Mɛ wínnyáwínnyá lɛ́ mi, mi kpo ɖo nukɔn yi wɛ ɖo batɛ́mu mitɔn gúdo

 1. Nǔ ɖagbe tɛ́ lɛ́ mɛ wínnyáwínnyá gěgé ka ko wa?

MƐ WÍNNYÁWÍNNYÁ afatɔ́n mɔ̌kpán wɛ nɔ bló batɛ́mu xwewú xwewú tɛgbɛ. A ko ɖe afɔ mɔ̌hun wɛ a? Ényí a ko wa mɔ̌ hǔn, nɔví súnnu kpó nɔví nyɔ̌nu kpó gbigbɔ tɔn towe lɛ́ ɖo awǎ jɛ xá we wɛ, bɔ xomɛ hun Jexóva lɔmɔ̌. (Nǔx. 27:11) Yi agbɔ̌n jí, bo lin tamɛ dó nǔ ɖagbe e a ko wa lɛ́ é jí. A ko kplɔ́n Biblu kpó kanɖódónǔwú kpó, bóyá nú xwe gěgé. Nǔ e a kplɔ́n lɛ́ é zɔ́n bɔ a kú d’é jí ɖɔ Biblu ɔ, Xó Mawu tɔn wɛ é nyí. Amɔ̌, tají hú gǎn ɔ, a kplɔ́n bo tuun mɛ e nyí Dǒwátɔ́ Biblu tɔn é, bo lɛ́ yí wǎn n’i. Wǎn e a yí nú Jexóva é jɛjí káká bɔ din ɔ, a zé hwiɖée jó n’i bo húzú mɛsɛntɔ́ tɔn e bló batɛ́mu é. É jí wǔ kpɔ́n!

 2. Étɛ́ jí mǐ ka ná ɖɔ xó dó ɖo xóta élɔ́ mɛ?

² É ɖo wɛn ɖɔ nǔɖiɖi towe gbɔn mɛtɛ́nkpɔ́n gěgé mɛ, hwenu e a ɖo gǎn dó wɛ bá bló batɛ́mu é. Amɔ̌, ényí a ɖo susu wɛ ɔ, a ná lɛ́ gbɔn mɛtɛ́nkpɔ́n yɔ̌yɔ́ ɖěvo lɛ́ mɛ. Satáan ná tɛ́n kpɔ́n bo ná vɔ́ da nú wǎn e a yí nú Jexóva é, bo ná lɛ́ bló bɔ a ná ɖó Jexóva sinsɛn te. (Efɛ́. 4:14) Ma lɔn nú nǔ mɔ̌hun jɛ ó. Étɛ́ ka sixú d’alɔ we bɔ a ná kpo ɖo gbejí nú Jexóva, lobo lɛ́ wa nǔ sɔgbe xá zě e a zé hwiɖée jó n’i é? A ɖó ná kpo ɖo gǎn dó wɛ bo ná húzú klisánwun e zin é. (Ebl. 6:1) Amɔ̌, nɛ̌ a ka sixú wa énɛ́ gbɔn? Nǔ e jí mǐ ná ɖɔ xó dó ɖo xóta élɔ́ mɛ é nɛ́.

 3. Gǎn tɛ́ klisánwun lɛ́ bǐ ka ɖó ná dó ɖo batɛ́mu yětɔn gúdo?

³ Ényí mǐ bló batɛ́mu gúdo ɔ, mǐ bǐ wɛ ɖó ná xwedó wě e mɛsɛ́dó Pɔ́lu ɖe xá nǔɖitɔ́ hǎtɔ́ e ɖo Efɛ́zi lɛ́ é é. É dó wǔsyɛ́n lanmɛ nú yě ɖɔ yě ní “nyí mɛxó ɖo nǔɖiɖi mɛ.” (Efɛ́. 4:13) Ðo xógbe ɖěvo mɛ ɔ, yě ní ‘kpo ɖo nukɔn yi wɛ.’ Mǐ sixú mɔ nǔ jɛ nǔ e ɖɔ wɛ Pɔ́lu ɖe hwenu e é jlɛ́ nukɔnyiyi ɖo gbigbɔ lixo dó lěe vǐ ɖé nɔ su gbɔn ɖo agbaza lixo é wú é mɛ. Xomɛ nɔ hun mɛjitɔ́ lɛ́ tawun dó vǐ yɛ̌yɛ́ yětɔn wú, bɔ yě nɔ lɛ́ gó ɖó wǔ tɔn. Amɔ̌, é sixú nɔ vǔ mɔ̌ káká sɔ́yi ǎ. Bɔ nú é ɖo susu wɛ ɔ, é ná jó “nǔ e nyí yɔkpɔ́vú tɔn lɛ́” é dó. (1 Kɔ. 13:11) Nǔ ɖokpó ɔ wɛ é nɔ nyí nú klisánwun lɛ́ lɔmɔ̌. Mǐ bló batɛ́mu gúdo ɔ, mǐ ɖó ná kpo ɖo nukɔn yi wɛ. Mi nú mǐ ní gbéjé nǔ e ná d’alɔ mǐ bɔ mǐ ná kpé énɛ́ wú é ɖé lɛ́ kpɔ́n.

