Nyǐkɔ towe ka ɖo “gbɛwéma” ɔ mɛ a?

 1. Sɔgbe xá Malacíi 3:16 ɔ, wěma tɛ́ wlán wɛ Jexóva ka ɖe? Étɛ́ ka ɖo wěma énɛ́ mɛ?

JEXÓVA ɖo wěma bǔnɔ ɖé wlán wɛ sín xwe afatɔ́n mɔ̌kpán ɖíe. Nyǐkɔ lɛ́ wlán dó wěma énɛ́ mɛ wɛ é ɖe; Abɛ́li e nyí kúnnuɖetɔ́ gbejínɔtɔ́ nukɔntɔn ɔ é sín nyǐkɔ wɛ è dó wěma énɛ́ mɛ jɛ nukɔn.b (Luk. 11:50, 51) Sín hwenɛ́nu ɔ, Jexóva ko dó nyǐkɔ gěgé ɖěvo lɛ́ wěma énɛ́ mɛ, bɔ ɖo égbé ɔ, nyǐkɔ lǐvi mɔ̌kpán wɛ ɖo wěma énɛ́ mɛ. È ylɔ́ wěma énɛ́ ɖɔ “wěma mɛ flínflín tɔn,” “gbɛwéma,” kpó “wěma mlámlá gbɛ tɔn” kpó ɖo Biblu mɛ. Ðo xóta élɔ́ mɛ ɔ, “gbɛwéma” wɛ mǐ ná zán dó dó gesí wěma énɛ́.—Xa Malacíi 3:16, nwt; Nǔɖe. 3:5; 17:8.

 2. Mɛ̌ mɛ̌ e sín nyǐkɔ è ka dó gbɛwéma ɔ mɛ? Étɛ́ mǐ ka sixú wa bɔ è ná dó nyǐkɔ mǐtɔn wěma énɛ́ mɛ?

² Mɛ ɖěɖěe nɔ sɛn Jexóva kpó sísí kpó, alǒ nɔ ɖó sísí e gɔ́ngɔ́n é n’i, bo lɛ́ yí wǎn nú nyǐkɔ tɔn lɛ́ é bǐ sín nyǐkɔ wɛ ɖo wěma bǔnɔ énɛ́ mɛ. Ali ɔ ná hun nú yě bɔ yě ná mɔ gbɛ mavɔmavɔ. Égbé ɔ, ényí mǐ zun xɔ́ntɔn vívɛ́ xá Jexóva gbɔn vɔ̌sísá gbɛxɔnúmɛ tɔn Vǐ tɔn Jezu Klísu tɔn jí ɔ, è sixú wlán nyǐkɔ mǐtɔn dó wěma énɛ́ mɛ. (Jaan 3:16, 36) Nukúnɖíɖó jǐxwé tɔn wɛ mǐ ɖó oo, alǒ ayǐkúngban jí tɔn wɛ mǐ ɖó ɔ, mǐ mɛ bǐ wɛ nɔ ba ɖɔ è ní dó nyǐkɔ mǐtɔn wěma énɛ́ mɛ.

 3-4. (a) È ko wlán nyǐkɔ mǐtɔn dó gbɛwéma ɔ mɛ din wɛ xlɛ́ ɖɔ mǐ ná nɔ gbɛ káká sɔ́yi a? Tínmɛ. (b) Étɛ́ lɛ́ jí mǐ ka ná ɖɔ xó dó ɖo xóta élɔ́ kpó éé bɔ d’é wú é kpó mɛ?

³ Ðiɖɔ wɛ è ka ɖe ɖɔ mɛ e sín nyǐkɔ è wlán dó wěma énɛ́ mɛ lɛ́ é bǐ ná mɔ gbɛ mavɔmavɔ ɔ dandan a? Mǐ mɔ xósin nǔkanbyɔ́ énɛ́ tɔn ɖo xó e Jexóva ɖɔ nú Mɔyízi, bɔ é ɖo Tíntɔ́n 32:33 mɛ é mɛ. Jexóva ɖɔ: “Mɛ e hu hwɛ dó mì ɔ sín nyǐkɔ jɛ́n un ná súnsún sín wěma ce mɛ.” Hǔn, è sixú súnsún, alǒ ɖe nyǐkɔ e è wlán dó wěma énɛ́ mɛ din lɛ́ é síin, cí nǔ ɖɔ klɛnyɔ́ɔ wɛ Jexóva zán dó wlán nyǐkɔ lɛ́ ná jɛ nukɔn ɖɔhun. (Nǔɖe. 3:5.) Mǐ ɖó ná kpo ɖo gǎn dó wɛ bónú nyǐkɔ mǐtɔn ná nɔ wěma énɛ́ mɛ káká jɛ hwenu e è ná sɔ́ bǐki dó wlán d’é mɛ dó é.

