Nukae Biblia Gblɔ tso Mawu kple Yesu Ŋu?

NE WOXLẼ Biblia tso eƒe gɔmedzedze vaseɖe eƒe nuwuwu eye menye Mawuɖekaetɔ̃ ƒe susu aɖeke wotsɔ xlẽe o la, ɖe woake ɖe nukpɔsusu ma ŋua? Kurakura o.

Nusi dzena kɔte na agbalẽxlẽla si mede akpa aɖeke dzi o ye nye be Mawu ɖeɖekoe nye Ŋusẽkatãtɔ, Wɔla la, amesi le eɖokui si eye wòle vovo tso ame bubu ɖesiaɖe gbɔ, eye be Yesu hã, le eƒe anyinɔnɔ do ŋgɔ na amegbetɔzuzu gɔ̃ hã me la, nye amesi le eɖokui si eye wòle vovo, amesi wowɔ eye wòbɔbɔ eɖokui ɖe Mawu te.

Ame Ðekae Mawu Nye, Menye Ame Etɔ̃ O

WOYƆ Biblia ƒe nufiafia si nye be Mawu nye ame ɖeka la be mawuɖekadzixɔse. Eye L. L. Paine si nye subɔsubɔha ƒe ŋutinyafialagã la ɖee fia be mawuɖekadzixɔse akuakua ŋutɔŋutɔ meɖe mɔ ɖe Mawuɖekaetɔ̃ ŋu o: “Mawuɖekadzixɔse dzaa koe Nubabla Xoxoa fia. Mawu nye ame ŋutɔŋutɔ si nye ɖeka ko. Nukpɔsusu si nye be woake ɖe mawuɖekaetɔ̃ ŋu le eme la . . . nye nusi gɔmeɖoanyi aɖeke meli na o.”

Ðe tɔtrɔ aɖe va eme le mawuɖekadzixɔse me le Yesu ƒe anyigba dzi vava vɔ megbea? Paine ɖo eŋu be: “Le nya sia gome la, memamã aɖeke mele Nubabla Xoxoa kple Yeyea dome o. Woyi mawuɖekadzixɔse ƒe nukpɔsusua dzi. Yesu nye Yudatɔ, dzila siwo nye Yudatɔwoe na hehee le ŋɔŋlɔ siwo nye Nubabla Xoxoa me. Eƒe nufiafia nye Yudatɔwo ƒe nufiafia vaseɖe etome ke; nyateƒee, enye nyanyuie yeye, gake menye mawuŋutinufiafia yeyee o. . . . Eye exɔ Yudatɔwo ƒe mawuɖekadzixɔse ƒe mawunyakpukpui vevi la tsɔ wɔ eɖokui tɔe be: ‘Oo, Israel, see, Aƒetɔ mía Mawu la Mawu ɖekae wònye.’”

Nya mawo dze le Mose V, 6:4 me. Katolikotɔwo ƒe New Jerusalem Bible (NJB) ƒe afisia xlẽ be: “Israel, ɖo to: Yahweh mía Mawu lae, Yahweh ɖeka kolia lae.”a Le gbeŋutise si wozã le kpukpui ma me nu la, agbɔsɔsɔ ƒe nyaɖɔnya aɖeke mele nya “ɖeka” ŋu si fia be wole nu ƒom tso nusi sɔ gbɔ wu ame ɖeka ko ŋu o.

Kristotɔ apostolo Paulo hã mefia be tɔtrɔ aɖeke va le amesi Mawu nye la me o, le Yesu ƒe dzodzo le anyigba dzi megbe kura gɔ̃ hã. Eŋlɔ bena: “Ke Mawu la . . . ɖekae.”—Galatiatɔwo 3:20; kpɔ Korintotɔwo I, 8:4-6 hã.

