“Mi zán nǔwúkpíkpé tamɛ linlin tɔn mitɔn, mi nɔ acéjí!”

 1. Étɛ́ Jezu ka ɖɔ nú ahwanvú tɔn lɛ́ dó vivɔnu gbɛ ɔ tɔn wú? Akpá tɛ́ é ka gba nú yě?

AZǍN yɔywɛ ɖé jɛ nukɔn nú kú Jezu tɔn ɔ, ahwanvú tɔn ɛnɛ kanbyɔ́ ɛ ɖɔ: “Étɛ́ ka ná nyí wuntun . . . azǎn gǔdo gúdo tɔn gbɛ élɔ́ tɔn lɛ́” tɔn? (Mat. 24:3) É cí ɖɔ hwenu e è ná sú kún dó nú Jeluzalɛ́mu kpó tɛ́npli tɔn kpó é wú kan nǔ byɔ́ dó wɛ ahwanvú lɛ́ ɖe ɖɔhun. Ðo xósin e Jezu ná é mɛ ɔ, é nyí hwenu e è ná sú kún dó nú Jeluzalɛ́mu é kɛ́ɖɛ́ wú wɛ é ɖɔ xó dó ǎ, é lɛ́ ɖɔ xó dó “azǎn gǔdo gúdo tɔn gbɛ élɔ́ tɔn lɛ́” wú. Jezu ɖɔ xó élɔ́ dó vivɔnu gbɛ ɔ tɔn wú: “Mɛ ɖěbǔ tuun azǎn ɔ alǒ gan ɔ mɛ ǎ, wɛnsagun e ɖo jǐxwé lɛ́ é tuun ǎ, Vǐ ɔ lɔ tuun ǎ, loɔ, Tɔ́ ɔ kɛ́ɖɛ́ wɛ tuun.” Énɛ́ gúdo ɔ, é gb’akpá nú ahwanvú tɔn lɛ́ bǐ ɖɔ: “Mi nɔ wunzɛn.”—Mak. 13:32-37.

 2. Étɛ́wú é ka ɖo tají ɖɔ klisánwun xwe kanweko nukɔntɔn ɔ tɔn lɛ́ ní nɔ wunzɛn?

² Klisánwun xwe kanweko nukɔntɔn ɔ tɔn e nyí Jwifu lɛ́ é ɖó ná nɔ wunzɛn cóbá gán. Jezu ɖɔ nǔ e ahwanvú tɔn lɛ́ ná mɔ bo ná tuun ɖɔ hwenu e è ná sú Jeluzalɛ́mu kpó tɛ́npli tɔn kpó sín kún dó é ko sɛ yá é sín xó nú yě. É ɖɔ: “Hwenu e mi ná mɔ bɔ ahwankpá lɛ́ ná ɖó gɔnu lɛ́ lɛ̌ dó Jeluzalɛ́mu é ɔ, mi ní tuun ɖɔ hwenu e è ná sú kún tɔn dó é ko sɛkpɔ́.” Hwenɛ́nu ɔ, yě ɖó ná xwedó akpágbanúmɛ Jezu tɔn, lobo “jɛ hinhɔn yi sókan mɛ jí.” (Luk. 21:20, 21) Mɛ ɖěɖěe ɖ’ayi te dó akpágbanúmɛ énɛ́ wú lɛ́ é gán, hwenu e Hlɔ̌manu lɛ́ wá sú kún dó nú Jeluzalɛ́mu é.

 3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Azǎn gǔdo gúdo tɔn gbɛ nyanya élɔ́ tɔn lɛ́ mɛ nɔ gbɛ ɖe wɛ mǐ ɖe. Énɛ́ wú ɔ, mǐ lɔ ɖó ná zán nǔwúkpíkpé tamɛ linlin tɔn mǐtɔn, lobo nɔ wunzɛn. Ðo xóta élɔ́ mɛ ɔ, mǐ ná ɖɔ xó dó lěe mǐ sixú nɔ jlɛ̌ jí gbɔn hwenu e mǐ ɖo nǔ ɖěɖěe ɖo jijɛ wɛ ɖo gbɛ ɔ mɛ lɛ́ é kpɔ́n wɛ é, lěe mǐ sixú cɔ́ mǐɖée gbɔn é kpó lěe mǐ sixú zán hwenu e kpo é ganjí gbɔn é kpó jí.

