Na Cava ena Kau Tani ni Yaco Mai na Matanitu ni Kalou?

1, 2. (a) E duidui vakacava na ituvaki kei vuravura kei na kaivesu e daubasulawa? (Raica na imatai ni iyaloyalo.) (b) Cava ena kilai me baleta na rusa ni ituvaki ca kei vuravura?

“O SA vakarau mate!” E voqa na vosa qori, e cabolo na katuba kaukamea ni sa kau mai tuba na daubasulawa vakarerevaki. Cava eratou kaya kina qori na yadra ni valeniveivesu? E rairai bulabula, qai sega ni laurai e yagona e dua na ka me nanumi kina ni sa vakarau mate. Ia sa ra kauti koya sara tiko ga qori na yadra me lai vakamatei. E vakadinadinataki ni daubasulawa, mani totogi mate kina.a

² Nida vakasamataka, na ituvaki ni bula nikua e vaka sara tu ga na turaga e totogi mate qori. Sa rui ca vakalevu na ituvaki kei vuravura, sa voleka gona ni rusa. E kaya na iVolatabu: “Sa takali tiko yani na vuravura.” (1 Joni 2:17) Io ena rusa dina na veika e yaco tiko kina. Ia e tiko na kedrau duidui na kena sa vakarau vakarusai na ituvaki kei vuravura, kei na kaivesu e vakamacalataki qori. Ni bera ni vakamatei de so era na rairai kudruvaka, ra kaya ni sega ni tau vua na lewadodonu, se ra nuitaka ni na veisautaki vakasauri na kena itotogi. Ena yasana adua, sa vakatulewataka oti tu na iLiuliu Cecere Duadua ni vuravura kei na lomalagi e dau lewadodonu, na kena lewai na ituvaki kei vuravura. (Vkru. 32:4) Ena sega ni daro na kena vakarusai, se me vakatitiqataki tale na lewadodonu e tau kina. Ia ni sa tau oti na lewa qori, era na duavata ena marau na ibulibuli vuku e lomalagi vaka kina e vuravura ni a vakayacori dina ga na lewadodonu. Dua na ka na vakacegu eda na vakila!

 3. Na cava na va na iwasewase eda na dikeva ni na vakarusai ni sa yaco mai na Matanitu ni Kalou?

³ Na cava e okati ena “vuravura” e “sa takali tiko yani”? Ena rusa e levu na ka era nanuma tu nikua na tamata ni ivakarau ni bula ena vuravura qo. Vakacava me rarawataki qori? Sega sara ga! Baleta ni tiki bibi ni ‘itukutuku vinaka ni Matanitu’ ni Kalou. (Maciu 24:14) Meda raica gona vakabibi na veika ena kau tani ni sa yaco mai na Matanitu ni Kalou. Eda na wasea vakava: ira na tamata ca, isoqosoqo e cakacaka vakailawaki, veika ca e dau caka, kei na ituvaki rarawataki. Ena iwasewase yadudua qori eda na raica kina (1) e tara vakacava na noda bula nikua, (2) na cava ena cakava kina o Jiova, kei (3) na ka ena cakava me vakaisosomitaka kina ena veika vinaka.

 4. E tarai keda vakacava nikua na nodra ivalavala na tamata ca?

⁴ E tarai keda vakacava nikua na ka era cakava na tamata ca? Ni parofisaitaka oti ga na yapositolo o Paula ni na vakilai “e levu na ka dredre” ena gauna qo, e uqeti tale vakalou me vola: “O ira na daucaka ca kei ira na dauveidabui era na qai torosobu ga.” (2 Tim. 3:1-5, 13) O vakadinadinataka ni sa yaco dina tiko na parofisai qori? Levu e dau vakalolomataki sara ga vei ira na tamata ca ni mosimosi nodra dau veivakasagai, ra veivakaduiduitaki, ra dau basulawa voravora tale ga. So e dau laurai levu na ka era cakava, so tale era dau veidabui, ra cakava vunivuni tiko na ka, qai nanumi nira dau cakacaka vakadodonu. Ke ra sega mada ga ni cakava vei keda e dua na ka na tamata ca, se tarai keda tiko ga na nodra ivalavala. E rarawataki dina na vakadomobula ni ka era dau cakava. E vakarerevaki sara ga nodra vakalolomataki ira na gone, ira na itabaqase kei ira na malumalumu. E vakamanumanu, vakatimoni qai lolovira na nodra itovo. (Jeme. 3:15) Ka ni marau ni tiko ena Vosa i Jiova na itukutuku vinaka me isosomi ni tukutuku ca va qori.

