Tenɔnɔ Kae Anɔ Asiwò Le Ʋɔnudrɔ̃zikpui La Ŋgɔ?

“Ne Amegbetɔvi la ava le eƒe ŋutikɔkɔe me, eye dɔlawo katã akpe ɖe eŋuti la, ekema abɔbɔ nɔ eƒe ŋutikɔkɔezikpui la dzi.”—MATEO 25:31.

 1-3. Nukata míate ŋu akpɔ mɔ na nu nyuiwo le ʋɔnudɔdrɔ̃ gome?

‘ÈDZE AGƆ LOO MÈDZE AGƆ O?’ Ame geɖe tsia dzi ɖe nusi gbɔna dzɔdzɔ ge ŋu ne wole ʋɔnunya aɖe sem. Ʋɔnudrɔ̃lawo kple nyamedzrolawo adze agbagba be yewoaɖi anukware, gake ɖe wodrɔ̃a ʋɔnu dzɔdzɔe ɣesiaɣia? Mèse be wodrɔ̃ ʋɔnu madzɔmadzɔ hetrɔ nya bu le ʋɔnu kpɔ oa? Ʋɔnu numadzɔmadzɔ dɔdrɔ̃ alea menye nu yeye o, abe alesi míekpɔe le Yesu ƒe lododo si le Luka 18:1-8 me ene.

² Eɖanye nuka teƒee nèkpɔ le amegbetɔ ƒe ʋɔnudɔdrɔ̃ me o, de dzesi Yesu ƒe nyataƒonya sia be: “Ðe Mawu maɖe eƒe ame tiatia, siwo le ɣli dom nɛ ŋkeke kple zã, . . . o mahã? Mele egblɔm na mi bena: Aɖe wo kaba. Gake ne Amegbetɔvi la va la, ɖe wòakpɔ xɔse la le anyigba la dzi mahã?”

³ Ẽ, Yehowa akpɔ egbɔ be wodrɔ̃ ʋɔnu dzɔdzɔe ye subɔlawo mlɔeba. Yesu hã anɔ eme, vevietɔ fifia, elabena fifi nuɖoanyi vɔ̃ɖia ƒe “ŋkeke mamleawo” mee míele. Eteƒe madidi o Yehowa ato Via ŋusẽtɔ la dzi aɖe vɔ̃ɖinyenye ɖa le anyigba dzi keŋkeŋ. (Timoteo II, 3:1; Tesalonikatɔwo II, 1:7, 8; Nyaɖeɖefia 19:11-16) Míate ŋu akpɔ akpa si wɔm Yesu le le eƒe lododo mamleawo dometɔ ɖeka si míeyɔna zi geɖe be alẽwo kple gbɔ̃wo ŋuti lododo la me.

 4. Aleke míese ɣeyiɣi si alẽwo kple gbɔ̃wo ŋuti lododoa va eme la gɔmee, gake nukata míagalé ŋku ɖe lododoa ŋu fifia? (Lododowo 4:18)

⁴ Ɣeyiɣi didi aɖee nye sia si wòwɔ na mí be lododo la fia Yesu ƒe zidzinɔnɔ esime woɖoe Fia le ƒe 1914 me eye wòle ʋɔnu drɔ̃m tso ɣemaɣi—amesiwo ɖee fia be yewoɖi alẽwo akpɔ agbe mavɔ, eye gbɔ̃awo akpɔ tsɔtsrɔ̃ mavɔ. Gake ne míegbugbɔ ŋugble de le lododoa ŋu la, ana ɣeyiɣi si me wòava eme kple nusi wòfia ŋuti gɔmesese si to vovo vie nasu mía si. Gɔmesese yeye sia na míaƒe gbeƒãɖeɖedɔa kple alesi amewo wɔa nu ɖe eŋui gava le vevie wu. Mina míadzro nusi Biblia ɖe fia le Yehowa kple Yesu siwo nye Fiawo kple Ʋɔnudrɔ̃lawo la ŋu me ne míakpɔ nusi dzi míenɔ te ɖo kpɔ lododoa ƒe gɔmesese sia si de to wu la.

Yehowa, Ʋɔnudrɔ̃la Gãtɔ La

 5, 6. Nukata wòsɔ be míabu Yehowa be enye Fia kple Ʋɔnudrɔ̃la?

⁵ Yehowa ɖua xexeame katã dzi eye ekpɔ ŋusẽ ɖe nusianu dzi. Esi gɔmedzedze kple nuwuwu meli nɛ o ta la, enye “fia mavɔmavɔtɔ.” (Timoteo I, 1:17; Psalmo 90:2, 4; Nyaɖeɖefia 15:3) Ekpɔ ŋusẽ awɔ ɖoɖowo, alo ade sewo, ahakpɔ egbɔ be wowɔ ɖe wo dzi. Gake ŋusẽ le esi be wòanye Ʋɔnudrɔ̃la hã. Yesaya 33:22 gblɔ be: “Yehowa enye míaƒe ʋɔnudrɔ̃la, Yehowa enye míaƒe aʋafia, Yehowa enye míaƒe fia, eya aɖe mí.”

⁶ Tso blema ke la, Mawu subɔlawo bua Yehowa be enye nyagɔmekula kple ʋɔnunyawo Drɔ̃la. Le kpɔɖeŋu me, esime “xexeame ƒe ʋɔnudrɔ̃la” la da Sodom kple Gomora ƒe vɔ̃ɖivɔ̃ɖi ŋuti ɖaseɖiɖiwo kpɔ la, edrɔ̃ ʋɔnu wo me nɔlawo be wodze na tsɔtsrɔ̃ eye ekpɔ egbɔ be wohe ʋɔnudɔdrɔ̃ dzɔdzɔe ma va wo dzi. (Mose I, 18:20-33; Hiob 34:10-12) Aleke gbegbe wòganaa kakaɖedzi míi enye si be míanya be Yehowa nye Ʋɔnudrɔ̃la dzɔdzɔe si ate ŋu ahe ʋɔnudɔdrɔ̃ me tsonuwo vɛ ɣesiaɣi!

 7. Aleke Yehowa wɔ nu abe Ʋɔnudrɔ̃la ene le nuwɔwɔ kple Israel me?

⁷ Yehowa drɔ̃ ʋɔnu amewo tẽ ɣeaɖewoɣi le blema Israel. Ne ɖe nènɔ agbe ɣemaɣi la, ɖe wò dzi madze eme be nànya be Ʋɔnudrɔ̃la deblibo aɖee kpɔa nyawo gbɔ oa? (Mose III, 24:10-16; Mose IV, 15:32-36; 27:1-11) Mawu naa “afiatsotsowo” hã siwo katã nyo be woazã abe dzidzenuwo ene le ʋɔnudɔdrɔ̃ me. (Mose III, 25:18, 19; Nexemya 9:13; Psalmo 19:10, 11; 119:7, 75, 164; 147:19, 20) Eyae “nye xexeame ƒe ʋɔnudrɔ̃la,” eyata mí katã míele ete.—Hebritɔwo 12:23.

 8. Aleke Daniel ƒe ŋutega la do ƒome kplii?

⁸ “Eteƒekpɔla” ƒe ɖaseɖiɖi le mía si le nya sia ŋuti. Wona nyagblɔɖila Daniel kpɔ lã wɔadã aɖewo siwo tsitre ɖi na dziɖuɖuwo alo fiaɖuƒewo la ƒe ŋutega. (Daniel 7:1-8, 17) Egblɔ kpe ɖe eŋu be: “Wotsɔ fiazikpui li anyi, eye amegã ɖeɖi aɖe bɔbɔ nɔ edzi, eƒe avɔ fu tititi.” (Daniel 7:9) De dzesii be Daniel kpɔ fiazikpui “eye amegã ɖeɖi [Yehowa] bɔbɔ nɔ edzi.” Bia ɖokuiwò be, ‘Ðe Daniel nɔ eteƒe kpɔm le afisia be Mawu va zu Fiaa?’

