Wɛnɖagbe ɔ Jlatɔ́ Lɛ

JEHOVAH na mǐ kpɔ́ndéwú e nǔ bǐ vɔ ɖ’ewu é ɖé bɔ mǐ na xwedó, é wɛ nyí Vǐ tɔn Jezu Klisu. (1 Pi. 2:21) Enyi mɛɖé huzu ahwanvu Jezu tɔn ɔ, mɛ ɔ nɔ huzu devízɔ́watɔ́ Mawu tɔn lɛ ɖokpo, bo nɔ jla wɛnɖagbe ɔ. Bo na dó xlɛ́ ɖɔ azɔ̌ enɛ nɔ fá kɔ nú mɛ ɖò gbigbɔ lixo ɔ, Jezu ɖɔ: “Mi wá gɔ̌n ce; mi mɛ e agban kpinkpɛn hinhɛn cikɔ na lɛ é bǐ, bonu má na gbɔjɛ mi. Mi yí nǔkplɔnmɛ ce lɛ sè, bonu lindɔ̌n mitɔn lɛ na vo, ɖó mɛfífá wɛ un nyí, bo nyí xomɛnyɔtɔ́.” (Mat. 11:28, 29) Akpá e é dó é jɛnu nú mɛ ɖěɖee yí gbè bo xwedó è lɛ é bǐ.

² Ðó Jezu nyí Devízɔ́watɔ́ Ðaxó Mawu tɔn wutu ɔ, é ylɔ́ mɛɖé lɛ ɖɔ ye ni wá nyí ahwanvu emitɔn lɛ. (Mat. 9:9; Jaan 1:43) É kplɔ́n sinsɛnzɔ́ ɔ ye, bo sɛ́ ye dó bonu ye na wà azɔ̌ e wà wɛ é lɔmɔ̌ ɖè é. (Mat. 10:1–11:1; 20:28; Luk. 4:43) Nukɔnmɛ ɔ, é lɛ́ sɛ́ mɛ 70 ɖevo lɛ dó, bonu ye na ɖ’alɔ ɖò wɛnɖagbe e kúnkplá Axɔ́suɖuto Mawu tɔn é jijla mɛ. (Luki 10:1, nwt; 10:8-11) Ee Jezu sɛ́ ahwanvu enɛ lɛ lɔmɔ̌ dó é ɔ, é ɖɔ nú ye ɖɔ: “Mɛ e ɖótó mi ɔ, nyɛ wɛ é ɖótó; mɛ e ka gbɛ́ mi ɔ, nyɛ wɛ é gbɛ́. Mɛ e ka gbɛ́ mì ɔ, é gbɛ́ mɛ e sɛ́ mì dó ɔ.” (Luk. 10:16) Mɔ̌ mɛ ɔ, Jezu ɖè lee azɔ̌ e è sɔ́ d’así nú ahwanvu lɛ é ɖò taji sɔ́ é xlɛ́. Ye na sɔ́ Jezu kpo Mawu Ajalɔnlɔn ɔ kpo sín afɔ ɖó te! Mɔ̌ ɖokpo ɔ wɛ é na nyí nú mɛ ɖevo ɖěɖee na sɔ ylɔ̌ Jezu tɔn elɔ égbé lɛ é bǐ: “Wǎ, bo xwedó mì.” (Luk. 18:22; 2 Kɔ. 2:17) Mɛ e yí gbè na lɛ é bǐ ɔ, Mawu zɔ́n azɔ̌ ye bɔ ye na jla wɛnɖagbe Axɔ́suɖuto ɔ tɔn, lobo kplɔ́n nǔ mɛ lɛ bonu ye na huzu ahwanvu.—Mat. 24:14; 28:19, 20.

³ Ðó mǐ yí gbè nú ylɔ̌ e Jezu ylɔ́ mǐ bɔ mǐ na xwedó è é wutu ɔ, mǐ “tuùn” Jehovah Mawu kpo Jezu Klisu kpo. (Jaan 17:3) È kplɔ́n ali Jehovah tɔn lɛ mǐ. Kpo alɔdó tɔn kpo ɔ, mǐ kpéwú bo huzu linlin mǐtɔn lɛ, sɔ́ gbɛtɔ́ yɔyɔ̌ ɔ dó, lobo nɔ zán gbɛ̀ sɔgbe xá nǔgbododó Jehovah tɔn lɛ. (Hlɔ. 12:1, 2; Efɛ. 4:22-24; Kolo. 3:9, 10) Lee é sù nukún mǐtɔn mɛ gbɔn é sísɛ́ mǐ bɔ mǐ sɔ́ gbɛzán mǐtɔn jó nú Jehovah, bo ɖè enɛ xlɛ́ gbɔn baptɛm blobló ɖò sin mɛ gblamɛ. Hwenu e mǐ bló baptɛm é ɔ, è ɖè mǐ bɔ mǐ nyí devízɔ́watɔ́ lɛ.

⁴ Mǐ ɖó na nɔ hɛn d’ayi mɛ hwebǐnu ɖɔ sinsɛnzɔ́ e mǐ nɔ wà nú Mawu é ɖó na nyí kpo ayi mímɛ́ ɖé kpo, bɔ mǐ ɖó na lɛ́ nyí xomɛvɔnɔ. (Ðɛh. 24:3, 4; Eza. 52:11; 2 Kɔ. 6:14–7:1) Nǔ e mǐ ɖi nú Jezu Klisu é zɔ́n bɔ mǐ ɖó ayixa mímɛ́ ɖé. (Ebl. 10:19-23, 35, 36; Nǔɖe. 7:9, 10, 14) Mɛsɛ́dó Pɔlu ɖè wě xá Klisanwun lɛ ɖɔ ye ni nɔ wà nǔ bǐ dó sɔ́ Mawu sù, bo ma nyí afɔklɛ́nnú nú mɛ ɖevo lɛ ó. Mɛsɛ́dó Piyɛ́ɛ tɛɖɛ̌ jí ɖɔ é ɖò taji ɖɔ è ni ɖó walɔ ɖagbe, bá dó sixu dɔn nǔmaɖitɔ́ lɛ wá nǔgbo ɔ mɛ. (1 Kɔ. 10:31, 33; 1 Pi. 3:1) Nɛ̌ a ka sixu d’alɔ mɛɖé, bɔ é na jɛxa bá nyí devízɔ́watɔ́ wɛnɖagbe ɔ tɔn, bo gɔ́ nú mǐ gbɔn?

