1 Maŋtsɛmɛi

13 Yɛ Yehowa famɔ naa lɛ, Nyɔŋmɔ gbɔmɔ+ ko jɛ Yuda kɛba Betel be ni Yeroboam damɔ afɔleshaa latɛ+ lɛ he ni eeba ebashã lasu afɔle lɛ. 2 Kɛkɛ ni egba eshi afɔleshaa latɛ lɛ yɛ Yehowa famɔ naa ekɛɛ: “Afɔleshaa latɛ oo, afɔleshaa latɛ! Nɔ ni Yehowa kɛɛ nɛ: ‘Naa! Abaafɔ binuu ko yɛ David shĩa lɛ ni abaatsɛ lɛ Yosia!+ Hei grɔŋŋi lɛ osɔfoi lɛ, ni ji mɛi ni shãa lasu afɔle yɛ onɔ lɛ, ebaagbe amɛ yɛ onɔ,* ni ebaashã gbɔmɛi awui hu yɛ onɔ.’”+ 3 Eto okadi ko yɛ nakai gbi lɛ nɔ ekɛɛ: “Enɛ ji okadi ni Yehowa kɛhã: Naa! Afɔleshaa latɛ lɛ mli baagba, ni emli lamulu* lɛ baashwie shi.”

4 Be ni Maŋtsɛ Yeroboam nu nɔ ni anɔkwa Nyɔŋmɔ lɛ gbɔmɔ lɛ gba eshi afɔleshaa latɛ ni yɔɔ Betel lɛ nɔŋŋ lɛ, ejie enine yɛ afɔleshaa latɛ lɛ nɔ, ni ekpã mli etsɔɔ anɔkwa Nyɔŋmɔ lɛ gbɔmɔ lɛ ekɛɛ: “Nyɛmɔa lɛ!”+ Amrɔ nɔŋŋ kɛkɛ ni enine ni ekpã mli lɛ shɔ̃,* ni enyɛɛɛ esu enine dɔŋŋ.+ 5 Kɛkɛ ni afɔleshaa latɛ lɛ mli gba ni lamulu lɛ jɛ afɔleshaa latɛ lɛ nɔ eshwie shi tamɔ bɔ ni anɔkwa Nyɔŋmɔ lɛ gbɔmɔ lɛ hã okadi lɛ yɛ Yehowa famɔ naa lɛ.

6 Kɛkɛ ni maŋtsɛ lɛ kɛɛ anɔkwa Nyɔŋmɔ lɛ gbɔmɔ lɛ akɛ: “Ofainɛ kpa Yehowa, o-Nyɔŋmɔ lɛ fai ni osɔle ohã mi koni ena mi mɔbɔ ni etsa minine lɛ ehã mi.”+ Kɛkɛ ni anɔkwa Nyɔŋmɔ lɛ gbɔmɔ lɛ kpa Yehowa fai, ni Nyɔŋmɔ na maŋtsɛ lɛ mɔbɔ ni etsa enine lɛ ehã lɛ ni etsɔ tamɔ bɔ ni eyɔɔ tsutsu lɛ. 7 Kɛkɛ ni maŋtsɛ lɛ kɛɛ anɔkwa Nyɔŋmɔ lɛ gbɔmɔ lɛ akɛ: “Ba wɔtee shĩa koni oyaye nii, ni make bo nɔ ko.” 8 Shi anɔkwa Nyɔŋmɔ lɛ gbɔmɔ lɛ kɛɛ maŋtsɛ lɛ akɛ: “Kɛ́ oja oshĩa lɛ mli ni ohã mi fã po lɛ, mikɛ bo eyaŋ, ni miyeŋ nɔ ko* ni minuŋ nu hu yɛ biɛ. 9 Ejaakɛ Yehowa fã mi akɛ: ‘Kaaye nii* ni kaanu nu hu, ni kaaku osɛɛ kɛtsɔ gbɛ ni otsɔ nɔ kɛba lɛ nɔŋŋ nɔ kɛtee.’” 10 No hewɔ lɛ, etsɔ gbɛ kroko nɔ kɛtee, ni etsɔɔɔ gbɛ ni etsɔ nɔ kɛba Betel lɛ nɔ.

