Etɛ Biblu ka Ðɔ Dó Natáaxwe Wu?

Biblu ɖɔ azǎn e gbè e jì Jezu é ǎ, é ka lɛ́vɔ ɖɔ ɖɔ mǐ ɖó na ɖu jijizán tɔn ǎ. Cyclopedia de McClintock et Strong wlan ɖɔ: “Natáaxwe ɖuɖu ɔ kún gosin Mawu gɔ́n ó, mɔ̌ jɛn é ma ka gosin Alɛnuwema Yɔyɔ̌ ɔ mɛ ǎ é nɛ.”

Amɔ̌, dò biba nú fí e Natáaxwe jɔ sín é xlɛ́ ɖɔ aca sinsɛn pagáwun tɔn tɔn lɛ mɛ wɛ é gosin. Biblu xlɛ́ ɖɔ enyi mǐ nɔ tɛ́n kpɔ́n bo na sɛn Mawu lee é ma ba ǎ gbɔn é ɔ, mǐ nɔ dó xomɛsin n’i.—Tíntɔ́n 32:5-7.

1. Jijizán Jezu tɔn ɖuɖu: “Klisanwun bǐbɛ̌mɛ tɔn lɛ nɔ ɖu jijizán [Jezu tɔn] ǎ, ɖó ye nɔ kpɔ́n jijizán mɛɖé tɔn ɖuɖu dó mɔ aca pagáwun tɔn ɖé.”—The World Book Encyclopedia.

2. 25 décembre: Nǔ ɖebǔ xlɛ́ ɖɔ è jì Jezu ɖò azǎn enɛ jí ǎ. É cí ɖɔ sinsɛngán lɛ sɔ́ azǎn enɛ bonu é na cá kan xá xwè pagáwun tɔn e è nɔ ɖu ɖò avivɔ hwenu é ɖɔhun.

3. Nǔnamɛ kpo agɔ̌ɖuɖu kpo: The Encyclopedia Americana ɖɔ: “Saturnales ee nyí xwè Hlɔma tɔn ɖé, bɔ è nɔ ɖu ɖò sun décembre tɔn tɛntin é wɛ è nɔ xwedó ɖò Natáaxwe ɔ sín aca lɛ gegě mɛ. Ði kpɔ́ndéwú ɔ, xwè enɛ mɛ wɛ agɔ̌ɖuɖu, nǔ nina mɛ, kpo vɛ̌la títá kpo tɔ́n sín.” Encyclopædia Britannica ɖɔ: “È nɔ ɖó azɔ̌ kpo ajɔ̌ kpo bǐ te” ɖò Saturnales hwenu.

4. Myɔ Natáaxwe tɔn lɛ: The Encyclopedia of Religion ɖɔ ɖɔ mɛ e ɖò Elɔpu lɛ é nɔ sɔ́ “myɔ kpo atín e sín ama nɔ ɖò mǔ hwebǐnu lɛ é alɔkpa vovo lɛ bǐ kpo” dó b’acɔ́ nú xwé yetɔn lɛ, bo na dó ɖu avivɔ hwenu sín xwè ɔ na, lobo na lɛ́ nya yɛ nyanya lɛ.

5. Natáaxwe sín atín e è nɔ ylɔ́ ɖɔ “sapin” é: “Pagáwun ɖěɖee nɔ nɔ Elɔpu lɛ é nɔ sɛn atín, bɔ aca enɛ gbakpé tawun. Hwenu e ye tlɛ wá huzu Klisanwun é ɔ, ye jó aca enɛ dó ǎ.” Lee aca enɛ ma bú nu ǎ gbɔn é ɖokpo wɛ nyí ɖɔ mɛ lɛ nɔ “sɔ́ atín e è b’acɔ́ na é ɖó hɔntogbo lɛ jí, alǒ ɖó xwé yetɔn lɛ gbè ɖò avivɔ hwenu sín xwè lɛ hwenu.”—Encyclopædia Britannica.