Vunautaka na iTukutuku Vinaka ena Veiulunivanua na Andes

KEIMAMI le 18 na davo koto ena qele. Keimami davo ninini toka ena neimami iovi ni moce (sleeping bags), qai vakarogoca tu na taubi ni uca ena delanivale kava. Ni keimami raica na ituvaki ni vale qo, keimami nanuma ni se qai tawani vakadua.

Na cava na inaki ni neimami lakova na vanua qo? Keimami via muria na ivakaro i Jisu me vunautaki na itukutuku vinaka me “yacova nai yalayala kei vuravura.” (Caka. 1:8; Maciu 24:14) Qo e dua na ilakolako ni cakacaka vakavunau ina dua na vanua ribayawa ena veiulunivanua na Andes, e Bolivia.

Neitou Gole Yani

Ka ni bolebole mada ga na sasaga yani e kea. Na basi e dau gole ina vanua ribayawa va qo e sega ni dei na gauna e lako kina. E basi lailai toka ga na kena keimami vodo kina, qai so era sega ni dabe era tu cake tu ga. Ia keimami mani yaco kece yani.

Na inaki ni ilakolako qo me keimami lai vunau ena veikorokoro era tu ena veiulunivanua na Andes, e Bolivia. Ni keimami sobu, keimami sa dui taura sara na neimami iyaya qai veimuri yani ina sala e gole ina ulunivanua.

Era koro lalai ga, ia era veiyawaki na vale, qai taura toka e vica na aua na kena tarai na koro kece. E balavu gona na vanua keimami taubaletaka nira tu veiyawaki na vale. Vakalevu me keimami veilecayaki ena takelo ni gaunisala.

“Na Cava Oni Sega ni Lako Mai Kina e Liu?”

E kurabuitaka dina e dua na marama na yawa ni vanua keimami taubaletaka yani, e kaya me keimami vakayagataka nona valenikuro kei na buka me saqa kina na vakasigalevu. Ni vakaraitaki vua e dua na turaga na ka e tukuna na iVolatabu me baleta na kedra ituvaki na mate, a taroga sara, “Na cava oni sega ni lako mai kina e liu?” Ena levu ni nona tataleitaki, a veitomani tu mai ni keimami biubiu mai na nona koro me taroga e so tale na taro. Dua tale na turaga e se sega ni bau sotavi ira na iVakadinadina i Jiova qai taleitaka vakalevu na ivola vakaivolatabu keimami veisoliyaka tiko. E vakavinavinakataka sara vakalevu na neimami gole yani qai veisureti me keimami vakacegu ena bogi oya ena dua na vale e ka lailai toka ga.

Dua na bogi buto keimami sega ni kila ni keimami sa biria na neimami valelaca ena vanua era vakabure tu kina na kadi loaloa. Dua na ka na neimami tikotiko vakaca ena totolo ni nodra sa katilaki keimami. Ia ena levu ni neimami wawale keimami sa sega ga ni toki, oti ga vakalailai sa ra sega ni veikati.

Taumada e dau momosi sara ga na yago ni keimami davo tiko e ra, ia ni toso na gauna keimami sa matau kina. Dau yali na momosi qori ena matakalailai ni keimami raica na kedra totoka na buca era vakarurugi tu ena o, vaka kina na veiulunivanua totoka e lutuka tu na ucacevata. E rogo ga na drodro ni uciwai kei na sere ni manumanu vuka.

Ni keimami sili oti ena uciwai, keimami veivosakitaka e dua na tikinivolatabu, katalau sara, oti keimami cabe yani vakamalua ena delana me tomani na vunau ena so tale na koro. Sega ni matewale neimami cabeta na delana. Keimami sotava e dua na kena marama, a tagi sara ga ni raica ena iVolatabu ni yaca ni Kalou o Jiova. Dua na ka nona marau. Sa rawa gona ni cavuta sara ga na yaca ni Kalou ena nona masu!

