Ðo gbesisɔmɛ nú azǎn Jexóva tɔn

 1. Étɛ́ mǐ ka ɖó ná wa bo ná gán ɖo azǎn Jexóva tɔn gbe?

ÉNYÍ Biblu ɖɔ xó dó “azǎn Jexóva tɔn” wú ɔ, é nɔ dó gesí hwenu e Jexóva ná sú kún dó nú kɛntɔ́ tɔn lɛ́, lobo ná hwlɛ́n togun tɔn gán é. Ðo hwexónu ɔ, Jexóva dɔn tó nú togun ɖé lɛ́. (Eza. 13:1, 6; Ezek. 13:5; Sof. 1:8) Ðo hwe mǐtɔn nu ɔ, “azǎn Jexóva tɔn” ná bɛ́ hwenu e toxóɖɔtɔ́gán lɛ́ ná sú kún dó nú Babilɔ́nu ɖaxó ɔ é, bo ná fó ɖo ahwan Aamagedɔ́ni tɔn hwenu. Bo ná dó gán ɖo “azǎn” énɛ́ gbe ɔ, din wɛ mǐ ɖó ná jɛ nǔ sɔ́ jí. Jezu kplɔ́n mǐ ɖɔ é kún nyí ɖɔ mǐ ná sɔ́ nǔ ɖ’ayǐ nú “wǔvɛ́ ɖaxó ɔ” kpowun wɛ ó, loɔ, mǐ ɖó ná lɛ́ “ɖo gbesisɔmɛ” ná.—Mat. 24:21; Luk. 12:40.

 2. Aniwú mǐ ka sixú ɖu le nǔ e è ɖɔ ɖo Tɛsaloníkinu lɛ́ nukɔntɔn ɔ mɛ lɛ́ é tɔn?

² Ðo wěma nukɔntɔn e mɛsɛ́dó Pɔ́lu sɛ́ dó Tɛsaloníkinu lɛ́ é mɛ ɔ, é zán nǔjlɛ́dónǔwú ɖěbɔdóɖěwú lɛ́ bo ná dó d’alɔ klisánwun lɛ́ bónú yě ná ɖo gbesisɔmɛ nú azǎn ɖaxó Jexóva tɔn e gbe é ná ɖɔ hwɛ é. Pɔ́lu tuun ɖɔ azǎn Jexóva tɔn kún ná wá hwenu e émí ɖo xó ɖɔ wɛ é ó. (2 Tɛ. 2:1-3) É ɖo mɔ̌ có, é dó wǔsyɛ́n lanmɛ nú nɔví tɔn lɛ́ ɖɔ yě ní sɔ́ nǔ ɖ’ayǐ nú azǎn énɛ́, cí nǔ ɖɔ é ná wá sɔ wɛ ɖɔhun, bɔ mǐɖésúnɔ sixú wa nǔ sɔgbe xá wěɖexámɛ énɛ́. Mi nú mǐ ní ɖɔ xó dó nǔ e é tínmɛ dó nǔ élɔ́ lɛ́ wú é wú: (1) lěe azǎn Jexóva tɔn ná wá gbɔn é, (2) mɛ ɖěɖěe ma ná gán ɖo azǎn énɛ́ gbe ǎ lɛ́ é, (3) lěe mǐ sixú sɔ́ nǔ ɖ’ayǐ bo ná gán gbɔn é.

 3. Nɛ̌ azǎn Jexóva tɔn ka ná wá lěe ajotɔ́ nɔ wá zǎnmɛ gbɔn é ɖɔhun gbɔn? (Lɛ̌ kpɔ́n fɔtóo ɔ.)

³ ‘Lěe ajotɔ́ nɔ wá zǎnmɛ gbɔn é ɖɔhun.’ (1 Tɛ. 5:2) Ðo xógbe nǔjlɛ́dónǔwú tɔn atɔn e è zán dó ɖɔ xó dó wǐwá azǎn Jexóva tɔn tɔn wú lɛ́ é mɛ ɔ, nukɔntɔn ɔ nɛ́. Hwɛhwɛ ɔ, ajotɔ́ lɛ́ nɔ yá wǔ wa nǔ, lobo nɔ lɛ́ dɔn zǎn dó wǔ hwenu e mɛ lɛ́ ma ɖó nukún tɔn ǎ é. Ajijimɛ wɛ azǎn Jexóva tɔn lɔ ná wá; é ná fyán mɛ gěgé. Lěe nǔ lɛ́ ná yá wǔ jɛ gbɔn é tlɛ sixú fyán klisánwun nǔgbó lɛ́. Amɔ̌ mǐdɛɛ lɛ́ ɔ, è ná sú kún dó nú mǐ ǎ; mɛ nyanya lɛ́ wɛ è ná sú kún dó ná.

