Togbɔ Be Tetekpɔwo Li Hã, Lé Wò Xɔse Me Ðe Asi!

“Nɔvinyewo, ne miege ɖe tetekpɔ bubu ƒomeviwo me la, mibui dzidzɔ sɔŋ.”—YAKOBO 1:2.

 1. Nukawoe mee Yehowa ƒe amewo tona gake subɔnɛ le xɔse kple ‘dzi kpɔdzidzɔ’ me?

YEHOWA ƒe amewo nye eƒe Ðasefo siwo tsɔa edzixɔxɔse kple ‘dzi kpɔdzidzɔ’ subɔnɛ. (Mose V, 28:47; Yesaya 43:10) Wowɔa esia togbɔ be tetekpɔ geɖe vaa wo dzi hã. Togbɔ be wotoa nɔnɔme sesẽwo me hã, wokpɔa akɔfafa tso nya siawo me be: “Nɔvinyewo, ne miege ɖe tetekpɔ bubu ƒomeviwo me la, mibui dzidzɔ sɔŋ, esi mienyae bena, miaƒe xɔse ƒe dodokpɔ wɔa dzidodo.”—Yakobo 1:2, 3.

 2. Nukae míenya le amesi ŋlɔ Yakobo ƒe lɛtaa ŋu?

² Ƒe 62 M.Ŋ. me lɔƒoe nusrɔ̃la Yakobo si nye Yesu Kristo dadavi ŋlɔ nya ma. (Marko 6:3) Yakobo nye hamemegã nɔ Yerusalem-hamea me. Le nyateƒe me la, ‘amewo bu’ eya, Kefa (Petro), kple Yohanes ‘be wonye sɔtiwo’—ame like, siwo woɖo anyi sesĩe ale be wolé hamea ɖe te. (Galatiatɔwo 2:9) Esi wotsɔ aʋatsotso ƒe nyaa va “apostoloawo kple hamemegãwo” ŋkume le ƒe 49 M.Ŋ. me lɔƒo la, Yakobo do susu nyui aɖe si sɔ ɖe Ŋɔŋlɔawo nu ɖa si dzi ƒe alafa gbãtɔ me dziɖuha la lɔ̃ ɖo.—Dɔwɔwɔwo 15:6-29.

 3. Nukawoe nye kuxi siwo dze ŋgɔ ƒe alafa gbãtɔ me Kristotɔwo la dometɔ aɖewo, eye aleke míawɔ Yakobo ƒe lɛtaa naɖe vi gãtɔ kekeake na mí?

³ Esi Yakobo nye gbɔgbɔ me alẽkplɔla si tsɔ ɖe le eme ta la, ‘enya alẽha la ƒe nɔnɔme.’ (Lododowo 27:23) Ekpɔe dze sii ɣemaɣi be Kristotɔwo nɔ tetekpɔ sesẽwo me tom. Ehiã be woaɖɔ ame aɖewo ƒe tamesusu ɖo, elabena wonɔ kesinɔtɔwo dzi dem. Tadedeagu va zu kɔnu dzro aɖe ko na wo dometɔ geɖe. Ame aɖewo nɔ woƒe aɖe si womemlã o zãm tsɔ nɔ nu gblẽmee. Xexeame ƒe gbɔgbɔ nɔ ŋusẽ gbegblẽ kpɔm ɖe wo dzi, eye ame geɖe megbɔa dzi ɖi alo doa gbe ɖa o. Le nyateƒe me la, Kristotɔ aɖewo dze dɔ le gbɔgbɔ me. Yakobo ƒe lɛta la ƒo nu tso nya siawo ŋu le mɔ tuameɖo aɖe nu, eye eƒe aɖaŋuɖoɖoa gasɔ nyuie egbea abe alesi wòsɔ le ƒe alafa gbãtɔ M.Ŋ. mee ene. Ne míedzro lɛta sia me abe míawoe woŋlɔe na tẽ la, aɖe vi geɖe na mí.a

