Wěma nukɔntɔn e è wlán sɛ́dó Kɔlɛ́ntinu lɛ́ é

1 Nyɛ Pɔ́lu, ée è ylɔ́ bónú má nyí mɛsɛ́dó Klísu Jezu tɔn gbɔn jlǒ Mawu tɔn gblamɛ é, kpó nɔví mǐtɔn Sositɛ́nu kpó, 2 wɛ ɖo wěma wlán sɛ́dó agun Mawu tɔn e ɖo Kɔlɛ́nti é wɛ; midɛɛ lɛ́ e è ko ɖe ɖó vo ɖo bǔ e mi ɖe xá Klísu Jezu é mɛ, bo lɛ́ ylɔ́ bónú mi ná nyí mɛ mímɛ́ lɛ́ é sɛ́ dó wɛ mǐ ɖe, gɔ́ nú mɛ e gbɔn fí bǐ bo nɔ ylɔ́ nyǐkɔ Aklúnɔ mǐtɔn Jezu Klísu tɔn lɛ́ é bǐ; é nyí Aklúnɔ nú yě, bo lɛ́ nyí nú mǐ lɔ:

3 Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpó fífá kpó mi.

4 Un nɔ dó kú nú Mawu ce hwebǐnu dó ta mitɔn mɛ, ɖó fɛ́nú Mawu tɔn e è ná mi ɖo Klísu Jezu mɛ é wútu. 5 Ðó ɖo bǔ e mi ɖe xá ɛ é mɛ ɔ, è dó dɔkun nú mi ɖo nǔ bǐ mɛ, ɖo tají ɔ, mi ɖó nǔwúkpíkpé ɔ bo ná ɖɔ xó ganjí bo lɛ́ tuun nǔ dégbédégbé, 6 ɖó kúnnu e è ɖe dó Klísu wú é ko dó ɖɔ do ɖo tɛ́ntin mitɔn. 7 Énɛ́ wú ɔ, ée mi ɖo te kpɔ́n hwenu e è ná ɖe Aklúnɔ mǐtɔn Jezu Klísu xlɛ́ é kpó akpakpa sɔ́ mɛ kpó é ɔ, nǔníná ɖěbǔ hwedó mi ǎ. 8 É ná lɛ́ bló bɔ mi ná lí dǒ káká jɛ vivɔnu, bónú è ní ma mɔ hwɛ ɖě bo dó mi ɖo Aklúnɔ mǐtɔn Jezu Klísu sín azǎn gbe ó. 9 Mawu ɖo gbejí, é wɛ ylɔ́ mi bónú mi ná nɔ bǔ* xá Vǐ tɔn Jezu Klísu Aklúnɔ mǐtɔn.

10 Din ɔ, nɔví lɛ́, un ɖo byɔ̌byɔ́ mi wɛ ɖo Aklúnɔ mǐtɔn Jezu Klísu nyíkɔ mɛ ɖɔ mi bǐ ní nɔ ɖó gbe kpɔ́ ɖo xóɖiɖɔ mɛ, bónú kínklán ní ma ɖo tɛ́ntin mitɔn ó, é nyɔ́ wa ɔ, mi ní nɔ bǔ bǐ mlɛ́mlɛ́ ɖo ayi kpó linlin kpó mɛ. 11 Nɔví ce lɛ́ mi, nǔgbó ɔ, mɛ e ɖo Klowée xwégbe é ɖé lɛ́ ɖɔ nú mì ɖɔ gbemanɔkpɔ́ ɖo tɛ́ntin mitɔn. 12 Nǔ e ɖɔ wɛ un ɖe é wɛ nyí ɖɔ, mi mɛ ɖokpó ɖokpó nɔ ɖɔ: “Nyɛ ɔ, Pɔ́lu tɔn wɛ un nyí,” “Nyɛ ka nyí Apolósu tɔn,” “Nyɛ ka nyí Sefási* tɔn,” “Nyɛ ka nyí Klísu tɔn.” 13 Klísu ɔ má wɛ a? Pɔ́lu wɛ è xwe nyi atín wú dó ta mitɔn mɛ ǎ, kabǐ? Alǒ, Pɔ́lu nyíkɔ mɛ wɛ mi bló batɛ́mu ɖe a? 14 Un dó kú nú Mawu ɖɔ un kún bló batɛ́mu nú mɛɖé ɖo mi mɛ zɛ Klisipúsi kpó Gayiwúsi kpó wú ó. 15 Énɛ́ wú ɔ, mɛ ɖěbǔ sixú ɖɔ ɖɔ è bló batɛ́mu nú mi ɖo nyǐkɔ ce mɛ ǎ. 16 Ááán, un lɛ́ bló batɛ́mu nú xwédo Sitefanási tɔn. Mɛ e kpo lɛ́ é ɔ, un sɔ́ flín nú un bló batɛ́mu nú mɛɖé ɖo yě mɛ ǎ. 17 Ðó má bló batɛ́mu nú mɛ wú wɛ Klísu sɛ́ mì dó ǎ, é nyɔ́ wa ɔ, má jlá wɛn ɖagbe ɔ wú wɛ; é ka nyí kpó xógbe nǔnywɛ́tɔ́ lɛ́ tɔn kpó ǎ, é ma nyí mɔ̌ ǎ ɔ, yatín* Klísu tɔn táá nyí nǔ yǎyá.