 4. Jijɔ tɛ́ ka sixú d’alɔ we bɔ a ná yi nukɔn ɖo gbigbɔ lixo? Tínmɛ. (Filípunu lɛ́ 1:9)

⁴ Nǔ wǎn e a yí nú Jexóva é ní jɛjí. A ko yí wǎn nú Jexóva tawun. Amɔ̌, wǎn e a yí n’i é sixú lɛ́ jɛjí. Gbɔn nɛ̌ é? Mɛsɛ́dó Pɔ́lu ɖɔ xó dó ali e nu nǔ sixú nyí mɔ̌ ɖe é ɖokpó wú, ɖo Filípunu lɛ́ 1:9 mɛ. (Xa.) Pɔ́lu xo ɖɛ ɖɔ wǎnyíyí Filípunu lɛ́ tɔn “ní ɖo jijɛjí wɛ.” Hǔn, wǎnyíyí mǐtɔn sixú jɛjí. Nú mǐ “tuun nǔ ganjí, bo ɖó nukúnnúmɔjɛnǔmɛ titewungbe” ɔ ɔ, nǔ sixú nyí mɔ̌. Lě do mǐ kplɔ́n bo tuun Jexóva sɔ é ɔ, mɔ̌ do wɛ mǐ nɔ yí wǎn n’i sɔ, bɔ jijɔ tɔn lɛ́ kpó lěe é nɔ wa nǔ gbɔn é kpó nɔ su nukún mǐtɔn mɛ. Akpakpa e nɔ sɔ́ mǐ dó nǔ e mǐ ná wa bo dó xomɛhunhun n’i é wú é nɔ ɖo jijɛjí wɛ, bɔ mǐ nɔ ba ná wa nǔɖé gbeɖé b’ɛ ná kú wǔ n’i ǎ. Mǐ nɔ dó gǎn, bo nɔ tuun jlǒ tɔn kpó lěe mǐ sixú wa nǔ sɔgbe xá jlǒ énɛ́ gbɔn é kpó.

 5-6. Nɛ̌ wǎn e mǐ yí nú Jexóva é ka sixú jɛjí gbɔn? Tínmɛ.

⁵ Ényí mǐ kplɔ́n bo tuun Vǐ Mawu tɔn e nɔ wa nǔ Tɔ́ tɔn ɖɔhun bɔ nǔ bǐ nɔ vɔ ɖ’é wú é ganjí ɔ, wǎn e mǐ yí nú Jexóva é ná jɛjí. (Ebl. 1:3) Ali ɖagbe hú gǎn e nu mǐ sixú tuun Jezu ɖe é wɛ nyí ɖɔ mǐ ní kplɔ́n Wɛnɖagbewéma ɛnɛ lɛ́. Ényí a ma ko ɖó aca ɖagbe Biblu xixa gbe bǐ gbe tɔn ǎ ɔ, étɛ́wú a ma ka ná sɔ́ nǔ ná din ǎ? Nú a ɖo tan e kúnkplá Jezu lɛ́ é xa wɛ hǔn, nɔ sɔ́ ayi ɖó jijɔ tɔn lɛ́ jí. É nyɔ́ lyá, bo nɔ dɔn yɔkpɔ́vú lɛ́ dó wǔ kpó wǎnyíyí kpó. (Mak. 10:13-16) É nɔ bló bɔ ahwanvú tɔn lɛ́ nɔ vo bo nɔ ɖɔ nǔ e ɖo ayi yětɔn mɛ lɛ́ é. (Mat. 16:22) Ðo ali énɛ́ nu ɔ, kpɔ́ndéwú Tɔ́ tɔn jǐxwé tɔn ɔ tɔn xwedó wɛ é ɖe mɔ̌. Jexóva lɔ nyɔ́ lyá tawun. Mǐ sixú vo bo xo ɖɛ sɛ́dó è. Ényí mǐ ɖo ɖɛ xo wɛ ɔ, mǐ sixú ɖɔ nǔ e ɖo ayi mǐtɔn mɛ lɛ́ é bǐ n’i. Mǐ ɖeji ɖɔ é kún ná dó hwɛ mǐ ó. É yí wǎn nú mǐ, bo nɔ kpé nukún dó mǐ wú.—1 Pi. 5:7.

