‘Zě Afɔ Dó Afɔdo Tɔn lɛ Mɛ Télélé’

1-2. Nǔjlɛdonǔwu tɛ ka d’alɔ mǐ, bɔ mǐ mɔ nǔ jɛ xó e ɖò 1 Piyɛ́ɛ 2:21 mɛ lɛ é wu?

MǏ NI ɖɔ ɖɔ a ɖò gbɛ̌ta saɖitɔ́ lɛ tɔn ɖé mɛ, bɔ mi ɖò gbetótló e dó xɛsi bɔ kɔ́gudu gbɔn fí bǐ é ɖé mɛ gbɔn wɛ. Alixlɛ́mɛtɔ́ e ko mɔ nǔ kpɔ́n é ɖé wɛ ɖò ali xlɛ́ mi wɛ. Ee é ɖò zɔnlin zun wɛ ɖò nukɔn mitɔn é ɔ, é ɖò afɔdo tɔn lɛ jó nyi ayǐ wɛ ɖò kɔ́gudu ɔ mɛ. É wá jɛ hweɖenu bɔ a sɔ́ mɔ alixlɛ́mɛtɔ́ ɔ ǎ! Amɔ̌, xɛsi ɖi we ǎ. É nyɔ́ wà ɔ, hwi kpo mɛ ɖevo e ɖò gbɛ̌ta ɔ mɛ lɛ é kpo xwedó afɔdo mɛ tɔn télélé lee mi kpéwú gbɔn é!

² Gbɛ̀ nyanya e mɛ mǐ ɖè égbé é cí gbetótló enɛ e dó xɛsi é ɖɔhun, bɔ Klisanwun lɛ cí gbɛ̌ta saɖitɔ́ lɛ tɔn enɛ ɖɔhun. É na cɛ nú Jehovah ɖɔ é na mǐ alixlɛ́mɛtɔ́ ɖagbe hugǎn ɔ, enɛ wɛ nyí Vǐ sunnu tɔn Jezu Klisu, bɔ mǐ sixu zé afɔ dó afɔdo tɔn lɛ mɛ télélé. (1 Pi. 2:21) Sɔgbe xá wema alɔdlɛndónǔ tɔn Biblu tɔn ɖé ɔ, ɖò wemafɔ ɔ mɛ ɔ, Piyɛ́ɛ sɔ́ Jezu jlɛ́ dó alixlɛ́mɛtɔ́ ɖé wu. Lee alixlɛ́mɛtɔ́ ɖé nɔ jó xlɛ̌ lɛ nyi ayǐ gbɔn é ɔ, mɔ̌ wɛ Jezu lɔ jó xlɛ̌ lɛ nyi ayǐ gbɔn, bonu mǐ na sixu xwedó. Mǐ ni ɖɔ xó dó nǔkanbyɔ ɖěɖee sixu d’alɔ mǐ bɔ mǐ na zé afɔ dó afɔdo tɔn lɛ mɛ é atɔn jí. Etɛ ka nyí tinmɛ è ni zé afɔ dó afɔdo Jezu tɔn lɛ mɛ tɔn? Etɛwu mǐ ka ɖó na wà mɔ̌? Nɛ̌ mǐ ka sixu wà mɔ̌ gbɔn?

 3. Etɛ ka nyí tinmɛ è ni zé afɔ dó afɔdo mɛɖé tɔn mɛ tɔn?

³ Etɛ ka nyí tinmɛ è ni zé afɔ dó afɔdo mɛɖé tɔn mɛ tɔn? Ðò Biblu mɛ ɔ, xógbe “ɖi zɔnlin” kpo xókwín “afɔ” kpo nɔ dó gesí nǔ e wà wɛ mɛɖé ɖè ɖò gbɛzán tɔn mɛ é. (Bǐb. 6:9, nwt; Nǔx. 3:23) Kpɔ́ndéwú e mɛɖé sɔ́ ɖ’ayǐ é ɔ, è sixu sɔ́ jlɛ́ dó afɔdo tɔn sín wuntun e è nɔ mɔ ɖò kɔ́mɛ, hwenu e é ɖò zɔnlin zun wɛ é wu. Enɛ wu ɔ, è ni sɔ́ afɔ dó afɔdo mɛɖé tɔn mɛ sín tinmɛ wɛ nyí è ni xwedó kpɔ́ndéwú tɔn, è ni wà nǔ mɛ ɔ ɖɔhun.