18 Ðó xlonɔxó wɛ wɛn e kunkplá yatín* ɔ é nyí nú mɛ e ɖo dindɔn wɛ lɛ́ é, amɔ̌, nú mǐ mɛ e hwlɛ́n gán wɛ è ɖe lɛ́ é ɔ, hlɔ̌nhlɔ́n Mawu tɔn wɛ. 19 Ðó è ko wlán ɖɔ: “Un ná sú kún dó nú nǔnywɛ́ nǔnywɛ́tɔ́ lɛ́ tɔn, bɔ bǐbí wěmasetɔ́ lɛ́ tɔn ɔ, un ná gbɛ́.”* 20 Fítɛ́ nǔnywɛ́tɔ́ ɔ ka ɖe? Fítɛ́ sɛ́nkplɔ́nmɛtɔ́* ɔ ka ɖe? Fítɛ́ nǔdɔntɔ́ gbɛ* élɔ́ tɔn ɔ ka ɖe? Mawu ma ko sɔ́ nǔnywɛ́ gbɛ ɔ tɔn dó húzú xlonɔnú a? 21 Ðó gbɛ ɔ nɔ gán jɛ nǔnywɛ́ éɖésúnɔ tɔn wú wútu ɔ, é tuun Mawu ǎ, amɔ̌, nǔnywɛ́ Mawu tɔn zɔ́n bɔ é nyɔ́ nukún tɔn mɛ ɖɔ é ní gbɔn wɛn e jlá wɛ mǐ ɖe bɔ é nyí xlonɔxó nú mɛ ɖěvo lɛ́ é gblamɛ, dó hwlɛ́n mɛ e ɖi nǔ lɛ́ é gán.

22 Ðó Jwifu lɛ́ nɔ byɔ́ wuntun lɛ́ bɔ Glɛ̌kinu lɛ́ nɔ ba nǔnywɛ́; 23 amɔ̌, mǐ nɔ jlá wɛn e kunkplá Klísu e è xwe nyi atín wú é, é ka nyí afɔklɛ́nnú nú Jwifu lɛ́ bo nyí xlonɔnú nú mɛ e ɖo akɔta ɖě lɛ́ mɛ lɛ́ é. 24 É ɖo mɔ̌ có, nú mɛ ɖěɖěe è ylɔ́ lɛ́ é, énɛ́ wɛ nyí Jwifu kpó Glɛ̌kinu kpó bǐ ɔ, Klísu nyí hlɔ̌nhlɔ́n Mawu tɔn bo lɛ́ nyí nǔnywɛ́ Mawu tɔn. 25 Ðó nǔ e gosín Mawu gɔ́n bɔ è nɔ kpɔ́n dó mɔ xlonɔnú é nyɔ́nǔi hú gbɛtɔ́ lɛ́, bɔ nǔ e gosín Mawu gɔ́n bɔ è nɔ kpɔ́n dó mɔ nǔ e ma ɖó gǎn ǎ é ɖó hlɔ̌nhlɔ́n hú gbɛtɔ́ lɛ́.

26 Nɔví lɛ́ mi, mi tuun ɖɔ hwenu e Mawu ylɔ́ mi é ɔ, gěgé mitɔn kún nyí nǔnywɛ́tɔ́ ɖo gbɛtɔ́ lɛ́ nukúnmɛ ó, gěgé mitɔn kún ɖó hlɔ̌nhlɔ́n ó, gěgé mitɔn kún ka lɛ́ jɔ ɖo xwédo nukúnɖéjí lɛ́ mɛ ó, 27 amɔ̌, Mawu sɔ́ nǔ gbɛ ɔ tɔn e è nɔ kpɔ́n dó mɔ xlonɔnú lɛ́ é bo ná dó dó winnyá nǔnywɛ́tɔ́ lɛ́; Mawu sɔ́ nǔ gbɛ ɔ tɔn e è nɔ kpɔ́n dó mɔ nǔ e ma ɖó gǎn ǎ lɛ́ é bo ná dó dó winnyá nǔ e ɖó hlɔ̌nhlɔ́n lɛ́ é; 28 Mawu sɔ́ nǔ gbɛ ɔ tɔn e è nɔ kpɔ́n dó mɔ nǔ e ma hwɛ́n nǔɖé ǎ lɛ́ é kpó nǔ e è ma nɔ ké ya ná ǎ lɛ́ é kpó, nǔ e ma tíin ǎ lɛ́ é, dó bló bɔ nǔ e tíin lɛ́ é húzú nǔ vɔ̌tɔ́, 29 bónú mɛɖé ní ma yí nugo ɖo Mawu nukɔn ó. 30 Amɔ̌, Mawu wɛ zɔ́n bɔ mi ɖo bǔ xá Klísu Jezu; Jezu wɛ ɖe nǔnywɛ́ Mawu tɔn kpó nǔjlɔ́jlɔ́wiwa Mawu tɔn kpó xlɛ́ mǐ; gbɔn Jezu jí ɔ, mǐ sixú húzú mɛ mímɛ́, bɔ è lɛ́ tún kan nú mǐ gbɔn gbɛxixɔ ɔ gblamɛ; 31 nǔ nyí mɔ̌, bónú nǔ e mɛ é ná tɔ́n kɔ dó é ní sɔgbe xá nǔ e è ko wlán ɖ’ayǐ é, é wɛ nyí ɖɔ: “Mɛ e nɔ gó é, ní nɔ gó ɖó tuun e é tuun Jexóva* é wú.”