NǓKPLƆNKPLƆN 52
Nǔ E Wu Nǔsisɔ Mǐtɔn kpo Acɔ́biba Mǐtɔn kpo Ðò Taji É
Ðò nǔsisɔ kpo acɔ́biba kpo kpáxwé ɔ, mǐ mɛ bǐ wɛ ɖó nǔ e nɔ jló mǐ lɛ é. Nǔgbododó Biblu tɔn ɖé lɛ tíìn bo gɛ́dɛ́ ǎ, bɔ nú mǐ xwedó ye ɔ, mǐ sixu cyan nǔ e mǐ na dó lɛ é, bo ka na lɛ́ kpò ɖò Jehovah nukúnmɛ nyɔ́ wɛ fɛɛ. Mǐ ni gbéjé ɖé lɛ ɖò ye mɛ kpɔ́n.
1. Nǔgbododó tɛ lɛ ka ɖó na xlɛ́ ali mǐ bɔ mǐ na wá gbeta nǔ e mǐ na dó lɛ é, kpo lee mǐ na ba acɔ́ gbɔn é kpo tɔn kɔn?
Mǐ ɖó na nɔ “sɔnǔ lee é jɛxa gbɔn é, ɖò yɛ̌yi mɛ, ɖò jlɛ̌ jí,” bɔ nǔsisɔ mǐtɔn na nɔ mɛ́ hwebǐnu bonu mɛ ɖevo lɛ na sixu mɔ ɖɔ mǐ “sí Mawu,” alǒ zé mǐɖée jó nú Mawu. (1 Timɔtée 2:9, 10) Mǐ ni gbéjé nǔgbododó ɛnɛ enɛ lɛ kpɔ́n: (1) Nǔsisɔ mǐtɔn ɖó na “jɛxa.” Lee a na ko mɔ gbɔn ɖò kplé agun tɔn mǐtɔn lɛ jí é ɔ, nǔ vovo wɛ nɔ nyɔ́ mǐ mɛ e ɖò togun Jehovah tɔn mɛ lɛ é nukúnmɛ, é ɖò mɔ̌ có, nǔsisɔ mǐtɔn lɛ kpo lee mǐ nɔ kpa ɖa alǒ blá ɖa gbɔn é kpo nɔ ɖexlɛ́ tɛgbɛ ɖɔ mǐ nɔ ɖó sísí nú Mawu e mǐ nɔ sɛn é. (2) Nǔsisɔ “ɖò yɛ̌yi mɛ” sín tinmɛ wɛ nyí ɖɔ mǐ na sɔnǔ ɖò ali ɖé nu, b’ɛ na zɔ́n bɔ mɛ ɖevo lɛ na ɖó linlin masɔgbe dó mǐ wu, alǒ dɔn ayi yetɔn wá mǐ jí zɛ xwé wu ǎ. (3) Mǐ nɔ xlɛ́ ɖɔ mǐ “ɖò jlɛ̌ jí,” hwenu e mǐ ma nɔ xwedó nǔsisɔ ɖebǔ alǒ acɔ́biba ɖebǔ e vɛ́ ko ɖò zo jí lɛ é ǎ é. (4) Nǔsisɔ mǐtɔn kpo acɔ́biba mǐtɔn kpo ɖó na nɔ xlɛ́ hwebǐnu ɖɔ mǐ “sí Mawu,” alǒ zé mǐɖée jó nú Mawu; enɛ na zɔ́n bɔ mɛ ɖevo lɛ na mɔ nyi wɛn ɖɔ Mawu nǔgbo ɔ wɛ mǐ nɔ sɛn.—1 Kɔlɛntinu lɛ 10:31.
2. Nɛ̌ nǔsisɔ mǐtɔn kpo acɔ́biba mǐtɔn kpo ka sixu wà nǔ dó nǔɖitɔ́ hatɔ́ mǐtɔn lɛ wu gbɔn?
Nǔgbo wɛ ɖɔ mǐ ɖó acɛ bo na cyan nǔ e mǐ na dó lɛ é, amɔ̌, mǐ ɖó na nɔ kanbyɔ mǐɖée ɖɔ nǔsisɔ mǐtɔn ka sixu dó tagba nú mɛ ɖevo lɛ wɛ à jí. Mǐ nɔ tɛ́n kpɔ́n bo nɔ wà nǔ e wu mǐ kpé é bǐ, bo nɔ nyí afɔklɛ́nnú nú mɛɖé ǎ, é nyɔ́ wà ɔ, mǐ nɔ “ba na nyɔ́ ɖò nɔzo [mǐtɔn] sí, nú ɖagbe nɔzo ɔ tɔn, bonu é na yì nukɔn ɖò nǔɖiɖi mɛ.”—Xà Hlɔmanu lɛ 15:1, 2.