 4. Lěe nǔ ɖěɖěe ɖo jijɛ wɛ ɖo gbɛ ɔ mɛ lɛ́ é ɖo blǒbló wɛ bɔ nǔɖɔɖayǐ Biblu tɔn lɛ́ ɖo jijɛnu wɛ gbɔn é ɖó ná dɔn mǐ. Aniwú?

⁴ Nǔ e wú lěe nǔ ɖěɖěe ɖo jijɛ wɛ ɖo gbɛ ɔ mɛ lɛ́ é ɖo blǒbló wɛ bɔ nǔɖɔɖayǐ Biblu tɔn lɛ́ ɖo jijɛnu wɛ gbɔn é ná dɔn mǐ é sukpɔ́. Ði kpɔ́ndéwú ɔ, Jezu ɖɔ nǔ ɖěɖěe ná jɛ bo ná d’alɔ mǐ bɔ mǐ ná tuun ɖɔ hwenu e è ná sú kún dó nú gbɛ Satáan tɔn é ko sɛkpɔ́ é xó nú mǐ. (Mat. 24:3-14) Mɛsɛ́dó Piyɛ́ɛ dó wǔsyɛ́n lanmɛ nú mǐ ɖɔ mǐ ní ɖ’ayi te dó lěe nǔɖɔɖayǐ Biblu tɔn lɛ́ ɖo jijɛnu wɛ gbɔn é wú, énɛ́ ɔ, nǔɖiɖi mǐtɔn ná lí dǒ. (2 Pi. 1:19-21) Wěma Biblu tɔn gǔdo tɔn ɔ bɛ́ gbɔn lě: “Nǔ e ɖo hwlǎhwlá, bɔ Jezu Klísu ɖe xlɛ́ céɖécéɖé lɛ́ wɛ ɖo wěma élɔ́ mɛ. Mawu ɖe nǔ énɛ́ lɛ́ xlɛ́ ɛ, bónú é ná xlɛ́ nǔ e ná jɛ ɖo malínmálín mɛ lɛ́ mɛsɛntɔ́ tɔn lɛ́.” (Nǔɖe. 1:1) Énɛ́ wú ɔ, nǔ e ɖo jijɛ wɛ ɖo gbɛ ɔ mɛ din lɛ́ é kpó lěe yě sixú bló bɔ nǔɖɔɖayǐ Biblu tɔn lɛ́ jɛnu gbɔn é kpó tuuntuun nɔ ɖu ayi mɛ nú mǐ titewungbe tɔn. Gɔ́ ná ɔ, xó ɖiɖɔ dó nǔ énɛ́ lɛ́ e ɖo jijɛ wɛ lɛ́ é wú xá mǐɖée sixú nɔ sɔ́ akpakpa mǐ.

 5. Étɛ́ mǐ ka ɖó ná nyi alɔ ná? Étɛ́ mǐ ka ɖó ná wa? (Lɛ̌ kpɔ́n fɔtóo lɛ́.)

⁵ É ɖo mɔ̌ có, ényí mǐ ɖo xó ɖɔ dó nǔɖɔɖayǐ Biblu tɔn lɛ́ wú wɛ ɔ, mǐ ɖó ná nyi alɔ nú lěe mǐ lin ɖɔ nǔ lɛ́ ná jɛ gbɔn é ɖiɖɔ. Aniwú? Ðó mǐ jló ná ɖɔ nǔ ɖěbǔ e ná dɔn kínklán wá agun ɔ mɛ é ǎ. Ði kpɔ́ndéwú ɔ, mǐ sixú nɔ se bɔ gǎn gbɛ ɔ tɔn lɛ́ nɔ ɖɔ lěe yě sixú ɖe ɖɛ tagba bǔnɔ ɖé, bo hɛn fífá kpó ayijayǐ kpó wá gbɔn é. Mǐ ɖó ná ɖɔ ɖɔ xó énɛ́ lɛ́ ɖo blǒbló wɛ bɔ nǔɖɔɖayǐ e ɖo 1 Tɛsaloníkinu lɛ́ 5:3 mɛ é ɖo jijɛnu wɛ ǎ, é nyɔ́ wa ɔ, mǐ ɖó ná tuun nǔ gǔdo gúdo tɔn e tɔ́n dó xó énɛ́ wú é. Ényí xó e mǐ nɔ ɖɔ lɛ́ é nɔ jínjɔ́n nǔ e tutoblónúnǔ Jexóva tɔn nɔ ɖe tɔ́n lɛ́ é jí hǔn, alɔ dó agun ɔ wɛ mǐ ɖe mɔ̌ bónú é ná nɔ bǔ, “bo ɖó linlin ɖokpó ɔ” nɛ́.—1 Kɔ. 1:10; 4:6.

