September

Ɔsɛ dɛ yɛyer hɛnho dɛ yɛbɛma hɛnho akokwaa, na sɛ hɛnho kokwaa so a, ɔsɛ dɛ yɛbɔ hɛnho mbɔdzen na yɛanntsew annsan. Iyi kyerɛ dɛ sɛ hɛnho akokwaa a, ɔnnsɛ dɛ yɛgye hɛnho dzi dodoodow dɛ yeewie nyin. (1 Cor. 10:12) Mbom ɔsɛ dɛ ‘yɛpɛnsapɛnsa hɛn mu hwɛ’ dɛ yegu do ara rinya nkɔenyim anaa. Krataa a ɔsomafo Paul kyerɛwee kɛmaa Colossaefo no mu no, ɔsanee kaa siantsir a sɛ hɛnho kokwaa a ɔnnsɛ dɛ yenya adwen dɛ yeewie no ho asɛm. Nna Colossaefo no yɛ Christianfo a hɔnho akokwaa, naaso Paul bɔɔ hɔn kɔkɔ dɛ wɔnhwɛ yie na woennya adwen a hɔn a wɔnnsom Jehovah no wɔ no bi. (Col. 2:​6-10) Afei so, nna ɔda edzi dɛ Epaphras nyim hɔn a wɔwɔ asafo no mu no yie, ntsi nna ɔtaa bɔ mpaa ma hɔn mbrɛ ɔbɛyɛ a wobotum ‘egyina hɔ pi.’ (Col. 4:12) Ebɛnadze na yebotum esua efi mu? Ɔno nye dɛ, nna Paul na Epaphras nyina nyim dɛ sɛ yebotum akɔ do ama hɛnho akokwaa a, ɔsɛ dɛ yɛkɔ do yɛ ndzɛmba a ɔbɛma yɛnye Jehovah ntamu ebusuabɔ no mu akɔ do ara ayɛ dzen, na afei so yɛma Nyankopɔn boa hɛn. Nna wɔpɛ dɛ Colossaefo no yɛ ndzɛmba a ɔbɛma hɔnho akɔ do akokwaa, anaa wɔbɛda no edzi dɛ wɔyɛ nkorɔfo a woenyin ewie ɔmmfa ho ɔhaw a nna worihyia no. w24.04 6-7 ¶16-17

Sɛ yesuro Jehovah a, ɔkyerɛ dɛ yɛdɔ no paa na yɛmmpɛ dɛ yɛyɛ biribiara a n’enyi nngye ho. Yɛbɔ mbɔdzen dɛ yebohu papa na bɔn mu nsonsonee nye nsonsonee a ɔda nokwar na atorsɛm ntamu mbrɛ ɔbɛyɛ a yɛbɔsɔ Jehovah n’enyi. (Mbɛ. 2:3-6; Heb. 5:14) Sɛ yesuro nyimpa kyɛn Nyankopɔn a, obotum ama yaatwe hɛnho efi nokwar no ho. Israelmba mu etsitsir 12 a wɔsomaa hɔn dɛ wɔnkɔhwɛ asaase a nna Jehovah dze ahyɛ Israelfo no bɔ no, hom mma yensusu hɔn asɛm no ho nhwɛ. Hɔn mu du dze, osiandɛ nna wɔnndɔ Jehovah papa ntsi, wɔmaa Canaanfo no hɔnho hu tɔɔ hɔn do. Dɛm ntsi wɔkaa kyerɛɛ hɔn nuanom Israelfo no dɛ: ‘Yerunntum mmfow nnkɔto nnhyɛ ɔman no do, osiandɛ hɔn ho yɛ dzen sen hɛn.’ (Nka. 13:​27-31) Ɔwɔ mu, wɔ nyimpa enyi do dze, nna ɔyɛ nokwar dɛ Canaanfo no ho yɛ dzen kyɛn Israelfo no koraa. Naaso, ka a wɔkaa dɛ Israelfo no runntum nndzi hɔn atamfo no do konyim no, nna ɔakɛyɛ tse dɛ mbrɛ woeyi Jehovah esi nkyɛn. w24.07 9 ¶5-6

Yebotum aka dɛ Jehovah bu atsɛntsenenee aber nyina anaa? Nyew! Nna Abraham nyim iyi paa. Nna onyim dɛ Jehovah a ɔyɛ ‘asaase nyinara Ɔtsɛmbuafo no’ nndzi mfom, ne nyansaa mu dɔ na ɔda ehumbɔbɔr edzi. Jehovah atsetse ne Ba no yie na ɔdze ahyɛ ne nsa dɛ ommbu nyimpa nyinara atsɛn. (John 5:22) Jehovah na Jesus nyina nyim dza ɔwɔ nyimpa biara n’akoma mu. (Matt. 9:4) Dɛm ntsi sɛ worubu nyimpa biara atsɛn a, wɔbɛyɛ “dza ɔtsen”! Dɛm ntsi hom mma yennya ahotodo dɛ Jehovah na onyim dza oye. Ɔsɛ dɛ yɛkaa dɛ yɛmmfata dɛ yebu atsɛn, mbom Jehovah na ɔfata! (Isa. 55:​8, 9) Dɛm ntsi sɛ ɔba no atsɛmbu mu a, ɔsɛ dɛ yegyaa biribiara hyɛ Jehovah nye ne Ba no nsa. Jesus yɛ Ɔhen a ɔda n’Egya n’atsɛntsenenee nye n’ehumbɔbɔr no bi edzi pɛpɛɛpɛ.—Isa. 11:​3, 4. w24.05 7 ¶18-19

Asɛm a Jesus kae aber a odzi kan a ohyiaa Nathanael no ma yehu dɛ ohia dɛ yɛka nokwar wɔ hɛn akoma mu. Aber a Philip dze ne nyɛnko Nathanael baa Jesus ne nkyɛn no, Jesus kaa asɛm bi faa Nathanael ho a nna ɔyɛ nwanwa. Ɔwɔ mu, nna Jesus nnhyiaa Nathanael da, naaso Jesus kaa dɛ: “Hwɛ, Israelnyi ankasa a ndaadaa biara nnyi no mu nye yi.” (John 1:47) Jesus hun dɛ Nathanael no nokwardzi no da mu fua. Nna Nathanael yɛ nyimpa tse dɛ hɛnara. Naaso nna ɔnnyɛ nyaatwem mbom nna odzi nokwar wɔ biribiara mu. Jesus n’enyi gyee Nathanael no suban yi ho, na ɔkamfoo no wɔ ho. Dza yɛyɛ a ɔbɛma yɛasɔ Jehovah n’enyi a wɔaka ho asɛm wɔ Ndwom 15 no, no mu piinara fa mbrɛ ɔsɛ dɛ yɛnye afofor dzi ho. Ndwom 15:3 ka dɛ obi a ɔabɔsoɛ Jehovah ne ntamadan mu no, ‘ɔmmfa ne tɛkyerɛma mmbɔ nseku, ɔnnyɛ ne nyɛnko bɔn, na ɔnnsɛɛ n’anyɛnkofo hɔn dzin.’ Sɛ yɛkeka nsɛm a ɔnnyɛ nokwar fa nkorɔfo ho dze sɛɛ hɔn dzin a, obotum ahaw hɔn paa.—Jas. 1:26. w24.06 10 ¶7, 9; 11 ¶10

