1 Mose
8 Shi Nyɔŋmɔ gbala ejwɛŋmɔ kɛba* Noa kɛ ŋa mli kooloi kɛ shĩa kooloi fɛɛ ni kɛ lɛ yɔɔ adeka lɛ mli lɛ anɔ,+ ni Nyɔŋmɔ hã kɔɔyɔɔ ko tswa yɛ shikpɔŋ lɛ nɔ, ni nui lɛ anɔ bɔi gbɔmɔ. 2 Atsimɔ nui babaoo lɛ anuhiŋmɛii lɛ anaa, ni aŋamɔ ŋwɛi nui lɛ shinai* lɛ, no hewɔ lɛ, nugbɔ ni nɛɔ kɛjɛɔ ŋwɛi lɛ kpa nɛmɔ.*+ 3 Kɛkɛ ni nui lɛ anɔ bɔi gbɔmɔ fiofio yɛ shikpɔŋ lɛ nɔ. Be ni gbii 150 baa naagbee lɛ, nui lɛ anɔ egbɔ. 4 Yɛ nyɔɔŋ ni ji kpawo lɛ nɔ gbi ni ji 17 lɛ nɔ lɛ, adeka lɛ yama shi yɛ Ararat gɔji lɛ anɔ. 5 Ni nui lɛ anɔ gbɔ fiofio kɛyashi nyɔɔŋ ni ji nyɔŋma lɛ nɔ. Yɛ nyɔɔŋ ni ji nyɔŋma lɛ klɛŋklɛŋ gbi lɛ nɔ lɛ, ana gɔji lɛ ayiteŋ.+
6 No hewɔ lɛ, be ni gbii 40 ba naagbee lɛ, Noa gbele samfɛlɛ+ ní efee yɛ adeka lɛ he lɛ, 7 ni etsu kwaakwaalabite; ni efiliki kɛtee kɛba aahu, kɛyashi nui lɛ gbi yɛ shikpɔŋ lɛ nɔ.
8 Sɛɛ mli lɛ, etsu okpo koni ekɛna kɛji nui lɛ emii yɛ shikpɔŋ lɛ nɔ. 9 Okpo lɛ náaa he ko esɔ̃ ejɔɔ ehe,* no hewɔ lɛ, eku esɛɛ kɛba eŋɔɔ yɛ adeka lɛ mli, ejaakɛ nui lɛ ha shikpɔŋ lɛ fɛɛ hiɛ+ lolo. No hewɔ lɛ, ekpã enine mli ni eŋɔ okpo lɛ kɛba adeka lɛ mli. 10 Emɛ gbii kpawo kroko, ni esaa etsu okpo lɛ shi kome ekoŋŋ kɛjɛ adeka lɛ mli. 11 Be ni okpo lɛ ba eŋɔɔ aaafee gbɛkɛ mli lɛ, ena akɛ oliv baa fɔ tsɛ enaa! No hewɔ lɛ, Noa ná le akɛ nui lɛ anɔ egbɔ yɛ shikpɔŋ lɛ nɔ.+ 12 Esaa emɛ gbii kpawo kroko hu. Kɛkɛ ni etsu okpo lɛ, shi ekuuu esɛɛ kɛbaaa eŋɔɔ dɔŋŋ.
13 Agbɛnɛ, be ni shɛɔ afi ni ji afi 601+ lɛ klɛŋklɛŋ nyɔɔŋ lɛ klɛŋklɛŋ gbi lɛ nɔ lɛ, nui lɛ anɔ egbɔ kwraa yɛ shikpɔŋ lɛ nɔ; ni Noa jie adeka lɛ naanɔ lɛ, ni ena akɛ shikpɔŋ lɛ nɔ miigbi. 14 Yɛ nyɔɔŋ ni ji enyɔ lɛ nɔ gbi ni ji 27 lɛ nɔ lɛ, shikpɔŋ lɛ nɔ gbi kwraa.
15 Agbɛnɛ, Nyɔŋmɔ kɛɛ Noa akɛ: 16 “Jee kpo yɛ adeka lɛ mli, bo kɛ oŋa kɛ obihii lɛ kɛ obihii lɛ aŋamɛi lɛ.+ 17 Okɛ bɔɔ nii srɔtoi fɛɛ ni hiɛ kamɔ+—bɔɔ nii ni filikiɔ kɛ kooloi kɛ nii fɛɛ ni wamɔɔ yɛ shikpɔŋ lɛ nɔ lɛ aje kpo, koni amɛshwere* yɛ shikpɔŋ lɛ nɔ, ní amɛfɔ ní amɛyi afa yɛ shikpɔŋ lɛ nɔ.”+
18 No hewɔ lɛ, Noa kɛ ebihii lɛ+ kɛ eŋa kɛ ebihii lɛ aŋamɛi lɛ fɛɛ je kpo. 19 Bɔɔ nɔ fɛɛ bɔɔ nɔ ni hiɛ kã kɛ kooloo fɛɛ kooloo ni wamɔɔ kɛ bɔɔ nɔ fɛɛ bɔɔ nɔ ni filikiɔ, nɔ fɛɛ nɔ ni tsiɔ ehe yɛ shikpɔŋ lɛ nɔ lɛ je kpo kɛje adeka lɛ mli yɛ amɛkui anaa.+ 20 Ni Noa ma afɔleshaa latɛ+ ehã Yehowa, ni emɔ kooloi ni he tse lɛ fɛɛ mli eko kɛ bɔɔ nii ni filikiɔ ni he tse+ lɛ fɛɛ mli eko, ni ekɛshã shãa afɔle yɛ afɔleshaa latɛ lɛ nɔ.+ 21 Ni Yehowa nu ŋma kpakpa* lɛ. No hewɔ lɛ, Yehowa kɛɛ yɛ etsuiŋ akɛ: “Milomɔŋ* shikpɔŋ+ lɛ dɔŋŋ yɛ gbɔmɔ hewɔ, ejaakɛ gbɔmɔ tsuiŋ susumɔ lɛ, efɔŋ ni kɛjɛ egbekɛbiiashi;+ ni mikpãtãŋ nɔ fɛɛ nɔ ni hiɛ kã lɛ hiɛ dɔŋŋ tamɔ bɔ ni mifee lɛ.+ 22 Kɛjɛ be nɛɛ nɔ kɛyaa lɛ, nidumɔ kɛ nikpamɔ, ŋanii kɛ dɔlɛ, latsa be kɛ fɛ̃i be, jetsɛremɔ kɛ jenamɔ, sɛɛ efoŋ yɛ shikpɔŋ lɛ nɔ kɔkɔɔkɔ.”+