Ta 36
Wowɔ Dugã la Aƒedoe
Ŋutega—Nyaɖeɖefia 18:1–19:10
Nyati: Babilon Gã la ƒe anyidzedze kple eƒe tsɔtsrɔ̃; woɖe gbe ƒã Alẽvi la ƒe srɔ̃ɖeɖe
Emevaɣi: Tso ƒe 1919 me vaseɖe xaxa gã la megbe
1. Nukae ade dzesi xaxa gã la ƒe gɔmedzedze?
NULILIAME, nya dovoɖiname, gbegblẽ—nenemae Babilon Gã la ƒe tsɔtsrɔ̃ anɔ! Anye afɔku vɔ̃ɖitɔ kekeakewo dometɔ ɖeka le ŋutinya katã me, eye ade dzesi “xaxa gã . . . [si meva kpɔ] tso xexeame ƒe gɔmedzedze vaseɖe egbegbe o, eye megale vava ge akpɔ o” la ƒe gɔmedzedze.—Mateo 24:21.
2. Togbɔ be woɖo dunyahefiaɖuƒewo anyi eye wodze anyi hã la, fiaɖuƒe ka tɔgbee gakpɔtɔ li?
2 Ɣeyiɣi didi aɖee nye esia si alakpasubɔsubɔha li. Eyi edzi nɔ anyi, eye naneke mexe mɔ nɛ o tso Nimrod si lɔ̃a ʋukɔkɔɖi, amesi tsi tre ɖe Yehowa ŋu eye wòna wodze Babel-mɔ̃ tutu gɔme la ƒe ŋkekeawo me ke. Esi Yehowa tɔtɔ aglãdzela mawo ƒe gbe eye wòkaka wo ɖe anyigba katã dzi la, wotsɔ Babilon ƒe alakpasubɔsubɔha la ɖe asi dzoe. (Mose I, 10:8-10; 11:4-9) Tso ɣemaɣi me ke la, woɖo dunyahefiaɖuƒe gãwo anyi eye wo nu yi, gake Babilon ƒe subɔsubɔha ya gakpɔtɔ li. Etrɔ ɖe dzedzeme kple nɔnɔme vovovowo me eye wòva zu alakpasubɔsubɔ ƒe xexemefiaɖuƒe si nye Babilon Gã si ƒe nya wogblɔ ɖi la. Eƒe akpa si ɖe dzesi wue nye Kristodukɔa, si dzɔ tso blema Babilon kple “Kristotɔ” xɔsegbelawo ƒe nufiafiawo me. Le alesi Babilon Gã la li tso keke blemablema ke ta la, esesẽna na ame geɖe be woaxɔ edzi ase be woava tsrɔ̃e gbeɖeka.
3. Aleke Nyaɖeɖefia ɖo kpe alakpasubɔsubɔha ƒe anyidzedze dzie?
3 Eyata enye nusi sɔ be Nyaɖeɖefia natsɔ numeɖeɖe tsitotsito eve siwo ƒo nu tso alakpasubɔsubɔha ƒe anyidzedze kple nudzɔdzɔ siwo akplɔe ayi eƒe aƒedozuzu keŋkeŋ mee ŋuti la atsɔ aɖo kpe esia dzie. Míekpɔe dze sii xoxo be eyae nye “gbolo gã” la si eƒe ahiãvi xoxo siwo nye dunyahelawo awɔ aƒedoe mlɔeba. (Nyaɖeɖefia 17:1, 15, 16) Ke míele ekpɔ ge azɔ le ŋutega bubu me abe dugã aɖe si nye subɔsubɔha ƒe nuɖoanyi si ɖi blema Babilon la ene.
Babilon Gã la Ðe Goglomi
4. (a) Ŋutega kae Yohanes gakpɔ? (b) Aleke míawɔ adze si mawudɔla la, eye nukatae wòsɔ be wòaɖe gbe ƒã Babilon Gã la ƒe anyidzedze?
4 Yohanes yi nya la dzi hegblɔ na mí be: “Eye nusiawo megbe la mekpɔ mawudɔla bubu aɖe le ɖiɖim tso dziƒo, eye ŋusẽ gã le esi, eye eƒe ŋutikɔkɔe klẽ ɖe anyigba dzi. Eye wòdo ɣli kple gbe sesẽ le gbɔgblɔm bena: Emu, Babilon gã la mu!” (Nyaɖeɖefia 18:1, 2a) Esiae nye zi evelia si Yohanes le mawudɔla la ƒe gbeƒãɖeɖe ma sem. (Kpɔ Nyaɖeɖefia 14:8.) Gake azɔ ya la, mawudɔla la ƒe atsyɔ̃ɖoɖo te gbe ɖe alesi nusia dzi ŋɔe la dzi elabena eƒe ŋutikɔkɔe klẽ ɖe anyigba la katã dzi! Amekae anye ema? Ƒe alafa geɖe do ŋgɔ la, esi nyagblɔɖila Xezekiel nɔ nya ta kam tso dziƒoŋutega aɖe ŋu la, egblɔ be: “[Yehowa] ƒe ŋutikɔkɔe na anyigba le keklẽm.” (Xezekiel 43:2) Mawudɔla ɖeka ko si ƒe ŋutikɔkɔe ƒe keklẽ ate ŋu asɔ kple Yehowa tɔe nye Aƒetɔ Yesu, amesi nye “[Mawu ƒe] ŋutikɔkɔe ƒe keklẽ kple eƒe mawunyenye ƒe nɔnɔme.” (Hebritɔwo 1:3) Le ƒe 1914 me la, Yesu va zu Fia le dziƒo, eye tso ɣemaɣi la, ele eƒe dziɖuŋusẽ zãm ɖe anyigba la dzi abe Dziɖula kple Ʋɔnudrɔ̃la ene kpe ɖe Yehowa ŋu. Eyata esɔ be eya naɖe gbeƒã Babilon Gã la ƒe anyidzedze.
5. (a) Amekae mawudɔla la zã tsɔ ɖe gbe ƒã Babilon Gã la ƒe anyidzedzea? (b) Esi ʋɔnudɔdrɔ̃ dze egɔme ɖe amesiwo gblɔna be ‘Mawu ƒe aƒemetɔwoe’ yewonye dzi la, aleke wònɔ na Kristodukɔa?