Sɛ isiesie woho yie ansaana akɔ asɛnka a, ɔremma wo yamu nnhyehye wo aber a enye nkorɔfo robɔ nkɔmbɔ no. Jesus boaa n’esuafo no ma wosiesiee hɔnho ansaana ɔrosoma hɔn ma wɔakɛka asɛmpa no. (Luke 10:​1-11) Osiandɛ wɔdze dza Jesus dze kyerɛkyerɛɛ hɔn no yɛɛ edwuma no ntsi, wotumii yɛɛ edwuma a wɔdze hyɛɛ hɔn nsa no yie, na iyi maa hɔn enyi gyee paa. Ebɛnadze na yebotum ayɛ dze esiesie hɛnho ansaana yɛakɔ asɛnka? Asɛm a yɛpɛ dɛ yɛka no, ɔsɛ dɛ yɛdwendwen ho na yɛdze hɛnankasa hɛn nsɛm ka mbrɛ ɔbɛyɛ a hɔn a yɛka asɛm no kyerɛ hɔn no bɛtse ase. Afei so, ɔsɛ dɛ yɛdwendwen mbrɛ hɔn a yɛrekɛka asɛm no akyerɛ hɔn no besi ayɛ hɔn adze no ho na yehu dza hɛn so yɛbɛyɛ. Sɛ yɛyɛ dɛm a, aber a yeehyia nkorɔfo wɔ asɛnka mu no, yɛremmper hɛnho, mbom yɛbɛserew akyerɛ hɔn na yɛnye hɔn abɔ nkɔmbɔ dɛ hɛn anyɛnkofo. w24.04 16 ¶6-7

Adze tsitsir paa ntsi a yɛka asɛmpa no nye dɛ yɛdɔ Jehovah Nyankopɔn, na ɔyɛ hɛn dɛw dɛ ne dzin krɔnkrɔn no da hɛn do. Yebu asɛnka edwuma no dɛ ɔyɛ kwan a yɛfa do yi hɛn Nyankopɔn a yɛdɔ no no ayɛw. Yefi hɛn akoma nyina mu gye to mu dɛ Jehovah Nyankopɔn sɛ fata dɛ ɔgye enyimnyam nye enyidzi nye tum fi n’asomfo anokwafo hɔ. Adanse a odzi mu a ɔno nye dɛ Jehovah na ‘ɔbɔɔ adze nyina’ na sɛ ɔnnyɛ ɔno a nnkyɛ yɛnntse ase no, sɛ yɛka ho asɛm kyerɛ afofor a, ɔkyerɛ dɛ yɛdze enyimnyam nye enyidzi rema no. Sɛ yɛdze hɛn ber, hɛn ahoɔdzen nye hɛn ahodze yɛ asɛnka edwuma no dɛ mbrɛ hɛn tsebea bɛma hɛn kwan a, ɔkyerɛ dɛ yɛdze hɛn tum rema Jehovah. (Matt. 6:33; Luke 13:24; Col. 3:23) Asɛm no ara nye dɛ, hɛn enyi gye ho dɛ yɛbɛka Nyankopɔn ho asɛm akyerɛ nkorɔfo osiandɛ yɛdɔ no. Afei so, ɔdɔ a yɛwɔ ma Nyankopɔn no kenyan hɛn ma yɛka ne dzin nye no suban ahorow a ɔyɛ fɛw no ho asɛm kyerɛ afofor. w24.05 17 ¶11

Jehovah ma hɛn asomu dwe hɛn na hɛn akoma tɔ hɛn yamu, na daakye so ɔbɛma yeenya daa nkwa. Yɛgye dzi paa dɛ Jehovah pɛ dɛ otua hɛn kaw na ɔwɔ tum so a ɔdze bɛyɛ dɛm. Dɛm ntsi sɛ yɛdze hɛn werɛ hyɛ no mu a, hɛn nsa rinnsi famu da. Iyi kenyan hɛn ma yɛyer hɛnho yɛ dza yebotum biara wɔ Jehovah no som mu dɛ mbrɛ n’asomfo anokwafo a wɔtsenaa ase tsetse no yɛe no. Dɛmara na Timothy a ɔtsenaa ase wɔ asomafo no hɔn aber do no so yɛe. (Heb. 6:​10-12) Nna Timothy wɔ awerɛhyɛmu dɛ Nyankopɔn tseasefo no botua no kaw. (1 Tim. 4:10) Dɛm ntsi ɔyeer noho wɔ Jehovah no som mu na ɔboaa afofor so. Ndzɛmba a ɔyɛe no bi nye dɛn? Ɔsomafo Paul hyɛɛ no nkuran dɛ ɔnyer noho nkyerɛkyerɛ yie wɔ asafo no nye asɛnka edwuma no mu. Afei so, nna ɔsɛ dɛ Timothy yɛ nhwɛdo pa ma no nuanom Christianfo a ɔnye hɔn wɔ asafo no mu no. Bio so, ɔsomafo Paul dze edwumadzen ahorow bi hyehyɛɛ ne nsa. Bi nye dɛ ɔkaa kyerɛɛ no dɛ hɔn a wohia nkaenyim no, ɔsɛ dɛ ɔka hɔn enyim naaso ɔsɛ dɛ ofi ɔdɔ mu yɛ dɛm. (1 Tim. 4:​11-16; 2 Tim. 4:​1-5) Nna Timothy gye dzi paa dɛ Jehovah botua no kaw.—Rom. 2:​6, 7. w24.06 22-23 ¶10-11

