Nǔ e Biblu kplɔ́n mǐ dó Dǒwátɔ́ tɔn wú é

 1. Étɛ́wú Biblu ka nɔ su nukún towe mɛ?

BIBLU e Jexóva Mawu ná mǐ é su nukún mǐtɔn mɛ kpɔ́n! Wě e nǔnywɛ́ kpé lɛ́ é wɛ Jexóva ɖe xá mǐ ɖ’é mɛ; wě énɛ́ lɛ́ e é ɖe xá mǐ é sixú d’alɔ mǐ, bɔ mǐ ná ɖí xwi xá tagba mǐtɔn lɛ́ ɖo égbé bɔ é ná kpa mǐ. É lɛ́ ná mǐ nukúnɖíɖó sɔgúdo tɔn ɖaaɖagbe ɖé. Tají hú gǎn ɔ, Jexóva ɖe jijɔ e é ɖó é gěgé xlɛ́ mǐ ɖo Biblu mɛ. Ényí mǐ lin tamɛ dó jijɔ tɔn ɖaaɖagbe lɛ́ jí ɔ, yě nɔ dɔn mǐ tawun, bɔ mǐ nɔ ba ná zun xɔ́ntɔn vívɛ́ xá ɛ.—Ðɛh. 25:14.

 2. Ali tɛ́ lɛ́ nu Jexóva ka ko ɖe éɖée xlɛ́ gbɛtɔ́ lɛ́ ɖe?

² Jexóva ba ɖɔ mɛ lɛ́ ní tuun émí. Ðo hwexónu ɔ, Jexóva gbɔn nǔ lěhun lɛ́ gblamɛ dó ɖe éɖée xlɛ́: dlɔ̌ lɛ́, nǔmimɔ lɛ́ kpó wɛnsagun lɛ́ kpó. (Kɛ́n. 12:6; Mɛ. 10:3, 4) Amɔ̌, ényí è ma wlán dlɔ̌ énɛ́ lɛ́, nǔmimɔ énɛ́ lɛ́, alǒ wɛn e wɛnsagun énɛ́ lɛ́ dó lɛ́ é ǎ ɔ, nɛ̌ è ka sixú kplɔ́n yě gbɔn? Nǔ e wú Jexóva zán súnnu ɖé lɛ́ bɔ yě ‘wlán’ nǔ e é ba ɖɔ mǐ ní tuun lɛ́ é “dó wěma mɛ” é nɛ́. (Jel. 30:2) Ðó Jexóva wɛ nyí “alixlɛ́mɛtɔ́ e nyɔ́ bɔ nǔ bǐ vɔ ɖ’é wú” é wútu ɔ, mǐ sixú ɖeji ɖɔ wlɛnwín énɛ́ e é zán dó ɖɔ xó xá mǐ é wɛ nyí ɖagbe hú gǎn ɔ.—Ðɛh. 18:31.

 3. Nɛ̌ Jexóva ka cyɔ́n alɔ Xó tɔn jí gbɔn? (Ezayíi 40:8)

³ Xa Ezayíi 40:8. Sín xwe afatɔ́n mɔ̌kpán ɖíe wɛ Xó Mawu tɔn ko ɖo wě e nǔnywɛ́ kpé lɛ́ é ɖe xá súnnu kpó nyɔ̌nu kpó gbejínɔtɔ́ lɛ́ wɛ. Nɛ̌ nǔ ka nyí mɔ̌ gbɔn? Nǔkanbyɔ́ ɖagbe ɖé wɛ, ɖó wěma-mlámlá lɛ́ kpó anyǔwéma lɛ́ kpó jí wɛ è wlán Biblu ɔ dó ɖo bǐbɛ́mɛ, bɔ hwenu ɖo yiyi wɛ é ɔ, yě ka wá gblé. Énɛ́ wú wɛ mǐ ma sɔ́ ɖó wěma-mlámlá kpó anyǔwéma kpó ɖě ɖo égbé ǎ. Amɔ̌, Jexóva bló tuto bɔ è vɔ́ nǔwlánwlán mímɛ́ énɛ́ lɛ́ wlán. Gbɛtɔ́ hwɛhutɔ́ lɛ́ wɛ vɔ́ nǔ énɛ́ lɛ́ wlán có, yě ka ɖ’ayi te tawun. Ði kpɔ́ndéwú ɔ, akɔwé ɖokpó ɖɔ xó élɔ́ dó Nǔwlánwlán mímɛ́ Ebléegbe tɔn lɛ́ wú: “Mǐ kú d’é jí ɖɔ wěma xóxó e è vɔ́ wlán lɛ́ é ɖě kún sɔ́ sɔgbe sɔ énɛ́ ó.” È wlán nǔ lɛ́ din é ɔ, é ko lín, nǔ e jí è wlán dó lɛ́ é lɔ ko gblé, bɔ mɛ e wlán lɛ́ é lɔ nyí hwɛhutɔ́ có, nǔ e Dǒwátɔ́ Biblu tɔn Jexóva ba ɖɔ mǐ ní tuun lɛ́ é jɛ́n ɖo Biblu mɛ égbé.

