NǓKPLƆNKPLƆN 46
Etɛwu È ka Na Zé Mɛɖée Jó nú Mawu Bo Bló Baptɛm?
Mɛɖée zízé jó nú Jehovah sín tinmɛ wɛ nyí ɖɔ, è ni xoɖɛ ɖé dó d’akpá n’i ɖɔ è na sɛn éɖokponɔ géé, bo na sɔ́ ɛ ɖó tɛn nukɔntɔn ɔ mɛ ɖò gbɛzán mɛtɔn mɛ. (Ðɛhan 40:9) Enɛ gudo ɔ, è nɔ bló baptɛm. Mɔ̌ wiwa nɔ xlɛ́ mɛ ɖevo lɛ ɖɔ è ko sɔ́ mɛɖée jó nú Mawu. Gbeta mǐɖée zízé jó nú Jehovah tɔn wɛ nyí gbeta taji hugǎn ɔ ɖò gbɛ̀ mɛ. Etɛ ka sixu sísɛ́ we bɔ a na wá gbeta taji mɔ̌hun e na huzu gbɛzán towe é kɔn?
1. Etɛ ka nɔ sísɛ́ mɛɖé b’ɛ nɔ sɔ́ éɖée jó nú Mawu?
Wanyiyi wɛ nɔ sísɛ́ mǐ bɔ mǐ nɔ sɔ́ mǐɖée jó nú Jehovah. (1 Jaan 4:10, 19) Biblu ɖɔ nú mǐ ɖɔ: “A na yí wǎn nú Aklunɔ Mawu towe kpodo ayi towe bǐ kpo, kpodo lindɔ̌n towe bǐ kpo, kpodo linlin towe bǐ kpo, kpodo hlɔnhlɔn towe bǐ kpan.” (Maki 12:30) Mǐ nɔ ɖexlɛ́ ɖɔ mǐ yí wǎn nú Mawu, gbɔn xó e mǐ nɔ ɖɔ lɛ é gblamɛ, bo nɔ lɛ́ ɖexlɛ́ ɖò nǔ e mǐ nɔ wà lɛ é mɛ. Lee wanyiyi adodwé nɔ zɔ́n bɔ sunnu ɖé kpo nyɔnu ɖé kpo nɔ wlí alɔ gbɔn é ɖɔhun ɔ, wǎn e mǐ lɔ yí nú Jehovah é nɔ sísɛ́ mǐ, bɔ mǐ nɔ sɔ́ mǐɖée jó n’i bo nɔ bló baptɛm.
2. Nyɔna tɛ lɛ Jehovah ka nɔ kɔn dó Kúnnuɖetɔ́ tɔn e bló baptɛm lɛ é jí?
Nú a bló baptɛm ɔ, a na huzu hagbɛ̌ xwédo Jehovah tɔn awǎjijɛnɔ ɔ tɔn ɖé. Mɔ̌ mɛ ɔ, a na ɖu wanyiyi tɔn sín vivǐ ɖò ali gegě nu, bo na lɛ́ sɛkpɔ́ ɛ hugǎn. (Xà Malacíi 3:16-18.) Jehovah na nyí Tɔ́ towe, bɔ a na lɛ́ ɖu xwédo gbigbɔ tɔn e mɛ nɔví sunnu kpo nɔví nyɔnu kpo e gbɔn gbɛ̀ ɔ bǐ mɛ lɛ é ɖè é sín vivǐ. Nɔví enɛ lɛ yí wǎn nú Jehovah, bo lɛ́ yí wǎn nú hwi lɔ. (Xà Maki 10:29, 30.) É ɖò mɔ̌ có, cobonu a na bló baptɛm ɔ, a ɖó na ɖè afɔ ɖé lɛ. A ɖó na kplɔ́n nǔ dó Jehovah wu, yí wǎn n’i, bo lɛ́ ɖi nǔ nú Vǐ tɔn. Gudo mɛ ɔ, a ɖó na zé gbɛzán towe jó nú Jehovah. Nú a ɖè afɔ enɛ lɛ bo bló baptɛm gudo ɔ, ali na hun nú we bɔ a na ɖu gbɛ̀ víví kaka sɔyi. Xó Mawu tɔn ɖɔ: “Baptɛm . . . ɖò mi lɔ hwlɛngán wɛ dìn.”—1 Piyɛ́ɛ 3:21, nwt.
