Ðu le Biblu xixa towe tɔn hú gǎn

 1. Étɛ́ ka xlɛ́ ɖɔ Mawuxówéma ɔ ɖo tají nú Jezu?

DǑ NUKÚN lěe tó ɖíɖó nǔkplɔ́nmɛ Jezu tɔn lɛ́ ná ko cí é mɛ kpɔ́n! Hwɛhwɛ wɛ é nɔ ɖe xó sín Nǔwlánwlán mímɛ́ e é kplɔ́n bɔ é ɖo ta tɔn mɛ lɛ́ é mɛ. Nǔgbó ɔ, Jezu ɖe xó sín Xó Mawu tɔn mɛ ɖo xó nukɔn nukɔntɔn e é ɖɔ ɖo batɛ́mu tɔn gúdo bɔ è wlán ɖ’ayǐ lɛ́ é kpó xó gǔdo gúdo tɔn ɖěɖěe é ɖɔ jɛ nukɔn nú kú tɔn bɔ è wlán ɖ’ayǐ é ɖé lɛ́ kpó mɛ.b (Sɛ́n. 8:3; Ðɛh. 31:6; Luk. 4:4; 23:46) Gɔ́ ná ɔ, ɖo xwe atɔn adaɖé e gbo nǔ we énɛ́ lɛ́ mɛ é vlamɛ ɔ, hwɛhwɛ wɛ Jezu nɔ xa Mawuxówéma ɔ ɖo agbawungba, nɔ ɖe xó sín mɛ, lobo nɔ lɛ́ tínmɛ nú mɛ lɛ́.—Mat. 5:17, 18, 21, 22, 27, 28; Luk. 4:16-20.

 2. Ée Jezu ɖo susu wɛ é ɔ, étɛ́ ka d’alɔ ɛ bɔ é tuun Mawuxówéma ɔ ganjí? (Kpɔ́n ɖiɖe e ɖo akpá ɔ jí é.)

² Ðo xwe ɖěɖěe jɛ nukɔn nú sinsɛnzɔ́ Jezu tɔn lɛ́ é mɛ ɔ, é nɔ xa Xó Mawu tɔn, bo nɔ lɛ́ ɖótó hwɛhwɛ. É ɖo wɛn ɖɔ é nɔ se, bɔ Mali kpó Jozɛ́fu kpó nɔ ɖe xó sín Biblu mɛ, ɖo xó e xwédo ɔ nɔ ɖɔ ɖó kpɔ́ gbe bǐ gbe ɖo xwégbe lɛ́ é hwenu.c (Sɛ́n. 6:6, 7) Mǐ sixú kú d’é jí ɖɔ Jezu kpó xwédo tɔn kpó nɔ yi kplɔ́ngbasá ɖo gbɔjɛzángbe lɛ́ bǐ. (Luk. 4:16) Ényí é yi dɔ̌n bɔ è ɖo Mawuxówéma ɔ xa wɛ ɔ, é ná ko nɔ ɖótó kpó sɔxwixwe kpó. Hwenu ɖo yiyi wɛ é ɔ, Jezu kplɔ́n bo nɔ xa Nǔwlánwlán mímɛ́ lɛ́ éɖésúnɔ. Wǎgbɔ tɔn ɔ, Jezu wá tuun Mawuxówéma ɔ ganjí, yí wǎn ná, lobo nɔ lɛ́ ná tɛn ɛ bɔ é nɔ xlɛ́ ali nǔwiwa tɔn lɛ́. Ði kpɔ́ndéwú ɔ, flín nǔ e jɛ ɖo tɛ́npli ɔ mɛ hwenu e é ɖo xwe 12 kpowun ɖó wɛ é. “Nukúnnúmɔjɛnǔmɛ tɔn kpó xósin tɔn lɛ́ kpó nɔ jí wǔ” nú sɛ́nkplɔ́nmɛtɔ́ e tuun Mɔyízisɛ́n ɔ ganjí lɛ́ é.—Luk. 2:46, 47, 52.