 9. Nukae ‘anyi nɔnɔ ɖe’ fiazikpui dzi fia? Gblɔ eƒe kpɔɖeŋuwo.

⁹ Ne míexlẽe be ame aɖe “bɔbɔ nɔ” fiazikpui dzi la, ɖewohĩ míabu be ezu fia, elabena Biblia zãa nya gbɔgblɔ ma ɣeaɖewoɣi. Le kpɔɖeŋu me: “Esime [Zimri nɔ] fia ɖum, eye wòbɔbɔ nɔ fiazikpuia dzi la, . . . ” (Fiawo I, 16:11; Fiawo II, 10:30; 15:12; Yeremya 33:17) Mesia ŋuti nyagblɔɖi aɖe gblɔ be: “Abɔbɔ nɔ eƒe fiazikpui dzi aɖu fia.” Eyata be ‘woabɔbɔ nɔ fiazikpui dzi’ ate ŋu afia be woazu fia. (Zaxarya 6:12, 13) Wogblɔ le Yehowa ŋu be enye Fia si bɔbɔ nɔ fiazikpui dzi. (Fiawo I, 22:19; Yesaya 6:1; Nyaɖeɖefia 4:1-3) Eyae nye “fia mavɔmavɔtɔ” la. Gake esi wòƒo nu tso eƒe fianyenye akpa yeye aɖe ŋu ta la, míate ŋu agblɔ be eva zu Fia, abe ɖe wògagbugbɔ eƒe fiazikpuia dzi nɔ yeyee ene.—Kronika I, 16:1, 31; Yesaya 52:7; Nyaɖeɖefia 11:15-17; 15:3; 19:1, 2, 6.

10. Nukae nye Israel-fiawo ƒe dɔ vevi aɖe? Gblɔ eƒe kpɔɖeŋu.

¹⁰ Gake nya vevi aɖe dze le afisia: Blemafiawo ƒe dɔ vevi aɖee nye nyawo dɔdrɔ̃ kple afiatsotso. (Lododowo 29:14) Ðo ŋku ʋɔnu dzɔdzɔe si Salomo drɔ̃ esime nyɔnu eve nɔ vidzĩ ɖeka ʋlim la dzi. (Fiawo I, 3:16-28; Kronika II, 9:8) Eƒe dziɖuɖudɔwɔxɔ dometɔ ɖekae nye “fiazikpui ƒe akpata la, afisi wòdrɔ̃a ʋɔnu lena,” wogayɔnɛ hã be “ʋɔnudrɔ̃ƒe akpata.” (Fiawo I, 7:7) Wogblɔ le Yerusalem ŋu be enye afisi “woɖo zikpui anyi ɖe ʋɔnudɔdrɔ̃ ŋu” le. (Psalmo 122:5) Edze ƒã be ‘fiazikpui dzi nɔnɔ’ ate ŋu afia ʋɔnudɔdrɔ̃ ƒe ŋusẽ zazã hã.—Mose II, 18:13; Lododowo 20:8.

11, 12. (a) Nukae Yehowa ƒe anyi nɔnɔ si ŋu woƒo nu tsoe le Daniel 7 me la fia? (b) Aleke mawunyakpukpui bubuwo ɖo kpe edzii be Yehowa nɔa anyi drɔ̃a ʋɔnu?

¹¹ Fifia mina míatrɔ ɖe nudzɔdzɔ si me Daniel kpɔ ‘Amegã Ðeɖi la wònɔ anyi’ le la ŋu. Daniel 7:10 gblɔ kpee be: “Woɖi ʋɔnu, eye woke agbalẽwo.” Ẽ, Amegã Ðeɖi la nɔ anyi be yeadrɔ̃ ʋɔnu le xexeme dzi ɖuɖu ƒe nyawo ŋu eye be wòatso afia na Amegbetɔvi la be edze be wòaɖu dzi. (Daniel 7:13, 14) Emegbe míexlẽ be “amegã ɖeɖi la va, eye wòtso afia na dziƒoʋĩtɔ la ƒe ame kɔkɔeawo,” eye amesiwo wotso afia na la dze aɖu fia kple Amegbetɔvi la. (Daniel 7:22) Mlɔeba la, ‘woɖi ʋɔnu’ eye wodrɔ̃ fɔbubuʋɔnu xexemefiaɖuƒe mamletɔ la.—Daniel 7:26.a

¹² Eyata esi Daniel kpɔ Mawu ‘wònɔ fiazikpui dzi’ la fia be Eva be yeadrɔ̃ ʋɔnu. Dawid dzi ha do ŋgɔ be: “[Wò Yehowae] tso nye nya kple nye kodzoɖoɖo la wòde go; èbɔbɔ nɔ fiazi dzi, wò ʋɔnudrɔ̃la dzɔdzɔe.” (Psalmo 9:5, 8) Eye Yoel ŋlɔ bena: “Dukɔwo netso, ne woava Yosafat ƒe bali la me; elabena afima [Yehowa abɔbɔ] nɔ anyi ɖo adrɔ̃ ʋɔnu dukɔwo katã godoo.” (Yoel 4:12; tsɔe sɔ kple Yesaya 16:5.) Wokplɔ Yesu kple Paulo siaa yi ʋɔnui eye ame aɖe nɔ anyi se woƒe nyawo hedrɔ̃ ʋɔnu wo.b—Yohanes 19:12-16; Dɔwɔwɔwo 23:3; 25:6.

Yesu ƒe Ðoƒe

13, 14. (a) Kakaɖedzi kae nɔ Mawu ƒe amewo si be Yesu ava zu Fia? (b) Ɣekaɣie Yesu nɔ eƒe fiazikpui dzi, eye gɔmesese ka nue wòdze fiaɖuɖu gɔme le tso ƒe 33 M.Ŋ. me yina?

¹³ Fia kple Ʋɔnudrɔ̃la siaae Yehowa nye. Ke Yesu ya ɖe? Mawudɔla si ɖe gbeƒã eƒe dzidzi la gblɔ be: “Aƒetɔ Mawu la atsɔ fofoa Dawid ƒe fiazikpui la anae; . . . eye nuwuwu manɔe na eƒe fiaɖuƒe la o.” (Luka 1:32, 33) Yesu anye Dawid ƒe fiaɖuƒea domenyila tegbee. (Samuel II, 7:12-16) Dziƒoe wòanɔ aɖu fia, elabena Dawid gblɔ be: “Yehowa gblɔ na nye Aƒetɔ [Yesu] be: Bɔbɔ nɔ nye nuɖusi me, vaseɖe esime matsɔ wò futɔwo awɔ wò afɔɖodzinui! Yehowa ado wò ŋusẽ ƒe fiatikplɔ ɖa tso Zion be: Ðu fia le wò futɔwo titina!”—Psalmo 110:1-4.