Woƒo nu tso Mawu ŋu zi akpe nanewo le Biblia me abe ame ɖeka ene. Ne eya ŋutɔ le nu ƒom la, eƒoa nu abe ame ɖeka si me memã o ene. Biblia mate ŋu agblɔe bubui be eme nagakɔ wu esia o. Abe alesi Mawu gblɔe ene la: “Nyee nye Yehowa, ŋkɔnyee, nyematsɔ nye bubu na ame tutɔ . . . o.” (Yesaya 42:8) “Nyee nye Yahweh wò Mawu . . . Mawu bubu aɖeke manɔ asiwò wum o.” (Míawoe te gbe ɖe edzi.)—Mose II, 20:2, 3, JB.

Nukatae Biblia-ŋlɔla siwo katã Mawu ƒe gbɔgbɔ ʋã la aƒo nu tso Mawu ŋu abe ame ɖeka ene ne ame etɔ̃e wònye nyateƒe? Vi kae ema aɖe wu amewo fuflu ko? Ne ame etɔ̃e ƒo ƒu nye Mawu la, anye ne ana eƒe Biblia-ŋlɔlawo nakɔ eme nyuie godoo be ɖikeke aɖeke manɔ eŋu o. Anye ne Hela Ŋɔŋlɔawo ŋlɔlawo, siwo ŋutɔ kpɔ Yesu ŋkume kple ŋkumee ya teti aŋlɔe. Gake womeŋlɔe o.

Ke boŋ nusi me Biblia-ŋlɔlawo kɔ nyuie zi geɖee nye be Mawu nye Ame ɖeka—Ame ɖeka kolia si ɖe dzesi, si me mamã aɖeke mele o, si ame aɖeke mesɔ kple o. “Nyee nye Yehowa, ɖeke megali o; mawu aɖeke mekpe ɖe ŋunye o.” (Yesaya 45:5) “Ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi!”—Psalmo 83:19.

Menye Mawu si Nye Ame Geɖe ƒe Ƒuƒoƒo O

YESU yɔ Mawu be enye “Mawu vavã ɖeka la.” (Yohanes 17:3) Meyɔe ɣeaɖekeɣi kpɔ be enye mawu si nye ame geɖe ƒe ƒuƒoƒo o. Eyatae womegayɔ ame bubu aɖeke le Biblia me be Ŋusẽkatãtɔ o negbe Yehowa ko. Ne ɖe ame bubu aɖe li nenema la, anye ne nya “ŋusẽkatãtɔ” la anye nusi ŋu gɔmesese mele o. Womeyɔ Yesu alo gbɔgbɔ kɔkɔea kpɔ nenema gbeɖe o, elabena Yehowa koe ƒo nuwo katã ta. Egblɔ le Mose I, 17:1 me be: “Nye enye Mawu ŋusẽkatãtɔ.” Eye Mose II, 18:11 gblɔ be: “Yehowa kpe wu [mawu bubuwo] katã.”

Le Hebri Ŋɔŋlɔawo me la, xexlẽme agbɔsɔsɔtɔ evee li na nya ʼelohʹah (mawu); woawoe nye ʼelo·himʹ (mawuwo) kple ʼelo·hehʹ (ƒe mawuwo). Zi geɖe la, wozãna nya la le xexlẽme agbɔsɔsɔtɔ siawo me na Yehowa, eye le emawo gome la, woɖea egɔme le xexlẽme si nye ame ɖeka tɔ nu be “Mawu.” Ðe xexlẽme agbɔsɔsɔtɔ siawo fia Mawuɖekaetɔ̃a? Ao, womefia nenema o. William Smith gblɔ le A Dictionary of the Bible me be: “Esesẽ ŋutɔ hafi woakpɔ nya si wosusuna ko gblɔna be wozãa [ʼelo·himʹ] na ame etɔ̃ siwo ƒe ƒuƒoƒoe nye Mawu ɖeka la dzidela le agbalẽnyalawo dome fifia. Enye nusi gbeŋutisenyalawo yɔna be xexlẽme agbɔsɔsɔtɔ si dea dzesi fianyenye loo, alo efia Mawu ƒe ŋusẽ ƒe blibonyenye, Mawu ƒe ŋusẽ siwo wòɖena fiana la katã ƒe ƒuƒoƒo.”

