Wěma nukɔntɔn e è wlán sɛ́dó Kɔlɛ́ntinu lɛ́ é

14 Mi wa nǔ e wú mi kpé é bǐ bo nɔ ɖe wǎnyíyí xlɛ́, é ɖo mɔ̌ có, mi ní nɔ dó gǎn bo ná mɔ nǔníná gbigbɔ tɔn lɛ́ yí,* ɖo tají ɔ, nǔníná gbeyíɖɔzɔ́wiwa tɔn. 2 Ðó mɛ e nɔ ɖɔ xó dó gbe vovo lɛ́ mɛ é nɔ ɖɔ xó nú gbɛtɔ́ lɛ́ ǎ, loɔ, Mawu wɛ é nɔ ɖɔ ná. Mɛ ɖěbǔ nɔ mɔ nukúnnú jɛ mɛ ǎ, ɖó é nɔ ɖɔ nǔbúdo Mawu tɔn lɛ́ gbɔn gbigbɔ ɔ gblamɛ. 3 É ɖo mɔ̌ có, mɛ e nɔ wa gbeyíɖɔzɔ́ é sín xó nɔ bló bɔ gbɛtɔ́ lɛ́ nɔ lí dǒ, nɔ dó wǔsyɛ́n lanmɛ nú yě, lobo nɔ lɛ́ dó gbɔ nú yě. 4 Mɛ e nɔ ɖɔ xó dó gbe vovo lɛ́ mɛ é nɔ bló bɔ éɖésúnɔ nɔ lí dǒ, amɔ̌, mɛ e nɔ wa gbeyíɖɔzɔ́ é nɔ bló bɔ agun ɔ nɔ lí dǒ. 5 Din ɔ, é ná ko jló mì ɖɔ mi mɛ bǐ ní nɔ ɖɔ xó dó gbe vovo lɛ́ mɛ, amɔ̌, é jló mì hú gǎn ɖɔ mi ní wa gbeyíɖɔzɔ́. Nǔgbó ɔ, mɛ e ɖo gbeyíɖɔzɔ́ wa wɛ é hú gǎn mɛ e ɖo xó ɖɔ dó gbe vovo lɛ́ mɛ wɛ é, afi nú é tínmɛ nǔ e ɖɔ wɛ é ɖe é bónú agun ɔ ní dó sixú lí dǒ ɔ nɛ́. 6 Amɔ̌ din ɔ, nɔví lɛ́ mi, ényí un wá gɔ̌n mitɔn bo nɔ dó gbe vovo lɛ́ ɔ, ɖagbe tɛ́ énɛ́ ka ná wa nú mi? Ényí un hɛn nǔɖexlɛ́mɛ, nǔtuuntuun, nǔɖɔɖayǐ alǒ nǔkplɔ́nmɛ wá nú mi ɔ jɛ́n é ná wa ɖagbe nú mi.

7 Nǔ ɖokpó ɔ wɛ é nyí kpó nǔ e ma ɖó fúnfún ǎ, bo ka nɔ ɖi gbe lɛ́ é kpó, ɖi kpete alǒ agǐdigbo. Nú è ɖo kpete kún wɛ alǒ ɖo agǐdigbo xo wɛ, bo ma wa mɔ̌ ganjí ǎ ɔ, nɛ̌ è ka ná mɔ nukúnnú jɛ mɛ gbɔn? 8 Ðó nú kpɛn ɖo nǔ ɖɔ wɛ bo ma ka za wě ǎ ɔ, mɛ̌ ka ná sɔ́ nǔ ɖ’ayǐ nú ahwan? 9 Ðo ali ɖokpó ɔ nu ɔ, ényí mi ma zán ɖɛ̌ mitɔn dó ɖɔ nǔ e bɔ wǔ bɔ è ná mɔ nukúnnú jɛ mɛ lɛ́ é ǎ ɔ, nɛ̌ mɛɖé ka ná tuun nǔ e ɖɔ wɛ mi ɖe é gbɔn? Nǔgbó ɔ, xó ɖɔ dó jɔhɔn mɛ jɛ́n é ná nyí. 10 Gbe alɔkpa gěgé wɛ ɖo gbɛ ɔ mɛ, é ɖo mɔ̌ có, bǐ mɛ wɛ è sixú mɔ nukúnnú jɛ. 11 Ðó nú un ma mɔ nukúnnú jɛ xó e ɖɔ wɛ è ɖe é sín tínmɛ wú ǎ ɔ, un ná nyí jǒnɔ nú mɛ e ɖo xó ɔ ɖɔ wɛ é, bɔ mɛ e ɖo xó ɔ ɖɔ wɛ é ná nyí jǒnɔ nú mì. 12 Nǔ ɖokpó ɔ wɛ é nyí nú mi lɔ. Ðó nǔníná gbigbɔ tɔn lɛ́ nɔ jló mi tawun wútu ɔ, mi bo dó gǎn bá mɔ nǔníná e ná zɔ́n bɔ agun ɔ ná lí dǒ lɛ́ é yí bónú é ní túnflá.