3. Nɛ̌ nǔsisɔ mǐtɔn kpo acɔ́biba mǐtɔn kpo ka sixu dɔn mɛ ɖevo lɛ wá nǔgbo ɔ mɛ gbɔn?
Hwebǐnu wɛ mǐ nɔ sɔnǔ lee é jɛxa gbɔn é có, mǐ ka nɔ lɛ́ ɖó ayi te ganji dó lee mǐ nɔ sɔnǔ gbɔn é wu, hwenu e mǐ xwè kplé agun tɔn lɛ alǒ sinsɛnzɔ́ ɔ mɛ é. Mǐ nɔ ba nú nǔsisɔ mǐtɔn ni fɛ́ ayi mɛ lɛ tɔn sín wɛn taji e dó ye wɛ mǐ ɖè é jí ǎ. É nyɔ́ wà ɔ, mǐ nɔ ba ɖɔ nǔsisɔ mǐtɔn ni zɔ́n bonu nǔgbo ɔ ni dɔn mɛ lɛ, bonu ye na “ɖó sísí nú nǔkplɔnmɛ e ɖɔ xó dó Mawu Mɛhwlɛngántɔ́ mǐtɔn wu” é.—Titu 2:10.
BA DÒ NÚ NǓ D’EJI
Mǐ ni gbéje nǔ e mǐ sixu wà, bɔ nǔsisɔ mǐtɔn kpo acɔ́biba mǐtɔn kpo na xlɛ́ mɛ ɖevo lɛ ɖɔ Klisanwun wɛ mǐ nyí é kpɔ́n.
Nú mǐ ɖó sísí nú mɛ e ɖò tɛn acɛkpikpa tɔn mɛ lɛ é ɔ, nǔsisɔ mǐtɔn sixu ɖexlɛ́. Jehovah nɔ mɔ nǔ e ɖò ayi mǐtɔn mɛ é có, nǔsisɔ mǐtɔn kpo acɔ́biba mǐtɔn kpo ɖó na lɛ́ xlɛ́ ɖɔ mǐ ɖó sísí n’i
4. Nǔsisɔ mǐtɔn e nɔ mɛ́ é nɔ xlɛ́ ɖɔ mǐ ɖó sísí nú Jehovah
Hwɛjijɔ taji hugǎn tɛ wu mǐ ka na nɔ kéya nú nǔsisɔ mǐtɔn? Xà Ðɛhan 47:3, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nú mǐ flín ɖɔ linlin e mɛ lɛ na ɖó dó Jehovah wu é na sín lee mǐ nɔ sɔnǔ gbɔn é wu ɔ, gbeta tɛ lɛ kɔn mǐ ka na wá dó nǔsisɔ mǐtɔn wu?
Hwɛ ka lin ɖɔ é sɔgbe ɖɔ lee mǐ nɔ sɔnǔ gbɔn, hwenu e mǐ xwè kplé lɛ alǒ sinsɛnzɔ́ ɔ mɛ é ni nɔ ɖu ayi mɛ nú mǐ à? Etɛwu?
5. Lee mǐ na wá gbeta ɖagbe nǔ e mǐ na dó lɛ é, kpo lee mǐ na ba acɔ́ gbɔn é kpo tɔn kɔn gbɔn é
Nú awu mǐtɔn lɛ na bo vɛ́ axi alǒ kpɔ ɔ, ye ɖó na mɛ́, bo lɛ́ jɛxa nǔ e wà wɛ mǐ ɖè é. Xà 1 Kɔlɛntinu lɛ 10:24 kpo 1 Timɔtée 2:9, 10 kpo. Enɛ gudo hǔn, mi ɖɔ xó ɖó kpɔ́ dó nǔ e wu mǐ ɖó na nyi alɔ nú nǔ lěhun lɛ didó é jí:
Nǔ e è dóvɛ̌ na b’ɛ wló é, alǒ ee ɖò jégléjéglé lɛ é.