The American Journal of Semitic Languages and Literatures gblɔ tso ʼelo·himʹ ŋu be: “Ɣesiaɣi kloe la, wozãnɛ kple nɔnɔmefianya si woɖe tso dɔwɔnya me si nye xexlẽme ɖekatɔ, eye wo kple ŋkɔnyaɖɔnya nɔnɔmefiatɔ xexlẽme ɖekatɔe zɔna.” Eƒe kpɔɖeŋu aɖee nye si be, dzesideŋkɔ ʼelo·himʹ ɖeɖe dze zi 35 le nuwɔwɔ ŋuti nuŋlɔɖia me, eye ɣesiaɣi si wozã dɔwɔnya si ɖɔ nusi Mawu gblɔ kple nusi wòwɔ la, wozãnɛ le xexlẽme ɖekatɔ nu. (Mose I, 1:1–2:4) Eyata agbalẽ ma ƒo eta be: “Ele be woaɖe [ʼelo·himʹ] gɔme boŋ be enye nya si wozãna le xexlẽme agbɔsɔsɔtɔ me tsɔ tea gbe ɖe nu dzi eye efiaa gãnyenye kple fianyenye.”

ʼElo·himʹ mefia be “amewo” o ke boŋ “mawuwo” ye wòfia. Eyata amesiwo gblɔna be nya sia fia be Mawuɖekaetɔ̃ ŋue wole nu ƒom le la wɔa wo ɖokui mawugeɖedzixɔselawoe, si gɔmee nye be wonye amesiwo dea ta agu na Mawu siwo sɔ gbɔ wu ɖeka. Nukatae? Elabena ema afia be mawu etɔ̃e le Mawuɖekaetɔ̃ la me. Gake Mawuɖekaetɔ̃dzixɔselawo katã kloe tsia tre ɖe nukpɔsusu si nye be mawu vovovo etɔ̃e le Mawuɖekaetɔ̃a me la ŋu.

Biblia zãa nya ʼelo·himʹ kple ʼelo·hehʹ hã ne ele nu ƒom tso mawu siwo nye trɔ̃wo ŋu. (Mose II, 12:12; 20:23) Gake le ɣebubuɣiwo la, ate ŋu aku ɖe alakpamawu ɖeka dzaa ko ŋu, abe esime Filistitɔwo ƒo nu tso “woƒe mawu [ʼelo·hehʹ] Dagon” ŋu ene. (Ʋɔnudrɔ̃lawo 16:23, 24) Woyɔ Baal be ‘mawu aɖe [ʼelo·himʹ].’ (Fiawo I, 18:27) Hekpe ɖe eŋu la, wozã nya la na amegbetɔwo hã. (Psalmo 82:1, 6) Wogblɔ na Mose be anɔ abe “Mawu” (ʼelo·himʹ) ene na Aron kple Farao.—Mose II, 4:16; 7:1.

Eme kɔ ƒã be dzesideŋkɔ ʼelo·himʹ kple ʼelo·hehʹ zazã na alakpamawuwo kple na amegbetɔwo gɔ̃ hã mefia be le ɖesiaɖe gome la, mawu geɖe ŋue wole nu ƒom le o; nenema ke ʼelo·himʹ alo ʼelo·hehʹ zazã na Yehowa mefia be esɔ gbɔ wu ame ɖeka o, vevietɔ ne míede ŋugble tso ɖaseɖiɖi siwo le Biblia ƒe akpa bubuawo me ku ɖe nyati sia ŋu la ŋuti.

