Gilead Ðo Dutanyanyuigblɔlawo ‘Ðe Anyigba ƒe Seƒe Ke’

ƑE BLAATƆ̃ kple edzivɔe nye sia si Gbetakpɔxɔ Habɔbɔa ƒe Biblia Gilead Sukua le dutanyanyuigblɔlawo ɖom ɖe dɔ gbe. Gilead Sukua ƒe klass 107 lia wu suku nu le September 11, 1999 dzi. Sukuvi 48 siwo tso dukɔ 11 mee nɔ klass la me, eye woɖo wo ɖe dukɔ 24 me be woaɖasubɔ. Woava wɔ ɖeka kple dutanyanyuigblɔla akpe bubu geɖe siwo wɔ akpa vevi aɖe le Yesu ƒe nya mamlɛ siwo wògblɔ hafi yi dziƒo la dzi wɔwɔ me. Egblɔe ɖi be yeƒe nusrɔ̃lawo ‘anye yeƒe ɖaseɖilawo vaseɖe anyigba ƒe seƒe ke.’—Dɔwɔwɔwo 1:8.

Sukunuwuwu ƒe wɔna siwo yi edzi le Gbetakpɔxɔ Habɔbɔa ƒe Hehenaƒea le Patterson, New York, nye wɔna gã aɖe ŋutɔ wowɔ le teƒe dzeani sia. Edzɔ dzi na sukunuwulaawo be ƒometɔwo, xɔlɔ̃ veviwo, kple amekpekpewo va. Ne wotsɔ amesiwo se wɔnawo le nyasemɔ̃wo dzi kple amesiwo kpɔe le television dzi le Brooklyn kple Wallkill dɔwɔƒegãawo ƒo ƒui la, eteƒekpɔlawo katã ƒe xexlẽme nye 4,992.

Subɔ Yehowa Kple Hawòvi Nuteƒewɔwɔtɔe

“Amekae Le Yehowa ƒe Akpa Dzi?” Tanya sia ŋue Carey Barber, amesi nye Dziɖuha la me tɔ kple sukunuwuwu wɔnaawo ƒe zimenɔla ƒo nu tsoe tsɔ ʋu wɔnaa nui. Eɖe nu me be nya siae dze ŋgɔ Israel-viwo le Mose ŋɔli. Eɖo ŋku edzi na sukunuwulaawo kple vavalawo be Israel-vi geɖe bu woƒe agbe le gbeadzi le esi wogbe Yehowa ƒe akpa dzi nɔnɔ nuteƒewɔwɔtɔe ta. Esi woƒo wo ɖokui ɖe trɔ̃subɔsubɔ me vɔ la, “[wobɔbɔ] nɔ anyi, ɖu nu, eye wono nu. Emegbe wotsi tre de asi fefe me.” (Mose II, 32:6) Yesu xlɔ̃ nu Kristotɔwo tso afɔku sia ke ŋu be: “Mikpɔ mia ɖokui dzi nyuie, bena nutsuɖuɖu kple ahamumu kple dzimaɖitsitsi ɖe nuɖuɖu ŋu nagate miaƒe dzi ɖe to o, eye ŋkeke ma nagalili mi abe mɔ̃ ene o.”—Luka 21:34-36.

Nuƒola si kplɔe ɖo, Gene Smalley, si le Agbalẽŋɔŋlɔ Kɔmitia me, bia sukunuwulaawo be: “Mianye Ŋusẽdoamelawoa?” Eɖe nu me be woxɔ Helagbe me nya si nye pa·re·go·riʹa de Eŋlisigbe me wòzu ŋkɔ na atike tsakatsaka aɖe si tsia vevesese nu. Gake apostolo Paulo zã Helagbe me nya sia na eƒe hadɔwɔlawo le Kolosetɔwo 4:11. Woɖe nya sia gɔme le New World Translation Biblia me be “ŋusẽtsoƒe.”

Dutanyanyuigblɔla sukunuwulaawo ate ŋu anye egbegbe ŋusẽdoamela ŋutɔŋutɔwo le woƒe dɔwo gbe ne woabɔbɔ wo ɖokui anye ŋusẽtsoƒe na nɔviŋutsu kple nɔvinyɔnu siwo dome woava nɔ kple ne woaɖe lɔlɔ̃ kpakple nuwɔwɔ aduadu ƒe gbɔgbɔ afia le hati dutanyanyuigblɔla siwo dome woanɔ la dome.