⁵ Enyi a jɛ Biblu kplɔ́n xá mɛ e ɖó jlǒ é ɖé jí tlolo hǔn, dǒ wusyɛn lanmɛ n’i ɖɔ é ni nɔ ɖɔ nǔ e kplɔ́n wɛ é ɖè lɛ é nú mɛ ɖevo lɛ. É sixu ɖɔ xó xá hɛ̌nnumɔ tɔn lɛ, xɔ́ntɔn tɔn lɛ, azɔ̌gbɛ́ tɔn lɛ, kpo mɛ ɖevo lɛ kpo hweɖebǔnu e ali tɔn hun n’i é. Afɔ enɛ ɖò taji bonu mɛ yɔyɔ̌ lɛ na kplɔ́n lee ye na xwedó Jezu Klisu, lobo nyí devízɔ́watɔ́ wɛnɖagbe ɔ tɔn lɛ gbɔn é. (Mat. 9:9; Luk. 6:40) Ee mɛ yɔyɔ̌ ɖé na ɖò susu wɛ ɖò gbigbɔ lixo, bɔ kúnnuɖiɖe e ma nyí aca tɔn ǎ é na bí alɔ n’i d’eji é ɔ, é ɖò wɛn ɖɔ é na jló na ɖ’alɔ ɖò sinsɛnzɔ́ ɔ mɛ.

⁶ Cobonu a na ylɔ́ mɛɖé b’ɛ na jɛ wɛn jla jí sín xwé ɖé gbè jɛ xwé ɖé gbè ɔ, a ɖó na kúdeji hwɛ̌ ɖɔ é ɖó jijɔ e jɛxa é ɖé lɛ. Mɛ e nɔ xwedó mǐ ɖò Mawuxóɖiɖɔzɔ́ ɔ mɛ é ɖé nɔ ɖè éɖée xlɛ́ ɖò agbawungba ɖi Kúnnuɖetɔ́ Jehovah tɔn ɖé. Enɛ wu ɔ, é ɖó na ko nɔ zán gbɛ̀ sɔgbe xá nǔgbododó Jehovah tɔn lɛ, bo hɛn ɔ, é na nyí wɛnjlatɔ́ e ma ko bló baptɛm ǎ é ɖé.

⁷ Hwenu e a nɔ kplɔ́n nǔ xá mɛɖé bo nɔ ɖɔ xó dó nǔgbododó Biblu tɔn lɛ jí xá ɛ é ɔ, a na ko mɔ nǔ jɛ ninɔmɛ tɔn lɛ wu. A sixu ko mɔ ɖɔ é nɔ zán gbɛ̀ sɔgbe xá nǔ e é kplɔ́n lɛ é. Amɔ̌, gbɛzán nǔkplɔntɔ́ ɔ tɔn sín akpáxwé ɖé lɛ tíìn bɔ mɛxo agun tɔn lɛ na ba na ɖɔ xó d’eji xá mi mɛ we lɛ bǐ ɖó kpɔ́.

⁸ Titoblonunutɔ́ kplékplé mɛxo lɛ tɔn tɔn na bló tuto bɔ mɛxo agun tɔn we (mɛ ɖokpo na ɖò wěɖegbɛ́ sinsɛnzɔ́ tɔn mɛ) na ɖɔ xó dó nǔ enɛ lɛ jí xá hwi kpo Biblu kplɔntɔ́ ɔ kpo. Ðò agun ɖěɖee mɛ mɛxo agun tɔn lɛ ma sukpɔ́ ɖè ǎ lɛ é ɔ, mɛxo agun tɔn ɖokpo kpo devízɔ́watɔ́ sinsɛnzɔ́wiwa tɔn e jɛxa é ɖé kpo sixu wà azɔ̌ enɛ. Nɔví sunnu ɖěɖee è sɔ́ lɛ é ɖó na tɛ́n kpɔ́n bo yawǔ ɖeɖɛ xó enɛ. Nǔgbo ɔ, enyi kplé agun tɔn ɖé hwenu wɛ è ɖɔ jlǒ nǔkplɔntɔ́ ɔ tɔn sín xó nú ye ɖè ɔ, ye sixu ɖɔ xó xá hwi kpo é kpo ɖò kplé ɔ gudo. Mɛ bǐ ɖó na vo ɖò xóɖɔɖókpɔ́ ɔ hwenu. Cobonu è na yí gbè ɖɔ nǔkplɔntɔ́ ɔ nyí wɛnjlatɔ́ e ma ko bló baptɛm ǎ é ɖé ɔ, é ɖó na sɔgbe xá nǔ elɔ lɛ:

1. (1) É ɖi nǔ ɖɔ Biblu ɔ nyí Xó e gosin Mawu gɔ́n é.—2 Tim. 3:16.

2. (2) É tuùn nǔkplɔnmɛ dodó Mawuxówema ɔ tɔn lɛ bo ɖi nǔ nú ye, bɔ enyi è kan nǔ byɔ ɛ ɔ, xósin tɔn lɛ na jinjɔn adingban-núkplɔnmɛ sinsɛn tɔn alǒ linlin éɖesunɔ tɔn lɛ jí ǎ, loɔ, é na sɔgbe xá Biblu ɔ.—Mat. 7:21-23; 2 Tim. 2:15.

3. (3) É nɔ xwedó gbeɖiɖe Biblu tɔn e ɖɔ ɖɔ è ni dó gbɛ̌ xá togun Jehovah tɔn ɖò kplé agun tɔn lɛ hwenu é, enyi é kpéwú bo na bló mɔ̌ ɔ nɛ.—Ðɛh. 122:1; Ebl. 10:24, 25.

4. (4) É tuùn nǔ e Biblu kplɔ́n mɛ dó agalilɛ wu é, kaka jɛ afɔdógbě alǒ nyɔnu ɖevo biba, asì gegě dida, kpo sunnu na ɖóxó xá sunnu alǒ nyɔnu na ɖóxó xá nyɔnu kpo jí, bo nɔ zán gbɛ̀ sɔgbe xá nǔkplɔnmɛ enɛ lɛ. Enyi mɛ ɔ ɖò kpɔ́ xá mɛ e kpo é kpo ma ɖó mɛ̌ ɖokpo ɔ ǎ, bo ma ka lɛ́ nyí hɛ̌nnumɔ tɔn ǎ é ɖé ɔ, ye mɛ we lɛ ɖó na wlí alɔ sɔgbe xá sɛ́n.—Mat. 19:9; 1 Kɔ. 6:9, 10; 1 Tim. 3:2, 12; Ebl. 13:4.

5. (5) É nɔ setónú nú gbeɖiɖe Biblu tɔn e gbɛ́ ɖɔ è ni ma nu ahan mú ó é, bo nɔ nyi alɔ nú amasin e ɖó aɖǐ bo nɔ zɔ́n bɔ nǔwiwa mɛtɔn nɔ zɛkpá alǒ taglomɛ mɛtɔn nɔ wlú lɛ é.—2 Kɔ. 7:1; Efɛ. 5:18; 1 Pi. 4:3, 4.

6. (6) É mɔ ɖɔ é xɔ akwɛ tawun ɖɔ è ni nyi alɔ nú gbɛ̌ nyanya lɛ.—1 Kɔ. 15:33.