 4. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

⁴ Jexóva wɛ nyí Jɔtɛn “nǔníná ɖagbe ɖagbe bǐ, kpó nǔnámɛ e nǔ vɔ ɖ’é wú ɔ bǐ kpó” tɔn. (Ja. 1:17) Nǔníná ɖagbe hú gǎn e Jexóva ná mǐ lɛ́ é ɖokpó wɛ nyí Xó tɔn. Nǔníná ɖé nɔ ɖe lě do mɛ e ná nǔ ɔ mǐ é tuun mǐ kpó nǔ e hudó mǐ lɛ́ é kpó sɔ é xlɛ́. Nǔ ɖokpó ɔ wɛ é nyí nú Biblu lɔ. Ényí mǐ gbéjé nǔníná énɛ́ kpɔ́n ɔ, mǐ nɔ kplɔ́n nǔ gěgé dó Jexóva wú. Mǐ nɔ kplɔ́n lěe é tuun mǐ sɔ é kpó lěe é tuun nǔ e hudó mǐ lɛ́ é gbɔn é kpó. Ðo xóta élɔ́ mɛ ɔ, mǐ ná gbéjé nǔ e Biblu kplɔ́n mǐ dó jijɔ Jexóva tɔn atɔn élɔ́ lɛ́ wú é kpɔ́n: nǔnywɛ́ tɔn, hwɛjijɔ tɔn kpó wǎnyíyí tɔn kpó. Jɛ nukɔn hwɛ̌ ɔ, mi nú mǐ ní gbéjé ali e nu Biblu ɖe nǔnywɛ́ Mawu tɔn xlɛ́ ɖe é ɖé lɛ́ kpɔ́n.

 5. Ðɔ ali e nu Biblu ɖe nǔnywɛ́ Mawu tɔn xlɛ́ ɖe é ɖokpó.

⁵ Jexóva tuun ɖɔ mǐ ɖó hudó wěɖexámɛ tɔn e nǔnywɛ́ kpé lɛ́ é tɔn. Nǔnywɛ́ tɔn wɛ ka gɔ́ nǔníná tɔn énɛ́ e nyí Biblu é mɛ. Wěɖexámɛ Biblu tɔn lɛ́ nɔ d’alɔ gbɛtɔ́ lɛ́. Biblu nɔ ɖyɔ́ gbɛzán mɛtɔn. Hwenu e Mɔyízi wlán wěma Biblu tɔn nukɔntɔn lɛ́ é ɔ, é ɖɔ nú togun Mawu tɔn Izlayɛ́li ɖɔ: “Sɛ́n énɛ́ lɛ́ nyí xó tófwe ǎ.” (Sɛ́n. 32:47) Gbɛ mɛ ɖěɖěe se tónú nú Xó Mawu tɔn lɛ́ é tɔn ɖó nu, bɔ yě lɛ́ ɖó awǎjijɛ. (Ðɛh. 1:2, 3) È wlán Xó Mawu tɔn din é ɔ, é ko lín tawun có, énɛ́ ka ɖe hlɔ̌nhlɔ́n e é ɖó bo nɔ húzú gbɛzán mɛ lɛ́ tɔn é kpo ǎ. Ði kpɔ́ndéwú ɔ, ɖo xóta ɖěbɔdóɖěwú “Biblu nɔ húzú gbɛzán mɛtɔn” e nɔ tɔ́n ɖo jw.org jí lɛ́ é mɛ ɔ, a ná mɔ tan nǔ e jɛ nǔgbó, bo xlɛ́ ɖɔ Biblu ɖó hlɔ̌nhlɔ́n bo ɖo “azɔ̌ wa ɖo mɛ e ɖi nǔ [n’i] lɛ́ é mɛ” wɛ ɖo égbé lɛ́ é tɔn gěgé.—1 Tɛ. 2:13.