⁶ Jezu nɔ se wǔvɛ́ xá mɛ. Mɛsɛ́dó Matíe wlán ɖɔ: “Ée é mɔ ahwan ɔ é ɔ, nǔ yětɔn blá wǔ n’i, ɖó é mɔ ɖɔ è gbídí kɔ nú yě bo lɛ́ dó vɛ̌ nú yě lɛ̌ngbɔ́ e ma ɖó lɛ̌ngbɔ́nyitɔ́ ɖě ǎ lɛ́ é ɖɔhun.” (Mat. 9:36) Bɔ nɛ̌ nǔ ka nɔ cí nú Jexóva? Jezu ɖɔ: “Mɔ̌ ɖokpó ɔ, Tɔ́ ce e ɖo jǐxwé é ba ɖěbǔ ɖɔ mɛ kpɛví élɔ́ lɛ́ ɖokpó vɔ́vɔ́ ní dɔn ǎ.” (Mat. 18:14) Énɛ́ dó wǔsyɛ́n lanmɛ nú mɛ tawun! Lěe mǐ ɖo Jezu tuun d’é jí wɛ sɔ é ɔ, mɔ̌ wɛ wǎn e mǐ yí nú Jexóva é nɔ ɖo jijɛjí wɛ sɔ.

 7. Nɛ̌ gbɛ̌ dídó xá klisánwun e zin lɛ́ é ka sixú d’alɔ we gbɔn?

⁷ Ényí a nɔ zán hwenu ɖó kpɔ́ xá nɔví súnnu kpó nɔví nyɔ̌nu kpó e zin ɖo agun ɔ mɛ lɛ́ é, bo tuun yě ɔ, énɛ́ lɔ sixú zɔ́n bɔ wǎn e a yí nú yě é ná jɛjí, bɔ a ná yi nukɔn ɖo gbigbɔ lixo. Nɔ ɖ’ayi lě do yě ɖ’awǎjijɛ sɔ é wú. Gbeta ɔ kɔn e yě wá bo ɖo Jexóva sɛn wɛ é vɛ́ nú yě kpɔ́n ǎ. Nɔ byɔ́ yě ɖɔ yě ní ɖɔ nǔ e yě ko mɔ kpɔ́n ɖo sinsɛnzɔ́ e wa nú Jexóva wɛ yě ɖe é mɛ é ɖé lɛ́ nú we. Nɔ ba alɔdó yětɔn hwenu e a jló ná wá gbeta tají ɖé kɔn é. Nɔ flín ɖɔ “mɛ e ná ɖe wě dó [nǔ] wú lɛ́ sukpɔ́ ɔ,” é nɔ kpa mɛ.—Nǔx. 11:14.

 8. Ényí a ko xo nǔ kpɔ́n dó nǔ e Biblu ɖɔ lɛ́ é wú kpɔ́n ɔ, étɛ́ a ka sixú wa?