Sɛ nna Jehovah no nkorɔfo yɛ no do asoɔdzen a, mpɛn pii no nna ɔsoma no nkɔnhyɛfo ma wɔkɔbɔ hɔn kɔkɔ dɛ wɔnsakyer. Dɛ mfatoho no, Nyankopɔn maa Jeremiah kaa kyerɛɛ Israelfo no dɛ: ‘Ɔkobɔnyi Israel e, san bra o. Moronnhwɛ wo ebufuw mu na meyɛ ehumbɔbɔr. Mobo nnkofuw daa. Hu w’emumuyɛ kɛkɛ, dɛ ato mbra etsia Jehovah wo Nyankopɔn.’ (Jer. 3:​12, 13) Jehovah maa nkɔnhyɛnyi Joel so kaa kyerɛɛ hɔn dɛ: ‘Hom mfa hom akoma nyinara nsan mbra me nkyɛn.’ (Joel 2:​12, 13) Ɔmaa Isaiah so kaa kyerɛɛ hɔn dɛ: “Hom nhohor homho, hom ntsew homho; hom nyi hom emumuyɛdze no mmfi m’enyiwa do; hom ngyaa bɔn yɛ.” (Isa. 1:​16-19) Bio so, Jehovah maa Ezekiel kaa dɛ: “Aso mowɔ enyigye bi wɔ omumuyɛnyi no wu ho? . . . Na nnyɛ [dza mepɛ nye dɛ] ɔbɛdan efi no kwan mu, na oenya nkwa? Minnyi nyia owu no wu ho enyigye, . . . dɛm ntsi hom nsakyer, na hom nnya nkwa.” (Ezek. 18:​23, 32) Jehovah pɛ dɛ nyimpa tsena ase daa, ntsi sɛ nkorɔfo nu hɔnho a, ɔma n’enyi gye paa! w24.08 9 ¶5-6

Jehovah ma n’asomfo nyina nsa ka ndzɛmba a ɔbɛma wɔnye ne ntamu ayɛ papa. Afei so, ɔma hɔn akwankyerɛ na ɔbɔ hɔn ho ban. Adze kor a ɔma yehu dɛ Jehovah nnyɛ enyimhwɛ nye dɛ, ɔhwɛ hu dɛ obiara a ɔwɔ asaase yi do no ne nsa botum aka Bible no bi na wɔakenkan. Kasa ahorow ebiasa na wodzii kan dze kyerɛɛw Bible no. Ɔno nye Hebrew, Aramaic, na Greek. Hɔn a wotum kenkan kasa ahorow a wodzii kan dze kyerɛɛw Bible no, wɔnye Jehovah ntamu yɛ papa kyɛn hɔn a wonntum nnkenkan no anaa? Oho, ɔnntse dɛm koraa. (Matt. 11:25) Sɛ yɛakɔ skuul edu ekyir o, sɛ yɛnnkɔree nndur ekyir o, sɛ yetum kenkan kasa ahorow a wodzii kan dze kyerɛɛw Bible no o, sɛ yenntum nnkenkan o, ɔnnyɛ ɔno na Jehovah begyina do dze ato nsa afrɛ hɛn dɛ yɛmbɛyɛ n’anyɛnkofo. Dɛ nkyɛ Jehovah bɛma hɔn a wɔakɔ skuul edu ekyir no nkotsee atse n’Asɛm no ase no, ɔnnyɛ no dɛm, mbom ɔma obiara a ɔwɔ asaase yi do beebiara no tum tse n’Asɛm no ase. Wɔakyerɛ n’Asɛm Bible no ase akɔ kasa ahorow pii mu. Dɛm ntsi, Bible no botum aboa nyimpa a wɔwɔ wiadze yi mu beebiara, na wobotum so esua mbrɛ wobesi abɛyɛ Jehovah n’anyɛnkofo.—2 Tim. 3:​16, 17. w24.06 6-7 ¶13-15

Nkɔm a Jesus hyɛɛ dɛ wɔbɛsɛɛ Jerusalem no, nna ɔrennkyɛr na wɔaaba mu. Ntsi nna ɔsɛ dɛ Christianfo a wɔyɛ Jewfo no dze ber a wɔaka no hyɛ hɔn gyedzi mu dzen ama woeetum emia hɔn enyi egyina ɔhaw a nna woribehyia no ano. (Heb. 10:25; 12:​1, 2) Hɛn so, yenyim dɛ ɔrennkyɛr ahohiahia kɛse bi bɛba. Naaso dza yɛrohwɛ kwan no dze, ɔbɛkyɛn dza Christianfo a nna wɔyɛ Hebrewfo no hyiae no koraa. (Matt. 24:21; Nyi. 16:​14, 16) Asɛm no nye dɛ, afotu a Jehovah dze maa dɛm Christianfo no, hɛn so, yebotum enya do mfaso. Hom mma yensusu no mu bi ho. Ɔsomafo Paul hyɛɛ ne mfɛfo Christianfo no nkuran dɛ wɔmpɛnsapɛnsa Nyankopɔn n’Asɛm no mu. (Heb. 5:14–6:1) Paul dze Hebrew Kyerɛwnsɛm no boaa no nuanom no ma wohun siantsir a kwan a Christianfo no fa do som Jehovah no yɛ papa koraa kyɛn Jewfo no hɔndze no. Nna Paul nyim dɛ, sɛ Jewfo a nna wɔabɛyɛ Christianfo no tse nokwar no ase yie a, ɔbɔboa hɔn paa. Nna ɔbɛma wɔahyɛ nkyerɛkyerɛ ahorow a ɔnnyɛ nokwar no nsew, na wɔatwe hɔnho efi ho amma wɔaanndaadaa hɔn. w24.09 8-9 ¶2-3; 10 ¶6

Nna Jesus n’esuafo no hia nkuranhyɛ. Ebɛnadze ntsi a? Nna hɔn mu binom egya hɔn efie, hɔn mbusua, nye hɔn ndwuma hɔ ebedzi Jesus n’ekyir. (Matt. 19:27) Afei so, nna nkorɔfo bu hɔn a wɔabɛyɛ Jesus n’esuafo no dɛ wɔnnka nyimpa ho. (John 9:22) Nna Jesus n’esuafo no gye dzi dɛ ɔno nye Messiah a wɔahyɛ no ho bɔ no, ntsi na wɔdze dɛm ndzɛmba ahorow no bɔɔ afɔr no. (Matt. 16:16) Naaso aber a wokum Jesus no, wɔtsee nka dɛ hɔn enyidado nyinara asa, na iyi maa hɔn werɛ howee. Nna Jesus nyim dɛ no wu no na wɔama hɔn werɛ ahow, na ɔnnyɛ dɛ wonnyi gyedzi. Ntsi da a wonyaan no ara pɛr na ɔhyɛɛ ase dɛ ɔrehyɛ n’anyɛnkofo no nkuran. Dɛ mfatoho no, aber a nna Mary Magdalene rusu wɔ Jesus ne nda no do no, oyii noho edzi kyerɛɛ no. (John 20:​11, 16) Afei so, oyii noho edzi kyerɛɛ n’esuafo beenu no a nna wɔnam kwan do rokɔ Emmaus no. Na oyii noho edzi kyerɛɛ ɔsomafo Peter so. w24.10 13 ¶5-6