 4. Ali tɛ́ nu azǎn Jexóva tɔn ka cí lěe vǐnú nɔ jɛ mɛ wa jí gbɔn é ɖɔhun ɖe?

⁴ ‘Lěe vǐnú nɔ jɛ xoxónɔ wa jí gbɔn é ɖɔhun.’ (1 Tɛ. 5:3) Nyɔ̌nu e ɖo xo é sixú ɖɔ hwenu e vǐnú ná jɛ wiwa ɛ jí é pɛ́pɛ́pɛ́ ǎ. Amɔ̌, é kú d’é jí ɖɔ hwenu mɔ̌hun ɖé ná wá. Ényí é ka wá ɔ, ɖibla nyí ajijimɛnú wɛ é nɔ nyí, bɔ wǔvɛ́ kpó xósúsú kpó nɔ ɖ’é nu. Ðo ali ɖokpó ɔ nu ɔ, mǐ tuun azǎn e gbe azǎn Jexóva tɔn ná wá é kpó gan ɔ mɛ kpó ǎ. É ɖo mɔ̌ có, mǐ kú d’é jí ɖɔ é jawě, bɔ Mawu ná sú kún dó nú mɛ nyanya lɛ́ ajijimɛ, lobɔ yě ɖě ná gán ɖ’é mɛ ǎ.

 5. Ali tɛ́ nu wǔvɛ́ ɖaxó ɔ ka cí wěziza ayǐtéhɔ̌nnu tɔn ɖɔhun ɖe?

⁵ Wěziza ayǐtéhɔ̌nnu tɔn ɖɔhun. Nǔjlɛ́dónǔwú atɔngɔ́ Pɔ́lu tɔn lɛ́vɔ́ ɖɔ xó dó ajotɔ́ ɖěɖěe ɖo ajo ja wɛ zǎnmɛ lɛ́ é wú. Amɔ̌, gayɛnu tɔn ɔ, é cí ɖɔ azǎn Jexóva tɔn sɔ́ jlɛ́ dó wěziza ayǐtéhɔ̌nnu tɔn wú wɛ Pɔ́lu ɖe ɖɔhun. (1 Tɛ. 5:4) Ajotɔ́ ɖěɖěe nɔ dɔn zǎn dó wǔ lɛ́ é ɔ, nǔ e gbé yě tɔ́n é nɔ ɖo ayi mɛ ɖu nú yě wɛ sɔmɔ̌ bɔ yě nɔ tuun ɖɔ ganmɛ ɖo yiyi wɛ ǎ. Ayǐ sixú wá hɔ́n fyán yě, bo ɖe yě gba. Ðo ali ɖokpó ɔ nu ɔ, wǔvɛ́ ɖaxó ɔ ná ɖe mɛ ɖěɖěe cí ajotɔ́ ɖɔhun, bo nɔ ɖo wimɛnú wa wɛ lɛ́ é, ɖo xógbe ɖěvo mɛ ɔ, mɛ ɖěɖěe nɔ ɖó kan dó nǔ e Mawu gbɛ́ wǎn ná lɛ́ é wiwa wú lɛ́ é gba. Mǐ jló ná cí yěɖɔhun ǎ, énɛ́ wú ɔ, mǐ ɖó ná nɔ nyi alɔ nú nǔ e nɔ vɛ́ mɔ nú Jexóva lɛ́ é wiwa, bo ná nɔ ɖó kan dó “ɖagbewiwa alɔkpa bǐ, nǔjlɔ́jlɔ́wiwa alɔkpa bǐ kpó nǔgbóɖiɖɔ alɔkpa bǐ kpó” wú dó xlɛ́ ɖɔ mǐ ɖo gbesisɔmɛ. (Efɛ́. 5:8-12) Énɛ́ gúdo ɔ, Pɔ́lu zán nǔjlɛ́dónǔwú e ɖi yěɖée lɛ́ é we dó ɖɔ xó dó mɛ ɖěɖěe ma ná gán ǎ lɛ́ é wú.