Yesu Nye Nuwɔwɔ Si Le Vovo

LE YESU ƒe anyigbadzinɔɣi la, enye amegbetɔ, gake enye ame deblibo elabena Mawue trɔ Yesu ƒe agbeŋusẽ de Maria ƒe vidzidɔ me. (Mateo 1:18-25) Gake menye nenemae eƒe agbenɔnɔ dze egɔmee o. Eya ŋutɔ gblɔ be “[yeɖi] tso dziƒo va.” (Yohanes 3:13) Eyata ɖeko wònye nusi sɔ be wògblɔ na eyomedzelawo emegbe be: “Ke ne miakpɔ Amegbetɔvi la [Yesu] wòalia yi dziƒo si wònɔ do ŋgɔ la ɖe?”—Yohanes 6:62, NJB.

Eyata Yesu nɔ dziƒo do ŋgɔ na eƒe anyigba dzi vava. Gake ɖe wònye ameɖekaetɔ̃ siwo nye ŋusẽkatãtɔ, mavɔtɔ siwo nye Mawu la me tɔa? Ao, elabena Biblia gblɔe kɔte be le Yesu ƒe anyinɔnɔ do ŋgɔ na amegbetɔzuzu me la, enye gbɔgbɔmenuwɔwɔ, abe alesi tututu mawudɔlawo hã nye gbɔgbɔmenuwɔwɔ siwo Mawu wɔ ene. Eya alo mawudɔlawo menɔ anyi do ŋgɔ na wo wɔwɔ o.

Le Yesu ƒe anyinɔnɔ do ŋgɔ na amegbetɔzuzu me la, enye “nuwɔwɔwo katã ƒe ŋgɔgbevi.” (Kolosetɔwo 1:15) Enye “Mawu ƒe nuwɔwɔwo ƒe gɔmedzedze.” (Nyaɖeɖefia 3:14) Masɔ be woaɖe “gɔmedzedze” [Helagbe, ar·kheʹ] gɔme be efia be Yesue nye Mawu ƒe nuwɔwɔwo ‘gɔmedzela’ o. Yohanes zã Helagbe me nya ar·kheʹ wu zi gbɔ zi 20 le nusiwo wòŋlɔ ɖe Biblia me la me, eye ɣesiaɣi la, gɔmeɖeɖe “gɔmedzedze” ma kee le wo katã si. Ẽ, Mawu wɔ Yesu wònye eƒe nuwɔwɔ makpɔmakpɔwo ƒe gɔmedzedze.

Lé ŋku ɖe alesi nya mawo siwo wogblɔ tso Yesu ƒe dzɔdzɔ ŋu la do ƒome kplikplikpli kple nya siwo kpɔɖeŋu ƒe “Nunya” la gblɔ le Biblia-gbalẽ si nye Lododowo me la ŋu nyuie: “Yahweh wɔm menye eƒe nuwɔwɔwo ƒe ŋgɔgbevi, do ŋgɔ na eƒe nuwɔwɔ siwo do xoxo wu. Hafi woaɖo towo gɔme anyi, do ŋgɔ na togbɛwo la, medzɔ; hafi wòwɔ anyigba, gbedzi kple xexeame ƒe gɔmedzenuwo.” (Lododowo 8:12, 22, 25, 26, NJB) Togbɔ be wozã nya “Nunya” wòle tsitre ɖi na amesi Mawu wɔ hã la, agbalẽnyalawo dometɔ akpa gãtɔ lɔ̃ ɖe edzi be kpɔɖeŋunyagbɔgblɔe wònye wozã na Yesu si nye gbɔgbɔmenuwɔwɔ hafi wòazu amegbetɔ.

Abe amesi nye “Nunya” le eƒe anyinɔnɔ do ŋgɔ na eƒe amegbetɔzuzu me ene la, Yesu yi edzi gblɔ be yenɔ “[Mawu] gbɔ abe dɔnunɔla aɖaŋuwɔla ene.” (Lododowo 8:30, JB) Le ɖekawɔwɔ me kple wɔƒe sia si nye dɔnunɔla aɖaŋuwɔla la, Kolosetɔwo 1:16 gblɔ le Yesu ŋu be “Mawu wɔ nusianu si le dziƒo kple anyigba dzi to eyama dzi.”—Today’s English Version (TEV).