⁴ Xó énɛ́ fɔ́n nǔkanbyɔ́ ɖé lɛ́ nyi te. Ði kpɔ́ndéwú ɔ, étɛ́ Biblu ka ɖɔ dó mɛ ɖěɖěe sín nyǐkɔ è wlán dó gbɛwéma ɔ mɛ lɛ́ é kpó mɛ ɖěɖěe sín nyǐkɔ ma ɖ’é mɛ ǎ lɛ́ é kpó wú? Hwetɛ́nu è ka ná dó gbɛ mavɔmavɔ sín ajɔ mɛ ɖěɖěe sín nyǐkɔ ɖo gbɛwéma ɔ mɛ lɛ́ é? Étɛ́ ka ná jɛ dó mɛ ɖěɖěe ali ɔ ma hun ná bɔ yě tuun Jexóva cóbó kú ǎ lɛ́ é wú? É ka sixú nyɔ́ bló bɔ è ná wlán nyǐkɔ yětɔn dó wěma énɛ́ mɛ a? È ná ná xósin nú nǔkanbyɔ́ énɛ́ lɛ́ ɖo xóta élɔ́ kpó éé bɔ d’é wú é kpó mɛ.

MƐ̌ MƐ̌ E SÍN NYǏKƆ KA ÐO WĚMA Ɔ MƐ?

 5-6. (a) È ɖɔ gbɛ̌nu ɖé lɛ́ xó bɔ è wlán nyǐkɔ yětɔn dó gbɛwéma ɔ mɛ. Gbɛ̌nu ɖětɛ́ wú Filípunu lɛ́ 4:3 ka kɛ nu dó? (b) Hwetɛ́nu è ka ná wlán nyǐkɔ yětɔn dó gbɛwéma ɔ mɛ bǐ mlɛ́mlɛ́?

⁵ Mɛ̌ mɛ̌ e sín nyǐkɔ è ka wlán dó wěma nǔjlɛ́dónǔwú tɔn énɛ́ mɛ? Bo ná dó ná xósin nú nǔkanbyɔ́ énɛ́ ɔ, mǐ ná ɖɔ xó dó gbɛtɔ́ gbɛ̌nu atɔ́ɔ́n wú. Gbɛ̌nu ɖé lɛ́ sín nyǐkɔ ɖo gbɛwéma ɔ mɛ, bɔ mɛ ɖěvo lɛ́ tɔn ka ɖ’é mɛ ǎ.

⁶ Gbɛ̌nu nukɔntɔn ɔ wɛ nyí mɛ ɖěɖěe è cyán bɔ yě ná yi kp’acɛ xá Jezu ɖo jǐxwé lɛ́ é. È ko wlán nyǐkɔ yětɔn lɛ́ dó gbɛwéma ɔ mɛ din wɛ a? Ganjí. Sɔgbe xá xó e mɛsɛ́dó Pɔ́lu ɖɔ nú “azɔ̌gbɛ́” tɔn e ɖo Filípu lɛ́ é ɔ, nyǐkɔ mɛ yí ami dó ɖe ɖěɖěe è cyán bɔ yě ná kp’acɛ xá Jezu lɛ́ é tɔn ko ɖo gbɛwéma ɔ mɛ din. (Xa Filípunu lɛ́ 4:3.) Amɔ̌, cóbónú nyǐkɔ yětɔn ná nɔ wěma nǔjlɛ́dónǔwú tɔn énɛ́ mɛ ɔ, yě ɖó ná kpo ɖo gbejí nɔ wɛ. Nú è ɖó wuntun gǔdo tɔn ɔ yě gúdo ɔ wɛ è ná wlán nyǐkɔ yětɔn dó wěma énɛ́ mɛ bǐ mlɛ́mlɛ́. É sixú nyí jɛ nukɔn nú kú yětɔn, alǒ jɛ nukɔn nú hwenu e wǔvɛ́ ɖaxó ɔ ná bɛ́ dó é wɛ nǔ ná nyí mɔ̌.—Nǔɖe. 7:3.