 6. Étɛ́ lɛ́ 2 Piyɛ́ɛ 3:11-13 ka sixú kplɔ́n mǐ?

⁶ Xa 2 Piyɛ́ɛ 3:11-13. Mɛsɛ́dó Piyɛ́ɛ d’alɔ mǐ bɔ mǐ ná kpo ɖo linlin e ɖo jlɛ̌ jí é ɖó wɛ hwenu e mǐ ɖo nǔɖɔɖayǐ Biblu tɔn lɛ́ gbéjé kpɔ́n wɛ é. É byɔ́ mǐ ɖɔ mǐ ní “hɛn [wǐwá azǎn Jexóva tɔn tɔn] ayǐ mɛ ganjí.” Aniwú? Ényí tíntɛ́nkpɔ́n wɛ mǐ ɖe bo ná tuun “azǎn ɔ kpó gan” e mɛ Jexóva ná bló bɔ Aamagedɔ́ni ná wá dó é kpó ǎ, loɔ, biba wɛ mǐ ɖe bo ná zán hwenu e kpo nú mǐ é dó “ɖó walɔ mímɛ́, bo ná nɔ wa gbejí nɔ nú Mawu sín nǔ lɛ́.” (Mat. 24:36; Luk. 12:40) Ðo xógbe ɖěvo mɛ ɔ, mǐ ba ná kpo ɖo gbɛ ɖagbe zán wɛ, lobo kú d’é jí ɖɔ gǎn e dó wɛ mǐ ɖe bo ɖo Jexóva sɛn wɛ é nɔ ɖe wǎn ɖaxó e mǐ yí n’i é xlɛ́. Ayi sísɔ́ ɖó énɛ́ jí ná d’alɔ mǐ bɔ mǐ ná cɔ́ mǐɖée.

 7. Nɛ̌ mǐ ka nɔ xlɛ́ ɖɔ mǐ ɖo mǐɖée cɔ́ wɛ gbɔn? (Luki 21:34)

⁷ Ényí nǔ e ɖo jijɛ wɛ ɖo gbɛ ɔ mɛ lɛ́ é kɛ́ɖɛ́ wú wɛ Jezu ɖɔ è ní cɔ́ mɛɖée dó ǎ; é lɛ́ ɖɔ ɖɔ è ní cɔ́ mɛɖée. Xó énɛ́ jɛ wě ɖo akpá e é gba nú mɛ ɖo Luki 21:34 mɛ é mɛ. (Xa.) Ð’ayi xó e Jezu ɖɔ é wú: “Mi cɔ́ miɖée.” Mɛ e nɔ cɔ́ éɖée é nɔ ɖ’ayi te dó nǔ ɖěbǔ e ná wa nǔ dó xɔ́ntɔn e é zun xá Jexóva é wú é wú, lobo nɔ tɛ́n kpɔ́n bo nɔ nyi alɔ ná. Mɔ̌ mɛ ɔ, é nɔ kpo ɖo wǎnyíyí Mawu tɔn mɛ.—Nǔx. 22:3; Ju. 20, 21.

 8. Akpá tɛ́ mɛsɛ́dó Pɔ́lu ka gba nú klisánwun lɛ́?

⁸ Mɛsɛ́dó Pɔ́lu gb’akpá nú klisánwun lɛ́ ɖɔ yě ní cɔ́ yěɖée. Ði kpɔ́ndéwú ɔ, é ɖɔ xó élɔ́ nú klisánwun Efɛ́zi tɔn lɛ́: “Mi . . . nɔ cɔ́ lěe mi nɔ zán gbɛ gbɔn é ganjí, mi ma nɔ zán gbɛ xlonɔ lɛ́ ɖɔhun ó, loɔ, nǔnywɛ́tɔ́ lɛ́ ɖɔhun.” (Efɛ́. 5:15, 16) Satáan nɔ ɖo gǎn dó wɛ hwebǐnu bo ná wa nǔ dó xɔ́ntɔn e mǐ zun xá Jexóva é wú, énɛ́ wú wɛ Biblu ɖe wě élɔ́ xá mǐ: “Mi ní nɔ ɖo nukúnnú mɔ jɛ nǔ e nyí jlǒ Jexóva tɔn é mɛ wɛ.” Énɛ́ ɔ, mǐ ná cɔ́ mǐɖée bo ná jɛ mɔ Satáan tɔn ɖěbǔ mɛ ǎ.—Efɛ́. 5:17.