Emegbe Daniel Sydlik, amesi nye Dziɖuha la me tɔ, ƒo nu tso nyati si nye “Sikasedede si Nu Woanɔ Agbe Ðo” ŋu. Eɖe nu me be gɔmeɖose kɔkɔ si Yesu gblɔ le Mateo 7:12 be, “nusianu, si mielɔ̃na bena, amewo nawɔ na mi la, miawo hã miwɔ nenema ke na wo” la bia nyuiwɔwɔ na ame bubuwo, menye asaƒoƒo na vɔ̃wɔwɔ ɖe wo ŋu ko o.

Be nusia nanya wɔ la, nu etɔ̃e hiã: ŋku si kpɔa nume na ame, dzi si sea veve ɖe ame ti, kple asi si naa kpekpeɖeŋu. Egblɔ le nyataƒoƒo me be: “Ne míese le mía ɖokui me be míana kpekpeɖeŋu la, ele be míanae kaba. Ele be míadze agbagba awɔ nusi míadi be amewo nawɔ na mí la na wo.” Dutanyanyuigblɔlawoe nya sia sɔ na vevietɔ, elabena woawoe yina anyigba bubuwo dzi be yewoakpe ɖe amewo ŋu be woanɔ agbe ɖe Kristotɔnyenye vavãtɔ nu.

Nufialawo Gblɔ Ŋkuɖodzinya Lédzinamewo

Gilead-nufiala Karl Adams de dzi ƒo na dutanyanyuigblɔla sukunuwulaawo be “Minɔ Tsitsim Ðaa.” Le go kawo me? Gbã, le sidzedze kple eŋudɔwɔwɔ nyuie me. Le Gilead la, sukuviawo srɔ̃ alesi woaku nu me anya nusi Biblia me ŋutinyawo lɔ ɖe eme kple nɔnɔme siwo me nyaawo dzɔ le. Wode dzi ƒo na wo be woade ŋugble le alesi wòle be ŋutinya ɖesiaɖe nakpɔ ŋusẽ ɖe wo dzii ŋu. Wode dzi ƒo na wo be woayi nusia wɔwɔ dzi.

Nɔviŋutsu Adams gblɔ be: “Evelia, minɔ tsitsim ɖaa le lɔlɔ̃ me. Lɔlɔ̃ nye nane si ne wodo ŋusẽe la, ate ŋu atsi. Ne woŋe aɖaba ƒu edzi la, aku.” (Filipitɔwo 1:9) Esi wonye dutanyanyuigblɔlawo azɔ ta la, ahiã be woatsi le lɔlɔ̃ me le nɔnɔme vovovo me. Eye etɔ̃lia, “[Miyi edzi miatsi] le mía Aƒetɔ kple xɔla Yesu Kristo ƒe amenuveve kple sidzedze la me.” (Petro II, 3:18) Nuƒola la gblɔ be: “Esiae nye amenuveve wɔnuku si Yehowa ɖe fia to Via dzi. Ne míaƒe ŋudzedzekpɔkpɔ ɖe amenuveve sia ŋu le tsitsim ɖe edzi la, vivi si míase le Mawu ƒe lɔlɔ̃nu wɔwɔ me kple le dɔ si wòde mía si wɔwɔ me la atsi ɖe edzi.”

Gilead-nufiala bubu si nye Mark Noumair ƒo nu tso tanya si nye “Xɔe Lɔlɔ̃tɔe, Ekema Àte Ŋu Ado Dzi Atsɔe” ŋu. Exlɔ̃ nu be: “Srɔ̃ alesi nàxɔ nɔnɔme sesẽ siwo nàdo goe le dutanyanyuigbɔgblɔdɔa wɔwɔ me la lɔlɔ̃tɔe, ekema àte ŋu ado dzi atsɔe. Amesiwo Yehowa lɔ̃ koe wòhea to na. Ne wòwɔ na wò be womeɖo aɖaŋu aɖe na ye nyuie o, wotɔ ŋku ye, alo be mesɔ o la, lɔlɔ̃ na Yehowa kple mia kplii dome ƒomedodo akpe ɖe ŋuwò be nàdo dzi.”