⁸ Ðu ɖo nǔxokpɔ́n towe lɛ́ jí. Lěe mǐ ko ɖɔ gbɔn ɖo akpáxwé 2gɔ́ ɔ mɛ é ɔ, Satáan ná tɛ́n kpɔ́n bo ná sú ali dó we, bónú a ná gɔn nukɔn yi ɖo gbigbɔ lixo. Ali e nu é sixú wa mɔ̌ ɖe é ɖokpó wɛ nyí ɖɔ é ná bló bɔ a ná jɛ nǔ xo kpɔ́n dó nǔkplɔ́nmɛ Biblu tɔn ɖé lɛ́ wú jí. Ði kpɔ́ndéwú ɔ, mɛɖé lɛ́ sixú tɛ́n kpɔ́n bo ná bló bɔ a ná kú d’é jí ɖɔ Mawu kún dá mǐ ó, lé nǔ lɛ́ jɔ nú yěɖée wɛ zɔ́n bɔ mǐ tíin. A sixú gɔn nǔ káká ɖé, alǒ ɖěbǔ tuun dó xóta énɛ́ wú hwenu e a ɖo wǐnnyáwínnyá mɛ é, amɔ̌ din e a ko su é ɔ, è sixú ko ɖo nǔ kplɔ́n we d’é wú wɛ ɖo wěmaxɔmɛ. Nǔ e ɖɔ wɛ mɛ̌si towe lɛ́ ɖe dó nǔ lɛ́ jɔ nú yěɖée xó ɔ wú é sixú cí nǔ e xwe ali bo lɛ́ ɖu ɖo mɛ jí é ɖɔhun. Amɔ̌, yě sixú ko nɔ ma gbéjé kúnnuɖenú e xlɛ́ ɖɔ Gbɛɖótɔ́ ɖé tíin lɛ́ é kpɔ́n dó nǔjɔnǔ mɛ. Flín nǔgbódodó e ɖo Nǔnywɛ́xó 18:17 mɛ é: “Mɛɖé wá jɛ hwɛ dó nukɔn ɔ, è nɔ mɔ ɖɔ hwɛ tɔn jɔ; mɛ e é dó hwɛ ɔ ka wá ɔ, é nɔ flí xó tɔn xwe.” Ma yí gbe nú nǔ e a se ɖo wěmaxɔmɛ lɛ́ é bǐ kpowun ó, é nyɔ́ wa hǔn, xwe sɔ bo gbéjé nǔgbó e ɖo Xó Mawu tɔn Biblu ɔ mɛ lɛ́ é kpɔ́n. Ba do nú nǔ ɖo wěma mǐtɔn lɛ́ mɛ. Ðɔ xó xá nɔví súnnu kpó nɔví nyɔ̌nu kpó ɖěɖěe ko ɖi nǔ nú nǔ lɛ́ jɔ nú yěɖée xó ɔ kpɔ́n lɛ́ é. Kan nǔ e zɔ́n bɔ yě kú d’é jí ɖɔ Gbɛɖótɔ́ ɖé tíin, bo yí wǎn nú mǐ é byɔ́ yě. Xóɖɔɖókpɔ́ mɔ̌hun lɛ́ sixú d’alɔ we bɔ a ná mɔ kúnnuɖenú e xlɛ́ ɖɔ Gbɛɖótɔ́ ɖé tíin lɛ́ é.

 9. Étɛ́ tan Melissa tɔn ka kplɔ́n we?

⁹ Do e nɔví nyɔ̌nu e nɔ nyí Melissa é ba nú nǔ dó xóta e kúnkplá nǔɖíɖó lɛ́ wú é hɛn le wá n’i tawun.b É ɖɔ: “Ðo wěmaxɔmɛ ɔ, è nɔ xwlé nǔ lɛ́ jɔ nú yěɖée xó ɔ mɛ ɖo ali ɖé nu bɔ é nɔ cí nǔ e sɔgbe tawun é ɖɔhun. Ðo bǐbɛ́mɛ ɔ, un ba ná ba do nú nǔ ǎ, ɖó xɛsi ɖo ɖiɖi mì wɛ ɖɔ un ná wá yi xo go nǔ e xlɛ́ ɖɔ nǔ lɛ́ jɔ nú yěɖée nyí nǔgbó lɛ́ é. Amɔ̌, un tuun ɖɔ Jexóva kún ba ɖɔ mǐ ní sɛn émí kúnnuɖenú lɛ́ mɛvo ó. Énɛ́ wú ɔ, un húzú kpan nukɔn nǔxokpɔ́n ce lɛ́. Un xa wěma Y a-t-il un Créateur qui se soucie de vous? kpó alɔnuwéma élɔ́ lɛ́ kpó: La vie a-t-elle été créée?, Cinq questions à se poser sur l’origine de la vie. Nǔ e sín hudó un ɖó é pɛ́ɛ nɛ́. Nǔ e un ɖó ná ko bló ɖ’ayǐ é nɛ́.”

