Lala Dzigbɔɖitɔe

LÃKPLƆVI si lɔ̃a aƒadodo be “Amegãxi loo!” evɔ amegãxi aɖeke meva hafi o kpɔnɛ be womeganyaa aƒa na ye ne yegado ɣli emegbe o. Nenema ke ame geɖe mebua Yehowa ƒe ŋkekea ƒe aƒetutu ŋu egbea o le nyanyananya gbogbo siwo wose gake womeva eme o ta. Esi ame geɖe mete ŋu kpɔa nuxlɔ̃amenya si nye akuakua ne woawɔ ɖe edzi o ta la, wogena ɖe Mawu ƒe futɔ gãtɔ Satana, alakpa “kekeli ƒe dɔla” ma si me.—Korintotɔwo II, 11:14.

Afɔku anɔ ɖekematsɔleme ƒe gbɔgbɔ si anɔ ame me le amesiwo subɔ Yehowa ɣeyiɣi aɖewoe nye sia kura gɔ̃ hã gome. Nukatae? De ŋugble le nuxlɔ̃amenya si apostolo Petro gblɔ le ƒe alafa gbãtɔa me la ŋu kpɔ.

Bu Tame Nyuie

Petro ƒe lɛta evelia si tso gbɔgbɔ me la nye ŋkuɖodzinya na Kristotɔ gbãtɔwo, eye enyee na míawo hã nenema ke. Eŋlɔ bena: “Lɔlɔ̃tɔwo, esia nye agbalẽ evelia xoxo, si meŋlɔ ɖo ɖe mi, eye metsɔ ŋkuɖoɖonudzi nyɔ miaƒe tamesusu, si me kɔ la le wo me.” (Petro II, 3:1) Nukae na Petro tsi dzi alea ɖo? Petro ƒo nu tso fewuɖulawo, amesiwo ƒe fewuɖuɖu gblẽa nu le alesi wòhiãe be Mawu subɔlawo nawɔ nu kpatae le ɣeyiɣi si me wole la ƒe vava ŋu. Fifiae nye ɣeyiɣi si me wòle be míakpɔ nyuie be fewuɖulawo nagaflu mí o. Eyata Petro xlɔ̃ nu eƒe nuxlẽlawo be ‘woaɖo ŋku nya, siwo nyagblɔɖila kɔkɔeawo gblɔ ɖi tsã la dzi.’ (Petro II, 3:2; Dɔwɔwɔwo 3:22, 23) Nya kawoe nyagblɔɖilawo gblɔ?

Mawu subɔla nuteƒewɔlawo he amewo ƒe susu yi alesi Mawu ƒe ʋɔnudɔdrɔ̃ he vɔ̃ɖinyenye va nuwuwue dzi zi geɖe. Petro ɖo ŋku Noa ƒe ŋkekea me Tsiɖɔɖɔ si dzi Mawu to de nu nyawo me esi anyigbaa yɔ fũ kple nuvɔ̃ɖiwɔwɔ dzi na eƒe nuxlẽlawo. Tsiɖɔɖɔ gã ma he xexeme si nɔ anyi ɣemaɣi va nuwuwui ɖikaa. Gake Mawu kpɔ Noa, eƒe ƒomea, kple “nugbagbewo katã kple ŋutilãwo katã” ƒomevi ta le aɖakaʋua me. Eŋuti xo siwo wotuna le xexeame katã ɖo kpe Biblia me nuŋlɔɖia ƒe nyateƒenyenye dzi.a—Mose I, 6:19; Petro II, 3:5, 6.