7. (7) É sɛ́n kancica e é ɖó xá tutoblonunu sinsɛn nǔvú tɔn e mɛ é ɖè é bǐ mlɛ́mlɛ́. É ɖó amǐsa yetɔn yiyi te, bo sɔ́ nɔ ɖó alɔ ɖò nǔwiwa yetɔn lɛ mɛ alǒ nɔ gudo nú ye ɖě ǎ.—2 Kɔ. 6:14-18; Nǔɖe. 18:4.

8. (8) É ɖè ta sín nǔ e kan toxóɖiɖɔ gbɛ̀ ɔ tɔn lɛ é bǐ mɛ.—Jaan 6:15; 15:19; Ja. 1:27.

9. (9) É ɖi nǔ nú nǔ e Ezayíi 2:4 ɖɔ dó hunnyahunnya akɔta lɛ tɔn wu é, lobo nɔ zán gbɛ̀ sɔgbe xá.

10. (10) É jló nǔgbo nǔgbo bo na nyí ɖokpo ɖò Kúnnuɖetɔ́ Jehovah tɔn lɛ mɛ.—Ðɛh. 110:3, nwt.

⁹ Enyi linlin e nǔkplɔntɔ́ ɔ ɖó dó nǔ enɛ lɛ wu é ma zawě nú mɛxo agun tɔn lɛ ǎ ɔ, ye ɖó na kanbyɔ ɛ, vlafo bo na zán wemafɔ ɖěɖee è slɛ́ lɛ é ɖò xóɖɔɖókpɔ́ ɔ hwenu. É ɖò taji ɖɔ é ni mɔ nukúnnú jɛ mɛ ɖɔ mɛ ɖěɖee nɔ ɖ’alɔ ɖò Mawuxóɖiɖɔzɔ́ ɔ mɛ xá Kúnnuɖetɔ́ Jehovah tɔn lɛ é ɖó na nɔ zán gbɛ̀ sɔgbe xá nǔ enɛ lɛ e Mawuxówema ɔ byɔ lɛ é. Nǔ e é ɖɔ lɛ é na d’alɔ mɛxo agun tɔn lɛ bɔ ye na kpɔ́n ɖɔ é ka tuùn nǔ e ɖó nukún wɛ è ɖè ɖò así tɔn é, bo ka lɛ́ jɛxa ɖó bǎ e sɔgbe é ɖé mɛ bo na jɛ alɔ ɖó ɖò Mawuxóɖiɖɔzɔ́ ɔ mɛ jí à jí.

¹⁰ Enyi nǔkplɔntɔ́ ɔ jɛxa alǒ gbɔ ɔ, mɛxo agun tɔn lɛ ɖó na yawǔ ɖɔ n’i. Ðò ninɔmɛ gegě mɛ ɔ, enɛ nɔ nyɔ́ bló ɖò xóɖɔɖókpɔ́ ɔ gudo. Enyi é jɛxa ɔ, mɛxo agun tɔn lɛ na dó doo n’i kpo akpakpa sɔ́ mɛ kpo ɖɔ é nyí wɛnjlatɔ́. (Hlɔ. 15:7) Mɛxo agun tɔn lɛ ɖó na dó wusyɛn lanmɛ n’i ɖɔ é ni yawǔ jɛ alɔ ɖó ɖò Mawuxóɖiɖɔzɔ́ ɔ mɛ jí, lee é nyɔ́ bló gbɔn é, lobo na ganmɛ tɔn ɖò sun fifó. Mɛxo agun tɔn lɛ sixu tinmɛ n’i ɖɔ enyi Biblu kplɔntɔ́ ɖé jɛxa bo huzu wɛnjlatɔ́ e ma ko bló baptɛm ǎ é, lobo na ganmɛ azɔn nukɔntɔn ɔ ɔ, è nɔ sɔnǔ nú káti wɛnjlatɔ́ tɔn ɖokpo n’i, bo nɔ sɔ́ ɖó agun ɔ sín wema lɛ mɛ. Mɛxo agun tɔn lɛ nɔ xò nǔ mɛɖesunɔ tɔn wɛnjlatɔ́ ɔ tɔn enɛ lɛ kplé, bonu tutoblonunu ɔ na dó sixu kpé nukún dó sinsɛn sín azɔ̌ Kúnnuɖetɔ́ Jehovah tɔn lɛ tɔn lɛ wu, gbɔn gbɛ̀ ɔ bǐ mɛ. Ye nɔ lɛ́ wà mɔ̌ bonu wɛnjlatɔ́ ɔ na dó sixu ɖ’alɔ ɖò gbigbɔ sín nǔ lɛ mɛ, bɔ è na lɛ́ nɔ gudo n’i ɖò gbigbɔ lixo. Gɔ́ na ɔ, mɛxo agun tɔn lɛ sixu flín wɛnjlatɔ́ yɔyɔ̌ lɛ ɖɔ è nɔ zán nǔ mɛɖesunɔ tɔn yetɔn lɛ sɔgbe xá Sɛ́n E Kúnnuɖetɔ́ Jehovah Tɔn lɛ Nɔ Xwedó Gbɔn Gbɛ̀ ɔ Bǐ Mɛ Dó Alɔcyɔncyɔn Nǔ lɛ Jí Wu lɛ É, ee ɖò jw.org jí é.

¹¹ Tintɛnkpɔn bo má dó wɛnjlatɔ́ yɔyɔ̌ ɔ ganji kpo xlɛ́xlɛ́ ɖɔ nukɔnyiyi tɔn mya nukún nú mǐ kpo sixu d’alɔ ɛ tawun. É sixu sísɛ́ ɛ bɔ é na nɔ na ganmɛ tɔn ɖò gbesisɔmɛ, lobo tlɛ lɛ́ dó gǎn bo sɛn Jehovah ganji.—Fili. 2:4; Ebl. 13:2.

¹² Enyi mɛxo agun tɔn lɛ wá gbeta ɔ kɔn ɖɔ Biblu kplɔntɔ́ ɔ jɛxa bo na jɛ alɔ ɖó ɖò Mawuxóɖiɖɔzɔ́ ɔ mɛ jí ɔ, é sɔgbe bɔ è na sɔ́ wema Tutoblonunu Ee Nɔ Wà Jlǒ Jehovah Tɔn É ɖokpo n’i. Enyi é na ganmɛ tɔn azɔn nukɔntɔn ɔ gudo ɔ, è na ɖɔ ɖò ɖɔnúese ɖé mɛ nú agun ɔ ɖɔ é huzu wɛnjlatɔ́ e ma ko bló baptɛm ǎ é ɖé.