 5. (a) Na cava e se soli tiko qo vei ira na tamata ca? (b) Na cava na kedra itinitini o ira na sega ni via veisau?

⁵ Na cava ena cakava kina o Jiova? Se solia tiko o Jiova na gauna vei ira na tamata ca mera veisau. (Aisea 55:7) E se sega ni tau vei ira na iotioti ni vakatulewa. Na ituvaki ca ga ena vakarusai. Vakacava o ira na sega ni via veisau, era tokona tiko ga na ka ca me yacova na gauna ni veivakararawataki levu? E yalataka o Jiova ni na vakarusai ira kece na tamata ca e vuravura. (Wilika Same 37:10.) De ra nanuma ni na sega ni tau vei ira na lewa qori. Levu era dau vunia na nodra ivalavala, sega tale ga ni tau vei ira na lewadodonu ena vuravura qo se na ca ni ka era cakava. (Jope 21:7, 9) Ia e uqeta na iVolatabu meda nanuma tiko qo: “Ni raica na mata ni Kalou na ivalavala kece ni tamata, e raica tale ga na nona ilakolako kece. E sega na butobuto se na loaloa vavaku na vanua era rawa ni vunitaki ira kina na dau cakacala.” (Jope 34:21, 22) E sega ni dua na ka e rawa ni vunitaki vei Jiova. Era na sega ni dro rawa na dauveivakaisini, se me dua na vanua buto se titobu me sega ni raica rawa na Kalou na ka e caka tiko kina. Ni oti na Amaketoni, era na sega ni laurai tale na tamata ca. Sa sega tale ni dua na kedra o!​—Same 37:12-15.

 6. O cei ena sosomitaki ira na tamata ca, cava e itukutuku vinaka kina qori?

⁶ O cei na sosomitaki ira na tamata ca? E yalataka vakayalololoma na Kalou: “Era na taukena na vuravura na yalomalumalumu, era na kunea na marau vakasakiti ena levu ni vakacegu.” E tukuni tale ga ena same qori: “O ira na yalododonu era na taukena na vuravura, era na qai bula tawamudu kina.” (Same 37:11, 29) O cei era “yalomalumalumu” ra qai “yalododonu”? O ira na yalomalumalumu era taleitaka na ivakavuvuli kei na veidusimaki i Jiova, ia o ira na yalododonu era taleitaka mera cakava na ka dodonu ena mata i Jiova na Kalou. Ena vuravura nikua era levu cake na tamata ca ni vakatauvatani kei ira na yalododonu. Ia ena vuravura vou e se bera mai, era na qai bula ga kina na ilawalawa tamata era yalomalumalumu ra qai yalododonu, ena sega ni kauaitaki na kedra levu. O ira ga qo era na qai veisautaki vuravura me parataisi!

 7. E tarai keda vakacava na ka era cakava tiko nikua na isoqosoqo dau cakacaka vakailawaki?

⁷ Ena tarai keda vakacava na isoqosoqo e cakacaka vakailawaki? Levu na ka ca e yaco tu nikua era caka sara tu ga vakaisoqosoqo. Vakasamataki ira mada na isoqosoqo lotu era lawakitaki ira e milioni vakacaca ena itukutuku me baleta na Kalou, kena nuitaki na iVolatabu, inuinui me baleta na vuravura kei na kawatamata ena dua na gauna mai qo​—kei na levu tale na ka e sega ni tukuni rawa. Vakacava na matanitu era uqeta na veiraravui vakamatatamata, ra vakararawataki ira na dravudravua kei na malumalumu, ra qai rawaka ena veivaqumi kei na veitovaki? Vakacava na kabani lelevu dau kocokoco era benuca na itikotiko, ra vakacacana na iyau bula, ra vakaisini ira na dauvolivoli mera vutuniyau ga kina e vica, ra qai dravudravu e vica vata na milioni? Sega ni vakabekataki ni o ira sara ga na isoqosoqo dau cakacaka vakailawaki qo era vakavuna tiko noda bula rarawa.