Petro gblɔ le Mawu ƒe nudede nyawo me ma ŋu be enye ‘nusi bu ɖe’ ame aɖewo. Emegbe fewuɖula siwo nɔ anyi ɣemaɣi ble ame bubuwo wozu ɖekematsɔlemetɔwo. Gake mele be míawo ya míaŋlɔ nusiwo Yehowa wɔ va yi xoxo la be gbeɖe o. Petro gblɔ na mí be: “Wotsɔ nya ma ke dzra fifi dziƒo kple anyigba la ɖo, eye woda wo ɖi na dzo, vaseɖe ame mavɔ̃mawuwo ƒe ʋɔnudɔdrɔ̃ kple gbegblẽ ƒe ŋkeke la dzi.” (Petro II, 3:7) Ẽ, Mawu gale nu de ge nyawo me ake.

Mawu Mele Wɔwɔm Blewu O

Ƒe akpe geɖewo va yi xoxo. Nukatae Mawu lala ɣeyiɣi didi sia gbegbe le ameƒomea ƒe kuxiwo gbɔ kpɔkpɔ ŋu? Petro gahe susu yi nya bubu dzi. Egblɔ be: “Lɔlɔ̃tɔwo, nu ɖeka sia naganɔ ɣaɣla ɖe mi o bena, le Mawu gbɔ la ŋkeke ɖeka le abe ƒe akpe ɖeka ene, eye ƒe akpe ɖeka hã abe ŋkeke ɖeka ene.” (Petro II, 3:8) Alesi Yehowa bua ɣeyiɣie to vovo na mía tɔ. Le Mawu mavɔtɔ la gome la, tso Adam wɔɣi vaseɖe fifia mede kwasiɖa ɖeka teti gɔ̃ hã o. Gake aleke ke míebua ɣeyiɣii o, ƒe akpe ɖeka ɖesiaɖe kple ŋkeke ɖeka ɖesiaɖe si ava yi la tea mí ɖe Yehowa ƒe tameɖoɖowo me vava ŋu wu.

“Netsɔ netsɔ metsɔna o” nye nyagbɔgblɔ si fia be ne ède asi asitɛ me hele nane lalam la, ewɔnɛ be nua ƒe dzɔdzɔ metsɔna le ame ŋkume o. Gake Petro kafui na mí be ‘míalala, eye míadi Mawu ƒe ŋkeke la ƒe vava vevie.’ (Petro II, 3:12) Aleke míate ŋu atu susu me ƒe nɔnɔme si ana míanɔ ŋudzɔ na Mawu ƒe nudede nyawo me ƒe aƒetutu ɖoe?

Nuwɔna Ðina Hoo Wu Nyagbɔgblɔ

Petro he susu yi nuwɔna kple nuwɔwɔ dzi. Eƒo nu tso “anyinɔnɔ kɔkɔe kple mawusosroɖa” ŋu. (Petro II, 3:11) Nukae nusiawo fia?

Mawu subɔla adodoea wɔa nu le mɔ si adze Eŋu nu. Subɔla vavã ma ƒe xɔse dzena le eƒe agbenɔnɔ me. Esia naa wòtoa vovo le amesiwo gblɔna ko be yewoxɔ Mawu kple eƒe ŋugbedodowo dzi se la gbɔ. Ðewohĩ ède dzesii be hahoo ɖaseɖiɖidɔ si Yehowa Ðasefowo wɔna la na be woto vovo. Wovaa wò aƒeme be woahe wò susu ayi Mawu ƒe ŋugbedodo siwo le Biblia me dzi. Gake woɖia ɖase le woƒe mɔkpɔkpɔ kple dzixɔsewo ŋu le afisiafi si wodo go amewo le hã.

Ðasefo si medzudzɔa gbeƒãɖeɖe le eƒe xɔse ŋu na ame bubuwo o la dzia eƒe xɔse ɖe dzi hedoa ŋusẽe. Nuƒoƒo tso nane ŋu dzia ame ƒe ŋudzedzekpɔkpɔ ɖe eŋu ɖe edzi eye wòganaa dzi dzɔnɛ eye eƒe dzi dzea eme. Ne míeɖe gbeƒã Mawu Fiaɖuƒe ŋuti nyanyuia la, míele nusi dze Yehowa ŋu hã wɔm. Abe alesi Petro hati apostolo Paulo gblɔe ene la, míenya be menye ‘madzɔmadzɔtɔe wònye be wòaŋlɔ míaƒe dɔwɔwɔ kple lɔlɔ̃, si míeɖe fia le eƒe ŋkɔ ta be o.’—Hebritɔwo 6:10; Romatɔwo 10:9, 10.