5 Amekae mawudɔla sia si si ŋusẽ geɖe le la zã tsɔ le gbe ƒã ɖem nudzɔdzɔ wɔnuku siawo na ameƒomea? Ehẽ, amesiwo woɖe gae le anyidzedze ma me, amesiamina susɔeawo, amesiwo nye Yohanes ƒe ha la me tɔwo kee. Tso ƒe 1914 vaseɖe 1918 me la, amesiawo kpe fu geɖe le Babilon Gã la si me, gake le ƒe 1918 me la, Aƒetɔ Yehowa kple eƒe “[Abraham ƒe] nubabla ƒe dɔla,” Yesu Kristo dze ʋɔnu dɔdrɔ̃ “Mawu ƒe aƒe” la si nye amesiwo gblɔna be Kristotɔwoe yewonye la gɔme. Eyata wohe Kristotɔ xɔsegbelawo va ʋɔnui. (Maleaxi 3:1; Petro I, 4:17) Ʋufɔ gã si wòɖi le xexemeʋa gbãtɔ me, gome si wòkpɔ le Yehowa ƒe ɖasefo ɖianukwarewo yome titi me, kple eƒe Babilon dzixɔsewo mede edzi le ʋɔnudrɔ̃ɣia o; nenema kee Mawu mekpɔ ŋudzedze ɖe Babilon Gã la ƒe akpa aɖeke hã ŋu o.—Tsɔe sɔ kple Yesaya 31:1-9.
6. Nukatae míate ŋu agblɔe be Babilon Gã la dze anyi le ƒe 1919 me?
6 Eyata Babilon Gã la dze anyi le ƒe 1919 me, eye mɔ ʋu na Mawu ƒe amewo be woaɖe ga wo eye woagbugbɔ wo aɖo anyi ake ɖe woƒe anyigba si nye gbɔgbɔ me dzidzedzekpɔkpɔ me; esiawo katã yi edzi abe ŋkeke ɖeka dzie wòdzɔ ene. (Yesaya 66:8) Le ƒe ma me la, Yehowa Mawu kple Yesu Kristo, Dario Gãtɔ kple Kores Gãtɔ de asi nyawo me be subɔsubɔha megate ŋu kpɔ ŋusẽ ɖe Yehowa ƒe amewo dzi azɔ o. Magate ŋu akpɔ ŋusẽ ɖe wo dzi azɔ be wòaxe mɔ na woƒe Yehowa subɔsubɔ kple alesi woana amesiwo katã asee la nanya be Babilon Gã si nye gbolo la dze anyi eye Yehowa ƒe fianyenye taʋiʋli tu aƒe o!—Yesaya 45:1-4; Daniel 5:30; 6:1 .
7. (a) Togbɔ be wometsrɔ̃ Babilon Gã la le ƒe 1919 me o hã la, aleke Yehowa bui? (b) Esi Babilon Gã la dze anyi le ƒe 1919 me la, nukae do tso eme na Yehowa ƒe amewo?
7 Nyateƒee, wometsrɔ̃ Babilon Gã la le ƒe 1919 me o—abe alesi wometsrɔ̃ blema Babilon-dua le ƒe 539 D.M.Ŋ. me esime Kores, Persiatɔ la ƒe aʋakɔ ɖu edzi o ene. Gake le Yehowa ƒe nukpɔsusu nu la, habɔbɔ ma dze anyi. Wodrɔ̃ fɔbuʋɔnui eye wòle tsɔtsrɔ̃ lalam; eyata alakpasubɔsubɔha magate ŋu alé Yehowa ƒe amewo ɖe kluvinyenye me azɔ o. (Tsɔe sɔ kple Luka 9:59, 60.) Wotu ka amesiawo be woasubɔ abe Aƒetɔ la ƒe dɔla nuteƒewɔla kple aɖaŋudzela ene be woana gbɔgbɔmenuɖuɖu le ɣeyiɣi nyuitɔ dzi. Wotso afia na wo be ‘Wowɔe nyuie’ eye wode dɔ asi na wo be woagado vevie nu ake le Yehowa ƒe dɔa me.—Mateo 24:45-47; 25:21, 23; Dɔwɔwɔwo 1:8.
8. Nudzɔdzɔ kae gbetakpɔla si ŋu woƒo nu le le Yesaya 21:8, 9 me la ɖe gbe ƒãe, eye nukae gbetakpɔla ma nye vɔvɔli na egbea?
8 Ƒe akpe geɖewo do ŋgɔ la, Yehowa zã nyagblɔɖila bubuwo be woagblɔ nudzɔdzɔ ɖedzesi sia ɖi. Yesaya ƒo nu tso gbetakpɔla aɖe si ‘ɖe gbe abe dzata ene be: Oo, Yehowa, metsi tre ɖe nye dzɔƒe la ɖaa le ŋkeke me, eye metsi dzɔƒe la le zã blibo la me’ la ŋu. Eye nudzɔdzɔ kae gbetakpɔla ma kpɔ dze sii eye wòtsɔ dzideƒo si le abe dzata tɔ ene ɖe gbe ƒãe? Eyae nye si be: “Babel [Babilon] mũ, emũ, eye [Yehowa gbã] eƒe legbawo katã ƒu anyi”! (Yesaya 21:8, 9) Gbetakpɔla sia nye kpɔɖeŋu si sɔ nyuie kple Yohanes habɔbɔ la egbea, esime wòzãa Gbetakpɔxɔ magazine la kple teokrasigbalẽ bubuwo tsɔ ɖea gbe ƒã nya sia be Babilon Gã la dze anyi.
Babilon Gã la ƒe Toyiyi
9, 10. (a) Aleke Babilon ƒe subɔsubɔha ƒe ŋusẽkpɔɖeamedzi yi toe tso Xexemeʋa I dzi? (b) Aleke mawudɔla sesẽ la ƒo nu tso nɔnɔme si me Babilon Gã la le ŋue?
9 Blema Babilon la ƒe anyidzedze le ƒe 539 D.M.Ŋ. nye toyiyi aɖe si nɔ anyi ɣeyiɣi didi aɖe si va wu enu ɖe eƒe aƒedozuzu me la ƒe gɔmedzedze. Nenema ke tso xexemeʋa gbãtɔ dzi la, Babilon subɔsubɔha yi to vevie le xexeame katã. Woxe mɔ ɖe tadedeagu na Shinto fiagã la nu le Japan le xexemeʋa evelia megbe. Kɔmiunist-dziɖuɖua ye kpɔa ŋusẽ ɖe subɔsubɔha ƒe ametiatia kple dɔ siwo woawɔ la dzi le China. Le Europa ƒe anyiehe si Protestanttɔwo bɔ ɖo la, ame geɖe megatsɔ ɖeke le mawusubɔsubɔ me o. Eye mama kple dzrehehe siwo le Roma Katoliko-ha la me la gbɔdzɔ eƒe ŋusẽkpɔɖedzi nyitsɔ laa le afisiwo nye eƒe dziɖuƒe le xexeame katã.—Tsɔe sɔ kple Marko 3:24-26.