Awofo, hom mboa hom ba ma ontum nkyerɛkyerɛ siantsir a ɔgye dzi dɛ Ɔbɔadze bi wɔ hɔ no mu. Ibotum nye wo ba no abɔ mu akenkan nsɛm a ɔba toatoa do wɔ jw.org a wɔato dzin “Young People Ask—Creation or Evolution?” no. Afei nsɛm ahorow a ɔwɔ hɔ a wo ba no botum egyina do akyerɛkyerɛ afofor dɛ Ɔbɔadze bi wɔ hɔ no, ibotum nye no esusu ho; hom botum ayɛ ho ɔyɛkyerɛ mpo. Hyɛ no nkuran dɛ sɛ obi ma no kwan dɛ ɔnkyerɛkyerɛ ne gyedzi mu nkyerɛ no a, ɔmfa nsɛm a ɔtɔ asomu na ɔnnyɛ dzen so dɛ nkorɔfo bɛtse ase nyɛ edwuma. Dɛ mfatoho no, no skuulnyi bi botum aka dɛ: “Emi dza muhu na megye dzi, na Nyankopɔn so munnhun no da.” Sɛ ɔba no dɛm a, obotum aka dɛ: “Fa no dɛ enam kwaa bi mu, nna ehu bura bi a nsu wɔ mu. Kwaa no mmbɛn kurow mu koraa, naaso ihu dɛ wɔahyɛ da ara esiesie bura no kama. Ebɛn adwen na ibenya? Ntsi sɛ ibenya adwen dɛ bura no mpo obi na otui a, nna ɔno amansan yi nye ndzɛmba a nkwa wɔ mu no, ehwɛ a ɔnyɛ obi na ɔbɔe a?” w24.12 18 ¶16

Hɛn nyina hia afotu a obotum aboa hɛn ma yeesisi gyinae a no ho hia wɔ asetsena mu. Yebotum enya dɛm afotu yi mu beberee efi asafo mu mpanyimfo nye Christianfo afofor a hɔnho akokwaa hɔ. Sɛ dɛm enuanom yi enyin kyɛn hɛn a, ɔnnsɛ dɛ yenya adwen dɛ hɔn mber etwa mu ntsi hɔn afotu no rommboa hɛn ndɛ. Jehovah pɛ dɛ yesua biribi fi hɔn a hɔn enyi efir no hɔ. Osiandɛ hɔn enyi efir ntsi, wɔwɔ suahu na nyansa kyɛn hɛn. Tsetse no, Jehovah nam n’asomfo anokwafo a hɔn enyi efir do hyɛɛ no nkorɔfo nkuran na ɔmaa hɔn akwankyerɛ. Dɛm anokwafo yi mu bi nye Moses, David, nye ɔsomafo John. Mbarimba yi anntsena ase wɔ ber kor mu. Afei so, ɔsor nsɛm a osisii wɔ hɔn mu biara asetsena mu. Aber a wɔaka kakra ma woewu no, wotuu nkyirmba fo. Dɛm mbarimba anokwafo yi mu biara maa ɔdaa edzi dɛ ohia paa dɛ yetsie Nyankopɔn. Ɔmmfa ho mfe a yeedzi no, sɛ yɛgye ber susu hɔn afotu no ho a, ɔbɔboa hɛn paa.—Rom. 15:4; 2 Tim. 3:16. w24.11 8 ¶1-2

Noah n’aber do tɔnn na Nyankopɔn kaa kyerɛɛ nyimpa dɛ mma wonndzi bɔgya. (Gen. 9:​3, 4) Aber a Jehovah dze ne Mbra no rema Israelfo no, ɔsanee sii dɛm ahyɛdze yi do. Ɔkaa dɛ obiara a obedzi bɔgya no, wonku no. (Lev. 7:27) Jesus so dzii dɛm Mbra yi do. (Matt. 5:​17-19) Ntsi nna ɔnnyɛ adze a Jesus bɛka akyerɛ nyimpadɔm a wɔyɛ Jewfo no dɛ wondzi no honam na wɔnnom no bɔgyaa ankasa. Nna asɛm a Jesus reka yi yɛ kasakoa. Ansaana Jesus rebɛka dɛm asɛm yi no, nna oedzi kan nye Samarianyi ɔbaa bi akasa wɔ dɛm kwan yi do. Ɔkaa kyerɛɛ no dɛ: ‘Nsu a medze bɛma no bɛma enya onnyiewiei nkwa.’ (John 4:​7, 14) Nna ɔnnyɛ dza Jesus reka nye dɛ nsu pɔtsee bi wɔ hɔ a sɛ Samarianyi ɔbaa no nom a ɔbɛma oenya onnyiewiei nkwa. Na dɛmara na nyimpadɔm a ɔnye hɔn kasae wɔ Capernaum no so, nna ɔnnyɛ dza Jesus reka akyerɛ hɔn nye dɛ, sɛ wodzi no honam na wɔnom no bɔgyaa ankasa a, wɔbɛtsena ase daa. w24.12 9 ¶4-6

Adwen a ɔmmfata a wiadze no wɔ wɔ mbaa ho no, ɔsɛ dɛ Christianfo kunnom hwɛ hɔnho yie paa na woeennya bi. Ebɛnadze ntsi na yɛreka dɛm? Siantsir a yɛreka dɛm no mu kor nye dɛ, mpɛn pii no, dza obi dwendwen ho no, ɔno na ɔyɛ. Ɔsomafo Paul bɔɔ Christianfo a nna wɔasera hɔn wɔ tsetse Rome asafo no mu no kɔkɔ dɛ ‘mma wɔnnyɛ hɔn ho dɛ wiadze yi.’ (Rom. 12:​1, 2) Aber a Paul kyerɛɛw krataa kɛmaa Rome asafo no, nna enuanom no dze mfe pii atsena asafo no mu. Naaso, sɛ yɛhwɛ asɛm a Paul kae yi a, ɔma yehu dɛ nna mbrɛ nkorɔfo yɛ hɔn adze wɔ wiadze no mu no da ho ara wɔ Christianfo binom hɔn adwen mu. Ɔno ntsi na otuu hɔn fo dɛ wɔnsesa hɔn adwen na hɔn suban no. Christianfo kunnom a wɔwɔ hɔ ndɛ so, wobotum esua biribi efi dɛm afotu yi mu. Naaso awerɛhosɛm nye dɛ, adwen a ɔmmfata a wiadze no wɔ wɔ mbaa ho no, Christianfo kunnom binom wɔ bi, na iyi ma wɔyɛ hɔn yernom basabasa mpo. w25.01 9 ¶4

