Nǔ e Mɛsɛ́dó lɛ́ wa lɛ́ é

19 Énɛ́ gúdo ɔ, hwenu e Apolósu ɖo Kɔlɛ́nti é ɔ, Pɔ́lu gbɔn xá ɖěɖěe ma yá xu ǎ lɛ́ é mɛ bo wá Efɛ́zi. É mɔ ahwanvú ɖé lɛ́ ɖo fínɛ́, 2 bo ɖɔ nú yě ɖɔ: “Mi ka mɔ gbigbɔ mímɛ́ yí, hwenu e mi húzú nǔɖitɔ́ é a?” Yě yí gbe n’i ɖɔ: “Étɛ́! Nǔɖé to nyí gbigbɔ mímɛ́ ɔ, mǐ se kpɔ́n ǎ mɛ.” 3 Énɛ́ wú ɔ, é ɖɔ: “Batɛ́mu ɖětɛ́ è ka bló nú mi lo?” Yě ɖɔ: “Batɛ́mu Jaan tɔn.” 4 Pɔ́lu ɖɔ: “Jaan bló batɛ́mu nú mɛ lɛ́, bɔ é nyí xlɛ̌ hwɛ yětɔn lɛ́ e vɛ́ nú yě é tɔn; é nɔ ɖɔ nú yě ɖɔ yě ní ɖi nǔ nú mɛ e jawě ɖo gǔdo émítɔn é, mɛ énɛ́ wɛ nyí Jezu.” 5 Ée yě se mɔ̌ é ɔ, yě bló batɛ́mu ɖo Aklúnɔ Jezu nyíkɔ mɛ. 6 Bɔ hwenu e Pɔ́lu sɔ́ alɔ ɖó yě jí é ɔ, gbigbɔ mímɛ́ wá yě jí, bɔ yě jɛ xó ɖɔ dó gbe ɖěvo lɛ́ mɛ jí, bo jɛ nǔ ɖɔ ɖ’ayǐ jí. 7 Yě bǐ ná yi súnnu 12 mɔ̌.

8 É nɔ yi kplɔ́ngbasá ɔ, bo nɔ ɖɔ xó kpó adɔgbígbó kpó, bo nɔ xwlé xóɖiɖɔ lɛ́ mɛ lɛ́, lobo nɔ jlɛ́ xó dó xó wú xá yě dó Axɔ́súɖuto Mawu tɔn wú dó ɖu ɖo yě jí, káká nú sun atɔn. 9 Amɔ̌, hwenu e mɛɖé lɛ́ syɛ́n ta bo gbɛ́ nǔ ɖi,* bo nɔ nylá nu dó Ali nǔgbó ɔ wú ɖo ahwan ɔ nukɔn é ɔ, é gosín tɛ́ntin yětɔn, bo kplá ahwanvú lɛ́ sín yě mɛ. É nɔ xwlé xóɖiɖɔ mɛ ayǐhɔ́ngbe ayǐhɔ́ngbe ɖo wěmaxɔmɛ Tilanɔ́si tɔn sín kplégbasá. 10 É wa mɔ̌ nú xwe we, bɔ énɛ́ zɔ́n bɔ mɛ e nɔ nɔ tokpɔn Azíi tɔn mɛ lɛ́ é bǐ se Aklúnɔ sín xó, Jwifu kpó Glɛ̌kinu kpó bǐ.

