Nukata Ɣeyiɣia Le Kpuie Alea?

ƔEYIƔI. Asesẽ na mí be míaɖe nya sia gɔme tututu, gake enye nyateƒe be edze abe ɣeyiɣi mele mía sum o ene. Míenya hã be, eva yina kabakaba. Le nyateƒe me la, míefaa konyi edziedzi be, “Ɣeyiɣia le du dzi ŋutɔ.”

Ke hã, edze ƒã be Eŋlisi hakpanyaŋlɔla Austin Dobson gogo nyateƒea kloe esi wògblɔ le ƒe 1877 me be: “Ðe nèbe ɣeyiɣi le yiyima? Gbeɖegbeɖe! Kpɔ ɖa, Ɣeyiɣi anɔ anyi eye míadzo le egbɔ.” Tso esime Dobson ku le ƒe 1921 me la, ƒe 80 kloe enye esia va yi; ɣeyiɣi kpɔtɔ li.

Ɣeyiɣi Li Fũ

Biblia gblɔ le ameƒomea Wɔla ŋu na mí be: “Hafi towo nava do, eye anyigba kple xexeme nadzɔ la, wòe nye Mawu tso mavɔ me yi mavɔ me.” (Psalmo 90:2) Alo abe alesi The New Jerusalem Bible ɖe egɔmee ene la, “wòe nye Mawu tegbetegbe.” Eyata ɣeyiɣi anɔ anyi ɖaa abe alesi Mawu ŋutɔ hã lii ene—tegbee!

To vovo sã na Mawu, amesi si ɣeyiɣi mavɔmavɔwo le la, míexlẽ le amegbetɔwo ŋu be: “Elabena míaƒe ŋkekewo katã nu yi le wò dziku la nu, míaƒe ƒewo vɔ ɖe mí abe ame ƒe ŋeŋe ene. Míaƒe agbenɔƒewo nye ƒe blaadre, ne ede ƒã la, ƒe blanyi, eye fuɖename kple hiã nye wo adegbeƒonu; elabena wova yi kabakaba, eye míedzo.”—Psalmo 90:9, 10.

Nukatae agbe si li egbea le kpuie alea gbegbe, evɔ Biblia fia nu eme kɔ nyuie be Mawu ƒe tameɖoɖoe nye be amegbetɔwo nanɔ agbe tegbee? (Mose I, 1:27, 28; Psalmo 37:29) Le esi teƒe be amegbetɔwo nanɔ agbe si seɖoƒe meli na o abe alesi Mawu ɖo tamee ene la, nukatae le mama dedie nu la ŋkeke siwo me nu dea ame dzi wu le agbe me mede ŋkeke 30,000 o ɖo? Nukatae ɣeyiɣi mele amegbetɔwo sum kura o? Ameka alo nuka gbɔe nɔnɔme wɔnublanui sia tso? Biblia ɖo nyabiabia siawo ŋu wome kɔ nyuie.a

Ɣeyiɣia Dzi Kpɔtɔ Le Ðeɖem

Ame tsitsiwo aɖo kpe edzi be le ƒe siawo me la, ɣeyiɣiawo le du dzi ale gbegbe. Nyadzɔdzɔŋlɔla aɖe si ŋkɔe nye Dk. Sybille Fritsch ɖee fia be le ƒe 200 siwo va yi me la, gaƒoƒo si wowɔa dɔ le kwasiɖaa me dzi ɖe kpɔtɔ tso gaƒoƒo 80 va ɖo 38, “gake míekpɔtɔ le konyi fam kokoko be ɣeyiɣi mele mía sum o.” Eɖe eme be míegblɔna be: “Ɣeyiɣi meli o; ɣeyiɣie nye ga; ɣeyiɣi mele ame sum o abe alesi gbɔgbɔ mesua amee o ene; vovo aɖeke mele agbe sia me o.”

Nu yeye siwo wɔm wole na mɔnukpɔkpɔ geɖe ʋu eye amewo ate ŋu awɔ nu geɖe siwo dzidzime siwo do ŋgɔ meku drɔ̃e gɔ̃ hã le wo ŋu o. Gake zi alesi mɔnukpɔkpɔ geɖe li míate ŋu awɔ dɔ geɖe la, zi nenemae dzi le ɖeɖem le mía ƒo be ɣeyiɣi si míatsɔ awɔ woe mele mía sum o. Le ŋkeke siawo me le xexeame ƒe akpa geɖe la, amewo ɖo game ɖe nusianu ŋu eye wotsia dzi be yewoawu ɖesiaɖe nu ɖe gamea dzi. Ele be Papa nayi dɔme ŋdi ga 7:00, ele be Dada nakplɔ ɖeviawo ayi sukui le ŋdi ga 8:30 me, Tɔgbui ayi aɖakpɔ ɖɔkta le ŋdi ga 9:40 me, eye ele be mí katã míanɔ klalo hena kpekpe vevi aɖe wɔwɔ le fiẽ ga 7:30 me. Esi míetsi dzi be míawu nanewo nu ahadze bubu gɔme ta la, ɣeyiɣi gobii aɖeke mekpɔtɔ na ɖiɖiɖeme aɖeke o. Eye míefaa konyi le dɔ ɖeka ŋugbe wɔwɔ gbesiagbe si tea ɖeɖi ame ŋu hetia ame la ŋu.