 6. Étɛ́wú mǐ ka sixú ɖɔ ɖɔ Biblu gbɔn vo nú wěma ɖěvo ɖěbǔ?

⁶ Wěma ɖěvo ɖěbǔ cí Xó Mawu tɔn ɖɔhun ǎ. Aniwú nǔ ka nyí mɔ̌? Ðó Jexóva Mawu e nyí Dǒwátɔ́ wěma énɛ́ tɔn é nyí Nǔbǐwúkpétɔ́, mavɔmavɔ, bɔ nǔnywɛ́ tɔn lɛ́ hú gǎn mɛ ɖěvo ɖěbǔ tɔn. Wěma gěgé ɖěvo lɛ́ tíin bɔ mɛ e wlán yě lɛ́ é nɔ ko kú cóbɔ è nɔ kpo ɖo yě xa wɛ; amɔ̌, hwenu ɖo yiyi wɛ ɔ, wěɖexámɛ e ɖ’é mɛ lɛ́ é nɔ wá cá. Biblu ka nɔ cá ǎ; wěɖexámɛ tɔn lɛ́ nɔ d’alɔ gbɛtɔ́ lɛ́ hwebǐnu. Ényí mǐ nɔ xa wěma mímɛ́ énɛ́ bo nɔ lɛ́ lin tamɛ d’é jí hwebǐnu ɔ, Dǒwátɔ́ tɔn nɔ zán gbigbɔ mímɛ́ tɔn agbɔ̌nnɔ ɔ dó d’alɔ mǐ, bɔ mǐ nɔ mɔ lěe mǐ sixú zán wě e Biblu nɔ ɖe xá mǐ lɛ́ é ɖo gbɛzán mǐtɔn mɛ gbɔn é. (Ðɛh. 119:27; Mal. 3:16; Ebl. 4:12) Ɛɛn, akpakpa ɖo Dǒwátɔ́ tɔn sɔ́ wɛ bónú é ná d’alɔ we. Xó énɛ́ lɛ́ dó wǔsyɛ́n lanmɛ nú mǐ bɔ mǐ ná nɔ xa Biblu hwɛhwɛ.