10 Ðikekemanɔmee la, nusiawo katã nye ‘Frat-tɔsisia ƒe miemie’ hena asrafowo ƒe Babilon Gã la dzi dzedze si gbɔna. ‘Tsia ƒe miemie’ sia dze le gbe ƒã si papa ɖe le October 1986 me la me be sɔlemeha la “agazu nubiala ake”—le fe gbogbo si wònyi la ta. (Nyaɖeɖefia 16:12) Vevietɔ tso ƒe 1919 me la, woklo nu le Babilon Gã la dzi be amehawo nakpɔ be enye gbɔgbɔ me gbegbe, abe alesi tututu mawudɔla la ɖe gbe ƒãe le afisia ene be: “Eye wòtrɔ zu gbɔgbɔ vɔ̃wo ƒe nɔƒe kple gbɔgbɔ makɔmakɔwo katã ƒe gaxɔ kple xevi makɔmakɔ, siwo katã wotsri la, ƒe xadza”! (Nyaɖeɖefia 18:2b) Esusɔ vie ko wòazu gbegbe ŋutɔŋutɔ, abe alesi Babilon ƒe gli gbagbãwo le le Irak egbea ene.—Kpɔ Yeremya 50:25-28 hã.
11. Gɔmesese ka nue Babilon Gã la zu “gbɔgbɔ vɔ̃wo ƒe nɔƒe” kple ‘gbɔgbɔ makɔmakɔwo kple xevi makɔmakɔwo ƒe xadza’ le?
11 Anɔ eme be nyagbɔgblɔ “gbɔgbɔ vɔ̃wo” si wozã le afisia la nye nya si ku ɖe “gbɔgbɔ vɔ̃ siwo le abe gbɔ̃ ene” (se‘i·rimʹ) si dze le Babilon si dze anyi la ɖɔɖɔ me la ŋu be: “Gbemelãwo atsyɔ akɔ ɖe afima, eye favieʋutowo ayɔ woƒe xɔwo me, golowo atso aƒe ɖe afima, eye azizãwo [gbɔgbɔ vɔ̃ siwo le abe gbɔ̃ ene, NW] aɖi adzrɔ le afima.” (Yesaya 13:21) Manye gbɔgbɔ vɔ̃wo ŋutɔŋutɔ ŋue wole nu ƒom le o ke boŋ lã siwo nɔa gbegbe siwo ƒe fu le kedzekedze siwo ƒe dzedzeme nana wo kpɔlawo ƒe susu yia gbɔgbɔ vɔ̃wo dzi la boŋ ye. Lã mawo kpakple aɖiya ʋeʋẽ (“gbɔgbɔ makɔmakɔwo”) kple xevi makɔmakɔ siwo le Babilon Gã la ƒe aƒedo me le kpɔɖeŋunyagbɔgblɔ me la fia alesi wòku le gbɔgbɔ mee. Agbetsitsi ƒe mɔkpɔkpɔ aɖeke kura mele esi na ameƒomea o.—Tsɔe sɔ kple Efesotɔwo 2:1, 2.
12. Aleke Babilon Gã la ƒe nɔnɔme sɔ kple Yeremya ƒe nyagblɔɖi si le ta 50 mee?
12 Eƒe nɔnɔme sɔ kple nusi Yeremya ƒe nyagblɔɖia gblɔ la be: “Yehowa be, yi neva Kaldeatɔwo, Babeltɔwo kple woƒe amegãwo kple woƒe nunyalawo dzi! . . . Kuɖiɖi neva na woƒe tsiwo, ne woamie! Elabena legbawo ƒe anyigba wonye, eye wotsɔ ŋɔdzinuwo le adegbe ƒomee. Eyata gbedadiwo kple amegãxiwo atso aƒe ɖi, eye golowo anɔ afima; ame magatso aƒe ɖi akpɔ o, eye ame manɔ eme o, tso dzidzime yi dzidzime.” Trɔ̃subɔsubɔ kple gbedodoɖa mawo ke gbugbɔgagblɔ enuenu mate ŋu aɖe Babilon Gã la tso teƒeɖoɖo si ɖi alesi Mawu tsrɔ̃ Sodom kple Gomora la me o.—Yeremya 50:35-40.
Aha si Nyɔa Seselelãme ɖe Ame Me
13. (a) Aleke mawudɔla sesẽ la he susu yi alesi gbegbe Babilon Gã la ƒe gbolowɔwɔ keke tae la dzie? (b) Agbegbegblẽnɔnɔ kae xɔ aƒe ɖe blema Babilon esi le Babilon Gã la hã me?
13 Mawudɔla sesẽ la gahe míaƒe susu yi alesi gbegbe Babilon Gã la ƒe ahasiwɔwɔ keke tae la dzi eye wòɖe gbe ƒãe be: “Elabena dukɔwo katã no eƒe ahasiwɔwɔ ƒe dɔmedzoe ƒe aha la, eye anyigba dzi fiawo wɔ ahasi kplii, eye anyigba dzi sitsalawo trɔ zu kesinɔtɔwo le eƒe hadzedze vivivo ƒe ŋusẽ ŋuti.” (Nyaɖeɖefia 18:3) Etsɔ eƒe subɔsubɔha ƒe mɔ makɔmakɔwo mlã dukɔwo katãe. Le Helatɔwo ƒe ŋutinyaŋlɔla Herodotus ƒe nya nu la, wobia tso nyɔnuvi ɖesiaɖe si be wòatsɔ gbedoxɔ me gbolowɔwɔ agblẽ eƒe ɖetugbi nɔaƒe nyenye mee. Gbɔdɔdɔ ƒe agbegbegblẽnɔnɔ nyɔŋuwo ƒe nɔnɔmetatawo gale kpememe siwo ƒe akpa aɖewo ŋu wogblẽ nu le le aʋawɔwɔ me la dzi le Angkor-gbedoxɔ si le Kampuchea kple le gbedoxɔ siwo le Khajuraho, India la me, afisiwo wota Hindutɔwo ƒe mawu Vishnu ɖo gbɔdɔdɔnuwɔna nyɔŋuwo ƒo xlãe la me. Nu koklo le agbegbegblẽnɔnɔ dzi siwo ʋuʋu television dzi mawunyagblɔlawo le ƒe 1987 me, kple le ƒe 1988 me hã le United States kpakple alesi ŋutsu siwo dɔa wo nɔewo gbɔ la nye osɔfowo la ɖee fia be Kristodukɔa gɔ̃ hã ɖea mɔ ɖe matrewɔwɔ ŋutɔŋutɔ si nyɔ ŋu ƒe nuwɔna siwo gbɔ eme la ŋu. Gake dukɔwo katã kpɔ gome le matrewɔwɔ ƒomevi aɖe si vɔ̃ɖi kura wu la me.
