Etsɔme Kae Li Na Mi̇́aƒe Anyigba La?

World Military and Social Expenditures 1996 gblɔ be: “Ƒe alafa aɖeke meva kpɔ si de 20 lia sia nu le dumeviwo ƒe ʋunyaʋunyawɔwɔ tsukukutɔe me, le aʋa agbɔsɔsɔme siwo wowɔ me, le ame gbogbo siwo zu sitsoƒedilawo me, le ame miliɔn geɖe siwo wowu le aʋawɔwɔwo me, kple le ga gbogbo siwo wogblẽ ɖe ‘ɖokuitakpɔkpɔ’ ŋu me o.” Ðe nɔnɔme sia ava ɖɔ ɖo gbaɖegbea?

Apostolo Petro ɖo ŋku ŋugbe aɖe si Mawu do ƒe alafa aɖewo do ŋgɔ dzi na Kristotɔwo be: “Míele dziƒo yeye kple anyigba yeye, siwo me dzɔdzɔenyenye anɔ la, lalam le [Mawu ƒe] ŋugbedodo la nu.” (Petro II, 3:13) Yesaya ƒe nyagblɔɖi ƒe akpa aɖee nya mawo nye. (Yesaya 65:17; 66:22) Blema Israel kpɔ emevava gbãtɔ esi wogbugbɔ dukɔa ɖo eƒe ŋugbedodonyigba dzi le aboyomenɔnɔ le Babilon ƒe 70 megbe. Alesi Petro gbugbɔ he susu yi “dziƒo yeye kple anyigba yeye” ƒe ŋugbedodoa dzi fia be nyagblɔɖia agava eme le mɔ gãtɔ gɔ̃ hã nu—le xexeame godoo!

Mawu ƒe lɔlɔ̃nue wònye be woagbugbɔ nɔnɔme dzɔdzɔewo aɖo anyigba dzi, eye eƒe dziƒo Fiaɖuƒe si Kristo nye Fia nae ahee vɛ. “Dukɔ [magatsɔ] yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.” (Yesaya 2:4) Ŋutifafa kple dedienɔnɔ blibo sia si axɔ anyigba la dzie Yesu fia eyomedzelawo be woakpɔ mɔ na ahado gbe ɖa abia le nusi amewo lɔ̃a yɔyɔ be Mía Aƒetɔ ƒe Gbedodoɖa me be: “Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!”—Mateo 6:9, 10.

Ðe wòadzɔ dzi na wò be nànɔ agbe le xexe si me nudzɔdzɔewɔwɔ le abe alesi wòle le dziƒo ene mea? Mɔkpɔkpɔ mae Biblia tsɔ ɖo amesiame si di tso dzi blibo me be yeanya Mawu ahanɔ agbe ɖe eƒe mɔ dzɔdzɔeawo nu la ŋkume.