 7. Nɛ̌ Biblu ka dɔn togun Mawu tɔn ɖó bǔ ɖo hwexónu gbɔn?

⁷ Nǔ ɖěvo lɛ́vɔ́ xlɛ́ ɖɔ nǔnywɛ́ Mawu tɔn wɛ ɖo Biblu mɛ; nǔ e xlɛ́ mɔ̌ é wɛ nyí ɖɔ Biblu nɔ d’alɔ togun Mawu tɔn bɔ é nɔ nɔ bǔ. Ée Izlayɛ́li ví lɛ́ yi Akpádídó-yíkúngban ɔ jí é ɔ, fí vovo lɛ́ wɛ yě jɛ agban ɖó. Mɛɖé lɛ́ nyí hwehutɔ́, mɛ ɖěvo lɛ́ nɔ nyi nyibú, lɛ̌ngbɔ́ kpó gbɔ̌ kpó, bɔ mɛ ɖěvo lɛ́ nyí glesi. Bléwún jɛ́n Izlayɛ́li ví e ɖo akpá ɖé xwé lɛ́ é ná wɔn ya nú ganjíninɔ Izlayɛ́li ví e ɖo akpá ɖěvo xwé ɖo to ɔ mɛ lɛ́ é tɔn. Amɔ̌, Jexóva bló tuto bɔ Izlayɛ́li ví lɛ́ ná nɔ kplé ɖó kpɔ́ ɖo táan vovo mɛ, bɔ è ná nɔ xa Xó tɔn, bo lɛ́ tínmɛ nú yě. (Sɛ́n. 31:10-13; Nɛɛ. 8:1-2, 8, 18) Mǐ ní ɖɔ ɖɔ Izlayɛ́li ví gbejínɔtɔ́ ɖé tɔ́n Mawu sɛn gbé bo wá Jeluzalɛ́mu bo mɔ, bɔ vlafo ɔ, mawusɛntɔ́ éɖɔhun lǐvi mɔ̌kpán gosín fí vovo ɖo to ɔ mɛ, bɔ yě lɔ wá; dǒ nukún lěe nǔ ná cí n’i é mɛ kpɔ́n! Jexóva d’alɔ togun tɔn gbɔn mɔ̌ bɔ é nɔ bǔ. Nukɔnmɛ, hwenu e è ɖó agun klisánwun tɔn ayǐ é ɔ, mɛ e nɔ dó gbe vovo lɛ́ é wɛ nɔ mɛ; mɛɖé lɛ́ nyí mɛ nukúnɖéjí, bɔ mɛ ɖěvo lɛ́ nyí mɛ kpaa lɛ́, mɛɖé lɛ́ nyí dɔkunnɔ, lobɔ mɛ ɖěvo lɛ́ nyí wamamɔnɔ. Amɔ̌, ɖó yě yí wǎn nú Xó Mawu tɔn wútu ɔ, yě mɛ bǐ nɔ bǔ bo sɛn Mawu nǔgbó ɖokpó ɔ. Biblu e kplɔ́n wɛ mɛ yɔ̌yɔ́ lɛ́ ɖe é kpó kplé lɛ́ domɛ e yě nɔ yi é kpó jɛ́n ná d’alɔ yě bɔ yě ná mɔ nukúnnú jɛ Xó Mawu tɔn mɛ.—Mɛ. 2:42; 8:30, 31.

 8. Nɛ̌ Jexóva ka ɖo blǒbló wɛ bónú togun tɔn ná nɔ bǔ ɖo égbé gbɔn?

⁸ Mawu nǔnywɛ́tɔ́ mǐtɔn kpo ɖo nǔ kplɔ́n togun tɔn wɛ, bo lɛ́ kpo ɖo blǒbló wɛ bónú é ná nɔ bǔ gbɔn Biblu gblamɛ. Biblu wɛ nyí jɔtɛn nǔɖuɖu gbigbɔ tɔn e sín vǐví mǐ nɔ ɖu é tɔn. Hwɛhwɛ wɛ mǐ nɔ kplé ɖo kplé agun tɔn mǐtɔn lɛ́ kpó kpléɖókpɔ́ lɛ́ kpó jí, bɔ è nɔ xa Xó Mawu tɔn, tínmɛ, bo nɔ lɛ́ ɖɔ xó d’é wú, bɔ mǐ nɔ se. Nǔgbó ɔ, azɔ̌wanú tají ɖé wɛ Biblu nyí bɔ Jexóva nɔ zán dó d’alɔ togun tɔn, bónú “yě ná ɖó gbe kpɔ́ bo sɛn ɛ.”—Sof. 3:9.