Ne Tetekpɔwo Va Mía Dzi

 4. Aleke wòle be míabu tetekpɔwoe?

⁴ Yakobo fia alesi míabu tetekpɔwoe mí. (Yakobo 1:1-4) Megblɔ be ye kple Mawu ƒe Vi la yewonye ƒometɔwo o, ke boŋ eyɔ eɖokui ɖokuibɔbɔtɔe be “Mawu kple Aƒetɔ Yesu Kristo ƒe dɔla.” Yakobo ŋlɔ lɛtaa na gbɔgbɔ me Israel ƒe “ƒome wuieve” siwo “ka hlẽ,” gbã le yometiti ta. (Dɔwɔwɔwo 8:1; 11:19; Galatiatɔwo 6:16; Petro I, 1:1) Esi míenye Kristotɔwo ta la, wotia míawo hã mía yome, eye “[míegena] ɖe tetekpɔ bubu ƒomeviwo me.” Gake ne míeɖo ŋku edzi be tetekpɔ siwo me míedo dzi le doa ŋusẽ míaƒe xɔse la, ‘míabui dzidzɔ sɔŋ’ ne wova mía dzi. Ne míewɔ nuteƒe na Mawu le tetekpɔwo me la, ana míanɔ dzidzɔ kpɔm ɖaa.

 5. Nukae ate ŋu anye míaƒe tetekpɔwo dometɔ aɖewo, eye nukae dzɔna ne míedo dzi le wo me dzidzedzetɔe?

⁵ Míaƒe tetekpɔwo ƒe ɖewoe nye dzɔgbevɔ̃e siwo dzɔna ɖe ameƒomea dzi. Le kpɔɖeŋu me, lãmegbegblẽ ate ŋu aɖe kpe na mí. Mawu megadaa dɔ le nukumɔ nu fifia o, gake eɖoa gbe siwo míedona ɖa biaa nunya kple ŋusẽ si hiã be míatsɔ akpɔ dɔléle aɖe gbɔe la ŋu na mí. (Psalmo 41:2-4) Míekpea fu hã le dzɔdzɔenyenye ta esi míenye Yehowa ƒe Ðasefo siwo yome wotina ta. (Timoteo II, 3:12; Petro I, 3:14) Ne míete ŋu do dzi le tetekpɔ siawo me la, eɖea míaƒe xɔse ƒe nɔnɔme fiana, wòva zua ‘esi wodo kpɔ.’ Eye ne míaƒe xɔse ɖu dzi la, ena ‘míete ŋu doa dzi.’ Xɔse si to tetekpɔwo me gasẽ ɖe edzi akpe ɖe mía ŋu míado dzi le dodokpɔ siwo agava emegbe la me.

 6. Aleke ‘dzidodo kpɔa eƒe dɔwɔwɔ bliboe,’ eye afɔɖeɖe nyui kawoe míate ŋu awɔ ne míeɖo tetekpɔ me?

⁶ Yakobo gblɔ be: “Ke dzidodo la nakpɔ eƒe dɔwɔwɔ blibo.” Ne míeɖe mɔ tetekpɔ aɖe yi edzi eye míete kpɔ be míawɔ nusi mesɔ ɖe Ŋɔŋlɔawo nu atsɔ atsi enu kpata o la, dzidodo awɔ ‘dɔ’ ahawɔ mí Kristotɔ blibo siwo si xɔse le. Le nyateƒe me la, ne tetekpɔ aɖe ɖe míaƒe gbɔdzɔgbɔdzɔ aɖe fia la, ele be míadi Yehowa ƒe kpekpeɖeŋu be míatsɔ aɖu edzii. Ke ne mía nu beble be míanɔ gbɔdɔdɔ ƒe agbe gbegblẽ ye tetekpɔa nye ya ɖe? Mina míado gbe ɖa le kuxi ma ŋu eye míawɔ nu wòasɔ kple míaƒe gbedodoɖawo. Ðewohĩ ahiã be míadi dɔ awɔ le teƒe bubu alo míaɖe afɔ bubuwo atsɔ alé nuteƒewɔwɔ na Mawu me ɖe asi.—Mose I, 39:7-9; Korintotɔwo I, 10:13.

