Josua
1 Ni sa mate o Mosese na tamata i Jiova, e kaya sara o Jiova vei Josua*+ na luvei Nuni, na dauveiqaravi+ nei Mosese: 2 “Sa mate o Mosese na noqu tamata.+ Ia mo vakarau mo takosova na uciwai na Joritani, o iko kei ira kece na tamata qo moni lako ina vanua au solia vei ira, oya vei ira na lewe i Isireli.+ 3 Au na solia vei kemuni na vanua kece e butuka na yavamuni, me vaka au yalataka vei Mosese.+ 4 Na iyalayala ni nomuni vanua ena tekivu mai na vanua talasiga me yaco i Lepanoni, me yaco sara ina uciwai levu na Uferetisi, oya na nodra vanua kece na Itaiti+ me yaco ina Wasa Levu* ena ra.*+ 5 Ena sega ni dua e valuti iko rawa ena gauna kece ni nomu bula.+ Me vaka ga niu dau tokoni Mosese, au na tokoni iko tale ga.+ Au na sega ni biuti iko se vakanadakui iko.+ 6 Mo yaloqaqa mo kaukaua,+ ni o iko ga o na liutaki ira na tamata qo mera taukena na vanua au bubuluitaka meu solia vei ira na tukadra.+
7 “Mo yaloqaqa mada ga mo kaukaua sara, mo muria vinaka na Lawa kece e vakaroti iko kina o Mosese na noqu tamata. Mo kua ni gole tani kina ina imatau se ina imawi,+ mo valavala vakavuku ena vanua kece o lakova.+ 8 Me kua ni lako tani mai gusumu na ivola ni Lawa qo,+ mo wilika toka e ra* ena siga kei na bogi mo muria vinaka na ka kece e volai kina,+ ena rawa vinaka na nomu sasaga, o na qai valavala vakavuku.+ 9 Vakaevei au a sega ni vakaroti iko? Mo yaloqaqa mo kaukaua. Mo kua ni domobula se rere ni tokoni iko o Jiova na nomu Kalou ena vanua kece o lakova.”+
10 Ia o Josua e qai vakaroti ira na nodra turaga na tamata: 11 “Moni lako yani ena loma ni keba moni vakaroti ira na tamata, ‘Moni vakarautaka na ka e baleti kemuni, ni oni na takosova tiko na Joritani ena tolu na siga mai qo moni taukena na vanua e solia vei kemuni o Jiova na nomuni Kalou moni taukena.’”+
12 E kaya o Josua vei ira na Rupeni, vei ira na Kata, kei na veimama ni yavusa na Manasa: 13 “Moni nanuma na ka e vakaroti kemuni kina o Mosese na tamata i Jiova:+ ‘Sa solia vei kemuni na vakacegu o Jiova na nomuni Kalou, sa solia vei kemuni na vanua qo. 14 Era na tiko na watimuni, na luvemuni, kei na nomuni manumanu ena vanua e solia vei kemuni o Mosese ena yasa* ni Joritani+ qo, ia o kemuni kece na tamata qaqa+ moni takoso moni tuva vakaivalu e matadra na tacimuni.+ O kemuni moni vukei ira 15 me vakacegui ira mada na tacimuni o Jiova me vakataki kemuni, mera taukena tale ga na vanua e solia vei ira o Jiova na nomuni Kalou. Moni qai lesu ina vanua e soli vei kemuni moni tawana moni taukena, oya na vanua e solia vei kemuni o Mosese na tamata i Jiova ena tokalau ni Joritani.’”+
16 Era tukuna vei Josua: “Keimami na vakayacora na ka kece o vakaroti keimami kina, keimami na lako tale ga ina vanua o tukuna me keimami lako kina.+ 17 Keimami na rogoci iko me vaka ga na neimami dau rogoca na ka kece e tukuna o Mosese. Me tokoni iko mada ga o Jiova na nomu Kalou me vaka ga na nona tokoni Mosese.+ 18 Ena vakamatei o koya e beca na nomu ivakaro qai sega ni muria na ivakaro kece o tukuna vua.+ Mo yaloqaqa mada ga mo kaukaua.”+