 4. Etɛ ka nyí tinmɛ è ni zé afɔ dó afɔdo Jezu tɔn lɛ mɛ tɔn?

⁴ Dìn ɔ, etɛ ka nyí tinmɛ è ni zé afɔ dó afɔdo Jezu tɔn lɛ mɛ tɔn? È ma na lɛ̀ xógle ǎ ɔ, tinmɛ tɔn wɛ nyí è ni xwedó kpɔ́ndéwú tɔn. Ðò wemafɔ e jí xóta mǐtɔn jinjɔn é mɛ ɔ, mɛsɛ́dó Piyɛ́ɛ ɖò xó ɖɔ dó kpɔ́ndéwú ɖagbe Jezu tɔn lɛ wu wɛ, ɖó é dɛ ɖò wuvɛ̌ lɛ nu; amɔ̌, mǐ sixu xwedó kpɔ́ndéwú Jezu tɔn ɖò ali gegě ɖevo lɛ nu. (1 Pi. 2:18-25) Nǔgbo ɔ, gbɛzán Jezu tɔn bǐ, enɛ wɛ nyí nǔ e é nɔ ɖɔ é kpo nǔ e é nɔ wà é kpo, nyí kpɔ́ndéwú ɖé bɔ mǐ na xwedó.

 5. Gbɛtɔ́ hwɛhutɔ́ lɛ ka sixu xwedó kpɔ́ndéwú maɖóblɔ̌ Jezu tɔn dóo à? Tinmɛ.

⁵ Ðó mǐ nyí gbɛtɔ́ hwɛhutɔ́ lɛ wutu ɔ, mǐ ka sixu xwedó kpɔ́ndéwú Jezu tɔn lɛ dóo à? Ɛɛn, mǐ sixu kpéwú. Flín ɖɔ Piyɛ́ɛ dó wusyɛn lanmɛ nú mǐ ɖɔ mǐ ni ‘zé afɔ dó afɔdo Jezu tɔn lɛ mɛ télélé’; é ɖɔ mǐ ni wà mɔ̌ bonu nǔ bǐ ni vɔ ɖ’ewu ǎ. Enyi mǐ xwesɔ bo zé afɔ dó afɔdo tɔn lɛ mɛ, enɛ wɛ nyí ɖɔ enyi mǐ zán nǔwukpíkpé e gbɛtɔ́ hwɛhutɔ́ ɖé ɖó é bǐ ɔ, mǐ na setónú nú xó mɛsɛ́dó Jaan tɔn elɔ lɛ: ‘Zǎn gbɛ̀ lee Jezu ɖesunɔ zán gbɛ̀ tɔn gbɔn é.’—1 Jaan 2:6.

6-7. Etɛwu mǐ ka sixu ɖɔ ɖɔ afɔ sísɔ́ dó afɔdo Jezu tɔn lɛ mɛ na zɔ́n bɔ mǐ na sɛkpɔ́ Jehovah d’eji?

⁶ Afɔ sísɔ́ dó afɔdo Jezu tɔn lɛ mɛ na zɔ́n bɔ mǐ na sɛkpɔ́ Jehovah d’eji. Etɛwu mǐ ka sixu ɖɔ mɔ̌? Jɛ nukɔn hwɛ̌ ɔ, Jezu sɔ́ kpɔ́ndéwú taji ɖé ɖ’ayǐ nú mǐ, dó lee è nɔ wà nǔ bo nɔ nyɔ́ Mawu nukúnmɛ gbɔn é wu. (Jaan 8:29) Enɛ wu ɔ, enyi mǐ nɔ zé afɔ dó afɔdo Jezu tɔn lɛ mɛ ɔ, nǔ mǐtɔn na nyɔ́ Jehovah nukúnmɛ. Bɔ mǐ sixu ɖeji ɖɔ Tɔ́ mǐtɔn jixwé tɔn ɔ na sɛkpɔ́ mɛ ɖěɖee nɔ dó gǎn syɛnsyɛn bá huzu xɔ́ntɔn tɔn lɛ é.—Ja. 4:8.