Nunya Didi

 7. Aleke woate ŋu akpe ɖe mía ŋu be míato tetekpɔwo me?

⁷ Yakobo fia nusi míawɔ ne míenya alesi míanɔ te ɖe tetekpɔ aɖe nu o la mí. (Yakobo 1:5-8) Yehowa mado vlo mí le esi nunya mele mía si o eye míedo gbe ɖa biae le xɔse me ta o. Akpe ɖe mía ŋu míatsɔ susu nyui akpɔ tetekpɔa ahado dzi le eme. Ate ŋu ato haxɔsetɔwo dzi alo míaƒe Biblia sɔsrɔ̃ me ahe míaƒe susu ayi mawunyakpukpuiwo dzii. Nusiwo adzɔ le Mawu ƒe mɔfiafia te ate ŋu ana míakpɔ nusi wòle be míawɔ. Mawu ƒe gbɔgbɔ ate ŋu afia mɔ mí. (Luka 11:13) Be nusiawo nate ŋu aɖe vi na mí la, godoo ele be míaku ɖe Mawu kple eƒe amewo ŋu kplikplikpli.—Lododowo 18:1.

 8. Nukata dzimevesusula makpɔ naneke tso Yehowa gbɔ o?

⁸ Yehowa naa nunya mí be míakpe akɔ kple tetekpɔwo ne ‘míeyi edzi ɖe kuku le xɔse me, eye míeke ɖi aɖeke o.’ Amesi le ɖi kem la “[ɖi] ƒutsotsoe, si ya ƒona yina gbɔna” faa. Ne míenye kemalilawo le gbɔgbɔ me alea la, ‘mele be míabui be míakpɔ nane tso Yehowa gbɔ o.’ Migana míanye ‘dzimevesusulawo’ kple amesiwo ‘melina sesĩe’ le gbedodoɖa me alo mɔ bubuwo nu o. Mina míaxɔ Yehowa, nunya Dzɔtsoƒe la, dzi ase boŋ.—Lododowo 3:5, 6.

Dzi Ate Ŋu Adzɔ Kesinɔtɔ Kple Ame Dahe Siaa

 9. Nukata mí Yehowa subɔlawo míatɔ dzɔ be dzi nadzɔ mí?

⁹ Ne míaƒe tetekpɔwo ƒe ɖee ahedada nye hã, mina wòanɔ susu me na mí be Kristotɔ kesinɔtɔwo kple ame dahewo siaa ate ŋu akpɔ dzidzɔ. (Yakobo 1:9-11) Hafi amesiaminawo ƒe akpa gãtɔ nava zu Yesu yomedzelawo la, ŋutilãmenu boo aɖeke menɔ wo si o eye xexeame mebua wo ɖe naneke me o. (Korintotɔwo I, 1:26) Gake woate ŋu akpɔ dzidzɔ ɖe woƒe “kɔkɔɖedzi” be wova zu Fiaɖuƒedomenyilawo la ta. (Romatɔwo 8:16, 17) Gake ‘wobɔbɔ’ kesinɔtɔ siwo ŋu wode bubui tsã la ‘ɖe anyi’ le esi wozu Kristo yomedzelawo ta elabena xexeame va nɔ vlo dom wo. (Yohanes 7:47-52; 12:42, 43) Gake mí Yehowa subɔlawo katã míate ŋu akpɔ dzidzɔ elabena xexeme kesinɔnuwo kple ɖoƒe kɔkɔ nɔnɔ meɖi naneke o ne míetsɔ wo sɔ kple gbɔgbɔmekesinɔnu siwo le mía si. Eye aleke gbegbe míedaa akpee nye si be mele mía dome be ame nada eɖokui le hadomeɖoƒe aɖe nɔnɔ ta o!—Lododowo 10:22; Dɔwɔwɔwo 10:34, 35.

