2 Mose

32 Agbɛnɛ, maŋbii lɛ na akɛ Mose sɛɛ eyatsɛ yɛ gɔŋ lɛ nɔ,+ ni ekpelekeee shi kɛbaaa. No hewɔ lɛ, maŋbii lɛ bua amɛhe naa kɛbɔle Aaron, ni amɛkɛɛ lɛ akɛ: “Tee shi ni ofee nyɔŋmɔ ohã wɔ ní enyiɛ wɔhiɛ,+ ejaakɛ wɔleee nɔ ni eba nɛkɛ Mose nɛɛ, ni ji nuu lɛ ni nyiɛ wɔhiɛ* kɛshi Ejipt shikpɔŋ lɛ nɔ lɛ nɔ.” 2 Kɛkɛ ni Aaron kɛɛ amɛ akɛ: “Nyɛjiea shika tsuru toiiaŋnii+ ni yɔɔ nyɛŋamɛi kɛ nyɛbihii kɛ nyɛbiyei lɛ atoiiaŋ lɛ, ní nyɛkɛbahãa mi.” 3 No hewɔ lɛ, maŋbii lɛ fɛɛ jiejie shika tsuru toiiaŋnii ni yɔɔ amɛtoiiaŋ lɛ, ni amɛkɛbahã Aaron. 4 Kɛkɛ ni ehe shika tsuru lɛ yɛ amɛdɛŋ, ni ekɛ nikpɛmɔ dade kpɛ́ kɛfee tsinabi amaga.+ Ni amɛbɔi kɛɛmɔ akɛ: “Israel, o-Nyɔŋmɔ lɛ ni nyiɛ ohiɛ* kɛshi Ejipt shikpɔŋ lɛ nɔ lɛ nɛ.”+

5 Be ni Aaron na enɛ lɛ, ema afɔleshaa latɛ yɛ amaga lɛ hiɛ. Ni Aaron tswa adafi ekɛɛ: “Wɔ́ lɛ, abaaye gbi jurɔ ahã Yehowa.” 6 No hewɔ lɛ, enɔ jetsɛremɔ lɛ amɛte shi leebi maŋkpa, ni amɛshãshãa shãa afɔlei ni amɛkɛ naanyobɔɔ afɔlei hã. No sɛɛ lɛ, maŋbii lɛ ho tara shi, ni amɛye nii ni amɛnu nii. Kɛkɛ ni amɛte shi ni amɛshwɛ amɛhiɛ jogbaŋŋ.+

7 Agbɛnɛ, Yehowa kɛɛ Mose akɛ: “Yaa, kpelekemɔ shi kɛya, ejaakɛ omaŋbii lɛ, mɛi ni onyiɛ amɛhiɛ* kɛshi Ejipt shikpɔŋ lɛ nɔ lɛ ebule amɛhe.*+ 8 Amrɔ nɛɛ nɔŋŋ lɛ, amɛgbá afã kɛje gbɛ ni mifã amɛ akɛ amɛnyiɛ nɔ lɛ nɔ.+ Amɛfee tsinabi amaga amɛhã amɛhe, amɛmiikoto lɛ, ni amɛmiishã afɔle amɛmiihã lɛ, ni amɛmiikɛɛ akɛ, ‘Israel, o-Nyɔŋmɔ lɛ ni nyiɛ ohiɛ* kɛshi Ejipt shikpɔŋ lɛ nɔ lɛ nɛ.’” 9 Yehowa tee nɔ ekɛɛ Mose akɛ: “Mina akɛ maŋ nɛɛ, maŋ ni kuɛŋ ti ji amɛ.+ 10 No hewɔ lɛ, agbɛnɛ, ŋmɛɛ mi gbɛ ní makpãtã amɛhiɛ yɛ mimlifu ni naa wa lɛ mli, ní mahã bo moŋ otsɔ maŋ kpeteŋkpele.”+