 7. Sɔgbe xá nukúnnúmɔjɛnǔmɛ e mǐ ɖó dó Nǔɖexlɛ́mɛ 7:16, 17 wú é ɔ, hwetɛ́nu è ka ná wlán nyǐkɔ mɛ wɔ̌búwɔ́bú ɔ éé ɖo lɛ̌ngbɔ́ ɖěvo lɛ́ nyí wɛ é tɔn dó gbɛwéma ɔ mɛ bǐ mlɛ́mlɛ́?

⁷ Gbɛ̌nu wegɔ́ ɔ wɛ nyí mɛ wɔ̌búwɔ́bú e ɖo lɛ̌ngbɔ́ ɖěvo lɛ́ nyí wɛ é. Fí e mǐ ɖe din é ɔ, è ka ko wlán nyǐkɔ yětɔn dó gbɛwéma ɔ mɛ a? Ganjí. Nyǐkɔ yětɔn ka ná nɔ gbɛwéma ɔ mɛ hwenu e yě ná ko xo Aamagedɔ́ni zlɛ́ gúdo é a? Ganjí. (Nǔɖe. 7:14) Jezu ɖɔ ɖɔ mɛ énɛ́ lɛ́ e cí lɛ̌ngbɔ́ ɖɔhun é “ná mɔ gbɛ mavɔmavɔ.” (Mat. 25:46) Amɔ̌, è ná dó gbɛ mavɔmavɔ sín ajɔ mɛ ɖěɖěe ná xo Aamagedɔ́ni zlɛ́ lɛ́ é afɔjí afɔjí ǎ. Nyǐkɔ yětɔn e è ko wlán dó gbɛwéma ɔ mɛ kpó klɛnyɔ́ɔ kpó é ná kpo ɖo mɔ̌. Ðo Axɔ́súɖuɖu xwe afatɔ́n tɔn ɔ hwenu ɔ, Jezu “ná nyí Lɛ̌ngbɔ́nyitɔ́ yětɔn, bo ná kplá yě yi fí e sin ɖagbe e nɔ ná gbɛ mɛ ɔ nɔ tɔ́n sín lɛ́” é. Mɛ ɖěɖěe nɔ xwedó ali e xlɛ́ yě wɛ Klísu ɖe, bɔ è ná wá mɔ ɖɔ yě ɖo gbejí nú Jexóva lɛ́ é sín nyǐkɔ wɛ ná nɔ gbɛwéma ɔ mɛ káká sɔ́yi.—Xa Nǔɖexlɛ́mɛ 7:16, 17.

 8. Mɛ̌ mɛ̌ e sín nyǐkɔ è ma ka wlán dó gbɛwéma ɔ mɛ ǎ? Étɛ́ ka ná jɛ dó yě wú?

⁸ Gbɛ̌nu atɔngɔ́ ɔ nɔ te nú gbɔ̌ lɛ́; è ná sú kún yětɔn dó ɖo Aamagedɔ́ni hwenu. Nyǐkɔ yětɔn ɖo gbɛwéma ɔ mɛ ǎ. Jezu ɖɔ “è ná sú mɛ énɛ́ lɛ́ sín kún dó káká sɔ́yi.” (Mat. 25:46) Mawu sɔ́ d’ayi mɛ nú Pɔ́lu bɔ é ɖɔ nú mǐ ɖɔ: “É ná sɔ́ kú mavɔmavɔ dó dɔn tó nú yě.” (2 Tɛ. 1:9; 2 Pi. 2:9) Mɔ̌ ɖokpó ɔ, mɛ ɖěɖěe jló bo hu hwɛ dó gbigbɔ mímɛ́ wá yi lɛ́ é ná nɔ gbɛ káká sɔ́yi ǎ, é nyɔ́ wa ɔ, è ná sú kún yětɔn dó káká sɔ́yi. É ɖo wɛn ɖɔ è kún ná fɔ́n yě sín kú ó. (Mat. 12:32; Mak. 3:28, 29; Ebl. 6:4-6) Din ɔ, mi nú mǐ ní ɖɔ xó dó gbɛ̌nu we e è ná fɔ́n dó ayǐkúngban ɔ jí lɛ́ é wú ganjí.