⁷ Wegɔ́ ɔ, Jezu wà nǔ Tɔ́ tɔn ɖɔhun, bɔ nǔ bǐ vɔ ɖ’ewu. Enɛ wu wɛ é ɖɔ: “Mɛ e mɔ mì ɔ ko mɔ Tɔ́ ɔ.” (Jaan 14:9) Mǐ sixu xwedó jijɔ Jezu tɔn lɛ kpo lee é nɔ wà nǔ gbɔn xá mɛ ɖevo lɛ é kpo; ɖi kpɔ́ndéwú ɔ, é kú nǔblawu nú gudunɔ ɖé, sè wuvɛ̌ xá nyɔnu e ɖò azɔn syɛnsyɛn ɖé jɛ wɛ é ɖé, bɔ mɛ ɖěɖee mɛ kú dó lɛ é sín nǔ lɛ́ blawǔ n’i. Enyi mǐ wà nǔ Jezu ɖɔhun ɔ, kpɔ́ndéwú Jehovah tɔn xwedó wɛ mǐ ɖè mɔ̌ nɛ. (Mak. 1:40, 41; 5:25-34; Jaan 11:33-35) Lě dò mǐ wà nǔ Jehovah ɖɔhun sɔ é ɔ, mɔ̌ dò wɛ mǐ nɔ sɛkpɔ́ ɛ sɔ é nɛ.

 8. Tinmɛ nǔ e wu afɔ sísɔ́ dó afɔdo Jezu tɔn lɛ mɛ na d’alɔ mǐ bɔ mǐ na “ɖu ɖò” gbɛ̀ ɔ jí é.

⁸ Afɔ sísɔ́ dó afɔdo Jezu tɔn lɛ mɛ nɔ zɔ́n bɔ gbɛ̀ nyanya elɔ nɔ fɛ́ ayi mǐtɔn ǎ. Ðò zǎn e jɛ nukɔn nú kú Jezu tɔn é mɛ ɔ, é kpéwú bo ɖɔ: “Un ko ɖu ɖò gbɛ̀ ɔ jí.” (Jaan 16:33) Ðiɖɔ wɛ é ɖè ɖɔ emi kún lɔn bonu lee gbɛ̀ ɔ nɔ lin nǔ gbɔn é, nǔ e gbé é nɔ nya lɛ é kpo lee é nɔ wà nǔ gbɔn é kpo wà nǔ dó emi wu ó. Jezu ɖè ayi sín nǔ taji e wu é wá ayikúngban jí é jí gbeɖé ǎ, enɛ wɛ nyí bo na dó jɛhun dó nyikɔ Jehovah tɔn jí. Mǐdɛɛ lɛ ka lo? Nǔ gegě wɛ sixu fɛ́ ayi mǐtɔn ɖò gbɛ̀ elɔ mɛ. Amɔ̌, Jezu ɖɔhun ɔ, enyi mǐ zé ayi ɖó jlǒ Jehovah tɔn wiwa jí ɔ, mǐ lɔ na “ɖu ɖò” gbɛ̀ ɔ jí.—1 Jaan 5:5.