11 Kɛkɛ ni Mose kpa Yehowa, e-Nyɔŋmɔ lɛ fai+ ekɛɛ: “Ao Yehowa, mɛni hewɔ omli aaafu omaŋ lɛ waa, be ni okɛ hewalɛ kpele kɛ nineshiwalɛ ejie amɛ kɛje Ejipt shikpɔŋ lɛ nɔ lɛ sɛɛ?+ 12 Mɛni hewɔ hu ni ooohã Ejiptbii lɛ akɛɛ akɛ, ‘Ehiɛ yiŋtoo fɔŋ ko be ni enyiɛ amɛhiɛ kɛshi Ejipt lɛ. Eetao eyagbe amɛ yɛ gɔji lɛ anɔ, ní ebule amɛshishi kɛje shikpɔŋ lɛ nɔ’?+ Hã omli ni efu waa lɛ sɛɛ afo, ní otsake* yiŋ ni okpɛ akɛ okɛ amanehulu nɛɛ baaba omaŋ lɛ nɔ lɛ. 13 Kaimɔ otsuji Abraham kɛ Isak kɛ Israel, mɛi ni okɛ bo diɛŋtsɛ ohe kã amɛ kitã okɛɛ: ‘Mahã nyɛseshibii afa tamɔ ŋwɛi ŋulamii,+ ni mikɛ shikpɔŋ nɛɛ fɛɛ ní mikɛɛ mikɛbaahã nyɛseshibii lɛ baahã amɛ, koni amɛŋɔ akɛ amɛnɔ daa’ lɛ.”+

14 No hewɔ lɛ, Yehowa tsake ejwɛŋmɔ* yɛ amanehulu ni ekɛɛ ekɛbaaba emaŋ lɛ nɔ lɛ he.+

15 Ni Mose tsɔ ehe ni ekpeleke shi kɛjɛ gɔŋ lɛ nɔ ni ehiɛ Odaseyeli tɛi tɛtrɛbii enyɔ+ lɛ yɛ edɛŋ.+ Aŋma nii yɛ tɛi tɛtrɛbii lɛ biɛ kɛ biɛ fɛɛ; aŋma nii yɛ amɛhiɛ kɛ amɛsɛɛ. 16 Tɛi tɛtrɛbii lɛ, Nyɔŋmɔ ninenaa nitsumɔ ni, ni niŋmaa ni yɔɔ tɛi tɛtrɛbii lɛ anɔ lɛ hu lɛ, Nyɔŋmɔ niŋmaa ni akpɛ́ yɛ nɔ ni.+ 17 Be ni Yoshua nu hoo ni maŋbii lɛ feɔ yɛ bolɔmɔ ni amɛbolɔɔ lɛ hewɔ lɛ he lɛ, ekɛɛ Mose akɛ: “Tawuu bolɔmɔ ko miiya nɔ yɛ nsara lɛ mli.” 18 Shi Mose kɛɛ:

19 Be ni Mose bɛŋkɛ nsara lɛ ni ena tsinabi+ lɛ kɛ joi lɛ nɔŋŋ lɛ, emli wo la waa, ni eshɛrɛ tɛi tɛtrɛbii lɛ ni yɔɔ edɛŋ lɛ eshwie shi, ni ejwara amɛ yɛ gɔŋ lɛ shishi.+ 20 Eŋɔ tsinabi ni amɛfee lɛ, ni ekɛ la shã, ni egbɛlɛ lɛ munyɔmunyɔ tamɔ mulu;+ no sɛɛ lɛ, ekɛshwã nu lɛ hiɛ ni ehã Israelbii lɛ nu.+ 21 Ni Mose kɛɛ Aaron akɛ: “Mɛni maŋ nɛɛ fee bo hewɔ ni okɛ esha kpeteŋkpele eba amɛnɔ nɛɛ?” 22 Aaron hã hetoo akɛ: “Minuŋtsɔ, omli akawo la. Bo diɛŋtsɛ ole akɛ maŋ lɛ sumɔɔ ni amɛfee efɔŋ.+ 23 No hewɔ lɛ, amɛkɛɛ mi akɛ, ‘Feemɔ nyɔŋmɔ ohã wɔ ní enyiɛ wɔhiɛ, ejaakɛ wɔleee nɔ ni eba nɛkɛ Mose nɛɛ, ni ji nuu lɛ ni nyiɛ wɔhiɛ* kɛshi Ejipt shikpɔŋ lɛ nɔ lɛ nɔ.’+ 24 No hewɔ lɛ, mikɛɛ amɛ akɛ, ‘Mɔ fɛɛ mɔ ni yɔɔ shika tsuru ko lɛ, ejie ní ekɛhã mi.’ Kɛkɛ ni mishɛrɛ mishwie la lɛ mli, ni nɔ ni jɛ mli kɛba ji tsinabi nɛɛ.”