 9. Nɛ̌ mǐ ka sixú tuun jlǒ Jexóva tɔn gbɔn?

⁹ Biblu slɛ́ nǔ e sixú wa nǔ dó xɔ́ntɔn e mǐ zun xá Jexóva é wú lɛ́ é bǐ ǎ. Mǐ nɔ wá gbeta ɖé lɛ́ kɔn hwɛhwɛ bɔ Biblu ka ɖɔ xó ɖě dó yě wú tlɔlɔ ǎ. Cóbónú mǐ ná wá gbeta e nǔnywɛ́ kpé lɛ́ é kɔn ɔ, mǐ ɖó ná tuun nǔ e nyí “jlǒ Jexóva tɔn” é. Ényí mǐ nɔ xa Xó Mawu tɔn hwɛhwɛ lobo nɔ lin tamɛ d’é jí ɔ, mǐ sixú tuun nǔ e nyí jlǒ Jexóva tɔn é. Lě do mǐ tuun jlǒ Jexóva tɔn, lobo lɛ́ tɛ́n kpɔ́n bo ɖó “linlin Klísu tɔn” sɔ é ɔ, vlafo, mɔ̌ do wɛ mǐ ná nɔ wa nǔ “nǔnywɛ́tɔ́ lɛ́” ɖɔhun sɔ, ényí sɛ́n ɖé ma tlɛ ɖe bo ɖɔ nǔ e mǐ ná wa é nú mǐ ǎ ɔ nɛ́. (1 Kɔ. 2:14-16) Awǒvinú ɖé lɛ́ tíin bɔ é nɔ bɔ wǔ bɔ è nɔ ɖ’ayi yě wú; amɔ̌, ɖěvo lɛ́ tɔn nyí mɔ̌ ǎ.

10. Awǒvinú tɛ́ lɛ́ mɔ̌ mǐ ka ɖó ná nyi alɔ ná?

¹⁰ Nǔ élɔ́ lɛ́ ɖo awǒvinú ɖěɖěe mǐ ɖó ná nyi alɔ ná lɛ́ é mɛ: alɔlwɛ́ ɖúɖú, ahan nu díngan, nǔ ɖu zɛ xwé wú, xó gblégblé ɖiɖɔ, káká jɛ video e mɛ dǎkaxixo ɖe lɛ́ é, fɔtóo nǔblíblíwiwa tɔn lɛ́ kpó nǔ mɔ̌hun ɖěvo lɛ́ kpó kpínkpɔ́n jí. (Ðɛh. 101:3) Kɛntɔ́ mǐtɔn Awǒvi nɔ ɖo ali e nu é ná gbɔn bo ná wa nǔ dó xɔ́ntɔn e mǐ zun xá Jexóva é wú é ba wɛ hwebǐnu. (1 Pi. 5:8) Ényí mǐ ma ɖo acéjí ǎ ɔ, Satáan sixú dó mɛnújlójló, nǔgbómaɖɔ, nukúnkɛn, wǎngbɛ́númɛ, goyíyí kpó mɛhɛndóxomɛ kpó dó ayi mǐtɔn mɛ. (Ga. 5:19-21) Linlin énɛ́ lɛ́ nɔ syɛ́n sɔmɔ̌ ɖo bǐbɛ́mɛ ǎ. Amɔ̌, ényí mǐ ma yá wǔ nya yě dó gbě ǎ ɔ, yě ná kpo ɖo susu wɛ ɖo ayi mǐtɔn mɛ, bo ná wá wa nǔ dó mǐ wú, lěe nǔ aɖǐvɛ́nɔ ɖé nɔ wa nǔ dó mɛ wú gbɔn é ɖɔhun.—Ja. 1:14, 15.