 9. Etɛ mǐ ka ɖó na wà bo na nɔ ali e nɔ kplá mɛ yì gbɛ̀ mavɔmavɔ mɛ é jí?

⁹ Afɔ sísɔ́ dó afɔdo Jezu tɔn lɛ mɛ na zɔ́n bɔ mǐ na mɔ gbɛ̀ mavɔmavɔ. Ee dɔnkpɛvu dɔkunnɔ ɖé kan nǔ e é ɖó na wà bo na mɔ gbɛ̀ mavɔmavɔ é byɔ é ɔ, Jezu yí gbè n’i ɖɔ: “Wǎ xwedó mì.” (Mat. 19:16-21) Jezu ɖɔ nú Jwifu ɖěɖee ma ɖi nǔ ɖɔ é wɛ nyí Klisu ɔ ǎ é ɖé lɛ ɖɔ: “Lɛngbɔ̌ ce lɛ . . . nɔ xwedó mì. Un nɔ na gbɛ̀ mavɔmavɔ ye.” (Jaan 10:24-29) Jezu ɖɔ nú Nikodɛmu ee nyí Hwɛɖɔxɔsa Ðaxó Jwifu lɛ tɔn sín gǎn ɖé, bo jló na mɔ nǔ jɛ nǔkplɔnmɛ tɔn lɛ mɛ d’eji é ɖɔ mɛ ɖěɖee ‘ɖi nǔ nú emi’ lɛ é na “mɔ gbɛ̀ mavɔmavɔ.” (Jaan 3:16) Mǐ nɔ ɖè nǔɖiɖi e mǐ ɖó nú Jezu é xlɛ́, gbɔn nǔwiwa sɔgbe xá nǔ e é ɖɔ lɛ é kpo nǔ e é wà lɛ é kpo gblamɛ. Enyi mǐ wà mɔ̌ ɔ, mǐ na nɔ ali e nɔ kplá mɛ yì gbɛ̀ mavɔmavɔ mɛ é jí.—Mat. 7:14.

10. Etɛ mǐ ka ɖó na wà bo na dó tuùn Jezu ganji? (Jaan 17:3)

¹⁰ Mǐ ɖó na tuùn Jezu hwɛ̌, cobo zé afɔ dó afɔdo tɔn lɛ mɛ télélé. (Xà Jaan 17:3.) È ni “tuùn” Jezu nyí gbè ɖokpo nú ǎ. Mǐ ɖó na tuùn i ganji, enɛ wɛ nyí ɖɔ, mǐ ɖó na nɔ kplɔ́n nǔ dó jijɔ tɔn lɛ, linlin tɔn lɛ, kpo nǔgbododó e é nɔ xwedó lɛ é kpo wu. Mǐ na bo tlɛ ɖò nǔgbo ɔ mɛ sín xwè mɔ̌kpan ɖíe ɔ, mǐ ɖó na kpò ɖò gǎn dó wɛ bo na tuùn Jehovah kpo Vǐ tɔn kpo.

11. Etɛ ka ɖò Wɛnɖagbe-Wema ɛnɛ lɛ mɛ?

¹¹ Jehovah gbɔn wanyiyi gblamɛ, bo sɔ́ Wɛnɖagbe-Wema ɛnɛ lɛ dó Xó tɔn mɛ, bo na dó d’alɔ mǐ bonu mǐ na tuùn Vǐ tɔn ganji. Tan e kúnkplá gbɛzán Jezu tɔn kpo sinsɛnzɔ́ tɔn kpo é wɛ ɖò Wɛnɖagbe-Wema lɛ mɛ. Nǔ e Jezu ɖɔ lɛ é, nǔ e é wà lɛ é, kpo lee nǔ nɔ cí n’i é kpo wɛ tɔ́n ɖò wema enɛ lɛ mɛ. Wema ɛnɛ enɛ lɛ nɔ d’alɔ mǐ bɔ mǐ nɔ “lin tamɛ kpo sɔxwixwe kpo” dó kpɔ́ndéwú Jezu tɔn jí. (Ebl. 12:3, nwt) Nǔgbo ɔ, xlɛ̌ e Jezu zé ɖ’ayǐ lɛ é wɛ ɖò ye mɛ. Enɛ wu ɔ, enyi mǐ nɔ gbéjé Wɛnɖagbe-Wema lɛ kpɔ́n ganji ɔ, mǐ sixu tuùn Jezu d’eji. Wǎgbɔ tɔn ɔ, mǐ sixu zé afɔ dó afɔdo tɔn lɛ mɛ télélé.