11 Nakai beiaŋ lɛ, gbalɔ nuumo ko yɛ Betel, ni ebihii ba shĩa amɛbabɔ lɛ nɔ fɛɛ nɔ ni anɔkwa Nyɔŋmɔ lɛ gbɔmɔ lɛ fee yɛ Betel nakai gbi lɛ kɛ nibii ni ekɛ maŋtsɛ lɛ wie lɛ fɛɛ. Be ni amɛbɔ amɛpapa amaniɛ lɛ amɛgbe naa lɛ, 12 amɛpapa bi amɛ akɛ: “Nɛgbɛ etsɔ kɛtee?” Kɛkɛ ni ebihii lɛ tsɔɔ lɛ gbɛ ni anɔkwa Nyɔŋmɔ lɛ gbɔmɔ lɛ ni jɛ Yuda lɛ tsɔ nɔ kɛtee. 13 Kɛkɛ ni ekɛɛ ebihii lɛ akɛ: “Nyɛwoa teji lɛ nɔ nii nyɛhãa mi.” Kɛkɛ ni amɛwo teji lɛ nɔ nii amɛhã lɛ, ni eta nɔ.

14 Etiu anɔkwa Nyɔŋmɔ lɛ gbɔmɔ lɛ ni eyanina lɛ ni eta tso agbo ko shishi. Kɛkɛ ni ebi lɛ akɛ: “Bo ji anɔkwa Nyɔŋmɔ lɛ gbɔmɔ ni jɛ Yuda lɛ lo?”+ Ekɛɛ akɛ: “Hɛɛ, mi ni.” 15 Nuumo lɛ kɛɛ lɛ akɛ: “Ba wɔtee shĩa ni oyaye nɔ ko.”* 16 Shi ekɛɛ nuumo lɛ akɛ: “Minyɛŋ maku misɛɛ, ni minyɛŋ mikɛ bo aya oshĩa lɛ hu, ni mikɛ bo yeŋ nii* ni mikɛ bo enuŋ nu hu yɛ biɛ. 17 Ejaakɛ Yehowa fã mi akɛ, ‘Kaaye nii* ni kaanu nu hu yɛ jɛmɛ. Kaaku osɛɛ kɛtsɔ gbɛ ni otsɔ nɔ kɛba lɛ nɔŋŋ nɔ kɛtee.’” 18 Kɛkɛ ni nuumo lɛ kɛɛ lɛ akɛ: “Mi hu gbalɔ ji mi tamɔ bo nɔŋŋ, ni ŋwɛibɔfo ko bakɛɛ mi yɛ Yehowa famɔ naa akɛ, ‘Hã ekɛ bo aku sɛɛ kɛba oshĩa lɛ koni ebaye nɔ ko* ni enu nu.’” (Shi no mli lɛ, eelaka lɛ.) 19 No hewɔ lɛ, ekɛ nuumo lɛ ku sɛɛ kɛtee nuumo lɛ shĩa lɛ ni eyaye nii* ni enu nu.

20 Be ni amɛta okpɔlɔ lɛ he lɛ, Yehowa kɛ gbalɔ lɛ ni yaŋɔ lɛ kɛku sɛɛ kɛba lɛ wie,* 21 ni ebo etsɛ anɔkwa Nyɔŋmɔ lɛ gbɔmɔ ni jɛ Yuda lɛ ekɛɛ, “Nɔ ni Yehowa kɛɛ nɛ: ‘Gbii abɔ ni otse Yehowa wiemɔ lɛ hiɛ atua, ni oyeee kitã ni Yehowa, o-Nyɔŋmɔ lɛ, wo bo lɛ nɔ, 22 shi oku osɛɛ oyaye nii* ni oyanu nu yɛ he ni akɛɛ bo yɛ he akɛ, “Kaaye nii* ni kaanu nu” lɛ, akɛ ogbonyo eyaŋ otsɛmɛi afuuhe lɛ.’”+