11. Awǒvinú e ma nɔ jɛ wě mɔ̌ ǎ é tɛ́ mǐ ka ɖó ná nyi alɔ ná? Aniwú?

¹¹ Awǒvinú e ma nɔ jɛ wě mɔ̌ ǎ é ɖé wɛ gbɛ̌ nyanya lɛ́ dídó nyí. Kpɔ́ndéwú ɖé ɖíe. Mǐ ní ɖɔ ɖɔ a nɔ w’azɔ̌ xá mɛ e ma nyí Kúnnuɖetɔ́ Jexóva tɔn ǎ é ɖé. A ba ɖɔ azɔ̌gbɛ́ towe ní nɔ ɖó linlin ɖagbe dó Kúnnuɖetɔ́ Jexóva tɔn lɛ́ wú, énɛ́ wú ɔ, a nɔ nyɔ́ xomɛ dó wǔ tɔn, bo nɔ lɛ́ d’alɔ ɛ. Hweɖélɛ́nu ɔ, a tlɛ nɔ ɖu nǔ xá ɛ. Hwenu ɖo yiyi wɛ é ɔ, a jɛ nǔ ɖu ɖó kpɔ́ xá ɛ jí hwɛhwɛ. Sín hweɖénu jɛ hweɖénu ɔ, azɔ̌gbɛ́ towe nɔ ɖɔ xó gblégblé lɛ́. Ðo bǐbɛ́mɛ ɔ, a yí wǎn ná ǎ. Amɔ̌, a se xó énɛ́ lɛ́ káká bɔ é wá yá é ɔ, yě sɔ́ nɔ ɖɔ nǔɖé nú we ǎ. Gbe ɖokpó kpowun ɔ, azɔ̌gbɛ́ towe ylɔ́ we ɖɔ hwi ní wá nu ahan xá émí ɖo azɔ̌ gǔdo, bɔ a yí gbe. Wǎgbɔ tɔn ɔ, a jɛ nǔ lin jí azɔ̌gbɛ́ towe ɖɔhun. É sɔ́ ná lín cóbónú a ná jɛ nǔ wa jí éɖɔhun ǎ. É ɖo wɛn ɖɔ mǐ nɔ nyɔ́ xomɛ dó mɛ lɛ́ bǐ wú, bo nɔ lɛ́ sí yě, amɔ̌, mǐ ɖó ná flín ɖɔ mɛ e kpó mǐ kpó nɔ zán hwenu ɖó kpɔ́ lɛ́ é nɔ wa nǔ dó mǐ wú titewungbe tɔn; é sixú nyí dó ɖagbe jí, alǒ dó nyanya jí. (1 Kɔ. 15:33) Ényí mǐ nɔ cɔ́ mǐɖée lěe Jezu byɔ́ mǐ ɖɔ mǐ ní wa gbɔn é ɔ, mǐ ná nyi alɔ nú gbɛ̌ e ma ɖo dandan ǎ lɛ́ é dídó xá mɛ ɖěɖěe ma nɔ zán gbɛ sɔgbe xá nǔgbódodó Jexóva tɔn ǎ lɛ́ é. (2 Kɔ. 6:15) Mǐ ná mɔ awǒvinú lɛ́ lobo nyi alɔ ná.

12. Ée ahwanvú Jezu tɔn lɛ́ ɖo te kpɔ́n kún súsú dó nú Jeluzalɛ́mu kpó tɛ́npli tɔn kpó é ɔ, azɔ̌ tɛ́ yě ka wa?

¹² Jezu ba ɖɔ hwenu e ahwanvú émítɔn lɛ́ ná ɖo te kpɔ́n kún súsú dó nú Jeluzalɛ́mu kpó tɛ́npli tɔn kpó é ɔ, alɔnu yětɔn ní ján. Jezu zɔ́n azɔ̌ ɖé yě ɖɔ yě ní wa. É ɖe gbe nú yě ɖɔ yě ní jlá wɛn ɖagbe ɔ “ɖo Jeluzalɛ́mu, Judée kpó Samalíi kpó, káká yi fí e lín hú gǎn ɖo ayǐkúngban jí é.” (Mɛ. 1:6-8) Azɔ̌ kpligidi ɖé wɛ nyí énɛ́ bɔ é zɔ́n yě. Sɔ́ e yě sɔ́ yěɖée jó nú azɔ̌ énɛ́ é zɔ́n bɔ yě zán hwenu yětɔn ganjí.