10. Aleke wòle be Kristotɔ nabu ŋutilãmekesinɔnuwoe?

¹⁰ Yakobo kpe ɖe mía ŋu míekpɔe be menye kesinɔnuwo kple dzidzedzekpɔkpɔ le xexeame dzie míaƒe agbe nɔ te ɖo o. Abe alesi seƒoƒo ƒe anidzedze mewɔnɛ be wògbea yɔyrɔ le ɣe ƒe “ŋdɔbibi” nu o ene la, nenema ke kesinɔtɔ ƒe kesinɔnuwo mate ŋu adidi eƒe agbenɔƒewo ɖe edzi o. (Psalmo 49:7-10; Mateo 6:27) Ate ŋu aku esime wòle eƒe ‘agbemedɔwo’ minyãm, ɖewohĩ le eƒe gadɔwo me. Eyata nu vevitɔe nye be míanye ‘kesinɔtɔwo le Mawu gbɔ’ eye míawɔ nusianu si míate ŋui atsɔ ado Fiaɖuƒedɔwo ɖe ŋgɔe.—Luka 12:13-21; Mateo 6:33; Timoteo I, 6:17-19.

Amesiwo Doa Dzi le Tetekpɔ me Nye Dzidzɔtɔwo

11. Mɔkpɔkpɔ kawoe le amesiwo léa woƒe xɔse me ɖe asi le tetekpɔwo me si?

¹¹ Míeɖanye kesinɔtɔwo loo alo ame dahewo o, ne míedo dzi le tetekpɔwo me ko hafi míate ŋu akpɔ dzidzɔ. (Yakobo 1:12-15) Ne míeto tetekpɔwo me eye míaƒe xɔse gakpɔtɔ le sesĩe la, woate ŋu agblɔ be míenye dzidzɔtɔwo, elabena nusi nyo le Mawu ŋkume wɔwɔ na wokpɔa dzidzɔ. Ne Kristotɔ amesiaminawo lé woƒe xɔse me ɖe asi vaseɖe ku me la, wokpɔa “agbefiakuku,” si nye makumakunyenye le dziƒo. (Nyaɖeɖefia 2:10; Korintotɔwo I, 15:50) Ne anyigbadzinɔnɔ ƒe mɔkpɔkpɔe le mía si eye míeyi edzi xɔ Mawu dzi se la, míate ŋu akpɔ mɔ be míanɔ agbe mavɔ le paradisonyigba dzi. (Luka 23:43; Romatɔwo 6:23) Aleke gbegbee Yehowa nyoa dɔme na amesiwo katã xɔa edzi sena enye si!

12. Ne míele fu kpem la, nukata mele be míagblɔ be: ‘Mawue le nye tem kpɔ o’?

¹² Ðe wòate ŋu anye be Yehowa ŋutɔe tsɔa fukpekpe tea mí kpɔna? Ao, mele be míagblɔ be: ‘Mawue le nye tem kpɔ o.’ Yehowa medzea agbagba be yeana míawɔ nuvɔ̃ o ke boŋ akpɔ egbɔ be yekpe ɖe mía ŋu ahado ŋusẽ si hiã la mí be míado dzi le tetekpɔwo me ne míenɔ te sesĩe le xɔse me. (Filipitɔwo 4:13) Mawu le kɔkɔe, eyata mekplɔa mí yia nɔnɔme siwo agbɔdzɔ míaƒe tenɔnɔ ɖe nuvɔ̃wɔwɔ ŋu me o. Ne míege ɖe nɔnɔme siwo mesɔ o me eye míewɔ nuvɔ̃ aɖe la, mele be míada vodadaa ɖe eyama dzi o, “elabena womate ŋu ate Mawu akpɔ kple nuvɔ̃ o, ke eya ŋutɔ la metea ame aɖeke kpɔna o.” Togbɔ be Yehowa ate ŋu aɖe mɔ tetekpɔ aɖe nava mía dzi be wòatsɔ ana amehehe si aɖe vi na mí hã la, menye susu vɔ̃ wòtsɔ doa mí kpɔnae o. (Hebritɔwo 12:7-11) Ðewohĩ Satana ate mí kpɔ be míawɔ nuvɔ̃, gake Mawu ate ŋu aɖe mí tso vɔ̃ɖitɔ ma si me.—Mateo 6:13.