12. Nɛ̌ mǐ ka sixu ɖu Wɛnɖagbe-Wema lɛ sín lè bǐ mlɛ́mlɛ́ gbɔn?

¹² Cobonu mǐ na ɖu Wɛnɖagbe-Wema lɛ sín lè bǐ mlɛ́mlɛ́ ɔ, mǐ na wà nǔ hugǎn ye xixa kpowun. Mǐ ɖó na ba hwenu bo kplɔ́n ye kpo sɔxwixwe kpo, lobo lɛ́ lin tamɛ dó ye jí ganji. (Sɔ́ jlɛ́ dó Jozuwée 1:8 wu.) Mi nú mǐ ni ɖɔ xó dó wlɛnwín ɖěɖee sixu d’alɔ mǐ bɔ mǐ na lin tamɛ dó Wɛnɖagbe-Wema lɛ jí, bo lɛ́ zán nǔ ɖěɖee mǐ xà ɖò ye mɛ lɛ é we wu.

13. Nɛ̌ a ka sixu bló gbɔn bɔ tan e ɖò Wɛnɖagbe-Wema lɛ mɛ lɛ é na ɖò gbɛ̀?

¹³ Nukɔntɔn, blǒ bonu tan e ɖò Wɛnɖagbe-Wema ɔ mɛ lɛ é ni ɖò gbɛ̀. Zǎn nǔwukpíkpé tamɛ linlin tɔn towe dó mɔ, bo lɛ́ sè nǔ e ɖò jijɛ wɛ é, lobonu é ni lɛ́ byɔ lanmɛ nú we. Bonu a na kpé enɛ wu hǔn, ba dò nú nǔ ɖò wema ɖěɖee tutoblonunu Jehovah tɔn sɔnǔ na lɛ é mɛ. Gbějé nǔ e lɛlɛ̌ dó tan e kplɔ́n wɛ a ɖè é kpɔ́n, enɛ wɛ nyí nǔ e jɛ jɛ nukɔn na lɛ é kpo nǔ e jɛ bɔ d’ewu lɛ é kpo. Ba dò nú nǔ d’eji dó mɛ e xó tan ɔ ɖɔ lɛ é kpo fí e xó é ɖɔ lɛ é kpo wu. Sɔ́ tan e kplɔ́n wɛ a ɖè é jlɛ́ dó tan mɔ̌hun ɖevo e ɖò Wɛnɖagbe-Wema ɖevo mɛ é wu. Hweɖelɛnu ɔ, Wɛnɖagbe-Wema wlantɔ́ ɖé nɔ ɖɔ xó dó gǒflɛ́mɛ e dɔn mɛ bɔ Wɛnɖagbe-Wema wlantɔ́ ɖevo ma ɖɔ xó d’ewu ǎ é wu.

14-15. Nɛ̌ mǐ ka sixu zán tan e ɖò Wɛnɖagbe-Wema ɖé mɛ lɛ é ɖò gbɛzán mǐtɔn mɛ gbɔn?

¹⁴ Wegɔ́, zǎn nǔ e tan e ɖò Wɛnɖagbe-Wema ɔ mɛ lɛ é kplɔ́n we lɛ é ɖò gbɛzán towe mɛ. (Jaan 13:17) Enyi a ba dò nú tan e ɖò Wɛnɖagbe-Wema ɖé mɛ é kpo sɔxwixwe kpo gudo hǔn, kanbyɔ hwiɖée ɖɔ: ‘Nǔkplɔnmɛ ɖé ka ɖò tan elɔ mɛ bɔ un sixu zán ɖò gbɛzán ce mɛ à? Nɛ̌ un ka sixu zán tan elɔ dó d’alɔ mɛ ɖevo gbɔn?’ Dǒ gǎn bo lin tamɛ dó mɛ e a tuùn é ɖé jí, enɛ gudo ɖò hwenu e jɛxa dó é ɔ, mǎ nǔ e a kplɔ́n é xá ɛ kpo wanyiyi kpo, bo ka ɖ’ayi te dó wà mɔ̌.