¹⁴ Ɣekaɣie ema va eme? Yesu meɖu fia esime wònye amegbetɔ o. (Yohanes 18:33-37) Eku le ƒe 33 M.Ŋ. me, wofɔe ɖe tsitre, eye wòyi dziƒo. Hebritɔwo 10:12 gblɔ be: “Eya la, esime wòtsɔ vɔsa ɖeka na ɖe nuvɔ̃wo ta megbe la, ebɔbɔ nɔ anyi ɖe Mawu ƒe nuɖusi me tegbetegbe.” Ŋusẽ kae nɔ Yesu si? “[Mawu tsɔe] ɖo ye ŋutɔ ƒe nuɖusi me le dziƒonutowo me ɖe dziɖulanyenye kple ŋusẽ kple ŋutete kple aƒetɔnyenye katã . . . dzi, . . . eye wòtsɔ eya ke ɖo nuwo katã ƒe ta hena hame [la].” (Efesotɔwo 1:20-22) Esi Yesu dze fiaɖuɖu ɖe Kristotɔwo dzi gɔme ɣemaɣi ta la, Paulo te ŋu ŋlɔe be Yehowa “ɖe mí tso viviti ƒe ŋusẽ la me, eye wòtsɔ mí ɖo eƒe lɔlɔ̃vi ƒe fiaɖuƒe la me.”—Kolosetɔwo 1:13; 3:1.

15, 16. (a) Nukata míegblɔ be Yesu mezu Mawu ƒe Fiaɖuƒea ƒe Fia le ƒe 33 M.Ŋ. me o? (b) Ɣekaɣie Yesu dze fiaɖuɖu le Mawu ƒe Fiaɖuƒea me gɔme?

¹⁵ Gake Yesu mezu Fia kple Ʋɔnudrɔ̃la ɖe dukɔwo dzi ɣemaɣi o. Enɔ Mawu ƒe nuɖusime nɔ ɣeyiɣi si me wòazu Mawu ƒe Fiaɖuƒea ƒe Fia la lalam. Paulo ŋlɔ tso eŋu be: “Mawudɔlawo dome ameka wògblɔ na kpɔ bena: ‘Bɔbɔ nɔ nye nuɖusi me, vaseɖe esime matsɔ wò futɔwo awɔ wò afɔɖodzinui’ mahã?”—Hebritɔwo 1:13.

¹⁶ Yehowa Ðasefowo ta nya geɖe siwo ɖo kpe edzi be ɣeyiɣi si Yesu nɔ lalam la wu enu le ƒe 1914 me, esime wòva zu Mawu ƒe Fiaɖuƒea ƒe dziɖula le dziƒonuto makpɔmakpɔa me. Nyaɖeɖefia 11:15, 18 gblɔ be: “Xexemefiaɖuƒe la trɔ zu mía Aƒetɔ kple eƒe Kristo la tɔ, eye wòaɖu fia tso mavɔ me yi ɖe mavɔ me.” Gake “dzi ku dukɔwo, eye wò dziku va.” Ẽ, dukɔwo do dziku ɖe wo nɔewo ŋu le Xexemeʋa I me. (Luka 21:24) Aʋawɔwɔ, anyigbaʋuʋu, dɔvɔ̃wo, nuɖuɖu ƒe veve, kple nu mawo tɔgbe siwo teƒe míekpɔ tso ƒe 1914 me ke la ɖo kpe edzi be Yesu le dzi ɖum le Mawu ƒe Fiaɖuƒea me, eye xexeame ƒe nuwuwu mamlea gogo.—Mateo 24:3-14.

17. Nya vevi kawo gɔmee míese vaseɖe fifia?

¹⁷ Mítsɔ nya siawo wɔ numetoto kpui aɖe: Míate ŋu agblɔ be Mawu nɔ fiazikpui dzi hezu Fia, gake le gɔmesese bubu nu la, ate ŋu anɔ eƒe fiazikpui dzi adrɔ̃ ʋɔnu. Le ƒe 33 M.Ŋ. me la, Yesu nɔ Mawu ƒe nuɖusime, eye wònye Fiaɖuƒea ƒe Fia fifia. Gake ɖe Yesu si nye Fia si le dzi ɖum fifia la ganye Ʋɔnudrɔ̃la hã? Eye nukata wòle be míatsɔ ɖe le esia me, vevietɔ le ɣeyiɣi sia me?

18. Kpeɖodzi kae li be Yesu ava zu Ʋɔnudrɔ̃la hã?

¹⁸ Yehowa, amesi si gome le be wòatia ʋɔnudrɔ̃lawo la, tia Yesu be wòanye Ʋɔnudrɔ̃la si ɖo Eƒe dzidzenuwo gbɔ. Yesu ɖe esia fia esime wònɔ nu ƒom tso alesi wogbɔa agbe amewo le gbɔgbɔ me ŋu be: “Fofo la medrɔ̃a ʋɔnu ame aɖeke o, ke boŋ etsɔ ʋɔnudɔdrɔ̃ la katã de asi na Via.” (Yohanes 5:22) Gake Yesu ƒe ʋɔnudɔdrɔ̃ yi ŋgɔ wu ʋɔnu ma tɔgbe dɔdrɔ̃, elabena eyae nye agbagbeawo kple kukuawo ƒe ʋɔnudrɔ̃la. (Dɔwɔwɔwo 10:42; Timoteo II, 4:1) Paulo gblɔ ɣeaɖeɣi be: “[Mawu ɖo] ŋkeke, si dzi wòle ʋɔnu drɔ̃ ge xexeame godoo le dzɔdzɔenyenye nu to ŋutsu [Yesu], si woɖo la dzi; eye wòle xɔse dom ɖe amewo katã, le esi wòfɔe ɖe tsitre tso ame kukuwo dome la ŋuti.”—Dɔwɔwɔwo 17:31; Psalmo 72:2-7.

19. Nukata wòsɔ be míagblɔ le Yesu ŋu be enɔ anyi hezu Ʋɔnudrɔ̃la?

¹⁹ Eyata ɖe míate ŋu aƒo nya ta wòasɔ be Yesu bɔbɔ nɔ ŋutikɔkɔefiazikpui aɖe dzi eye wònye Ʋɔnudrɔ̃la tɔxɛa? Ẽ. Yesu gblɔ na apostoloawo be: “Le nuwo ƒe gbugbɔgadzi me la, gbesigbe ke Amegbetɔvi la abɔbɔ nɔ eƒe ŋutikɔkɔezikpui la dzi la, miawo hã miabɔbɔ nɔ zikpui wuive dzi, eye miadrɔ̃ ʋɔnu Israel ƒome wuieveawo.” (Mateo 19:28) Togbɔ be Fiaɖuƒea ƒe Fiae Yesu nye fifia hã la, anyinɔnɔ ɖe fiazikpui dzi adrɔ̃ ʋɔnu Ƒe Akpe Ðeka hã kpe ɖe dɔ siwo wòagawɔ siwo ŋu woƒo nu tsoe le Mateo 19:28 la ŋu. Ɣemaɣi la, adrɔ̃ ʋɔnu ameƒomea katã, ame dzɔdzɔewo kple ame madzɔmadzɔwo siaa. (Dɔwɔwɔwo 24:15) Anyo be esia nanɔ susu me na mí ne míatrɔ ɖe Yesu ƒe lododoawo dometɔ ɖeka si ku ɖe míaƒe ɣeyiɣia kple míaƒe agbe ŋu la ŋuti.

Nya Kae Lododoa Gblɔ?

20, 21. Nya kae Yesu ƒe apostolowo bia si ku ɖe míaƒe ɣeyiɣia ŋu, eye nyabiabia kae wòfɔ ɖe te?

²⁰ Do ŋgɔ teti na Yesu ƒe ku la, eƒe apostolowo biae be: “Ɣekaɣie nusiawo ava? Eye ka enye wò vava kple xexeame ƒe nuwuwu la ƒe dzesii?” (Mateo 24:3) Yesu gblɔe ɖi be nu ɖedzesiwo adzɔ le anyigba dzi hafi ‘nuwuwua nava.’ Do ŋgɔ teti na nuwuwu ma la, dukɔwo “[akpɔ] Amegbetɔvi la le dziƒolilikpowo dzi gbɔna kple ŋusẽ kple ŋutikɔkɔe geɖe.”—Mateo 24:14, 29, 30.