13. Nukae ate ŋu adzɔ ne míetsri dzodzro vɔ̃ o?

¹³ Ele be míanɔ gbedodoɖa dzi elabena nɔnɔme aɖe ate ŋu akplɔ mí de dzodzro vɔ̃ si ana míawɔ nuvɔ̃ me. Yakobo gblɔ be: “Wotea amesiame kpɔna, ne eya ŋutɔ ƒe nudzodzro henɛ, eye wòblenɛ.” Ne míetsɔ míaƒe dzi ɖo dzodzro vɔ̃wo ŋu va wɔ nuvɔ̃ la, míate ŋu abu fɔ Mawu o. Ne míeɖe dzodzro vɔ̃wo le susu me o la, ‘axɔ aƒe ɖe mía me,’ atsi ɖe edzi le dzia me, eye ‘wòadzi nuvɔ̃.’ Ne míeva wɔ nuvɔ̃ la, “edzia ku.” Edze ƒã be ele be míadzɔ míaƒe dzi ŋu eye míatsri dzodzro vɔ̃wo. (Lododowo 4:23) Woxlɔ̃ nu Kain be nuvɔ̃ de xa ɖe eŋu, gake mexe mɔ ɖe enu o. (Mose I, 4:4-8) Eyata nukae wòle be míawɔ ne míeva le afɔ aɖe si mesɔ ɖe Ŋɔŋlɔawo nu o ɖem? Ele be míada akpe godoo ne Kristotɔ hamemegãwo dze agbagba be yewoaɖɔ mí ɖo be míagawɔ nuvɔ̃ ɖe Mawu ŋu o.—Galatiatɔwo 6:1.

Mawu—Nu Nyuiwo Dzɔtsoƒee Wònye

14. Gɔmesese ka nue míate ŋu agblɔ le be Mawu ƒe nunanawo ‘de blibo’?

¹⁴ Ele be míaɖo ŋku edzi be nu nyuiwo Dzɔtsoƒee Yehowa nye, ke menye tetekpɔwo tsoƒe o. (Yakobo 1:16-18) Yakobo yɔ haxɔsetɔwo be “nɔvinye lɔlɔ̃tɔwo” eye eɖee fia be Mawue nye ‘nunana nyuiwo kple esiwo de blibo katã’ Nala. Nusiwo Yehowa naa mí le gbɔgbɔ me kple le ŋutilã me la ‘de blibo,’ alo wonyo, eye wode le go sia go me. Wotso “dziƒo,” Mawu ƒe nɔƒee wotso. (Fiawo I, 8:39) Yehowae nye “kekeliwo ƒe Fofo”—ɣe, ɣleti, kple ɣletiviwo. Enaa gbɔgbɔmekekeli kple nyateƒe hã mí. (Psalmo 43:3; Yeremya 31:35; Korintotɔwo II, 4:6) Mawu wɔa nusi nye nyuitɔ kekeake ɣesiaɣi le nu nyuiwo nana me wòto vovo na ɣe si ƒe zɔzɔ naa vɔvɔliwo trɔna eye ŋdɔ me koe wòklẽna sesĩe wu la. Adzra mí ɖo godoo be míakpe akɔ kple tetekpɔwo ne míewɔ gbɔgbɔmemɔnuɖoɖo siwo wòna to eƒe Nya kple “dɔla nuteƒewɔla kple aɖaŋudzela” la dzi ŋudɔ bliboe.—Mateo 24:45.

