŋutɔ hã tso gbegblẽ ƒe kluvinyenye la me ayi ɖe mawuviwo ƒe ŋutikɔkɔe ƒe ablɔɖe la me.”—Romatɔwo 8:21.
Nya Vevi Siwo Ŋu Míade Ŋugble Le
◻ Kpɔɖeŋu kae Paulo zã be yeatsɔ aɖe ŋuʋaʋã ɖae?
◻ Aleke ŋuʋaʋã ate ŋu agblẽ hamea ƒe ŋutifafa mee?
◻ Aleke dzilawo ate ŋu ahe wo viwo be woanɔ te ɖe ŋuʋaʋã nui?
◻ Aleke míate ŋu atsri ŋuʋaʋã ƒe nuwɔna vɔ̃ɖiwoe?
[Nɔnɔmetata si le axa 16]
Migana ŋuʋaʋã nagblẽ hamea ƒe ŋutifafa dome o
[Nɔnɔmetata si le axa 17]
Dzilawo ate ŋu ahe wo viwo be woakpe akɔ kple ŋuʋaʋã ƒe seselelãmewo