10-11. Étɛ́ ka sixú d’alɔ we bɔ a ná gbí dɔn ɖo mɛtɛ́nkpɔ́n nukɔn? (1 Tɛsaloníkinu lɛ́ 4:3, 4)

¹⁰ Nyi alɔ nú walɔ nyanya lɛ́. Ényí a ɖo wǐnnyáwínnyá mɛ ɔ, jlǒ xóɖóxámɛ tɔn sixú syɛ́n tawun, bɔ è sixú lɛ́ gbídí kɔ nú we syɛ́nsyɛ́n bónú a ná lɛ aga. Satáan nɔ ba ɖɔ a ní gbɔ jlǒ towe. Étɛ́ ka sixú d’alɔ we bɔ a ná gbí dɔn ɖo mɛtɛ́nkpɔ́n nukɔn? (Xa 1 Tɛsaloníkinu lɛ́ 4:3, 4.) Nɔ ɖɔ lěe nǔ cí nú we é nú Jexóva ɖo ɖɛ towe lɛ́ mɛ. Nɔ ɖɔ lěe nǔ cí nú we nǔgbó nǔgbó é n’i, bo nɔ byɔ́ ɛ ɖɔ é ní ná hlɔ̌nhlɔ́n we. (Mat. 6:13) Nɔ flín ɖɔ nǔ e ba wɛ Jexóva ɖe é wɛ nyí ɖɔ é ná d’alɔ we, é kún nyí é ná ɖó hwɛ nú we wɛ ó. (Ðɛh. 103:13, 14) A sixú lɛ́ ba alɔdó ɖo Xó Mawu tɔn mɛ. Melissa e xó mǐ ɖɔ wá yi é mɔ hlɔ̌nhlɔ́n, bo ɖí xwi xá linlin masɔgbe tɔn lɛ́. É ɖɔ: “Biblu xixa gbe bǐ gbe d’alɔ mì bɔ un jó gbe ǎ. É nɔ flín mì ɖɔ Jexóva tɔn wɛ un nyí, bɔ un ba ná sɛn ɛ.”—Ðɛh. 119:9.

¹¹ Ma nɔ tɛ́n kpɔ́n bo ná ɖe ɖɛ tagba towe lɛ́ hwiɖésúnɔ ó. Nɔ ɖɔ xó dó nǔ e ɖí xwi xá wɛ a ɖe lɛ́ é wú xá mɛjitɔ́ towe lɛ́. Nǔgbó wɛ ɖɔ xó ɖɔ dó nǔ mɔ̌hun e kúnkplá mɛɖésúnɔ lɛ́ é wú nɔ bɔ wǔ ǎ, amɔ̌, é ɖo tají ɖɔ a ní wa mɔ̌. Melissa ɖɔ: “Un xo ɖɛ dó byɔ́ akɔ́nkpinkpan, bo ɖɔ xó dó xó ɔ wú xá papá ce. Énɛ́ gúdo ɔ, agbɔ̌n ce jɛ do tawun. Un tuun ɖɔ Jexóva nɔ gó ɖó wǔ ye.”