15. Nukae nye Yehowa ƒe nunana nyuitɔwo dometɔ ɖeka?

¹⁵ Nukae nye Mawu ƒe nunana nyuiawo dometɔ ɖeka? Eyae nye gbɔgbɔmevi siwo wòdzi to gbɔgbɔ kɔkɔe dzi, amesiwo le dɔ wɔm le nyanyuia, alo “nyateƒenya” la ŋu. Amesiwo wodzi le gbɔgbɔ me nye ‘ŋgɔgbevi aɖewo,’ siwo wotia tso ameƒomea me be woanye “fiawo kple nunɔlawo” le dziƒo. (Nyaɖeɖefia 5:10; Efesotɔwo 1:13, 14) Ðewohĩ nusi nɔ susu me na Yakobo enye lu babla gbãtɔ si wona le Nisan 16 dzi, si nye ŋkeke si dzi wofɔ Yesu ɖe tsitre, kple lu ƒe abolo eve si wona le Pentekoste-ŋkekea dzi esime wokɔ gbɔgbɔ kɔkɔe ɖe amewo dzi. (Mose III, 23:4-11, 15-17) Le go ma me la, Yesue anye ŋgɔgbevi la eye eƒe hadomenyilawo anye ‘ŋgɔgbevi aɖewo.’ Ke ne anyigbadzinɔnɔ ƒe mɔkpɔkpɔe le mía si ya ɖe? Eléle ɖe susu me akpe ɖe mía ŋu míalé míaƒe xɔse me ɖe asi na “nunana nyuiwo katã” Nala si wɔ ɖoɖo ɖe agbe mavɔ nɔnɔ le eƒe Fiaɖuƒedziɖuɖu me ŋu.

Mizu “Nyadziwɔlawo”

16. Nukata wòle be ‘míaɖe abla le nusese me gake anɔ blewu le nuƒoƒo kple dziku me’?

¹⁶ Míeɖale xɔse ƒe dodokpɔwo me tom fifi laa alo míele ɖeke me tom o, ele be míanye “nyadziwɔlawo.” (Yakobo 1:19-25) Ele be ‘míaɖe abla le’ Mawu ƒe nya sese me, eye míanye edziwɔla siwo ɖoa to. (Yohanes 8:47) Gake mina ‘míanɔ blewu le nuƒoƒo me,’ ahada nya si míegblɔna kpɔ nyuie. (Lododowo 15:28; 16:23) Ðewohĩ Yakobo le nu xlɔ̃m mí be míagatsi klokloklo agblɔ be Mawu gbɔe míaƒe tetekpɔwo tso o. Egaɖo aɖaŋu na mí be “[míanɔ] blewu hã le dziku me; elabena ame ƒe dziku mewɔa Mawu ƒe nu dzɔdzɔe o.” Ne ame aɖe ƒe nyagbɔgblɔ ku dzi na mí la, mina ‘míagbɔ dzi ɖi’ ale be míagatsɔ nya tɔame aɖo eŋu o. (Efesotɔwo 4:26, 27) Dziku ƒe nɔnɔme si ate ŋu ahe kuxiwo vɛ na mí eye wòazu tetekpɔ na ame bubuwo la mana míawɔ nusi míaƒe Mawu dzɔdzɔea dzixɔxɔse bia tso mía si o. Tsɔ kpe ɖe eŋu la, ne míenye ‘nugɔmeselawo’ la, míanye ‘dzigbɔɖitɔwo,’ eye ana mía nɔviŋutsuwo kple nɔvinyɔnuwo nate ɖe mía ŋu.—Lododowo 14:29.