 9. Jijɔ tɛ́ ka ɖo tají cóbɔ è ná mɔ nukúnnú jɛ wɛn e ɖo Biblu mɛ é mɛ? (Luki 10:21)

⁹ Mǐ ní lɛ́ ɖɔ xó dó nǔ ɖěvo e xlɛ́ ɖɔ Jexóva ɖó nǔnywɛ́ é jí. Akpáxwé Biblu tɔn gěgé tíin bɔ mɛɖéesɔ́hwetɔ́ ɖěɖěe nɔ xa lɛ́ é kɛ́ɖɛ́ jɛ́n sixú mɔ nukúnnú jɛ mɛ. (Xa Luki 10:21.) Fí lɛ́ bǐ wɛ mɛ lɛ́ nɔ xa Biblu ɖe. Akɔwé ɖokpó ɖɔ ɖɔ “mɛ gěgé nɔ xa Biblu ɔ hú wěma ɖěvo ɖěbǔ, bɔ ényí yě ɖo xixa wɛ ɔ, yě nɔ xwe sɔ bo nɔ xa.” Amɔ̌, mɛ e nɔ sɔ́ yěɖée hwe lɛ́ é kɛ́ɖɛ́ jɛ́n nɔ mɔ nukúnnú jɛ nǔ e yě xa é mɛ, bo nɔ lɛ́ zán.—2 Kɔ. 3:15, 16.

10. Ali ɖěvo tɛ́ nu Biblu ka ɖe nǔnywɛ́ Jexóva tɔn xlɛ́ ɖe?

¹⁰ Amɔ̌, mǐ nɔ lɛ́ kplɔ́n nǔ dó nǔnywɛ́ Jexóva tɔn wú ɖo Biblu mɛ, ɖo ali ɖěvo nu. É nyí mǐ bǐ wɛ Jexóva nɔ xo kplé bo nɔ zán Xó tɔn dó kplɔ́n nǔ kpowun ǎ, é nɔ lɛ́ kplɔ́n nǔ mǐ mɛ ɖokpó ɖokpó, bo nɔ lɛ́ dó gbɔ nú mǐ. Ényí mǐ ɖo Xó Mawu tɔn xa wɛ ɔ, mǐ sixú mɔ lěe nǔ mǐ mɛ ɖokpó ɖokpó tɔn nɔ ɖu ayi mɛ n’i gbɔn é. (Eza. 30:21) Ényí a ɖo tagba ɖé mɛ gbɔn wɛ ɔ, azɔn nabí a ka nɔ sɔ́ Biblu bo nɔ xa wěmafɔ ɖé, cí nǔ ɖɔ hwiɖokpónɔ wɛ è wlán ná ɖɔhun? Nǔgbó ɔ, Biblu nɔ dɔn gbɛtɔ́ lǐvi mɔ̌kpán. Nɛ̌ nǔ e sín hudó a ɖó din lɛ́ é pɛ́pɛ́pɛ́ ka sixú ɖo Biblu mɛ gbɔn? Nǔ nyí mɔ̌, ɖó mɛ e ɖó nǔnywɛ́ hú gǎn ɖo wɛ̌kɛ́ ɔ mɛ é wɛ nyí Dǒwátɔ́ tɔn wútu.—2 Tim. 3:16, 17.

11. Lěe è wlán Biblu gbɔn é xlɛ́ ɖɔ Jexóva kún nɔ ɖe mɛɖé ɖó vo ɖo mɛɖé mɛ ó. Gbɔn nɛ̌ é?

¹¹ Jijɔ Jexóva tɔn ɖěvo wɛ nyí hwɛjijɔ. (Sɛ́n. 32:4) Hwɛjijɔ cá kan tawun xá mɛ ma ɖe ɖó vo ɖo mɛ mɛ; Jexóva ka nɔ ɖe mɛɖé ɖó vo ɖo mɛɖé mɛ ǎ. (Mɛ. 10:34, 35; Hlɔ̌. 2:11) Gbe vovo e mɛ è wlán Biblu dó é xlɛ́ ɖɔ Mawu kún nɔ ɖe mɛɖé ɖó vo ɖo mɛɖé mɛ ó. Wěma 39 Biblu tɔn nukɔntɔn lɛ́ gěgé wɛ è wlán dó Ebléegbe mɛ; gbe énɛ́ mɛ wɛ togun Mawu tɔn nɔ mɔ nǔ jɛ hú gǎn ɖo hwenɛ́nu. É ɖo mɔ̌ có, ɖo klisánwun xwe kanweko nukɔntɔn ɔ tɔn lɛ́ hwenu ɔ, mɛ gěgé wɛ nɔ dó Glɛ̌kigbe, énɛ́ wú ɔ, wěma Biblu tɔn 27 gǔdo tɔn lɛ́ ɔ, Glɛ̌kigbe mɛ wɛ è wlán yě dó. Ényí gbe ɖokpó kpowun mɛ wɛ Jexóva ba ɖɔ è ní wlán Xó émítɔn dó ǎ. Gbe gěgé wɛ gbɛtɔ́ lǐva tántɔn mɔ̌ e ɖo ayǐkúngban jí ɖo égbé lɛ́ é nɔ dó. Nɛ̌ mɛ tootóbú énɛ́ lɛ́ ka sixú kpé wú bo kplɔ́n nǔ dó Jexóva wú gbɔn?