Eyata dɔnunɔla sia, si nye eƒe hatidɔwɔla suetɔ, le kpɔɖeŋunyagbɔgblɔ nu, dzie Mawu Ŋusẽkatãtɔ la to wɔ nu bubuwo katã. Biblia ƒo nya la ta kpokploe ale: “Mawu ɖeka, Fofo la, si gbɔ nuwo katã tso . . . kple Aƒetɔ ɖeka, Yesu Kristo, si dzi nuwo katã to la ye li na mí.” (Míawoe te gbe ɖe edzi.)—Korintotɔwo I, 8:6, RS, Katolikotɔwo ƒe gɔmeɖeɖe.

Ðikekemanɔmee la, dɔnunɔla aɖaŋuwɔla siae Mawu gblɔ na be: “[Na] míawɔ ame ɖe míaƒe nɔnɔme [nu].” (Mose I, 1:26) Ame aɖewo gblɔ be “mía” kple “míaƒe” si le nyagbɔgblɔ sia me fia be Mawuɖekaetɔ̃ ŋue wole nu ƒom le. Gake ne ègblɔ be ‘Na míawɔ nane na mía ɖokui’ la, ame aɖeke mase egɔme be esia fia be ame geɖe ƒo ƒu abe ame ɖeka ene ɖe mewò o. Nusi gblɔm nèle koe nye be ame eve alo esiwo wu nenema awɔ dɔ ɖekae le nane ŋu. Nenema ke esi Mawu zã “mí” kple “míaƒe” la, ɖeko wònɔ nya gblɔm na ame bubu si nye eƒe gbɔgbɔmenuwɔwɔ gbãtɔ, dɔnunɔla aɖaŋuwɔla Yesu le eƒe anyinɔnɔ do ŋgɔ na amegbetɔzuzu me.

Ðe Woate Ŋu Ate Mawu Kpɔa?

WOGBLƆ tso Yesu ŋu le Mateo 4:1 me be ‘Abosam tee kpɔ.’ Esi wòfia “xexeame fiaɖuƒewo katã kple woƒe ŋutikɔkɔe” Yesu vɔ la, Satana gblɔ be: “Matsɔ nu siawo katã ana wò, ne èdze klo de ta agu nam.” (Mateo 4:8, 9) Satana nɔ agbagba dzem be yeana Yesu nagbe nuteƒewɔwɔ na Mawu.

Gake nuteƒewɔwɔ ƒe dodokpɔ kae wòanye ne Yesue nye Mawu? Ðe Mawu ate ŋu adze aglã ɖe eɖokui ŋua? Ao, gake mawudɔlawo kple amegbetɔwo ate ŋu adze aglã ɖe Mawu ŋu eye wodzee hã. Ne Yesu menye Mawu o, ke boŋ amesi le vovo eye eya ŋutɔ ƒe lɔlɔ̃nu faa le esi, amesi ate ŋu anye nuteƒemawɔla ne ɖe wòtia nenema, abe amegbetɔ alo mawudɔla ene, ko hafi gɔmesese anɔ dodokpɔ si wowɔ nɛ la ŋu.

Le go bubu me la, enye nusi womate ŋu asusu be Mawu awɔ nuvɔ̃ eye mawɔ nuteƒe na eɖokui o. “Eƒe nuwɔwɔ de blibo; . . . Mawu nyateƒetɔ wònye, . . . nuteƒewɔla kple dzɔdzɔetɔ wònye.” (Mose V, 32:4) Eyata ne ɖe Yesu nye Mawu la, anye ne womate ŋu atee kpɔ o.—Yakobo 1:13.