¹³ Yɔkpɔvu lɛ lɔ sixu jɛxa bo huzu wɛnjlatɔ́. Jezu yí yɔkpɔvu lɛ lobo xoɖɛ nú ye. (Mat. 19:13-15; 21:15, 16) Nǔgbo wɛ ɖɔ mɛjitɔ́ lɛ wɛ nyí mɛ nukɔntɔn e ɖó na kpé nukún dó vǐ yeɖesunɔ tɔn lɛ wu é, amɔ̌, mɛ ɖevo lɛ ɖò agun ɔ mɛ sixu jló na d’alɔ mɛ winnyawinnya ɖěɖee ɖó jlǒ kpo ayi bǐ kpo, bo na ɖ’alɔ ɖò Axɔ́suɖuto ɔ jijla sín azɔ̌ mɛ lɛ é. Enyi mɛjitɔ́ ɖé wɛ nú we ɔ, kpɔ́ndéwú ɖagbe e a nɔ zé ɖ’ayǐ ɖò Mawuxóɖiɖɔzɔ́ ɔ mɛ é na d’alɔ vǐ towe lɛ tawun, bɔ ye na ɖókan dó sinsɛnzɔ́ yetɔn nú Mawu wu. Enyi vǐ e ɖó walɔ ɖagbe é ɖé nɔ sɔ́ jlǒ dó tinmɛ nǔ e é ɖi nǔ na lɛ é nú mɛ ɖevo lɛ ɔ, alɔ ɖevo tɛ è ka sixu dó è?

¹⁴ É na sɔgbe ɖɔ mɛjitɔ́ lɛ ni sɛkpɔ́ mɛxo agun tɔn e ɖò Wěɖegbɛ́ Sinsɛnzɔ́ tɔn mɛ lɛ é ɖokpo bo ɖɔ xó xá ɛ bonu ye ni kpɔ́n ɖɔ vǐ ɔ ka jɛxa bá huzu wɛnjlatɔ́ à jí. Titoblonunutɔ́ kplékplé mɛxo lɛ tɔn tɔn na bló tuto bɔ mɛxo agun tɔn we (mɛ ɖokpo na gosin wěɖegbɛ́ sinsɛnzɔ́ tɔn mɛ) na kplé xá vǐ ɔ kpo mɛjitɔ́ tɔn Kúnnuɖetɔ́ lɛ alǒ mɛ e gɔ́n é ɖè é kpo. Enyi vǐ ɔ mɔ nukúnnú jɛ nǔgbo Biblu tɔn nukɔn nukɔntɔn lɛ mɛ, bo lɛ́ xlɛ́ ɖɔ emi jló na ɖ’alɔ ɖò sinsɛnzɔ́ ɔ mɛ ɔ, enɛ xlɛ́ ɖɔ é ɖò nukɔn yì wɛ. Enyi ye ko gbéjé nǔ enɛ lɛ kpo ɖevo ɖěɖee è nɔ kpɔ́n nú mɛxo lɛ é kpo kpɔ́n gudo ɔ, mɛxo agun tɔn we lɛ sixu wá gbeta ɔ kɔn ɖɔ vǐ ɔ sixu nyí wɛnjlatɔ́ e ma ko bló baptɛm ǎ é ɖé. (Luk. 6:45; Hlɔ. 10:10) Hwenu e ye kplé xá yɔkpɔvu ɖé é ɔ, é byɔ ɖɔ ye ni ɖɔ xó dó nǔ e jí è nɔ ɖɔ xó dó xá mɛxo lɛ hwɛhwɛ, b’ɛ ma ka kan yɔkpɔvu ɖé ǎ lɛ é jí ǎ.

¹⁵ Ðò xóɖɔɖókpɔ́ ɔ hwenu ɔ, mɛxo agun tɔn lɛ ɖó na kpa vǐ ɔ ɖó nukɔnyiyi tɔn wutu, lobo dó wusyɛn lanmɛ n’i ɖɔ é ni nya baptɛm gbé. Ðó mɛjitɔ́ lɛ w’azɔ̌ syɛnsyɛn bo kplɔ́n nǔgbo ɔ vǐ yetɔn wutu ɔ, é jɛxa ɖɔ è ni kpa ye lɔmɔ̌. Bo na dó d’alɔ mɛjitɔ́ lɛ bonu ye na nɔ gudo nú vǐ yetɔn lɛ d’eji ɔ, mɛxo agun tɔn lɛ ɖó na nyi ye sɛ́dó xóta “Wɛn ɖé nú Mɛjitɔ́ Klisanwun Lɛ” mɛ; é ɖò wexwɛ 179-181 jí.

¹⁶ Enyi a wá tuùn Jehovah, bo yí wǎn n’i, bɔ dìn ɔ a ɖò nǔ e Mawu byɔ lɛ é wà wɛ, lobo nɔ lɛ́ ɖ’alɔ ɖò Mawuxóɖiɖɔzɔ́ ɔ mɛ ɔ, a ɖó na hɛn kancica hwi kpo é kpo tɔn syɛn d’eji. Gbɔn nɛ̌ é? A na zé gbɛzán towe jó n’i, lobo bló baptɛm ɖò sin mɛ dó xlɛ́ mɔ̌.—Mat. 28:19, 20.

¹⁷ Tinmɛ mɛɖée zízé jó tɔn wɛ nyí ɖɔ è ni zé mɛɖée jó nú sinsɛnzɔ́ Mawu tɔn. Bo na dó zé hwiɖée jó nú Mawu ɔ, a ɖó na xoɖɛ sɛ́dó è, bo d’akpá dó nǔjɔnǔ mɛ ɖɔ a na zán gbɛzán towe ɖò sinsɛnzɔ́ tɔn mɛ, lobo ɖi zɔnlin gbɔn ali tɔn lɛ jí. Tinmɛ tɔn wɛ nyí ɖɔ è ni zé mɛɖée bǐ jó n’i kaka sɔyi. (Sɛ́n. 5:9) Xó mɛɖesunɔ tɔn ɖé wɛ. Mɛɖebǔ sixu bló ɖó tɛn towe mɛ ǎ.

¹⁸ É ɖò mɔ̌ có, enyi nǔglɔ kɛɖɛ wɛ a na ɖɔ nú Jehovah ɖè ɖɔ emi jló na nyí étɔn ǎ. A ɖó na xlɛ́ mɛ ɖevo lɛ ɖɔ emi ko zé emiɖée jó nú Mawu. A na ɖè enɛ xlɛ́ gbɔn baptɛm biblo ɖò sin mɛ gblamɛ, lee Jezu bló gbɔn é. (1 Pi. 2:21; 3:21) Enyi a ko wá gbeta ɔ kɔn ɖò ayi towe mɛ bo na sɛn Jehovah, lobo jló na bló baptɛm ɔ, etɛ a ka ɖó na wà? A ɖó na ɖɔ nú titoblonunutɔ́ kplékplé mɛxo lɛ tɔn tɔn. É na bló tuto bɔ mɛxo agun tɔn ɖé lɛ na ɖɔ xó xá we, bɔ ye na kpɔ́n ɖɔ a ka jɛxa nǔ ɖěɖee Mawu byɔ ɖò mɛ e na bló baptɛm lɛ é sí é à jí. Nú a na mɔ tinmɛ ɖevo lɛ hǔn, kpɔ́n “Wɛn ɖé nú Wɛnjlatɔ́ E Ma Ko Bló Baptɛm Ǎ É,” ee ɖò wexwɛ 182-184 jí ɖò wema elɔ mɛ é, kpo “Nǔkanbyɔ lɛ nú Mɛ E Jló Na Bló Baptɛm lɛ É” kpo ɖò wexwɛ 185-207 jí.

