NUSƆSRƆ̃ 20
Ðoɖo Si Nu Nuwo Le Le Kristo Hamea Me
Yehowa nye Mawu si wɔa nu ɖe ɖoɖo nu. (1 Korintotɔwo 14:33) Eya ta, esɔ be míakpɔ mɔ be eƒe amewo hã nawɔ nu ɖe ɖoɖo nu. Ðoɖo ka nue nuwo zɔna ɖo le Kristo hamea me? Akpa kae míate ŋu awɔ be nuwo nayi edzi nyuie le hamea me?
1. Ame kae nye Kristo hamea ƒe ta?
‘Kristo ye nye hamea ƒe ta.’ (Efesotɔwo 5:23) Togbɔ be dziƒoe wòle hã, eyae kpɔa dɔ siwo wɔm Yehowa ƒe amewo le le xexea me godoo la dzi. Eɖo hamemetsitsi siwo tsi le xɔse me la ƒe ha aɖe wonye “kluvi nuteƒewɔla kple aɖaŋudzela,” si míegayɔna be Dɔdzikpɔha. (Xlẽ Mateo 24:45-47.) Dɔdzikpɔha siae naa mɔfiamewo hameawo le xexea me godoo, abe ale si ko apostoloawo kple hamemetsitsi siwo nɔ Yerusalem le blema la fia mɔ Kristo hamea ene. (Dɔwɔwɔwo 15:2) Gake menye ŋutsu siawoe nye míaƒe habɔbɔa ƒe kplɔlawo o. Ke boŋ, wodzroa Biblia me be yewoanya nu si Yehowa di tso yewo si eye wobɔbɔna ɖe Yesu ƒe kpɔkplɔ te.
2. Ame kawoe nye hamemetsitsiwo, eye dɔ kae wowɔna?
Hamemetsitsiwo nye ŋutsu Kristotɔ siwo wɔ nuteƒe ƒe geɖe, wozãa Biblia tsɔ fiaa nu Yehowa ƒe amewo, wokpena ɖe wo ŋu, eye wodea dzi ƒo na wo. Womexea fe na wo ɖe woƒe dɔa ta o. Ke boŋ, wosubɔna ‘kple lɔlɔ̃nu faa le Mawu ŋkume; menye le viɖe ƒoɖi didi ta o, ke boŋ kple dzi faa.’ (1 Petro 5:1, 2) Subɔsubɔdɔwɔlawo kpea asi ɖe hamemetsitsiwo ŋu, eye le ɣeyiɣi aɖe megbe la, subɔsubɔdɔwɔlawo hã ate ŋu ava dze anye hamemetsitsiwo.
Dɔdzikpɔhaa ɖoa hamemetsitsi aɖewo wonyea nutome sue dzikpɔlawo. Nutome sue dzikpɔlawo srãa hame vovovowo kpɔna be yewoana mɔfiame wo ahade dzi ƒo na wo. Nutome sue dzikpɔlawo ɖoa hamemetsitsiwo kple subɔsubɔdɔwɔlawo, gake hafi woaɖo wo la, wokpɔa egbɔ be woɖo Ŋɔŋlɔawo ƒe nudidiwo gbɔ.—1 Timoteo 3:1-10, 12; Tito 1:5-9.
3. Nu kae wòle na Ðasefo ɖe sia ɖe be wòawɔ?
Ame siwo katã le hamea me la ‘kafua Yehowa ƒe ŋkɔ.’ Wowɔa esia ne wodea hame ƒe kpekpewo hekpɔa gome le wo me eye woɖea gbeƒã nya nyuia le woƒe ŋutete nu.—Xlẽ Psalmo 148:12, 13.
SRƆ̃ NU BUBUWO
Àsrɔ̃ nu tso kplɔla si ƒomevi Yesu nye kple ale si hamemetsitsiwo dzea agbagba be yewoasrɔ̃ eƒe kpɔɖeŋu la ŋu. Azɔ hã, àkpɔ ale si míate ŋu awɔ nu aduadu kple Yesu kpakple hamemetsitsiwo.
4. Yesu nye kplɔla si ƒe dɔme nyo
Yesu kpe mí lɔlɔ̃tɔe be míava ye gbɔ. Mixlẽ Mateo 11:28-30, eye miadzro nyabiase siawo me:
Kplɔla ka ƒomevie Yesu nye? Aleke Yesu di be yeana míase le mía ɖokui me?