Nukae do tso Fiaɖuƒe ŋuti nyanyui si kakam míele veviedodotɔe le fifi nuɖoanyi sia ƒe ŋkeke mamlɛawo me la me? Dzi anukwaretɔ akpe alafa nanewo le alesi woawɔ ƒomedodo kplikplikpli naɖo wo kple Yehowa dome, be wòave wo nu la srɔ̃m, eye agbe mavɔ nɔnɔ le paradisonyigba dzi ƒe mɔkpɔkpɔ la na wokpɔa dzidzɔ vavãtɔ.

Enyanya Do Ŋgɔ

Togbɔ be Biblia na míenya be Yehowa Mawu ade nu nyawo me le eƒe ŋkeke ɖoɖi si tu aƒe dzi hã la, ehiã be míawɔ ɖe Petro ƒe nuxlɔ̃amenya bubu si wògagblɔ la dzi. “Esi mienya nusiawo ɖi ŋuti la, mikpɔ mia ɖokui dzi nyuie, bene ame gblẽkuwo ƒe beble nagahe mi ayii o, eye miagadze anyi atso mia ŋutɔwo miaƒe kelili la me o.”—Petro II, 3:17.

Yehowa nya kɔtee do ŋgɔ be dzi ate ŋu aɖe le ame aɖewo siwo si xɔse sẽŋu mele o ƒo le alesi wòawɔ abe ɖe Mawu ƒe nudede nyawo me tsi megbe ene la ta. Enyae hã be ame mavɔ̃mawuwo ƒe ŋusẽkpɔɖeamedzi ate ŋu agblẽ nu le ye subɔla anukwaretɔwo ŋu, alo agblẽ nu le woƒe dzixɔse be Mawu ƒe ŋkɔ ŋutikɔɣi ɖo vɔ la ya teti ŋu. Aleke gbegbee wòanye afɔkui enye si be woaɖe asi le ame ƒe nuteƒewɔwɔ ŋu le ŋkeke mamlɛ siawo me!

Menye fifiae nye ɣeyiɣi si me ɖikeke alo kakaɖedzimanɔamesi nanɔ mía me le nusi Yehowa awɔ la ŋu o. (Hebritɔwo 12:1) Ke boŋ fifiae nye ɣeyiɣi si me wòle be míaƒe ŋudzedzekpɔkpɔ ɖe nusi Yehowa ƒe dzigbɔgbɔɖi he vɛ ŋu nadzi ɖe dzi—xɔxɔ ƒe mɔnukpɔkpɔ si su ame miliɔn geɖe siwo va zu ameha gã siwo tso dukɔwo katã me la me tɔwo, amesiwo le mɔ kpɔm na agbetsitsi le xaxa gã la me. (Nyaɖeɖefia 7:9, 14) Petro xlɔ̃ nu be: “Mitsi le mía Aƒetɔ kple xɔla Yesu Kristo ƒe amenuveve kple sidzedze la me. Eya tɔ lanye ŋutikɔkɔe la tso azɔ yiɖase mavɔmavɔ ƒe ŋkeke la dzi.”—Petro II, 3:18.

“Midzra Mia Ðokui Ðo le Mawu ƒe Lɔlɔ̃ la Me”

Ametakpɔnue wònye na mí ne míedoa vevie Fiaɖuƒe gbeƒãɖeɖedɔa, eye míedea Kristotɔwo ƒe kpekpewo edziedzi hena subɔsubɔ kple Mawu ƒe Nya sɔsrɔ̃. Awɔe be ɣeyiɣi manɔ mía ŋu míatsi dzi akpa ɖe egbe nuɖoanyi vɔ̃ɖia ƒe nɔnɔme siwo le gbegblẽm ɖe edzi la ŋu o. Mele be vɔvɔ̃ kple dzimaɖitsitsi naɖu Kristotɔ vavãtɔwo ƒe agbe dzi o. (Korintotɔwo I, 15:58) Alesi míedoa vevie nui le Yehowa subɔsubɔ me la, nenemae wòadze na míi be ɣeyiɣia le yiyim kabakabae.

