Wɛ̌masɛ́dómɛ Judi tɔn

1 Nyɛ Judi, éé nyí kannumɔ Jezu Klísu tɔn, bo nyí nɔví Jaki tɔn é, wɛ ɖo wěma sɛ́ dó mɛ ɖěɖěe Mawu Tɔ́ ɔ yí wǎn ná bo ylɔ́, lobo cyɔ́n alɔ yě jí nú Jezu Klísu lɛ́ é wɛ:

2 Nǔbláwǔkúnúmɛ, fífá kpó wǎnyíyí Mawu tɔn kpó ní túnflá nú mi.

3 Mɛ vívɛ́ná lɛ́ mi, un ɖo gǎn lɛ́ bǐ dó wɛ, bo ná wlán nǔ sɛ́dó mi dó hwlɛngán e mǐ ɖó ɖo bǔ é wú; amɔ̌, un wá mɔ ɖɔ é ɖo dandan ɖɔ má wlán nǔ sɛ́dó mi, bo byɔ́ mi ɖɔ mi ní fun ahwan syɛ́nsyɛ́n dó nǔɖiɖi e è ná mɛ mímɛ́ lɛ́ azɔn ɖokpó bɔ xó fó é tamɛ. 4 Hwɛjijɔ e wú wɛ é wɛ nyí ɖɔ, mɛɖé lɛ́ lun byɔ́ mi mɛ, bɔ Nǔwlánwlán mímɛ́ lɛ́ ko ɖó hwɛ nú yě sín hwenu línlín ɖíe. Yě nɔ sí Mawu ǎ, bo nɔ sɔ́ fɛ́nú Mawu mǐtɔn tɔn dó ba hwɛjijɔ nú wunhínhɔ́nnú* lɛ́, lobo nɔ nɔ gbejí nú Jezu Klísu, mɛ ɖokpó géé e nyí gǎn mǐtɔn bo lɛ́vɔ́ nyí Aklúnɔ mǐtɔn é ǎ.

5 Mi tuun nǔ élɔ́ lɛ́ bǐ ganjí có, un jló ná flín mi ɖɔ Jexóva* hwlɛ́n togun ɖé sín Ejípu, énɛ́ gúdo ɔ, é sú kún dó nú yě mɛ ɖěɖěe ma ɖi nǔ ǎ lɛ́ é. 6 Bɔ wɛnsagun ɖěɖěe jó azɔ̌ e è ɖe nú yě é kpó nɔtɛn e jɛxá yě é kpó dó lɛ́ é ɔ, é dó wlɔ e è ma sixú wɛ́n ǎ lɛ́ é yě, bo bɛ́ yě dó ablu gɔngɔn mɛ, nú hwɛ e è ná ɖó nú yě ɖo azǎn ɖaxó ɔ gbe é. 7 Mɔ̌ ɖokpó ɔ, Sodɔ́mu kpó Gomɔ́ɔ kpó, kpó toxo e lɛ́ lɛ̌ dó yě lɛ́ é kpán lɔmɔ̌ jó yěɖée dó nú agalilɛ* e syɛ́n tawun é, bo nɔ nya jlǒ agbaza tɔn e ma nyí jɔwámɔ tɔn ǎ lɛ́ é gbé. Yě wá húzú kpɔ́ndéwú akpágbanúmɛ tɔn nú mǐ, ɖó è sɔ́ zo mavɔmavɔ dó dɔn tó nú yě.

8 É ɖo mɔ̌ có, mɛ énɛ́ lɛ́ lɔ kpo nú dlɔ̌ kúkú, nɔ hɛn yěɖée kpó mɛ ɖěvo lɛ́ kpó blí, nɔ ɖó sísí nú acɛkpikpa ǎ, bo nɔ nylá nu dó mɛ e Mawu sɔ́ su lɛ́ é wú. 9 Hwenu e wɛnsagungán Micɛ́li ka kpé nǔɖé xá Awǒvi, bo ɖo nǔ dɔn xá ɛ wɛ dó cyɔ Mɔyízi tɔn wú é ɔ, é glá bo zán xógbe mɛzunzun tɔn lɛ́ dó ɖó hwɛ n’i ǎ, loɔ, é ɖɔ: “Jexóva* ní gbɛ́ nǔ nú we.” 10 Amɔ̌, mɛ énɛ́ lɛ́ nɔ nylá nu dó, nú è ná ɖɔ xójɔxó ɔ, nǔ e mɛ yě ma mɔ nukúnnú jɛ ǎ lɛ́ é bǐ wú. Bɔ ɖo nǔ e mɛ yě nɔ mɔ nukúnnú jɛ ɖo jɔwámɔ linu kanlin ɖɔhun lɛ́ é bǐ mɛ ɔ, yě nɔ ɖo nǔ e ná hɛn nǔ gblé dó yě wú lɛ́ é wa wɛ.