Menye Míawo Ðeɖekoe Ɣeyiɣia Mele Susum O

Mawu ƒe Futɔ, Satana Abosam, amesi ƒe nugbeɖoɖowo na be ameƒomea ƒe agbenɔƒe dzi tso la ŋutɔ ƒe vɔ̃ɖinyenye me tsonuwo le eya ŋutɔ dzi vam fifia. (Tsɔe sɔ kple Galatiatɔwo 6:7, 8.) Esi Nyaɖeɖefia 12:12 nɔ nu ƒom tso Mesia Fiaɖuƒe si wodzi le dziƒo ŋu la, egblɔ nusita wòle be mɔkpɔkpɔ nanɔ mía si esi wògblɔ be: “Eyata dzi nedzɔ mi, mi dziƒowo kple amesiwo nɔ wo me la! Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.”—Míawoe te gbe ɖe edzi.

Le Biblia ƒe ɣeyiɣikɔntabubu si dzi míate ŋu aka ɖo kple Biblia ƒe nyagblɔɖiwo ƒe emevava nu la, míele “vovoɣi vi” ma ƒe nuwuɣi me fifia. Dzidzɔ kae nye si wònye be míanya be eteƒe madidi o Satana ƒe ɣeyiɣia avɔ keŋkeŋ! Ne woɖee ɖa ko la, amegbetɔ toɖolawo agaɖo blibodede gbɔ, eye agbe mavɔ si ƒe tame Yehowa ɖo na wo le gɔmedzedzea me la ate ŋu asu wo si. (Nyaɖeɖefia 21:1-4) Ɣeyiɣi ƒe anyimanɔmanɔ maganye kuxi azɔ o.

Àte ŋu akpɔ alesi agbe mavɔ nɔnɔ—nusi wòafia be woanɔ agbe tegbee la le susu me ɖa? Magadzɔ akpɔ be nuwo atsi ŋuwò si makpɔ ɣeyiɣi awɔ o. Ne èhiã ɣeyiɣi geɖe la, etsɔ, alo kwasiɖa si gbɔna, alo ƒe si gbɔna—le nyateƒe me la, ɣeyiɣi gbogbo aɖe li na wò!

Ɣeyiɣi si Le Mía Si Fifia Ŋudɔwɔwɔ Nunyatɔe

Esi Satana nyae be ɣeyiɣi si le ye si yeatsɔ akpɔ ŋusẽ ɖe amegbetɔwo dzii mesɔ gbɔ o ta la, edzea agbagba be yeade dɔ geɖe asi na amewo ale gbegbe be ɣeyiɣi aɖeke naganɔ wo si ɖe Mawu ƒe Fiaɖuƒe si woɖo anyi la ŋuti nyanyui la sese ŋu o. Eyata anyo be míawɔ ɖe aɖaŋu si Mawu ɖo la dzi be: “Mikpɔ nyuie be, miazɔ pɛpɛpɛ; menye abe numanyamanyatɔwo ene o, ke boŋ abe nunyalawo ene, amesiwo wɔa ɣeyiɣi la ŋuti dɔ blibo; elabena ŋkekeawo nye vɔ̃. Eyaŋuti la migazu bometsilawo o, ke boŋ midze si nusi nye Aƒetɔ la ƒe lɔlɔ̃nu.”—Efesotɔwo 5:15-17.

Aleke wòle vevie enye si be míawɔ míaƒe ɣeyiɣi ŋudɔ nyuie atsɔ awɔ nusiwo le vevie wu boŋ tsɔ wu be míagblẽ wo ɖe numaɖinu siwo meɖea vi na mí ɖaa o ŋu! Ele be míana nɔnɔme si nɔ Mose si nanɔ míawo hã si esi wòƒo koko na Yehowa tso dzi me le nya siawo me be: “Fia alesi míaxlẽ míaƒe ŋkekewoe la mí, ne dzi nyanu naɖo mía si!”—Psalmo 90:12.

Nyateƒee wònye be vovo mele ame aɖeke ŋu le xexeame egbea o. Ke hã Yehowa Ðasefowo le nu xlɔ̃m wò vevie be nàzã ɣeyiɣi sue si le asiwò ƒe ɖe atsɔ asrɔ̃ nu tso nusiwo dim Mawu le hena agbe mavɔ kpɔkpɔ le eƒe Fiaɖuƒea ƒe dziɖuɖua te la ŋu. Gaƒoƒo ɖeka si nàzã kwasiɖa ɖesiaɖe asrɔ̃ Biblia ɖe ɖoɖo nu be ‘nàdze si nusi nye Yehowa ƒe lɔlɔ̃nu’ ate ŋu akpe ɖe ŋuwò be wò ŋutɔ nàkpɔ nya siawo ƒe emevava be: “Tsri vɔ̃, eye nawɔ nyui, ekema ànɔ anyi tegbee. Ame dzɔdzɔewo anyi anyigba la dome, eye woanɔ edzi tegbee.”—Psalmo 37:27, 29.

[Etenuŋɔŋlɔ]