14-16. (a) Gbɔgbɔ me kadodo manɔsenu si le dunyahehe kple subɔsubɔha me kae nɔ anyi esime Fasitɔwo nɔ Italia dzi ɖum? (b) Esime Italia dze Abyssinia dzi la, nya kawoe Katoliko-bisiɔpwo gblɔ?
14 Míedzro subɔsubɔha kple dunyahehe dome kadodo manɔsenu si ɖo Hitler zi dzi esime Nazitɔwo nɔ Germania dzi ɖum la me xoxo. Fu wɔ dukɔ bubuwo hã le subɔsubɔha ƒe eɖokui ƒoƒo ɖe xexeamenyawo me ta. Le kpɔɖeŋu me: Esime Fasitɔwo nɔ Italia dzi ɖum la, le February 11, 1929 me la, Mussolini kple Papatenɔla Gasparri de asi Lateran Nubabla la te eye esia na Vatikan-dua zu du si le eɖokui si. Papa Pius XI gblɔ be “[yegbugbɔ] Italia de Mawu si, eye yegbugbɔ Mawu de Italia si.” Nyateƒee wòtoa? Kpɔ nusi dzɔ le ƒe ade megbe la ɖa. Le October 3, 1935 dzi la, Italia dze Abyssinia dzi eye wògblɔ be enye “dukɔ sẽŋuta si me kluvinyenye gale edzi yim le kokoko.” Gake le nyateƒe me la, amekae nɔ ŋutasẽnu wɔm? Ðe Katolikoha la bu fɔ Mussolini ƒe ŋutasẽnuwɔwɔwoa? Le esime papa la gblɔ nya siwo ate ŋu afia nusi alo nu kemɛ la, eƒe bisiɔpwo ƒe gbe de dzi bobobo le wo “denyigba,” Italia ƒe aʋawɔsrafowo yayra me. Anthony Rhodes ka nya ta le agbalẽ si nye The Vatican in the Age of the Dictators me be:
15 “Le Udine (Italia) ƒe Bisiɔp ƒe Lɛta si wòŋlɔ ɖo ɖe sɔlemewo le October 19, [1935] dzi me la, eŋlɔ bena: ‘Mesɔ ɖe ɣeyiɣia dzi be míaƒo nu tso nya la ŋu be mía tɔ dzɔ alo mía tɔ medzɔ o eye mesɔ na mí hã be míawɔ ema o. Míaƒe dɔdasi abe Italiatɔwo, eye vevietɔ, abe Kristotɔwo ene enye be míawɔ mía tɔ sinu be míaƒe aʋawɔnuwo naɖu dzi.’ Padua ƒe Bisiɔp ŋlɔ le October 21 lia dzi be: ‘Le xaxaɣi siwo me tom míele me la, míele biabiam tso mia si be miaɖo dzi ɖe míaƒe dumegãwo kple asrafowo ŋu.’ Le October 24 lia dzi la, Kremona Bisiɔp kɔ asrafowo ƒe aflaga geɖe ŋu eye wògblɔ be: ‘Mawu ƒe yayra nenɔ asrafo siawo, siwo axɔ anyigba wɔnu yeyewo le Afrika-nyigba dzi hena Italia-ŋkutatɔ la dzi, be woatsɔ Romatɔwo kple Kristotɔwo ƒe ŋkuʋuʋu ayi wo gbɔe. Italia ƒe afɔ negali ke ake abe amesi ɖu aƒetɔ ɖe Kristotɔnyenye dzi le xexeame katã ene.’”
16 Woha Abyssinia eye Roma Katoliko-nunɔlawo ƒe yayra nɔ megbe na esia wɔwɔ. Ðe amesiawo dometɔ aɖe ate ŋu agblɔ le mɔ aɖe nu abe apostolo Paulo ene be, ye ‘ŋuti kɔ tso amewo katã ƒe ʋu mea’?—Dɔwɔwɔwo 20:26.
17. Aleke Spania kpe fui le esi eƒe nunɔlawo do kpo ‘woƒe yiwo tsɔtsɔ atu kodziwoe’ ta?
17 Tsɔ Spania—dukɔ bubu si hã Babilon Gã la lé de eƒe matrewɔwɔa me—kpe ɖe Germania, Italia kple Abyssinia ŋu. Nusi he Dukɔmeviʋa si wowɔ le ƒe 1936-39 le anyigba ma dzi vɛ la ƒe akpa aɖe tso afɔ si amehawo ƒe dziɖuɖu si le afima ɖe be yeatsɔ aɖiɖi Roma Katoliko-ha la ƒe ŋusẽkpɔɖedzi gã lae gbɔ. Esi aʋa la nɔ edzi yim la, Franko, Katoliko Fasi ƒe tɔtrɔwo ŋgɔnɔla yɔ eɖokui be yenye “Atitsogaʋa Kɔkɔe la ƒe Aʋafiagã Kristotɔ;” emegbe egblɔ be yegbe ŋkɔ ma. Spaniatɔ akpe alafa geɖe tsrɔ̃ le aʋa la me. Le esia megbe la, le akɔntabubu si me woɖiɖi xexlẽmea ɖe anyi ŋutɔ le me nu la, Franco ƒe amewo wu dunyahehabɔbɔ si nye Popular Front me tɔ 40,000, eye dunyahehabɔbɔ sia me tɔwo hã wu subɔsubɔhaŋgɔnɔla 8,000 siwo nye saɖagaxɔmenɔlawo, nunɔlawo, nyɔnu nunɔlawo, kple amesiwo woxɔ yeyee ɖe nunɔlawo ƒe suku la. Ŋɔdzi kple afɔku mawoe dukɔmeviʋa la he vɛ eye esia na nunya si le Yesu ƒe nyawo me dze ƒã be: “Gbugbɔ wò yi la ɖo eteƒe; elabena amesiwo katã dia yi la, yi kee woatsɔ awu woe.” (Mateo 26:52) Aleke gbegbe wònyɔ ŋui be Kristodukɔa naƒo eɖokui ɖe ʋukɔkɔɖi gbogbo sia gbegbe me! Nyateƒee, eƒe osɔfowo do kpo ‘woƒe yiwo tsɔtsɔ tu kodziwoe’ kura!—Yesaya 2:4.
