Wěma nukɔntɔn e è wlán sɛ́dó Kɔlɛ́ntinu lɛ́ é

6 Ényí mɛɖé ɖo mi mɛ bɔ gbemanɔkpɔ́ ɖo é kpó nɔví ɖěvo kpó tɛ́ntin ɔ, é nɔ glá sɔ́ xó ɔ yi hwɛgun ɖo nǔmaɖitɔ́ lɛ́ nukɔn, bɔ é nɔ nyí ɖo mɛ mímɛ́ lɛ́ nukɔn ǎ wɛ a? 2 Alǒ mi tuun ɖɔ mɛ mímɛ́ lɛ́ ná ɖɔ hwɛ xá gbɛ ɔ ǎ cé? Bɔ nú é ka nyí ɖɔ mi wɛ ná ɖɔ hwɛ xá gbɛ ɔ ɔ, mi kpé wú bo ná ɖe ɖɛ xó kléwún kléwún lɛ́ ǎ cé? 3 Mi tuun ɖɔ mǐ ná ɖɔ hwɛ xá wɛnsagun lɛ́ ǎ cé? Étɛ́wú mi ma ka ná ɖe ɖɛ gbɛ élɔ́ sín xó lɛ́ ǎ lo? 4 Ényí é ka byɔ́ ɖɔ mi ní ɖe ɖɛ xó gbɛ élɔ́ tɔn lɛ́ ɔ, étɛ́wú mi ka ná sɔ́ yi hwɛɖɔtɔ́ e ma ɖo agun ɔ mɛ ǎ lɛ́ é nukɔn lo? 5 Un ɖo xó ɖɔ wɛ bónú winnyá ná hu mi. Nǔnywɛ́tɔ́ ɖěbǔ ɖo mi mɛ bo kpé wú bo ná ɖɔ hwɛ ɖo nɔví tɔn lɛ́ tɛ́ntin ǎ wɛ a? 6 Bɔ nɔví ɖě nɔ dɔn ɖěvo yi hwɛgun ɖo nǔmaɖitɔ́ lɛ́ nukɔn!

7 Nǔgbó ɔ, miɖée lɛ́ e mi nɔ dɔn yi hwɛ nukɔn é ɔ, ayǐ wɛ mi ko jɛ. Étɛ́wú mi ma ka sixú yí gbe bónú è wa nǔ agɔ xá mi ǎ? Étɛ́wú mi ma ka sixú yí gbe bónú è hízí mi ǎ? 8 É nyɔ́ wa ɔ, mi nɔ wa nǔ agɔ xá mɛ, bo nɔ hízí mɛ, bɔ nɔví mitɔn lɛ́ wɛ mi ka nɔ wa nǔ énɛ́ lɛ́ xá!

9 Alǒ mi tuun ɖɔ nǔagɔwatɔ́ lɛ́ kún ná ɖu Axɔ́súɖuto Mawu tɔn sín gǔ ó ǎ cé? Mi ma blɛ́* miɖée ó.* Mɛ e nɔ lɛ aga* lɛ́ é, mɛ e nɔ sɛn bǒcyɔ lɛ́ é, mɛ e nɔ dó afɔ gbě alǒ mɛ e nɔ ba nyɔ̌nu ɖěvo lɛ́ é, súnnu e nɔ ɖóxó xá súnnu lɛ́ é,* 10 ajotɔ́ lɛ́, nukúnkɛndótɔ́ lɛ́, ahannumúnɔ lɛ́, nǔyáɖɔnúmɛtɔ́* lɛ́ kpó mɛwlóɖutɔ́ lɛ́ kpó ɖě ná ɖu Axɔ́súɖuto Mawu tɔn sín gǔ ǎ. 11 É ɖo mɔ̌ có, nǔ e mɛɖé lɛ́ ɖo mi mɛ bo nyí ɖ’ayǐ é nɛ́. Amɔ̌, è ko lɛ mi wé; è ko slá wǔ nú mi; è ko ɖɔ ɖɔ mi nyí nǔjlɔ́jlɔ́watɔ́ ɖo Aklúnɔ Jezu Klísu nyíkɔ mɛ gbɔn Mawu mǐtɔn sín gbigbɔ gblamɛ.

12 Sɛ́n ɔ* yí gbe bɔ un sixú wa nǔ lɛ́ bǐ, amɔ̌, nǔ lɛ́ bǐ wɛ nɔ hɛn le wá ǎ. Sɛ́n ɔ yí gbe bɔ un sixú wa nǔ lɛ́ bǐ, amɔ̌, un ná lɔn nú nǔɖé ní ɖ’acɛ dó jǐ ce ǎ. 13 Nǔɖuɖu ɔ, adɔgo tɔn wɛ é nyí, bɔ adɔgo nyí nǔɖuɖu tɔn, amɔ̌, Mawu ná sɔ́ nǔ we énɛ́ lɛ́ bǐ dó húzú nǔ yǎyá. Agbaza nyí agalilɛ* tɔn ǎ, loɔ, Aklúnɔ tɔn wɛ, bɔ Aklúnɔ nyí agbaza tɔn. 14 Amɔ̌, Mawu fɔ́n Aklúnɔ sín kú, é ná lɛ́ fɔ́n mǐ lɔ sín kú gbɔn hlɔ̌nhlɔ́n tɔn gblamɛ.

15 Mi tuun ɖɔ agbaza mitɔn lɛ́ ɔ, wǔjɔnú Klísu tɔn lɛ́ wɛ yě nyí ǎ cé? Énɛ́ wú ɔ, un ná ɖe wǔjɔnú Klísu tɔn lɛ́ síin bo ná dɔn cá xá agalɛtɔ́ wɛ a? Gbeɖé kpɔ́n! 16 Mi tuun ɖɔ mɛ ɖěbǔ e ɖóxó xá agalɛtɔ́ ɖé é ɔ, é kpó agalɛtɔ́ ɔ kpó húzú agbaza ɖokpó ǎ cé? Ðó Mawu ɖɔ: “Yě mɛ we lɛ́ ná nyí agbaza ɖokpó.” 17 Amɔ̌, mɛ ɖěbǔ e ɖo bǔ xá Aklúnɔ é ɔ, é kpó é kpó nyí ɖokpó ɖo gbigbɔ mɛ. 18 Mi hɔn nú agalilɛ!* Hwɛ ɖěvo ɖěbǔ e mɛɖé sixú hu é ɖo zɔ nú agbaza tɔn, amɔ̌, mɛ e nɔ lɛ aga é ɔ, hwɛ hu dó agbaza éɖésúnɔ tɔn wɛ é ɖe. 19 Mi tuun ɖɔ agbaza mitɔn ɔ, tɛ́npli gbigbɔ mímɛ́ e Mawu ná mi bɔ é ɖo mi mɛ é tɔn wɛ ǎ cé? Gɔ́ ná ɔ, mi nyí miɖésúnɔ tɔn ǎ, 20 ɖó axɔ́ ɖé wɛ è sú dó xɔ mi. Énɛ́ wú ɔ, mi ɖó ná zán agbaza mitɔn dó kpa susu nú Mawu.