13. Étɛ́wú é ka byɔ́ ɖɔ mǐ ní zán hwenu mǐtɔn ganjí? (Kolósinu lɛ́ 4:5)

¹³ Xa Kolósinu lɛ́ 4:5. Bónú mǐ ná cɔ́ mǐɖée ɔ, é byɔ́ ɖɔ mǐ ní lin tamɛ dó nǔjɔnǔ mɛ dó lěe zán hwenu mǐtɔn gbɔn wɛ mǐ ɖe é wú. “Nǔmaɖónukún lɛ́” sixú wa nǔ dó mǐ mɛ ɖěbǔ wú. (Nǔt. 9:11, nwt) Mǐ sixú kú ajijimɛ.

14-15. Nɛ̌ mǐ ka sixú zán hwenu mǐtɔn ganjí gbɔn? (Eblée lɛ́ 6:11, 12) (Lɛ̌ kpɔ́n fɔtóo ɔ.)

¹⁴ Mǐ sixú zán hwenu mǐtɔn ganjí gbɔn jlǒ Jexóva tɔn wiwa kpó blǒbló bónú xɔ́ntɔn e mǐ zun xá Jexóva é ní lí dǒ kpó gblamɛ. (Jaan 14:21) Mǐ ɖó ná “syɛ́nlǐn, bo lí dǒ, lobo nɔ ɖo bǐbí dó Aklúnɔ sín azɔ̌ ɔ wú d’é jí wɛ.” (1 Kɔ. 15:58) Énɛ́ ɔ, lěe mǐ zán hwenu mǐtɔn gbɔn cóbɔ vivɔnu ɔ wá é ná vɛ́ nú mǐ kpɔ́n ǎ; é sixú nyí vivɔnu gbɛzán mǐtɔn tɔn, alǒ vivɔnu gbɛ élɔ́ tɔn.—Mat. 24:13; Hlɔ̌. 14:8.

¹⁵ Égbé ɔ, Jezu kpo ɖo ali xlɛ́ ahwanvú tɔn lɛ́ wɛ ɖo wɛn ɖagbe Axɔ́súɖuto ɔ tɔn e jlá wɛ yě ɖe gbɔn ayǐkúngban ɔ bǐ jí é kɔn. É ɖe akpá e é dó é. Jezu nɔ kplɔ́n mǐ lěe mǐ ná jlá wɛn ɔ gbɔn é, bo nɔ lɛ́ ná mǐ azɔ̌wanú e sín hudó mǐ ɖó bo ná dó jlá wɛn ɖagbe ɔ gbɔn fí bǐ é. (Mat. 28:18-20) Ényí mǐ nɔ ɖó kan dó wɛn ɖagbe ɔ jíjlá kpó nǔ kplɔ́nkplɔ́n mɛ lɛ́ kpó sín azɔ̌ ɔ wú hǔn, azɔ̌ e nyí mǐtɔn é wa wɛ mǐ ɖe mɔ̌ nɛ́; ényí mǐ lɛ́ ɖo wunzɛn bo ɖo te kpɔ́n vivɔnu gbɛ élɔ́ tɔn hǔn, azɔ̌ e nyí mǐtɔn é wa wɛ mǐ lɛ́ ɖe mɔ̌ nɛ́. Ényí mǐ nɔ xwedó wěɖexámɛ e ɖo Eblée lɛ́ 6:11, 12 mɛ é ɔ, mǐ ná hɛn nukúnɖíɖó mǐtɔn syɛ́nsyɛ́n “káká sɔ́yi vivɔnu.”—Xa.

16. Étɛ́ mǐ ka kán ɖ’é jí bá wa?

¹⁶ Jexóva ko sɔ́ azǎn e gbe é ná sú kún dó nú gbɛ Satáan tɔn é kpó gan ɔ mɛ kpó. Hwenu e é ɖó dó é su ɔ, é ná bló bɔ nǔɖɔɖayǐ e kúnkplá gbɛ yɔ̌yɔ́ ɔ, bo ɖo Xó tɔn mɛ lɛ́ é bǐ ná jɛnu. Amɔ̌ hweɖélɛ́nu ɔ, mǐ sixú lin ɖɔ vivɔnu ɔ ɖo lǐnlín wɛ. É ɖo mɔ̌ có, azǎn Jexóva tɔn ná gbɔ hwenu ǎ, é ná wá “jɛ́n wɛ.” (Xab. 2:3) Énɛ́ wú ɔ, mi nú mǐ ní kán ɖ’é jí bá ‘kpo ɖo te nɔ kpɔ́n Jexóva wɛ,’ dó xlɛ́ ɖɔ mǐ ɖeji dó Mawu e nɔ “hwlɛ́n [mǐ] gán” é wú.—Micée 7:7.