12. Nɛ̌ a ka sixú nɔ wá gbeta ɖagbe lɛ́ kɔn gbɔn?

¹² Nǔ nǔgbódodó Biblu tɔn lɛ́ ní xlɛ́ ali we. Ée a ná ɖo susu wɛ é ɔ, mɛjitɔ́ towe lɛ́ ná yí gbe bɔ a ná nɔ wá gbeta lɛ́ kɔn nú hwiɖée hú gǎn. Amɔ̌, é lɛ́ kpo nǔ gěgé bɔ a ko tuun din ǎ. Nɛ̌ a ka sixú nyi alɔ nú nǔ e ná wa nǔ dó xɔ́ntɔn e a zun xá Jexóva é wú é ɖé gbɔn? (Nǔx. 22:3) Nɔví nyɔ̌nu e nɔ nyí Kari é tínmɛ nǔ e d’alɔ ɛ b’ɛ wá gbeta ɖagbe hú gǎn lɛ́ kɔn é. É wá mɔ nǔ jɛ wú ɖɔ é kún byɔ́ ɖɔ è ní dó sɛ́n dó ninɔmɛ lɛ́ bǐ wú nú klisánwun e zin lɛ́ é ó. É ɖɔ: “É byɔ́ ɖɔ má mɔ nǔ jɛ nǔgbódodó Biblu tɔn lɛ́ wú hú ɖɔ má tuun sɛ́n lɛ́ kpowun.” Ényí a ɖo Biblu xa wɛ hǔn, nɔ kan nǔ élɔ́ lɛ́ byɔ́ hwiɖée: ‘Étɛ́ akpáxwé élɔ́ ka kplɔ́n mì dó linlin Jexóva tɔn wú? Nǔgbódodó ɖé lɛ́ ka ɖo fí bo sixú xlɛ́ ali nǔwiwa ce lɛ́ a? Ényí mɔ̌ wɛ nyí ɔ, nú un zán yě ɔ, nɛ̌ un ka ná ɖu le tɔn gbɔn?’ (Ðɛh. 19:8; Eza. 48:17, 18) Ényí a nɔ xa Biblu, lobo nɔ lɛ́ lin tamɛ dó nǔgbódodó tɔn lɛ́ jí ɔ, é ná bɔ wǔ nú we hú gǎn, bɔ a ná wá gbeta e nɔ dó xomɛhunhun nú Jexóva lɛ́ é kɔn. Ée a ná ɖo nukɔn yi wɛ é ɔ, a ná ɖ’ayi wú ɖɔ é kún byɔ́ ɖɔ è ní nɔ dó sɛ́n nú we dó ninɔmɛ ɖokpó ɖokpó wú ó, ɖó a ná mɔ nǔ jɛ linlin e Jexóva nɔ ɖó dó nǔ lɛ́ wú é wú.

13. Le tɛ́ xɔ́ntɔn ɖagbe lɛ́ zunzun ka sixú hɛn wá nú we? (Nǔnywɛ́xó 13:20)

¹³ Zun xɔ́ntɔn ɖěɖěe yí wǎn nú Jexóva lɛ́ é. Lěe mǐ ko ɖɔ gbɔn wá yi ɖo akpáxwé 7gɔ́ ɔ mɛ é ɔ, xɔ́ntɔn e a zun lɛ́ é sixú d’alɔ we bɔ a ná húzú klisánwun e zin é. (Xa Nǔnywɛ́xó 13:20.) Nɔví nyɔ̌nu e nɔ nyí Sara é ba awǎjijɛ tɔn kpo. Énɛ́ gúdo ɔ, nǔɖé jɛ bo d’alɔ ɛ bɔ é húzú lěe é nɔ kpɔ́n nǔ lɛ́ gbɔn é. Sara ɖɔ: “Gan ɖagbe ɔ mɛ wɛ xɔ́ntɔn ɖagbe lɛ́ wá dó. Nyi kpó nɔví nyɔ̌nu wínnyáwínnyá ɖé kpó nɔ kplɔ́n Atɔxwɛ ɖó kpɔ́ ɖo aklúnɔzángbla lɛ́ bǐ mɛ. Xɔ́ntɔn ɖěvo d’alɔ mì bɔ un jɛ xósin ná jí ɖo kplé jí. Ðó alɔ e xɔ́ntɔn ce lɛ́ dó mì é wútu ɔ, un jɛ Biblu kplɔ́n jí nyiɖésúnɔ, bo nɔ lɛ́ xo ɖɛ dó nǔjɔnǔ mɛ. Un jɛ vǐvɛ́ xá Jexóva jí, bo lɛ́ jɛ awǎjijɛ ɖó jí.”

14. Nɛ̌ Julien ka zun xɔ́ntɔn ɖagbe lɛ́ gbɔn?

¹⁴ Nɛ̌ a ka sixú zun xɔ́ntɔn ɖěɖěe ná sísɛ́ we dó nǔ ɖagbe wiwa kɔn lɛ́ é gbɔn? Julien e nyí mɛxó agun tɔn ɖé din é ɖɔ: “Hwenu e un ɖo wǐnnyáwínnyá mɛ é ɔ, un zun xɔ́ntɔn ɖagbe lɛ́ ɖo sinsɛnzɔ́ ɔ mɛ. Xɔ́ntɔn énɛ́ lɛ́ nɔ ɖó kan dó nǔ wú, bo d’alɔ mì bɔ un mɔ awǎjijɛ e sinsɛnzɔ́ ɔ sixú hɛn wá é. Un wá sɔ́ sinsɛnzɔ́ hwebǐnu tɔn dó ɖó nǔ e gbé un ná nya é. Un lɛ́ wá ɖ’ayi wú ɖɔ un xo xɔ́ntɔn ɖagbe gěgé zunzun kpo, ɖó un sɔ́ ayi ɖó xɔ́ntɔn zunzun xá mɛ e kpó nyi kpó ɖó xwe ɖokpó ɔ lɛ́ é jí wútu. Nukɔnmɛ ɔ, un lɛ́ wá zun xɔ́ntɔn ɖagbe lɛ́ ɖo Betɛ́li. Kpɔ́ndéwú yětɔn d’alɔ mì bɔ un w’azɔ̌ ɖo ayiɖeɖayǐ e sín gbeta kɔn un nɔ wá lɛ́ é wú, bɔ énɛ́ zɔ́n bɔ un sɛkpɔ́ Jexóva d’é jí.”