MƐ ÐĚÐĚE È NÁ FƆ́N SÍN KÚ LƐ́ É

 9. Sɔgbe xá Mɛsɛ́dó 24:15 ɔ, gbɛ̌nu we tɛ́ lɛ́ è ka ná fɔ́n sín kú dó ayǐkúngban ɔ jí? Vogbingbɔn tɛ́ ka ɖo yě mɛ?

⁹ Biblu ɖɔ mɛ gbɛ̌nu we xó, bɔ è ná fɔ́n yě sín kú, lobɔ yě ná ɖó nukúnɖíɖó ɔ bo ná nɔ gbɛ káká sɔ́yi ɖo ayǐkúngban jí; yě wɛ nyí “mɛ ɖagbe lɛ́” kpó “mɛ nyanya lɛ́” kpó. (Xa Mɛsɛ́dó 24:15.) “Mɛ ɖagbe lɛ́” wɛ nyí mɛ ɖěɖěe sɛn Jexóva kpó gbejíninɔ kpó ɖo gbɛhwenu yětɔn é. Amɔ̌, “mɛ nyanya lɛ́” sɛn Jexóva cóbó kú ǎ. Nú è ná ɖɔ xójɔxó ɔ, nǔ nyanya wɛ yě wa ɖo ninɔmɛ gěgé mɛ. Ðó è ná fɔ́n gbɛ̌nu we énɛ́ lɛ́ bǐ sín kú wútu ɔ, mǐ ka sixú ɖɔ ɖɔ nyǐkɔ yě bǐ tɔn ko ɖo gbɛwéma ɔ mɛ a? Bo ná dó mɔ xósin nú nǔkanbyɔ́ énɛ́ ɔ, mi nú mǐ ní ɖɔ xó dó gbɛ̌nu we énɛ́ lɛ́ ɖokpó ɖokpó wú.

10. Étɛ́wú è ka ná fɔ́n “mɛ ɖagbe lɛ́” sín kú? Wǔjɔmɛ tɛ́ sín vǐví yě mɛ ɖé lɛ́ ka ná ɖu? (Lɛ̌ kpɔ́n “Nǔ e nǔxatɔ́ lɛ́ kanbyɔ́ lɛ́ é” éé kúnkplá fínfɔ́n sín kú dó ayǐkúngban jí é ɖo Atɔxwɛ élɔ́ mɛ.)

¹⁰ “Mɛ ɖagbe lɛ́” wɛ nyí gbɛ̌nu ɛnɛgɔ́ ɔ. È ko dó nyǐkɔ yětɔn gbɛwéma ɔ mɛ cóbɔ yě kú. Ée yě kú é ɔ, è ka ɖe nyǐkɔ yětɔn sín gbɛwéma ɔ mɛ wɛ a? Éǒ, ɖó yě kpo ɖo “gbɛ” ɖo Jexóva nukúnmɛ. Jexóva “nyí Mawu mɛkúkú lɛ́ tɔn ǎ; Mawu mɛ e ɖo gbɛ lɛ́ tɔn wɛ é nyí; ɖó, ɖo Mawu nukɔn ɔ, yě bǐ wɛ ɖo gbɛ.” (Luk. 20:38) Énɛ́ xlɛ́ ɖɔ hwenu e è ná fɔ́n mɛ ɖagbe lɛ́ sín kú dó ayǐkúngban jí é ɔ, è ná mɔ nyǐkɔ yětɔn lɛ́ ɖo gbɛwéma ɔ mɛ, é ná bo tlɛ nyí “klɛnyɔ́ɔ” wɛ è sɔ́ dó wlán ná hwɛ̌ ɔ nɛ́. (Luk. 14:14) É ɖo wɛn ɖɔ, mɛɖé lɛ́ ná ɖo mɛ énɛ́ lɛ́ e è ná fɔ́n sín kú lɛ́ é mɛ bɔ è ná jɔ wǔ yě bɔ yě ná nyí “axɔ́ví ɖo ayǐkúngban ɔ bǐ jí.”—Ðɛh. 45:16, nwt.

11. Étɛ́ é ka ná byɔ́ ɖɔ è ní kplɔ́n “mɛ nyanya lɛ́” cóbɔ è ná wlán nyǐkɔ yětɔn dó gbɛwéma ɔ mɛ?