Nǔ e nɔ fyɔ́n mɛ dánwúndánwún, nɔ ɖè mɛ̌ xlɛ́, alǒ nɔ fɔ́n xóɖóxámɛ sín jlǒ dó lanmɛ nú mɛ lɛ é.
Klisanwun lɛ ɖò Mɔyizisɛ́n ɔ glɔ́ ǎ có, sɛ́n ɔ ka ɖè linlin Jehovah tɔn xlɛ́. Xà Sɛ́nflínmɛ 22:5, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛwu mǐ ka ɖó na nyi alɔ nú nǔsisɔ kpo acɔ́biba kpo ɖěɖee nɔ zɔ́n bɔ sunnu nɔ cí nyɔnu ɖɔhun, alǒ nyɔnu nɔ cí sunnu ɖɔhun lɛ é?
Xà 1 Kɔlɛntinu lɛ 10:32, 33 kpo 1 Jaan 2:15, 16 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛwu nǔ elɔ ka ɖó na ɖu ayi mɛ nú mǐ: Nǔsisɔ mǐtɔn ka nɔ nyí afɔklɛ́nnú nú mɛɖé lɛ ɖò fí e mǐ nɔ nɔ é, alǒ ɖò agun ɔ mɛ wɛ à?
Nǔsisɔ kpo acɔ́biba kpo alɔkpa tɛ lɛ ka gbakpé fí e a nɔ nɔ é?
A ka lin ɖɔ nǔsisɔ alɔkpa enɛ lɛ ɖé lɛ kún jɛxa Klisanwun ɖé ó wɛ à? Etɛwu?
Mǐ sixu sɔnǔ bo lɛ́ ba acɔ́ ɖò ali vovo nu, cobo ka na lɛ́ kpò ɖò Jehovah nukúnmɛ nyɔ́ wɛ fɛɛ
MƐÐÉ LƐ ÐƆ: “Un ɖó acɛ bo na dó nǔ ɖebǔ e jló mì é.”
É ka sɔgbe nukún hwɛ tɔn mɛ à? Etɛwu?
ETƐ LƐ A KA KPLƆ́N?
Nú mǐ nɔ wá gbeta ɖagbe lɛ kɔn dó nǔsisɔ mǐtɔn kpo acɔ́biba mǐtɔn kpo wu ɔ, mǐ nɔ ɖè sísí e mǐ ɖó nú Jehovah kpo mɛ ɖevo lɛ kpo é xlɛ́.
Vɔ̌gbɔnji
Etɛwu nǔsisɔ mǐtɔn kpo acɔ́biba mǐtɔn kpo ka ɖò taji nú Jehovah?
Nǔgbododó tɛ lɛ ka ɖó na xlɛ́ ali mǐ, hwenu e mǐ ɖò gbeta lɛ kɔn wá dó nǔsisɔ mǐtɔn kpo acɔ́biba mǐtɔn kpo wu wɛ é?
Etɛ lɛ nǔsisɔ mǐtɔn kpo acɔ́biba mǐtɔn kpo ka sixu wà nú nukún e mɛ ɖevo lɛ nɔ sɔ́ dó kpɔ́n Mawusinsɛn nǔgbo ɔ na é?
KÍJÉ
Kpɔ́n wɛn e dó wɛ nǔsisɔ towe lɛ ɖè é.
Kpɔ́n nǔ e wu é nyí nǔnywɛnú ɖɔ a ni lin tamɛ ganji hwɛ̌ cobo yì ɖè nǔ dó wǔtu é.
“Etɛ Biblu ka Ðɔ Dó Nǔ Ðè Dó Wǔtu Wu?” (Xóta Ɛntɛnɛti jí tɔn)
Gbějé nǔgbododó ɖevo e sixu xlɛ́ ali gbeta mǐtɔn lɛ é kpɔ́n.
Nɛ̌ nawe e yí wǎn nú Mawu é ɖé ka kplɔ́n, bo nɔ ɖó linlin e ɖò jlɛ̌ jí é dó gbeta e kɔn mɛ ɖevo lɛ nɔ wá dó nǔsisɔ wu é wu gbɔn?
“Nǔsisɔ kpo Acɔ́biba kpo Wɛ Nyí Afɔklɛ́nnú nú Mì” (Réveillez-vous!, 22 décembre 2003)