Aleke hamemetsitsiwo srɔ̃a Yesu ƒe kpɔɖeŋui? Mikpɔ VIDEOA.
Biblia gblɔ ale si tututu wòle be hamemetsitsiwo nawɔ woƒe dɔae.
Mixlẽ Yesaya 32:2 kple 1 Petro 5:1-3, eye miadzro nyabiase siawo me:
Aleke nèse le ɖokuiwò me esi nèkpɔe be hamemetsitsiwo dzea agbagba vevie be yewoana gbɔdzɔe amewo abe ale si Yesu wɔe ene?
Mɔ bubu kawo nue hamemetsitsiwo srɔ̃a Yesu ƒe kpɔɖeŋu le?
5. Hamemetsitsiwo ɖoa kpɔɖeŋu nyui na hamea
Nɔnɔme kae wòle be wòanɔ hamemetsitsiwo si ɖe woƒe dɔa ŋu? Mikpɔ VIDEOA.
Yesu ɖo kpɔɖeŋu ɖi na ame siwo xɔa ŋgɔ le hamea me. Mixlẽ Mateo 23:8-12, eye miadzro biabia sia me:
Le Biblia ƒe nya nu la, nu kae wodi tso hamemetsitsiwo si? Ðe nèsusu be subɔsubɔhakplɔlawo wɔna ɖe nya si Biblia gblɔ la dzia?
A. Hamemetsitsiwo doa ŋusẽ woawo ŋutɔwo kple woƒe ƒomea ƒe xɔse
B. Hamemetsitsiwo tsɔa ɖe le eme na ame sia ame le hamea me
D. Hamemetsitsiwo ɖea gbeƒã edziedzi
Ð. Hamemetsitsiwo fiaa nu hamea. Wokpea asi ɖe Fiaɖuƒe Akpataa me dzadzraɖo kple dɔ bubuwo hã ŋu
6. Míate ŋu awɔ nu aduadu kple hamemetsitsiwo
Biblia gblɔ susu vevi aɖe si tae wòle be míawɔ nu aduadu kple hamemetsitsiwo. Mixlẽ Hebritɔwo 13:17, eye miadzro nyabiase siawo me:
Ðe nèkpɔe be enyo be Biblia gblɔ be míaɖo to ame siwo le ŋgɔ xɔm le mía dome eye míabɔbɔ mía ɖokui na woa? Nu ka tae nèɖo eŋu nenema?
Mixlẽ Luka 16:10, eye miadzro nyabiase sia me:
Nu ka tae wòle vevie be míaɖo to hamemetsitsiwo le nu suetɔ gɔ̃ hã me?
AME AÐEWO GBLƆNA BE: “Mehiã kokoko be ame nanɔ subɔsubɔha aɖe me o.”
Viɖe kawoe nèsusu be ame akpɔ ne ewɔa ɖeka kple hamea wosubɔa Mawu?
NU SIWO MÍESRƆ̃
Yesu ye nye hamea ƒe ta. Edzɔa dzi na mí be míaɖo to hamemetsitsi siwo le Yesu ƒe kpɔkplɔ te, elabena wonaa gbɔdzɔe mí eye woɖoa kpɔɖeŋu nyui na mí.
Numetoto
Ame kae nye hamea ƒe ta?
Aleke hamemetsitsiwo kpena ɖe hamea ŋui?
Nu kae wòle na Yehowa subɔla ɖe sia ɖe be wòawɔ?
KU NU ME TSO NYATIA ŊU
Le video sia me la, àkpɔ nu siwo ɖo kpe edzi be Dɔdzikpɔhaa kple hamemetsitsiwo tsɔ ɖe le eme na Kristotɔwo vevie egbea.
Àkpɔ dɔ siwo nutome sue dzikpɔlawo wɔna la le video sia me.
Xlẽ nu tso akpa vevi si nyɔnuwo wɔna le hamea me ŋu.
“Ðe Nyɔnu Siwo Nye Yehowa Ðasefowo La Fiaa Nua?” (Gbetakpɔxɔ, September 1, 2012)
Xlẽ nu tso ale si hamemetsitsiwo kua kutri vevie ale be woate ŋu ade dzi ƒo na ame siwo le hamea me la ŋu.
“Hamemetsitsiwo—‘Wonye Hadɔwɔlawo Na Míaƒe Dzidzɔkpɔkpɔ’” (Gbetakpɔxɔ, January 15, 2013)