¹⁹ Ðò xwè lɛ vlamɛ ɔ, lee sinsɛn-biblo mímɛ́ ɔ ɖò ada gbló wɛ gbɔn gbɛ̀ ɔ bǐ mɛ gbɔn é sín gbeɖiɖó nɔ dó wusyɛn lanmɛ nú togun Jehovah tɔn. Sín hwenu e Jezu Klisu ɖɔ nú ahwanvu tɔn lɛ azɔn nukɔntɔn ɔ ɖɔ è na jla wɛnɖagbe ɔ gbɔn ayikúngban ɔ bǐ jí é ɔ, nǔ e nɔ ɖu ayi mɛ nú Klisanwun nǔgbo lɛ tawun é wɛ nyí lee ye na wà azɔ̌ enɛ yì ta gbɔn é.—Mat. 28:19, 20; Mak. 13:10; Mɛ. 1:8.

²⁰ É nɔ víví nú ahwanvu Jezu tɔn nukɔntɔn lɛ ɖɔ ye ni sè gbeɖiɖó lɛ dó nukɔnyiyi wɛnɖagbejijlazɔ́ ɔ tɔn wu. (Mak. 6:30) Wema Biblu tɔn e nyí Mɛsɛ́dó é ɖɔ nú mǐ ɖɔ ahwanvu 120 mɔ̌ jí wɛ gbigbɔ mímɛ́ jɛte dó ɖò Pantekotu 33 H.M. tɔn. Enɛ gudo zaan ɔ, kɛ́n ahwanvu lɛ tɔn jɛji bo yì 3 000 mɔ̌, bɔ enɛ gudo ɔ, é yì 5 000 mɔ̌. È ɖó gbè ɖɔ “ayihɔngbe ayihɔngbe ɔ, Aklunɔ . . . nɔ dɔn mɛ e é hwlɛngán lɛ wá gɔ́ nú ye,” bɔ “vɔsanúxwlémawutɔ́ wɔbuwɔbu ɖé lɛ jɛ nǔ ɖi nú Jezu jí ɖò Jwifu lɛ mɛ.” (Mɛ. 1:15; 2:5-11, 41, 47; 4:4; 6:7) Kpɔ́n lee nukɔnyiyi sín gbeɖiɖó enɛ lɛ na ko dó wusyɛn lanmɛ nú ahwanvu lɛ sɔ́ é! Sinsɛngán Jwifu lɛ tɔn lɛ ɖò ya dó nú ye wɛ syɛnsyɛn có, gbeɖiɖó enɛ lɛ e sɔ́ akpakpa mɛ é sísɛ́ ye bɔ ye yì nukɔn, bo wà azɔ̌ e Mawu sɔ́ d’así nú ye é.

²¹ Ðò xwè 60-61 H.M. tɔn mɔ̌ ɔ, Pɔlu wlan dó wema e é sɛ́dó Kolosinu lɛ é mɛ ɖɔ wɛnɖagbe ɔ “ɖò gbigbakpé wɛ, bo ɖò azɔ̌ wà ɖò [Klisanwun] lɛ sín gbɛzán mɛ wɛ gbɔn gbɛ̀ ɔ bǐ mɛ,” bɔ “è dó nǔ e Mawu bló ɖò gbɛ̀ ɔ mɛ lɛ é.” (Kolo. 1:5, 6, 23) Klisanwun nukɔntɔn lɛ setónú nú Xó Mawu tɔn ɔ, bɔ gbigbɔ mímɛ́ na hlɔnhlɔn ye bɔ ye wà wɛnɖagbejijla sín azɔ̌ ɖaxó ɖé, hwɛ̌ cobɔ è sú kún dó nú gbɛ̀ Jwifu lɛ tɔn ɖò xwè 70 H.M. tɔn. Kpɔ́n lee azɔ̌ e wà wɛ ye ɖè é sín gbeɖiɖó sise na ko dó wusyɛn lanmɛ nú Klisanwun gbejinɔtɔ́ enɛ lɛ sɔ́ é!

²² Mɔ̌ ɖokpo ɔ, tutoblonunu Jehovah tɔn égbé tɔn ɔ nɔ tɛ́n kpɔ́n bo nɔ sɔ́ kɛ́n azɔ̌ e wà wɛ è ɖè bonu Matie 24:14 na dó jɛnu lɛ é tɔn, é ɖɔ: “È na jla axɔ́suɖuɖu Mawu tɔn sín Wɛnɖagbe gbɔn gbɛ̀ ɔ bǐ mɛ, bonu é na nyí kúnnuɖiɖe nú gbɛtɔ́ lɛ bǐ. Enɛ ɔ gudo ɔ, gbɛ̀ ɔ na vɔ.” Ðó mǐ nyí Mawu sɛntɔ́ e zé mǐɖée jó é wutu ɔ, mǐ ɖó azɔ̌ mya nukún ɖé bo na wà. Mǐɖesunɔ ɖó na ɖ’alɔ ɖò sinsɛnzɔ́ ɔ mɛ bǐ mlɛ́mlɛ́ cobɔ vivɔnu ɔ na wá. Jehovah na bló bɔ è na wà azɔ̌ enɛ, bɔ enyi mǐ ɖ’alɔ ɖ’emɛ ɔ, nǔ mǐtɔn na nyɔ́ Jehovah nukúnmɛ.—Ezek. 3:18-21.

²³ Etɛ lɛ sín gbè mǐ ka na ɖó tawun? Ganmɛ-wema e tutoblonunu ɔ sɔnǔ na é nɔ ɖɔ nǔ ɖěɖee sín gbè mǐ na ɖó lɛ é. Amɔ̌, tinmɛ elɔ lɛ e bɔ d’ewu é sixu d’alɔ mɛ.

²⁴ Ðò akpáxwé e è wlan “Publications laissées (imprimées ou électroniques)” dó é mɛ ɔ, wlǎn wema nabi e a sɔ́ nú mɛ e ma ko nyí Kúnnuɖetɔ́ e bló baptɛm ǎ lɛ é: é sixu nyí ee è zín é alǒ Ɛntɛnɛti jí tɔn. Ðò akpáxwé “Vidéos montrées” mɛ ɔ, wlǎn azɔn nabi e a kpéwú bo xlɛ́ video mǐtɔn lɛ ɖokpo mɛ é.