17. Nukae adzɔ ne míeɖe vɔ̃ɖinyenye ɖa tso dzi kple susu me?

¹⁷ Ehiã godoo be míaɖe “ɖiƒoƒo katã”—nusianu si nyɔa ŋu na Mawu hedoa dziku na ame ɖa. Tsɔ kpe ɖe eŋu la, ele be “[míaɖe] vɔ̃ɖinyenye geɖe fũ la ɖi.” Ele be mí katã míaɖe ŋutilã kple gbɔgbɔ me makɔmakɔnyenye ɖesiaɖe ɖa le míaƒe agbe me. (Korintotɔwo II, 7:1; Petro I, 1:14-16; Yohanes I, 1:9) Vɔ̃ɖinyenye ɖeɖeɖa le dzi kple susu me kpe ɖe mía ŋu ‘míetsɔ dɔmefafa xɔ nyateƒenya si wodo ɖe mía me.’ (Dɔwɔwɔwo 17:11, 12) Eɖanye ɣeyiɣi didi kae míenye Kristotɔwo o, ele be míayi edzi ana woado Ŋɔŋlɔawo me nyateƒe geɖe ɖe mía me. Nukatae? Elabena Mawu ƒe gbɔgbɔa naa nya si wodo la dea ‘amenyenye yeye’ si ana míakpɔ xɔxɔ la mía me.—Efesotɔwo 4:20-24.

18. Aleke amesi nye nyasela ɖeɖeko to vovo na amesi ganye edziwɔla hãe?

¹⁸ Aleke míeɖenɛ fiana be nya la fiaa mɔ mí? To alesi míanye ‘nyadziwɔla toɖolawo, eye menye nyaselawo ɖeɖeko o’ me. (Luka 11:28) Xɔse si na wowɔa dɔwo abe veviedodo le Kristotɔwo ƒe subɔsubɔdɔa me kple gomekpɔkpɔ le Mawu ƒe amewo ƒe kpekpewo me edziedzi ene la le “nyadziwɔlawo” si. (Romatɔwo 10:14, 15; Hebritɔwo 10:24, 25) Amesi nye nyasela dzro ko la “ɖi ŋutsu aɖe, si kpɔ eƒe dzɔdzɔmemo le ahũhɔ̃e me.” Ekpɔ eɖokui, eye wòdzo heŋlɔ nusi ahiã be wòawɔ atsɔ aɖɔ eƒe dzedzeme ɖo la be. Esi míenye “nyadziwɔlawo” ta la, míesrɔ̃a Mawu ƒe ‘se debliboa’ si ku ɖe nusianu si wòdi tso mía si ŋu la nyuie hewɔna ɖe edzi. Ablɔɖe si míekpɔna to esia wɔwɔ me la to vovo na kluvinyenye na nuvɔ̃ kple ku sã, elabena ekplɔa ame yia agbe mee. Eyata mina ‘míanɔ se debliboa me,’ eye míadzro eme ahawɔ ɖe edzi. Eye bu eŋu kpɔ ko! Esi míenye ‘dɔa wɔlawo, ke menye nyasela siwo ŋlɔa nu be o’ ta la, míekpɔa dzidzɔ si tsoa Mawu ƒe ŋudzedzekpɔɖeameŋu me.—Psalmo 19:8-12.

Menye Tadeagulawo Nyenye Dzro Koe O

19, 20. (a) Le Yakobo 1:26, 27 ƒe nya nu la, nukae subɔsubɔ dzadzɛ bia tso mía si? (b) Subɔsubɔ si ŋu ɖiƒoƒo mele o ƒe kpɔɖeŋu aɖewo ɖe?