 3. Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

³ Ényí mǐ lɔmɔ̌ nɔ xa Xó Mawu tɔn hwɛhwɛ ɔ, mǐ ná kplɔ́n bo tuun Mawuxówéma ɔ, lobo lɛ́ yí wǎn ná. Amɔ̌, nɛ̌ mǐ ka sixú ɖu le nǔ e mǐ nɔ xa lɛ́ é tɔn hú gǎn gbɔn? Nǔ e Jezu ɖɔ nú mɛ e tuun Sɛ́n ɔ ganjí lɛ́ é sixú kplɔ́n nǔ mǐ; yě mɛ ɖé lɛ́ wɛ nyí sɛ́nkplɔ́nmɛtɔ́ lɛ́, Falizyɛn lɛ́ kpó Saduseɛn lɛ́ kpó. Sinsɛngán énɛ́ lɛ́ nɔ xa Mawuxówéma ɔ hwɛhwɛ, amɔ̌, yě nɔ ɖu le nǔ e yě nɔ xa lɛ́ é tɔn ǎ. Jezu tɛ ɖɛ̌ nǔ e súnnu énɛ́ lɛ́ ɖó ná ko wa, bo ná ɖu le nǔ e yě nɔ xa lɛ́ é tɔn ganjí é atɔn jí. Xó e é ɖɔ nú yě lɛ́ é ná d’alɔ mǐ bɔ nǔwúkpíkpé e mǐ ɖó bo nɔ wa nǔ élɔ́ lɛ́ é ná jɛjí: (1) nukúnnú mimɔ jɛ nǔ e mǐ xa lɛ́ é mɛ, (2) nǔ xɔ akwɛ́ lɛ́ biba, (3) Xó Mawu tɔn jíjódó bónú é ná w’azɔ̌ ɖo mǐ wú.

 4. Étɛ́ Luki 10:25-29 ka kplɔ́n mǐ dó Xó Mawu tɔn xixa wú?

⁴ Mǐ ba ná mɔ nǔ jɛ nǔ e mǐ nɔ xa ɖo Xó Mawu tɔn mɛ lɛ́ é mɛ. É ma nyí mɔ̌ ǎ ɔ, mǐ ná ɖu le nǔ e mǐ nɔ xa lɛ́ é tɔn bǐ mlɛ́mlɛ́ ǎ. Ði kpɔ́ndéwú ɔ, ɖ’ayi xó e Jezu ɖɔ ɖó kpɔ́ xá “nya e tuun Sɛ́n ɔ ganjí é ɖé” é wú. (Xa Luki 10:25-29.) Hwenu e nya ɔ kan nǔ e é ná wa bo ná mɔ gbɛ mavɔmavɔ é byɔ́ é ɔ, Jezu d’alɔ ɛ bɔ é mɔ xósin ɔ ɖo Xó Mawu tɔn mɛ; é kanbyɔ́ ɛ ɖɔ: “Étɛ́ è ka wlán dó Sɛ́n ɔ mɛ? Nɛ̌ a ka mɔ nukúnnú jɛ mɛ gbɔn?” Nya ɔ ná xósin e sɔgbe é, ɖó é ɖe xó sín Mawuxówéma ɔ mɛ dó ɖɔ xó dó wǎn yí nú Mawu kpó nɔzo kpó wú. (Lev. 19:18; Sɛ́n. 6:5) Amɔ̌, ɖ’ayi nǔ e nya ɔ ɖɔ bɔ d’é wú é wú: “Mɛ̌ ka nyí nɔzo ce tawun?” Nya ɔ ɖe xlɛ́ ɖɔ émí kún mɔ nǔ jɛ nǔ e émí xa é mɛ ganjí ó. Wǎgbɔ tɔn ɔ, é tuun lěe é ná zán wěmafɔ énɛ́ lɛ́ ganjí ɖo gbɛzán tɔn mɛ gbɔn é ǎ.

