NǓKPLƆNKPLƆN 25
Linlin Tɛ Mawu ka Ðó nú Mǐ?
Biblu yí gbè ɖɔ gbɛ̀ gbɛtɔ́ lɛ tɔn ‘hwegli bɔ nǔxámɛ gɔ́.’ (Jɔbu 14:1) Nǔ e Mawu ba nú mǐ nǔgbo nǔgbo é jɛn na? É ma nyí mɔ̌ ǎ hǔn, linlin tɛ é ka ɖó nú mǐ lo? É ka na jɛ jlɔ́ gbè ɖokpo à? Mǐ ni gbéjé xósin gbɔdónúmɛ tɔn Biblu tɔn lɛ kpɔ́n.
1. Gbɛ̀ alɔkpa tɛ Jehovah ka ba nú mǐ?
Jehovah ba ɖɔ mǐ ni ɖó gbɛ̀ ɖagbe e nyɔ́ hugǎn é. Hwenu e é dá gbɛtɔ́ nukɔntɔn lɛ, Adamu kpo Ɛvu kpo é ɔ, é sɔ́ ye ɖó palaɖisi ɖɛkpɛɖɛkpɛ ɖé mɛ, é wɛ nyí jikpá Edɛni tɔn. Enɛ gudo ɔ, “é xoɖɛ dó ye jí bo ɖɔ: ‘Mi jì, mi gbà kún, bo kpé ayikúngban ɔ jí, bo sɔ́ ɛ ɖó acɛ mitɔn glɔ́.’” (Bǐbɛ̌mɛ 1:28) Jehovah ba ɖɔ ye ni jì vǐ, bo bló bonu ayikúngban ɔ bǐ ni huzu palaɖisi, lobo kpé nukún dó kanlin lɛ wu. Linlin tɔn wɛ nyí ɖɔ gbɛtɔ́ lɛ bǐ ni ɖu lanmɛ syɛn hunsin ɖagbe sín vivǐ bo nɔ gbɛ̀ kaka sɔyi.
Nǔ lɛ sɔ́ wá nyí gbɔn mɔ̌ ǎ có,a linlin Mawu tɔn huzu ǎ. (Ezayíi 46:10, 11) É kpò ɖò biba wɛ ɖɔ gbɛtɔ́ tónúsétɔ́ lɛ ni nɔ gbɛ̀ kaka sɔyi ɖò ninɔmɛ ɖagbe lɛ mɛ.—Xà Nǔɖexlɛ́mɛ 21:3, 4.
2. Nɛ̌ mǐ ka sixu ɖu gbɛ̀ e ɖó nu é ɖé sín vivǐ dìn gbɔn?
Jehovah dá mǐ bɔ mǐ nɔ “ɖó hudo nǔ gbigbɔ tɔn lɛ tɔn,” é wɛ nyí ɖɔ mǐ nɔ ɖó jlǒ ɔ bo na tuùn i lobo sɛn ɛ. (Xà Matie 5:3-6, nwt.) É ba ɖɔ mǐ ni ɖó kancica syɛnsyɛn ɖé xá emi, “bo wà jlǒ emitɔn, bo yí wǎn nú emi,” lobo sɛn emi “kpo ayi [mǐtɔn] bǐ kpo.” (Sɛ́nflínmɛ 10:12; Nǔnywɛxó 3:32) Enyi mǐ wà mɔ̌ ɔ, mǐ sixu ɖó awǎjijɛ nǔgbo, tagba lɛ na bo tlɛ ɖò finɛ ɔ nɛ. Nú mǐ ɖò Jehovah sɛn wɛ ɔ, mǐ nɔ mɔ ɖɔ gbɛ̀ mǐtɔn ɖó nu, ɖó mǐ ɖò gbɛ̀ zán wɛ lee é ba gbɔn é.
BA DÒ NÚ NǓ D’EJI
Kplɔ́n nǔ dó wanyiyi ɖaxó e Jehovah ɖexlɛ́ hwenu e é ɖò nǔ sɔ́ nú ayikúngban ɔ nú mǐ wɛ é kpo nǔ e Xó tɔn kplɔ́n mɛ dó nǔ e wu gbɛ̀ ɔ dó tíìn é wu é kpo wu.