¹¹ Mǐ ní ɖɔ xó dó gbɛ̌nu atɔ́ɔ́ngɔ́, éé nyí gǔdo tɔn é wú; é wɛ nyí “mɛ nyanya lɛ́.” Bóyá ɖó yě ma tuun sɛ́n Jexóva tɔn lɛ́ ǎ wútu ɔ, yě zán gbɛ jlɔ́jlɔ́ cóbó kú ǎ. Énɛ́ wú ɔ, è wlán nyǐkɔ yětɔn dó gbɛwéma ɔ mɛ ǎ. Amɔ̌, Mawu ná fɔ́n yě sín kú, énɛ́ ná zɔ́n bɔ ali ɔ sixú hun nú yě, bɔ è ná wlán nyǐkɔ yětɔn dó wěma énɛ́ mɛ. “Mɛ nyanya” énɛ́ lɛ́ ná ɖó hudó alɔdó tɔn tawun. Nǔ e nylá tawun lɛ́ é wɛ yě mɛ ɖé lɛ́ wa cóbó kú. Énɛ́ wú ɔ, é ná byɔ́ ɖɔ è ní kplɔ́n yě lěe yě ná zán gbɛ sɔgbe xá nǔgbódodó jlɔ́jlɔ́ Jexóva tɔn lɛ́ gbɔn é. Bo ná dó kpé énɛ́ wú ɔ, Axɔ́súɖuto Mawu tɔn ná sɔ́ nǔ nú tuto mɛkplɔ́nkplɔ́n tɔn ɖaxó hú gǎn e è ma ko bló kpɔ́n ɖo ayǐkúngban jí ǎ é.

12. (a) Mɛ̌ mɛ̌ e ka ná kplɔ́n nǔ mɛ nyanya lɛ́? (b) Étɛ́ ka ná jɛ dó mɛ ɖěɖěe ná gbɛ́ ɖɔ émí kún ná zán gbɛ sɔgbe xá nǔ e kplɔ́n wɛ émí ɖe lɛ́ é ó é wú?

¹² Mɛ̌ mɛ̌ e ka ná kplɔ́n nǔ mɛ nyanya lɛ́? Mɛ wɔ̌búwɔ́bú ɔ kpó mɛ ɖagbe ɖěɖěe è fɔ́n sín kú lɛ́ é kpó wɛ. Cóbónú è ná wlán mɛ nyanya lɛ́ sín nyǐkɔ dó gbɛwéma ɔ mɛ ɔ, yě ɖó ná zun xɔ́ntɔn vívɛ́ xá Jexóva, lobo lɛ́ zé yěɖée jó n’i. Jezu Klísu kpó mɛ yí ami dó ɖe lɛ́ kpó ná nɔ jǐxwé bo sɔ́ ayi ɖó lěe mɛ nyanya énɛ́ lɛ́ ɖo nǔ wa sɔgbe xá nǔ e kplɔ́n yě wɛ è ɖe lɛ́ é gbɔn é jí ganjí. (Nǔɖe. 20:4) È ná sú kún dó nú mɛ ɖěbǔ e ma ba ná wa nǔ sɔgbe xá nǔ e kplɔ́n ɛ wɛ è ɖe lɛ́ é ǎ é, ényí é ná bo tlɛ ɖó xwe 100 ɔ nɛ́. (Eza. 65:20) Jexóva kpó Jezu kpó nɔ mɔ nǔ jɛ ayi mɛ, énɛ́ wú ɔ, yě ná jó mɛ ɖěbǔ e ná wa nǔ nyanya é dó b’ɛ ná nɔ gbɛ ɖo gbɛ yɔ̌yɔ́ ɔ mɛ ǎ.—Eza. 11:9; 60:18; 65:25; Jaan 2:25.

MƐ ÐĚÐĚE È NÁ FƆ́N SÍN KÚ BO NÁ YĚ GBƐ MAVƆMAVƆ LƐ́ É KPÓ MƐ ÐĚÐĚE È NÁ FƆ́N SÍN KÚ BO ÐÓ HWƐ NÁ LƐ́ É KPÓ

13-14. (a) Ð’ayǐ ɔ, nɛ̌ mǐ ka mɔ nukúnnú jɛ xó Jezu tɔn e ɖo Jaan 5:29 mɛ é mɛ gbɔn? (b) Étɛ́ mǐ ka ɖó ná hɛn d’ayi mɛ dó xó énɛ́ lɛ́ wú?