 5. Nɛ̌ ɖɛxixo kpó nǔxixa dɛ̌dɛ̌ kpó ka sixú d’alɔ mǐ bɔ mǐ ná ɖu le nǔ e mǐ nɔ xa é tɔn hú gǎn gbɔn?

⁵ Ényí mǐ tɛ́n kpɔ́n bo ɖó nǔxixa sín walɔ ɖagbe ɖé ɔ, nukúnnúmɔjɛnǔmɛ e mǐ ɖó dó Xó Mawu tɔn wú é sixú jɛjí. Wěɖexámɛ ɖé lɛ́ ɖíe bo sixú d’alɔ we. Nɔ xo ɖɛ cóbó nɔ jɛ nǔ xa jí. Mǐ ɖó alɔdó Jexóva tɔn sín hudó cóbó ná mɔ nǔ jɛ Mawuxówéma ɔ mɛ, énɛ́ wú ɔ, mǐ sixú byɔ́ ɛ gbigbɔ mímɛ́ tɔn bo ná dó sɔ́ ayi ɖó nǔ e xa wɛ mǐ ɖe lɛ́ é jí. Énɛ́ gúdo hǔn, xa nǔ ɔ dɛ̌dɛ̌. Énɛ́ ná d’alɔ we bɔ a ná mɔ nǔ jɛ nǔ e xa wɛ a ɖe é mɛ. Ényí a nɔ xa nǔ ɔ dó jǐ, alǒ xwedó xóyídókanjí Biblu tɔn ɖé ɔ, énɛ́ sixú d’alɔ we tawun. Ényí a ɖo tó ɖó xó e è yí dó kan jí é wɛ, bo ɖo xwixwedó wɛ ɖo Biblu towe mɛ ɔ, énɛ́ ná d’alɔ we bɔ a ná mɔ nǔ jɛ nǔ e xa wɛ a ɖe é mɛ hú gǎn, bo lɛ́ flín, lobɔ nǔ e xa wɛ a ɖe ɖo Xó Mawu tɔn mɛ é ná kplɔ́n nǔ gěgé we. (Joz. 1:8) A xa nǔ ɔ kpé hǔn, lɛ̌ xo ɖɛ dó dó kú nú Jexóva nú Xó tɔn e é ná we é, bo byɔ́ ɛ ɖɔ é ní d’alɔ we bónú a ná zán nǔ e a xa é.

 6. Aniwú nǔɖé lɛ́ kinkanbyɔ́ hwiɖée kpó nǔ kléwun kléwún ɖé lɛ́ sín kɛ́n sísɔ́ kpó ka sixú d’alɔ we hwenu e a ɖo nǔ xa wɛ é? (Lɛ̌ kpɔ́n fɔtóo ɔ.)

⁶ Wěɖexámɛ we ɖěvo lɛ́ ɖíe bo sixú d’alɔ we bɔ a ná mɔ nukúnnú jɛ Biblu ɔ mɛ hú gǎn. Nɔ kan nǔɖé lɛ́ byɔ́ hwiɖée dó nǔ e xa wɛ a ɖe é wú. Ényí a ɖo nǔɖé xa wɛ ɖo Biblu mɛ hǔn, nɔ ba xósin nǔkanbyɔ́ élɔ́ lɛ́ tɔn: ‘Mɛ tají tɛ́ lɛ́ xó ɖɔ wɛ è ka ɖe? Mɛ̌ ka ɖo xó ɖɔ wɛ? Mɛ̌ ɖɔ xó ná wɛ é ka ɖe? Aniwú? Fítɛ́ nǔ ɔ ka ɖo jijɛ ɖe wɛ? Hwetɛ́nu nǔ ɔ ka ɖo jijɛ wɛ?’ Nǔkanbyɔ́ mɔ̌hun lɛ́ ná d’alɔ we bɔ a ná lin tamɛ dó nǔ tají ɖěɖěe ɖo nǔ e xa wɛ a ɖe é mɛ lɛ́ é jí, lobo lɛ́ xwedó. Gɔ́ ná ɔ, ényí a ɖo nǔ xa wɛ hǔn, nɔ sɔ́ kɛ́n nǔ kléwún kléwún ɖé lɛ́ tɔn ɖ’ayǐ. Ényí a nɔ wa mɔ̌ ɔ, a ná lin tamɛ dó nǔ e a xa é jí hú gǎn; énɛ́ ná d’alɔ we bɔ a ná mɔ nǔ jɛ mɛ ganjí. Gɔ́ ná ɔ, nǔ wlánwlán ɖ’ayǐ nɔ lɛ́ d’alɔ bɔ è nɔ flín nǔ e è xa é. A sixú wlán nǔkanbyɔ́ lɛ́ ɖ’ayǐ, sɔ́ kɛ́n nǔ ɖěɖěe a mɔ ɖo dobanúnǔ towe hwenu lɛ́ é tɔn, sɛ sin xwe nú nǔ tají lɛ́, bo lɛ́ wlán lěe a sixú zán nǔ e a xa lɛ́ é gbɔn é ɖ’ayǐ, alǒ wlán lěe nǔ cí nú we dó nǔ e a xa é wú é kpowun. Nǔ e a wlán ɖ’ayǐ lɛ́ é sixú d’alɔ we bɔ a ná mɔ ɖɔ Xó Mawu tɔn ɔ, wěma e è sɛ́ dó we tlɔlɔ é ɖé wɛ.

