2 Mose
27 “Okɛ akasia tso afee afɔleshaa latɛ;+ ekɛlɛ afee ninetalɔi* enumɔ, ni elɛɛmɔ afee ninetalɔi enumɔ. Afɔleshaa latɛ lɛ koji ejwɛ lɛ fɛɛ aye egbɔ, ni ekwɔlɛ afee ninetalɔi etɛ.+ 2 Feemɔ akolontoi+ omamɔ ekoji ejwɛ lɛ anɔ; akolontoi lɛ kɛ afɔleshaa latɛ lɛ fɛɛ afee nɔ muu kome, ni okɛ akɔɔble aha afɔleshaa latɛ lɛ he.+ 3 Feemɔ gogai ni akɛbaaloo emli lamulu* lɛ kɛ sofii kɛ tsɛnsii kɛ fakai kɛ lajeenii, ni okɛ akɔɔble afee ehe nibii lɛ fɛɛ.+ 4 Feemɔ looshãa dade, ni ji akɔɔble ntaŋ ní akɛbaawo afɔleshaa latɛ lɛ mli, ní okɛ akɔɔble afee gai ejwɛ yɛ akɔɔble ntaŋ lɛ nɔ yɛ ekoji ejwɛ lɛ. 5 Okɛ looshãa dade lɛ awo nɔ ni akɛbã afɔleshaa latɛ lɛ naa lɛ shishigbɛ, ni ebaakã kɛmiiya afɔleshaa latɛ lɛ teŋgbɛ. 6 Gbɔɔ akasia tsei kɛhã afɔleshaa latɛ lɛ, ní okɛ akɔɔble aha he. 7 Akɛ tsei lɛ baahɔlɔ gai lɛ amli yɛ afɔleshaa latɛ lɛ koŋ biɛ kɛ biɛ, koni akɛwó.+ 8 Okɛ ŋmoŋmolo afee afɔleshaa latɛ lɛ tamɔ adeka ni gbɛ kã mli. Feemɔ lɛ tamɔ bɔ ni akɛtsɔɔ* bo yɛ gɔŋ lɛ nɔ lɛ pɛpɛɛpɛ.+
9 “Feemɔ kpo+ owo sɔlemɔ buu lɛ he. Kpo lɛ he ni ye wuoyigbɛ, he ni kwɛɔ wuoyigbɛ lɛ, okɛ klala ni alo lɛ jogbaŋŋ ní kɛlɛ ji ninetalɔi 100 afee mamai kɛtsotsoro jɛmɛ.+ 10 Akulashiŋi 20 kɛ amɛnɔdaamɔnii ni fɔji yɔɔ mli 20 ní akɛ akɔɔble fee ahi jɛmɛ. Akulashiŋi lɛ ahe kpoji lɛ kɛ amɛmlibɛlɛmɔnii* lɛ, okɛ jwiɛtɛi afee. 11 Mamai ni akɛbaatsotsoro he ni ye kooyigbɛ lɛ hu kɛlɛ afee ninetalɔi 100, kɛ ehe akulashiŋi 20 kɛ amɛnɔdaamɔnii 20 ni fɔji yɔɔ mli ní akɛ akɔɔble fee, kɛ akulashiŋi lɛ ahe kpoji kɛ amɛmlibɛlɛmɔnii* ní akɛ jwiɛtɛi fee. 12 Kpo lɛ he ni ye anaigbɛ lɛ hu, okɛ mamai ni kɛlɛ ji ninetalɔi 50 atsotsoro jɛmɛ yɛ kpo lɛ lɛɛmɔ naa, kɛ ehe akulashiŋi nyɔŋma kɛ nɔdaamɔnii nyɔŋma ni fɔji yɔɔ mli. 13 Kpo lɛ he ni ye bokãgbɛ, ni ji he ni ye kɛmiiya hulushiteehe lɛ lɛɛmɔ afee ninetalɔi 50. 14 Mamai ninetalɔi 15 atsotsoro afã kome, kɛ ehe akulashiŋi etɛ kɛ nɔdaamɔnii etɛ ni fɔji yɔɔ mli.+ 15 Ni afã kroko lɛ hu, mamai ninetalɔi 15 atsotsoro jɛmɛ, ni akulashiŋi etɛ kɛ nɔdaamɔnii etɛ ni fɔji yɔɔ mli yɛ jɛmɛ.
16 “Okɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ+ alo pateeshɛŋ ni kɛlɛ ji ninetalɔi 20 owo kpo lɛ he shinaa lɛ naa, kɛ ehe akulashiŋi ejwɛ kɛ amɛnɔdaamɔnii ejwɛ ni fɔji yɔɔ mli.+ 17 Kpo lɛ he akulashiŋi lɛ fɛɛ lɛ, okɛ jwiɛtɛi afee amɛmlibɛlɛmɔnii lɛ kɛ amɛkpoji lɛ, shi akulashiŋi lɛ anɔdaamɔnii ni fɔji yɔɔ mli lɛ, okɛ akɔɔble afee.+ 18 Kpo lɛ kɛlɛ afee ninetalɔi 100,+ elɛɛmɔ afee ninetalɔi 50, ni ekwɔlɛ afee ninetalɔi 5, ní akɛ klala ni alo lɛ jogbaŋŋ fee, ni akɛ akɔɔble afee enɔdaamɔnii ni fɔji yɔɔ mli lɛ. 19 Nitsumɔ dadei lɛ fɛɛ kɛ nibii krokomɛi fɛɛ ni akɛbaatsu nii yɛ sɔlemɔ buu lɛ mli, kɛ sɔlemɔ buu lɛ dadei kɛ amɛnaa piɔpiɔi* lɛ, kɛ kpo lɛ he dadei kɛ amɛnaa piɔpiɔi lɛ fɛɛ lɛ, akɛ akɔɔble afee.+
20 “Fã Israelbii lɛ ni amɛkɛ oliv mu krɔŋŋ ni akɛ oliv yibii ni ashi* fee abahã bo ní akɛwo kanei lɛ amli kɛsu, bɔ ni afee ni kanei lɛ atso be fɛɛ be.+ 21 Aaron kɛ ebihii lɛ akwɛ koni kanei lɛ atso kɛjɛ gbɛkɛ kɛyashi leebi yɛ Yehowa hiɛ,+ yɛ kpee buu lɛ mli, yɛ pateeshɛŋ ni bɛŋkɛ Odaseyeli adeka+ lɛ hiɛgbɛ. Eji mla ni kã shi daa hã Israelbii lɛ yɛ amɛyinɔi fɛɛ amli.+