Asitsala Mɔzɔlawo
18. Amekawoe nye ‘anyigba dzi sitsala mɔzɔlawo’?
18 Amekawoe nye ‘anyigba dzi sitsala mɔzɔlawo’? Ðikekemanɔmee la, míayɔ wo egbea be asitsalawo, adzɔ gã dolawo, adzɔ gã ƒe amegãwo. Esia mele fiafiam be enye nu gbegblẽ be woakpɔ gome le asitsatsa si le se nu la me o. Biblia ɖo aɖaŋu siwo me nunya le na asitsalawo eye wòxlɔ̃ nu tso anukwaremaɖimaɖi, ŋukeklẽ, kple esiawo tɔgbe ŋu. (Lododowo 11:1; Zaxarya 7:9, 10; Yakobo 5:1-5) Viɖenu si lolo wue nye “mawusosroɖa kpakple ŋudzedzekpɔkpɔ.” (Timoteo I, 6:6, 17-19) Gake Satana ƒe xexeame mewɔna ɖe gɔmeɖose dzɔdzɔewo dzi o. Nugbegblẽwɔwɔ bɔ. Woate ŋu akpɔe le subɔsubɔha me, le dunyahehe me—kple le asi gã tsatsa me. Zi geɖe la, wokloa nu le ŋukpenanuwɔwɔ siawo abe dziɖuɖumegãwo ƒe gaɖuɖu kple aʋawɔnuwo ƒe asitsatsa manɔsenu ene la dzi le nyadzɔdzɔwo me.
19. Nyateƒe si ku ɖe xexeame ƒe ganyawo ŋu kae kpe ɖe mía ŋu be míase nusitae wogblɔ nya vɔ̃ ɖe anyigba dzi sitsalawo ŋu le Nyaɖeɖefia me la gɔme?
19 Ga si dukɔwo zãna ɖe aʋawɔnuwo ŋu gbɔ dɔlar biliɔn 1,000 ŋu ƒe sia ƒe, le esime agbemenuhiahiãwo mele ame miliɔn alafa geɖewo si o. Ewɔ nublanui ŋutɔ. Gake ewɔ abe ɖe aʋawɔnuwo nye nu vevi si dzi wotu xexeame ƒe ganyawo ɖo ene. Le April 11, 1987 dzi la, nya aɖe si dze le London ƒe Spectator me gblɔ be: “Ne míaxlẽ dɔwɔƒe siwo wòdo ƒome kplii tẽ la, dɔ siwo de 400,000 ye de nu eme le United States eye abe dɔ 750,000 ene le Europa. Gake nusi wɔ nukue nye be esime akpa si kɔlili aʋawɔnuwo wɔna la kpɔ ŋgɔyiyi le hadomegbenɔnɔ kple ganyawo gome la, wotutu nya vevitɔ si nye be ɖe dukɔ siwo le wo wɔm la le dediea ya da ɖe megbe.” Wokpɔ viɖe geɖe le bɔmb kple aʋawɔnu bubuwo dzadzra me, na amesiwo ava nye futɔwo kekeake gɔ̃ hã, le xexeame katã. Gbeɖeka bɔmb mawo atrɔ ava wo dzralawo gbɔ le dzobibi ƒe nugbegblẽ gã aɖe me eye woatsrɔ̃ wo. Nusi tsi tre ɖe eɖokui ŋu kae nye si! Tsɔ zãnunana si bɔ ɖe aʋawɔnuwo ƒe asitsatsa me la hã kpe ɖe eŋu. Le United States ɖeɖe la, Spectator gblɔ be “aʋawɔnu kple dɔwɔnu siwo ƒe home de dɔlar miliɔn 900 la búna ƒe sia ƒe na Amerika-srafowo ƒe Dɔwɔƒegã la esi womenyana afisi woto o.” Eyata mewɔ nuku o be womeƒo nu nyui aɖeke tso anyigba dzi sitsalawo ŋu le Nyaɖeɖefia me o!
20. Kpɔɖeŋu kae ɖee fia be subɔsubɔhawo kpɔ gome le asitsatsa ƒe nuwɔna gbegblẽwo me?
20 Abe alesi ŋutikɔkɔe mawudɔla la gblɔe ɖi ene la, subɔsubɔhawo ƒo wo ɖokui ɖe asitsanuwɔna gbegblẽ mawo me. Le kpɔɖeŋu me, Vatikan ƒe asi nɔ Italia ƒe Ambrosiano Gadzraɖoƒea ƒe anyidzedze me le ƒe 1982 me. Wohe nya la le ƒe 1980 ƒe ƒeawo me eye nya si womekpɔ ŋuɖoɖo na o ye nye: Afikae ga la to? Le February 1987 me la, Milan ʋɔnudrɔ̃lawo ɖe gbe be woalé Vatikan-nunɔla etɔ̃ aɖewo siwo dome Amerika bisiɔpgã aɖe hã le ɖe nutsotso siawo ta be wokpɔ gome le nuvlowɔwɔ si he agbaɖuɖua vɛ me, gake Vatikan gbe be yemaɖe asi le wo ŋu woadrɔ̃ ʋɔnu wo o. Togbɔ be wotsi tre ɖe eŋu vevie ŋutɔ hã la, Italia Nyagbugbɔdrɔ̃ƒe gãtɔ te fli ɖe amelégbalẽa me le July 1987 me, le nubabla xoxo aɖe si le Vatikan kple Italia dunyahedziɖuɖua dome ta.
21. Aleke míewɔ nya be ƒomedodo aɖeke menɔ Yesu kple asitsatsa siwo ŋu nya ku ɖo le eƒe ŋkekea me la dome o, gake nukae míekpɔna le Babilon subɔsubɔhawo me egbea?
21 Ðe ƒomedodo aɖe nɔ Yesu kple asitsatsa manɔsenu si nɔ anyi le eƒe ŋkekea me la domea? Ao. Aƒe alo anyigba aɖeke gɔ̃ hã menɔ esi o, elabena “mekpɔ afisi wòatsɔ ta aziɔ ɖo o.” Yesu xlɔ̃ nu ɖekakpui aɖe si nye dziɖula be: “Dzra nusiwo katã le asiwò la, eye namã wo na ame dahewo, eye nu nyui anɔ dziƒo na wò; eye nava adze yonyeme.” Nuxlɔ̃me nyui aɖee nye ma, elabena awɔe be wòaƒo asa na asitsanyawo ƒe dzimaɖitsitsi ɖesiaɖe. (Luka 9:58; 18:22) Gake ƒomedodo ɖigbɔwo le Babilon subɔsubɔha kple asigãtsatsa dome. Le kpɔɖeŋu me, le ƒe 1987 me la, Albany Times Union ka nya ta be Katolikotɔwo ƒe nutome gã si le Miami, Florida, U.S.A. la ƒe ganyawo gbɔkpɔla gã lɔ̃ ɖe edzi be sɔlemeha la ƒe ga le dɔwɔƒe siwo wɔa nukliaʋawɔnuwo, agbegbegblẽnɔnɔ sinimawo, kple esiwo wɔa sigaret la me.