²¹ Gake aleke wòanɔ na amesiwo le dukɔ mawo me ne Amegbetɔvi la va le eƒe ŋutikɔkɔe me? Mina míakpɔe ɖa le alẽwo kple gbɔ̃wo ŋuti lododoa me, si dze egɔme kple nya siawo be: “Ne Amegbetɔvi la ava le eƒe ŋutikɔkɔe me, eye dɔlawo katã akpe ɖe eŋuti la, ekema abɔbɔ nɔ eƒe ŋutikɔkɔezikpui la dzi; eye woaƒo dukɔwo katã nu ƒu ɖe eƒe ŋku me.”—Mateo 25:31, 32.

22, 23. Nya kawoe ɖee fia be alẽwo kple gbɔ̃wo ŋuti lododoa medze emevava gɔme tso ƒe 1914 me o?

²² Ðe lododo sia va eme esime Yesu bɔbɔ nɔ anyi le fiaɖuɖuŋusẽ me le ƒe 1914 me, abe alesi míese egɔmee ɣeyiɣi didi aɖe enye sia enea? Mateo 25:34 ƒo nu tso eŋu be ezu Fia, eyata esɔ be míagblɔ be lododoa le eme vam tso esime Yesu zu Fia le ƒe 1914 me ke. Gake ʋɔnu kae wòdrɔ̃ le ema megbe kpuie? Medrɔ̃ ʋɔnu “dukɔwo katã” o. Ke boŋ etrɔ eƒe susu ɖe amesiwo gblɔ be “Mawu ƒe aƒe me” tɔwoe yewonye la ŋu. (Petro I, 4:17) Yesu si nye Yehowa ƒe ʋɔnudrɔ̃la la va lé ŋku ɖe Kristotɔ amesiamina siwo susɔ ɖe anyigba dzi la ŋu be yeadrɔ̃ ʋɔnu wo, si wɔ ɖeka kple Maleaxi 3:1-3. Ɣemaɣie wodrɔ̃ ʋɔnu Kristodukɔa hã, amesi gblɔna alakpatɔe be ‘Mawu ƒe aƒe mee’ yele.c (Nyaɖeɖefia 17:1, 2; 18:4-8) Gake naneke meɖee fia be ɣemaɣi, alo tso ɣemaɣi la, Yesu nɔ anyi be yeadrɔ̃ ʋɔnu dukɔwo katã me tɔwo abe alẽwo alo gbɔ̃wo ene o.

²³ Ne míedzro dɔ si Yesu wɔ le lododoa me me la, míakpɔe be adrɔ̃ ʋɔnu dukɔwo katã mlɔeba. Lododoa meɖee fia be ʋɔnudɔdrɔ̃ sia ayi edzi ƒe geɖe, abe ɖe wodrɔ̃ ʋɔnu amesiwo ku le ƒe geɖe siwo va yi me be wodze na ku mavɔ alo agbe mavɔ ene, o. Edze abe amesiwo ku le nyitsɔ laa ƒewo me ƒe akpa gãtɔ yi ameƒomea ƒe yɔdo me ene. (Nyaɖeɖefia 6:8; 20:13) Gake lododoa fia ɣeyiɣi si Yesu adrɔ̃ ʋɔnu “dukɔwo katã” me tɔ siwo anɔ agbe ɣemaɣi eye woadze ŋgɔ eƒe afiatsotso.

24. Ɣekaɣie alẽwo kple gbɔ̃wo ŋuti lododoa ava eme?

²⁴ Le mɔ bubu nu la, lododoa fia asi etsɔme esime Amegbetɔvi la ava le eƒe ŋutikɔkɔe me. Anɔ anyi adrɔ̃ ʋɔnu amesiwo anɔ agbe ɣemaɣi. Atu eƒe ʋɔnudɔdrɔ̃a ɖe amesiwo ƒomevi woɖee fia be yewonye dzi. Ɣemaɣi la, woaɖe “vovo, si le ame dzɔdzɔe kple ame vɔ̃ɖi dome” afia wòadze ƒã. (Maleaxi 3:18) Ɣeyiɣi kpui aɖe koe ʋɔnudrɔ̃nyawo gbɔgblɔ kple emetsonua hehe va wo dzi la ŋutɔ axɔ. Yesu adrɔ̃ ʋɔnu dzɔdzɔe si anɔ te ɖe nusi dze le amewo ŋu la dzi.—Kpɔ Korintotɔwo II, 5:10 hã.

25. Nuka fiam Mateo 25:31 le esi wòƒo nu tso Amegbetɔvi la ŋu be enɔ ŋutikɔkɔezikpui dzi?

²⁵ Eyata esia fia be etsɔmeɣeyiɣi si me Yesu anɔ anyi adrɔ̃ ʋɔnu dukɔwo eye wòahe emetsonua ava wo dzi la ŋue Fia ŋusẽtɔ sia ƒe ‘anyinɔnɔ ɖe eƒe ŋutikɔkɔezikpui dzi’ hena ʋɔnudɔdrɔ̃, si ŋu woƒo nu tsoe le Mateo 25:31 la, ku ɖo. Ẽ, Yesu ƒe ʋɔnudɔdrɔ̃ si ŋu Mateo 25:31-33, 46 ƒo nu tsoe la sɔ kple esi le Daniel ta 7, afisi Fia, Amegã Ðeɖi si le dzi ɖum, la nɔ anyi be yeawɔ yeƒe Ʋɔnudɔdrɔ̃dɔ le.

26. Lododoa ŋuti numeɖeɖe yeye ka ŋue míeke ɖo?

²⁶ Alẽwo kple gbɔ̃wo ŋuti lododoa gɔme sese le mɔ sia nu ɖee fia be ʋɔnudɔdrɔ̃ alẽawo kple gbɔ̃awo le ŋgɔ gbɔna. Ava eme ne “xaxa gã” si woyɔ le Mateo 24:29, 30 la dze egɔme eye Amegbetɔvi la ‘va ɖo eƒe ŋutikɔkɔe me.’ (Tsɔe sɔ kple Marko 13:24-26.) Ɣemaɣi, esime nuɖoanyi vɔ̃ɖi bliboa aɖo eƒe nuwuwu la, Yesu aɖi ʋɔnu eye wòadrɔ̃ ʋɔnu amewo ahahe emetsonua ava wo dzi.—Yohanes 5:30; Tesalonikatɔwo II, 1:7-10.

27. Nukae wòle be míadi be míanya le Yesu ƒe lododo mamlea ŋu?

²⁷ Esia kɔ alesi míese ɣeyiɣi si me Yesu ƒe lododoa ava eme la gɔmee la me, si fia ɣeyiɣi si me woadrɔ̃ ʋɔnu alẽawo kple gbɔ̃awo. Gake aleke esia ka mí amesiwo tsɔ veviedodo le gbeƒã ɖem Fiaɖuƒenyanyui lae? (Mateo 24:14) Ðe wòna míaƒe dɔa megale vevie tututu oa, alo ɖe wògada agba si kpe wu boŋ ɖe mía dzia? Mina míakpɔ alesi wòka míi ɖa le nyati si kplɔe ɖo me.

Etsɔme Kae Li Na Alẽawo Kple Gbɔ̃awo?

“[Amã amewo] me atso wo nɔewo gbɔ, abe alesi alẽkplɔla mãa alẽwo kple gbɔ̃wo mee ene.”—MATEO 25:32.