 7. Jijɔ tɛ́ sín hudó mǐ ka ɖó hwenu e mǐ ɖo nǔ xa wɛ é? Aniwú? (Matíe 24:15)

⁷ Jezu ɖɔ jijɔ tají ɖé xó bɔ mǐ ɖó hudó tɔn cóbá mɔ nǔ jɛ nǔ e mǐ nɔ xa ɖo Xó Mawu tɔn mɛ lɛ́ é mɛ; ayiɖote wɛ. (Xa Matíe 24:15.) Étɛ́ ka nɔ nyí ayiɖote? Nǔwúkpíkpé e mɛɖé ɖó bo nɔ tuun lěe linlin ɖé cá kan xá ɖěvo gbɔn é kpó lěe linlin ɖé gbɔn vo nú ɖěvo gbɔn é kpó é wɛ. Ayiɖote nɔ zɔ́n bɔ è nɔ mɔ nǔ jɛ xó e è ma ɖɔ nyi wɛn ǎ é mɛ. Gɔ́ ná ɔ, lěe Jezu ɖɔ gbɔn é ɔ, mǐ ɖó hudó ayiɖote tɔn bá dó tuun nǔ ɖěɖěe ɖo jijɛ wɛ bo ɖo blǒbló wɛ bɔ nǔɖɔɖayǐ Biblu tɔn lɛ́ nɔ jɛnu lɛ́ é. Mǐ lɛ́ ɖó hudó jijɔ énɛ́ tɔn bá mɔ tɛn dó ɖu le nǔ ɖěɖěe mǐ nɔ xa ɖo Biblu mɛ lɛ́ é bǐ tɔn.

 8. Nɛ̌ mǐ ka sixú ɖ’ayi te hwenu e mǐ ɖo nǔ xa wɛ é gbɔn?

⁸ Jexóva nɔ ná ayiɖote mɛsɛntɔ́ tɔn lɛ́. Énɛ́ wú ɔ, xo ɖɛ sɛ́dó è bo byɔ́ ɛ ɖɔ é ní d’alɔ we bónú a ná tɛ́n kpɔ́n bo ɖó jijɔ énɛ́. (Nǔx. 2:6) Nɛ̌ a ka sixú wa nǔ sɔgbe xá ɖɛ towe gbɔn? Nɔ xwe sɔ bo nɔ gbéjé nǔ e a xa lɛ́ é kpɔ́n, lobo nɔ ɖ’ayi lěe yě cá kan xá nǔ ɖěvo e a ko tuun lɛ́ é gbɔn é wú. Zǎn azɔ̌wanú Biblu kplɔ́nkplɔ́n tɔn mǐtɔn lɛ́ dó kpé wú. Ði kpɔ́ndéwú ɔ, a sixú zán Anademẹwe Dodinnanu Tọn Na Kunnudetọ Jehovah Tọn Lẹ. Azɔ̌wanú mɔ̌hun lɛ́ ná d’alɔ we bɔ a ná mɔ nǔ jɛ wěmafɔ Biblu tɔn lɛ́ sín tínmɛ wú, bo lɛ́ mɔ ali ɖěɖěe nu a sixú zán yě ɖo gbɛzán towe mɛ ɖe lɛ́ é. (Ebl. 5:14) Ényí a nɔ ɖ’ayi te hwenu e a ɖo nǔ xa wɛ é ɔ, nukúnnúmɔjɛnǔmɛ e a ɖó dó Mawuxówéma ɔ wú é ná lɛ́ jɛjí.