E kaya e dua sa kena turaga ni sa nanumi koya na Kalou qai tabalaka na lagasere. E nona qaqanisere ni talai keimami yani na agilosi. Dua tale na turaga e sa tu ga ena nona vale ena vuku ni tauvimate, qai kaya ni sega ni dua ena nona koro a bau sasaga me lai sikovi koya yani. Kurabui sara ga o koya ni keimami gole sara mai na vanua yawa o La Paz. Dua tale na turaga e kaya ni lauti koya na nodra lako yani na iVakadinadina i Jiova e veivale, ni vakatauvatani kei na so tale na matalotu nira dau qiria ga na lali ni valenilotu me kacivi ira kina na lewenilotu.

Sega ni dua na vale ena yasayasa oya e vakalivaliva, era dau moce gona na itaukei ni sa tekivu karobo na vanua ra qai yadra ni kaca na mataka. Keimami tekivu vunau gona ena ono na kaloko ena mataka vei ira na lewenivale. Ke sega, keimami sa na bera baleta nira sa na gole ena nodra iteitei. Ia, era tu vakarau e so mera rogoca na itukutuku ena iVolatabu ni keimami lai vunau yani ena nodra iteitei, ra bau cegu kina na manumanu era dreta tu na siviyara. Levu vei ira na tiko e vale era tevuka na kuli ni sipi me keimami dabe kina, oti ra qai kacivi mai na lewenivuvale kece mera vakarorogo. E so na dauteitei era cautaka na taga lelevu e tawa tu kina na sila mera vakavinavinakataka na ivola vakaivolatabu keimami solia vei ira.

“Oni Sega ni Guilecavi Au”

Ia, me toso nodra kila na iVolatabu o ira na vakaitikotiko e kea, e bibi mera na dau sikovi. Levu era kerei keimami me keimami lesu yani me vakavulici ira ena so tale na ka. Oya na vuna, keimami sa lesuva tale kina vakavica na yalava qo.

Ena dua na ilakolako qori, a marau e dua na kena marama ni keimami lesu yani, qai kaya: “Oni vaka sara ga na luvequ. Oni sega ni guilecavi au.” A vakavinavinakataka e dua na turaga na neimami cakacaka qai kaya me keimami vakaicili ena nona vale ena veisiko e tarava. E vuavuaivinaka na neimami cakacaka. Keimami rogoca ni dua na marama keimami vunau vua ena dua na neimami ilakolako e liu, sa toki ina siti qai tekivu vunautaka na itukutuku vinaka.

Ena iotioti ni siga ena imatai ni neimami lakolako, e oti koso na karasini ni sitovu lailai, sa voleka tale ga ni oti na kakana. Keimami mani kumuna e so na buka me saqa kina na kakana sa vo tu, oti keimami qai taubale lesu. E vica vata na kilomita na yawa ni tauni me keimami lai vodo basi kina. Keimami qai yaco yani ni sa buto tu na vanua.

Neimami Lesu Mai

A ca na basi keimami vodo tiko kina ena neimami lakolako lesu i vale. Ia, keimami tarova rawa e dua na lori sa oso tu keimami qai vodo kina. Keimami vunau tale ga vei ira na vodo tiko. Era via kila se cava keimami lai cakava yani e kea. Dina nira mamadua, ia era veikauaitaki qai yalovinaka.

Ni oti e ciwa na aua na vodo lori tiko, keimami yaco sara i vale, salavata kei na liliwa qai draki suasua. Ia, a sega ni matewale na neimami ilakolako oya. Ena neimami lesu tiko mai qori, a tuvanaki sara me vuli iVolatabu e dua na marama e vakaitikotiko ena siti.

E itavi dokai dina me vunautaki na itukutuku vinaka vei ira na vakaitikotiko ena vanua ribayawa. Keimami vunau ena va na koro kei na levu na itikotiko. Keimami nanuma sara na ka e tukuni ena iVolatabu: “Na kena lagilagi e na ulu-ni-vanua na yava i koya sa kauta mai nai rogorogo vinaka, ka vakarogoya mai na sautu, sa kauta mai nai rogorogo vinaka ni ka vinaka, ka vakarogoya mai na veivakabulai.”​—Aisea 52:7; Roma 10:15.

[iYaloyalo ena tabana e 17]

Keimami vakarau lai vunautaka na itukutuku vinaka