15. Akpá tɛ́ Pɔ́lu ka gba nú Timɔtée dó gbɛ̌dídó wú? (2 Timɔtée 2:20-22)

¹⁵ Ényí a ɖ’ayi wú ɖɔ mɛɖé ɖo agun ɔ mɛ, bo kún nyí gbɛ̌ ɖagbe bɔ a ná dó ó ɔ ka lo? Pɔ́lu tuun ɖɔ mɛɖé lɛ́ ɖo klisánwun xwe kanweko nukɔntɔn ɔ tɔn lɛ́ sín agun mɛ bo kún nɔ lin nǔ, alǒ wa nǔ klisánwun ɖɔhun ó, énɛ́ wú ɔ, é gb’akpá nú Timɔtée ɖɔ é ní ɖó wǔ zɔ nú yě. (Xa 2 Timɔtée 2:20-22.) Xɔ́ntɔn e mǐ zun xá Jexóva é xɔ akwɛ́ tawun. Mǐ ná lɔn nú mɛ ɖěbǔ ná vɔ́ da nú xɔ́ntɔn e mǐ dó gǎn tawun bo zun xá Tɔ́ mǐtɔn jǐxwé tɔn ɔ é ǎ.—Ðɛh. 26:4.

16. Nǔ alɔkpa tɛ́ lɛ́ gbé a ka ɖó ná nya?

¹⁶ Nya nǔ ɖagbe lɛ́ gbé. Nya nǔ ɖěɖěe ná ná hlɔ̌nhlɔ́n nǔɖiɖi towe, bo lɛ́ d’alɔ we bɔ a ná zin ɖo gbigbɔ lixo lɛ́ é gbé. (Efɛ́. 3:16) Ði kpɔ́ndéwú ɔ, a sixú wá gbeta ɔ kɔn bo ná nɔ kplɔ́n nǔ, bo lɛ́ xa Biblu ɖo gbesisɔmɛ. (Ðɛh. 1:2, 3) Alǒ, a sixú tɛ́n kpɔ́n bo nɔ xo ɖɛ sín ayi mɛ hwɛhwɛ hú gǎn. É sixú byɔ́ ɖɔ a ɖó ná ɖu ɖo hwiɖée jí tawun ɖo ayiɖeɖayǐ e a nɔ cyán lɛ́ é kpó hwenu e a nɔ zán ɖo yě kɔn é kpó linu. (Efɛ́. 5:15, 16) Ényí Jexóva mɔ bɔ a ɖo gǎn dó wɛ bo ná yi nukɔn d’é jí ɔ, é ná víví n’i.