 1, 2. Nukata wòle be míatsɔ ɖe le alẽwo kple gbɔ̃wo ŋuti lododo la me?

EDZE ƒã be Yesu Kristoe nye Nufiala gãtɔ kekeake si nɔ anyigba dzi. (Yohanes 7:46) Eƒe nufiamɔnuwo dometɔ ɖekae nye lododowo, alo kpɔɖeŋuwo, zazã. (Mateo 13:34, 35) Wonɔa bɔbɔe gake wonaa gbɔgbɔ me kple nyagblɔɖi me nyateƒe goglowo me kɔna nyuie.

² Le Yesu ƒe lododo le alẽwo kple gbɔ̃wo ŋu me la, efia asi ɣeyiɣi si me wòawɔ dɔ tɔxɛ aɖe be: “Ne Amegbetɔvi la ava le eƒe ŋutikɔkɔe me, eye . . . ” (Mateo 25:31) Ele be míatsɔ ɖe le esia me elabena enye kpɔɖeŋu si Yesu wɔ tsɔ ƒo biabia si nye: “Ka enye wò vava la kple xexeame ƒe nuwuwu la ƒe dzesii?” la ŋu ɖoɖo ta. (Mateo 24:3) Gake nukae esia fia na mí?

 3. Le Yesu ƒe nuƒoa ƒe gɔmedzedze la, nukae wògblɔ be adzɔ ne xaxa gã la dze egɔme teti?

³ Yesu gblɔ nudzɔdzɔ ɖedzesi siwo ava “enumake” ne xaxa gã la dze egɔme la ɖi, siwo míele mɔ kpɔm na. Egblɔ be ekema “Amegbetɔvi la ƒe dzesi” ado. Esia akpɔ ŋusẽ ɖe “anyigba dzi ƒomeawo katã” siwo “[akpɔ] Amegbetɔvi la le dziƒolilikpowo dzi [wògbɔna] kple ŋusẽ kple ŋutikɔkɔe geɖe” la dzi vevie. Amegbetɔvi la ‘ƒe dɔlawo’ akpe ɖe eŋu. (Mateo 24:21, 29-31)a Ke alẽwo kple gbɔ̃wo ŋuti lododoa ya ɖe? Egbegbe Bibliawo ŋlɔnɛ ɖe ta 25 lia me, gake Yesu ƒe nyaŋuɖoɖo si gaƒo nu geɖe le eƒe vava le ŋutikɔkɔe me ŋu kple eƒe susu tɔtrɔ ɖe ʋɔnudɔdrɔ̃ “dukɔwo katã” ŋu ƒe akpa aɖee wònye.—Mateo 25:32.

Amesiwo Woyɔ le Lododoa Me

 4. Aleke woƒo nu tso Yesu ŋui le alẽwo kple gbɔ̃wo ŋuti lododoa ƒe gɔmedzedze, eye amekawo hãe woyɔ?

⁴ Yesu dze eƒe lododoa gɔme be: “Ne Amegbetɔvi la ava.” Anɔ eme be ènya amesi “Amegbetɔvi la” nye. Nyanyuigbalẽŋlɔlawo zã nyagbɔgblɔ ma na Yesu enuenu. Yesu ŋutɔ hã zãe, eye ɖikeke mele eme o be Daniel ƒe ŋutega si me wòkpɔ “nane . . . abe amegbetɔ ene” si va Amegã ɖeɖia gbɔ be yeaxɔ “ŋusẽ, bubu kple dziɖuɖu” le lae nɔ eƒe susu me. (Daniel 7:13, 14; Mateo 26:63, 64; Marko 14:61, 62) Togbɔ be Yesue nye ame vevitɔ le lododo sia me hã la, menye eya ɖekae le eme o. Egblɔ le nuƒo sia, si le Mateo 24:30, 31 me do ŋgɔ be ne Amegbetɔvi la ‘va kple ŋusẽ kple ŋutikɔkɔe geɖe’ la, eƒe dɔlawo awɔ akpa vevi aɖe. Nenema kee alẽwo kple gbɔ̃wo ŋuti lododoa hã ɖee fia be mawudɔlawo akpe ɖe Yesu ŋu ne ‘enɔ eƒe ŋutikɔkɔezikpui la dzi’ be yeadrɔ̃ ʋɔnu. (Tsɔe sɔ kple Mateo 16:27.) Gake dziƒoe Ʋɔnudrɔ̃la la kple eƒe dɔlawo le, eyata ɖe woƒo nu tso amegbetɔwo ŋu le lododoa mea?

 5. Aleke míawɔ anya Yesu ‘nɔviwo’?

⁵ Ŋkuléle ɖe lododoa me na míekpɔ ƒuƒoƒo etɔ̃ siwo wòhiã be míade dzesii. Tsɔ kpe ɖe alẽawo kple gbɔ̃awo ŋu la, Amegbetɔvi la yɔ ƒuƒoƒo etɔ̃lia si nyanya le vevie le dzesidede amesiwo alẽawo kple gbɔ̃awo nye me. Yesu yɔ hatsotso etɔ̃lia sia be yeƒe gbɔgbɔmenɔviwo. (Mateo 25:40, 45) Woanye tadeagula vavãwo godoo, elabena Yesu gblɔ be: “Amesi ke le Fofonye, . . . ƒe lɔlɔ̃nu wɔm la, eyae nye nɔvinyeŋutsu, enye nɔvinyenyɔnu, ganye danye hã.” (Mateo 12:50; Yohanes 20:17) Paulo ŋlɔ nu tso Kristotɔ siwo nye “Abraham ƒe ƒome” kple mawuviwo ŋu tsɔ yɔwoe tẽ. Eyɔ amesiawo be Yesu ‘nɔviwo’ kple “dziƒoyɔyɔ gomekpɔlawo.”—Hebritɔwo 2:9–3:1; Galatiatɔwo 3:26, 29.

 6. Amekawoe nye Yesu nɔvi ‘suewo’?

⁶ Nukata Yesu gblɔ be ye nɔvi ‘suewo’? Nya si wògblɔ eƒe apostoloawo se do ŋgɔ la dze le nya mawo me. Esi Yesu tsɔ Yohanes Amenyrɔ̃ɖetsimela, si ku do ŋgɔ na Yesu eye le ema ta anyigbadzinɔnɔ ƒe mɔkpɔkpɔe le esi la, nɔ sɔsɔm kple amesiwo ava nɔ agbe le dziƒo la, egblɔ be: “Ame aɖeke metsi tre kpɔ, si wu Yohanes [Amenyrɔ̃ɖetsimela la] o; gake amesi nye suetɔ le dziƒofiaɖuƒe la me la, wu eyama.” (Mateo 11:11) Ðewohĩ amesiwo ayi dziƒo la dometɔ aɖewo nye ame ŋkutawo le hamea me, abe apostoloawo ene, eye ame bubuwo mede wo nu o, gake wo katã nye Yesu ƒe gbɔgbɔmenɔviwo. (Luka 16:10; Korintotɔwo I, 15:9; Efesotɔwo 3:8; Hebritɔwo 8:11) Eyata ne edze abe wo dometɔ aɖewo nye ame tsɛwo ene le anyigba dzi hã la, nɔviawoe wonye eye ele be woawɔ nu ɖe wo ŋu abe nɔviawo ene.

Amekawoe Alẽawo Kple Gbɔ̃awo Nye?

 7, 8. Nya kae Yesu gblɔ le alẽawo ŋu, eyata nya kae míate ŋu agblɔ le wo ŋu?