 9. Nǔgbó tají e ɖo Mawuxówéma ɔ mɛ é tɛ́ Saduseɛn lɛ́ ka wɔn ya ná?

⁹ Nǔ e ɖo Nǔwlánwlán mímɛ́ Ebléegbe tɔn lɛ́ sín wěma atɔ́ɔ́n nukɔntɔn lɛ́ mɛ lɛ́ é má Saduseɛn lɛ́ tawun, amɔ̌, yě yí gbe nú nǔgbó tají ɖěɖěe ɖo wěma énɛ́ lɛ́ e Mawu sɔ́ d’ayi mɛ nú mɛ, bɔ è wlán lɛ́ é mɛ lɛ́ é ǎ. Ði kpɔ́ndéwú ɔ, mǐ ní gbéjé lěe Jezu ná xósin yě gbɔn hwenu e yě kan nǔ byɔ́ ɛ dó fínfɔ́n sín kú wú é kpɔ́n. É kanbyɔ́ yě ɖɔ: “Mi xa xó e Mawu ɖɔ nú Mɔyízi é ɖo wěma Mɔyízi tɔn mɛ, ɖo tan e kúnkplá wunkan ɔ é mɛ ǎ cé? É ɖɔ: ‘Un nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’” (Mak. 12:18, 26) É ɖo wɛn ɖɔ Saduseɛn lɛ́ ko xa akpáxwé énɛ́ azɔn mɔ̌kpán có, nǔ e Jezu kanbyɔ́ é xlɛ́ ɖɔ yě kún ké ya nú nǔgbó tají Mawuxówéma ɔ tɔn e kúnkplá fínfɔ́n sín kú é ó.—Mak. 12:27; Luk. 20:38.d

10. Ényí mǐ ɖo nǔ xa wɛ ɔ, étɛ́ lɛ́ wú mǐ ka ɖó ná nɔ ɖó ayi te dó?

¹⁰ Étɛ́ énɛ́ ka sixú kplɔ́n mǐ? Ényí mǐ ɖo nǔ xa wɛ ɔ, mǐ nɔ ba ná ɖó ayi te dó nǔ ɖěɖěe wěmafɔ ɖé, alǒ tan Biblu tɔn ɖé sixú kplɔ́n mǐ lɛ́ é bǐ wú. Mǐ nɔ ba ná mɔ nǔkplɔ́nmɛ nukɔn nukɔntɔn lɛ́ kɛ́ɖɛ́ kpowun ǎ, loɔ, mǐ nɔ lɛ́ ba ná mɔ nǔgbó kpó nǔgbódodó kpó ɖěɖěe gɔ́ngɔ́n, bo ɖo hwlǎhwlá lɛ́ é.