Esi Yesu menye Mawu o ta la, ate ŋu anye nuteƒemawɔla hafi. Gake elé nuteƒewɔwɔ me ɖe asi eye wògblɔ be: “Te ɖa le gbɔnye, Satana! Elabena woŋlɔ ɖi bena: ‘[Yehowa], wò Mawu la, nade ta agu na, eye eya ɖeka ko nasubɔ.’”—Mateo 4:10.

Aleke Gbegbe Tafe la Xɔ Asie?

SUSU siwo tae Yesu va anyigba dzi la dometɔ vevi aɖe hã do ƒome tẽ kple Mawuɖekaetɔ̃ ƒe nya la. Biblia gblɔ be: “Mawu ɖeka kple avuléla ɖeka, si le Mawu kple amewo dome, si nye ame Kristo Yesu la koe li, amesi tsɔ eɖokui na abe fexexe ɖe amewo katã ta la ene.”—Timoteo I, 2:5, 6.

Yesu, amesi ƒe asixɔxɔ mele ʋee wu alo kɔkɔ wu amegbetɔ deblibo tɔ o la, zu tafe si xe nusi Adam bu—gome si nye amegbetɔ ƒe agbe deblibo nɔnɔ le anyigba dzi—la wòde pɛpɛpɛ. Eyata esɔ be apostolo Paulo nayɔ Yesu be “Adam mamletɔ” eye wòagblɔ le nya mawo ke me be: “Alesi amewo katã ku le Adam me la, nenema ke woagbɔ agbe wo katã hã le Kristo me.” (Korintotɔwo I, 15:22, 45) Yesu ƒe amegbetɔ ƒe agbe debliboa ye nye ‘tafe si sɔ ɖe enu’ si wobia le Mawu ƒe dzɔdzɔenyenye nu—menye nane si bɔbɔ ɖe anyi alo kɔkɔ wu o. Le amegbetɔwo ƒe ʋɔnudɔdrɔ̃ me gɔ̃ hã la, gɔmeɖose vevi aɖe si dzi wonɔa te ɖoe nye be ele be nusi woaxe la nasɔ ɖe nusi wogblẽ la nu.

Gake ne ɖe Yesu nye Mawuƒokpli ƒe akpa aɖe la, anye ne tafe si wòaxe la ƒe asixɔxɔ akɔkɔ sasasã wu nusi Mawu ŋutɔ ƒe Sea bia. (Mose II, 21:23-25; Mose III, 24:19-21) Adam si nye amegbetɔ deblibo la koe wɔ nuvɔ̃ le Eden-bɔ me, ke menye Mawue o. Eyata be tafea nasɔ ɖe Mawu ƒe dzɔdzɔenyenye nu tututu la, ele be eƒe asixɔxɔ nasɔ ɖe enu pɛpɛpɛ—anye amegbetɔ deblibo, “Adam mamletɔ” la tɔ. Eyata esime Mawu ɖo Yesu ɖe anyigba dzi be wòanye tafe la, ena Yesu sɔ ɖe dzɔdzɔenyenye ƒe nudidi nu pɛpɛpɛ, menye Mawue wònye do ŋutilã o, menye amegbetɔ-afã-mawu-afã ye wònye o, ke boŋ ame deblibo ‘si wobɔbɔ ɖe anyi wu mawudɔlawo’ ye wònye. (Hebritɔwo 2:9; tsɔe sɔ kple Psalmo 8:6, 7.) Aleke wòadzɔe be Mawuƒokpli si nye ŋusẽkatãtɔ—Fofo, Vi, alo gbɔgbɔ kɔkɔe—nabɔbɔ ɖe anyi ɣeaɖeɣi wu mawudɔlawoe?

Aleke Wònye ‘Tenuvie’?

BIBLIA yɔ Yesu be Mawu ƒe “Tenuvi.” (Yohanes 1:14; 3:16, 18; Yohanes I, 4:9) Mawuɖekaetɔ̃fialawo gblɔna be esi Mawu nye mavɔmavɔtɔ ta la, nenema ke Mawu ƒe Vi la hã nye mavɔmavɔtɔe. Evɔ aleke ame aɖe anye vi eye le ɣeyiɣi ma ke la wòagasɔ kple fofoa le ƒe me?