¹⁵ Mi nú mǐ ni gbéjé kpɔ́ndéwú lee mǐ sixu zán wěɖexámɛ we enɛ lɛ gbɔn é tɔn kpɔ́n. Mǐ na gbéjé tan asúkúsi wamamɔnɔ e Jezu mɔ ɖò tɛmpli mɛ é tɔn kpɔ́n.

16. Tinmɛ nǔ e jɛ bɔ è wlán dó Maki 12:41 mɛ lɛ é.

¹⁶ Blǒ bonu tan ɔ ni ɖò gbɛ̀. (Xà Maki 12:41.) Dǒ nukún nǔ e jɛ é mɛ kpɔ́n. Nisáan 11gɔ́ xwè 33 H.M. tɔn wɛ mǐ ɖè. Azǎn yɔywɛ ɖé wɛ kpò bɔ Jezu na kú. Ðibla nyí kéze ɔ bǐ wɛ Jezu zán bo kplɔ́n nǔ mɛ lɛ ɖò tɛmpli ɔ mɛ. Sinsɛngán gbeklánxámɛtɔ́ lɛ ka lɔn nǔ n’i ɖebǔ ǎ. Ye mɛ ɖé lɛ ko kan nǔ byɔ ɛ dó fí e é ba acɛ e é nɔ dó wà nǔ na é sín é wu. Ye mɛ ɖevo lɛ kan nǔ e ye mɔ ɖɔ é kún sixu na xósin na ó lɛ é byɔ ɛ. (Mak. 11:27-33; 12:13-34) Dìn ɔ, Jezu yì awa ɖevo xwé ɖò tɛmpli ɔ mɛ. É cí ɖɔ finɛ wɛ è nɔ ylɔ́ ɖɔ Kɔ́xota Nyɔnu lɛ Tɔn. É sixu mɔ gbǎ e mɛ è nɔ sɔ́ akwɛ dó é sɛ́dó. É jinjɔn ayǐ bo ɖò mɛ lɛ kpɔ́n wɛ, hwenu e ye ɖò nǔnina yetɔn lɛ sɔ́ dó gbǎ ɔ mɛ wɛ é. É mɔ dɔkunnɔ gegě, bɔ ye ɖò akwɛ ɖaxó ɖaxó sɔ́ dó gbǎ ɔ mɛ wɛ. Vlafo, fí e é ɖè dó gbǎ ɔ é lín sɔmɔ̌ ǎ, bɔ é nɔ sè gankwɛ e sɔ́ dó gbǎ ɔ mɛ wɛ mɛ lɛ ɖè é sín gbè.

17. Etɛ asúkúsi wamamɔnɔ e xó Maki 12:42 ɖɔ é ka wà?

¹⁷ Xà Maki 12:42. Táan klewun ɖé gudo ɔ, Jezu ɖ’ayi nawe ɖé wu. “Asúkúsi wamamɔnɔ” ɖé wɛ n’i. (Luk. 21:2) Gbɛ̀ bɔkun n’i ɖebǔ ǎ; b’ɛ cí ɖɔ gǎn wɛ é nɔ lɛ́ dó tawun cobo nɔ mɔ dandannú gbɛ̀ mɛ tɔn lɛ yayǎnɔ. É ɖò mɔ̌ có, é zɔn lɛ́ɛ bo yì akwɛgbá lɛ ɖokpo kɔn, bo zé gankwɛ kpɛví kpɛví we d’emɛ. Vlafo wɛ ye ɖɔ nǔ, hwenu e ye jɛ gbǎ ɔ mɛ é. Jezu tuùn nǔ e é zé dó gbǎ ɔ mɛ é. Akwɛ kpɛví kpɛví we wɛ é sɔ́ d’emɛ; akwɛ kpɛví hugǎn e è nɔ zán ɖò hwe ɔ nu é wɛ. È tlɛ sixu sɔ́ akwɛ enɛ dó xɔ gboli ɖokpo vɔ́vɔ́ ǎ; xɛ e kpɔ hugǎn bɔ è nɔ ɖu ɖò hwe ɔ nu lɛ é ɖokpo wɛ.