 8. Me vaka e tukuna na iVolatabu, na cava ena yaco ina isoqosoqo era nanuma tu e levu nikua ni na dei?

⁸ Na cava ena cakava kina o Jiova? Ena tekivu na veivakararawataki levu ni yavala na isoqosoqo vakapolitiki me ravuti lotu lasu kece e matataka na saqamua e vakatokai me o Papiloni na Ka Levu. (Vkta. 17:1, 2, 16; 18:1-4) Era na vakarusai vakadua na isoqosoqo lotu lasu kece qori. Ia vakacava ga na vo tale ni isoqosoqo dau cakacaka vakailawaki? Na iVolatabu e vakayagataka na ulunivanua kei na yanuyanu me vakatayaloyalotaka na isoqosoqo kece, kei na ituvatuva era nanuma tu na tamata nikua ni na dei. (Wilika Vakatakila 6:14.) E parofisaitaka na Vosa ni Kalou ni na yavalati na kedra yavu na matanitu qori kei na isoqosoqo kece era vakarurugi kina. Ena tini na veivakararawataki levu ena nodra vakarusai na matanitu kece ni vuravura makawa qo kei ira na tokona tiko mera saqata na Matanitu ni Kalou. (Jere. 25:31-33) Ni oti qori sa na sega tale ni vo e dua na isoqosoqo dau cakacaka vakailawaki!

 9. Eda kila vakacava ni na tuvanaki vinaka na vuravura vou?

⁹ Na cava ena sosomitaka na isoqosoqo dau cakacaka vakailawaki? Vakacava ena tiko e vuravura e dua tale na isoqosoqo ni sa oti na Amaketoni? E kaya na iVolatabu: “Eda waraka na lomalagi vou kei na vuravura vou me vaka na nona yalayala, era na tiko kina na yalododonu.” (2 Pita 3:13) Sa na oti vakadua na lomalagi kei na vuravura makawa, na matanitu dau cakacaka vakailawaki kei na isoqosoqo e vuravura era vakarurugi tu kina. Cava ga ena qai sosomitaki ira? Na matavosa “lomalagi vou kei na vuravura vou” e kena ibalebale ni na dua na matanitu vou kei na isoqosoqo vou e veiliutaki kina na matanitu qori. Qo na Matanitu ena veiliutaki kina o Jisu Karisito ni vakatotomuria vinaka na itovo i Jiova, na Kalou dau tuvatuvanaki. (1 Kor. 14:33) Ena tuvanaki vinaka na “vuravura vou.” Ena veirauti tale ga na levu ni tagane mera cola itavi. (Same 45:16) Ena dusimaki ira o Karisito kei na le 144,000 era veiliutaki vata kei koya. Vakasamataka mada na gauna sa na sosomitaki kina na isoqosoqo dau cakacaka vakailawaki ena dua ga na isoqosoqo e duavata, qai sega ni dau lawaki!

10. Na veika ca cava e takalevu tu ena nomu itikotiko? E tarai iko vakacava kei na nomu vuvale?

¹⁰ E tarai keda vakacava na veika ca e dau caka? Eda bula tu ena vuravura e levu kina na ka ca. Sa takalevu tu nikua na ivalavala dukadukali, lasu, kei na itovo voravora ni veivakamavoataki. Era saga na itubutubu mera taqomaki luvedra mai na veika ca va qori. Na buturara tale ga ni veivakamarautaki e kenadau ena vakabekabei ni veika ca, qai beci kina na ivakatagedegede i Jiova ena veika e vauca na ka dodonu kei na ka e cala. (Aisea 5:20) Ia e sega ni va qori na noda rai na lotu vaKarisito dina. Eda saga meda yalodina tiko ga ena vuravura e uqeta na kena beci na ivakatagedegede i Jiova.

11. Na cava eda vulica ena nona vakarusai Sotoma kei Komora o Jiova?

¹¹ Na cava ena cakava kina o Jiova? Vakasamataka ga na ka e cakava vei Sotoma kei Komora. (Wilika 2 Pita 2:6-8.) A rarawataka na turaga yalodina o Loti na ivalavala ca era cakava na tiko wavoliti koya kei na nona vuvale. Na nona vakarusa gona na vanua kece qori o Jiova, e vakaotia kina na ivalavala ca, me “ivakaraitaki” tale ga “ni ka ena yacovi ira na sega ni doka na Kalou.” Me vaka ga na nona vakaotia o Jiova na ivalavala dukadukali ena gauna ya, ena cakava tale ga qori ni vakataulewa ena veika ca era yaco tu nikua.

12. Na cava o rai vakanamata tu kina mo cakava ni sa kau tani na ituvaki makawa eda bula tu kina qo?

¹² Na cava ena sosomitaka na veika ca e dau yaco tiko? Ena marautaki na cakacaka ena parataisi e vuravura. Vakasamataka na kena veisautaki na vuravura qo me parataisi se da dui tara noda vale kei ira noda vuvale. Kena ikuri noda rawa ni kidavaki ira tale na milioni vakacaca era vakaturi mai na mate, meda qai vakavulici ira ena sala i Jiova kei na itukutuku ni veika e cakava vei keda. (Aisea 65:21, 22; Caka. 24:15) Ena levu na ka eda cakava meda marau kina, meda vakacaucautaki Jiova tale ga!