Ndɛ, asafo mu mpanyimfo nnyi adagyer koraa. Wɔyɛ asɛmpakafo. (2 Tim. 4:5) Wɔdze nsi na ahokeka dzi asɛnka edwuma no enyim, wɔyɛ nhyehyɛɛ ma yetum ka asɛmpa no wɔ hɛn asaasesin mu, na wɔtsetse hɛn ma yetum yɛ asɛnka na ɔkyerɛkyerɛ edwuma no yie. Afei so, wɔsom dɛ atsɛmbuafo. Na mbrɛ ɔtse nye dɛ, wɔnnyɛ atsɛmbuafo a wɔyɛ enyimhwɛ, mbom wɔda ehumbɔbɔr edzi. Sɛ Christiannyi bi yɛ bɔn kɛse a, asafo mu mpanyimfo yɛ dza wobotum biara boa no ma osiesie ɔnye Jehovah ntamu ma ɔsan yɛ kama. Ber kor no ara so, wɔhwɛ dɛ wɔbɛma asafo no ho atsew. (1 Cor. 5:​12, 13; Gal. 6:1) Edwuma tsitsir a asafo mu mpanyimfo yɛ nye dɛ wɔhwɛ Nyankopɔn no nguan. (1 Pet. 5:​1-3) Wɔgye ber siesie hɔnho ma ɔkasa ahorow a ogyina Bible do, wɔbɔ mbɔdzen dɛ wobohu obiara a ɔwɔ asafo no mu no yie, na wɔserasera hɔn hyɛ hɔn nkuran. Asafo mu mpanyimfo binom so boa ma wosisi Ahendzi Asa ahorow na wɔboa ma wosiesie bi so. Binom so boa ma wɔyɛ ehyiadzi ahorow ho ntotoe. Hɔn mu binom so ka Ayarsabea Ntamu Nkitahodzi Egyinatukuw no nye Ayarfo Nserahwɛ Kuw no ho. Iyinom nyina da nkyɛn a, wɔsan yɛ ndwuma afofor so. Hom mma yɛnka na asafo mu mpanyimfo yɛ edwumadzen dze boa hɛn paa! w24.10 20 ¶9

Sɛ Bible no ka dɛ wɔagye hɛn a, dza ɔkyerɛ nye dɛ yɛadze hɛnho osian werdam no a woetua no ntsi. Ɔsomafo Peter kaa iyi ho asɛm dɛ: “Hom nyim dɛ wɔammfa ndzɛmba a ɔprɔw, dwetɛ anaa sika na wɔdze gyee hom fii hom abrabɔ gyangyan a hom egyanom dze gyaa hom no mu. Na mbom Christ bɔgya a ɔsom bo no a, dɛ eguambaa a dzɛm nye nkekaa nnyi no ho .” (1 Pet. 1:​18, 19) Osian werdam no ntsi, wobotum agye hɛn efi bɔn na owu nsamu. (Rom. 5:21) Ɔyɛ hɛn dɛw paa dɛ Jehovah dze Jesus no bɔgyaa anaa no nkwa a ɔsom bo no agye hɛn efi bɔn na owu nsamu. Nokwasɛm nye dɛ, hɛn enyi sɔ adze a Jehovah na Jesus ayɛ ama hɛn no paa. w25.02 5 ¶15-16

Yebesi dɛn ahwɛ yie amma biribiara aannsɔ hɛn annhwɛ? Aberantsɛ a Mbɛbusɛm tsir 7 ka no ho asɛm no, hom mma yɛnhwɛ dza yebotum esua efi n’asɛm no mu. Ɔnye ɔbaa bi a ne bra asɛɛ bɔɔ edwaman. Nyiyimu 21 no ka dɛ “awerɛfir mu ara” na aberantsɛ no dzii ɔbaa no ekyir. Naaso, nyiyimu ahorow a odzi nyiyimu 21 no enyim no ma yehu dɛ, nna aberantsɛ no edzi kan etu anamɔn ahorow bi. Dɛm anamɔn ahorow no na ɔdze no nkakrankakra piapiaa no ma ɔkɛyɛɛ bɔn no. Ebɛnadze na ɔmaa aberantsɛ no kɛyɛɛ bɔn? Odzi kan, dɛm ewimbir no, nna ‘orutwa mu wɔ beebi a ɔbɛn ɔbaa no ne nsaaba mu.’ Afei, ɔkɛfaa kwan a ɔkɔ ɔbaa no ne fie do. (Mbɛ. 7:​8, 9) Aber a ohun ɔbaa no, ɔammpɛ beebi ammfa mbom okehyiaa no na ɔmaa kwan ma ofeew n’ano. Bio so, aber a nna ɔbaa no reka dɛ ɔabɔ asomdwee afɔr no, otsiee no. Obotum aba dɛ nna ɔbaa no pɛ dɛ aberantsɛ no hu dɛ ɔnnyɛ nyimpa bɔn, ntsi na ɔkaa dɛm asɛm no. (Mbɛ. 7:​13, 14, 21) Sɛ aberantsɛ no maa n’enyi daa hɔ, nna oenntu anamɔn a ɔtse dɛm a, nkyɛ ɔannkɛyɛ bɔn. w24.07 16 ¶8-9; 19 ¶19

Sɛ obi yɛ bɔn a no mu yɛ dur bi wɔ asafo no mu a, Jehovah nnsosɔw do. Ɔmmpɛ dɛ n’asomfo nya adwen dɛ sɛ wɔma ɔdzebɔnyɛnyi bi a onnu noho kɔ do tsena asafo no mu a, ɔkyerɛ dɛ wɔwɔ ehumbɔbɔr. Jehovah wɔ ehumbɔbɔr paa, naaso ɔnnsosɔw bɔn do. Dɛmara so na dza ɔaka dɛ ɔyɛ papa anaa bɔn no, ɔnnkɛsesa no dabiarada. (Jude 4) Nokwasɛm nye dɛ, sɛ Jehovah ma ɔdzebɔnyɛnyi a onnu noho no kɔ do tsena asafo no mu a, obotum asɛɛ asafo no, na ɔno mbom bɛkyerɛ dɛ onnyi ehumbɔbɔr. (Mbɛ. 13:20; 1 Cor. 15:33) Naaso iyi nyina mu no, yenyim dɛ Jehovah mmpɛ dɛ ɔsɛɛ obiara. Mbom ne yamu a nkyɛ ɔbɛgye obiara nkwa. Hɔn a wogyaa bɔn yɛ na wɔpɛ dɛ wɔfa no nyɛnko bio no, ohu hɔn mbɔbɔr. (Ezek. 33:11; 2 Pet. 3:9) Ntsi aber a ɔbarimba no a ɔwɔ Corinth asafo no mu nuu noho na ɔsesaa no suban bɔn no, Jehovah nam ɔsomafo Paul do maa asafo no hun dɛ, ɔsɛ dɛ wɔdze ɔbarimba no no bɔn kyɛ no na wɔsan gye no ba asafo no mu bio. w24.08 17 ¶7; 18-19 ¶14-15