Mawuɖekaetɔ̃fialawo gblɔna be le Yesu gome la, menye nyagɔmeɖegbalẽ ƒe gɔmeɖeɖe si wozã na ‘vidzidzi’ le fofo gome si nye be ‘woanye fofo si adzi ame’ ye wozã na “tenuvi” la o. (Webster’s Ninth New Collegiate Dictionary) Wogblɔna be le Yesu gome la, efia “gɔmesese si ku ɖe ƒomedodo si gɔmedzedze meli na o ŋu,” esi nye ƒomedodo ƒomevi aɖe si nye tenuvi si menye ɖe wodzii o la tɔ. (Vine’s Expository Dictionary of Old and New Testament Words) Ðe ema ɖi nya si me susu le na wòa? Ðe fofo ate ŋu adzi vi eye manye eya mee wòdzɔ tso oa?

Gawu la, nukatae Biblia zã Helagbe me nya ma ke si wòzã na “tenuvi” (abe alesi Vine lɔ̃ ɖe edzi egɔmemaɖemaɖee ene) la tsɔ ɖɔ ƒomedodo si le Isak kple Abraham domee? Hebritɔwo 11:17 ƒo nu tso Isak ŋu be enye Abraham ƒe “tenuvi.” Ðikeke mele eme o be le Isak gome la, enye tenuvi le nya la ƒe gɔmesese ŋutɔŋutɔ nu, mesɔ kple fofoa le ɣeyiɣi alo nɔƒe gome o.

Strong ƒe Exhaustive Concordance gblɔ be Helagbe me nya si dzi wotu nya “tenuvi” ɖo, si wozã na Yesu kple Isak ye nye mo·no·ge·nesʹ, si woɖe tso moʹnos si gɔmee nye “ɖeka kolia” kple giʹno·mai, nya la ƒe agunu si gɔmee nye “woana woadzɔ,” “woazu (woava nɔ anyi)” la me. Eyata woɖe mo·no·ge·nesʹ gɔme be: “Vi ɖeka si wodzi, tenuvi, eyae nye vi ɖeka kolia.”—A Greek and English Lexicon of the New Testament, si E. Robinson ŋlɔ.

Theological Dictionary of the New Testament si me Gerhard Kittel to la gblɔ be: “[Mo·no·ge·nesʹ] gɔmee nye ‘ame ɖeka kolia si wodzi,’ eyae nye amesi si nɔviŋutsu alo nɔvinyɔnu mele o.” Agbalẽ sia hã gblɔ be le Yohanes 1:18; 3:16, 18; kple Yohanes I, 4:9 me la, “menye ɖeko wotsɔ Yesu ƒe ƒomedodo la sɔ kple esi le tenuvi kple fofoa dome tɔ ko o. Ƒomedodo si le tenuvi kple Fofo la domee wònye.”

Eyata gɔmedzedze li na Yesu, Tenuvi la, ƒe agbe. Eye woate ŋu ayɔ Mawu Ŋusẽkatãtɔ la be Edzila, alo Fofoa, le gɔmesese ma ke si nu anyigbadzifofo, abe Abraham ene, dzia vi le la nu. (Hebritɔwo 11:17) Eyata esi Biblia yɔ Mawu be enye Yesu “Fofo” la, nya la ŋutɔŋutɔ gblɔm wòle—be ame vovovo evee wonye. Mawue nye tsitsitɔ. Yesue nye ɖevitɔ—le ɣeyiɣi, nɔƒe, ŋusẽ, kple sidzedze gome.