11 Mawu nɔ ɖo nǔjíwǔ ɖaxó ɖaxó lɛ́ bló wɛ gbɔn Pɔ́lu jí, 12 bɔ è tlɛ nɔ hɛn avɔ kpó lɛ̌nsuví* kpó, éé jɛ agbaza Pɔ́lu tɔn wú lɛ́ é yi jó nú azinzɔnnɔ lɛ́; énɛ́ ɔ, azɔn nɔ gbɔ nú yě, bɔ gbigbɔ nyanya lɛ́ nɔ gosín mɛ lɛ́ jí. 13 Amɔ̌, Jwifu e nɔ gosín fí ɖé jɛ fí ɖěvo, bo nɔ ɖo awǒvi lɛ́ nya wɛ lɛ́ é lɔ tɛ́n kpɔ́n, bo ná ylɔ́ nyǐkɔ Aklúnɔ Jezu tɔn dó mɛ e jí gbigbɔ nyanya ɖe lɛ́ é jí. Yě nɔ ɖɔ: “Un ɖe gbe nú we dó nǔjɔnǔ mɛ ɖo Jezu e Pɔ́lu nɔ jlá é nyíkɔ mɛ ɖɔ a ní tɔ́n.” 14 Vɔ̌sánúxwlémawutɔ́gán Jwifu lɛ́ tɔn ɖokpó nɔ nyí Séva, bo ɖó vǐ súnnu tɛ́nwe, bɔ yě lɔ nɔ wa mɔ̌. 15 Yě ɖo mɔ̌ wa wɛ gbe ɖokpó, bɔ gbigbɔ nyanya ɔ ɖɔ nú yě ɖɔ: “Un tuun Jezu, bo lɛ́ tuun Pɔ́lu; amɔ̌ midɛɛ lɛ́ ɔ, mɛ̌ mi ka nyí?” 16 Énɛ́ ɔ, nya e jí gbigbɔ nyanya ɔ ɖe é zɔn yě jí, bɔ hlɔ̌nhlɔ́n tɔn hú gǎn yětɔn, bɔ é ɖu ɖo yě jí ɖě jɛ ɖě gúdo, káká bɔ yě zɔn mɛ̌* bo hɔn tɔ́n sín xwé ɔ gbe, bɔ akpa ɖo wǔtu yětɔn. 17 Jwifu kpó Glɛ̌kinu kpó, éé nɔ nɔ Efɛ́zi lɛ́ é bǐ wá mɔ nǔ jɛ nǔ énɛ́ wú. Xɛsi jɛ yě bǐ jí, bɔ yě nɔ ɖo susu kpa nú Aklúnɔ Jezu sín nyǐkɔ wɛ. 18 Mɛ ɖěɖěe húzú nǔɖitɔ́ lɛ́ é nɔ yí gbe nú hwɛ yětɔn lɛ́, bo nɔ lɛ́ ɖɔ nǔ e yě wa lɛ́ é ɖo agbawungba. 19 Nǔgbó ɔ, majíkiblótɔ́ gěgé bɛ́ majíkiwéma yětɔn lɛ́ kplé, bo dó zo ɖo mɛ bǐ nukúnmɛ. È lɛ́n wěma e yě dó zo lɛ́ é sín akwɛ́ bɔ é nyí kpatágankwɛ́ 50 000. 20 Énɛ́ wú ɔ, xó Jexóva* tɔn fɔ́n bo ɖo gbigba kpé wɛ, bo lɛ́ ɖo ɖuɖéjí ɖó wɛ bɔ é jí wǔ.

21 Ée nǔ énɛ́ lɛ́ jɛ gúdo é ɔ, Pɔ́lu kán ɖ’é jí ɖo ayi mɛ ɖɔ ényí émí gbɔn Masedwáni kpó Akáyi kpó gúdo ɔ, émí ná yi Jeluzalɛ́mu. É ɖɔ: “Nú un yi dɔ̌n gúdo ɔ, un ɖó ná lɛ́ yi Hlɔ̌ma.” 22 Énɛ́ wú ɔ, é sɛ́ mɛ e nɔ d’alɔ ɛ lɛ́ é we dó Masedwáni; yě wɛ nyí Timɔtée kpó Elasíti kpó. Amɔ̌, éyɛ́ nɔ tokpɔn Azíi tɔn mɛ nú hwenu ɖé.

23 Hwenɛ́nu ɔ, hunnyahunnya ɖaxó ɖé fɔ́n, ɖó Ali nǔgbó ɔ wútu. 24 Nya ɖé nɔ nyí Demɛtliwúsi, ayǎtɔ́ kpatágan tɔn ɖé wɛ n’i, bɔ é nɔ zán kpatágan dó bló vodúnxɔ Aatemísi tɔn kpɛví kpɛví lɛ́ ná, bɔ é nɔ hɛn le gěgé wá nú alɔlyɛnzɔ́watɔ́* lɛ́. 25 É xo yě kpó mɛ ɖěvo e nɔ wa azɔ̌ mɔ̌hun lɛ́ é kpó kplé, bo ɖɔ: “Mɛ ce lɛ́ mi, mi tuun ganjí ɖɔ azɔ̌ élɔ́ wɛ nɔ dó dɔkun nú mǐ. 26 Pɔ́lu énɛ́ ka bló bɔ ahwan wɔ̌búwɔ́bú ɖé ɖi nǔ nú linlin ɖěvo, bo jɛ linlin énɛ́ xwedó jí; é nɔ ɖɔ ɖɔ nǔmɛsɛn e è sɔ́ alɔ dó bló lɛ́ é kún hwɛ́n nǔɖé ó. Efɛ́zi kɛ́ɖɛ́ wɛ é ka wa mɔ̌ ɖe ǎ, loɔ, ɖibla nyí tokpɔn Azíi tɔn ɔ bǐ mɛ wɛ. Mi mɔ bo lɛ́ se lěe é wa mɔ̌ gbɔn é. 27 Nǔ e ka nylá ɖ’é mɛ é wɛ nyí ɖɔ mɛ lɛ́ sixú ɖɔ xó nyanya dó azɔ̌ mǐtɔn wú. Énɛ́ kɛ́ɖɛ́ ka wɛ ǎ, yě ná nɔ lɛ́ mɔ nǔmɛsɛn ɖaxó Aatemísi sín xɔ dó mɔ nǔɖéwanú ǎ, lobɔ nǔmɛsɛn énɛ́ e è nɔ sɛn ɖo tokpɔn Azíi tɔn ɔ blěbú mɛ, bo nɔ lɛ́ sɛn ɖo ayǐkúngban ɔ bǐ jí é sɔ́ ná ɖó wi ɖé ta ǎ.” 28 Ée súnnu énɛ́ lɛ́ se mɔ̌ é ɔ, xomɛ sin yě tawun, bɔ yě jɛ xó sú jí ɖɔ: “Aatemísi Efɛ́zinu lɛ́ tɔn ɔ, nǔɖaxó wɛ!”

