Wěma nukɔntɔn e è wlán sɛ́dó Kɔlɛ́ntinu lɛ́ é

2 Énɛ́ wú ɔ, nɔví lɛ́ mi, hwenu e un wá mi gɔ́n é ɔ, é nyí xógbe ɖaxó ɖaxó lɛ́ alǒ gbɛtɔ́ sín nǔnywɛ́ wɛ un zán dó ɖɔ nǔbúdo Mawu tɔn sín xó nú mi ǎ. 2 Ðó un wá gbeta ɔ kɔn ɖɔ ɖo tɛ́ntin mitɔn ɔ, un kún ná tuun nǔ ɖě zɛ Jezu Klísu kpó xwe e è xwe è nyi atín wú é kpó wú ó. 3 Bɔ hwenu e un wá gɔ̌n mitɔn é ɔ, un ɖó gǎn ǎ, un ɖo xɛsi jí bo lɛ́ ɖo sísɔ́sísɔ́ wɛ tawun; 4 nǔnywɛ́ gbɛtɔ́ tɔn sín xó e nɔ ɖu ɖo mɛ jí lɛ́ é wɛ un zán dó ɖɔ xó bo lɛ́ jlá wɛn ɔ mi ǎ, é nyɔ́ wa ɔ, gbigbɔ Mawu tɔn sín hlɔ̌nhlɔ́n wɛ xó ce lɛ́ ɖe xlɛ́, 5 bónú nǔɖiɖi mitɔn ní ma jínjɔ́n nǔnywɛ́ gbɛtɔ́ lɛ́ tɔn jí ó, loɔ, é ní jínjɔ́n hlɔ̌nhlɔ́n Mawu tɔn jí.

6 Mǐ nɔ ɖɔ nǔnywɛ́ sín xó ɖo mɛ ɖěɖěe zin lɛ́ é tɛ́ntin, amɔ̌, é nyí nǔnywɛ́ gbɛ* élɔ́ tɔn ǎ, mɔ̌ jɛ́n é ma ka lɛ́ nyí gǎn gbɛ élɔ́ tɔn e è ná hu acɛ ná lɛ́ é sín nǔnywɛ́ ǎ é nɛ́. 7 Loɔ, nǔnywɛ́ Mawu tɔn e è sɔ́ hwlá dó nǔbúdo tɔn mɛ é sín xó wɛ mǐ nɔ ɖɔ; Mawu ko bló tuto tɔn jɛ nukɔn nú gbɛ* élɔ́, nú susu mǐtɔn. 8 Nǔnywɛ́ énɛ́ wú wɛ gǎn gbɛ* élɔ́ tɔn lɛ́ ɖě ma mɔ nǔ jɛ ǎ, ɖó nú yě ko mɔ nǔ jɛ wú wɛ ɔ, yě ná hu Aklúnɔ susunɔ ɔ* ǎ. 9 Amɔ̌, lěe è ko wlán gbɔn é ɔ: “Nǔ ɖěɖěe Mawu ko sɔ́ nǔ ná ɖ’ayǐ nú mɛ e yí wǎn n’i lɛ́ é ɔ, nukún mɔ ǎ, tó se ǎ, mɔ̌ jɛ́n é ma ka lɛ́ wá ayi mɛ nú mɛ ɖěbǔ ǎ é nɛ́.” 10 Ðó mǐdɛɛ lɛ́ wɛ Mawu ɖe yě xlɛ́ gbɔn gbigbɔ tɔn gblamɛ, ɖó gbigbɔ ɔ nɔ ba do nú nǔ bǐ, káká jɛ nǔ Mawu tɔn e gɔ́ngɔ́n lɛ́ é jí.

11 Ðó mɛ̌ ka ɖo gbɛtɔ́ lɛ́ mɛ, bo tuun nǔ e kunkplá mɛɖé é zɛ ayi* mɛ ɔ ɖésúnɔ tɔn wú? Mɔ̌ ɖokpó ɔ, mɛ ɖěbǔ kpé wú bo tuun nǔ e kunkplá Mawu lɛ́ é ǎ, gbigbɔ Mawu tɔn kɛ́ɖɛ́ jɛ́n tuun. 12 Din ɔ, mǐ mɔ gbigbɔ ɔ yí, é ka nyí gbigbɔ gbɛ ɔ tɔn ǎ, loɔ, gbigbɔ e gosín Mawu gɔ́n é wɛ, bónú mǐ ní dó sixú tuun nǔ e Mawu ná mǐ kpó xomɛnyínyɔ́ kpó lɛ́ é. 13 Mǐ nɔ lɛ́ ɖɔ nǔ énɛ́ lɛ́ sín xó; xó ɖěɖěe è sɔ́ nǔnywɛ́ gbɛtɔ́ tɔn dó kplɔ́n mɛ lɛ́ é wɛ mǐ ka nɔ zán ǎ, é nyɔ́ wa ɔ, ée gbigbɔ ɔ kplɔ́n mɛ lɛ́ é wɛ mǐ nɔ zán, mɔ̌ mɛ ɔ, mǐ nɔ sɔ́ xó e nyí gbigbɔ ɔ tɔn lɛ́ é dó tínmɛ* nǔ e nyí gbigbɔ ɔ tɔn lɛ́ é.

14 Amɔ̌, mɛ e linlin gbɛtɔ́ tɔn nɔ xlɛ́ ali é nɔ yí gbe nú* nǔ e nyí gbigbɔ Mawu tɔn tɔn lɛ́ é ǎ, ɖó xlonɔnú wɛ yě nyí n’i; é ka sixú lɛ́ tuun yě ǎ, ɖó gbigbɔ ɔ wɛ è nɔ sɔ́ dó gbéjé nǔ énɛ́ lɛ́ kpɔ́n. 15 Mɛ e gbigbɔ ka nɔ xlɛ́ ali é nɔ gbéjé nǔ lɛ́ bǐ kpɔ́n, mɛ ɖěbǔ ka nɔ gbéjé éyɛ́ kpɔ́n ǎ. 16 Ðó “mɛ̌ ka kpé wú bo tuun linlin Jexóva* tɔn, bo ná dó sixú kplɔ́n nǔ i?” Amɔ̌, mǐdɛɛ lɛ́ ɔ, mǐ ɖó linlin Klísu tɔn.