BA DÒ NÚ NǓ D’EJI
Mǐ ni gbéjé nǔ e wu é ɖò taji ɖɔ a ni sɔ́ hwiɖée jó nú Jehovah bo bló baptɛm é kpɔ́n.
3. Mǐ mɛ bǐ ɖó na sɔ́ mɛ e mǐ na sɛn é
Ðò Izlayɛli hwexónu tɔn ɔ, mɛɖé lɛ lin ɖɔ emi sixu sɛn Jehovah bo lɛ́ sɛn vodún Baálu. Amɔ̌, Jehovah sɛ́ gbeyiɖɔ tɔn Elíi dó bonu é na jlá linlin masɔgbe enɛ ɖó. Xà 1 Axɔ́su lɛ 18:21, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Gbeta tɛ kɔn Izlayɛli-ví lɛ ka ɖó na wá?
Izlayɛli-ví lɛ ɖɔhun ɔ, mǐ lɔ ɖó na sɔ́ mɛ e mǐ na sɛn é. Xà Luki 16:13, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛwu mǐ ma ka sixu sɛn Jehovah bo lɛ́ sɛn mɛ ɖevo, alǒ nǔ ɖevo à?
Nɛ̌ mǐ ka sixu xlɛ́ Jehovah ɖɔ mǐ wá gbeta ɔ kɔn bo na sɛn ɛ gbɔn?
4. Lin tamɛ dó wǎn e Jehovah yí nú we é jí
Jehovah na mǐ nǔ xɔ akwɛ gegě. Etɛ mǐdɛɛ lɛ ka sixu na ɛ? Xò VIDEO ɔ.
Ali tɛ lɛ nu mɔ̌ Jehovah ka ɖexlɛ́ ɖɔ emi yí wǎn nú we ɖè? Xà Ðɛhan 104:14, 15 kpo 1 Jaan 4:9, 10 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nǔnina Jehovah tɔn tɛ lɛ ka sù nukún towe mɛ tawun?
Nú a lin tamɛ dó nǔnina enɛ lɛ jí ɔ, nɛ̌ nǔ ka nɔ cí nú we dó Jehovah wu?
Nú mɛɖé na nǔ e mǐ yí wǎn na tawun é ɖé mǐ ɔ, mǐ nɔ ba na ɖè nǔsumɛnukúnmɛ xlɛ́ mɛ ɔ. Xà Sɛ́nflínmɛ 16:17, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nú a lin tamɛ dó nǔ e Jehovah na we lɛ é bǐ jí ɔ, etɛ a ka nɔ ba na na ɛ?
5. Mɛɖée zízé jo nú Mawu nɔ hɛn nyɔna gegě wá
Mɛ gegě nɔ lin ɖɔ nyǐjijɛ, azɔ̌ ɖagbe ɖiɖó, alǒ akwɛ ɖiɖó na zɔ́n bɔ ye na ɖó awǎjijɛ. Nǔgbo jɛn ka wɛ à? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Lɔnyiji-fɔnkan-yihundatɔ́ e ɖò video ɔ mɛ é yí wǎn nú balɔ́ɔn xixo tawun có, etɛwu é ka jó azɔ̌ enɛ dó?
É wá gbeta ɔ kɔn bo na sɔ́ éɖée jó nú Jehovah, é nyí nú balɔ́ɔn ǎ. Hwɛ ka lin ɖɔ é wá gbeta ɖagbe ɔ kɔn à? Etɛwu?