¹³ Jezu lɛ́ ɖɔ xó dó mɛ ɖěɖěe è ná fɔ́n sín kú dó ayǐkúngban jí fí lɛ́ é wú. Ði kpɔ́ndéwú ɔ, é ɖɔ: “Hwenu e mɛkúkú lɛ́ ná se gbe tɔn, bo ná fɔ́n ɔ ko sɛ yá; mi ma nú é kpácá mi ó. Yě ná tɔ́n sín yɔdo yětɔn lɛ́ mɛ; mɛ e wa nǔ ɖagbe lɛ́ ɔ, Mawu ná fɔ́n yě sín kú, bo ná ná yě gbɛ mavɔmavɔ. Loɔ, mɛ e wa nǔ nyanya lɛ́ ná fɔ́n sín kú, bónú Mawu ná ɖó hwɛ nú yě.” (Jaan 5:28, 29) Étɛ́ ɖɔ gbé Jezu ka ja?

¹⁴ Ð’ayǐ ɔ, mǐ mɔ nǔ jɛ mɛ ɖɔ xó Jezu tɔn lɛ́ nɔ dó gesí nǔ e mɛ ɖěɖěe ná fɔ́n sín kú lɛ́ é ná wa ɖo fínfɔ́n sín kú yětɔn gúdo lɛ́ é; énɛ́ wɛ nyí ɖɔ mɛ e ná fɔ́n sín kú é ɖé lɛ́ ná wa nǔ ɖagbe, bɔ yě mɛ ɖěvo lɛ́ ka ná wa nǔ nyanya. Amɔ̌, ɖ’ayi wú ɖɔ Jezu kún ɖɔ ɖɔ mɛ ɖěɖěe ná fɔ́n sín yɔdo mɛ flínflín tɔn mɛ tlóló lɛ́ é ná wa nǔ ɖagbe, alǒ ná wa nǔ nyanya ó. Nǔ e yě ko wa wá yi lɛ́ é xó ɖɔ wɛ é ɖe. Mɛ ɖěɖěe “wa nǔ ɖagbe lɛ́” é kpó mɛ ɖěɖěe “wa nǔ nyanya lɛ́” é kpó sín xó ɖɔ wɛ é ɖe. Énɛ́ xlɛ́ ɖɔ yě ko wa nǔ énɛ́ lɛ́ cóbó kú. Nukúnnúmɔjɛnǔmɛ énɛ́ sɔgbe dódó, ɖó è ná ná tɛn mɛɖé bónú é ná wa nǔ nyanya ɖo gbɛ yɔ̌yɔ́ ɔ mɛ ǎ. Mɛ nyanya lɛ́ ná ko wa nǔ nyanya énɛ́ lɛ́ cóbó kú. Énɛ́ wú ɔ, étɛ́ ɖɔ wɛ xógbe Jezu tɔn we élɔ́ lɛ́ ka ɖe: “Mawu ná fɔ́n yě sín kú, bo ná ná yě gbɛ mavɔmavɔ” kpó “mɛ e wa nǔ nyanya lɛ́ ná fɔ́n sín kú, bónú Mawu ná ɖó hwɛ nú yě” kpó?