Yuda si nɔ anyi le Petro ŋɔli, si nye Yesu dadavi la xlɔ̃ nu mí be: “Mi lɔlɔ̃tɔwo la, mitu mia ɖokui ɖe miaƒe xɔse kɔkɔe, si ƒo wo katã ta la dzi, eye mido gbe ɖa le Gbɔgbɔ kɔkɔe la me, eye midzra mia ɖokui ɖo le Mawu ƒe lɔlɔ̃ la me, anɔ lalam na mía Aƒetɔ Yesu Kristo ƒe nublanuikpɔkpɔ la hena agbe mavɔ.” (Yuda 20, 21) Kpɔ alesi nɔnɔme nyui si gbedodoɖa madzudzɔmadzudzɔe na wòsua ame si le vevie ɖa. (Tesalonikatɔwo I, 5:17) Yuda gayi edzi be: “Mikpɔ nublanui na ame aɖewo, amesiwo le ɖi kem, miɖe ame bubu aɖewo, eye mihe wo do go tso dzo la me, mitsɔ vɔvɔ̃ kpɔ nublanui na ame aɖewo, eye milé fu awu, si ŋutilã ƒo ɖi la gɔ̃ hã.” (Yuda 22, 23) Aleke wòhiãe be míado ŋusẽ mía nɔewo le ɣeyiɣi sesẽ siawo mee nye si! Eye aleke wòle vevie nye si be míagadze nuvɔ̃ me o, be míagazã “amenuveɣi” sia si wona mí la awɔ taflatsedonui na “agbe baɖa nɔnɔ” si bɔ fifia ale gbegbe ɖe egbe xexe gblẽku sia me o.—Yuda 4; Korintotɔwo II, 6:1, 2.

Ne èxɔ Petro, Paulo, kple Yuda ƒe nuxlɔ̃ame si me lɔlɔ̃ le, eye ne èdoa vevie nu ɖeɖi metea ŋuwò le Mawu ƒe subɔsubɔdɔa me o la, àte ŋu akpɔ Yehowa sinu dzigbɔɖitɔe be wòade nu nyawo me. Gake àlalaa?

Mègahe ɖe megbe o be nàdi Ðasefo siwo le mia gbɔ be woakpe ɖe ŋuwò nàdo ŋusẽ wò Wɔla la ƒe agbe mavɔ ƒe ŋugbedodowo dzixɔxɔse. Srɔ̃ nudidi siwo ana nàdze be nàkpɔ gome le xexeame katã ƒe ɖaseɖiɖidɔ si womagawɔ akpɔ o si awu enu le xaxa gã si le aƒe tum la me. (Marko 13:10) Ekema mɔnukpɔkpɔ asu asiwò be nànɔ xexe yeye si me dzɔdzɔenyenye anɔ si ŋugbe Petro do la me. (Petro II, 3:13) Wɔ ɖe eƒe ŋkuɖodzinyawo dzi! Lala dzigbɔɖitɔe! Do vevie nu!

[Etenuŋɔŋlɔ]

[Nɔnɔmetata si le axa 7]

Srɔ̃ nu fifia tso Paradiso si ƒe ŋugbe Mawu do la ŋu

[Nɔnɔmetata Tsoƒe si le axa 5]

Sisiblisi: Animals/Jim Harter/Dover Publications, Inc.; ɖevi alẽkplɔla: Children: A Pictorial Archive from Nineteenth-Century Sources/Grafton/Dover Publications, Inc.