Cobonu mɛsɛ́dó Pɔlu na huzu Klisanwun ɔ, azɔ̌ nukúnɖeji ɖé gbé nya wɛ é ɖè. Mɛ̌si nukúnɖeji ɖé wɛ kplɔ́n ɛ sɛ́n Jwifu lɛ tɔn. Amɔ̌, é jó nǔ enɛ lɛ dó bá dó huzu Klisanwun ɖé. É ka wá vɛ́ nú Pɔlu wɛ à? Xà Filipunu lɛ 3:8, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛwu Pɔlu ka ɖɔ ɖɔ nǔ e emi wà hwɛ̌ cobo wá huzu Klisanwun lɛ é ɔ, emi “mɔ . . . bǐ dó mɔ babá”?
Etɛ é ka wá mɔ ɖó tɛn tɔn mɛ?
Ðò nukún towɛ mɛ ɔ, etɛ ka na hɛn awǎjijɛ wá nú we hugǎn: Jehovah sinsɛn wɛ à, alǒ ali ɖevo e nu a sixu zán gbɛ̀ towe ɖè é?
Ee Pɔlu huzu Klisanwun é ɔ, nǔ e é mɔ lɛ é hugǎn nǔ e é sɔ́ dó savɔ̌ lɛ é
MƐÐÉ LƐ ÐƆ: “É byɔ ɖɔ è ni sɔ́ gbɛzán mɛtɔn jó nú Mawu ǎ. É na nyɔ́ hú ɖɔ è ni ɖu gbɛ̀ mɛtɔn kpowun.”
Etɛwu hwɛ ka lin ɖɔ é sɔgbe ɖɔ a ni sɔ́ hwiɖée jó nú Jehovah?
ETƐ LƐ A KA KPLƆ́N?
Wanyiyi nɔ sísɛ́ mǐ, bɔ mǐ nɔ zé mǐɖée jó nú Jehovah bo nɔ bló baptɛm.
Vɔ̌gbɔnji
Etɛwu é ka jɛxa ɖɔ mǐ ni yí wǎn nú Jehovah kpo ayi mǐtɔn bǐ kpo, lobo lɛ́ sɛn ɛ kpo ayi mǐtɔn bǐ kpo?
Nɛ̌ Jehovah ka nɔ kɔn nyɔna dó Kúnnuɖetɔ́ tɔn e bló baptɛm lɛ é jí gbɔn??
A ka jló na zé hwiɖée jó nú Jehovah à?
KÍJÉ
Kpɔ́n nǔ e wu hanjitɔ́ ɖé kpo balɔ́ɔnxotɔ́ ɖé kpo wá gbeta ɔ kɔn bá sɔ́ gbɛzán yetɔn jó nú Jehovah é.
Kpɔ́n hwɛjijɔ ɖevo e wu a na sɔ́ hwiɖée jó nú Mawu lɛ é.
“Etɛwu A ka Ðó Na Sɔ́ Hwiɖée Jó nú Jehovah?” (Atɔxwɛ [Gungbe], 15 janvier 2010)
Ðò nǔxixo sín video elɔ mɛ ɔ, kpɔ́n awǎjijɛ e mɛ ɖěɖee zé yeɖée jó nú Jehovah lɛ é nɔ mɔ é.
Ðò tan gbɛzán tɔn “Nú Xwè Mɔ̌kpan ɔ, Un Kanbyɔ Nyiɖée Ðɔ: ‘Etɛwu Mǐ ka Tíìn?’” mɛ ɔ, ɖ’ayi nǔ e sísɛ́ nawe ɖé b’ɛ gbéjé nǔ e ɖò tɛn nukɔntɔn ɔ mɛ n’i lɛ é kpɔ́n é wu.
“Biblu Nɔ Huzu Gbɛzán Mɛtɔn” (Atɔxwɛ [Flansegbe], 1er novembre 2012)