“Nye Dukɔ . . . , Mido Go tso Me”
22. (a) Nukae gbe aɖe si ɖi tso dziƒo la gblɔ? (b) Nukae na Mawu ƒe amewo tso aseye le ƒe 537 D.M.Ŋ. kple ƒe 1919 M.Ŋ. me?
22 Yohanes ƒe nya siwo kplɔe ɖo la fia asi nusi dzɔ kpɔ le nyagblɔɖi me la me vava ake be: “Eye mese gbe bubu aɖe tso dziƒo le gbɔgblɔm bena: Mi amesiwo nye nye dukɔ la, mido go tso me, bene miagade ha kplii le eƒe nuvɔ̃wo me o, eye bena miagaxɔ eƒe fuwɔame ƒe ɖeke o.” (Nyaɖeɖefia 18:4) Yehowa ƒe sedede nɔ nyagblɔɖi siwo ku ɖe blema Babilon la hã ƒe anyidzedze ŋu me le Hebri Ŋɔŋlɔawo me na eƒe amewo be: “Misi tso Babel.” (Yeremya 50:8, 13) Nenema ke esi Babilon Gã la ƒe aƒedozuzu tu aƒe la, wole dzi dem ƒo na Mawu ƒe amewo fifia be woasi. Le ƒe 537 D.M.Ŋ. la, mɔnukpɔkpɔ si ʋu ɖi be woadzo le Babilon la na Israel-vi ɖianukwarewo tso aseye ŋutɔ. Nenema ke asiɖeɖe le Mawu ƒe amewo ŋu tso Babilon ƒe kluvinyenye me le ƒe 1919 me na wotso aseye geɖe ŋutɔ. (Nyaɖeɖefia 11:11, 12) Eye tso ɣemaɣi ke ame miliɔn bubu geɖewo ɖo to sededea be woasi.
23. Aleke gbe si tso dziƒo la te gbe ɖe alesi wòhiã kpata be woasi le Babilon Gã la me la dzie?
23 Ðe wòhiã kpata alea gbegbe be woasi le Babilon Gã la me eye woado le xexeame ƒe subɔsubɔhawo me ahaɖe ame ɖokui ɖa keŋkeŋ nyateƒea? Ẽ, ehiã elabena ele be Mawu ƒe nukpɔsusu ku ɖe Babilon Gã la ƒe subɔsubɔha ƒe nugbegblẽwɔwɔ sia ŋu la nanɔ mía si. Metsyɔ nu naneke dzi le eyɔyɔ be gbolo gã me o. Eyata azɔ gbe si ɖi tso dziƒo gagblɔ le gbolo sia ŋu na Yohanes be: “Elabena eƒe nuvɔ̃wo kɔ yi ɖatɔ dziƒo, eye Mawu ɖo ŋku eƒe nu madzɔmadzɔ wɔwɔwo dzi. Miɖo teƒe nɛ, abe alesi eya hã ɖo eteƒe na mi ene, miɖo teƒe nɛ teƒe eve le eƒe dɔwɔwɔwo nu, kplu si me wòtɔtɔ nu le la, mitɔtɔ nu teƒe eve nu ɖe eme nɛ. Zi geɖe alesi wòdo eɖokui ɖe dzi, eye wòdze ha la, zi geɖe ma ke miwɔ fui, eye mina wòafa konyi; elabena egblɔ le eƒe dzi me bena: Mebɔbɔ nɔ anyi abe fianyɔnu ene, eye nyemenye ahosi o, eye nyemegale konyi fa ge akpɔ o. Eyata le ŋkeke ɖeka dzi la eƒe fukpekpewo ava edzi: Ku kple konyifafa kpakple dɔwuame eye woatɔ dzoe wòafiã keŋkeŋ; elabena [Yehowa] Mawu, amesi drɔ̃ ʋɔnui la, enye ŋusẽtɔ.”—Nyaɖeɖefia 18:5-8.
24. (a) Ele be Mawu ƒe amewo nasi le Babilon Gã la me be nuka nagadzɔ ɖe wo dzi o? (b) Amesiwo do kpo go dodo le Babilon Gã la me kpɔa gome kplii le nuvɔ̃ kawo me?
24 Nya mawo nu sẽ lo! Eyata ehiã be woawɔ nu kpata. Yeremya xlɔ̃ nu Israel-viwo le eƒe ŋkekea me be woawɔ nu eye wògblɔ be: “Misi dzo le Babel, . . . elabena Yehowa ƒe hlɔ̃biaɣi enye esia; nusi wòwɔ la, eya teƒe woaɖo nɛ. Nye dukɔ, midzo le egbɔ, eye amesiame neɖe eƒe agbe tso Yehowa ƒe dɔmedzoe heliheli la nu!” (Yeremya 51:6, 45) Nenema ke gbe si tso dziƒo la le nu xlɔ̃m Mawu ƒe amewo be woado go tso Babilon Gã la me bene woagaxɔ eƒe fuwɔamewo ƒe ɖeke o. Wole gbe ƒã ɖem Yehowa ƒe ʋɔnudɔdrɔ̃ siwo le abe fuwɔame ene siwo ava xexe sia kpakple Babilon Gã dzi la fifia. (Nyaɖeɖefia 8:1–9:21; 16:1-21) Ele be Mawu ƒe amewo naɖe wo ɖokui ɖa tso alakpasubɔsubɔha la gbɔ ne womedi be yewo ŋutɔwo yewoaxɔ fuwɔame mawo eye yewoatsrɔ̃ kplii mlɔeba o. Hekpe ɖe ema ŋu la, ha ma me nɔnɔ ana woakpɔ gome le eƒe nuvɔ̃wo me. Ana be woawo hã woaɖi gbɔgbɔmehasiwɔwɔ kple “amesiwo katã wowu le anyigba dzi la, ƒe ʋu” ƒe fɔ abe eya ke ene.—Nyaɖeɖefia 18:24; tsɔe sɔ kple Efesotɔwo 5:11; Timoteo I, 5:22.
25. Mɔ ka nue Mawu ƒe amewo do go tso blema Babilon me le?
25 Gake aleke Mawu ƒe amewo awɔ ado go le Babilon Gã la me? Le blema Babilon la gome la, ele na Yudatɔwo be woazɔ mɔ ŋutɔŋutɔ adzo le Babilon-dua me ayi ɖe keke Ŋugbedodonyigba la dzi. Gake nu geɖe hiã wu ema. Yesaya gblɔ le nyagblɔɖi me na Israel-viwo be: “Midzo, midzo, miʋu tso afima! Migaka si nu makɔmakɔ aɖeke ŋu o! Miʋu tso wo dome; mi Yehowa ƒe nutsɔlawo, mikɔ mia ɖokui ŋu!” (Yesaya 52:11) Ẽ, ele be woaɖe asi le Babilon subɔsubɔha ƒe nuwɔna makɔmakɔ ɖesiaɖe si aƒo ɖi woƒe tadedeagu na Yehowa la ŋu.