12. Ðɔ ali e nu Daniyɛ́li 12:4 ɖo jijɛnu wɛ ɖe ɖo azǎn gǔdo gúdo tɔn élɔ́ lɛ́ mɛ é ɖokpó.

¹² Jexóva d’akpá gbɔn gbeyíɖɔ Daniyɛ́li jí ɖɔ ɖo azǎn gǔdo gúdo tɔn lɛ́ mɛ ɔ, “nukúnnúmɔjɛnǔmɛ nǔgbó” Xó Mawu tɔn tɔn ná wá “túnflá,” énɛ́ wɛ nyí ɖɔ mɛ gěgé ná mɔ nukúnnú jɛ Biblu ɔ mɛ. (Xa Daniyɛ́li 12:4, nwt.) Ali e nu nukúnnúmɔjɛnǔmɛ énɛ́ túnflá ɖe é ɖokpó wɛ nyí ɖɔ, è nɔ tínmɛ Biblu kpó wěma lɛ́ kpó dó gbe ɖěvo lɛ́ mɛ, nɔ ɖe tɔ́n, bo nɔ lɛ́ má. Biblu wá húzú wěma e è tínmɛ, bo lɛ́ má hú gǎn ɖo gbɛ ɔ mɛ é. Hweɖélɛ́nu ɔ, Biblu ɖěɖěe azɔ̌xwé lɛ́ nɔ ɖe tɔ́n lɛ́ é nɔ v’axi tawun. Sín hwenu línlín ɖíe wɛ togun Jexóva tɔn ko ɖo Xó Mawu tɔn blěbú, alǒ akpáxwé tɔn ɖé tínmɛ wɛ; gbe 240 jɛjí mɛ wɛ yě ko tínmɛ dó, bɔ mɛ bǐ sixú yí vɔ̌nu. Wǎgbɔ tɔn ɔ, gbɛtɔ́ e gosín akɔta lɛ́ bǐ mɛ lɛ́ é ɖo gbe yí nú “wɛn ɖagbe Axɔ́súɖuto ɔ tɔn” wɛ, cóbónú vivɔnu ɔ ná wá. (Mat. 24:14) Mawu mǐtɔn hwɛjijɔnɔ ɔ jló ná hun ali nú mɛ gěgé lěe é nyɔ́ bló gbɔn é, bónú yě ná kplɔ́n, bo tuun i gbɔn Xó tɔn xixa gblamɛ. Nǔ nyí mɔ̌, ɖó é yí wǎn nú mǐ mɛ bǐ tawun wútu.

13. Aniwú mǐ ka sixú ɖɔ ɖɔ Biblu ɖe wǎnyíyí Jexóva tɔn xlɛ́? (Jaan 21:25)

¹³ Biblu d’alɔ mǐ bɔ mǐ mɔ nǔ jɛ mɛ ɖɔ jijɔ Jexóva tɔn tají hú gǎn ɔ wɛ nyí wǎnyíyí. (1 Jaan 4:8) Lin tamɛ dó nǔ ɖěɖěe é yí gbe bɔ è wlán dó Biblu mɛ lɛ́ é kpó nǔ ɖěɖěe é ma yí gbe bɔ è wlán d’é mɛ ǎ lɛ́ é kpó jí. Nǔ e sín hudó mǐ ɖó bá vɛ́ xá ɛ, ɖó gbɛzán awǎjijɛnɔ ɖé din, lobo lɛ́ mɔ gbɛ mavɔmavɔ lɛ́ é pɛ́pɛ́pɛ́ wɛ é ná mǐ. Nǔgbó ɔ, ɖó Jexóva yí wǎn nú mǐ wútu ɔ, é ɖe gǒflɛ́mɛ lɛ́ xlɛ́ mǐ zɛ nǔ e sín agban mǐ sixú hɛn lɛ́ é wú ǎ.—Xa Jaan 21:25.