⁷ Míexlẽ le ʋɔnudɔdrɔ̃ alẽawo ŋu me be: “[Yesu] agblɔ na amesiwo le eƒe nuɖusi me la bena: Miva, mi Fofonye ƒe ame yayrawo, minyi fiaɖuƒe, si wodzra ɖo ɖi na mi tso xexeme ƒe gɔmeɖoɖoanyi me la, ƒe dome! Elabena dɔ wum, eye miena nuɖuɖum; tsikɔ wum, eye miena tsim; amedzro menye, eye miexɔm medze mia gbɔ. Mele amama, eye miedo awu nam; nye lãme gblẽ, eye mieva kpɔm ɖa, mele gaxɔ me, eye mieva gbɔnye. Tete ame dzɔdzɔeawo axɔ edzi nɛ agblɔ bena: Aƒetɔ, gbekagbee míekpɔ bena, dɔ le wuwòm, eye míenyi wò, alo tsikɔ le wuwòm eye míena tsi wò mahã? Gbekagbe míekpɔ wò nènye amedzro, eye míexɔ wò nèdze mía gbɔ, alo amama, eye míedo awu na wò mahã? alo gbekagbe míekpɔ bena, wò lãme gblẽ, alo nèle gaxɔ me, eye míeva kpɔ wò ɖa mahã? Eye fia la aɖo eŋu agblɔ na wo bena: Vavã mele egblɔm na mi bena: Nusianu, si miewɔ na nenem nɔvinye sue siawo dometɔ ɖeka la, nyee miewɔe na.”—Mateo 25:34-40.

⁸ Edze ƒã be amegbetɔwo ƒe hatsotso aɖee alẽ siwo wodrɔ̃ ʋɔnu na be wodze anɔ Yesu ƒe nuɖusi me afisi bubu kple amenuveve le la tsitre ɖi na. (Efesotɔwo 1:20; Hebritɔwo 1:3) Nukae wowɔ eye ɣekaɣie? Yesu gblɔ be wotsɔ amenuveve, bubudeameŋu kple dɔmenyo na nuɖuɖu, nunono, kple awu ye, eye wokpe ɖe ye ŋu esi yedze dɔ alo nɔ gaxɔ me. Esi alẽawo gblɔ be yewomewɔ nusiawo na Yesu ŋutɔ o la, egblɔ be wokpe ɖe yeƒe gbɔgbɔmenɔvi Kristotɔ amesiamina susɔeawo ŋu eyata yee wowɔe na le gɔmesese ma nu.

 9. Nukatae menye Ƒe Akpe Ðeka Dziɖuɖua mee lododoa ava eme le o?

⁹ Menye Ƒe Akpe Ðeka Dziɖuɖua mee lododoa ava eme o, elabena amesiaminawo maganye amegbetɔ siwo anɔ dɔwuame, tsikɔwuame, dɔléle, alo gaxɔmenɔnɔ ƒe fu kpem ɣemaɣi o. Gake wo dometɔ geɖe to nusiawo me le nuɖoanyi sia ƒe nuwuɣia me. Tso esime wonyã Satana ɖo ɖe anyigba dzi la, eɖe eƒe dziku ɖe ame susɔeawo ŋu etɔxɛe, eye wòhe fewuɖuɖu, fuwɔame, kple ku va wo dzi.—Nyaɖeɖefia 12:17.

10, 11. (a) Nukata masɔ be míabu be amesiame si awɔ nu nyui aɖe na Yesu nɔviwo la anɔ alẽawo dome o? (b) Amekawoe alẽawo tsi tre ɖi na wòsɔ?

¹⁰ Ðe Yesu le gbɔgblɔm be ne amesiame nya nyo dɔme na ye nɔviawo dometɔ ɖeka vie, abe abolo sue alo tsinono nana wo ene ko la, adze anye alẽ siawo dometɔ ɖekaa? Enye nyateƒe be dɔmenyo siawo wɔwɔ ate ŋu aɖe amegbetɔ ƒe nyuiwɔwɔ afia, gake le nyateƒe me la, edze abe wobia nu geɖe wu tso alẽ siwo le lododo sia me la si ene. Le kpɔɖeŋu me, menye mawudzimaxɔsela alo osɔfo siwo nyo dɔme na nɔviawo kpɔ lae Yesu wɔnɛ o. Ke boŋ Yesu yɔ alẽawo be “ame dzɔdzɔewo” zi eve sɔŋ. (Mateo 25:37, 46) Eyata alẽawo anye amesiwo tsɔ ɣeyiɣi didi aɖe do alɔ Kristo nɔviwo—na kpekpeɖeŋu wo vevie—eye woɖe xɔse fia ale gbegbe be wokpɔ tenɔnɔ nyui le Mawu ƒe ŋkume.

¹¹ Le ƒe alafa siwo va yi me la, ame geɖe, abe Abraham ene kpɔ tenɔnɔ nyui. (Yakobo 2:21-23) Wobu Noa, Abraham, kple nuteƒewɔla bubuwo de “alẽ bubu” siwo anɔ agbe le Paradiso me le Mawu ƒe Fiaɖuƒea ƒe dziɖuɖu te la dome. Le míaƒe ɣeyiɣiawo me la, ame miliɔn geɖe bubuwo ge ɖe tadedeagu vavãtɔ me va zu alẽ bubuwo eye wo kple amesiaminawo va zu “alẽha ɖeka.” (Yohanes 10:16; Nyaɖeɖefia 7:9) Amesiawo siwo si anyigbadzinɔnɔ ƒe mɔkpɔkpɔ le la bua Yesu nɔviwo be wonye Fiaɖuƒea ƒe ame dɔdɔwo eye le ema ta wokpe ɖe wo ŋu—le ŋutilã me kple gbɔgbɔ me siaa. Yesu bua nusi alẽ bubuawo wɔna na nɔvia siwo le anyigba dzi la be yee wowɔe na. Woatso afia na amesiawo dometɔ siwo anɔ agbe la akpe ɖe alẽawo ŋu ne eva le ʋɔnu drɔ̃m dukɔwo.

12. Nukata alẽawo abia nya le dɔmenyo siwo wowɔ na Yesu ŋu?

¹² Ne alẽ bubuawo kpe ɖe amesiaminawo ŋu le gbeƒã ɖem nyanyuia eye wonaa kpekpeɖeŋu wo la, ke nukata woabia be: “Aƒetɔ, gbekagbee míekpɔ bena, dɔ le wuwòm, eye míenyi wò, alo tsikɔ le wuwòm, eye míena tsi wò mahã?” (Mateo 25:37) Ate ŋu anye susu vovovowo tae. Lododoe nya sia nye. Yesu zãe tsɔ ɖe alesi wòtsɔ ɖe le eƒe gbɔgbɔmenɔviwo me vevie la fia; esea veve kpli wo hekpea fu ɖe wo ti. Yesu gblɔ do ŋgɔ be: “Amesi ke xɔa mi la, nyee wòxɔ, eye amesi ke xɔam la, exɔ amesi dɔm ɖa.” (Mateo 10:40) Yesu keke gɔmeɖosea ɖe enu le lododo sia me tsɔ ɖee fia be nusianu si woawɔ ɖe nɔviawo ŋu (nyui alo vɔ̃ o) la ɖoa keke dziƒo ke; ele abe eya ŋutɔe wowɔe na le dziƒo ene. Azɔ hã Yesu te gbe ɖe Yehowa ƒe ʋɔnudɔdrɔ̃ ƒe dzidzenu dzi le afisia, eye ena eme kɔ be Mawu ƒe ʋɔnudɔdrɔ̃ sɔ hele dzɔdzɔe, eɖanye amenuveve tɔ alo fɔbubu tɔ o. Gbɔ̃awo mate ŋu ado taflatse be, ‘Ne ɖe míekpɔ wò ŋutɔ la, ne míewɔe na wò’ o.