11 Heelú yě, ɖó yě mlɛ́ ali Kanyɛ́ɛ tɔn, bo hwlɛndó bo wlí ali nyanya e Baláamu ɖo ajɔ gbé mɛ bo wlí é. Kún yětɔn ná sú dó, ɖó yě xwedó gǔfínfɔ́nxó Kolée tɔn lɛ́. 12 Yě nyí awǐnnya e ɖo hwlǎhwlá ɖo sin glɔ́ lɛ́ é, ɖo agɔ̌ ɖěɖěe mi nɔ ɖu dó ɖe wǎnyíyí mitɔn xlɛ́ lɛ́ é hwenu, hwenu e yě nɔ ɖo ɖuɖu xá mi wɛ é; lɛ̌ngbɔ́nyitɔ́ e nɔ ná nǔɖuɖu yěɖée ma ɖi xɛsi lɛ́ é; akpɔ́kpɔ́ ɖěɖěe jɔhɔn sɔ́ yi dě ɔ, é nɔ sɔ́ yi dě, bɔ jǐ ma ka nɔ ja ǎ lɛ́ é; atín ɖěɖěe ma nɔ ná sínsɛ́n dó hwe yětɔn nu ǎ bo kú bǐ mlɛ́mlɛ́,* bɔ è hɔn ɖɔ ná lɛ́ é; 13 mɛ énɛ́ lɛ́ nyí aslɔkɛ́ e ɖo adǎn jí lɛ́ é, bɔ winnyá yěɖésúnɔ tɔn sín fún wɛ yě nɔ nyɛ; sunví ɖěɖěe ɖo flúflú wɛ, bɔ ablu e gɔngɔn hú bǐ é ɖo te kpɔ́n káká sɔ́yi lɛ́ é.

14 Ɛɛn, Enɔ́ki e nyí jijimɛ tɛ́nwegɔ́ ɔ sín Adámu jí é lɔmɔ̌ ko ɖɔ ɖ’ayǐ dó yě wú ɖɔ: “Mi kpɔ́n! Jexóva* kpó wɛnsagun mímɛ́ tɔn afatɔ́n mɔ̌kpán* lɛ́ kpó wá, 15 bo ná ɖɔ hwɛ xá gbɛtɔ́ lɛ́ bǐ, lobo ɖó hwɛ nú yě mɛ ɖěɖěe ma nɔ ɖó sísí nú Mawu ǎ lɛ́ é, ɖó nǔ nyanya e yě wa lɛ́ é bǐ kpó xó baɖabaɖa ɖěɖěe hwɛhutɔ́ énɛ́ lɛ́ e ma nɔ ɖó sísí nú Mawu ǎ lɛ́ é ɖɔ dó wǔtu tɔn lɛ́ é bǐ kpó wú.”

16 Mɛ énɛ́ lɛ́ nɔ ɖo nǔ húnhún ɖɔ wɛ, yě nɔ ɖo gbɛ vo sa wɛ, bo nɔ ɖo nǔ wa sɔgbe xá jlǒ yěɖésúnɔ tɔn lɛ́ wɛ, lobo nɔ ɖo nugo yí wɛ, hwenu e yě nɔ ɖo mɛ ɖěvo lɛ́ klɔ́ wɛ* nú le yěɖésúnɔ tɔn lɛ́ é.

17 Amɔ̌, mɛ vívɛ́ná lɛ́ mi, midɛɛ lɛ́ ɔ, mi flín xó* e Aklúnɔ mǐtɔn Jezu Klísu sín mɛsɛ́dó lɛ́ ko ɖɔ ɖ’ayǐ lɛ́ é. 18 Yě ko nɔ ɖɔ nú mi ɖ’ayǐ ɖɔ: “Ðo azǎn* gǔdo gúdo tɔn lɛ́ mɛ ɔ, mɛcákotɔ́ lɛ́ ná tíin bo ná nɔ wa nǔ sɔgbe xá jlǒ nyanya yěɖésúnɔ tɔn lɛ́. 19 Mɛ e nɔ dɔn kínklán wá lɛ́ é wɛ yě nyí, kanlinjɔmɔ lɛ́,* gbigbɔ Mawu tɔn nɔ xlɛ́ ali yě ǎ.* 20 Amɔ̌, mɛ vívɛ́ná lɛ́ mi, midɛɛ lɛ́ ɔ, mi ní lí dǒ ɖo nǔɖiɖi mímɛ́ mitɔn e nǔ bǐ vɔ ɖ’é wú é mɛ, bo nɔ xo ɖɛ gbɔn gbigbɔ mímɛ́ gblamɛ, 21 bo ná dó nɔ wǎnyíyí Mawu tɔn mɛ, ée mi ɖo te kpɔ́n nǔbláwǔkúnúmɛ Aklúnɔ mǐtɔn Jezu Klísu tɔn e zɔ́n bɔ è ná mɔ gbɛ mavɔmavɔ é. 22 Gɔ́ ná ɔ, mi ní nɔ ɖo nǔbláwǔ kú nú mɛ e nɔ ɖo nǔ xo kpɔ́n wɛ lɛ́ é wɛ; 23 mi dɔn yě sín myɔ mɛ dó hwlɛ́n yě. Amɔ̌, mi ní nɔ ɖo nǔbláwǔ kú nú mɛ ɖěvo lɛ́ wɛ, mi ní nɔ wa mɔ̌ kpó xɛsi kpó, mi ní ka gbɛ́ wǎn nú awu e yě hɛn kwíji gbɔn nǔnyanyawiwa yětɔn lɛ́ gblamɛ é.

24 Din ɔ, Mawu kpé wú bo ná hɛn mi, bɔ mi ná klɛ́n afɔ ǎ, bo ná lɛ́vɔ́ bló bɔ mi ná nyí mɛ mímɛ́ ɖo susu tɔn nukɔn kpó awǎjijɛ ɖaxó kpó. 25 É wɛ nyí Mawu mǐtɔn ɖokpó géé ɔ kpó Hwlɛngántɔ́ mǐtɔn kpó, bɔ susu, agbadídó, hlɔ̌nhlɔ́n kpó acɛkpikpa kpó jɛxá ɛ, sín mavɔmavɔ, égbé, káká sɔ́yi mavɔmavɔ, gbɔn Jezu Klísu Aklúnɔ mǐtɔn jí. Amǐ.