Ne èbu eŋu be menye Yesu koe nye gbɔgbɔmevi si Mawu wɔ le dziƒo o la, nusitae wozã nya “Tenuvi” le egome la me akɔ na wò ƒã. Woyɔ mawudɔla siwo nye gbɔgbɔmeme akpeakpe gbogbo siwo Mawu wɔ la hã be “Mawu ƒe viwo,” le gɔmesese ma ke si nu Adam nye Mawu ƒe vi le la nu, elabena woƒe agbeŋusẽ dzɔ tso Yehowa Mawu, si nye Agbevudo alo Agbedzɔƒe la gbɔ. (Hiob 38:7; Psalmo 36:10; Luka 3:38) Gake wowɔ amesiawo katã to “Tenuvi” la, si nye amesi ko Mawu na wòdzɔ tẽ la dzi.—Kolosetɔwo 1:15-17.

Ðe Wobu Yesu be Enye Mawua?

TOGBƆ be woyɔ Yesu le Biblia me zi geɖe be Mawu ƒe Vi hã la, ame aɖeke mesusui kpɔ le ƒe alafa gbãtɔ me be enye Mawu Vi la o. Gbɔgbɔ vɔ̃ siwo ‘xɔnɛ sena be Mawu ɖekae li’ gɔ̃ hã nya le sidzedze si su wo si le gbɔgbɔmenutome nɔnɔ me be Yesu menye Mawu o. Eyata woyɔ Yesu wòsɔ ɖe edzi nyuie be “Mawuvi.” (Yakobo 2:19; Mateo 8:29) Eye esime Yesu ku la, Roma-srafo trɔ̃subɔla siwo nɔ afima la nya nyuie be nusi yewose tso eyomedzelawo nu la nye nyateƒe be “Mawuvie nye esia” ke menye be Yesu nye Mawu o.—Mateo 27:54.

Eyata nyagbɔgblɔ “Mawuvi” la fia Yesu abe amesi wòwɔ wòle vovo ene, ke menye abe Mawuɖekaetɔ̃ ƒe akpa aɖe ene o. Esi wònye Mawuvi ta la, magate ŋu anye Mawu ŋutɔ o, elabena Yohanes 1:18 gblɔ be: “Ame aɖeke mekpɔ Mawu ɣeaɖekeɣi kpɔ o.”—RS, Katolikotɔwo ƒe gɔmeɖeɖe.

Nusrɔ̃lawo bu Yesu be enye “avuléla ɖeka, si le Mawu kple amewo dome,” ke menye abe Mawu ŋutɔ ene o. (Timoteo I, 2:5) Esi wònye be le avuléla ƒe gɔmeɖeɖe nu la, enye amesi le vovo na amesiwo hiã avuléle la ta la, anye nusi tsi tre ɖe eɖokui ŋu be Yesu nanye akpa evea siwo dome wòle agbagba dzem be yealé avu le la ƒe akpa aɖe. Ema anye gbɔgblɔ be yenye nusi menye o.

Biblia la ƒe nya me kɔ eye wòto mɔ ɖeka le nu ƒoƒo tso ƒomedodo si le Mawu kple Yesu dome la ŋu me. Yehowa Mawu koe nye Ŋusẽkatãtɔ. Eyae wɔ Yesu tẽ le eƒe anyinɔnɔ do ŋgɔ na eƒe amegbetɔzuzu me. Eyata gɔmedzedze li na Yesu eye mate ŋu asɔ kple Mawu le ŋusẽ alo mavɔmavɔtɔnyenye me gbeɖe o.

[Etenuŋɔŋlɔ]

[Nya si ɖe dzesi si le axa 14]

Yesu le nɔƒe evelia le ɣeyiɣi, ŋusẽ, kple sidzedze gome elabena Mawue wɔe

[Nɔnɔmetata si le axa 15]

Yesu gblɔ be yenɔ anyi do ŋgɔ na yeƒe amegbetɔzuzu, elabena Mawu wɔ ye yenye Mawu ƒe nuwɔwɔ makpɔmakpɔwo ƒe gɔmedzedze