13. Nukata amesiwo ɖi gbɔ̃wo ayɔ Yesu be “Aƒetɔ”?

¹³ Ne míenya ɣeyiɣi si me wodrɔ̃ ʋɔnu si ŋu woƒo nu tsoe le lododo sia me la, míase amesiwo gbɔ̃awo nye me nyuie wu. Ava eme esime “Amegbetɔvi la ƒe dzesi lado ɖe dziŋgɔli me, eye anyigba dzi ƒomeawo katã woado konyifaɣli, eye woakpɔ Amegbetɔvi la [wògbɔna] kple ŋusẽ kple ŋutikɔkɔe geɖe.” (Mateo 24:29, 30) Amesiwo atsi agbe le xaxa si ava Babilon Gã si wɔ ŋlɔmi le Fia la nɔviwo ŋu dzi me la atsɔ mɔkpɔkpɔbuɖeame ayɔ Ʋɔnudrɔ̃la la be “Aƒetɔ,” ahakpɔ mɔ be aɖe yewoƒe agbe.—Mateo 7:22, 23; tsɔe sɔ kple Nyaɖeɖefia 6:15-17.

14. Nuka dzie Yesu anɔ te ɖo adrɔ̃ ʋɔnu alẽawo kple gbɔ̃awo?

¹⁴ Gake menye nya siwo amesiwo nye tsã sɔlemedelawo, mawudzimaxɔselawo, alo ame bubuwo atsi dzodzodzoe agblɔ dzie Yesu atu eƒe ʋɔnudɔdrɔ̃ ɖo o. (Tesalonikatɔwo II, 1:8) Ke boŋ ʋɔnudrɔ̃la la adzro amewo ƒe dzi kple alesi wowɔ nu ɖe “[nɔvia] sue siawo dometɔ ɖeka” gɔ̃ hã ŋu va yi la me. Enye nyateƒe be Kristotɔ amesiamina siwo susɔ ɖe anyigba dzi ƒe xexlẽme dzi le ɖeɖem kpɔtɔ. Gake zi alesi amesiamina siwo nye “dɔla nuteƒewɔla kple aɖaŋudzela” la yi edzi naa gbɔgbɔmenuɖuɖu kple mɔfiafia la, mɔnukpɔkpɔ le amesiwo ava zu alẽwo si be woawɔ nyui na dɔla ƒe habɔbɔa, abe alesi ‘ameha gã siwo tso dukɔ sia dukɔ kple to sia to kple du sia du me’ la wɔ ene.—Nyaɖeɖefia 7:9, 14.

15. (a) Aleke ame geɖe ɖee fia be yewoɖi gbɔ̃woe? (b) Nukata wòle be míatsri egbɔgblɔ be ame aɖe nye alẽ alo gbɔ̃?

¹⁵ Aleke amewo wɔ nu ɖe Kristo nɔviwo kple alẽ bubuawo me tɔ miliɔn geɖe siwo wɔ ɖeka kpli wo hezu alẽha ɖeka la ŋu? Ame geɖe manya dze Kristo teƒenɔlawo dzi tẽ o, gake womewɔ nu ɖe eƒe amewo ŋu lɔlɔ̃tɔe hã o. Esi amesiwo ƒe nɔnɔme ɖi gbɔ̃wo tɔ lɔ̃ xexe vɔ̃ɖia wu ta la, wogbea Fiaɖuƒegbedasia, ne wosee tẽ alo to mɔ bubu aɖe nu. (Yohanes I, 2:15-17) Gake le ye katã me la, Yesue nye amesi wotia be wòadrɔ̃ ʋɔnu mlɔeba. Menye míawoe afia amesiwo nye alẽwo kple amesiwo nye gbɔ̃wo o.—Marko 2:8; Luka 5:22; Yohanes 2:24, 25; Romatɔwo 14:10-12; Korintotɔwo I, 4:5.

Etsɔme Kae Li na Ƒuƒoƒo Ðesiaɖe?

16, 17. Etsɔme kae anɔ alẽawo si?

¹⁶ Yesu gblɔ afia si wòatso na alẽawo be: “Miva, mi Fofonye ƒe ame yayrawo, minyi fiaɖuƒe, si wodzra ɖo ɖi na mi tso xexeme ƒe gɔmeɖoɖoanyi me la, ƒe dome!” Amekpekpe vividoɖeameŋutɔe kae nye si—“Miva”! Woava wɔ nuka? Woava nɔ agbe mavɔ, abe alesi wògblɔ tsɔ ƒo etae ene be: “Ame dzɔdzɔewo [ayi] ɖe agbe mavɔ la me.”—Mateo 25:34, 46.

¹⁷ Yesu ɖe nusi wobia tso amesiwo aɖu fia kplii le dziƒo si la fia le talentowo ŋuti lododoa me, gake nusi wodi tso Fiaɖuƒea teviwo sie wògblɔ le lododo sia me. (Mateo 25:14-23) Ne míagblɔe kaŋ la, alẽawo anyi Yesu ƒe Fiaɖuƒea ƒe dziɖuƒe si le anyigba dzi la dome le woƒe alɔdodo nɔviawo tso dzi blibo me ta. Woase vivi le agbe me le paradisonyigba dzi—nusi Mawu dzra ɖo ɖi na wo “tso” amesiwo akpɔ ɖeɖe ƒe “xexeame ƒe gɔmedzedze.”—Luka 11:50, 51.

18, 19. (a) Afia kae Yesu atso na gbɔ̃awo? (b) Aleke míate ŋu aka ɖe edzi be menye fu mavɔe gbɔ̃awo akpe o?

¹⁸ Aleke afia si woatso na gbɔ̃wo ato vovoe nye si! “Tete wòagblɔ na amesiwo le mia me la hã bena: Mite ɖa tso gbɔnye, mi amesiwo woƒo fi de; miyi ɖe dzo mavɔ, si wodzra ɖo ɖi na Abosam kple eƒe dɔlawo la me! Elabena dɔ wum, eye miena nuɖuɖum o; tsikɔ wum, eya miena tsim o; amedzro menye, eye miexɔm medze mia gbɔ o; menɔ amama, eye miedo awu nam o; nye lãme gblẽ, menɔ gaxɔ me, eye mieva kpɔm ɖa o. Tete woawo hã woaxɔ edzi nɛ agblɔ bena: Aƒetɔ, gbekagbe miekpɔ wò bena, dɔ le wuwòm, alo tsikɔ le wuwòm, alo nènye amedzro, alo nèle amama, alo wò lãme gblẽ, alo nèle gaxɔ me, eye míesubɔ wò o mahã? Tete wòaɖo ŋu na wo agblɔ bena: Vavã mele egblɔm na mi bena: Nusianu, si miewɔ na nenem me sue siawo dometɔ ɖeka o la, miewɔe na nye hã o.”—Mateo 25:41-45.