15. Mɛ̌ mɛ̌ e ‘Mawu ka ná fɔ́n sín kú, bo ná ná gbɛ mavɔmavɔ’? Aniwú?

¹⁵ Mɛ ɖagbe lɛ́, énɛ́ wɛ nyí mɛ ɖěɖěe wa nǔ ɖagbe cóbó kú lɛ́ é ɔ, è ná fɔ́n yě sín kú “bo ná ná yě gbɛ mavɔmavɔ,” ɖó nyǐkɔ yětɔn ná ɖo gbɛwéma ɔ mɛ wútu. Énɛ́ xlɛ́ ɖɔ “mɛ e wa nǔ ɖagbe” bɔ Jaan 5:29 ɖɔ è ná fɔ́n yě sín kú lɛ́ é ɔ, nǔ ɖokpó ɔ wɛ yě nyí kpó “mɛ ɖagbe” ɖěɖěe è ná fɔ́n sín kú bɔ è ɖɔ xó yětɔn ɖo Mɛsɛ́dó 24:15 mɛ lɛ́ é kpó. Nukúnnúmɔjɛnǔmɛ élɔ́ sɔgbe xá nǔ e ɖo Hlɔ̌manu lɛ́ 6:7 mɛ é; fínɛ́ ɖɔ: “Mɛ e kú ɔ gosín hwɛhuhu sín hlɔ̌nhlɔ́n kan nu.” Hǔn, ényí mɛ ɖagbe lɛ́ kú ɔ, Jexóva nɔ sɔ́ hwɛ e yě hu lɛ́ é kɛ yě, amɔ̌, é ná flín gbejíninɔ sín nǔ e yě wa hwenu e yě kpo ɖo gbɛ lɛ́ é bǐ. (Ebl. 6:10) É ɖo wɛn ɖɔ, é byɔ́ ɖɔ mɛ ɖagbe énɛ́ lɛ́ e è ná fɔ́n sín kú lɛ́ é ní kpo ɖo gbejí nɔ wɛ, énɛ́ wɛ ná zɔ́n bɔ nyǐkɔ yětɔn ná kpo ɖo gbɛwéma ɔ mɛ.

16. Étɛ́ ɖɔ wɛ è ka ɖe bo ɖɔ “mɛ e wa nǔ nyanya lɛ́ ná fɔ́n sín kú, bónú Mawu ná ɖó hwɛ nú yě”?

¹⁶ Mɛ ɖěɖěe ko wa nǔ nyanya cóbó kú lɛ́ é ka ló? Nǔgbó wɛ ɖɔ ée yě kú é ɔ, è sɔ́ hwɛ yětɔn lɛ́ kɛ yě, amɔ̌, yě sɛn Jexóva hwenu e yě ɖo gbɛ é ǎ. È wlán nyǐkɔ yětɔn lɛ́ dó gbɛwéma ɔ mɛ ǎ. Hǔn, “mɛ e wa nǔ nyanya” bɔ è ná fɔ́n sín kú lɛ́ é jɛ́n lɛ́ nyí “mɛ nyanya” e è ná fɔ́n sín kú bɔ Mɛsɛ́dó 24:15 ɖɔ lɛ́ é. È ná fɔ́n yě sín kú “bónú Mawu ná ɖó hwɛ nú yě.”c Énɛ́ xlɛ́ ɖɔ Jezu ná sɔ́ ayi ɖó mɛ nyanya lɛ́ jí, lobo lɛ́ gbéjé yě kpɔ́n. (Luk. 22:30) É ná byɔ́ hwenu kpɛɖé cóbɔ Jezu ná tuun nú mɛɖé jɛxá bɔ è ná dó nyǐkɔ tɔn gbɛwéma ɔ mɛ, alǒ gbɔ. Ényí mɛ nyanya énɛ́ lɛ́ jó gbɛ nyanya e yě ko zán ɖ’ayǐ ɔ dó, bo zé yěɖée jó nú Jexóva ɔ jɛ́n è sixú wlán nyǐkɔ yětɔn dó gbɛwéma ɔ mɛ.

17-18. Étɛ́ mɛ e è ná fɔ́n sín kú dó ayǐkúngban jí, bɔ yě ná mɔ gbɛ mavɔmavɔ lɛ́ é bǐ ka ɖó ná wa? Étɛ́ dó gesí wɛ xógbe “walɔ yětɔn” e ɖo Nǔɖexlɛ́mɛ 20:12, 13 mɛ é ka ɖe?

¹⁷ Ényí mɛ ɖěɖěe è ná fɔ́n sín kú lɛ́ é ɔ, mɛ ɖagbe wɛ yě nyí oo, alǒ mɛ nyanya wɛ yě nyí ɔ, é ná byɔ́ ɖɔ yě ní se tónú nú sɛ́n ɖěɖěe ɖo wěma mlámlá yɔ̌yɔ́ e è ná hun ɖo xwe 1000 ɔ mɛ lɛ́ é mɛ é. Mɛsɛ́dó Jaan tínmɛ nǔ e é mɔ ɖo nǔmimɔ mɛ é gbɔn lě: “Un mɔ mɛkúkú lɛ́, ɖaxó kpó kpɛví kpó, ɖo te ɖo axɔ́súzinkpo ɔ nukɔn, bɔ è hun wěma mlámlá lɛ́. Amɔ̌, è lɛ́ hun wěma mlámlá ɖěvo; wěma mlámlá gbɛ tɔn ɔ wɛ. È ɖɔ hwɛ xá mɛkúkú lɛ́ sɔgbe xá nǔ e è wlán dó wěma mlámlá lɛ́ mɛ lɛ́ é sɔgbe xá walɔ yětɔn lɛ́.”—Nǔɖe. 20:12, 13, nwt.