29 Énɛ́ ɔ, hunnyahunnya ɖé fɔ́n, bo kpé toxo ɔ bǐ mɛ, bɔ yě bǐ zɔn kpɔ́ bo kán wezun byɔ́ nǔkpɔ́ntɛn ɔ. Yě dɔn Gayiwúsi kpó Alisitáki kpó, éé nyí Masedwáninu bo nɔ xwedó Pɔ́lu yi tomɛ lɛ́ é yi dɔ̌n. 30 Pɔ́lu jló ná byɔ́ nǔkpɔ́ntɛn ɔ, bo ná yi togun ɔ nukɔn, amɔ̌, ahwanvú lɛ́ lɔn nǔ n’i ǎ. 31 Xɔ́ntɔn tɔn ɖěɖěe nɔ kpé nukún dó xweɖuɖu lɛ́ kpó ayihúndida lɛ́ kpó wú ɖo nǔkpɔ́ntɛn ɔ lɛ́ é tlɛ sɛ́ wɛn dó è, bo sa vo n’i ɖɔ é ní ma sɔ́ gbɛ tɔn ɖó axɔ́ nu, bo yi nǔkpɔ́ntɛn ɔ ó. 32 Hwenɛ́nu ɔ, ahwan ɔ bǐ wɛ wlú. Mɛ ɖě sú xó bo ɖɔ ɖě ɔ, mɛ ɖě nɔ sú xó bo nɔ ɖɔ ɖěvo, lobɔ gěgé yětɔn tlɛ tuun nǔ e wútu yě kplé ɖó kpɔ́ é ǎ. 33 Yě mɛ ɖé lɛ́ kplá Alɛsándlu e sísɛ́ dó nukɔn wɛ Jwifu lɛ́ ɖe é sín ahwan ɔ mɛ. Énɛ́ ɔ, Alɛsándlu bló alɔ nú mɛ lɛ́ ɖɔ yě ní cí xwíí, bo jló ná jɛ hun dó éɖée jí ɖo nukɔn yětɔn. 34 Amɔ̌, hwenu e yě mɔ ɖɔ Jwifu wɛ n’i é ɔ, yě bǐ jɛ xó sú jí zɛ̌ɛ́n káká nú ganxixo we mɔ̌, bo nɔ ɖɔ: “Aatemísi Efɛ́zinu lɛ́ tɔn ɔ, nǔɖaxó wɛ!”

35 Gǎn toxo ɔ tɔn wá kpé wú, bo xo hwihwɛ́ ahwan ɔ, lobo ɖɔ: “Efɛ́zinu lɛ́ è mi, mɛ̌ ka ɖo gbɛtɔ́ lɛ́ mɛ tawun, bo ma ka tuun ɖɔ toxo Efɛ́zinu lɛ́ tɔn wɛ nɔ cɔ́ nǔmɛsɛn ɖaxó Aatemísi sín xɔ kpó akpajlɛ́ tɔn e j’ayǐ sín jǐxwé é kpó ǎ? 36 Ðó mɛɖé sixú dɔn nǔ énɛ́ lɛ́ ǎ wútu ɔ, mǐ ɖó ná cí xwíí, bo ná zɔn kplakpla jí dó wa nǔ ǎ. 37 Ðó súnnu élɔ́ lɛ́ e mi kplá wá fí é nɔ j’ajo ɖo vodúnxɔ mɛ ǎ, yě ka nɔ lɛ́ nylá nu dó nǔmɛsɛn mǐtɔn wú ǎ. 38 Énɛ́ wú ɔ, ényí Demɛtliwúsi kpó alɔlyɛnzɔ́watɔ́ e ɖo kpɔ́ xá ɛ lɛ́ é kpó kpé nǔɖé xá mɛɖé ɔ, azǎn e gbe è nɔ ɖɔ hwɛ lɛ́ é ɖo fínɛ́, bɔ tokpɔngán* lɛ́ lɔ ɖo fínɛ́; yě ní yi ylɔ́ hwɛ yěɖée lɛ́. 39 Amɔ̌, ényí mi lɛ́vɔ́ ɖo nǔ ɖěvo ba wɛ zɛ énɛ́ wú ɔ, kplé e sɔgbe ɖo sɛ́n linu é ɖé hwenu jɛ́n è ná ɖɔ gbo ɖe. 40 Nǔ e jɛ égbé é sixú zɔ́n bɔ è dó hwɛ mǐ ɖɔ mǐ nyí todɔnfúnlɛ̌ntɔ́, ɖó è sixú zɔn dó nǔ ɖěbǔ jí, bo ba hwɛjijɔ nú hunnyahunnya élɔ́ ǎ.” 41 Ée é ɖɔ xó énɛ́ lɛ́ gúdo é ɔ, é nyi ahwan ɔ.