Nɔviŋutsu Noumair ɖee fia be dutanyanyuigbɔgblɔdɔa wɔwɔ bia dɔ geɖe wɔwɔ. “Gake dɔwɔwɔ lɔlɔ̃ manɔmee mana wò dzi nadze eme o. Lɔlɔ̃ manɔmee la, wò aƒemedɔwo—abe nuɖaɖa, asiƒeƒle, atikutsetsewo kɔklɔ, tsi ɖoɖo dzo dzi—ate ŋu ati wò. Ele be nàtɔ sẽ abia ɖokuiwò be, ‘Nukatae mele dɔ siawo wɔm ɖo?’ Ne ègblɔ na ɖokuiwò be, ‘Nye agbagbadzedzewo awɔe be hanyevi dutanyanyuigblɔlawo nanɔ lãmesẽ me eye dzi nadzɔ wo’ la, ke magasesẽ na wò o.” Exlɔ̃ nu wo le nyataƒoƒo me be: “Eɖanye tohehe xɔxɔ, dutanyanyuigbɔgblɔdɔa me dɔwo wɔwɔ, alo masɔmasɔwo gbɔ kpɔkpɔ ye o, exɔxɔ lɔlɔ̃tɔe akpe ɖe ŋuwò be nàdo dzi le wò dɔdasia wɔwɔ me. ‘Lɔlɔ̃ la nu metsina gbeɖe o.’ ”—Korintotɔwo I, 13:8.

Emegbe Gilead-nufiala Wallace Liverance bia gbe sukuviawo wogblɔ nuteƒekpɔkpɔ dodzidzɔname geɖe siwo su wo si esime woyi gbeadzi kple hame siwo le nutoa me. Tsɔ kpe ɖe aƒeme yi aƒeme dɔa wɔwɔ ŋu la, wozã dutanyanyuigbɔgblɔdɔa ƒe hehe siwo woxɔ la tsɔ di amewoe le agbatsɔʋudzeƒewo, nunyãƒewo, ketekeɖoƒewo, kple teƒe bubuwo.

Dutanyanyuigblɔla Kpɔnuteƒewo Gblɔ Dzideƒonamenyawo

Ne dutanyanyuigblɔla yeyewo yi dutanyigbawo dzi la, ɖe wòhiã be woatsi dzia? Ðe woate ŋu anɔ te ɖe dutadɔ wɔwɔ ƒe kuxiwo nua? Nukae alɔdzedɔwɔƒewo wɔna be woatsɔ akpe ɖe ame yeye siawo ŋu be dɔa nadze edzi na wo? Bene woaɖo biabia siawo kple bubuwo ŋu la, Steven Lett si le Subɔsubɔdɔdzikpɔƒea, kple David Splane si le Agbalẽŋɔŋlɔ Dɔwɔƒea bia gbe nɔviŋutsu siwo nɔ alɔdzedɔwɔƒe kɔmiti me tɔwo ƒe suku dem le Gbetakpɔxɔ Habɔbɔa ƒe Hehenaƒea. Nɔviŋutsu siwo wobia gbee la le alɔdzedɔwɔƒe kɔmitiwo me le Spain, Hong Kong, Liberia, Benin, Madagascar, Brazil, kple Japan.

Yehowa subɔla kpɔnuteƒe siawo siwo dometɔ geɖe le dutanyanyuigbɔgblɔdɔa wɔm ƒe geɖe la, de dzi ƒo na sukunuwulaawo kple wo dzilawo kpakple woƒe ƒometɔ siwo nɔ vavalaawo dome. Wonɔ te ɖe nusiwo teƒe woa ŋutɔwo kple hati dutanyanyuigblɔlawo kpɔ dzi ɖee fia be woate ŋu akpe akɔ kple kuxiwo kple fuɖenamewo dzidzedzetɔe. Raimo Kuokkanen si nye dutanyanyuigblɔla le Madagascar gblɔ be, kuxi si woado goe la ate ŋu alolo, “gake woate ŋu akpɔ egbɔ, eye Habɔbɔa kpena ɖe mía ŋu.” Östen Gustavsson si le subɔsubɔm le Brazil fifia gblɔ be: “Menye mía ŋutɔwoe tia afisi woɖo mí ɖo o. Eyata míeɖoe be míawɔ mía tɔ sinua anɔ afima.” James Linton si le subɔsubɔm le Japan gblɔ be nusi kpe ɖe ye ŋue nye “nɔvi siwo nɔ dutanyanyuigbɔgblɔdɔa wɔm xoxo dome nɔnɔ.” Dutanyanyuigbɔgblɔdɔ wɔwɔ nye Yehowa subɔsubɔdɔ dodzidzɔname si naa dzidzeme eye wònye mɔ si dzi wotona kpɔa eƒe alẽwo dzi.