 6. Ali tɛ́ nu mɛ gěgé ka nɔ d’amlɔ ɖe? (1 Tɛsaloníkinu lɛ́ 5:6, 7)

⁶ ‘Mɛ ɖěɖěe nɔ d’amlɔ lɛ́ é.’ (Xa 1 Tɛsaloníkinu lɛ́ 5:6, 7.) Pɔ́lu jlɛ́ mɛ ɖěɖěe ma ná gán ɖo azǎn Jexóva tɔn gbe ǎ lɛ́ é dó mɛ ɖěɖěe nɔ d’amlɔ lɛ́ é wú. Yě tuun nǔ e ɖo jijɛ lɛ́ lɛ̌ dó yě wɛ lɛ́ é, alǒ tuun ɖɔ ganmɛ ɖo yiyi wɛ ǎ. Énɛ́ wú ɔ, yě nɔ tuun hwenu e nǔ tají ɖé jɛ é, bo nɔ ce glíwún dó yěɖée wú ǎ. Égbé ɔ, mɛ gěgé nɔ d’amlɔ ɖo gbigbɔ lixo. (Hlɔ̌. 11:8) Yě ɖi nǔ nú nǔ ɖěɖěe xlɛ́ ɖɔ mǐ ɖo gbɛ nɔ wɛ ɖo “azǎn gǔdo gúdo tɔn lɛ́” mɛ, bɔ wǔvɛ́ ɖaxó ɔ ná bɛ́ ɖo malínmálín mɛ lɛ́ é ǎ. Ényí hǔzúhúzú ɖaxó ɖaxó lɛ́ jɛ tíntíin jí ɖo gbɛ ɔ mɛ ɔ, wɛn Axɔ́súɖuto ɔ tɔn mǐtɔn nɔ jɛ mɛɖé lɛ́ dɔn jí. Nǔ ɖo ganjí ɔ, wunzɛn wɛ yě ɖó ná nɔ, amɔ̌, mɛ gěgé nɔ lɛ́ mlɔ́ ayǐ. Mɛ ɖěɖěe tlɛ ɖi nǔ nú azǎn e gbe Jexóva ná sú kún dó nú mɛ nyanya lɛ́ é nɔ lin ɖɔ wǐwá tɔn kún ko kpɔ́ fí ó. (2 Pi. 3:3, 4) É ɖo mɔ̌ có, mǐ tuun ɖɔ wě e Mawu sɔ́ d’ayi mɛ nú mɛ bɔ è ɖe xá mǐ ɖɔ mǐ ní nɔ wunzɛn é ɖo tají tawun égbé, din e azǎn ɔ ɖo sisɛkpɔ́ wɛ é.

 7. Nɛ̌ mɛ ɖěɖěe sín kún Mawu ná sú dó lɛ́ é ka cí ahannumúnɔ lɛ́ ɖɔhun gbɔn?

⁷ ‘Mɛ ɖěɖěe nɔ nu ahan mú lɛ́ é.’ Pɔ́lu jlɛ́ mɛ ɖěɖěe Mawu ná sú kún yětɔn dó lɛ́ é dó ahannumúnɔ lɛ́ wú. Mɛ ɖěɖěe jí ahan ɖe lɛ́ é nɔ yá wǔ mɔ nǔ jɛ nǔ e ɖo jijɛ lɛ́ lɛ̌ dó yě wɛ lɛ́ é wú ǎ, bɔ gbeta e kɔn yě nɔ wá lɛ́ é lɔ nɔ xlɛ́ mɔ̌. Ali ɖokpó ɔ nu ɔ, mɛ nyanya lɛ́ nɔ yí gbe nú akpágbanúmɛ Mawu tɔn lɛ́ ǎ. Yě wá gbeta ɔ kɔn bo mlɛ́ ali e nɔ kplá mɛ bɔ è nɔ yi dɔn é. Amɔ̌, è ɖɔ nú klisánwun lɛ́ ɖɔ ayi yětɔn ní ɖo te, alǒ yě ní zán nǔwúkpíkpé tamɛ linlin tɔn yětɔn ganjí. (1 Tɛ. 5:6) Akɔwé Biblu tɔn ɖokpó ɖɔ ɖɔ mɛ e nɔ zán nǔwúkpíkpé tamɛ linlin tɔn tɔn ganjí é nɔ nɔ “xwíí, bo kún nɔ ɖi xɛsi ó, nɔ kpé wú bo nɔ lin tamɛ ganjí, bɔ énɛ́ nɔ zɔ́n bɔ é nɔ wá gbeta ɖagbe lɛ́ kɔn.” Aniwú mǐ ka ɖó ná nɔ cí xwíí? Mɔ̌ wiwa ná zɔ́n bɔ mǐ ná ɖó nu ɖo toxóɖiɖɔ, alǒ nǔ e nɔ jɛ ɖo to égbé lɛ́ é mɛ ǎ. Ée azǎn Jexóva tɔn ná ɖo sisɛkpɔ́ wɛ é ɔ, kɔ e mɛ lɛ́ ná gbídí nú mǐ bónú mǐ ná ɖó nu ɖo nǔ énɛ́ lɛ́ mɛ é ná lɛ́ jɛjí. É ɖo mɔ̌ có, é byɔ́ ɖɔ ado ní hu mǐ dó lěe mǐ ná wa nǔ gbɔn é wú ǎ. Gbigbɔ Mawu tɔn sixú d’alɔ mǐ bɔ mǐ ná cí xwíí, ɖó ninɔmɛ ayi mɛ tɔn ɖagbe, bo lɛ́ kpé wú bo wá gbeta e nǔnywɛ́ kpé lɛ́ é kɔn.—Luk. 12:11, 12.