23 Be ni anɔkwa Nyɔŋmɔ lɛ gbɔmɔ lɛ eye nii* ni enu nu lɛ sɛɛ lɛ, gbalɔ nuumo lɛ wo teji lɛ nɔ nii ehã gbalɔ lɛ ni eyaŋɔ lɛ kɛku sɛɛ kɛba lɛ. 24 Kɛkɛ ni eyi gbɛ, shi jata ko kɛ lɛ bakpe yɛ gbɛ lɛ nɔ ni egbe lɛ.+ Egbonyo lɛ kã gbɛ lɛ nɔ, ni teji lɛ damɔ he; jata lɛ hu damɔ gbonyo lɛ he. 25 No mli lɛ, mɛi komɛi miiho ni amɛna gbonyo lɛ kã gbɛ lɛ nɔ, ni jata lɛ damɔ gbonyo lɛ he. Amɛba ni amɛbabɔ he amaniɛ yɛ maŋ ni gbalɔ nuumo lɛ yɔɔ mli lɛ mli.

26 Be ni gbalɔ lɛ ni yaŋɔ lɛ kɛjɛ gbɛ lɛ nɔ kɛba lɛ nu he nɔŋŋ lɛ, ekɛɛ akɛ: “Anɔkwa Nyɔŋmɔ lɛ gbɔmɔ lɛ ni tse Yehowa wiemɔ lɛ hiɛ atua lɛ ni;+ Yehowa jie lɛ ehã jata lɛ koni eye lɛ awui ni egbe lɛ yɛ famɔ ni Yehowa kɛhã gbalɔ lɛ naa.”+ 27 Kɛkɛ ni ekɛɛ ebihii lɛ akɛ: “Nyɛwoa teji lɛ nɔ nii nyɛhãa mi.” No hewɔ lɛ, amɛwo nɔ nii amɛhã lɛ. 28 Kɛkɛ ni eyi gbɛ ni eyana gbonyo lɛ kã gbɛ lɛ nɔ ni teji lɛ kɛ jata lɛ damɔ he. Jata lɛ yeko gbonyo lɛ, ni eyeko teji lɛ hu awui ko. 29 Gbalɔ lɛ wó anɔkwa Nyɔŋmɔ lɛ gbɔmɔ lɛ gbonyo lɛ ni ekɛ lɛ fɔ̃ teji lɛ nɔ, ni gbalɔ nuumo lɛ kɛ lɛ ku sɛɛ kɛba lɛ diɛŋtsɛ emaŋ lɛ mli koni ebafó lɛ ni efu lɛ. 30 No hewɔ lɛ, ekɛ gbonyo lɛ yaŋmɛ lɛ diɛŋtsɛ efuuhe lɛ, amɛtee nɔ amɛfó lɛ amɛkɛɛ: “Minyɛmi kpoo oo!” 31 Be ni efu lɛ lɛ, ekɛɛ ebihii lɛ akɛ: “Kɛ́ migbo lɛ, nyɛfua mi yɛ he ni afu anɔkwa Nyɔŋmɔ lɛ gbɔmɔ lɛ yɛ lɛ. Nyɛkɛ mi afɔ̃a emasɛi.*+ 32 Nɔ fɛɛ nɔ ni egba yɛ Yehowa famɔ naa eshi afɔleshaa latɛ ni yɔɔ Betel lɛ, kɛ jamɔhei fɛɛ ni yɔɔ hei grɔŋŋi+ lɛ yɛ Samaria maji lɛ amli lɛ baaba mli kɛ̃.”+

33 Yɛ nɔ ni ba nɛɛ fɛɛ sɛɛ po lɛ, Yeroboam ejeee gbɛ fɔŋ ni ekɔ lɛ nɔ, shi etee nɔ ehole osɔfoi kɛhã hei grɔŋŋi lɛ kɛjɛ maŋbii lɛ ateŋ.+ Ewóɔ mɔ fɛɛ mɔ ni sumɔɔ akɛ esɔmɔ akɛ osɔfo lɛ osɔfo,* ni ekɛɔ akɛ: “Hã esɔmɔ akɛ hei grɔŋŋi lɛ osɔfoi lɛ eko.”+ 34 Esha nɛɛ ni Yeroboam+ shĩa lɛ fee lɛ hã akpãtã amɛhiɛ ni ajie amɛ kɛje shikpɔŋ lɛ nɔ.+