14. Ali ɖěvo tɛ́ nu nǔ e ɖo Biblu mɛ lɛ́ é ka ɖe wǎnyíyí Mawu tɔn xlɛ́ ɖe?

¹⁴ Jexóva lɛ́ ɖɔ xó nú mǐ ɖo ali e wlí yɛ̌yi nú mɛ é ɖé nu dó xlɛ́ ɖɔ émí yí wǎn nú mǐ. É dó sɛ́n lɛ́ nú mǐ gbɛ́ɖɛ́ɖɛ́ ɖo Biblu mɛ bo ɖɔ nǔ e mǐ ná wa ɖo akpáxwé gbɛzán mǐtɔn tɔn lɛ́ bǐ mɛ é nú mǐ ǎ. É nyɔ́ wa ɔ, é nɔ zán tan nǔ e jɛ nǔgbó lɛ́ é tɔn, nǔɖɔɖayǐ e sɔ́ akpakpa mɛ lɛ́ é kpó wěɖexámɛ e nyɔ́ zán lɛ́ é kpó dó d’alɔ mǐ bónú mǐ ná wá gbeta e sɔgbe lɛ́ é kɔn. Mɔ̌ mɛ ɔ, Xó Mawu tɔn nɔ sísɛ́ mǐ bɔ mǐ nɔ yí wǎn n’i, bo nɔ lɛ́ sɛ́n ɛ kpó ayi bǐ kpó.

15. (a) Nɛ̌ Jexóva ka ɖe xlɛ́ ɖɔ mɛ ɖěɖěe nɔ xa Biblu lɛ́ é sín nǔ nɔ ɖu ayi mɛ nú émí gbɔn? (b) Mɛ e xó Biblu ɖɔ é tɛ́ jí ɖyɔ̌vǐvú ɔ, nɔví súnnu wínnyáwínnyá ɔ kpó nɔví nyɔ̌nu mɛxómɔ ɔ kpó ka ɖo tamɛ lin dó wɛ ɖo ɖiɖe ɔ mɛ? (Bǐb. 39:1, 10-12; 2 Axɔ́. 5:1-3; Luk. 2:25-38)

¹⁵ Biblu ɖe xlɛ́ ɖɔ nǔ mǐtɔn nɔ ɖu ayi mɛ nú Jexóva titewungbe tɔn. Gbɔn nɛ̌ é? Tan e nɔ ɖe lěe nǔ nɔ cí nú gbɛtɔ́ lɛ́ é xlɛ́ é gěgé wɛ ɖo Xó tɔn mɛ. Mǐ sixú mɔ nǔ jɛ lěe nǔ cí nú mɛ e xó Biblu ɖɔ lɛ́ é mɛ, ɖó “gbɛtɔ́ wɛ [yě] nyí mǐ bǐ ɖɔhun.” (Ja. 5:17) Tají hú gǎn ɔ, ényí mǐ kpɔ́n lěe é wa nǔ gbɔn xá gbɛtɔ́ mǐɖɔhun lɛ́ é ɔ, mǐ sixú kpé wú bo mɔ nukúnnú jɛ lěe “Jexóva nɔ kú nǔbláwǔ nú mɛ, bo nɔ lɛ́ yí wǎn nú mɛ titewungbe” gbɔn é mɛ ganjí.—Ja. 5:11.