 8. Jijɔ tɛ́ lɛ́ xó 1 Tɛsaloníkinu lɛ́ 5:8 ka ɖɔ bɔ yě ná d’alɔ mǐ bɔ mǐ ná nɔ wunzɛn, lobo lɛ́ zán nǔwúkpíkpé tamɛ linlin tɔn mǐtɔn ganjí? (Lɛ̌ kpɔ́n fɔtóo ɔ.)

⁸ ‘Sɔ́ ganwu dó, lobo sɔ́ gangbákún xwe.’ Pɔ́lu jlɛ́ mǐ dó sɔ́ja ɖěɖěe nɔ ɖo acéjí, bo nɔ lɛ́ sɔ́ nǔ nú ahwan lɛ́ é wú. (Xa 1 Tɛsaloníkinu lɛ́ 5:8.) È nɔ ɖó nukún ɖɔ sɔ́ja ɖé ní ɖo gbesisɔmɛ bá fun ahwan hweɖébǔnu e ahwan ná bɛ́ é. Nǔ ɖokpó ɔ wɛ é nyí nú mǐ lɔmɔ̌. Nǔɖiɖi kpó wǎnyíyí kpó nɔ nyí ganwu bɔ mǐ nɔ sɔ́ dó, bɔ nukúnɖíɖó nɔ nyí gangbákún bɔ mǐ nɔ sɔ́ xwe dó xlɛ́ ɖɔ mǐ ɖo gbesisɔmɛ nú azǎn Jexóva tɔn. Jijɔ énɛ́ lɛ́ sixú d’alɔ mǐ tawun.

 9. Nɛ̌ nǔɖiɖi ka nɔ cyɔ́n alɔ mǐ jí gbɔn?

⁹ Ganwu nɔ cyɔ́n alɔ ayi sɔ́ja ɖé tɔn jí. Mɔ̌ ɖokpó ɔ, nǔɖiɖi kpó wǎnyíyí kpó nɔ cyɔ́n alɔ ayi nǔjlɛ́dónǔwú tɔn mǐtɔn jí. Yě ná d’alɔ mǐ bɔ mǐ ná kpo ɖo Mawu sɛn wɛ, lobo lɛ́ kpo ɖo Jezu xwedó wɛ. Nǔɖiɖi nɔ ná gǎnjɛwú mǐ ɖɔ Jexóva ná d’ajɔ mǐ, ényí mǐ ba ɛ kpó ayi mǐtɔn bǐ kpó ɔ nɛ́. (Ebl. 11:6) É ná d’alɔ mǐ bɔ mǐ ná kpo ɖo gbejí nú Gǎn mǐtɔn Jezu, ényí é tlɛ byɔ́ ɖɔ mǐ ná dɛ ɖo tagba syɛ́nsyɛ́n lɛ́ nu ɔ nɛ́. Ényí mǐ nɔ ɖ’ayi kpɔ́ndéwú mɛ ɖěɖěe yadónúmɛ, alǒ akwɛ́yózo ɖo fínɛ́ có, yě tɛ́ dó gbejíninɔ yětɔn wú ɖo égbé lɛ́ é tɔn wú ɔ, mǐ sixú ná hlɔ̌nhlɔ́n nǔɖiɖi mǐtɔn bɔ é ná d’alɔ mǐ bɔ mǐ ná dɛ ɖo wǔvɛ́ gbɛ mɛ tɔn lɛ́ nu. Gɔ́ ná ɔ, ényí mǐ xwedó kpɔ́ndéwú mɛ ɖěɖěe zán gbɛ e bɔkun bo sɔ́ Axɔ́súɖuto ɔ ɖó tɛn nukɔntɔn ɔ mɛ lɛ́ é tɔn ɔ, mǐ ná jɛ nǔɖókan lɛ́ xixokplé sín mɔ mɛ ǎ.b