²⁵ Ðò akpáxwé e è wlan “Nouvelles visites” dó é mɛ ɔ, wlǎn azɔn nabi e a yì ba mɛ e ma ko zé éɖée jó, bo bló baptɛm lobo nyí Kúnnuɖetɔ́ ǎ é ɖé kpɔ́n, bá mɔ tɛn dó flɔ́ zo dó glɔ̌ nú jlǒ e é ɖó é é. È sixu xà mɛbakpɔ́n, hwenu e è yì mɔ mɛɖé ɖò xwégbe é, hwenu e è wlan wema sɛ́dó mɛ ɔ, ylɔ́ ɛ ɖò alokan jí, wlan nǔ sɛ́dó è gbɔn alokan alǒ Ɛntɛnɛti jí, alǒ hwenu e è hɛn wema ɖé lɛ yì jó n’i é. Hweɖebǔnu e è kplɔ́n Biblu xá mɛɖé é ɔ, è sixu xà mɛbakpɔ́n ɖokpo. Mɛjitɔ́ ɖé sixu xà mɛbakpɔ́n ɖokpo ɖò aklunɔzán gbla ɖokpo ɖokpo mɛ, enyi é kpé nukún dó sinsɛn-biblo xwédo tɔn wu, bɔ vǐ e ma ko bló baptɛm ǎ é ɖé ɖò finɛ ɔ nɛ.

²⁶ Enyi è na bo nɔ kpé nukún dó Biblu kplɔnkplɔn ɖé wu ɖò aklunɔzán gbla lɛ bǐ mɛ ɔ, Biblu kplɔnkplɔn ɖokpo sín kɛ́n jɛn è na nɔ sɔ́ ɖò sun ɖokpo ɖokpo mɛ. Wɛnjlatɔ́ lɛ ɖó na wlan Biblu kplɔnkplɔn vovo nabi e wu ye nɔ kpé nukún dó ɖò sun ɖokpo mɛ lɛ é sín kɛ́n. Biblu kplɔnkplɔn ɖěɖee sín kɛ́n è na nɔ sɔ́ lɛ é wɛ nyí ee è kplɔ́n xá mɛ ɖěɖee ma ko zé yeɖée jó bo bló baptɛm bo nyí Kúnnuɖetɔ́ ǎ lɛ é. A sixu lɛ́ sɔ́ kɛ́n Biblu kplɔnkplɔn ɖokpo tɔn, hwenu e a kplɔ́n Biblu xá nɔví sunnu alǒ nɔví nyɔnu e awakanmɛ ko kú, bɔ wěɖegbɛ́ sinsɛnzɔ́ tɔn dó gesí nú we, alǒ mɛ e bló baptɛm yɔyɔ̌ bo ma ka ko fó wema Etɛ Biblu ka Sixu Kplɔ́n Mǐ? kpo Lee A Na Hɛn Hwiɖée Ðò Wanyiyi Mawu Tɔn Mɛ Gbɔn É kpo ǎ é ɖé é.

²⁷ É ɖò taji ɖɔ è ni ɖó gbè “Ganmɛ [Heures]” nabi e è w’azɔ̌ na é tɔn pɛ́ɛ. È na ɖɔ ɔ, táan nabi e è zán dó ɖ’alɔ ɖò sinsɛnzɔ́ xwé ɖé gbè jɛ xwé ɖé gbè tɔn mɛ, dó bló mɛbakpɔ́n lɛ, dó kplɔ́n Biblu xá mɛ, alǒ dó ɖekúnnu e nyí aca tɔn é, kabǐ ee ma nyí aca tɔn ǎ é nú mɛ ɖěɖee ma ko zé yeɖée jó bo bló baptɛm bo nyí Kúnnuɖetɔ́ ǎ lɛ é wɛ è na xà. Enyi wɛnjlatɔ́ we ɖò azɔ̌ wà ɖó kpɔ́ wɛ ɔ, ye mɛ we lɛ bǐ sixu sɔ́ kɛ́n ganmɛ e ye zán é tɔn, amɔ̌, mɛ ɖokpo wɛ na xà mɛbakpɔ́n e ye bló lɛ é kpo Biblu kplɔnkplɔn e wu ye kpé nukún dó lɛ é kpo. Mɛjitɔ́ we ɖěɖee kplɔ́n nǔ vǐ yetɔn lɛ ɖò Sinsɛn-Biblo xwédo tɔn hwenu lɛ é sixu sɔ́ kɛ́n ganxixo ɖokpo tɔn ɖò aklunɔzán gbla ɖokpo ɖokpo mɛ. Nɔví sunnu lɛ sixu sɔ́ kɛ́n ganxixo nabi e ye zán dó xwlé xóɖiɖɔ nú mɛ bǐ mɛ é tɔn. Mɛ e lilɛ xóɖiɖɔ nú mɛ bǐ ɖé dó gbè ɖevo mɛ é lɔ sixu xà ganmɛ tɔn. Nǔ taji ɖé lɛ tíìn bɔ è na nɔ sɔ́ ganmɛ yetɔn sín kɛ́n ǎ, ɖi nǔsisɔ nú kplé kúnnuɖegbé tɔn, kplé kúnnuɖegbé tɔn tɛnmɛ yiyi, zɔnlin ɖiɖi yì dɔ̌n kpo kɔlilɛ kpo, gɔ́ nú nǔ mɔhun ɖevo lɛ.

²⁸ Wɛnjlatɔ́ ɖokpo ɖokpo ɖó na xwedó ayixa tɔn e Biblu kplɔ́n é bo xoɖɛ, hwenu e é ɖò ganmɛ nabi e é dó ɖekúnnu na lɛ é sín kɛ́n sɔ́ wɛ é. Wɛnjlatɔ́ ɖé lɛ nɔ ɖekúnnu ɖò ayǐ ɖěɖee jí gbɛtɔ́ sukpɔ́ ɖè tawun lɛ é, bɔ mɛ ɖevo lɛ ka nɔ w’azɔ̌ ɖò fí ɖěɖee gbɛtɔ́ ma sukpɔ́ ɖè ǎ, b’ɛ byɔ ɖɔ è ni zɔn ali gaga lɛ é. Fí vovo lɛ wɛ mǐ nɔ ɖekúnnu ɖè; linlin vovo wɛ wɛnjlatɔ́ lɛ nɔ ɖó dó sinsɛnzɔ́ yetɔn wu. Hagbɛ̌ Alixlɛ́mɛtɔ́ ɔ nɔ hɛn agun e gbɔn gbɛ̀ ɔ bǐ mɛ lɛ é gannugánnú ɖɔ lě wɛ ye na nɔ xà ganmɛ e ye zán ɖò sinsɛnzɔ́ ɔ mɛ lɛ é gbɔn ǎ, mɔ̌ jɛn è ma ka lɛ́ sɔ́ mɛɖebǔ b’ɛ na dá hwɛ nú mɛ ɖò ali enɛ nu ǎ é nɛ.—Mat. 6:1; 7:1; 1 Tim. 1:5.