Nguan na mpɔnkye ho mfatoho no mu no, Jesus kaa dɛ mbrɛ nkorɔfo nye no nuanom a wɔasera hɔn no bedzi no na obegyina do dze eebu hɔn atsɛn. (Matt. 25:​31-46) Obobu nkorɔfo atsɛn dɛ nguan anaa mpɔnkye wɔ “ahohiahia kɛse” no mu, na owiei ara pɛr nna Amagedon ko no so toa do. (Matt. 24:21) Dɛ mbrɛ oguanhwɛfo kyekyɛ nguan na mpɔnkye mu no, dɛmara so na Jesus beyi hɔn a wɔdze nokwardzi taa no nuanom a wɔasera hɔn no ekyir no egyina afa na ɔdze hɔn a wɔannyɛ dɛm no so egyina afa. Bible no ma yehu dɛ, Jesus a Jehovah eyi no dɛ Ɔtsɛmbuafo no bobu atsɛn a ɔtsen. (Isa. 11:​3, 4) Ɔdze n’enyi to famu hwɛ mbrɛ nkorɔfo si yɛ hɔn adze, hɔn suban, nye nsɛm a wɔka no yie. Afei so ɔhwɛ mbrɛ nkorɔfo nye no nuanom a wɔasera hɔn no dzi. (Matt. 12:​36, 37) Dɛm a Jesus yɛ no bɛma oehu hɔn a wɔtaa no nuanom a wɔasera hɔn no ekyir na wɔboaa edwuma a wɔdze hyɛɛ hɔn nsa no. Ndzɛmba etsitsir a nguan no yɛ dze kyerɛ dɛ wɔtaa Christ no nuanom no ekyir no, no mu kor nye dɛ wɔboa hɔn ma wɔyɛ asɛmpaka edwuma no. w24.09 20-21 ¶3-4

Sɛ hɛn adwen mu yɛ hɛn konsee wɔ asɛm bi ho a, ɔsɛ dɛ yɛdze toto dza Bible no ka no ho, na yɛhwɛ dɛ adwen a yeenya no yɛ nokwar a. Ɔbabun no a ɔtse nka dɛ Jehovah nndwen no ho no, hom mma yɛmfa n’asɛm no nyɛ mfatoho. Adwen a oenya no, ɔsɛ dɛ ɔfa no dɛmara anaa? Oho, mbom ɔsɛ dɛ ‘ɔsɔ adze nyina hwɛ’ mbrɛ ɔbɛyɛ a obohu Jehovah so n’adwen wɔ asɛm no ho. Sɛ yɛkenkan Nyankopɔn n’Asɛm no a, ɔtse dɛ mbrɛ Jehovah nye hɛn rekasa. Naaso ɔsɛ dɛ yɛyer hɛnho hwehwɛ Jehovah n’adwen wɔ nsɛm bi a ɔhaw hɛn no ho. Ɔsɛ dɛ yɛhwehwɛ kyerɛwnsɛm pɔtsee a ɔfa hɛn asɛm no ho, na yesua ho adze. Yebotum dze edwindadze ahorow a Jehovah n’ahyehyɛdze dze ama hɛn no ayɛ asɛm no ho nhwehwɛmu akɔ ekyir. (Mbɛ. 2:​3-6) Sɛ yɛrebɛyɛ nhwehwɛmu no a, yebotum aserɛ Jehovah dɛ ɔmboa hɛn ma yenhu n’adwen wɔ hɛn asɛm no ho. Afei, yebotum ahwehwɛ Bible mu afotusɛm ahorow nye nsɛm pɔtsee bi a ɔfa hɛn asɛm no ho a yebotum dze ayɛ edwuma. w24.10 25 ¶4-5

Obiara a ɔpɛ dɛ onya hokwan wɔ asafo no mu mbrɛ ɔbɛyɛ a enuanom bɔbɔ agye no do anaa ɔdze bɛmema noho do no, Jehovah rinnhyira no. (1 Cor. 10:​24, 33; 13:4) Jesus n’anyɛnkofo a nna wɔbɛn no paa no mpo, odur mber bi no, nna wɔpɛ dɛ ɔdze hokwan ahorow bi hyehyɛ hɔn nsa. Naaso nna ɔnnyɛ adwen pa na wɔdze rohwehwɛ dɛm hokwan no. Ma yɛnhwɛ dza Jesus n’asomafo James na John yɛe. Wɔkɛserɛɛ Jesus dɛ ɔmma hɔn hokwan soronko bi wɔ n’Ahendzi no mu. Naaso Jesus annka annkyerɛ hɔn dɛ wɔayɛ adze dɛ woebisa biribi a ɔtse dɛm. Mbom dza ɔkaa kyerɛɛ n’asomafo 12 no nyina nye dɛ: “Obiara a ɔpɛ dɛ ɔyɛ kɛse wɔ hom mu no, ɔsɛ dɛ ɔsom hom. Na obiara a ɔpɛ dɛ odzi kan wɔ hom mu no, ɔnyɛ akowaa mma hom nyina.” (Mark 10:​35-37, 43, 44) Enuanom mbarimba a wɔpɛ dɛ wɔsom hɔn nuanom no dze adwen pa hwehwɛ hokwan ahorow wɔ asafo no mu. Sɛ wɔyɛ dɛm a, wɔboa enuanom no wɔ akwan ahorow pii do.—1 Thess. 2:8. w24.11 15-16 ¶7-8

Sɛ yerisi gyinae a, ɔdɔ a yɛwɔ ma afofor no bɔboa hɛn ma yaahwehwɛ dza oye ma hɔn na yaabrɛ hɛnho adze. (1 Cor. 10:​23, 24, 32; 1 Tim. 2:​9, 10) Sɛ yɛyɛ dɛm a, gyinae a yebesi no bɛkyerɛ dɛ yɛdɔ afofor na yebu hɔn so. Sɛ irisi gyinae kɛse bi a, ɔsɛ dɛ edwendwen dza a obehia dɛ eyɛ ama dɛm gyinaesi no aakɔ yie no ho. Jesus kaa dɛ ansaana yɛbɛyɛ biribi no, ɔsɛ dɛ ‘yɛsese hwɛ.’ (Luke 14:28) Dɛm ntsi, mber, sika nye ahoɔdzen a obehia dɛ edze hyɛ mu ama dɛm gyinaesi no aakɔ yie no, ɔsɛ dɛ edwendwen ho. Ɔtɔ da a, bi a obehia dɛ enye w’ebusuafo susu gyinae a epɛ dɛ isi no ho. Na iyi bɛma hɔn mu biara ehu dza obotum ayɛ dze aboa wo. Ebɛnadze ntsi na iyi nyina ho hia? Bi a ɔbɛma ehu dɛ gyinae a epɛ dɛ isi no, obehia dɛ eyɛ nsesa bi wɔ mu anaadɛ obehia dɛ isi gyinae fofor koraa. Afei so, sɛ eka gyinae a epɛ dɛ isi no ho asɛm kyerɛ w’ebusuafo na itsie hɔn adwenkyerɛ a, bi a ɔrennyɛ dzen mma hɔn koraa dɛ wɔbɔboa wo ma wo gyinaesi no aakɔ yie. w25.01 18-19 ¶14-15