10. Nɛ̌ wǎn yí nú Mawu kpó nɔzo mǐtɔn lɛ́ kpó ka nɔ d’alɔ mǐ bɔ mǐ nɔ dɛ gbɔn?

¹⁰ Bónú mǐ ná kpé wú bá nɔ wunzɛn, lobo lɛ́ zán nǔwúkpíkpé tamɛ linlin tɔn mǐtɔn ganjí ɔ, wǎnyíyí lɔ ɖo tají. (Mat. 22:37-39) Wǎn yí nú Mawu nɔ d’alɔ mǐ bɔ mǐ nɔ ɖó kan dó wɛnɖagbejíjlázɔ́ ɔ wú, ényí mɔ̌ wiwa ná bo tlɛ dɔn tagba ɖěbǔ kplá mǐ ɔ nɛ́. (2 Tim. 1:7, 8) Ðó mǐ nɔ lɛ́ yí wǎn nú mɛ ɖěɖěe ma nɔ sɛn Jexóva mǐɖɔhun ǎ lɛ́ é lɔ wútu ɔ, mǐ nɔ kpo ɖo wɛn ɖagbe ɔ jlá wɛ, bo nɔ kpo ɖo azɔ̌ wa gbɔn fí e mǐ nɔ jlá mawuxó ɖe lɛ́ é wɛ, bɔ nú é tlɛ byɔ́ ɖɔ mǐ ní zán alǒkan, alǒ wlán wěma sɛ́dó mɛ lɛ́ dó ɖɔ mawuxó nú yě ɔ, mǐ nɔ kpo ɖ’é wú. Hwebǐnu wɛ mǐ nɔ ɖó nukún ɖɔ gbe ɖokpó ɔ, nɔzo mǐtɔn lɛ́ ná húzú bo jɛ nǔ e sɔgbe é wa jí.—Ezek. 18:27, 28.

11. Nɛ̌ wǎn yí nú nǔɖitɔ́ hǎtɔ́ mǐtɔn lɛ́ ka nɔ d’alɔ mǐ gbɔn? (1 Tɛsaloníkinu lɛ́ 5:11)

¹¹ Ðó klisánwun hǎtɔ́ mǐtɔn lɛ́ lɔ nyí nɔzo mǐtɔn lɛ́ wútu ɔ, mǐ nɔ yí wǎn nú yě. Mǐ nɔ ná ‘akɔ́nkpinkpan mǐɖée lɛ́, bo nɔ bló bɔ mǐ nɔ lɛ́ lí dǒ’ dó xlɛ́ ɖɔ mǐ ɖo wǎnyíyí mɔ̌hun ɖe xlɛ́ mǐɖée wɛ. (Xa 1 Tɛsaloníkinu lɛ́ 5:11.) Sɔ́ja ɖěɖěe ɖo ahwan fun ɖó kpɔ́ wɛ lɛ́ é ɖɔhun ɔ, mǐ nɔ ná akɔ́nkpinkpan mǐɖée. É ɖo wɛn ɖɔ, sɔ́ja ɖé sixú d’akpa sɔ́ja gbɛ̌ tɔn ɖěvo wú ɖo ahwan hwenu, amɔ̌, é ná nyí jlǒ wɛ é sɔ́ dó wa mɔ̌ gbeɖé ǎ. Mɔ̌ ɖokpó ɔ, mǐ ná tuun bo d’akpa nɔví mǐtɔn lɛ́ wú, alǒ ba hlɔn yě wú gbeɖé ǎ. (1 Tɛ. 5:13, 15) Mǐ nɔ lɛ́ xlɛ́ ɖɔ mǐ yí wǎn nú yě gbɔn sísí ɖíɖó nú nɔví ɖěɖěe nɔ kpé nukún dó nǔ lɛ́ wú ɖo agun ɔ mɛ lɛ́ é gblamɛ. (1 Tɛ. 5:12) Hwenu e Pɔ́lu wlán wěma élɔ́ sɛ́dó Tɛsaloníkinu lɛ́ é ɔ, è ɖó agun yětɔn ayǐ é ɔ, xwe ɖokpó mɔ̌ bló wɛ jɛ́n é ɖe nɛ́. É cí ɖɔ súnnu e è sɔ́ ɖo agun énɛ́ mɛ lɛ́ é kún ko mɔ nǔ káká ɖé kpɔ́n ó, bo sixú ko lɛ́ ɖe afɔ ɖé lɛ́ nyi do. Nǔ ɖo mɔ̌ có, yě jɛxá sísí. Ée wǔvɛ́ ɖaxó ɔ ná ɖo sisɛkpɔ́ wɛ é ɔ, é sixú nyí mɛxó agun tɔn e ɖo xá mǐtɔn mɛ lɛ́ é gɔ́n wɛ mǐ ná nɔ ba wěɖexámɛ ɖe hú gǎn lěe mǐ ɖ’é wú gbɔn din é. Bóyá, ali sɔ́ ná hun nú mǐ bónú mǐ ná mɔ wěɖexámɛ lɛ́ sín nɔví mǐtɔn e ɖo Hɔ̌nkan gbɛ ɔ tɔn mǐtɔn lɛ́ é gɔ́n, alǒ alaxɔ mɛ ǎ, énɛ́ wú ɔ, é ɖo tají ɖɔ mǐ ní kplɔ́n bo nɔ yí wǎn nú mɛxó agun tɔn mǐtɔn lɛ́ din, lobo nɔ lɛ́ ɖó sísí nú yě. Gbɛ ná bo gbɔn ɖěbǔ hǔn, mi nú mǐ ní nɔ zán nǔwúkpíkpé tamɛ linlin tɔn mǐtɔn ganjí, bo ma nɔ sɔ́ ayi ɖó nǔwanyido yětɔn lɛ́ jí ó, loɔ, mǐ ní nɔ sɔ́ ayi ɖó lěe Jexóva gbɔn Klísu jí bo ɖo ali xlɛ́ súnnu gbejínɔtɔ́ énɛ́ lɛ́ wɛ gbɔn é jí.