13 Énɛ́ wú ɔ, mi nú mɛ e nɔ ɖɔ xó dó gbe ɖěvo mɛ é ní xo ɖɛ ɖɔ émí ní kpé wú bo nɔ tínmɛ xó e émí nɔ ɖɔ lɛ́ é. 14 Ðó ényí un ɖo ɖɛ xo wɛ dó gbe ɖěvo mɛ hǔn, nǔníná gbigbɔ tɔn e un mɔ yí é wɛ zɔ́n nɛ́; taglo ce mɛ ɖo nǔ ɖě wa wɛ ǎ. 15 Étɛ́ un ka ɖó ná wa lo? Un ná zán nǔníná gbigbɔ tɔn e un mɔ yí é dó xo ɖɛ, bo ka ná lɛ́ xo ɖɛ dó gbe e mɛ un mɔ nukúnnú jɛ é mɛ. Un ná zán nǔníná gbigbɔ tɔn e un mɔ yí é dó ji han dó kpa Mawu, bo ka ná lɛ́ ji han dó kpa Mawu dó gbe e mɛ un mɔ nukúnnú jɛ é mɛ. 16 É ma nyí mɔ̌ ǎ ɔ, ényí a zán nǔníná gbigbɔ tɔn e a mɔ yí é dó kpa susu nú Mawu ɔ, ɖó mɛ kpaa e ɖo tɛ́ntin mitɔn é ma tuun nǔ e ɖɔ wɛ a ɖe é ǎ wú ɔ, nɛ̌ é ka ná ɖɔ “amǐ” nú kúdónúmɛ sín ɖɛ e a xo é gbɔn? 17 Nǔgbó ɔ, a sixú ɖo kúdónúmɛ sín ɖɛ ɔ xo wɛ ganjí, amɔ̌, é bló bónú mɛ ɖě ɔ lí dǒ ǎ. 18 Un dó kú nú Mawu ɖɔ gbe e mɛ un nɔ ɖɔ xó dó lɛ́ é sukpɔ́ hú mi mɛ bǐ tɔn. 19 É ɖo mɔ̌ có, ɖo agun ɖé mɛ ɔ, é ná nyɔ́ ɖɔ má ɖɔ xókwín atɔ́ɔ́n dó gbe e mɛ un mɔ nukúnnú jɛ é mɛ bo ná dó kplɔ́n nǔ mɛ ɖěvo lɛ́,* hú ɖɔ má ɖɔ xókwín 10 000 dó gbe ɖěvo mɛ.

20 Nɔví lɛ́ mi, mi ma húzú yɔkpɔ́vú ɖo nukúnnúmɔjɛnǔmɛ mitɔn mɛ ó, é nyɔ́ wa ɔ, mi ní nyí yɔkpɔ́vú ɖo nǔ e kunkplá nǔnyanyawiwa é mɛ; mi ní su bǐ mlɛ́mlɛ́ ɖo nukúnnúmɔjɛnǔmɛ mitɔn* mɛ. 21 Ðo Sɛ́n ɔ mɛ ɔ, è wlán ɖɔ: “Jexóva* ɖɔ: ‘Un ná zán ɖɛ̌ jǒnɔ lɛ́ tɔn kpó nufló jǒnɔ lɛ́ tɔn kpó dó ɖɔ xó nú togun élɔ́, bɔ ényí un tlɛ bló mɔ̌ ɔ, yě ná ɖótó mì ǎ.’” 22 Énɛ́ wú ɔ, xó ɖiɖɔ dó gbe vovo lɛ́ mɛ nyí wuntun ɖé nú nǔɖitɔ́ lɛ́ ǎ, nǔmaɖitɔ́ lɛ́ wɛ é nyí ná. Gbeyíɖɔzɔ́wiwa nyí wuntun ɖé nú nǔmaɖitɔ́ lɛ́ ǎ, nǔɖitɔ́ lɛ́ wɛ é nyí ná. 23 Ényí agun ɔ blěbú kplé ɖó kpɔ́, bɔ mɛ bǐ ɖo xó ɖɔ dó gbe vovo lɛ́ mɛ wɛ, bónú gbɛtɔ́ kpaa lɛ́ alǒ nǔmaɖitɔ́ lɛ́ wá ɔ, yě ná ɖɔ ɖɔ taɖu wɛ mi hun ǎ cé? 24 Amɔ̌, ényí mi bǐ ɖo gbeyíɖɔzɔ́ wa wɛ, bónú nǔmaɖitɔ́ alǒ gbɛtɔ́ kpaa ɖé wá ɔ, nǔ e é se lɛ́ é ná gbɛ́ nǔ n’i, bo ná lɛ́ zɔ́n bɔ é ná gbéjé éɖée kpɔ́n hézéhézé. 25 Énɛ́ ɔ, nǔ e ɖo hwlǎhwlá ɖo ayi tɔn mɛ lɛ́ é ná jɛ wě, bɔ é ná xwe agbɔ̌nnusú do, bo ná sɛn Mawu, lobo ɖɔ: “Mawu ɖo tɛ́ntin mitɔn nǔgbó.”