¹⁸ “Walɔ” mɛ e è ná fɔ́n sín kú lɛ́ é tɔn tɛ́ lɛ́ jí è ka ná zɔn dó dó ɖó hwɛ nú yě? Nǔ e yě ko wa cóbó kú lɛ́ é wɛ a? Éǒ! Flín ɖɔ ée yě kú é ɔ, yě ko sú hwɛ e yě hu ɖ’ayǐ lɛ́ é sín axɔ́. Hǔn, “walɔ yětɔn” e xó è ɖɔ ɖo fí é sixú nyí nǔ e yě ko wa cóbó kú lɛ́ é ǎ. É nyɔ́ wa ɔ, lěe yě zán gbɛ sɔgbe xá nǔ e yě kplɔ́n ɖo gbɛ yɔ̌yɔ́ ɔ mɛ lɛ́ é gbɔn é dó gesí wɛ walɔ yětɔn lɛ́ ná ko ɖe. Súnnu gbejínɔtɔ́ ɖé lɛ́ ɖi Nɔwée, Samuwɛ́li, Davídi, kpó Daniyɛ́li kpó tlɛ ná kplɔ́n nǔ dó Jezu Klísu wú, lobo ɖi nǔ nú vɔ̌sísá tɔn. Ényí mɔ̌ hǔn, mɛ nyanya lɛ́ tɔn zun kwínkwín ma kwín!

19. Étɛ́ ka ná jɛ dó mɛ ɖěɖěe gbɛ́ ali jí wǔ énɛ́ e hun nú yě lɛ́ é wú?

¹⁹ Étɛ́ ka ná jɛ dó mɛ ɖěɖěe ná gbɛ́ ali jí wǔ énɛ́ e hun nú yě lɛ́ é wú? Nǔɖexlɛ́mɛ 20:15 ɖɔ nú mǐ ɖɔ: “Mɛ ɖěbǔ e sín nyǐkɔ è ma ko wlán dó gbɛwéma ɔ mɛ ɖ’ayǐ ǎ ɔ, è sɔ́ ɛ nyi myɔ togotogo ɔ mɛ.” Ɛɛn, è ná sú kún yětɔn dó bǐ mlɛ́mlɛ́. Énɛ́ wú ɔ, é ɖo tají tawun ɖɔ mǐ ní wa nǔ e wú mǐ kpé é bǐ bónú è ní wlán nyǐkɔ mǐtɔn dó gbɛwéma ɔ mɛ, bónú é lɛ́ nɔ mɛ.

20. Azɔ̌ e sɔ́ akpakpa mɛ é tɛ́ è ka ná wa ɖo Axɔ́súɖuɖu xwe afatɔ́n tɔn ɔ hwenu? (Kpɔ́n ɖiɖe e ɖo akpa ɔ jí é.)

²⁰ Axɔ́súɖuɖu xwe afatɔ́n tɔn ɔ ná víví kpɔ́n! È ná wa mɛkplɔ́nkplɔ́nzɔ́ ɖaxó hú gǎn e è ma ko wa kpɔ́n gbeɖé ɖo ayǐkúngban jí ǎ é. Amɔ̌, hwenɛ́nu wɛ è ná lɛ́ gbéjé nǔwalɔ mɛ ɖagbe lɛ́ kpó mɛ nyanya lɛ́ kpó tɔn kpɔ́n. (Eza. 26:9; Mɛ. 17:31) Nɛ̌ tuto mɛkplɔ́nkplɔ́n tɔn énɛ́ ka ná yi gbɔn? Xóta e bɔ d’é wú é ná d’alɔ mǐ bɔ mǐ ná mɔ nǔ jɛ mɛ, bɔ tuto ɖaaɖagbe énɛ́ ná lɛ́ su nukún mǐtɔn mɛ.l