16. Ényí mǐ xa nǔ dó mɛ ɖěɖěe wa nǔ nyi do bɔ Biblu ɖɔ xó yětɔn lɛ́ é wú ɔ, étɛ́ é ka nɔ kplɔ́n mǐ dó Jexóva wú? (Ezayíi 55:7)

¹⁶ Biblu lɛ́ ɖe wǎn e Jexóva yí nú mǐ é xlɛ́ ɖo ali ɖěvo nu. É ná gǎnjɛwú mǐ ɖɔ Mawu mǐtɔn kún ná jó mǐ dó hwenu e mǐ wa nǔ nyi do é ó. Izlayɛ́li ví lɛ́ hú hwɛ dó Jexóva azɔn mɔ̌kpán; é ɖo mɔ̌ có, ényí hwɛ yětɔn lɛ́ vɛ́ nú yě nǔgbó nǔgbó ɔ, Mawu nɔ sɔ́ kɛ yě. (Xa Ezayíi 55:7.) Klisánwun xwe kanweko nukɔntɔn ɔ tɔn lɛ́ lɔ tuun ɖɔ Jexóva yí wǎn nú émí tawun. Mawu sɔ́ dó ayi mɛ nú mɛsɛ́dó Pɔ́lu bɔ é dó wǔsyɛ́n lanmɛ nú nǔɖitɔ́ hǎtɔ́ tɔn lɛ́ ɖɔ yě ní “sɔ́ hwɛ kɛ” nya e hu hwɛ syɛ́nsyɛ́n bɔ hwɛ tɔn lɛ́ ka vɛ́ n’i é, bo “dó gbɔ n’i.” (2 Kɔ. 2:6, 7; 1 Kɔ. 5:1-5) É sɔ́ akpakpa mɛ tawun ɖɔ Jexóva kún gbɛ́ mɛsɛntɔ́ tɔn lɛ́, ɖó yě wa nǔ nyi do kpowun wútu ó. É nyɔ́ wa ɔ, é d’alɔ yě kpó wǎnyíyí kpó, gbɛ́ nǔ nú yě, bo byɔ́ yě ɖɔ yě ní lɛ́ wá húzú xɔ́ntɔn émítɔn. É d’akpá ɖɔ émí ná wa nǔ ɖokpó ɔ nú hwɛhutɔ́ ɖěɖěe hwɛ yětɔn lɛ́ vɛ́ ná égbé lɛ́ é bǐ.—Ja. 4:8-10.

17. Étɛ́wú Biblu ka nyí nǔníná e xɔ akwɛ́ sɔmɔ̌ é ɖé?

¹⁷ Jexóva ná mǐ nǔníná ɖaaɖagbe ɖé. Étɛ́wú Xó tɔn ka xɔ akwɛ́ sɔmɔ̌? Lěe mǐ kplɔ́n gbɔn é ɔ, Biblu ɖe nǔnywɛ́ Mawu tɔn, hwɛjijɔ tɔn kpó wǎnyíyí tɔn kpó xlɛ́. Wěma énɛ́ xlɛ́ ɖɔ Jexóva ba ɖɔ mǐ ní kplɔ́n bo tuun émí. É ba ɖɔ mǐ ní húzú xɔ́ntɔn émítɔn.

18. Nɛ̌ mǐ ka sixú xlɛ́ ɖɔ “nǔníná ɖagbe ɖagbe” Jexóva tɔn e nyí Biblu é su nukún mǐtɔn mɛ gbɔn?

¹⁸ Mǐ jló ná hɛn dó ayi mɛ ɖɔ “nǔníná ɖagbe ɖagbe” ɖé wɛ Xó Mawu tɔn nyí. (Ja. 1:17) Énɛ́ wú ɔ, mi nú é ní kpo ɖo nukún mǐtɔn mɛ su wɛ. Mǐ sixú ɖe xlɛ́ ɖɔ Xó Mawu tɔn su nukún mǐtɔn mɛ gbɔn xixa kpó tamɛ linlin d’é jí kpó gblamɛ. Ényí mǐ nɔ wa mɔ̌ ɔ, mǐ sixú kú d’é jí ɖɔ Dǒwátɔ́ tɔn ná kɔn nyɔ̌ná dó gǎn e dó wɛ mǐ ɖe é jí, bɔ mǐ ná lɛ́ mɔ nǔ jɛ lěe “è nɔ tuun Mawu gbɔn é wú.”—Nǔx. 2:5.