Yeremia

19 Nɔ ni Yehowa kɛɛ nɛ: “Yaa ni oyahé gbɛ́ yɛ gbɛshɔ̃lɔ ŋɔɔ.+ Ŋɔɔ maŋ onukpai lɛ ekomɛi kɛ osɔfoi lɛ ateŋ onukpai lɛ ekomɛi ofata ohe, 2 ni oje kpo kɛya Hinom Binuu Lɛ Jɔɔ+ lɛ mli yɛ Gbɛshɔ̃lɔi Agbó lɛ naa. Ni ojaje wiemɔi ni makɛɛ bo lɛ yɛ jɛmɛ. 3 Kɛɛmɔ akɛ, ‘Nyɛ Yuda maŋtsɛmɛi kɛ mɛi ni yɔɔ Yerusalem, nyɛboa Yehowa wiemɔ lɛ toi. Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ:

“‘“Mikɛ sane fɔŋ miiba biɛ nɛɛ, ni mɔ fɛɛ mɔ ni baanu lɛ, etoiiaŋ baafɛ̃lɛ lɛ. 4 Ejaakɛ amɛje misɛɛ+ ni amɛfee biɛ bɔ ni anyɛɛɛ ayoo biɛ dɔŋŋ.+ Amɛshãa afɔlei amɛhãa nyɔŋmɔi krokomɛi yɛ biɛ, nyɔŋmɔi ni amɛ kɛ amɛtsɛmɛi lɛ kɛ Yuda maŋtsɛmɛi lɛ leee, ni amɛhã mɛi ni efeko nɔ ko lɛ alá eyi biɛ nɛɛ obɔ.+ 5 Amɛmamɔ Baal hei grɔŋŋi lɛ koni amɛshã amɛbii* lɛ yɛ la mli kɛfee shãa afɔlei amɛhã Baal,+ nɔ ko ni mifãko, ni miwieko he hu, ni ebako mitsui mli po lɛ.”’*+

6 “‘“No hewɔ lɛ, naa! gbii miiba,” Yehowa kɛɛ, “ni atsɛŋ biɛ Tofet loo Hinom Binuu Lɛ Jɔɔ dɔŋŋ, shi moŋ, abaatsɛ biɛ Gbɔmɔgbee Jɔɔ.+ 7 Mafite Yuda kɛ Yerusalem yiŋtoi lɛ yɛ biɛ, ni mahã amɛnyɔ yɛ klante naa yɛ amɛhenyɛlɔi lɛ ahiɛ, ni amɛnyɔ hu yɛ mɛi ni taoɔ ni amɛshɔ̃ amɛwala yɛ amɛdɛŋ* lɛ anine nɔ. Ni mikɛ amɛgbohii lɛ baahã ŋwɛi loofɔji kɛ shikpɔŋ lɛ nɔ kooloi akɛ niyenii.+ 8 Ni mahã maŋ nɛɛ atsɔ nɔ ko ni hãa mɔ he jɔ̃ɔ ehe kɛ nɔ ko ni hãa mɔ boɔ tsia.* Naagbee mɔ fɛɛ naagbee mɔ ni tsɔɔ jɛmɛ kɛhoɔ lɛ baakwɛ, ni ehe baajɔ̃ ehe ni ebaabo tsia* yɛ ehaomɔi lɛ fɛɛ ahewɔ.+ 9 Ni mahã amɛye amɛbihii kɛ amɛbiyei aloo, ni amɛteŋ mɔ fɛɛ mɔ baaye enyɛmi gbɔmɔ loo yɛ bɔ ni amɛhenyɛlɔi lɛ kɛ mɛi ni taoɔ ashɔ̃ amɛwala yɛ amɛdɛŋ* lɛ ewo amɛhe ka ni amɛhã amɛhe efi amɛ yɛ bɔ ni amɛsa amɛnaa lɛ hewɔ.”’+

10 “Kɛkɛ lɛ, jwaa gbɛ́ lɛ yɛ hii ni kɛ bo tee lɛ ahiɛ, 11 ni okɛɛ amɛ akɛ, ‘Nɔ ni Yehowa, taiatsɛ lɛ kɛɛ nɛ: “Nɛkɛ majwa maŋbii nɛɛ kɛ maŋ nɛɛ, tamɔ bɔ ni mɔ ko jwaa gbɛshɔ̃lɔ gbɛ́ bɔ ni ehiii tsaramɔ dɔŋŋ lɛ; ni amɛbaafu gbohii lɛ yɛ Tofet kɛyashi amɛnáŋ he ko amɛfu amɛ yɛ dɔŋŋ.”’+

12 “‘Nɛkɛ ji bɔ ni mafee biɛ, kɛ mɛi ni yɔɔ biɛ lɛ, koni mahã maŋ nɛɛ atsɔ tamɔ Tofet,’ Yehowa kɛɛ. 13 ‘Ni Yerusalem shĩai lɛ kɛ Yuda maŋtsɛmɛi lɛ ashĩai lɛ baatsɔ he ko ni tseee tamɔ biɛ nɛɛ, Tofet,+ hɛɛ, shĩai fɛɛ ni amɛshã afɔlei amɛhã ŋwɛi asraafoi+ lɛ fɛɛ ni amɛfɔse dãa afɔlei amɛhã nyɔŋmɔi krokomɛi lɛ yɛ amɛyiteŋ lɛ.’”+

14 Be ni Yeremia ku esɛɛ kɛjɛ Tofet, he ni Yehowa tsu lɛ koni eyagba yɛ lɛ eba lɛ, eyadamɔ Yehowa shĩa lɛ kpo lɛ nɔ ni ekɛɛ maŋbii lɛ fɛɛ akɛ: 15 “Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Naa, mikɛ saji fɔji fɛɛ ni miwie yɛ nɛkɛ maŋ nɛɛ kɛ ehe maji lɛ fɛɛ ahe lɛ miiba amɛnɔ, ejaakɛ amɛfee amɛhe kuɛŋtilɔi ni amɛbooo miwiemɔi lɛ atoi.’”+