25 Mose na akɛ anyɛɛɛ gbɔmɛi lɛ anaa atsĩ, ejaakɛ Aaron ehã amɛmiifee nɔ ni amɛsumɔɔ, no hewɔ lɛ, amɛhiɛiaŋ shwie shi yɛ amɛhenyɛlɔi lɛ ahiɛ. 26 Kɛkɛ ni Mose ho edamɔ shi yɛ nsara lɛ agbó lɛ naa ni ekɛɛ: “Namɔ yɔɔ Yehowa gbɛfaŋ? Eba miŋɔɔ!”+ Ni Levibii lɛ fɛɛ bua amɛhe naa kɛba eŋɔɔ. 27 Agbɛnɛ, ekɛɛ amɛ akɛ: “Nɔ ni Yehowa, Israel Nyɔŋmɔ lɛ kɛɛ nɛ, ‘Nyɛteŋ mɔ fɛɛ mɔ aŋmɔ eklante, ní ekpa nsara lɛ mli fɛɛ, kɛjɛ agbó kome naa kɛya ekroko naa, ní egbe enyɛmi kɛ ekutsoŋnyo kɛ enaanyo kpaakpa.’”+ 28 Levibii lɛ fee nɔ ni Mose kɛɛ lɛ. No hewɔ lɛ, nakai gbi lɛ agbe hii aaafee 3,000. 29 Kɛkɛ ni Mose kɛɛ: “Nyɛfea nyɛhe krɔŋkrɔŋ* nyɛhãa Yehowa ŋmɛnɛ, ejaakɛ nyɛteŋ mɔ fɛɛ mɔ ete shi ewo lɛ diɛŋtsɛ ebinuu kɛ lɛ diɛŋtsɛ enyɛmi nuu;+ ŋmɛnɛ lɛ ebaajɔɔ nyɛ.”+

30 Enɔ jetsɛremɔ nɔŋŋ lɛ, Mose kɛɛ maŋbii lɛ akɛ: “Nyɛfee esha kpele, ni agbɛnɛ, makwɔ kɛya Yehowa ŋɔɔ ní mayakpa lɛ fai akɛ aleenɔ ekɛ nyɛhe esha lɛ baake nyɛ lo.”+ 31 No hewɔ lɛ, Mose ku esɛɛ kɛtee Yehowa ŋɔɔ, ni ekɛɛ: “Maŋ nɛɛ efee esha kpele diɛŋtsɛ! Amɛkɛ shika tsuru fee nyɔŋmɔ amɛhã amɛhe!+ 32 Shi agbɛnɛ, kɛ́ oosumɔ lɛ, okɛ amɛhe esha lɛ ake amɛ;+ kɛjeee nakai lɛ, ofainɛ, gbee mi moŋ migbɛ́i kɛje owolo ni oŋma lɛ mli.”+ 33 Shi Yehowa kɛɛ Mose akɛ: “Mɔ fɛɛ mɔ ni efee esha eshi mi lɛ, lɛ egbɛ́i magbe yɛ miwolo lɛ mli. 34 Agbɛnɛ yaa, nyiɛmɔ maŋ lɛ hiɛ kɛya he ni mikɛ bo ewie he lɛ. Naa! mibɔfo lɛ baanyiɛ ohiɛ,+ ni gbi ni mahã amɛbu amɛhe akɔntaa amɛhã mi lɛ, magbala amɛtoi yɛ amɛhe esha lɛ hewɔ.” 35 Kɛkɛ ni Yehowa bɔi maŋbii lɛ haomɔ yɛ tsinabi ni amɛfee, ni ji nɔ ni Aaron fee lɛ hewɔ.