18. Sɔgbe xá Maki 12:43, 44 ɔ, etɛ Jezu ka ɖɔ dó nǔ e asúkúsi ɔ na é wu?

¹⁸ Xà Maki 12:43, 44. Nǔ e asúkúsi ɔ wà é jiwǔ ɖò Jezu sín nukúnmɛ tawun. Enɛ wu ɔ, é ylɔ́ ahwanvu tɔn lɛ, bo dɔn ayi yetɔn wá nǔ e asúkúsi ɔ wà é jí, bo ɖɔ: “Akwɛ e asúkúsi wamamɔnɔ enɛ ɔ na dìn ɔ hugǎn mɛ ɖě lɛ bǐ tɔn.” Enɛ gudo ɔ, é tinmɛ ɖɔ: “Mɛ ɖě lɛ bǐ sésé [taji ɔ, dɔkunnɔ lɛ] ɔ, nǔ e kpé ye kpò ɔ wɛ ye wá na dó akwɛgbá ɔ mɛ. Éyɛ ɔ, akwɛ e é ɖó bo na dó xɔ nǔ ɖu, bo na nɔ gbɛ̀ ɔ, bǐ sésé wɛ é sɔ́ wá dó gbǎ ɔ mɛ.” Ee asúkúsi wamamɔnɔ ɔ na akwɛ e kpò ɖò gǒ tɔn mɛ é bǐ gbè nɛ gbè é ɔ, é ɖeji ɖɔ Jehovah na kpé nukún dó emi wu.—Ðɛh. 26:3.

19. Nǔ taji tɛ xó e Jezu ɖɔ dó asúkúsi wamamɔnɔ ɔ wu é ka sixu kplɔ́n mǐ?

¹⁹ Zǎn nǔ e a kplɔ́n ɖò tan ɔ mɛ é ɖò gbɛzán towe mɛ. Kanbyɔ hwiɖée ɖɔ: ‘Etɛ nǔ e Jezu ɖɔ dó asúkúsi wamamɔnɔ ɔ wu lɛ é ka sixu kplɔ́n mì?’ Lin tamɛ dó asúkúsi ɔ jí. É ɖò wɛn ɖɔ, é na ko jló na na nǔ Jehovah hú nǔ e é na é. Nǔ ɖò mɔ̌ có, é wà nǔ e wu é kpé é; é na nǔ ɖagbe hugǎn e é ɖó é Jehovah. Bɔ Jezu tuùn ɖɔ nǔ e é na é xɔ akwɛ ɖò Tɔ́ emitɔn nukúnmɛ. Nǔ taji e enɛ kplɔ́n mǐ é ɖíe: Enyi mǐ na nǔ e wu mǐ kpé é bǐ Jehovah ɔ, é nɔ sù nukún tɔn mɛ. Enɛ wɛ nyí sɛn e mǐ nɔ sɛn ɛ kpo ayi mǐtɔn bǐ kpo, kpodo lindɔ̌n mǐtɔn bǐ kpan é. (Mat. 22:37; Kolo. 3:23) Enyi Jehovah mɔ bɔ mǐ ɖò nǔ e wu mǐ kpé é bǐ wà wɛ ɔ, xomɛ nɔ hun i. Nǔgbododó enɛ kúnkplá táan kpo hlɔnhlɔn kpo e mǐ nɔ zán dó sɛn ɛ é, kaka jɛ alɔ e mǐ nɔ ɖó ɖò wɛnɖagbejijlazɔ́ ɔ mɛ é kpo kplé e mǐ nɔ yì lɛ é kpo jí.