12. Nɛ̌ nukúnɖíɖó ka nɔ cyɔ́n alɔ ayi mǐtɔn jí gbɔn?

¹² Lěe gangbákún ɖé nɔ cyɔ́n alɔ ta sɔ́ja ɖé tɔn jí gbɔn é ɔ, mɔ̌ wɛ nukúnɖíɖó hwlɛngán tɔn mǐtɔn nɔ cyɔ́n alɔ linlin mǐtɔn lɛ́ jí gbɔn é nɛ́. Ényí nukúnɖíɖó mǐtɔn lí dǒ ɔ, mǐ nɔ tuun ɖɔ nǔ e gbɛ ɔ nɔ xwlé mɛ lɛ́ é kún hwɛ́n nǔtí ó. (Filí. 3:8) Nukúnɖíɖó mǐtɔn nɔ d’alɔ mǐ bɔ mǐ nɔ cí xwíí, lobo nɔ lɛ́ ɖó ninɔmɛ ayi mɛ tɔn ɖagbe. Wallace kpó Laurinda kpó e ɖo sinsɛnzɔ́ wa wɛ ɖo Aflíka é mɔ ɖɔ xó énɛ́ nyí nǔgbó. Ðo aklúnɔzángbla atɔn vlamɛ ɔ, mɛjitɔ́ yě mɛ we lɛ́ bǐ tɔn ɖokpó ɖokpó kú. Ðó jɛmɛjí Covid-19 ɔ wú ɔ, yě kpé wú bo lɛ́ kɔ yi xwé bá nɔ kpɔ́ kpó mɛ e ɖo xwédo yětɔn mɛ lɛ́ é kpó ǎ. Wallace wlán ɖɔ: “Nukúnɖíɖó fínfɔ́n sín kú tɔn d’alɔ mì bɔ un nɔ lin tamɛ dó yě jí, é ka nyí dó lěe yě nɔ ɖo azǎn gǔdo gúdo tɔn gbɛ élɔ́ tɔn mɛ lɛ́ é jí ǎ, loɔ, dó lěe yě ná wá nɔ ɖo azǎn nukɔn nukɔntɔn ɖěɖěe yě ná bló ɖo gbɛ yɔ̌yɔ́ ɔ mɛ lɛ́ é jí. Nukúnɖíɖó énɛ́ nɔ fá ayi ce hwenu e un ɖo xwi ɖí xá aluwɛ, alǒ wǔvɛ́ e kú mɛvívɛ́ ɖé tɔn nɔ ɖó nú mɛ é wɛ é.”

13. Étɛ́ lɛ́ mǐ ka sixú wa bo ná mɔ gbigbɔ mímɛ́ yí?