17. Le tɛ́ alɔ dídó mɛ ɖěvo lɛ́ ka nɔ hɛn wá?

¹⁷ Ényí a nɔ d’alɔ mɛ ɖěvo lɛ́ ɔ, a ná húzú klisánwun e zin é. Jezu ɖɔ: “Nǔnámɛ nɔ dó xomɛhunhun nú mɛ hú nǔyíɖomɛsí.” (Mɛ. 20:35) Ényí a nɔ zán hwenu kpó wǐnnyáwínnyá mɛ sín hlɔ̌nhlɔ́n e a ɖó é kpó ɖě dó d’alɔ mɛ ɖěvo lɛ́ ɔ, a ná ɖu le tɔn tawun. Ði kpɔ́ndéwú ɔ, a sixú wá gbeta ɔ kɔn bo ná nɔ d’alɔ mɛxómɔ kpó wɔ̌nɖowǔnánɔ kpó e ɖo agun towe mɛ lɛ́ é. Vlafo a sixú nɔ xwlé axi nú yě, alǒ d’alɔ yě bɔ yě ná zán alǒkan, alǒ tablɛ́ti kpó nǔ mɔ̌hun ɖěvo lɛ́ kpó. Ényí nɔví súnnu wɛ nú we hǔn, nya devízɔ́watɔ́ sinsɛnzɔ́wiwa tɔn gbé, bo ná dó wa devízɔ́ nú nɔví súnnu kpó nɔví nyɔ̌nu kpó towe lɛ́. (Filí. 2:4) A nɔ lɛ́ jlá wɛn ɖagbe Axɔ́súɖuto ɔ tɔn mɛ ɖěvo lɛ́, bo nɔ dó ɖe wǎnyíyí xlɛ́ yě. (Mat. 9:36, 37) Ényí é nyɔ́ bló hǔn, nya nǔɖé lɛ́ gbé ɖo sinsɛnzɔ́ hwebǐnu tɔn ɔ mɛ.

18. Nɛ̌ sinsɛnzɔ́ hwebǐnu tɔn ka sixú d’alɔ we bɔ a ná yi nukɔn gbɔn?

¹⁸ Sinsɛnzɔ́ hwebǐnu tɔn ɔ sixú hun ali gěgé nú we bɔ a ná yi nukɔn ɖo gbigbɔ lixo. Gběxosín-alijítɔ́ nyínyí sixú hun wěmaxɔmɛ wɛnɖagbejlátɔ́ Axɔ́súɖuto ɔ tɔn lɛ́ tɔn sín hɔn nú we. A sixú wa sinsɛnzɔ́ ɖo Betɛ́li alǒ ɖ’alɔ ɖo xɔ tutoblónúnǔ ɔ tɔn lɛ́ gbígbá mɛ. Nɔví nyɔ̌nu gběxosín-alijítɔ́ wínnyáwínnyá e nɔ nyí Kaitlyn é ɖɔ: “Hwenu zínzán ɖó kpɔ́ xá nɔví súnnu kpó nɔví nyɔ̌nu kpó e ko mɔ nǔ kpɔ́n ɖo sinsɛnzɔ́ ɔ mɛ lɛ́ é d’alɔ mì tawun, bɔ un yi nukɔn ɖo gbigbɔ lixo ɖo batɛ́mu ce gúdo. Kpɔ́ndéwú yětɔn sísɛ́ mì bɔ un lɛ́ kplɔ́n Biblu d’é jí bo lɛ́ bló bɔ nǔwúkpíkpé mɛkplɔ́nkplɔ́n tɔn ce lɛ́ kpɔ́n te d’é jí.”

19. Nú a kpo ɖo nukɔn yi wɛ ɖo gbigbɔ lixo ɔ, nyɔ̌ná tɛ́ lɛ́ sín vǐví a ka ná ɖu?

¹⁹ Nú a ɖo nukɔn yi wɛ ɖo gbigbɔ lixo ɔ, a ná ɖu nyɔ̌ná gěgé sín le. Énɛ́ ná zɔ́n bɔ a sɔ́ ná zán wǐnnyáwínnyá hwenu towe dó nya nǔ vɔ̌tɔ́ lɛ́ gbé ǎ. (1 Jaan 2:17) A sɔ́ ná se wǔvɛ́ e gbeta nyanya lɛ́ kɔn wíwá nɔ hɛn wá nú mɛ é ǎ. É nyɔ́ wa ɔ, a ná mɔ gbɛ towe nu, bo ná lɛ́ ɖó awǎjijɛ jɔ awǎjijɛ. (Nǔx. 16:3) Kpɔ́ndéwú ɖagbe e a ɖó é ná dó wǔsyɛ́n lanmɛ nú nǔɖitɔ́ hǎtɔ́ towe lɛ́, yě ná bo tlɛ nyí mɛ wínnyáwínnyá alǒ mɛxó ɔ nɛ́. (1 Tim. 4:12) Tají hú gǎn ɔ, a ná ɖu fífá kpó awǎjijɛ kpó e è nɔ mɔ ɖó nǔ mɛtɔn nyɔ́ Jexóva nukúnmɛ, bɔ è lɛ́ zun xɔ́ntɔn vívɛ́ xá ɛ é sín vǐví.—Nǔx. 23:15, 16.