Ðo xwe kanweko nukɔntɔn ɔ mɛ ɔ, Satáan zán mɛ ɖěɖěe ɖo gǔdo n’i lɛ́ é dó ɖó adingban ɖě jɛ ɖě gúdo dó nǔjíwǔ e Vǐ Mawu tɔn bló bɔ xó ɖě ma ɖ’é wú ǎ lɛ́ é wú. Ði kpɔ́ndéwú ɔ, sinsɛngán lɛ́ ɖɔ nú mɛ lɛ́ ɖɔ acɛ e Jezu ɖó bo nɔ nya awǒvi lɛ́ ná é ɔ, “awǒvi lɛ́ sín gǎn” wɛ ná ɛ. (Mak. 3:22) Hwenu e Jezu ɖo wǔvɛ́ mɛ é ɔ, sinsɛngán lɛ́ dó hwɛ ɛ ɖɔ é nyí nunyládómawuwútɔ́, bo sísɛ́ ahwan ɔ bónú yě ná byɔ́ kú tɔn. (Mat. 27:20) Nukɔnmɛ ɔ, ée ahwanvú Klísu tɔn lɛ́ ɖo wɛn ɖagbe ɔ jlá wɛ é ɔ, mɛ e klán gbe xá yě lɛ́ é ‘fɔ́n mɛ lɛ́ dó jǐ’ nú klisánwun énɛ́ lɛ́, bónú yě lɔ ná wa nǔ ɖokpó ɔ. (Mɛ. 14:2, 19) Atɔxwɛ (Gungbe) 1^er décembre 1998 tɔn tínmɛ nǔ élɔ́ dó Mɛsɛ́dó 14:2 wú: “Mɛ e ɖo gǔdo nú Satáan lɛ́ é gbɛ́ wɛn e jlá wɛ klisánwun lɛ́ ɖe é, bo lɛ́ ɖɔ nǔ masɔgbe lɛ́ dó yě wú bónú mɛ lɛ́ ní ma ɖótó yě ó, lobo lɛ́ gbɛ́ wǎn nú yě.” Égbé ɔ, Satáan kpo ɖo “ayǐkúngban ɔ bǐ flú wɛ.” w24.04 11 akpá. 15-16