11. Sɔgbe xá 2 Timɔtée 3:16, 17 ɔ, nɛ̌ a ka sixú mɔ nǔ xɔ akwɛ́ lɛ́ ɖo Biblu mɛ gbɔn?

¹¹ Nɛ̌ a ka sixú mɔ nǔ xɔ akwɛ́ lɛ́ hwenu e a ɖo Biblu xa wɛ é gbɔn? Ð’ayi nǔ e 2 Timɔtée 3:16, 17 ɖɔ é wú. (Xa.) Ð’ayi wú ɖɔ wěmafɔ ɔ ɖɔ “nǔ e è wlán dó Mawuxówéma ɔ mɛ ɔ . . . bǐ . . . nyɔ́ nú” (1) è ná sɔ́ dó kplɔ́n nǔ mɛ, (2) bo ná dó ɖe mɛ dó ali jí, (3) bo ná dó ɖe nǔwanyido lɛ́ xlɛ́, (4) lobo ná dó kplɔ́n lěe è ná zán gbɛ ɖagbe gbɔn ɔ mɛ. A sixú ɖu le ɛnɛ énɛ́ lɛ́ e xó è ɖɔ é, é ná bo tlɛ nyí ɖo wěma Biblu tɔn ɖěɖěe a ma nɔ zán mɔ̌ ǎ lɛ́ é mɛ ɔ nɛ́. Gbějé tan ɔ kpɔ́n, bo kpɔ́n nǔ e é kplɔ́n we dó Jexóva, linlin tɔn, alǒ nǔgbódodó Biblu tɔn lɛ́ wú é. Ð’ayi lěe é sixú ɖe mɛ dó ali jí gbɔn é wú. Ényí a nɔ mɔ lěe wěmafɔ lɛ́ nɔ d’alɔ we bɔ a nɔ ɖ’ayi jlǒ, alǒ nǔwalɔ e ma sɔgbe ǎ lɛ́ é wú, lobo nɔ nyi alɔ nú yě gbɔn é kpó lěe yě nɔ d’alɔ we bɔ a nɔ nɔ gbejí nú Jexóva gbɔn é kpó wú hǔn, mɔ̌ wa wɛ a ɖe nɛ́. Gbějé lěe è sixú zán wěmafɔ ɔ dó ɖe nǔwanyido lɛ́ xlɛ́, alǒ jlá linlin masɔgbe ɖé ɖó, vlafo linlin masɔgbe mɛ e a xo go ɖo sinsɛnzɔ́ ɔ mɛ é ɖé tɔn gbɔn é kpɔ́n. Gɔ́ ná ɔ, nɔ ba ali ɖěɖěe nu wěmafɔ lɛ́ sixú gbɛ́ nǔ nú we, alǒ d’alɔ we bɔ a ná ɖó linlin ɖokpó ɔ Jexóva ɖɔhun ɖe é. Ényí a hɛn le ɛnɛ énɛ́ lɛ́ ayi mɛ ɔ, a ná mɔ nǔ xɔ akwɛ́ ɖěɖěe sixú dó jɛ̌ kɔ nú Biblu xixa towe lɛ́ é.

12. Aniwú Jezu ka kanbyɔ́ Falizyɛn lɛ́ ɖɔ: “Mi xa . . . ǎ cé?”

¹² Jezu lɛ́ kanbyɔ́ ɖɔ: “Mi xa . . . ǎ cé?” dó ɖe xlɛ́ ɖɔ Falizyɛn lɛ́ ɖó linlin e ma sɔgbe ǎ é dó Mawuxówéma ɔ wú. (Mat. 12:1-7)e Ðo ninɔmɛ énɛ́ mɛ ɔ, Falizyɛn lɛ́ ɖɔ ɖɔ ahwanvú Jezu tɔn lɛ́ gba gbɔjɛzánsɛ́n ɔ. Jezu zán kpɔ́ndéwú Mawuxówéma ɔ tɔn we, bo lɛ́ ɖe xó sín wěma Ozée tɔn mɛ dó xlɛ́ Falizyɛn lɛ́ ɖɔ yě kún mɔ nǔ jɛ nǔ e wú è ná gbɔjɛzánsɛ́n ɔ é wú ó, yě kún ka nɔ lɛ́ kú nǔbláwǔ nú mɛ ó. Aniwú nǔ ɖěɖěe mɛ énɛ́ lɛ́ xa ɖo Mawuxówéma ɔ mɛ lɛ́ é ma ka wa azɔ̌ ɖo yě wú ǎ? Bo ná dó mɔ xó ɖɔ dó mɛ ɖěvo lɛ́ wú, bo lɛ́ yí go wú wɛ yě nɔ xa nǔ ɔ. Jijɔ énɛ́ lɛ́ e yě ɖó é zɔ́n bɔ nukúnnú mimɔ jɛ nǔ e yě nɔ xa é mɛ gló yě.—Mat. 23:23; Jaan 5:39, 40.