¹³ ‘Mi ma cí myɔ gbigbɔ ɔ tɔn ó.’ (1 Tɛ. 5:19) Pɔ́lu jlɛ́ azɔ̌ e wa wɛ gbigbɔ mímɛ́ ɖe ɖo mǐ mɛ é dó myɔ wú. Ényí gbigbɔ Mawu tɔn ɖo azɔ̌ wa ɖo mǐ mɛ wɛ ɔ, akpakpa nɔ sɔ́ mǐ dó nǔ ɖagbe wiwa wú, bɔ mǐ nɔ ɖó kan d’é wú, lobo nɔ mɔ hlɔ̌nhlɔ́n bo nɔ w’azɔ̌ nú Jexóva. (Hlɔ̌. 12:11) Étɛ́ lɛ́ mǐ ka sixú wa bo ná mɔ gbigbɔ mímɛ́ yí? Mǐ sixú nɔ xo ɖɛ dó byɔ́, nɔ kplɔ́n Xó Mawu tɔn, lobo nɔ lɛ́ dó gbɛ̌ xá tutoblónúnǔ Mawu tɔn e gbigbɔ mímɛ́ tɔn ɖo ali xlɛ́ wɛ é. Mɔ̌ wiwa ná d’alɔ mǐ bɔ mǐ ná tɛ́n kpɔ́n bo ɖó “jijɔ ɖěɖěe gbigbɔ ɔ nɔ zɔ́n bɔ è nɔ ɖó lɛ́ é.”—Ga. 5:22, 23.

14. Étɛ́ mǐ ka ɖó ná nyi alɔ ná, bo ná dó kpo ɖo gbigbɔ Mawu tɔn mɔ yí wɛ? (Lɛ̌ kpɔ́n fɔtóo ɔ.)

¹⁴ Ényí Mawu ná gbigbɔ mímɛ́ tɔn mǐ gúdo ɔ, mǐ ɖó ná cɔ́ mǐɖée bo ‘ma cí myɔ gbigbɔ ɔ tɔn ó.’ Mɛ ɖěɖěe nɔ ɖó linlin ɖagbe, bo nɔ lɛ́ zán gbɛ jlɔ́jlɔ́ lɛ́ é kɛ́ɖɛ́ jɛ́n Mawu nɔ ná gbigbɔ tɔn. Ényí mǐ nɔ ɖo tamɛ lin dó nǔ e ma sɔgbe ǎ lɛ́ é jí wɛ, bo nɔ lɛ́ zán gbɛ blíblí ɔ, é sɔ́ ná ná gbigbɔ tɔn ɖě mǐ ǎ. (1 Tɛ. 4:7, 8) Bo ná dó kpo ɖo gbigbɔ mímɛ́ tɔn mɔ yí wɛ ɔ, mǐ ɖó ná nɔ ‘dó vɛ̌ nú nǔɖɔɖayǐ lɛ́’ ǎ. (1 Tɛ. 5:20) Ðo wěmafɔ élɔ́ mɛ ɔ, ‘nǔɖɔɖayǐ lɛ́’ wɛ nyí xó ɖěɖěe Jexóva ɖɔ nú mǐ gbɔn gbigbɔ mímɛ́ tɔn gblamɛ lɛ́ é; xó e kúnkplá azǎn Jexóva tɔn kpó lěe mǐ ná hwlɛndó hwenu lɛ́ gbɔn é kpó lɔ ɖ’é mɛ. Mǐ nɔ lin ɖɔ azǎn Jexóva tɔn, alǒ Aamagedɔ́ni kún ná wá ɖo gbɛhwenu mǐtɔn ó ǎ. É nyɔ́ wa ɔ, mǐ nɔ xlɛ́ ɖɔ mǐ ɖo nukún ɖó wɛ ɖɔ azǎn énɛ́ ná wá ɖo malínmálín mɛ, bo nɔ lɛ́ hɛn azǎn énɛ́ d’ayi mɛ gbɔn alɔnu mǐtɔn hinhɛn ján ɖo walɔ mímɛ́ kpó “gbejí nɔ nú Mawu sín nǔ lɛ́” wiwa ayǐhɔ́ngbe ayǐhɔ́ngbe kpó mɛ gblamɛ.—2 Pi. 3:11, 12.