²⁹ Táan e è zán ɖò sinsɛnzɔ́ ɔ mɛ bo ɖó gbè tɔn é ɖó na nyí ganxixo agboɖe ǎ. Enyi ɖɔ wɛnjlatɔ́ ɖé ma kpé nǔ wu ǎ ɖó é ko nyí mɛxo tawun, é ɖò azɔn syɛnsyɛn jɛ wɛ, è glɔ́n ɛ ɖó xwé e gbè è nɔ kpé nukún dó mɛ wu ɖè é ɖé, alǒ é sín nǔ ɖevo wu bɔ é ma sɔ́ ɖó gǎn ǎ ɔ, éyɛ sixu na ganmɛ agboɖe. Wɛnjlatɔ́ mɔhun ɖé sixu ɖó gbè cɛju 15, 30, alǒ 45 tɔn, b’ɛ na nyí ganxixo ɖokpo blebu ǎ. Enyi é na bo tlɛ zán cɛju 15 dó ɖekúnnu ɖò sun ɖé mɛ ɔ, é ɖó na ɖó ganmɛ enɛ sín gbè. È na xà ɛ dó wɛnjlatɔ́ Axɔ́suɖuto ɔ tɔn e w’azɔ̌ ɖò gbesisɔmɛ lɛ é mɛ. È lɛ́ yí gbè nú tuto enɛ nú wɛnjlatɔ́ e azɔ̌ tɔn ɖó dogbó nú táan klewun ɖé é, vlafo ɖó é jɛ azɔn syɛnsyɛn ɖé alǒ gblewǔ, bo sixu yì fí ɖé ǎ kaka nú sun ɖokpo abǐ hú mɔ̌ wutu. Amɔ̌, mɛ ɖěɖee nǔwiwa yetɔn ɖó dogbó tawun lɛ é kɛɖɛ wɛ tuto enɛ kan. Wěɖegbɛ́ sinsɛnzɔ́ tɔn wɛ na kpɔ́n ɖɔ wɛnjlatɔ́ ɖé ka jɛxa tuto enɛ à jí.

³⁰ È nɔ wlan azɔ̌ e a nɔ wà ɖò sinsɛnzɔ́ ɔ mɛ ɖò sun ɖokpo ɖokpo mɛ é dó káti wɛnjlatɔ́ tɔn ɖé jí. Agun ɔ tɔn wɛ nyí káti enɛ lɛ. Enyi a jló na sɛ̀ tɛn yì agun ɖevo mɛ hǔn, tɛ́n kpɔ́n bo tinmɛ nú mɛxo agun tɔn towe lɛ. Wěgbojinɔtɔ́ ɔ na sɛ́ káti towe dó agun yɔyɔ̌ ɔ. Enɛ na zɔ́n bɔ mɛxo agun tɔn lɛ na ɖò gbesisɔmɛ bo na yí we, lobo nɔ gudo nú we ɖò gbigbɔ lixo. Enyi a sɛ̀ tɛn sín agun towe mɛ, bo ma ka na bló sun atɔn cobo lɛ́ lɛkɔ wá ǎ hǔn, kɛnklɛn bo kpó ɖò wɛnɖagbejijla sín gbeɖiɖó towe sɛ́dó agun towe mɛ wɛ.

³¹ A ka nɔ wɔn hweɖelɛnu bo nɔ gɔn wɛnɖagbejijla towe sín gbè ɖó wɛ à? É ɖò wɛn ɖɔ mǐ bǐ wɛ è ɖó na nɔ flín nǔ ɖò hweɖelɛnu. Amɔ̌, enyi mǐ tɛ́n kpɔ́n bo ɖó linlin e sɔgbe é dó wɛnɖagbejijla sín gbeɖiɖó wu, lobo lɛ́ mɔ nukúnnú jɛ nǔ e wu mɔ̌ biblo ɖò taji é mɛ ɔ, é sixu bɔwǔ nú mǐ bɔ mǐ na nɔ flín bo na nɔ ɖó gbè nǔ e mǐ wà ɖò sinsɛnzɔ́ ɔ mɛ é tɔn.

³² Mɛɖé lɛ kanbyɔ ɖɔ: “Ðó Jehovah tuùn nǔ e wà wɛ un ɖè ɖò sinsɛnzɔ́ tɔn mɛ é wutu ɔ, etɛwu un ka ɖó na lɛ́ ɖó gbè tɔn nú agun ɔ?” Nǔgbo wɛ ɖɔ Jehovah tuùn nǔ e wà wɛ mǐ ɖè é, bɔ enyi mǐ ɖò sinsɛnzɔ́ mǐtɔn wà kpo ayi bǐ kpo wɛ, alǒ mǐɖewuzɔ́ wà wɛ mǐ ɖè ɔ, é lɛ́ tuùn. É ɖò mɔ̌ có, flín ɖɔ Jehovah sɔ́ kɛ́n azǎn nabi e Nɔwée nɔ tɔjihun ɖaxó ɔ mɛ na é, kpo xwè nabi e Izlayɛli-ví lɛ ɖi zɔnlin gbɔn gbetótló mɛ xɔ é kpo tɔn. Mawu bló bɔ è wlan tan mɛ ɖěɖee nɔ gbeji n’i lɛ é kpo mɛ ɖěɖee tlitó n’i lɛ é kpo tɔn. É bló bɔ è wlan ɖuɖeji ɖebɔdoɖewu e togun tɔn ɖó ɖò Kanáa yikúngban jí é, kpo nǔ ɖěɖee hwɛɖɔtɔ́ gbejinɔtɔ́ Izlayɛli tɔn lɛ wà lɛ é kpo. Nǔgbo ɔ, é bló bɔ è wlan nǔ e mɛsɛntɔ́ tɔn lɛ wà lɛ é sín gǒflɛ́mɛ gegě. É sɔ́ d’ayi mɛ nú mɛ lɛ bɔ ye wlan nǔ e jɛ lɛ é, bo dó xlɛ́ mǐ linlin e é ɖó dó gbeɖiɖó e sɔgbe lɛ é wu é céɖécéɖé.

³³ Nǔ e jɛ ɖò hwenuxó mɛ, bɔ è wlan dó Biblu mɛ lɛ é xlɛ́ ɖɔ gbeɖiɖó kpo tan kpo ɖěɖee mɛ Jehovah tɔn lɛ wlan lɛ é sɔgbe. Ðò ninɔmɛ gegě mɛ ɔ, enyi è ma ko wlan kɛ́n tawun tawun lɛ dó tan Biblu tɔn enɛ lɛ mɛ ǎ wɛ ɔ, è sixu gɔn lee ye ɖò taji sɔ́ é tuùn. Gbějé kpɔ́ndéwú elɔ lɛ kpɔ́n: Bǐbɛ̌mɛ 46:27; Tíntɔ́n 12:37; Hwɛɖɔtɔ́ lɛ 7:7; 2 Axɔ́su lɛ 19:35; 2 Tan 14:8-12; Jaan 6:10; 21:11; Mɛsɛ́dó 2:41; 19:19.