Isaiah kaa siantsir a ɔsɛ dɛ ‘yenya ahomka na yedzi ehurusi’ wɔ sunsum afamu paradise no mu ho asɛm. Jehovah ankasa na ɔama yenya dɛm sunsum afamu paradise yi. (Isa. 65:​18, 19) Ahyehyɛdze ahorow a wɔwɔ wiadze yi mu no mma nkorɔfo nnhu Nyankopɔn ho nokwasɛm. Dɛm ntsi ɔnnyɛ nwanwa dɛ Jehovah nam hɛn do roboa nkorɔfo ma wɔaatwe hɔnho efi dɛm ahyehyɛdze ahorow yi ho na wɔaaba hɛn sunsum afamu paradise a no mu yɛ enyigye yi mu! Nhyira ahorow a yenya osiandɛ yɛwɔ nokwar no mu no ma hɛn enyi gye, na okenyan hɛn ma yɛka ho asɛm kyerɛ nkorɔfo. (Jer. 31:12) Afei so, hɛn a yɛwɔ sunsum afamu paradise no mu no wɔ enyidado. Dɛm enyidado no da hɛn akoma do na yedzi ho ehurusi. Bible no ahyɛ bɔ dɛ ‘yebesisi adan, na yɛatsenatsena mu, na yɛatsɛw wenyin nture, na yeedzi no mu aba.’ ‘Yɛnnkɛberɛ kwa’ osiandɛ Jehovah behyira hɛn. Jehovah ahyɛ hɛn bɔ dɛ ɔbɔbɔ hɛn ho ban na ɔama hɛn asetsena a akomatɔyamu wɔ mu. Onyim obiara n’ehiadze, na ‘ɔbɛma atseasefo nyina enya dza wɔpɛ.’—Isa. 65:​20-24; Ndw. 145:16. w24.04 22-23 ¶11-12

Sɛ yɛdze hɛnho to Jehovah do korakora a, ɔkyerɛ dɛ yɛdze no ayɛ hɛn Botan. Yebotum enya awerɛhyɛmu dɛ wɔ mber a no mu yɛ dzen mpo mu no, sɛ yetsie no a, ɔbɔboa hɛn. (Isa. 48:​17, 18) Aber biara a yebohu dɛ ɔaboa hɛn no, ɔma ahotodo a yɛwɔ wɔ no mu no yɛ kɛse. Ɔba no dɛm a, ɔbɛma yɛagye edzi dɛ Jehovah nkotsee na obotum aboa hɛn ma yeegyina ɔhaw biara a yebehyia no ano. Jehovah dze, ɔtse dɛ ɔbotan a nsu abor no, otsim dza otsim. Sɛ ɔbɔ ne tsirmu dɛ ɔbɛyɛ biribi a, ɔrennsesa no. Dɛmara so na suban pa a ɔwɔ no, ɔnnkɛsesa no ara da. (Mal. 3:6) Aber a Adam na Eve yɛɛ Jehovah do asoɔdzen wɔ Eden ture no mu no, Jehovah annsesa dza nna ɔabɔ ne tsirmu dɛ ɔbɛyɛ no. Ɔsomafo Paul kaa Jehovah ho asɛm dɛ sɛ ɔka asɛm bi a, ɔnnsesa n’ano. (2 Tim. 2:13) Iyi ma yehu dɛ, dza obi bɛyɛ anaa dza obesi biara no remma Jehovah nnsesa. Ntsi mbra biara a Jehovah ahyɛ anaa adze biara a ɔdze esi n’enyi do dɛ ɔbɛyɛ no, ɔrennsesa n’ano. Nyame a ɔtse dɛm na yɛsom no, ntsi yenyim dɛ ɔto ma ɔyɛ dzen a, ɔnoara na ɔbɔboa hɛn na ɔaagye hɛn.—Ndw. 62:​6, 7. w24.06 27-28 ¶7-8

Sɛ enye obi renantsew a, ebɛnadze na ɔbɔboa wo ma eesi gyinae dɛ ebɔwar no anaa eronnwar no? Bɔ mbɔdzen dɛ ibohu nyimpa no yie. Ansaana ebɛhyɛ ase nye dɛm nyimpa no anantsew no, bi a ihun ndzɛmba kor anaa ebien bi wɔ no ho. Naaso sesei a enye no renantsew yi, ibenya hokwan ehu ‘n’akoma mu nyimpa a osuma no.’ Sɛ enye obi renantsew a, ebɛba ebohu mbrɛ dɛm nyimpa no nye Jehovah ntamu si tse, no suban, nye mbrɛ osi susu ndzɛmba ho no yie. Ber rokɔ do no, ɔsɛ dɛ itum yiyi nsɛmbisa bi ano. Bi nye dɛ: ‘Mohwɛ a, dɛm nyimpa yi botum ayɛ okun pa anaa ɔyer pa ama me a?’ (Mbɛ. 31:​26, 27, 30; Eph. 5:33; 1 Tim. 5:8) ‘Hɛn mu biara botum ama ne nyɛnko n’enyi agye anaa? Hɛn mu biara botum ebu n’enyi egu ne nyɛnko ne sintɔ do anaa?’ (Rom. 3:23) Aber a hom ruhu homho yie no, hom nkaa dɛ: Sɛ ibotum nye obi atsena a, ɔnnyɛ dza ohia paa nye dɛ hom adwen behyia wɔ biribiara ho. Mbom ɔsɛ dɛ hom mu biara yɛ krado dɛ ɔdze dza ɔpɛ bɔto nkyɛn. w24.05 27 ¶5

Ɔhen David yɛɛ bɔn kɛse bi. Naaso, aber a nkɔnhyɛnyi Nathan maa David hun dɛ Jehovah n’enyi nngye bɔn a ɔayɛ no ho no, David brɛɛ noho adze gyee no mfom too mu na onuu noho. (Ndw. 51:​3, 4, 17, etsifi asɛm) Ɔhen Hezekiah so yɛɛ bɔn tsiaa Jehovah. (2 Mber. 32:25) Naaso, dɛ mbrɛ David yɛe no, Hezekiah so brɛɛ no ho adze gyee no mfom too mu na onuu noho. (2 Mber. 32:26) Ntsi, Jehovah buu no dɛ ɔyɛ ɔhen pa na ɔkaa no ho asɛm dɛ, “ɔyɛɛ dza ɔtsen.” (2 Ahe. 18:3) Ebɛnadze na yebotum esua efi mu? Sɛ yɛyɛ bɔn a, ɔsɛ dɛ yenu hɛnho na yɛyɛ dza yebotum biara dɛ yɛrennsan nnkɛyɛ dɛm bɔn no bio. Sɛ asafo mu mpanyimfo tu hɛn fo wɔ biribi a yɛtse nka dɛ no ho nnhia ho a, ebɛnadze na ɔsɛ dɛ yɛyɛ? Ɔnnsɛ dɛ yɛtse nka dɛ Jehovah nndɔ hɛn anaa mpanyimfo no mmpɛ hɛn asɛm. Israel ahemfo a wodzii Jehovah nokwar no mpo, nna hɔn mu biara nnyi hɔ a ɔabor afotu anaa kasakyerɛ. (Heb. 12:6) Sɛ wɔtsen hɛn do a, ɔsɛ dɛ (1) yɛgye hɛn mfom to mu, (2) yɛyɛ nsesa biara a ohia no, na (3) yɛkɔ do ara fi hɛn akoma nyinara mu som Jehovah. Sɛ yɛyɛ bɔn na yenu hɛnho a, Jehovah so dze hɛn bɔn bɛkyɛ hɛn.—2 Cor. 7:​9, 11. w24.07 21 ¶8; 22 ¶9, 11