26. Aleke Korinto Kristotɔwo wɔ ɖe nya siwo nye ‘Mido go le wo dome, eye migaka asi nu makɔmakɔ ŋu o’ la dzie?
26 Apostolo Paulo yɔ nya tso Yesaya ƒe nyawo me le eƒe lɛta si wòŋlɔ na Korintotɔwo me hegblɔ be: “Migazu amesiwo atsɔ kɔkuti tutɔ na dzimaxɔsetɔwo ti o! Elabena hadede kae le dzɔdzɔenyenye kple sedzimawɔmawɔ dome? Alo ƒomedodo kae le kekeli kple viviti dome? . . . Eyaŋuti mido go le wo dome, eye miɖe mia ɖokui ɖa, [Yehowa ye] gblɔe, eye migaka asi nu makɔmakɔ ŋuti o.” Mehiã be Korinto Kristotɔwo nadzo le Korinto be woawɔ ɖe sedede ma dzi o. Gake ele na wo be woatsri alakpasubɔsubɔha ƒe gbedoxɔ makɔmakɔwo le nuwɔna ŋutɔŋutɔ me, kple be woaɖe wo ɖokui ɖa le gbɔgbɔ me tso legbasubɔla mawo ƒe nuwɔna makɔmakɔwo gbɔ. Tso ƒe 1919 me la, Mawu ƒe amewo dze sisi tso Babilon Gã la me gɔme le mɔ sia nu eye wokɔ wo ɖokui ŋu tso nufiafia kple nuwɔna siwo susɔ ɖe wo ŋu la me. Eyata wote ŋu subɔe abe dukɔ si ŋu wokɔ ene.—Korintotɔwo II, 6:14-17; Yohanes I, 3:3.
27. Nusiwo ɖi wo nɔewo kae le ʋɔnudɔdrɔ̃ siwo wohe va blema Babilon kple esiwo woahe ava Babilon Gã la dzie dome?
27 Blema Babilon ƒe anyidzedze kple eƒe tsɔtsrɔ̃ nye to si wohe nɛ ɖe eƒe nuvɔ̃wo ta. “Elabena eƒe ʋɔnudɔdrɔ̃ de dziƒo ke, eye wòɖatɔ alilikpowo.” (Yeremya 51:9) Nenema ke Babilon Gã la ƒe nuvɔ̃wo “kɔ yi ɖatɔ dziƒo” ke, ale be wova ɖo Yehowa ŋutɔ ŋkume. Eɖi numadzɔmadzɔwɔwɔ, trɔ̃subɔsubɔ, agbegbegblẽnɔnɔ, ameteteɖeanyi, fififi, kple amewuwu ƒe fɔ. Blema Babilon ƒe anyidzedze ƒe akpa aɖe nye hlɔ̃ si wobiae ɖe nusi wòwɔ ɖe Yehowa ƒe gbedoxɔ kple esubɔla vavãtɔwo ŋu la ta. (Yeremya 50:8, 14; 51:11, 35, 36) Nenema kee Babilon Gã la ƒe anyidzedze kple eƒe tsɔtsrɔ̃ mlɔeba hã nye hlɔ̃ biabiae ɖe nusi wòwɔ tadeagula vavãtɔwo le ƒe alafa geɖewo me la ta. Le nyateƒe me la, eƒe tsɔtsrɔ̃a anye “mía Mawu ƒe hlɔ̃biaŋkeke la” ƒe gɔmedzedze.—Yesaya 34:8-10; 61:2; Yeremya 50:28.
28. Dzɔdzɔenyenye ƒe dzidzenu kae Yehowa azã ɖe Babilon Gã la ŋu, eye nukata?
28 Le Mose ƒe Sea te la, ne Israel-vi aɖe fi nɔvia la, ele be wòaɖo nua teƒe, zi gbɔ zi eve teti. (Mose II, 22:1, 4, 7, 9) Yehowa azã dzɔdzɔenyenye ƒe dzidzenu ma tɔgbe le Babilon Gã la ƒe tsɔtsrɔ̃ si gbɔna me. Ele be wòaxɔ nusi wòwɔ la ƒe teƒe eve. Nublanuikpɔkpɔ aɖeke manɔ eme nɛ o elabena Babilon Gã la mekpɔ nublanui na amesiwo ge ɖe esi me o. Eno tsi le lãme na anyigbadzinɔlawo hetsɔ ‘wɔ leke na eɖokui ŋukpemanɔmee.’ Fukpekpe kple konyifafa ava edzi azɔ. Blema Babilon susui be yeƒe nɔƒe le dedie ŋutɔ eye wòƒoa adegbe be “Nyemazu ahosi o, eye womaɖe vi le ŋunye o.” (Yesaya 47:8, 9, 11) Babilon Gã la hã susuna be yele dedie. Gake eƒe tsɔtsrɔ̃ si ƒe gbe Yehowa “ŋusẽtɔ” la ɖe la ava kpata, abe “ŋkeke ɖeka dzi” wòdzɔ ene!
[Aɖaka si le axa 263]
“Fiawo Wɔ Ahasi Kplii”
Le ƒe 1800 ƒe ƒeawo ƒe gɔmedzedze me la, Europa sitsalawo nɔ atike muame vɔ̃ɖi si woyɔna be opium gbogbo aɖe tsɔm nɔ de gbãmee yi China. Le March 1839 me la, China dumegãwo dze agbagba be yewoatɔ te asitsatsa manɔsenu sia esi wolé aɖaka 20,000 siwo me atike vɔ̃ɖi sia le la hexɔe le Britania-sitsalawo si. Esia de dzre Britania kple China dome. Esime ƒomedodo si le dukɔ eveawo dome gblẽ ɖe edzi la, Britania Protestant mawunyadɔgbedela aɖewo de dzi ƒo na Britania be wòaho aʋa; nya siwo wogblɔ dometɔ aɖewoe nye esiwo gbɔna:
“Aleke gbegbe kuxi siawo dzɔ dzi nam enye si, elabena menya be England dziɖuɖua ado dɔmedzoe, eye Mawu azã Eƒe ŋusẽ atsɔ agbã mɔxenu siwo xe mɔ ɖe Kristo ƒe nyanyuiea ƒe China yiyi nu la.”—Henrietta Shuck, Southern Baptist mawunyadɔgbedela.