Asaƒoƒo na Dɔvɔ̃ si Wua Ame le Gbɔgbɔ Me

Theodore Jaracz, si nye Dziɖuha la me tɔ si ŋutɔ hã do le Gilead ƒe klass adrelia le ƒe 1946 me lae ƒo nuƒo mamlɛa si ƒe tanyae nye “Dɔ si Wònye be Woakpɔtɔ Axɔ Dzo le Gbɔgbɔ Me.” Gbã la, elɔ̃ ɖe edzi be afɔku dziŋɔwo le dzɔdzɔm le xexeame ƒe akpa geɖe, eye wògagblɔ be dzɔgbevɔ̃e manyatalenuwo le dzɔdzɔm ɖe ameƒomea dzi.

Nɔviŋutsu Jaracz he susu yi Psalmo 91 lia dzi eye wòƒo nu tso “dɔvɔ̃” kple ‘nugblẽnu’ si de dɔ lãme na ame miliɔn geɖe siwo ƒo xlã mí hewu wo le gbɔgbɔ me le xexeame godoo la ŋu. Abosam kple eƒe nuɖoanyi vɔ̃ɖia zã togblẽnya siwo le abe dɔvɔ̃ ene, siwo wotu ɖe xexemenunya kple ŋutilãmenudidi dzi tsɔ gbɔdzɔ amewo hewu wo le gbɔgbɔ me, gake Yehowa ka ɖe edzi na mí be dɔvɔ̃ sia magogo “amesi bɔbɔ nɔ dziƒoʋĩtɔ la ƒe bebeƒe” o.—Psalmo 91:1-7.

Nɔviŋutsu Jaracz gblɔ be: “Nusi sesẽ enye alesi woakpɔtɔ asẽ ŋu le xɔse me, akpɔtɔ anɔ dedienɔƒea. Manyo be míanɔ abe fewuɖula siwo ‘menye gbɔgbɔmemewo la o.’ Fifia nusiae nye kuxi egbea. Enye nusi dze ŋgɔ mí katã le habɔbɔa me. Ate ŋu adze ŋgɔ miawo hã le miaƒe dutanyanyuigbɔgblɔdɔa me.” (Yuda 18, 19) Gake wona dutanyanyuigblɔla sukunuwulaawo nya be woate ŋu ayi edzi anye gbɔgbɔmemewo le woƒe dɔwo gbe. Wode dzi ƒo na wo be woade ŋugble le kpɔɖeŋu aɖewo si nye alesi mía nɔviwo le dzi dom le Russia, Asia, kple le Afrika-dukɔwo mee ŋu—togbɔ be woxe mɔ ɖe dɔa nu, wotsia tre ɖe wo ŋu vevie, woɖua fewu le wo ŋu, mawudzimaxɔselawo gblɔa togblẽnyawo, eye wodaa alakpa ɖe wo si hã. Eye le go geɖe me la, kuxi ŋutɔŋutɔ aɖewo hã gava kpenɛ, wotsoa gbevovodolawo dome dzrewo kple nuhiahiãwo ƒe anyimanɔmanɔ gbɔ.