13. Linlin tɛ́ mǐ ka ná nɔ ɖó hwenu e mǐ ɖo Biblu xa wɛ é? Aniwú?

¹³ Xó ɖěɖěe Jezu ɖɔ lɛ́ é kplɔ́n mǐ ɖɔ mǐ ɖó ná nɔ xa Biblu kpó linlin e sɔgbe é kpó. Mǐ ɖó ná cí Falizyɛn lɛ́ ɖɔhun ǎ, loɔ, mǐ ɖó ná nɔ sɔ́ mǐɖée hwe, bo ná nɔ lɛ́ ɖo gbesisɔmɛ bá kplɔ́n nǔ. Mǐ ɖó ná nɔ “sɔ́ xomɛfífá dó yí gbe bónú xó e kpé wú bo ná hwlɛ́n [mǐ] é ní dó ɖɔ do ɖo ayi [mǐtɔn] lɛ́ mɛ.” (Ja. 1:21) Ényí mǐ nɔ fá xomɛ ɔ, mǐ ná yí gbe bɔ Xó Mawu tɔn ná húzú mɛ alɔkpa e mǐ nyí é. Ényí mǐ ma nɔ mɔ xó ɖɔ dó nǔ wú, alǒ yí go ǎ ɔ jɛ́n nǔkplɔ́nmɛ Biblu tɔn ɖěɖěe kúnkplá nǔbláwǔkúnúmɛ, wǔvɛ́sexámɛ kpó wǎnyíyí kpó lɛ́ é ná wa azɔ̌ ɖo mǐ wú.

14. Nɛ̌ mǐ ka sixú wa gbɔn bo tuun ɖɔ mǐ ɖo Biblu jó dó wɛ bɔ é ɖo azɔ̌ wa ɖo mǐ wú wɛ? (Lɛ̌ kpɔ́n fɔtóo lɛ́.)

¹⁴ Ényí mǐ nɔ jó Xó Mawu tɔn dó bɔ é nɔ w’azɔ̌ ɖo mǐ wú ɔ, lěe mǐ nɔ wa nǔ gbɔn xá mɛ ɖěvo lɛ́ é wɛ nɔ xlɛ́. Ðó Falizyɛn lɛ́ ma jó Xó Mawu tɔn dó bɔ é w’azɔ̌ ɖo yě wú ǎ wútu ɔ, yě “ɖó hwɛ nú xomɛvɔ́nɔ lɛ́.” (Mat. 12:7) Ðo ali ɖokpó ɔ nu ɔ, linlin e mǐ nɔ ɖó dó mɛ ɖěvo lɛ́ wú é, gɔ́ nú lěe mǐ nɔ wa nǔ gbɔn xá yě é nɔ xlɛ́ ɖɔ mǐ ɖo Xó Mawu tɔn jó dó wɛ bɔ é ɖo azɔ̌ wa ɖo mǐ wú wɛ, alǒ gbɔ. Ði kpɔ́ndéwú ɔ, mǐ ka nɔ ɖɔ nǔ ɖagbe e wú mǐ ɖ’ayi ɖo mɛ ɖěvo lɛ́ wú é hwɛhwɛ a, alǒ nǔwanyido yětɔn lɛ́ wú wɛ mǐ nɔ yá wǔ ɖɔ xó dó? Mǐ ka nɔ kú nǔbláwǔ nú mɛ, lobo nɔ lɛ́ ɖo gbesisɔmɛ bo ná sɔ́ hwɛ kɛ mɛ a, alǒ mǐ nɔ mɔ xó ɖɔ dó mɛ wú, lobo nɔ lɛ́ hɛn mɛ dó xomɛ? Ényí mǐ nɔ jó nǔ e mǐ nɔ xa lɛ́ é dó bɔ yě nɔ w’azɔ̌ ɖo linlin mǐtɔn lɛ́, lěe nǔ nɔ cí nú mǐ é kpó nǔwalɔ mǐtɔn lɛ́ kpó wú, alǒ gbɔ ɔ, xósin nǔkanbyɔ́ énɛ́ lɛ́ tɔn wɛ ná xlɛ́.—1 Tim. 4:12, 15; Ebl. 4:12.