26 Nɔví lɛ́, étɛ́ mi ka ɖó ná wa lo? Ényí mi kplé ɖó kpɔ́ ɔ, mɛɖé nɔ wá kpó ɖɛhan kpó, mɛ ɖěvo nɔ wá kpó nǔkplɔ́nmɛ kpó, mɛ ɖěvo nɔ wá kpó nǔɖexlɛ́mɛ kpó, mɛ ɖěvo nɔ ɖɔ xó dó gbe ɖěvo mɛ, bɔ mɛ ɖěvo nɔ tínmɛ gbe. Mi ní nɔ wa nǔ énɛ́ lɛ́ bo ná dó bló bónú mi mɛ ɖokpó ɖokpó ná lí dǒ. 27 Ényí mɛɖé lɛ́ tíin bo nɔ ɖɔ xó dó gbe vovo lɛ́ mɛ hǔn, mi nú yě ní ma hú mɛ we alǒ atɔn ó, ényí é sukpɔ́ dín ɔ nɛ́, bɔ mɛɖé ɖó ná nɔ lɛ́ tínmɛ nǔ e è ɖɔ é. 28 Amɔ̌, ényí mɛ ɖě ma ɖe bo ná tínmɛ ǎ hǔn, é ní nɔ xwíí ɖo agun ɔ mɛ, bo ɖɔ xó nú éɖée, bo lɛ́ ɖɔ nú Mawu. 29 Mi nú mɛ e nɔ wa gbeyíɖɔzɔ́ é we alǒ atɔn ní nɔ ɖɔ xó, bónú mɛ e kpo lɛ́ é ní nɔ mɔ nǔ jɛ tínmɛ ɔ wú. 30 Amɔ̌, ényí mɛ ɖěvo ɖo ayǐjínjɔ́n ɖo fínɛ́ bɔ Mawu ɖe nǔɖé xlɛ́ ɛ hǔn, mi nú mɛ nukɔntɔn e ɖo xó ɖɔ wɛ é ní cí xwíí. 31 Ðó mi mɛ bǐ sixú wa gbeyíɖɔzɔ́ mɛjíjɛmɛjíjɛ, bónú mɛ bǐ ní dó sixú kplɔ́n nǔ, bɔ è ná lɛ́ dó wǔsyɛ́n lanmɛ nú mɛ bǐ. 32 Gbeyíɖɔ lɛ́ ɖó ná ɖu ɖo yěɖée jí, hwenu e yě ɖo nǔníná gbigbɔ tɔn e nyí gbeyíɖɔzɔ́wiwa tɔn lɛ́ é zán wɛ é. 33 Ðó Mawu nyí Mawu nǔ hannyahannya tɔn ǎ, loɔ, Mawu fífá tɔn wɛ.

Lěe é nɔ nyí gbɔn ɖo agun mɛ mímɛ́ lɛ́ tɔn lɛ́ bǐ mɛ é ɔ, 34 mi nú nyɔ̌nu lɛ́ ní nɔ cí xwíí ɖo agun lɛ́ mɛ, ɖó è yí gbe nú yě bónú yě ná nɔ ɖɔ xó ǎ. É nyɔ́ wa ɔ, mi nú yě ní nɔ hwíhwɛ́ yěɖée lěe Sɛ́n ɔ lɔ ɖɔ gbɔn é. 35 Ényí yě jló ná mɔ do nú nǔɖé hǔn, mi nú yě ní kanbyɔ́ asú yětɔn lɛ́ ɖo xwégbe, ɖó winnyánú wɛ é nyí nú nyɔ̌nu ɖé ɖɔ é ní ɖɔ xó ɖo agun ɔ mɛ.

36 Midɛɛ lɛ́ gɔ́n wɛ xó Mawu tɔn gosín a? Alǒ midɛɛ lɛ́ kɛ́ɖɛ́ wɛ è ná a?

37 Ényí mɛ ɖěbǔ lin ɖɔ émí nyí gbeyíɖɔ alǒ émí mɔ nǔníná gbigbɔ tɔn ɖé yí ɔ, é ɖó ná mɔ nǔ jɛ wú ɖɔ gbeɖiɖe Aklúnɔ tɔn wɛ nǔ ɖěɖěe wlán sɛ́dó mi wɛ un ɖe lɛ́ é nyí. 38 Amɔ̌, ényí mɛ ɖěbǔ dó vɛ̌ ná ɔ, è ná dó vɛ̌ nú é lɔmɔ̌.* 39 Énɛ́ wú ɔ, nɔví ce lɛ́ mi, mi ní nɔ dó gǎn bo nɔ wa gbeyíɖɔzɔ́, é ɖo mɔ̌ có, mi ma gbɛ́ xó ɖiɖɔ dó gbe vovo lɛ́ mɛ nú mɛ ɖěbǔ ó. 40 Amɔ̌, mi ní nɔ wa nǔ lɛ́ bǐ lěe é jɛxá gbɔn é, bo nɔ lɛ́ wa kpó tuto kpó.*