15. Nɛ̌ mǐ ka sixú cɔ́ mǐɖée bónú xó ɖěɖěe mɛ lɛ́ nɔ fúnfún kpé lɛ́ é kpó nǔjlájlá ɖěɖěe gúdo Awǒvi nɔ nɔ lɛ́ é kpó ní ma wá flú mǐ ó gbɔn? (1 Tɛsaloníkinu lɛ́ 5:21)

¹⁵ Ðo malínmálín mɛ ɔ, mɛ ɖěɖěe klán gbe xá Mawu lɛ́ é ná ɖɔ ɖo ali ɖé nu ɖɔ: ‘Fífá tíin, bɔ ayi j’ayǐ!’ (1 Tɛ. 5:3) Nǔjlájlá ɖěɖěe Awǒvi sɔ́ d’ayi mɛ nú mɛ lɛ́ é wɛ kpé ayǐkúngban ɔ bǐ jí, bo ɖo mɛ gěgé dɔn bú wɛ. (Nǔɖe. 16:13, 14) Mǐdɛɛ lɛ́ ka lo? Ényí mǐ ‘nɔ gbéjé, alǒ “tɛ́n” nǔ lɛ́ bǐ kpɔ́n ɔ,’ nǔɖé ná dɔn mǐ yi bú ǎ. (Xa 1 Tɛsaloníkinu lɛ́ 5:21.) Xókwín Glɛ̌kigbe tɔn e è tínmɛ bɔ é nyí ‘gbéjé kpɔ́n’ é ɔ, è nɔ zán dó ɖɔ xó dó lěe mɛ lɛ́ nɔ tɛ́n gan xɔ akwɛ́ lɛ́ ɖi siká kpó kpatágan kpó kpɔ́n gbɔn, bo ná dó kpɔ́n ɖɔ akú jɛ́n yě nyí ǎ jí é wú. Mɔ̌ ɖokpó ɔ, é byɔ́ ɖɔ mǐ ní nɔ tɛ́n nǔ e mǐ nɔ se lɛ́ é, alǒ nǔ e mǐ nɔ xa lɛ́ é kpɔ́n, bo nɔ kpɔ́n ɖɔ nǔgbó jɛ́n yě nyí a jí. Énɛ́ ɖo tají nú Tɛsaloníkinu lɛ́, bo tlɛ ɖó ná ɖo tají hú gǎn nú mǐdɛɛ lɛ́, din e wǔvɛ́ ɖaxó ɔ ɖo sisɛkpɔ́ wɛ é. Mǐ ɖó ná nɔ ɖi nǔ nú nǔ e mɛ ɖěvo lɛ́ nɔ ɖɔ nú mǐ lɛ́ é bǐ ǎ, é nyɔ́ wa ɔ, mǐ ɖó ná nɔ zán nǔwúkpíkpé tamɛ linlin tɔn mǐtɔn bo ná nɔ jlɛ́ nǔ e mǐ nɔ xa, alǒ nǔ e mǐ nɔ se lɛ́ é dó nǔ e Biblu kpó tutoblónúnǔ Jexóva tɔn kpó ɖɔ lɛ́ é wú. Mɔ̌ wiwa ná zɔ́n bɔ nǔjlájlá ɖěɖěe gúdo Awǒvi nɔ nɔ lɛ́ é ɖě ná dɔn mǐ yi bú ǎ.—Nǔx. 14:15; 1 Tim. 4:1.

16. Nukúnɖíɖó ɖejidéwú tɛ́ mǐ ka ɖó? Étɛ́ mǐ ka kán ɖ’é jí bá wa?

¹⁶ Mǐ tuun ɖɔ mɛ Jexóva tɔn lɛ́ ná gán ɖo wǔvɛ́ ɖaxó ɔ hwenu. Amɔ̌, mǐ tuun nǔ e sɔ hɛn nu nú mǐ mɛ ɖokpó ɖokpó é ǎ. (Ja. 4:14) Nǔ ɔ wɛ nyí ɖɔ, mǐ xo wǔvɛ́ ɖaxó ɔ zlɛ́ wɛ oo, alǒ mǐ kpo ɖo gbejí bo kú cóbɔ é wá wɛ ɔ, è ná dó gbɛ mavɔmavɔ sín ajɔ mǐ. Mɛ yí ami dó ɖe lɛ́ ná nɔ kpɔ́ xá Klísu ɖo jǐxwé. Lɛ̌ngbɔ́ ɖěvo lɛ́ ná nɔ palaɖísi mɛ ɖo ayǐkúngban jí. Mi nú mǐ bǐ ní sɔ́ ayi ɖó nukúnɖíɖó jí wǔ mǐtɔn jí, bo kpo ɖo gbesisɔmɛ nú azǎn Jexóva tɔn.