13. Na ituvaki rarawataki cava sa yaco tu nikua ena vuku ni nodratou talaidredre o Setani, Atama kei Ivi?

¹³ E tarai keda vakacava nikua na ituvaki rarawataki? Na ituvaki rarawataki e yaco tiko nikua era vakavuna na tamata ca, isoqosoqo dau cakacaka vakailawaki, kei na ka ca tale eso. E dau tarai keda kece na veivaluvaluti, bula dravudravua, se veivakaduiduitaki vakamatatamata. Vakacava na tauvimate kei na mate? Qori na ka e dau yacovi keda kece. Ia e vu ga mai na nodratou talaidredre vei Jiova na le tolu​—o Setani, Atama kei Ivi. Eda sega gona ni galala mai na revurevu ni nodratou talaidredre.

14. Na cava ena cakava o Jiova ena ituvaki rarawataki? Tukuna e dua na kena ivakaraitaki.

¹⁴ Na cava ena cakava kina o Jiova? Vakasamataka mada na veivaluvaluti. E yalataka o Jiova ni na vakaotia vakadua. (Wilika Same 46:8, 9.) Vakacava na tauvimate? Ena vakaotia tale ga. (Aisea 33:24) Ia o mate? Ena tiloma se vakaotia vakadua o Jiova! (Aisea 25:8) Sa na sega na dravudravua. (Same 72:12-16) Ena cakava tale ga qori ena ituvaki rarawataki kece e dau vakavuna na noda bula vakaloloma. Ena vakaotia tale ga na “cagi” ca e curuma tu na vuravura qo, ni sa sega ni qai kune na yalo ca e dau uqeta o Setani kei ira na nona timoni.​—Efeso 2:2.

15. Na cava ena vakaoti vakadua ni sa cava na Amaketoni?

¹⁵ O rawa ni vakasamataka na vuravura e sega kina na veivaluvaluti, tauvimate se na mate? Raitayaloyalotaka mada​—ni sa sega na mataivalu e vanua, e wai, vaka kina na kena e dau vuka e macawa! Sa sega na iyaragi se me dua na kedra ivakananumi na lako ina ivalu. Sega tale ga na valenibula, vuniwai, nasi, nodra valeniwawa na mate, vale era dau qarava na veika me baleta na veibulu, kei na ibulubulu, se inisuataki tu noda bula! Ni sa vakaoti ga na basulawa, sa na sega ni vinakati tale na kabani ni yadra, ira na ovisa, loka ni vale, se vakayagataki na alamu! Vakasamataka mada ni sa na sega ni lomaocaocataki tale na ka e dau vakaleqa na noda vakasama kei na lomada.

16, 17. (a) Na vakacegu cava era na vakila o ira na sega ni vakarusai ena Amaketoni? Vakamacalataka. (b) Eda na vakadeitaka vakacava nida na bula tiko ga ni sa kau tani na vuravura makawa qo?

¹⁶ Sa na vakacava tu na bula ni sa oti na gauna rarawataki? Bau dredre toka meda vakasamataka na bula qori. Sa dede sara noda bula tiko ena vuravura makawa qo, eda sega gona ni lomaleqataka ni sa matau tu vei keda na kena ituvaki. Eda na vakataki ira ga na tiko volekata na siteseni ni sitimanivanua osooso, ni sa sega tu ni dua na ka vei ira na kena kosakosa, se mera kauaitaka na iboi o ira na tiko volekata na isovasova ni benu. Nira vakaoti kece na veika qori​—ena dua na vakacegu levu!

¹⁷ Na cava ena sosomitaka na ka rarawa eda vakila tiko qo? E sauma qori na Same 37:11: “Era na kunea na marau vakasakiti ena levu ni vakacegu.” Vakacava, o taleitaka na vosa qori? Qori sara ga na ka e vinakata o Jiova mo vakila. Mo saga gona ena nomu igu kece mo volekati Jiova tiko ga kei na nona isoqosoqo ena gauna dredre qo! Mareqeta na nomu inuinui, vakasamataka vakatitobu, vakadeitaka ena nomu vakasama kei na lomamu​—tukuna tale ga vei ira eso tale! (1 Tim. 4:15, 16; 1 Pita 3:15) Qori ga na sala o na vakadeitaka kina ni o na sega ni kau tani kei na vuravura sa vakarau rusa tu qo. O na bula tu ga kina​—qai vakila na marau me tawamudu!