¹⁹ Biblia-nusrɔ̃viwo nya be esia mate ŋu afia be amesiwo ƒe nɔnɔme ɖi gbɔ̃wo la ƒe luʋɔ makumakuwo akpe fu le dzo mavɔ aɖe me o. Ao, elabena luʋɔwoe amegbetɔwo nye; luʋɔ makumaku mele wo si o. (Mose I, 2:7; Nyagblɔla 9:5, 10; Xezekiel 18:4) Esi Ʋɔnudrɔ̃la la tso afia na gbɔ̃awo be woayi ɖe “dzo mavɔ” me la, efia tsɔtrɔ̃ si ŋu etsɔmemɔkpɔkpɔ aɖeke mele o, si anye Abosam kple eƒe gbɔgbɔ vɔ̃wo hã ƒe nuwuwu mavɔ. (Nyaɖeɖefia 20:10, 14) Eyata afia siwo to vovo ye Yehowa ƒe Ʋɔnudrɔ̃la la atso na amewo. Agblɔ na alẽawo be, “Miva”; eye wòagblɔ na gbɔ̃awo be, “Mite ɖa tso gbɔnye.” Alẽawo anyi “agbe mavɔ” dome. Gbɔ̃awo ayi ɖe ‘tsɔtsrɔ̃ mavɔ’ me.—Mateo 25:46.b

Nukae Wòfia na Mí?

20, 21. (a) Dɔ vevi kae le Kristotɔwo si be woawɔ? (b) Amewo me mamã kae le edzi yim? (d) Nɔnɔme ka mee amewo anɔ ne alẽwo kple gbɔ̃wo ŋuti lododoa dze emevava gɔme?

²⁰ Nu geɖe nɔ anyi siwo ŋu Yesu ƒe apostolo ene siwo se eƒe nyaŋuɖoɖo le eƒe anyinɔnɔ kple nuɖoanyiawo ƒe nuwuɣi ŋuti la abu. Ehiã be woanɔ ŋudzɔ ahanɔ mo xexi. (Mateo 24:42) Ele be woawɔ ɖaseɖiɖidɔ si ŋu woƒo nu tsoe le Marko 13:10 la hã. Yehowa Ðasefowo le dɔ ma wɔm ŋusẽtɔe egbea.

²¹ Gake nukae alẽwo kple gbɔ̃wo ŋuti lododoa ƒe gɔmesese yeye sia fia na mí? Amewo le akpa si woanɔ la tiam xoxo. Ame aɖewo le ‘mɔ gbadza si ɖo ta tsɔtsrɔ̃ me la’ dzi, eye ame bubuwo hã le agbagba dzem be yewoanɔ ‘mɔ xaxɛ si ɖo ta agbe me la’ dzi. (Mateo 7:13, 14) Gake ɣeyiɣi si me Yesu atso afia mamlea na alẽ kple gbɔ̃ siwo le lododoa me la le ŋgɔ gbɔna. Ne Amegbetɔvi la va hezu Ʋɔnudrɔ̃la la, akpɔe be nyateƒe Kristotɔ geɖe—siwo nye alẽ adzɔgbeɖela ƒe “ameha gã” aɖe—adze be woato “xaxa gã” la ƒe akpa mamlea me ayi xexe yeyea me. Ele be mɔkpɔkpɔ ma nana míakpɔ dzidzɔ fifia. (Nyaɖeɖefia 7:9, 14) Gake ame gbogbo siwo tso “dukɔ sia dukɔ” me awɔ nu abe gbɔ̃ mabunuwo ene. ‘Woayi ɖe tsɔtsrɔ̃ mavɔ me.’ Gbɔdzɔe kae nye si wòahe va anyigba dzi!

22, 23. Esi wònye etsɔmee lododoa ava eme la, nukata míaƒe gbeƒãɖeɖedɔa le vevie egbea?

²² Togbɔ be etsɔme si gbɔna kpuie ye ʋɔnudɔdrɔ̃ si ŋu woƒo nu tsoe le lododoa me ava eme le hã la, nu vevi aɖe le edzi yim fifia gɔ̃ hã. Mí Kristotɔwo míele gbeƒãɖeɖe gbedasi si mãa amewo me ƒe agbeɖeɖedɔ aɖe wɔm. (Mateo 10:32-39) Paulo ŋlɔ bena: “Elabena amesiame, si ayɔ [Yehowa] ƒe ŋkɔa dzi la, woaɖee. Azɔ aleke woayɔ amesi dzi womexɔ se o la mahã? Ke aleke woaxɔ amesi ŋutinya womese kpɔ o la dzi ase mahã? Ke aleke woase nya, ne nyanyui gbeƒãɖela aɖeke mele wo si o mahã?” (Romatɔwo 10:13, 14) Míaƒe dutoƒosubɔsubɔdɔa na Mawu ƒe ŋkɔ kple eƒe ɖeɖegbedasia le amesiwo le dukɔ siwo wu 230 me gbɔ ɖom. Kristo nɔvi amesiaminawoe gale ŋgɔ xɔm le dɔ sia me. Alẽ bubu siwo ade miliɔn atɔ̃ va kpe ɖe wo ŋu fifia. Eye amesiwo le xexeame katã le gbedasi si ƒe gbeƒã ɖem Yesu nɔviwo le la xɔm.

²³ Ame geɖe sea míaƒe gbedasia esi míeɖea gbeƒã tso aƒeme yi aƒeme alo le vome. Ame bubuwo ate ŋu anya nu tso Yehowa Ðasefowo kple nya si míegblɔna ŋu to mɔ si mele nyanya na mí o nu. Ne ʋɔnudrɔ̃ɣia ɖo la, afikae Yesu alé ŋku ɖe amesiwo dome ame le kple ƒome si me wòle ƒe ŋusẽkpɔɖeamedzi ŋu ase ɖo? Míenya o, eye mehiã be míasusu nya aɖe agblɔ o. (Tsɔe sɔ kple Korintotɔwo I, 7:14.) Ame geɖe doa tokui Mawu ƒe amewo, woɖua fewu le wo ŋu, alo kpɔa gome le wo yome titi tẽ me. Eyata ɣeyiɣi vevi aɖe mee míele; amesiawo ƒe nuwɔna ate ŋu ana woava zu amesiwo Yesu abu gbɔ̃woe.—Mateo 10:22; Yohanes 15:20; 16:2, 3; Romatɔwo 2:5, 6.

24. (a) Nukata wòle vevie be amewo nawɔ nu wòasɔ ɖe míaƒe gbeƒãɖeɖea nu? (b) Nɔnɔme kae nusɔsrɔ̃ sia na wòsu asiwò le míaƒe subɔsubɔdɔa ŋu?

²⁴ Gake dzidzɔtɔe la, ame geɖe xɔa nya la nyuie, wosrɔ̃a Mawu ƒe Nya la, eye wova zua Yehowa ƒe Ðasefowo. Ame aɖewo siwo wɔa nu fifia abe gbɔ̃wo ene ate ŋu atrɔ woƒe nɔnɔme ava zu abe alẽwo ene. Nya lae nye be amesiwo xɔa nya la eye wonaa kpekpeɖeŋu Kristo nɔvi susɔeawo vevie la to ema me ɖo kpe nusi dzi Yesu anɔ te ɖo axɔ wo ɖe eƒe nuɖusime ne eva nɔ eƒe fiazikpui dzi be yeadrɔ̃ ʋɔnu le ɣeyiɣi si gbɔna kpuie me la dzi fifia. Wole amesiawo yram eye woayi edzi ayra wo. Eyata ele be lododo sia nade dzo mía me be míawɔ dɔ veviedodotɔe le Kristotɔwo ƒe subɔsubɔdɔa me. Hafi wòatsi megbe akpa la, míedi be míawɔ míaƒe ŋutete katã aɖe gbeƒã Fiaɖuƒea ŋuti nyanyuia eye míato ema me ana mɔnukpɔkpɔ amewo be woawɔ nu ɖe enu. Ekema míagblẽ kpɔtɔea ɖe Yesu si me be wòadrɔ̃ ʋɔnua, fɔbubu tɔ loo alo amenuveve tɔ.—Mateo 25:46.