Ne ame aɖe gbɔdzɔ le gbɔgbɔ me la, “ehiã be wòazã aɖaŋuɖoɖo siwo le Mawu ƒe Nya la me atsɔ akpɔ nusi he kuxia vɛ gbɔ ahawɔ dɔ tso eŋu.” Wona Biblia me kpɔɖeŋu aɖewo. Wode dzi ƒo na Yosua be wòaxlẽ Segbalẽ si wotsɔ de esi la blewu gbesiagbe. (Yosua 1:8) Esi wofɔ Segbalẽa le Yosia ŋɔli la, Yehowa yra ɖe alesi wotsɔ mɔfiame siwo le eme wɔ dɔe nuteƒewɔwɔtɔe la dzi. (Fiawo II, 23:2, 3) Timoteo nya ŋɔŋlɔ kɔkɔeawo tso eƒe ɖevime. (Timoteo II, 3:14, 15) Menye nyasela nyuiwo koe Beroiatɔwo nye o; ke wobu wo be ‘woɖɔ ʋu wu’ hã elabena wodzroa Ŋɔŋlɔawo me gbesiagbe. (Dɔwɔwɔwo 17:10, 11) Eye Yesu Kristoe nye amesi ɖo kpɔɖeŋu nyuitɔ kekeake le Mawu ƒe Nya la nyanya kple eŋudɔwɔwɔ me.—Mateo 4:1-11.

Le etaƒoƒo me la, Nɔviŋutsu Jaracz xlɔ̃ nu dutanyanyuigblɔla yeyeawo dzonɔamemetɔe be: “Fifia miele klalo be miawɔ miaƒe dutanyanyuigbɔgblɔdɔa. Eye miele dutanyigba dzi yi ge le anyigba la ƒe akpa vovovo le gɔmesesea ŋutɔŋutɔ nu. Ne miedo go alesi woakpɔtɔ axɔ dzo le gbɔgbɔ me ƒe gbetɔame la, ekema miele mɔ ɖe ge be naneke naxe mɔ na nusi mieɖo be miawɔ o. Miele gbeƒã ɖe ge dzonɔamemetɔe, mide dzo amewo me bene woasrɔ̃ miaƒe xɔse, eye míado gbe ɖa kpli mi be Yehowa nagbɔ agbe amesiwo miafia nui abe alesi wòwɔe le mía gome ene. Eye awɔe be ame bubu geɖe hã nasi le gbɔgbɔmefɔku si le nu gblẽm le xexeame godoo fifia nu. Woawɔ ɖeka kpli mí le agbɔsɔsɔ gã me be míawɔ Yehowa ƒe lɔlɔ̃nu. Eye Yehowa neyra mi le dɔ sia wɔwɔ me.”

Esi zimenɔla la xlẽ gbedoname siwo tso dukɔ vovovo me le xexeame godoo vɔ la, ɣeyiɣia ɖo be woatsɔ ɖaseɖigbalẽwo ana sukunuwulaawo. Emegbe woxlẽ ŋudzedzekpɔkpɔ lɛta lédziname aɖe si sukuviawo ŋlɔ. Aleke gbegbe woda akpe na Yehowa kple eƒe habɔbɔa ɖe hehe tɔxɛ si woxɔ kple dɔ siwo wo dometɔ ɖesiaɖe xɔ be woanye dutanyanyuigblɔla siwo yina “anyigba ƒe seƒe ke” tae nye si!—Dɔwɔwɔwo 1:8.

[Aɖaka si le axa 29]

Sukuviawo Ŋuti Nyatakaka

Dukɔ siwo me wotso ƒe xexlẽme: 11

Dukɔ siwo me woɖo wo ɖo ƒe xexlẽme: 24

Sukuviawo ƒe xexlẽme: 48

Srɔ̃tɔwo ƒe xexlẽme: wo katã

Ƒe si woxɔ le mama dedie nu: 34

Ƒe si wole nyateƒea me le mama dedie nu: 17

Ɣeyiɣiawo katã ƒe subɔsubɔƒewo le mama dedie nu: 12

[Nɔnɔmetata si le axa 26]

Gbetakpɔxɔ Habɔbɔa ƒe Gilead Biblia Suku ƒe Klass 107 lia Nuwulawo

Le amesiwo ƒe ŋkɔ woŋlɔ ɖe ete me la, woxlẽ fliawo tso ŋgɔgbe yi megbee eye woŋlɔ ŋkɔawo tso miame yi ɖusime le fli ɖesiaɖe dzi.

1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.