³⁴ Nǔgbo wɛ ɖɔ é kún nyí nǔ e mǐ nɔ wà ɖò Jehovah sinsɛn mɛ lɛ é bǐ sín gbè wɛ mǐ nɔ ɖó ó, amɔ̌, gbeɖiɖó enɛ lɛ ɖò taji ɖò tutoblonunu Jehovah tɔn mɛ. Ðò xwè kanweko nukɔntɔn ɔ mɛ, hwenu e mɛsɛ́dó lɛ lɛkɔ sín wɛnɖagbe jla gbé é ɔ, ye “ɖó nǔ e ye wà lɛ é bǐ kpodo nǔ e ye kplɔ́n mɛ lɛ bǐ kpo sín gbè” nú Jezu. (Mak. 6:30) Hweɖelɛnu ɔ, gbeɖiɖó lɛ sixu xlɛ́ ɖɔ è ɖó na ɖó ayi sinsɛnzɔ́ mǐtɔn sín akpáxwé ɖé lɛ wu tawun. Kɛ́n lɛ sixu xlɛ́ ɖɔ è ɖó nukɔnyiyi ɖò akpáxwé ɖé lɛ, amɔ̌ ɖò akpá ɖevo lɛ xwé ɔ, é sixu nyí kɛ́n wɛnjlatɔ́ lɛ tɔn wɛ ɖekpo. É sixu nyí ɖɔ è ɖó hudo wusyɛn dó lanmɛ nú mɛ tɔn, alǒ ɖɔ tagba ɖé lɛ tíìn bɔ è ɖó na ɖeɖɛ. Nukúnkpénuwutɔ́ lɛ na gbéjé gbeɖiɖó lɛ kpɔ́n, bo na dó gǎn bo vɔ́ ninɔmɛ ɖebǔ e na wà nǔ dó nukɔnyiyi mɛɖé tɔn alǒ agun ɔ bǐ tɔn wu é jlaɖó.

³⁵ Gbeɖiɖó lɛ nɔ lɛ́ d’alɔ tutoblonunu ɔ bonu é na mɔ tɛn dó tuùn fí e è ɖó hudo azɔ̌watɔ́ tɔn ɖè hugǎn é. Xá ɖětɛ lɛ mɛ nukɔnyiyi ka sukpɔ́ ɖè hugǎn? Fitɛ lɛ nukɔnyiyi ma ka sukpɔ́ ɖè ǎ? Wema tɛ lɛ sín hudo è ka ɖó bo na d’alɔ mɛ lɛ bonu ye na kplɔ́n nǔgbo ɔ? Gbeɖiɖó lɛ nɔ d’alɔ tutoblonunu ɔ bɔ é nɔ tuùn wema e sín hudo è na ɖó ɖò wɛnɖagbejijlazɔ́ ɔ mɛ ɖò akpáxwé gbɛ̀ ɔ tɔn vovo lɛ é, bɔ enɛ gudo ɔ, é nɔ sú hudo enɛ lɛ sín dò.

³⁶ Gbeɖiɖó mɔhun lɛ nɔ dó wusyɛn lanmɛ nú mɛ. Enyi mǐ sè azɔ̌ e wà wɛ nɔví mǐtɔn lɛ ɖè, bo nɔ jla wɛnɖagbe ɔ gbɔn gbɛ̀ ɔ bǐ mɛ é sín gbeɖiɖó ɔ, xomɛ nɔ hun mǐ à cé? Nukɔnyiyi lɛ sín gbeɖiɖó nɔ d’alɔ mǐ bɔ mǐ nɔ mɔ lee tutoblonunu Jehovah tɔn ɖò ada gbló wɛ sɔ́ é. Nǔ e ko jɛ kpɔ́n lɛ é nɔ dó wusyɛn lanmɛ nú mǐ, bo nɔ bló bɔ mǐ nɔ ɖókan dó nǔ wu, lobo nɔ ɖ’alɔ ɖò wɛnɖagbejijlazɔ́ ɔ mɛ bǐ mlɛ́mlɛ́. (Mɛ. 15:3) Wɛnɖagbejijla mǐtɔn sín gbeɖiɖó ɖò taji, bo nɔ lɛ́ xlɛ́ ɖɔ nɔví e ɖò fí vovo ɖò gbɛ̀ ɔ mɛ lɛ é sín nǔ nɔ ɖu ayi mɛ nú mǐ. Gbɔn nǔ klewun enɛ wiwa gblamɛ ɔ, mǐ nɔ xlɛ́ ɖɔ mǐ hwihwɛ́ mǐɖée dó tuto e tutoblonunu Jehovah tɔn nɔ bló lɛ é glɔ́.—Luk. 16:10; Ebl. 13:17.

³⁷ Mǐ ɖó hwɛjijɔ ɖebǔ bo na jlɛ́ Mawuxóɖiɖɔzɔ́ mǐtɔn dó mɛ ɖevo tɔn wu ǎ. (Ga. 5:26; 6:4) Ninɔmɛ mɛ ɖokpo ɖokpo tɔn nɔ gbɔn vo. Ðò alɔ ɖevo mɛ ɔ, enyi mǐɖesunɔ nya nǔ e ɖò jlɛ̌ jí lɛ é gbé bo na dó kpɔ́n lee mǐ ɖò nukɔn yì wɛ ɖò sinsɛnzɔ́ ɔ mɛ gbɔn é ɔ, é na hɛn lè wá nú mǐ tawun. Enyi mǐ kpé nǔ e gbé nya wɛ mǐ ɖè lɛ é wu ɔ, é sixu zɔ́n bɔ mǐ na ɖó awǎjijɛ.

³⁸ É ɖò gaan ɖɔ, Jehovah ɖò mɛ ɖěɖee jí é na cyɔn alɔ ɖò “ya ɖaxó ɔ” hwenu lɛ é xokplé wɛ wunnawúnná. Mǐ ɖò gbɛ̀ nɔ wɛ ɖò hwe e nu nǔɖɔɖ’ayǐ Ezayíi tɔn elɔ ɖò jijɛnu wɛ é: ‘Xwétá e hwe hú xwétá lɛ bǐ ɔ na ɖó gbɛtɔ́ afatɔ́n (1 000); xwétá e ma ɖó gǎn ɖebǔ ǎ ɖò xwétá lɛ mɛ ɔ na huzu togun syɛnsyɛn. Nyɛ Jehovah ɔ, é jɛ hwetɔnnu ɔ, un na bló nǔ enɛ blewun.’ (Nǔɖe. 7:9, 14; Eza. 60:22) Wǔjɔmɛ ɖé wɛ é nyí ɖɔ è ni nyí devízɔ́watɔ́ wɛnɖagbe ɔ tɔn ɖò azǎn gudogudo tɔn taji elɔ lɛ mɛ.—Mat. 24:14.