Aʋa dzɔ mlɔeba—eyae nye aʋa si woyɔna egbea be Opium-ʋa. Mawunyadɔgbedelawo tsɔ nya siawo de dzi ƒo na Britania tso dzi blibo me be:
“Mesee le ɖokuinye me be enye dzizizi nam be ne menyẽ kɔ kpɔ alesi nyawo le fifia la, nyemagabui fũ abe nya si ku ɖe opium alo Eŋlisiawo ŋu ene o, ke boŋ abe Mawu ƒe nuɖoɖo wɔnuku aɖe be yeazã amegbetɔ ƒe ŋutasesẽ atsɔ ana Yeƒe amenuveve ƒe tameɖoɖowo ɖe China ŋu nava eme le eƒe mɔxeɖenu ƒe gli la gbagbã me ene.”—Peter Parker, Kongregasintɔwo ƒe mawunyadɔgbedela.
Kongregasintɔwo ƒe mawunyadɔgbedela bubu, Samuel W. Williams gblɔ kpee be: “Mawu ƒe asi dze ƒã le nusiwo katã dzɔ me, eye míake ɖi o be Amesi gblɔ be Yeva be Yeatsɔ yi ava anyigba dzi la va afisia eye Eva ɖe Eƒe futɔwo tsɔtsrɔ̃ kaba bene Yeaɖo Ye ŋutɔ Yeƒe Fiaɖuƒe anyi ta. Atsrɔ̃ nu eye wòagatsrɔ̃ nu vaseɖe esime Wòɖo Ŋutifafafia la anyi.”
Ku ɖe Chinatɔwo tsɔtsrɔ̃ dziŋɔa ŋu la, mawunyadɔgbedela J. Lewis Shuck ŋlɔ bena: “Mebua nudzɔdzɔ mawo . . . abe Aƒetɔ la ƒe dɔwɔnu tẽ siwo dzi wòtona tsɔ ɖea gbeɖuɖɔ si xea mɔ na Mawu ƒe Nyateƒe la ƒe ŋgɔyiyi ɖa ene.”
Kongregasintɔwo ƒe mawunyadɔgbedela Elijah C. Bridgman gblɔ kpee be: “Zi geɖe la, Mawu wɔa dziɖuɖua ƒe alɔ sesẽ ŋudɔ tsɔ dzrana mɔ dzi ɖoe na Eƒe fiaɖuƒea . . . Le ɣeyiɣi vevi siawo me la, dɔwɔnua nye amegbetɔwo; gake ŋusẽ si le mɔa fiam ye nye Mawu. Dukɔwo katã ƒe dziɖula kɔkɔtɔ zã England tsɔ he toe na China eye wòbɔbɔe ɖe anyi.”—Nya siwo woyɔ tso “Ends and Means,” 1974, si Stuart Creighton Miller ŋlɔ eye wota ɖe The Missionary Enterprise in China and America me la (Harvard Numekuku aɖe si me John K. Fairbank to).
[Aɖaka si le axa 264]
‘Asitsala Mɔzɔlawo Trɔ Zu Kesinɔtɔwo’
“Le ƒe 1929 kple Xexemeʋa II ƒe gɔmedzedze domedome la, [Bernardino] Nogara [Vatikan gadzikpɔlagã] tsɔ Vatikan gawo kple Vatikan teƒenɔlawo de dɔwɔƒe vovovo siwo me Italia kpɔa ga tsonɛ la me—vevietɔ etsɔ wo de elektrik dɔwɔƒewo, telefon dɔwɔƒewo, gadodo kple gadzadzraɖo dɔwɔƒewo, keteke dɔdzikpɔƒe suewo, kple dɔwɔƒe siwo wɔa agbledemɔ̃wo, siminti, kple avɔlɔ̃ƒewo me. Dɔ siawo dometɔ geɖe ɖe vi.
“Nogara ƒo adzɔha geɖewo nu ƒu ɖekae, wo dometɔ aɖewo nye La Società Italiana della Viscosa, La Supertessile, La Società Meridionale Industrie Tessili, kple La Cisaraion. Eƒo wo katã nu ƒu ɖekae hetsɔ ŋkɔ na wo be CISA-Viscosa eye wòtsɔ wo de Asitsamegã Francesco Maria Oddasso si nye amesiwo dzi Vatikan ka ɖo wu dometɔ ɖeka ƒe dzikpɔkpɔ te, azɔ Nogara dze agbagba tsɔ ha siawo siwo nu wòƒo ƒu ɖekae la de Italia ƒe avɔlɔ̃dɔwɔƒe gãtɔ kekeake si nye SNIA-Viscosa te. Esia na Vatikan ƒe gome si le SNIA-Viscosa me la ganɔ dzidzim ɖe edzi, eye le ɣeyiɣi aɖe megbe la, Vatikan va kpɔ ŋusẽ ɖe edzi—abe alesi esia ƒe kpeɖodzi dze le alesi Asitsamegã Oddasso va zu eƒe zimenɔla ƒe kpeɖeŋutɔe me ene.
“Aleae Nogara wɔ tra ɖe avɔlɔ̃dɔwɔƒea me. Etra ɖe adzɔha bubuwo hã me, elabena Nogara ƒe ayemɔwo sɔ gbɔ. Ðokuitɔmadila sia . . . to asitsala ɖesiaɖe ŋu le Italia ƒe ŋutinya me le alesi wògbɔ agbe Italia ƒe ganyawoe ta . . . Benito Mussolini ƒe asi mesu fiaɖuƒe si wòsusu la nenema gbegbe o, gake ekpe ɖe Vatikan kple Bernadino Nogara ŋu be woɖo dziɖuƒe bubu ƒomevi anyi.”—The Vatican Empire, si Nino Lo Bello ŋlɔ, axa 71-3.
Esia nye ƒomedodo kplikplikpli si le anyigba dzi sitsalawo kple Babilon Gã la dome ƒe kpɔɖeŋu ɖeka ko. Ðikekemanɔmee la, asitsala siawo afa konyi ne woƒe asisia megali o!
[Nɔnɔmetata si le axa 259]
Esi amewo kaka ɖe anyigba katã dzi la, wotsɔ Babilon-subɔsubɔ ɖe asi yii
[Nɔnɔmetata si le axa 261]
Abe gbetakpɔla ene la, Yohanes habɔbɔ la ɖea gbe ƒãe be Babilon dze anyi
[Nɔnɔmetata si le axa 266]
Blema Babilon ƒe gli gbagbãwo nye Babilon Gã la ƒe aƒedozuzu si gbɔna ƒe kpɔɖeŋu