3. Jehovah ɖó linlin ɖagbeɖagbe ɖé nú gbɛtɔ́ Lɛ
Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Etɛwu Mawu ka bló planɛti mǐtɔn ɖɛkpɛɖɛkpɛ ɔ?
Xà Nǔnywɛtɔ́xó 3:11, nwt, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛ enɛ ka kplɔ́n we dó Jehovah wu?
4. Linlin Jehovah tɔn huzu ǎ
Xà Ðɛhan 37:11, 29 kpo Ezayíi 55:11 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nɛ̌ mǐ ka wà gbɔn bo tuùn ɖɔ linlin e Jehovah ɖó nú mǐ é kún huzu ó?
È hɛn ɔ, è na jlá xwé e è dóvɛ̌ na é ɖé ɖó. Mɔ̌ ɖokpo ɔ, Mawu na jlá ayikúngban ɔ, ee gbɛtɔ́ lɛ ko dóvɛ̌ na é ɖó nú mɛ ɖěɖee yí wǎn n’i lɛ é
5. Jehovah sinsɛn nɔ zɔ́n bɔ gbɛ̀ mǐtɔn nɔ ɖó nu
Linlin e wu gbɛ̀ ɔ dó tíìn é tuùntuùn sixu hɛn awǎjijɛ wá nú mǐ. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Ee Terumi kplɔ́n nǔ dó nǔ e wu gbɛ̀ ɔ dó tíìn é wu gudo é ɔ, nɛ̌ é ka ɖu lè tɔn gbɔn?
Xà Nǔnywɛtɔ́xó 12:13, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Ðó Jehovah wà nǔ gegě nú mǐ wutu ɔ, etɛ mǐ ka na wà dó ɖè nǔsumɛnukúnmɛ xlɛ́?
MƐÐÉ SIXU KANBYƆ ÐƆ: “Etɛwu mǐ ka ɖò gbɛ̀ ɔ mɛ?”
Xósin tɛ a ka na na?
ETƐ LƐ A KA KPLƆ́N?
Jehovah jló ɖɔ mǐ ni ɖu gbɛ̀ víví kaka sɔyi ɖò ninɔmɛ ɖagbe lɛ mɛ ɖò ayikúngban jí fí. Nú mǐ nɔ sɛn ɛ kpo ayi mǐtɔn bǐ kpo ɔ, gbɛ̀ mǐtɔn nɔ ɖó nu, é na bo tlɛ nyí dìn hwɛ ɔ nɛ.
Vɔ̌gbɔnji
Linlin tɛ Jehovah ka ɖó nú Adamu kpo Ɛvu kpo ɖò bǐbɛ̌mɛ?
Nɛ̌ mǐ ka wà gbɔn bo tuùn ɖɔ linlin e Mawu ɖó nú gbɛtɔ́ lɛ é kún ɖyɔ ó?
Nɛ̌ gbɛ̀ towe ka sixu ɖó nu gbɔn?
KÍJÉ
Kpɔ́n kúnnuɖenú ɖěɖee xlɛ́ ɖɔ jikpá Edɛni tɔn tíìn kpɔ́n nǔgbo lɛ é.
“Jikpá Edɛni Tɔn: Xɛxó Wɛ À Alǒ Nǔgbo?” (Atɔxwɛ [Flansegbe] 1er janvier 2011)
Kplɔ́n nǔ e wu mǐ sixu kúdeji ɖɔ ayikúngban ɔ na nɔ ayǐ kaka sɔyi é.
“È Na Sú Kún Dó nú Ayikúngban ɔ Wɛ À?” (Xóta Ɛntɛnɛti jí tɔn)
Gbějé nǔ e Biblu ɖɔ dó lee gbɛ̀ towe sixu ɖó nu gbɔn é wu é kpɔ́n.
Kpɔ́n lee nya e lin ɖɔ emi ko ɖó nǔ lɛ bǐ é ɖé wá mɔ nǔ e hwedó è ɖò gbɛzán tɔn mɛ é gbɔn é.
a Ðò nǔkplɔnkplɔn e bɔ d’ewu é mɛ ɔ, mǐ na kplɔ́n nǔ dó nǔ e wu mǐ ma ko ɖò gbɛ̀ mɔ̌hun mɛ égbé dìn ǎ é wu.