¹⁹ Ne Mawu akpɔ ŋudzedze ɖe mía ŋu la, ke ehiã be míaɖo ŋku edzi be menye nane si wowɔna ɖaa dzro koe tadedeagu vavãtɔ nye o. (Yakobo 1:26, 27) Ðewohĩ míabu be míenye Yehowa ‘subɔla ɖoɖodziwɔla’ siwo ƒe nu dze eŋu, gake alesi eya bua mía dometɔ ɖesiaɖee nye nu vevitɔ. (Korintotɔwo I, 4:4) ‘Gamademade aɖe la’ ate ŋu anye gbɔdzɔgbɔdzɔ gã le mía ŋu. Míanɔ mía ɖokui blem ne míebu be Mawu kpɔa ŋudzedze ɖe míaƒe subɔsubɔ ŋu esi míezɔa ame bubuwo gɔme, míedaa alakpa, alo zãa aɖe la le mɔ gbegblẽ bubuwo nu. (Mose III, 19:16; Efesotɔwo 4:25) Míadi godoo be naneke mawɔe be míaƒe “subɔsubɔ” nanye “dzodzro” kple esi medze Mawu ŋu o.

²⁰ Togbɔ be Yakobo meyɔ subɔsubɔ si ŋuti kɔ ƒe akpa ɖesiaɖe o hã la, egblɔ be eƒe akpa aɖee nye ‘tsyɔ̃eviwo kple ahosiwo dzi kpɔkpɔ le woƒe xaxa me.’ (Galatiatɔwo 2:10; 6:10; Yohanes I, 3:18) Kristo-hamea tsɔa ɖe le ahosiwo ƒe nuhiahiãwo gbɔ kpɔkpɔ me etɔxɛe. (Dɔwɔwɔwo 6:1-6; Timoteo I, 5:8-10) Esi Mawue nye ahosiwo kple tsyɔ̃eviwo Takpɔla ta la, mina míawɔ nu aduadu kple Eyama awɔ nusi míate ŋui atsɔ akpe ɖe wo ŋu le gbɔgbɔ me kple le ŋutilã me. (Mose V, 10:17, 18) Subɔsubɔ dzadzɛ fia hã be “woadzra ame ɖokui ɖo ɖi maƒomaƒoe tso xexeame,” si nye amegbetɔ numadzɔmadzɔwɔlawo ƒe ƒuƒoƒo si le Satana ƒe ŋusẽ te. (Yohanes 17:16; Yohanes I, 5:19) Eyata migana xexeame ƒe mawumavɔ̃mavɔ̃nuwɔna naƒo ɖi mí o ale be míate ŋu akafu Yehowa eye míanye dɔwɔnuwo le eƒe subɔsubɔ me.—Timoteo II, 2:20-22.

21. Biabia bubu kawo mee wòle be míadzro ku ɖe Yakobo ƒe lɛtaa ŋu?

²¹ Ele be afisi míedzro Yakobo ƒe nuxlɔ̃amea me va ɖo la nakpe ɖe mía ŋu míado dzi le tetekpɔwo me eye míalé míaƒe xɔse me ɖe asi sesĩe. Ele be wòana míagakpɔ ŋudzedze ɖe nunana nyuiwo Nala lɔ̃amea ŋu geɖe wu. Eye Yakobo ƒe nyawo kpena ɖe mía ŋu be míasubɔ le dzadzɛnyenye me. Nya bubu kawo dzie wògahe míaƒe susu yii? Afɔɖeɖe bubu kawoe míate ŋu awɔ atsɔ aɖee afia be míexɔ Yehowa dzi se vavã?

[Etenuŋɔŋlɔ]

Aleke Nàɖo Wo Ŋui?

◻ Nukae akpe ɖe mía ŋu be míado dzi le tetekpɔwo me?

◻ Togbɔ be tetekpɔ li hã, nukata Kristotɔwo ate ŋu akpɔ dzidzɔ?

◻ Aleke míawɔ anye nyadziwɔlawo?

◻ Nukae subɔsubɔ dzadzɛ bia?

[Nɔnɔmetata si le axa 9]

Ne èɖo tetekpɔ me la, xɔ ŋusẽ si le Yehowa si wòtsɔ ɖoa gbedodoɖawo ŋui la dzi se

[Nɔnɔmetata siwo le axa 10]

“Nyadziwɔlawo” le gbeƒã ɖem Mawu ƒe Fiaɖuƒea le xexeame katã