20. Nɛ̌ a ka sixu zán nǔkplɔnmɛ e ɖò tan e kúnkplá asúkúsi ɔ é mɛ é dó d’alɔ mɛ ɖevo lɛ gbɔn? Nǎ kpɔ́ndéwú ɖé.

²⁰ Nɛ̌ a ka sixu zán nǔkplɔnmɛ e ɖò tan e kúnkplá asúkúsi ɔ mɛ é dó d’alɔ mɛ ɖevo lɛ gbɔn? Tɛ́n kpɔ́n bo lin tamɛ dó mɛ ɖěɖee é sixu byɔ ɖɔ è ni vɔ́ ganjɛwu na ɖɔ gǎn e dó wɛ ye ɖè lɛ é sù Jehovah nukúnmɛ é jí. Ði kpɔ́ndéwú ɔ, a ka tuùn nɔví nyɔnu mɛxomɔ ɖé, bɔ vlafo ɔ, é nɔ dóhwɛ éɖée, alǒ nɔ mɔ ɖɔ emi kún sɔ́ hwɛ́n nǔɖe ó, ɖó lanmɛ tɔn lɔn nǔ, alǒ é sɔ́ ɖó hlɔnhlɔn bo na wà nǔ gegě ɖò sinsɛnzɔ́ ɔ mɛ ǎ wutu à? Kabǐ, a ka sixu lin tamɛ dó nɔví sunnu e ɖò azɔn jɛmagbɔ syɛnsyɛn ɖé jɛ wɛ, bɔ awakanmɛ nɔ kú i ɖó é sɔ́ sixu nɔ yì Kpléxɔ Axɔ́suɖuto ɔ tɔn mɛ, bo nɔ bló kplé lɛ bǐ ǎ é ɖé jí à? Ðɔ “xó e na wà ɖagbe nú mɛ” lɛ é dó d’alɔ mɛ mɔ̌hun lɛ. (Efɛ. 4:29) Mǎ nǔkplɔnmɛ e dó wusyɛn lanmɛ nú mɛ, bɔ mǐ kplɔ́n ɖò tan asúkúsi ɔ tɔn mɛ lɛ é xá ye. Xó e dó wusyɛn lanmɛ nú mɛ bɔ a ɖɔ lɛ é sixu na ganjɛwu ye ɖɔ enyi ye na nǔ ɖagbe hugǎn e ye ɖó é Jehovah ɔ, é nɔ sù nukún tɔn mɛ. (Nǔx. 15:23; 1 Tɛ. 5:11) Enyi mɛ ɖevo lɛ na nǔ ɖagbe hugǎn e ye ɖó é Jehovah, bɔ nǔ ɔ na bo tlɛ hwe gbɔn ɖebǔ bonu a nɔ kpa ye ɔ, afɔ sɔ́ dó afɔdo Jezu tɔn lɛ mɛ wɛ a ɖè télélé mɔ̌ nɛ.

21. Etɛ a ka kánɖeji bo na wà?

²¹ É sù nukún mǐtɔn mɛ tawun ɖɔ tan e ɖò Wɛnɖagbe-Wema lɛ mɛ lɛ é ɖɔ xó dó gǒflɛ́mɛ gegě wu bɔ ye kúnkplá gbɛzán Jezu tɔn, bo zɔ́n bɔ mǐ sixu wà nǔ éɖɔhun, bo lɛ́ zé afɔ dó afɔdo tɔn lɛ mɛ télélé. A sixu bló tuto bo gbéjé Wɛnɖagbe-Wema lɛ kpɔ́n ɖò nǔkplɔnkplɔn mɛɖesunɔ tɔn alǒ Sinsɛn-Biblo Xwédo tɔn hwenu. Mi nú mǐ ni flín ɖɔ bonu mǐ na ɖu lè nǔkplɔnkplɔn mɔ̌hun tɔn ganji ɔ, mǐ ɖó na bló bɔ tan lɛ na ɖò gbɛ̀, lobo lɛ́ zán ye ɖò gbɛzán mǐtɔn mɛ. Mǐ ɖó na wà nǔ lee Jezu wà gbɔn é, bo ka ɖó na lɛ́ ɖótó nǔ e é ɖɔ lɛ é. Ðò xóta e bɔ d’ewu é mɛ ɔ, mǐ na gbéjé nǔ e xó gudogudo tɔn e Jezu ɖɔ cobo kú lɛ é sixu kplɔ́n mǐ é kpɔ́n.