15. Nɛ̌ nǔ ka cí nú Jezu dó Nǔwlánwlán mímɛ́ lɛ́ wú?

¹⁵ Jezu yí wǎn nú Nǔwlánwlán mímɛ́ lɛ́, bɔ lěe nǔ nɔ cí n’i d’é wú é tɔ́n ɖo nǔɖɔɖayǐ e ɖo Ðɛhan 40:9 mɛ é mɛ; fínɛ́ ɖɔ: “Mawu ce, jlǒ towe wiwa nɔ víví nú mì, sɛ́n towe ɖo ayi ce mɛ ganjí.” Ðó Jezu yí wǎn nú Mawuxówéma ɔ wútu ɔ, é ɖ’awǎjijɛ, bo lɛ́ kpo ɖo Jexóva sɛn wɛ. Ényí mǐ nɔ xa Xó Mawu tɔn, bo kplɔ́n lobo yí wǎn ná ɔ, mǐ lɔmɔ̌ sixú ɖó awǎjijɛ, lobo lɛ́ kpo ɖo Jexóva sɛn wɛ.—Ðɛh. 1:1-3.

16. Étɛ́ lɛ́ a ka ná wa bo ná dó ɖu le Xó Mawu tɔn xixa tɔn hú gǎn? (Kpɔ́n gbǎví “Xó e Jezu ɖɔ lɛ́ é sixú d’alɔ we bɔ a ná nɔ mɔ nǔ jɛ nǔ e a nɔ xa lɛ́ é mɛ.”)

¹⁶ Mi nú xó Jezu tɔn lɛ́ kpó kpɔ́ndéwú tɔn kpó ní d’alɔ mǐ, nú mǐ ní bló bónú Biblu xixa mǐtɔn ní kpɔ́n te d’é jí. Mǐ sixú nɔ xo ɖɛ, nɔ xa nǔ dɛ̌dɛ̌, nɔ kan nǔɖé lɛ́ byɔ́ mǐɖée, lobo nɔ lɛ́ sɔ́ kɛ́n nǔ kléwún kléwún ɖé lɛ́ tɔn dó bló bónú nukúnnúmɔjɛnǔmɛ e mǐ ɖó dó wěmafɔ Biblu tɔn lɛ́ wú é ná kpɔ́n te d’é jí. Mǐ sixú nɔ xwe sɔ dó gbéjé nǔ e mǐ nɔ xa lɛ́ é kpɔ́n kpó alɔdó wěma mǐtɔn lɛ́ tɔn kpó, dó xlɛ́ ɖɔ mǐ ɖó ayi te. Mǐ sixú kplɔ́n bo nɔ zán Biblu ganjí, gbɔn nǔ xɔ akwɛ́ ɖěɖěe ɖo tan e ma tlɛ má dó mǐ ganjí ǎ lɛ́ é mɛ é biba gblamɛ. Gɔ́ ná ɔ, ényí mǐ nɔ ɖó linlin e sɔgbe é hwenu e mǐ ɖo nǔ xa wɛ é ɔ, mǐ ná jó Xó Mawu tɔn dó bɔ é ná wa azɔ̌ ɖo mǐ wú. Ényí mǐ wa nǔ e wú mǐ kpé é bǐ bo nɔ bló nǔ énɛ́ lɛ́ ɔ, mǐ ná ɖu Biblu xixa mǐtɔn sín le hú gǎn, lobo ná lɛ́ sɛkpɔ́ Jexóva d’é jí.—Ðɛh. 119:17, 18; Ja. 4:8.