Woyi ɔdzebɔnyɛnyi bi fi asafo no mu aber a mbɔdzen a mpanyimfo no kɔr do bɔe dɛ nkyɛ wɔdze roboa no ma oeenu noho no, ɔammfa ne tsir anngye. (2 Ahe. 17:​12-15) Mbom, ɔkɔr do dze ne ndzeyɛɛ kyerɛɛ dɛ ɔmmpɛ dɛ ɔdze Jehovah ne mbra yɛ edwuma. (Deut. 30:​19, 20) Wɔma nkaabɔ wɔ asafo no mu ma enuanom hu dɛ dɛm nyimpa no nnyɛ Jehovah Dasefo bio. Ɔnnyɛ siantsir a wɔma dɛm nkaabɔ no nye dɛ wɔdze bogu ɔdzebɔnyɛnyi no n’enyim ase. Mbom wɔyɛ dɛm ama enuanom eetum edzi Bible mu ahyɛdze a ɔka dɛ ‘mma wɔnye nyimpa a ɔtse dɛm no nndzi afora anaa wɔnye no nndzidzi mpo’ no do. (1 Cor. 5:​9-11) Siantsir papa bi ntsi na Jehovah dze dɛm ahyɛdze yi mae. Ɔsomafo Paul kyerɛɛw dɛ: “Mbɔrkaw kakra kaw mbɔr no nyina.” (1 Cor. 5:6) Sɛ woennyi ndzebɔnyɛfo a wonnu hɔnho no emmfi asafo no mu a, binom benya adwen dɛ sɛ hɔnara so wɔammfa Jehovah ne mbra annyɛ edwuma a ɔnnyɛ hwee.—Mbɛ. 13:20; 1 Cor. 15:33. w24.08 27 ¶3-4

Mbrɛ ɔtse nye dɛ, ahoɔdzen a yɛwɔ no, yerunntum mmfa bi mma nkorɔfo dɛ mbrɛ Jehovah yɛ no. Naaso, yebotum dze ahoɔdzen a yɛwɔ no aboa afofor. Dɛ mfatoho no, enuanom a hɔn enyi efir anaa enuanom a wɔyar no, yebotum ekedzi gua abrɛ hɔn, anaadɛ yebotum ayɛ ndzɛmba ahorow bi dze aboa hɔn wɔ hɔn efie. Afei so,yebotum aboa ma woeesiesie Ahendzi Asa do anaa yaaboa ma woeesiesie ndzɛmba a wɔasɛɛ wɔ hɔ no. Mma wo werɛ mmfir dɛ, hɛn anomu asɛm wɔ tum paa. Inyim obi a ibotum akamfo no wɔ mbɔdzen a ɔrobɔ no ho anaa? Inyim obi a ohia awerɛkyekyer? Sɛ dɛm a, nna ɔno ma dɛm nyimpa no nhu dɛ edɔ no na edwen no ho so. Ibotum akɛsera no anaa afrɛ no wɔ fon do. Ibotum so akyerɛw nsɛm bi a ɔhyɛ nkuran egu kaad do dze akɛma no anaa asɛnd no email anaa tɛst mɛsegye. Onnhia dɛ eyɛ obi a w’ano atsew ana etum aka asɛm bi anaa akyerɛw biribi dze ahyɛ wo nua Christiannyi no nkuran. Mbom no, nsɛm kakraabi a ofi w’akoma mu a ebɛka akyerɛ wo nua no botum ayɛ dza obehia no dɛm da no ama oeetum akɔ do edzi Jehovah nokwar anaa oeenya enyidado dɛ ndzɛmba bɛyɛ yie.—Mbɛ. 12:25; Eph. 4:29. w24.09 28 ¶8-10

Sɛ eyɛ asafo mu somfo a, yɛgye dzi dɛ erobɔ woho mbɔdzen ama eetum abɛyɛ asafo mu panyin. W’enyi bɛgye ho dɛ ebɛyɛ “edwuma pa” a asafo mu mpanyimfo yɛ no bi anaa? Ndwuma a asafo mu mpanyimfo yɛ no, bi nye dɛn? Wodzi enyim ma yɛyɛ asɛnka edwuma no, wɔkyerɛkyerɛ enuanom no na wɔserasera hɔn hyɛ hɔn nkuran so. Afei so, wɔdze hɔn kasaa nye hɔn ndzeyɛɛ hyɛ asafo no dzen. Ɔnnyɛ nwanwa dɛ Bible no ka asafo mu mpanyimfo a wɔyɛ edwumadzen no ho asɛm dɛ wɔyɛ ‘akyɛdze a wɔdze ama nyimpa.’ (Eph. 4:8) Ibesi dɛn abɛyɛ asafo mu panyin? Sɛ obi rekɛpɛ edwuma a, dza wɔhwehwɛ fi no hɔ no, ɔnnyɛ dɛm ndzɛmba no bi na wɔhwehwɛ fi obi hɔ ansaana oetum abɛyɛ asafo mu panyin. Mpɛn pii no, sɛ ibenya edwuma bi a, ɔsɛ dɛ itum yɛ ndwuma ahorow bi a w’edwumawura no bɛpɛ dɛ eyɛ no. Naaso sɛ epɛ dɛ ebɛyɛ asafo mu panyin a, ɔsɛ dɛ eyer woho yɛ asɛnka edwuma no na itum kyerɛkyerɛ yie. Naaso ɔnnyɛ iyi nkotsee na ohia. Suban ahorow a ɔsɛ dɛ obi nya ama oeetum abɛyɛ asafo mu panyin a wɔaka ho asɛm wɔ 1 Timothy 3:​1-7 na Titus 1:​5-9 no, ɔsɛ dɛ ebɔ mbɔdzen nya dɛm suban ahorow no bi. w24.11 20 ¶1-3